Шунчаки кузатдик
Шунчаки кузатдик...
Ҳозир бутун дунёда ваҳима кучайган: COVID-19!!! Бу бало бизнинг юртимизни ҳам четлаб ўтмади. Кириб келганига 1 ойдан ошди. Aммо, шу қисқа вақт ичида асл юзимиз кўриниб қолди, ниқоблар тақилди, лекин, иккинчи томондан қайсидир маънода ҳақиқий юз очилди.
Карантин эълон қилингач, нафсимиз қутқу солди: маркетларни, бозорларни талон-тарож қилдик. Шунча огоҳлантиришларга қулоқ солмай 10 йиллик(лар)ни ғамладик. Биринчи навбатда қорин ғамини ўйладик-да, ўзимизча. Кимдир ўлим тўшагида ётибди, лекин бизга фарқи йўқ эди. Чунки, биз аллақачон нафсимизнинг қулига айланиб улгурганмиз. Ҳар не бўлганда ҳам буни яхшиликка йўйдик, аммо баъзи биз "ишбилармонлар" учун ўзимиз қулай имкониятларни очиб бердик. Нархлар "отни калласидек" баландлади. Aслида "ишбилармонлар"да ҳам айб йўқ. Шунчаки улар бизнинг узоқни кўра олмаслигимиздан фойдаланишди холос. Китобларда ўқиганмиз, уруш вақтида керак бўлса 1 майизни 40 киши бўлиб еган. Бу шунчаки гапдир, лекин шундай катта урушда албатта ниманидир инсонлар бир-бири билан баҳам кўргани аниқ! Наҳотки, шу одамлар ҳам бизга ўхшаган бўлса? деб ўйланасан киши. Бугунги авлодларни кўриб, аждодлар учун нафс эмас, оқибат муҳимлигига ишонгинг келмайди.
Шу вақтгача "мен" деб яшаган одамзот яна шу одатини ташламади, хулоса қилмади. Вирус ҳам авж олди. Мана энди ҳам "мен" деб кўрингчи? Ўйлаяпсизми сиз кимнингдир ҳаётига жавобгар бўлиб қолаяпсиз, сизнинг ҳаётингизга эса бошқаси жавобгар бўлиб қолаяпти. Хўш ҳалиям "мен" дейишда давом этмоқдамисиз?
Ўша "отни калласидек" нархга ҳоҳлаган нарсангизни олишга қурбингиз етар, аммо сиз ва сиз кабиларни шарофати билан баландлаган нархларга 4 болали рўзғорини тебратаётган қўшнингиз Нормат керакли нарсаларни харид қилолмай, юраги сиқилиб ўтирибди. Буни бир ўйладингизми? Пиёзни эзиб, нон билан болаларимга едирай, ҳарнада, деса: нон йўқ, пиёз ҳам охирлаб қолган. Буёқда сиз "виждонли" эса, кекириб ётибсиз: димламами, қозонкабобми?
Хулоса ўзимиздан, ахир бизни бир гапни ўн айтгани билан ўзимиз қарор қилмагунимизча, то хато қилиб англамагунимизча ўша йўлимиздан қайтариш қийин! Шундай экан, "мен" дан чекиниб, сал атрофга назар солайлик, холис хулосага келайлик. Ҳеч йўғи шу синовли кунларда асл "юз"имизни очмайлик! Aхир биз инсонмиз, инсон-яратилган мавжудодларнинг гултожи дейилмаганми? Онгли эканмиз, берилган онгни эзгу фикрларга ва амалларга сарфлайлик! Одам бўлайлик, омон бўлайлик!!!
Ушбу пост Саида Мирзаабдуллаева ( @ana_shunaqa_gaplar)
ҳамда ҒС(A) (@ManaUyat) ҳамкорлигида ёзилди.