@aluaa

Айт құтты болсын!

2020-05-23T04:56:01.172Z

Бүгін балалар Ораза айтқа сыйлық дайындауға кірісіп кеткен. Әли ата-анасына сыйлайтын ашық хатын дайындап әбден әлектенді. Бір сурет салады, ұнамайды, екінішісін салады, ұнамайды, өшіремін деп қағазы да мыжылып қала берді. Әйтеуір сабырмен соңына дейін жетіп, қайта салып, әп-әдемі ашық хаттарын бітірді. Омар өзінің жинап жүрген ақшасына анасына орамал, әкесіне тәспі алды. Раяна анасы ерекше гүл жақсы көретінін білетін, сондықтан солып қалмай ұзақ тұруы үшін қолынан анасына гүл жасады. Ал әкесі блокноттарды өте ұзақ әрі өзімен бірге әрқашан да алып жүретіндіктен блокнотының сырты тез ескіріп кететін. Соны Раяна байқап өзі еңбек сабағынан жасап жүрген, киіз сияқты матадан әкесіне қап жасады..Өте әдемі болып шықты.

Әли ұйқысынан тұрса Айт күні таңертең аналары өте керемет таңғы ас жасап қойыпты. Дастархан да көздің жауын алып жайнап тұр. Айттың дастарханын аналары ерекше етіп жасайтын. Мешіттен әкелері мен Омар айт намазын оқып келіп те қойыпты. Дастарханның қасында гүл, түрлі түсті жылтыр қағазбен оралған сыйлықтар Әлидің тағатын таусып, әрі ерекше қуаныш сыйлады. Раяна да ұйқысынан тұрып, анасының ыстық бауырсақтарының иісіне бөлмесінен “мммм, анашымның бауырсақтары” деп анасын құшақтай алды. “Мен тез жуынып келе қояйын” деп секіріп билеп жуынатын бөлмеге кетті.

Үйдегілердің көңіл күйлері ерекше көтеріңкі болды. Алла тағалаға осы күнге жеткізгеніне шүкір айтты. Дастарханға отырып, тамақтарын “Бисмиллахпен” бастап, сүйсіне жеді. Аяқтағанда Әли өзінің дұғасын тақылдап тағы да айтып берді. “Бәрекелді” деп, әкелері “Балаларым, Анасы, сендердің барлықтарыңды Айт мерекесімен құттықтаймын. Алла біздің иманымызды, берекемізді, ынтымағымызды, сүйіспеншілігімізді, қасиетімізді арттыра берсін. Әлемдегі барлық мұсылмандарға осы мерекеде жүректеріне ерекше қуаныш пен тыныштық сыйла, Я, Аллам. Рамазанды шығарып салдық. Иншалла, молынан сауаптарымызды алдық. Балаларым сендер осы оразаны ұстадыңдар, тіпті, Раяна сен соңғы апта бізбен бірге ұстап жарадың. Алтындарым менің, мына сыйлықтар сендерге! Айтымыз мүбәрак болсын!”, деп балаларға әдемі қораптарды үлестірді. Балалар мәз мейрам болып, өздерінің қағаздарын ашып, алған сыйлықтарына қуанып жатты. Әлиге өзі қалап жүрген екі аяқты велосипед, Раянаға әдемі аяқ киім, Омарға “Сахабалар” сериялық кітаптар - үшеуі де қуанышарын жасыра алмай секіріп кетті.

Ендігі кезек балаларға келді. Балалар өздерінің сыйлықтарын ата-анасына үлестіріп, “алғыстарын” айтты. Омар да, Раяна да, Әли де тек әкелері мен аналарына емес, бір-бірлеріне де сыйлық жасапты. Омар Раянаға блокнот, Әлиге түрлі түсті фломастерлер берсе, Раяна Омарға өзі қолдан жасаған кітаптың арасына қоятын бөлгіш, Әлиге қағаздан жасаған үлкен ұшақ сыйлады. Әли екі бауырына да ашық хаттар сыйлады. Осы көріністі бақылап отырған әкесі мен анасы “Алла бәрімізден разы болсын” деп бір-бірінің иығынан қысты.

