ЯНГИ УСУЛ ҒЎЗА ПАРВАРИШИДА ҚЎЛ КЕЛМОҚДА
Сирдарёлик деҳқонлар жорий йилда 72 минг гектардан ошиқ майдонда пахта етиштиришни режа қилишган. Гарчи об-ҳаво ноқулай келиб, ёғингарчилик кўп бўлаётган бўлса-да, фермерлар қулай фурсатдан унумли фойдаланиб, ерга чигит қадамоқда.
Дастлаб чигит экилган 20 минг гектардан зиёд майдонларда айни кунларда бир текис кўчат олишга эришилди. Кудан-кунга ривожланиб, бўй чўзаётган ғўза ниҳолларига агротехник ишлов бериш бошлаб юборилди. Вилоятнинг чекка ҳудуди бўлган Сардоба туманида ҳам 3 минг гектардан кўпроқ майдонга экилган чигит тупроқ ёриб, бўй кўрсатди. Ёш ғўза ниҳоллари қаторлари эҳтиёткорлик билан культивация қилинаётир. Чигит экишда янги усулнинг қўлланилганлиги майдонларда кўп кўчат ўстирилишини таъминлаш билан бирга культивация даврида бегона ўтларнинг илдизи билан барвақт йўқотилишида ҳам муҳим омил бўлмоқда. Айни вақтда туман далаларида 57 та культиватор агрегатларидан гуруҳ усулида юқори суръатда фойдаланилмоқда.
Сирдарё туманида ҳам чигит экиш мавсумига пухта тайёргарлик кўрилди. Бу эса, кўкламги экиш ишларини тез ва соз тугаллаш имконини бераётир. Далаларда мавжуд техникалар қувватидан самарали фойдаланилаётир. Туманнинг “Малик”, “Ҳамза”, “Синдоробод”, ва “Сирдарё” сув истеъмолчилари уюшмаларида бир текис униб чиққан ниҳолларни парваришлаш ишлари уюшқоқлик билан бошлаб юборилди. Шу билан бирга ёмғирли об-ҳаво чоғида намлик даражаси юқори, сув ортиқча кўллаган майдонларда сувни қочириш чоралари кўрилмоқда.
– Кўкламнинг серёғин келганлиги экиш-тикиш ишларини бирмунча кечиктирди, – дейди “Сирдарё агросервис МТП” масъулияти чекланган жамияти раҳбари Бахтиёр Рисбеков. – Шу сабабли об-ҳаво очиқ кунлари экиш техникалари кучидан юқори қувватда фойдаландик. Натижада уруғни қулай муддатларда ерга қадаб, текис ундириб олиш чораларини кўряпмиз.
Вилоятда экиш жараёнларини кузатар эканмиз тўлиқ кўчат ҳосил қилинган майдонларда биринчи культивация сифатли ва ўз вақтида амалга оширилаётганига гувоҳ бўлдик. Йил сўнггида баракали ҳосил кўтариш деҳқоннинг меҳнати, бой тажрибаси ва ғайратига боғлиқ, албатта.
Бозорбой БЕКМУРОДОВ,
“Qishloq hayoti” мухбири.