Xalilov Adham

Энг асосий мақсад - йўловчилар хавфсизлигини таъминлаш

2019-05-10T14:19:50.768Z

Президентимиз Чилонзор туманидаги “Тошкент” автовокзалида бўлиб, бу ерда амалга оширилган ишлар ва йўловчилар учун яратилган қулайликлар билан танишди.

Бугунги кунда мамлакатимизда аҳолига кўрсатилаётган автотранспорт хизматлари сифатини яхшилаш, чекка қишлоқ ва туманларни вилоят марказлари билан боғлашда жамоат транспорти қатновини йўлга қўйишга алоҳида эътибор қаратилмоқда. Давлатимиз раҳбарининг 2017 йил 10 январдаги “Аҳолига транспорт хизмати кўрсатиш ҳамда шаҳарлар ва қишлоқларда автобусларда йўловчилар ташиш тизимини янада такомиллаштириш чора-тадбирлари тўғрисида” қарори ва бошқа ҳуқуқий ҳужжатларда белгиланган вазифалар ижроси босқичма-босқич амалга оширилмоқда.

Жумладан, бундан 40 йил аввал бунёд этилган ва ташландиқ ҳолга келиб қолган “Тошкент” автовокзалини замонавий қиёфага келтириш, бу ердаги шароитларни яхшилаш, йўловчилар ва мамлакатимизга келаётган сайёҳлар учун қулайликлар яратиш, маҳаллий ва халқаро йўналишларда қатновларни тизимли йўлга қўйиш мақсадида кенг кўламли реконструкция ишлари амалга оширилди.

Айни пайтда “Тошкент” автовокзалида бир вақтнинг ўзида 2 минг 200 йўловчига хизмат кўрсатиш имкони яратилган. Вокзал сўнгги русумдаги технологиялар билан жиҳозланган. Бу ерда замонавий VIP-зал, она ва бола, тиббиёт хоналари, аёллар ва эркаклар учун алоҳида намозхона, меҳмонхона, ҳайдовчилар учун дам олиш хонаси, диспетчерлик хизмати, чиптахона, дўконлар, кафе-бар ташкил этилган. Бундан ташқари имконияти чекланган фуқароларнинг автовокзал ҳудудида эмин-эркин ҳаракат қилиши учун ҳам шароитлар яратилган. Иккита лифт, иккита эскалатор, махсус пандуслар шулар жумласидандир.

Ҳозирги кунда “Тошкент” автовокзалидан 12 та халқаро йўналиш бўйича хизмат кўрсатилмоқда. Кунига Қозоғистоннинг Чимкент шаҳрига 4 та, Туркистон шаҳрига 1 та, Қизил Ўрда шаҳрига 1 та, Олмаота шаҳрига 3 та, Ушкунур, Тароз, Еттисой ва пойтахт Нур-Султон шаҳарларига биттадан, Қирғизистон пойтахти Бишкек шаҳрига 2 та, Тожикистоннинг Хўжанд шаҳрига 1 та ҳамда Россия Федерациясининг Нижний Новгород шаҳрига ҳафтасига 3 та ва Татаристон пойтахти Қозон шаҳрига ҳафтасига 2 та тўғридан-тўғри рейслар бўлиб, кунига 15 дан ортиқ рейслар амалга оширилади. Автобуслар хизматидан 500-1000 тагача йўловчилар фойдаланади.

Қолаверса, нафақат пойтахт Тошкент, балки юртимизнинг бошқа ҳудудларидан ҳам халқаро қатновларнинг йўлга қўйилгани аҳолига янада қулайлик яратмоқда. Жумладан, “Чирчиқ-Ушкунур”, “Нукус-Ушкунур”, “Самарқанд-Панжакент”, “Самарқанд-Олмаота”, “Самарқанд-Туркистон”, “Термиз-Душанбе”, “Денов-Душанбе” йўналишларида бугунги кунда мунтазам қатновлар йўлга қўйилган.

