Фірма Samsung выробит менше смартфонӯв у рокови 2022, ги ся плановало

Корейськоє бізнес выданя Maeil Business News інформує нас за тото, ож фірма Samsung уменшит выробу смартфонӯв сього року из запланованых 310 міліонӯв до 280 міліонӯв. Ціфра не ож мала, исе ай так читава груда девайсӯв, но видко ож реалный прогноз продавань у компанії занизив ся выд спередущої цїлї. Раз видит ся ож исе годен быти ґлобалный тренд, кой выробникы технікы ладят ся ид ослабліньови економікы у світови, тай байлувут не выробляти тот дараб смартфонӯв, котрый нїкому буде продасти.

Применшені цїлї на выробу докынут ся ушыткых цїновых сеґментӯв, значит буде выроблено як менше предорогых «флаґманӯв», тай и май мало дешевых телефонӯв. Раз ся може видїти ож урїзати выробу дешевого сеґмента ото контр-продуктівно про саму фірму, ба ци не было бы лїпше зкофкусовати ся на май туньых варіантах, кидь люди скорше будут на них позирати, выбиравучи новый смартфон в умовах послабленої економікы? Но туй ся скорше позерат на ситуацію, кой алтернатівов є не куповати телефон домак. Чилядь, котра є потенційными куповачами сякых телефонӯв, скорше выберут не брати си новый девайс, а перечекати, хыба уже будут онь мусїти си дашто купити по другым причинам. Тай чилядь, што має май лїпшый, май дорогый смартфон, тоже гоже ся годна дорадити просто походити из ним щи гӯд-два.

Такый ґлобалный тренд будут чути на собі ай другі компанії, не лиш Samsung. Тото резултат комбінації факторӯв, помежи котрыма майчитавый ефект мали ґлобална пандемія, война Росії против Украйины, тай інфлація. Варта спомнити ож Samsung, наєдно из многыма другыми фірмами, дорадили ся придержати доставку свойих продуктӯв у Росію. Фірма Apple тоже голосила ож ладят ся ид доста «мертвому» сезонови сись гӯд, но планувут выробити тӯлко же смартфонӯв, кӯлко у рокови 2021.

Жерело: The Verge

Читайте нас на Twitter, Telegram тай Instagram