Түстен кейін ата мен әжелеріне құттықтап барды. Ата-анасының достарымен кездесті. Қай үйге бармасын керемет жайылған дастарxан, жылы лебіз, көтеріңкі көңіл балалардың айтын одан сайын ерекшелендіре түсті! Біз сені сағынамыз, Рамазан! Я, Аллам, келесі жылғы Рамазанға аман-есен жеткізе гөр!

Балақай, сен ата-анаң мен бауырларыңа айтқа сыйлығыңды дайындадың ба? Қолыңнан ашық xат жасап көр!

Рамазанның соңғы түні

2020-05-22T04:29:14.826Z

Бүгін соңғы тарауих оқылды. Әкесі, анасы, Омар намаз оқып біткесін сәл үнсіз отырып қалды. Анасы лезде мұздатқыштан балмұздақ шығарып, Раяна мен Әлиді шақырды. Балмұздақты айнала отырған отбасы, Рамазанда не жасап бітіргендерін бір-біріне айта бастады. Әркім өзінің чек листін алып келіп, мен мына күндердің барлығында ораза ұстадым, мен мына сүрелерді жаттадым деп балалар әкесі мен анасына таласа көрсете бастады. Әкесі: “Бүгін кішкентайымыздан бастайық, алғашқы рамазаны еді ғой, Әли бастай ғой”,- деді.

Әли: “Мен Кәусар, Ықылас, Фатиха сүресін жаттадым. Анаға көмектестім. Садақа бердім. Пайғамбарлар туралы білдім. Салауат айтып үйрендім. Әжетханаға кірерде және шығарда айтатын дұға жаттадым”,- деді.

Раяна жалғастыра: “Мен болсам, Әлидің сүрелерін жатқа білгендіктен Кәусар, Фалақ, Нәс сүрелерін жатадым. Оразаны тек аштық үшін ұстамайтынын білдім. Соңғы бір аптада толық ораза ұстадым. Өз атымның мағынасы осы Рамазан айымен байланысты екенін білдім. Әлиден тамақтан кейін оқылатын дұғаны жаттап алдым. “Әдеп әлемінде” деген кітапты бітірдім”,- деді өзіне көңілі тола.

Омар болса: “Мен Духа, Инширах, Тин сүрелерін жаттадым. “Ғибрат толы сандық” кітабын бітірдім. Оразаның денсаулыққа өте көп пайдасы бар екенін білдім. Алланың әмірлері адамдардың жақсылығы үшін екенін, кейде асығыстық танытып кей істеріге сабырсыздық танытатымызды түйдім. Осы жылы оразамды сіздермен бірге толық бір ай бойы ұстадым”,- деді. “Рамазанның аяғына да келіп жеткенімізге сене алар емеспін. Мен келесі Рамазанды сағынатын боламын”,- деді. Омардың бұл сөзіне Раяна мен Әли “Мен де”, “Мен де” деп жарыса жауап берді.

Балалар бұл жылы өздеріне жоспар жасағандықтан, Рамазан айын ерекше өткізді. Жігерлі бола түсті. Дін жайлы көп білім алып, Алла Тағалаға бір адым болса да жақындай түскен іштей сезден еді. Бұл ай балаларға өте көп қуаныш, сыйлықтар, мол берекет сыйлады. “Он екі айдың сұлтаны” деп айтатын, “Пайғамбарымызыдың сағына күтетін айы” деп атайтындайы бар екен ғой десті.

Балақай сен не үйрендің, өзіңе тізім жасап, ата-анаңа көрсет!

Фатиxа

2020-05-21T07:17:59.002Z

Бүгін Әли кестесі бойынша “Фатиха” сүресін жаттамақ болды. Бірақ неше рет қайталап, тырысса да мүлде есіне сақтай алмай-ақ қойды. Өте қиын сияқты. Кешке Омар ағасына жаттағанын тапсыратын еді. Кеш те таяп қалды, Әли әлі жаттай алмай жүр. Анасына келіп: “Анашым, мен мына сүрені жаттамай-ақ, қояйыншы?”,- деді. Анасы Әлиге мұқият қарады да: ”Не болды? Тым қиын бе екен?”,- деп сұрады. Әли жасырмай: “Тілім келмей-ақ қойды. Бағанадан бері қайталап отырмын”,-, деді.