Бундан ташқари “Тошкент-Самарқанд”, “Тошкент-Зарафшон”, “Тошкент-Каттақўрғон”, “Тошкент-Хатирчи”, “Тошкент-Мирбозор”, “Тошкент-Пахтаобод”, “Тошкент-Учқудуқ”, “Тошкент-Гагарин”, “Тошкент-Зомин”, “Тошкент-Янгиер”, “Тошкент-Термиз”, “Тошкент-Денов”, “Тошкент-Бухоро”, “Тошкент-Қоракўл” йўналишлари бўйича кунига 10 дан ортиқ маҳаллий рейслар амалга оширилиб, автобуслар хизматидан кунига 400-500 тагача йўловчи фойдаланаётир. Узоқ масофали йўналишларга чипталар 10 кун илгари сотилиши йўлга қўйилган. Имтиёзли йўловчилар ҳужжатларини кўрсатган ҳолда йўловчи ташиш қоидаларига биноан ўз ҳуқуқларидан фойдаланади. Ҳозирда автовокзалда йўловчиларга юқори савияда хизмат кўрсатиш йўлга қўйилган бўлиб, ҳар бир автобус йўналишга чиқишидан аввал тўлиқ техник, ҳайдовчилар эса тиббий кўрикдан ўтказилади. Автобусларнинг санитар ҳолати ҳам доимо назорат остида. Шунингдек, автовокзалдан қатнайдиган автобуслардан фойдаланган йўловчилар юз бериши мумкин бўлган бахтсиз ҳодисалардан мажбурий суғурталанади, суғурта пули чипталар қийматига киритилган ва ўзаро ташувчилар билан тузилган шартномалар асосида тақсимланади.

Президентимизнинг 2018 йил 5 мартдаги “Ўзбекистон Республикаси фуқароларининг вақтинчалик меҳнат фаолиятини амалга ошириш учун республика ташқарисига транспортда чиқиш вақтида хавфсизлигини таъминлаш чора-тадбирлари тўғрисида”ги қарори ижроси юзасидан Ўзбекистон Республикаси транспорт вазирлиги томонидан хорижий давлатларга вақтинчалик ишлаш учун кетаётган фуқароларнинг ўз вақтида манзилларига хавфсиз етказиб қўйишни ташкил этиш мақсадида “Uzautotrans Service” МЧЖ автобусда ташувларни амалга оширишга ихтисослаштирилган миллий корхонаси ташкил этилди. Мазкур корхона паркини замонавий автобуслар билан таъминлаш борасида Хитой Халқ Республикасининг “Zhengzhou Yutong Bus Co. Ltd.” компанияси билан 2018 йилда имзоланган шартномага кўра, 168 та замонавий автобусни сотиб олиш бўйича келишувга эришилган эди.

Бугун кунда мазкур замонавий автобусларнинг барчаси олиб келинди. Ушбу автобусларда ҳайдовчи ва йўловчилар учун барча қулайликлар яратилган. Кондиционер, салондаги иқлим назорати, хавфсизлик тизимлари шулар жумласидандир. Автобус 53 нафар йўловчига мўлжалланган бўлиб, ўриндиқлар юмшоқ, ҳар бир йўловчига максимал даражада қулайлик яратилган. Агар зарурат бўлса, ўриндиқларни олд ва орқа томонга силжитиш ҳамда ён томонга ҳам созлаш мумкин. Ҳар бир йўловчи ўриндиғи устида ҳаво дефлектори ва индивидуал ёритиш лампалари мавжуд. Шунингдек, йўловчиларнинг қўл юкларни жойлаштириш учун салонинг юқори қисмида махсус жойлар ажратилган. Узоқ сафар давомида йўловчиларнинг зерикмаслиги учун автобус салони юқори классдаги медиа тизим ва иккита монитор билан жиҳозланган.

Шу ернинг ўзида давлатимиз раҳбарига мамлакатимизнинг транспорт ва логистика тизимидаги муаммолар ва уларни бартараф этиш механизмлари, мазкур тизимни қисқа ва узоқ муддатларда ривожлантириш, халқаро ва шаҳарлараро автобус йўналишлари, автовокзал ҳамда автостанцияларни тараққий эттириш режалари ҳақида маълумот берилди.

Давлатимиз раҳбари бу ерда яратилган шароит ва қулайликларни кўздан кечирди. Автобус ҳайдовчиларининг халқаро тажрибалар асосида малакасини ошириш, йўловчилар хавфсизлигини таъминлаш бўйича мутасаддиларга зарур топшириқлар берди.

