March 30, 2019

МЕССИ: ЎҒЛИМ МЕНДАН НИМА УЧУН МЕНИ ЎЛДИРИШНИ ХОҲЛАШАЁТГАНИНИ СЎРАДИ

  • Аргентина терма жамоаси ва “Барселона” клуби сардори Лионель Месси ижтимоий тармоқда унга нисбатан қилинаётган танқидлар, таҳдидлар ва ёзилаётган ёлғонларни тўхтатишларини сўради.

Аргентиналик футболчи Club Octubre 94.7 FM радиосига берган интервьюсида ўзи учун ўтган ҳафта қийин ўтгани ва унга ўлим билан таҳдид қилишгани, ҳатто ўғли ҳам оммавий ахборот воситаларидаги салбий изоҳлардан хабардор эканлигини айтиб ўтган, деб ёзмоқда Goal нашри.

“Бу жуда оғир, ўғлим доим YouTubeда видео томоша қилади, – деди у. – Тиаго мендан Аргентинада нима учун мени ўлдиришни хоҳлашаётганини сўради.

Лекин менга фаолиятимни терма жамоада давом эттириш ёқади. Миллий терма жамоа билан бирга ғалаба қозонишни истайман. Барча муҳим ўйинларда ўйнашга тайёрман. Биз аллақачон Жаҳон кубоги финалида ўйнаганмиз ва бу осон иш эмас”, – дейди Месси.

У Аргентина терма жамоаси мураббийлар штабини ўзгартирилишида қўли борлиги ҳақидаги хабарларни инкор этиб:

“Мен ҳақимда айтган барча ёлғонларини ҳақиқатга айлантирмоқчи эмасман.

Ҳеч қачон миллий терма жамоа мураббийлари ҳақида қарор қабул қилмаганман. Аммо бундай ёмон хабарларни эшитмоқдаман. Бу мен учун жуда қийин жараён.

Агар Бразилияда бўлиб ўтган жаҳон чемпионатида ғолиб чиққан бўлганимизда, ҳозир бундай воқеалар гувоҳи бўлмаган бўлардик. Биз жуда кичик деталлар эвазига мағлуб бўлдик. Ва буни матбуотда турлича талқин қилишди. Менимча, матбуот бошқачароқ тарзда иш тутиши керак эди”, – деди футболчи.

Месси, шунингдек, “Albiceleste” мураббийи Лионель Скалонининг терма жамоани Copa America турнири учун қай даражада тайёрлаётгани ва жамоа ғалаба қозониш учун мураббий кўпроқ тажрибага муҳтож эканлиги ҳақида ҳам тўхталиб ўтди.

“Футболчилар билиши керакки, олдимизда еттита ёки саккизта ўйин бор холос ва буни яхши тушунган ҳолда сабр-тоқатли бўлишимиз керак”, – дейди аргентиналик форвард.

Эслатиб ўтамиз, Месси Аргентина термасининг Венесуэлага қарши кечган ўйинида жароҳат олган эди.

Ҳужумчи ушбу жароҳатдан тезда соғайиб, машғулотларда иштирок этаётганлиги ҳамда Ла Лига доирасида “Эспаньол”га қарши Каталония дербисида майдонга тушиши ҳақида маълумот берилди.

Яқинларингизга ҳам улашинг!

@tadbirkoruyjoy

https://t.me/joinchat/AAAAAE0Gs3_2byOCU_eVaA