Анасы:”Иә, мен сені түсінемін, арабша жаттаған қиын болуы мүмкін. Бірақ сен осыған дейін 2 сүре жаттап алдың ғой, кішкене тырыссаң, қолыңнан келеді. Сен өте зерексің ғой”,- деді. Әли ойланып тұрып: “Анашым, мен қазақшасын жаттайыншы?”,- деді. “Қаласаң, қазақшасын да жатта. Бірақ намазда болсын, дұға ретінде айтқың келсе де, зікір ретінде айтқың келсе де міндетті түрде арабшасын айту керек. Қазақша мағынасы өзің үшін, айтып отырғанда мағынасын біліп отырасың”. Әли: “Неге міндетті түрде, арабшасын айту керек?”,- деді.

Анасы: “Жақсы сұрақ, Әлижан. Себебі, Құран - араб тілінде түскен, Алланың сөзі. Егер барлық елдер өз тіліне аударып айтатын болса, мағынасы басқаша болып өзгеріп кетеді. Ал Құран - барлық кемшілік, өзгертулерден, бұрмаланудан Алла тарапынан сақтылған киелі кітап. Сондықтан да сүрелерді біз қазақшаға аударып алып айтпаймыз. Бірақ ішімізден дұға ететін болсақ, қалауымызды өз тілімізде Алладан сұрай береміз. Алла біздің тілектерімізден, ойымыздан, ниетімізден хабардар”,- деді. Әли: “Онда Құранның ішінде сүре көп қой, мен басқасын жаттайыншы, Фатиханы емес” деді бұлдана.

Анасы: “Мен саған Фатиха сүресі туралы айтып берейін, кейін жаттап жаттамайтыныңды өзің шешершің, жарай ма?” Әли жәй дауыспен “жарайды” деп келісті. “Фатиха сүресі, Құранның ең алғашқы сүресі, оны “Құранның анасы” дейді. Бұл сүренің ұлылығы сондай - әр намазға қосып, күніге жоқ дегенде 40 рет айтамыз. Фатихасыз намаз толық болмайды.Бұл сүре - адамзатқа бұрын соңды берілмеген тек біздің Пайғамбарымызға (с.а.у.) ғана берілген сыйлық. Алла Тағала былай деген: «Намазды Өзім мен құлымның арасында екіге бөлдім, жартысы Маған, жартысы құлыма әрі құлыма сұрағаны тиесілі. Егер де ол: «Әл-хамду лилләһи роббил ъаләмийн» десе, Алла: «Құлым Маған мадақ айтты, Мені мақтады», – дейді. Егер де ол: «Әр-рахманир рахим» десе, Алла: «Құлым Маған шүкірлігін айтты, алғыс айтты», – дейді. Егер де ол: «Мәәлики иәумиддин» десе, Алла: «Құлым Мені ұлықтады», – дейді. Егер де құлым: «Ийәкә нәғбуду уә ийәкә нәстәғийн», – десе, Алла Тағала: «Бұл Мені мен құлымның арасындағы нәрсе әрі құлыма сұрағаны тиесілі, Мен оған сұрағанын беремін», – дейді. Егер құл: «Иһдинас сыратал мустәқийм. Сыраталләзинә әнғамта ғаләйһим ғойрил мағдууби ғаләйһим уәләд-дооллийн», – десе, Алла: «Бұл құлымдікі әрі құлыма сұрағаны тиесілі», – дейді», — деген. Осыдан кейін ғалымдар кім Фатиха сүресін түсініп, оған амал жасаса, ол адамға Алла тағала дүниеде де, ақиретте де қалағанын береді деген екен”, - деп анасы Фатиха сүресін айтып берді.

Әли қызығып тыңдап қалыпты. Әли “Фатиха” сүресінің мағынасын толық түсінді. Анасынан тағы да қайталауын сұрады. Анасы сүрені тоқтап, тоқтап қайталап айтып берді. Бір-екі рет тағы да қайталап, Әли жаттап алды. Қуанышында шек жоқ. Әлидің сүре жаттауына бұл сүре туралы білмеуі кедергі болған сияқты.