3 та лицензия ҳамда 148 та лицензия варақаларининг амал қилиш муддатлари 10 иш кунига тўхтатилди

2019-05-03T06:54:36.172Z

Автомобиль транспортида йўловчилар ҳамда юкларни шаҳар, шаҳар атрофи ва шаҳарлараро ташиш фаолиятини лицензиялаш бўйича Хоразм вилоят комиссияси мажлисининг 2019 йил 29 апрелдаги № 37-сонли мажлис баёни қарорига асосан:

- Ўзбекистон Республикаси Вазирлар Маҳкамасининг 2018 йил 05-декабрдаги 994-сонли карорлари билан тасдиқланган Низомнинг 9-бандининг а), ж), кичик бандлари хамда Ўзбекистон Республикаси Вазирлар Маҳкамасининг 2003 йил 3-ноябрдаги 482-сонли карорларида кўрсатилган талаб ва шартларини бузганликлари автотранспорт корхоналарига тегишли қуйидаги “Йуловчиларни шаҳар атрофида енгил автомобилларда ташиш”, “Йуловчиларни шаҳар атрофида микроавтобусларда ташиш” фаолиятлари учун берилган 3 та лицензия ҳамда 148 та лицензия варақаларининг амал қилиш муддатлари 2019 йил 02 май кунидан бошлаб 10 иш кунигача муддатга тўхтатиш тўғрисида комиссия қарор қабул қилади;

1.1 Қуйидаги “Йўловчиларни шаҳар атрофида енгил автомобилларда ташиш” ва “Йўловчиларни шаҳар атрофида микроавтобусларда ташиш” фаолиятларини амалга ошириш учун автотранспорт воситаларига берилган жами 148 та лицензия варақалари 2019 йил 02 май кунидан бошлаб 10 иш куни муддатгача тўхтатилди.

1.2 Ўзбекистон Республикаси «Фаолиятнинг айрим турларини лицензиялаш тўғрисида»ги қонунининг 22-моддасига асосан хамда Вазирлар Маҳкамасининг 2018 йил 05-декабрдаги 994-сонли қарорлари билан тасдикланган Низомнинг 9-бандининг а) ва ж) кичик бандларини такроран ва қўпол равишда бузганлиги учун Урганч шахридаги “Хоразм Алфа Транс” МЧЖга “Йўловчиларни шаҳар атрофида енгил автомобилларда ташиш” фаолиятини амалга ошириш учун берилган АТ №0035957 серияли амал қилиш муддати 18.09.2015 йилдан 17.09.2020 йилгача бўлган, Хива шахридаги “Хорезм Караван Туризм” МЧЖга берилган “Йўловчиларни шаҳар атрофида енгил автомобилларда ташиш” фаолиятини амалга ошириш АТ №0049934 серияли 21.11.2018 йилда берилган, Хива шахридаги “Хива Жахонгир Мирзо” МЧЖга “Йўловчиларни шаҳар атрофида енгил автомобилларда ташиш” фаолиятини амалга ошириш учун берилган АТ №0043601 серияли амал қилиш муддати 03.10.2017 йилдан 02.10.2022 йилгача бўлган лицензияларнинг амал қилиш муддатлари 2019 йил 02 май кунидан бошлаб 10 иш куни муддатгача тўхтатилди.

Асос: Автомобиль транспортида йўловчилар ҳамда юкларни шаҳарда, шаҳар атрофида ва шаҳарлараро ташиш фаолиятини лицензиялаш бўйича Хоразм вилоят транспорт бошқармаси комиссиясининг 2019 йил 29 апрелдаги № 37-сонли мажлис йиғилиш қарори.

Ўзбекистон Республикаси Транспорт вазирлиги Матбуот хизмати

Зоминда янги автовокзал фойдаланишга топширилди

2019-05-03T06:22:30.129Z

Автотранспорт соҳасида кўрсатилаётган хизматлар сифатини ошириш, мамлакатимизнинг чекка ҳудудларидаги аҳолига қулай шароитларни яратиш борасида Транспорт вазирлиги томонидан қатор ишлар амалга оширилмоқда. Жумладан, Жиззах вилояти Зомин туманида янги автовокзал биноси фойдаланишга топширилди. 1,7 гектар майдондаги автошоҳбекат иншоотларини барпо этишда 6 миллиард 300 миллион сўмлик қурилиш ишлари амалга оширилди. Мазкур янги иншоот замонавий талабларга жавоб беради. Бу ерда йўловчилар учун барча қулайликлар яратилган. Кенг ва ёруғ кутиш зали, она ва бола хонаси, болалар майдончаси, тиббиёт хонаси, электрон табло, шунингдек, имконияти чекланган фуқароларнинг ҳудуд бўйлаб эмин- эркин ҳаракатланиши учун барча имкониятлар яратилди.

Бу ерда аввал мавжуд бўлган бино бир неча йиллар давомида мутлақо қаровсиз ташлаб қўйилгани туфайли ташландиқ ҳолга келиб қолганди. Бу эса ўз навбатида аҳолининг ҳақли эътирозига сабаб бўлиб, аҳоли кайфияти ва ҳудуд кўркига салбий таъсир этаётганди.

Янги мажмуа таркибида автобус, микроавтобус ва йўналишсиз таксилар учун алоҳида кутиш майдонлари барпо этилган. Автотранспортларни техник кўрикдан ўтказувчи механик хизмати йўлга қўйилган. Ҳозиргача туман марказидан йўловчиларга Зомин – Жиззах, Зомин – Даштобод, Зомин – Дуоба, Зомин – Култепа, Зомин – Зарбдор йўналишларида автобус ва микроавтобуслар хизмат кўрсатаётган эди. Янги автошоҳбекат ишга тушиши билан Зомин – Тошкент йўналишида автобус қатнови йўлга қўйилди. Бу 153,5 минг киши истиқомат қилувчи Зомин тумани аҳолиси учун ўзига ҳос туҳфа бўлди.

Мазкур мажмуанинг фойдаланишга топширилиши вилоятда автотранспорт соҳасида кўрсатилаётган хизматлар сифатини янги босқичга кўтарилишига бу орқали эса ҳудуд иқтисодиётиниг янада юксалишига муносиб ҳисса қўшади.

Ўзбекистон Республикаси Транспорт вазирлиги Ахборот хизмати

«Тошкент-Жакарта-Тошкент» йўналишидаги илк самолёт парвози амалга оширилди

2019-05-02T12:02:08.056Z

Президент Шавкат Мирзиёевнинг 2019 йил 29-30 март кунлари Бухоро вилоятига ташрифи давомида Ўзбекистон-Индонезия ўртасида тўғридан-тўғри авиақатновларни йўлга қўйишга доир белгиланган вазифанинг ижросини таъминлаш мақсадида Ўзбекистон Республикаси Туризмни ривожлантириш давлат қўмитаси, Транспорт вазирлиги, «Ўзбекистон ҳаво йўллари» МАК томонидан ҳамкорликда бу борадаги тизимли ишлар амалга оширилди.

Бугун, 2 май куни Ислом Каримов номидаги Тошкент халқаро аэропортидан «Тошкент-Жакарта-Тошкент» йўналишидаги илк самолёт парвози амалга оширилди. Жакартанинг «Сукарно-Хатта» халқаро аэропортида Тошкентдан илк парвозни амалга оширган йўловчиларни тантанали кутиб олиш маросими бўлиб ўтди. Индонезия ва Ўзбекистон ўртасидаги мунтазам авиақатновлар ҳафтада икки маротаба чоршанба ва жума кунлари амалга оширилади.

Шунингдек, бугун Жакарта шаҳрида икки мамлакат расмий доира вакиллари, жумладан Ўзбекистон Республикаси Туризмни ривожлантириш давлат қўмитаси, Транспорт вазирлиги, икки мамлакат туристик компаниялари, маҳаллий ва хорижий оммавий ахборот воситалари вакиллари иштирокида туризм форуми ташкил этилди.

Ўзбекистон Республикаси Транспорт вазирлиги Ахборот хизмати

“Хатирчи-Тошкент” йўналишида янги ва замонавий автобуслар хизмат кўрсатади

2019-05-02T10:03:28.131Z

Навоий вилоятида Ўзбекистон Республикаси Президентининг 2017 йил

10 январдаги ПҚ-2724-сонли “Аҳолига транспорт хизмати кўрсатиш ҳамда шаҳарлар ва қишлоқларда автобусларда йўловчилар ташиш тизимини янада такомиллаштириш чора-тадбирлари тўғрисида”ги қарори ижросини бажарилиши юзасидан бир қатор ишлар амалга оширилмоқда.