Балақай, бүгін сен де Фатиха сүресін жаттап ал.

Достар

2020-05-20T10:50:48.648Z

Омарға қазақ тілінен үй тапсырмасына “Достық” туралы шығарма жазуға берді. Омарға шығарма жазу оңай, ол кітап көп оқығандықтан өзінің ойын өте жақсы жеткізетін. Сондықтан шығарманы әдемі сөздермен өріп жазды. Достық пайдамен, қызметпен өлшенбейді, көңілмен, іс- әрекетпен өлшенеді. Досыңның қиын сәтіңдегі жылы сөзі, созған қол ұшы тез әсер ететін дәріден де артық көмектеседі. Достарыңмен көңіл көтерсең де, ішіңді тарқатып әңгіме айтсаң да жақсы серігіп қаласың. Қазақта “Досыңды көрсет, мен сенің кім екеніңді айтамын” деген сөз бар. Сондықтан достарды да жақсы таңдау керек. Досы жақсының өзі жақсы. Мен өз достарыммен мақтанамын” деген сөздері болды.

Жазып отырып ойға батты. Әкесінің қасына келіп Пайғамбарымыздың достары туралы айтып беруін өтінді. Әкесі: “Пайғамбарымыз қандай адам еді. Бүкіл жақсы қасиеттері бойында сіңірілген кермет жан еді ғой. Пайғамбарымыз керемет болса, достары да керемет деген сөз ғой. Пайғамбарымыз достарын ерекше жақсы көретін. Тіпті, "менің достарым, сахабаларым, аспандағы жұлдыз сияқты кімде кім олардың артынан ерсе, адаспайды" деп айтады. Оның сахабалары өте көп болды.

Сахаба деген оның әңгімесін, сұхбатын тыңдап, жүздескен деген мағынаны береді. Достары да Пайғамбарымызды ерекше жақсы көріп құрмет тұтқан. Достарының ішінде Пайғамбарымызбен ерекше жақсын болғандар, Әбу Бәкір Сыддық, Омар, Осман, Әли деген кісілер. Бұлардың ішінде де Әбу Бәкір Сыддықтың, Аллам одан разы болсын, орны ерекше. Пайғамбарымызға Пайғамбарлық 40 жасында келге ғой, бірақ Әбу Бәкірмен пайғамбарлық келмей тұрып тажақын дос болады. Әбу Бәкірдің ерекше ықыласы, мейірімді жүрегі, Пайғамбарымызға махаббаты, Аллаға құлшылығы шексіз еді. Тіпті, үмметімнің жасаған сауабы мен Әбу Бәкірдікін салыстырса, Әбу Бәкірдікі ауыр басады деген.

Екінші әділ халиф - Омар ибн Әл Хаттаб Пайғамбарға (оған Алланың игілігі мен сәлемі болсын) ең жақын сахабалардың бірі болатын. Ол бұл дүниеде Исламды таратуға көп үлесін қосты. Оны кейде Әл-Фаруқ деп те атайтын, яғни, «жақсыны жаманнан айырушы» дегенді білдіреді. Омар Құранның жиналып бір кітап болып шығарылуына ат салысқандардың бірі. Омар Исламды қабылдағаннан кейін Пайғамбарды (оған Алланың игілігі мен сәлемі болсын) қорғауға барынша тырысып, оның жанынан бір елі ажырамайтын болған.

Осман болса, өзінің адалдығымен ерекше танылған кісі болған. Пайғамбарымыз Османнан періштелердің өзі ұялады деп оның ұятының, әдебінің өте жоғары деңгейде болғандығын білдірткен. Ол бір еврейдің меншігіндегі Рума құдығын жиырма мың дирхемге сатып алып, барша мұсылмандарға оны емін-еркін пайдалануға рұқсат берген, қолы да жүрегі де ашық болған.

Ал Әли болса өзінің зеректігімен есте қалған Пайғамбарымыздың туысы әрі жақын досы болған. Пайғамбарымызды қорғап қалу үшін өзінің жанын беретіндей жанкешті болған. Ол ислам қабылдаған кезде жап жас бала болатын.Пайғамбар (оған Алланың игілігі мен сәлемі болсын) Әлиді «білім қаласына апарар қақпа» деп атайтын. Себебі, ол тәпсірде, хадистерде және фиқһта орасан зор білімге ие асқан ілімді адам болатын. Сонымен қатар, ол өзінің даналығымен әрі қырағылығымен ерекшеленетін, деді қоңыр даусымен.