Хусусан, Хатирчи туманида фаолият кўрсатиб келаётган “Ҳунарманд” кичик корхонаси ўз маблағлари ҳисобидан 2 дона Хитой давлатида ишлаб чиқарилган замонавий “YOUTONG” русумли юмшоқ ўриндиқли автобус сотиб олди.

— “Ушбу автобуслар ўзининг ташқи кўриниши, автобус салонининг шинамлиги, ўриндиқлар ҳолатини турли ўлчамлар бўйича ўзгартириш мумкинлиги ва жаҳон стандартларига тўлиқ жавоб бериши билан йўловчиларга қулайликлар яратади” – дейди, корхона раҳбари Б. Ойдинов.

Унинг сўзларига кўра, ушбу автобусларда вилоятнинг олис ҳудуди Хатирчи тумани билан Тошкент шаҳрига сифатли ва хавфсиз транспорт хизматлари кўрсатилиши кўзда тутилган.

Маълумот учун “Ҳунарманд” кичик корхонаси 2018 йилда ҳам худди шундай автобуслардан 4 дона олган бўлиб, ҳозирги кунда корхона балансидаги жами 6 та автобуслар бир катор йўналишларда йўловчиларга автотранспорт хизматини сифатли тарзда кўрсатиб келмоқда.

Ўзбекистон Республикаси Транспорт вазирлиги Ахборот хизмати

Йўл транспорт ходисасини олдини олайлик

2019-05-02T09:53:41.717Z

2019 йил 29 апрель куни соат 02.20ларда келган хабарга кўра, шу куни соат 01.35ларда Нурафшон шаҳар ҳудудидан ўтган 4Р 20 “Қорсув-Бўка-Бекобод” автомобиль йўлининг 6-км.да, “Бекобод-Тошкент” йўналиши бўйлаб ҳаракатланаётган “БК Интранс” хусусий корхонасига тегишли “Мерседес-Бенц” русумли, давлат рақами 01 366 СВА бўлган автобусининг ЙТҲга учраб, автобусда ёнғин содир бўлгани юзасидан, Ўзбекистон Республикаси транспорт вазирлиги Тошкент вилояти транспорт бошқармаси бошлиқ ўринбосари Р.Бегматов, Тошкент вилояти ИИБ ЙҲХБ техник назорат бўлими бошлиғи С.Назирханов Тошкент вилояти халқ таълими Ш.Бурхонов раислигида 15 та туман 7 та шаҳар халқ таълими мудирлари иштирокида Тошкент вилояти Халқ таълими бошқармасида йиғилиш ўтказилди.

Йиғилишда, ҳайдовчилар ва аҳоли ўртасида ЙТХларни келиб чиқиш сабаблари, салбий оқибатлари, уларни бартараф этиш ва олдини олиш юзасидан бир қанча масалалар кўрилиб, юқорида айтиб ўтилган ЙТХ бўйича тегишли хулосалар чиқарилди. Йиғилишда қатнашган иштирокчилар томонидан берилаган саволларга, мутасадди ташкилот ходимлари томонидан етарлича маълумот ва жавоблар берилди.

Ўзбекистон Ресбупликаси Транспорт вазирлиги Ахборот хизмати

Халқаро йўналишларда автобус қатновлари сони ортмоқда

2019-05-02T09:33:20.553Z

“Uzavtotrans Service” МЧЖ 2 майдан эътиборан Қозоғистонинг 4 та шаҳрига мунтазам қатновларни амалга оширишни бошлади. “Тошкент-Туркистон”, “Тошкент-Олмаота”, “Тошкент- Ушкунур”, “Чирчиқ-Ушкунур” йўналишлари шулар жумласидандир. Қатновлар барча қулайликларга эга замонавий YUTONG автобусларида амалга оширилади. Чипталарни Тошкент автовокзали кассаларидан ҳарид қилиш мумукин.

“Тошкент-Туркистон” йўналиши чипта нархи 50 000 сўм, “Тошкент- Олмаота” йўналиши чипта нархи 101 000 сўм, “Тошкент-Ушкунур” йўналиши чипта нархи 101 000 сўм, “Чирчиқ- Ушкунур” йўналиши чипта нархи 90 000 сўм.

Шунингдек, корхона томонидан яқин орада “Тошкент – Нур-Султон (Қозоғистон)”, “Тошкент – Тараз (Қозоғистон)”, “Тошкент – Қизилўрда (Қозоғистон)”, “Самарқанд – Туркистон (Қозоғистон)”, “Самарқанд – Душанбе (Тожикистон)”, “Тошкент – Қозон (Россия Федерацияси)”, “Тошкент – Уфа (Россия Федерацияси)”, “Тошкент – Омск (Россия Федерацияси)”, “Тошкент – Петропавловск (Россия Федерацияси)” йўналишларида ҳам мунтазам қатновларни йўлга қўйиш режалаштирилган.

Келажакда Хитой халқ Республикаси, Туркманистон, Россия Федерацияси ҳамда Қирғизистон Республикаларининг шаҳарларига Ўзбекистоннинг турли вилоятларидан йўналишлар очиш режалаштирилган.

Ўзбекистон Республикаси Транспорт вазирлиги Ахборот хизмати

Тошкент шаҳридан вилоятларга мунтазам автобус қатновлари йўлга қўйилди

2019-05-01T13:41:16.148Z

Мамлакатимиз аҳолисига кўрсатилаётган автотранспорт хизматалари сифатини ошириш, ресбуликамизнинг барча ҳудудларини автобус қатновлари билан қамраб олиш, бу орқали эса йўловчиларга муносиб шароитларни яратиш мақсадида Ўзбекистон Республикаси Транспорт вазирлиги томонидан қатор ишлар амалга оширилмоқда.

Жумладан, 1 майдан эътиборан “Uzavtotrans Service” МЧЖ корхонаси маҳаллий 8 та йўналишда мунтазам автобус қатновларини йўлга қўйди. Булар: “Тошкент – Гулистон – Янгиер”, “Тошкент – Самарқанд”, “Тошкент - Навоий – Бухоро”, “Тошкент – Термиз”, “Тошкент – Зомин”, “Тошкент – Гагарин”, “Тошкент – Денов”, “Тошкент – Қоракўл”. Қатновлар ҳар куни “Тошкент” автовокзалидан амалга оширилади. Йўналишларга замонавий “YUTONG” автобуслари қўйилган бўлиб, автобуслар кондиционер, иқлим назорати, мультимедиа тизими билан жихозланган. Корхона томонидан хавфсизлик масалаларига алоҳида эътибор қаратилган. Хусусан, йўналишга чиқаётган ҳар бир автобус техник кўрикдан, ҳайдовчилар эса тиббий кўрикдан ўтказилади, автобусларнинг санитар ҳолати мунтазам назорат остида. Қатнов жараёни эса GPS тизими орқали онлайн назорат этиб борилади.

2 май кунидан эътиборан эса “Uzavtotrans Service” МЧЖ корхонаси “Тошкент – Туркистон”, “Тошкент- Олмаота”, “Тошкент- Ушкунур”, “Чирчиқ- Ушкунур” йўналишларида халқаро қатновларни амалга оширишни бошлайди.

“Uzavtotrans Service” МЧЖ корхонаси Ўзбекистон Республикаси Президентининг 2018 йил 5 мартдаги “Ўзбекистон Республикаси фуқароларининг вақтинчалик меҳнат фаолиятини амалга ошириш учун республика ташқарисига транспортда чиқиш вақтида хавфсизлигини таъминлаш чора-тадбирлари тўғрисида” ги ПҚ-3584-сонли қарори ҳамда 2018 йил 6 мартдаги “Автомобиль транспортини бошқариш тизимини янада такомиллаштириш чора-тадбирлар тўғрисида”ги ПҚ-3589-сонли қарорлари ижросини таъминлаш мақсадида ташкил этилган. Ҳозирда корхона паркига Хитой халқ Республикасида ишлаб чиқарилган 100 дона юмшоқ ўринли “YUTONG” автобуслари сотиб олинди.

Ушбу автобусларда барча замонавий қулайликлар мавжуд бўлиб, улардан фойдаланишда мамлакатимизнинг ички, ташқи туризимини ривожлантириш ҳамда хорижий давлатларга ишлаш учун борувчи юртдошларимиз ва юртимизга ташриф буюрувчи меҳмонларга қулайлик яратиш ва уларни ўз манзилларига хавфсиз етказиб қўйишни таъминлаш мақсад килинган.

Ўзбекистон Республикаси Транспорт вазирлиги матбуот хизмати

Бекободдан “Ғалаба”гача

2019-04-30T08:35:14.602Z

Ўзбекистон Республикаси Транспорт вазирлиги Тошкент вилояти транспорт бошқармаси ташаббуси билан Бекобод шаҳридаги “Сифат дармон ситора транс” МЧЖ томонидан чекка ҳудудларни туман маркази билан боғловчи ВХ-638-сонли “Бекобод-Ғалаба” шаҳар атрофи йўналишли такси йўналишида йўловчиларга транспорт хизмати кўрсатиш йўлга қўйилди.

Ушбу йўналишга 28 та “ДАМАС” русумли автомобиллар бириктирилиб, улар шаҳардан 38 км. олисда жойлашган “Ғалаба” фермерлар уюшмаси ҳудудини Бекобод шаҳри билан боғлайди.

Мазкур йўналиш бўйича хизмат кўрсатадиган автомобиллар ҳар куни техник кўрикдан, ҳайдовчилар эса тиббий кўрикдан ўтганларидан сўнг, йўл варақаси берилиб, йўналишда ишлашга рухсат берилади. Ҳозирча фақат “ДАМАС” русумли автомобиллар қатнови йўлга қўйилмоқда. Йўналишда қатновлар соат 07-00 да бошланиб, соат 19-00 гача амалга оширилади.

Ўзбекистон Республикаси Транспорт вазирлиги Ахборот хизмати

Тадбиркорлар билан учрашув: муаммо ва ечим

2019-04-29T10:06:27.223Z

“Ўзбекистон темир йўллари” АЖ биносида Ўзбекистон Республикаси Транспорт вазири ўринбосари Д.Дехканов раислигида “Транспорт ва логистика тизимидаги мавжуд муаммолар ҳамда уларни бартараф этиш масалалари”га бағишланган очиқ мулоқот бўлиб ўтди. Тадбирда 100 дан ортиқ транспорт соҳасида фаолият юритаётган тадбиркорлар ва давлат ва хўжалик бошқаруви органларининг вакиллари иштирок этишди.

Очиқ мулоқот асосан автомобиль, темир йўл ва авиация транспорти, логистика ҳамда йўл хўжалиги тизимидаги тадбиркорларни қийнаётган мавжуд муаммолар ва уларнинг ечими юзасидан кўриладиган чоралар тўғрисида бўлиб, тадбиркорлар танқидий ва таҳлилий фикрларини билдириб ўтишди. Жумладан, “Ўрта Осиё Транс” ОАЖ вакили ҳозирги кунда Ўзбекистон – Қирғизистон чегарасида жойлашган “Дўстлик” божхона постида узлуксиз тирбандликлар юзага келаётганлиги ва бунинг оқибатида юк автомобиллари божхона постида 2-3 кунлаб қолиб кетаётганлигини таъкидлаб ўтди.

Шунингдек, тадбиркорлар хорижий юк ташувчи ҳайдовчилар юртимизда узоқ вақт бўлиши, уларнинг юк излаши учун шарт-шароит яратилаётгани оқибатида саботаж ташувлари ҳам амалга оширилаётганлиги ички юк ташувчилар фаолиятига таъсир кўрсатаётганлигини таъкидлашди.

Бундан ташқари йўловчи ташиш хизмати билан шуғулланаётган транспорт корхоналарининг асосий муаммоси янги харид қилинаётган автобуслар нархининг қимматлиги, банк кредити фоиз ставкаларининг жуда юқорилиги, банк кредити учун гаровга қўйилаётган мол- мулкнинг баҳолаш қийматининг фақатгина 60 фоизи гаровга қабул қилаётгани билан боғлиқ эканлиги ойдинлашди.

Очиқ мулоқот давомида тадбиркорлар томонидан кўтарилган муаммоли масалалар юзасидан вазирлик ва идораларнинг масъул ходимлари тегишли жавобларни бердилар.

Тадбиркорларнинг ечим топмаган муаммолари ва таклифларини етказиш мақсадида махсус анкеталар тарқатилиб, тадбир сўнгида йиғиб умумлаштирилди ҳамда ушбу муаммолар бўйича тегишли вазирлик ва идоралар билан биргаликда ўрганиб чиқиб, тегишли чоралар кўрилиши белгилаб олинди.

Ўзбекистон Республикаси Транспорт вазирлиги Ахборот хизмати