Омар Пайғамбарымыздың достарына бір жағынан таң қалып, бір жағынан оларға ерекше құрмет сезініп отырды. Әкесі әрі қарай жалғастырып: “Балам, бұлардың төртеуі де халифа болып, көздері тірі кезінде жәннатпен сүйіншіленген сахабалар. Адамның атын кім деп қойсаң, соған ұқсас болады деп сенің атыңды Омар, інің Әлидің есімін Әли деп қойдық” деді. Омардың жүрегін одан сайын мақтаныш, қуаныш кернеді. Өз атыма лайық адам болсам ғой деп ішінен дұға да етті.

Қадір түні

2020-05-19T05:40:43.783Z

Бүгін “Қадір түні” деп балалар ерекше дайындалып жүр. Бұл түн туралы Әли кеше Ерік ағасынан да естігені бар еді. Әкесі де таңертең: “Балаларым, бүгін Қадір түні, мың айдан да хайырлы түн. Жылына бірақ рет болады. Бұл түн туралы Қасиетті Құранда “Қадір” сүресі бар. Қадір түнінде Періштелер жерге көп түскендігі сонша - жерге сыймай қалатындай болады екен. Таң атқанша жерде амандық, тыныштық болады. Жасалған дұғалар қайтарылмайды” деп айтқан еді.

Әли балабақшадан келсе, Омар мен Раяна Алла Тағаладан не сұрайтынын тізіп жазып жатыр екен. Екеуі таласып, “Мен Алладан ата-анамның амандығын тілеймін”, “Мен де тілеймін”, “Мен осы жылы сабағымды өте жақсыға бітірсем екен”, “Мен келесі жылы биология олимпиядасынан 1 орын алайыншы” деп жатыр екен.

Әли де оларға қарап қызығып дұға тізімін жазғысы келді. Бірақ енді жаза алмайды. Ойына керемет идея келді. Сурет салуға болады ғой. Енді не тілейді. Бірінші отбасының барлығы бірге тұрған суретін салды. Екінші велосипед салды. Үшінші футбол добын, төртінші көп чупа чупс, бесінші ойыншықтарын салып еді әрі қарай не салатыны ойына келмей қалды. Омар мен Раянаның әңгімесіне құлақ салды. “Дүниеде тыныштық болсын, жақындарым аман болсын, ата әжем, ата анам денсаулығы мықты болсын” деп жатыр екен, Әли де қолынан келгенше сол тілектерді ұмытып қалмас үшін сала берді.

Балақай сен де бүгін Алладан тілейтін 10 дұға тізіміңді жаса.

Қонақтар

2020-05-18T04:21:16.870Z

Бүгін ауызашарға үйге көп қонақтар келді. Балалар әдетінше, аналарына көмектесіп зыр жүгіріп жүр. Ерекше Әли қуанып жүр. Ерік ағалар, Айгүл тәтелер, Әлидің достары Хамза мен Ахмет те келетін болды. Кеш түсті, қонақтар бірте-бірте келе бастады. Омар қонақтарды күтіп алып, киімдерін ілсе, Раяна мен Әли қатар тұрып, амандасып тұрды.

Балаларды әкесі үйреткен еді, “Қонағыңды Қызырдай күт” деп жиі естеріне салатын. Пайғамбарымыз да қонақтарға ерекше ілтипат көрсеткен екен. Хамза мен Ахмет те келді, Әли оларды көріп қуанғаны сонша - "Алақай!" деп айқайлап жіберді. Олардың ата-аналары да Омар, Раяна, Әлиге Рамазанмен құттықтап тәттілер алып келіпті. Қонақтар үстелге отырды.

Аналары дастарханды жайнатып тастаған, барлық тамақ дәмді, әдемі көрінеді. Су ішіп, дұға жасап ауыз да ашылды. Ақшам намаздары оқылып, ыстық тамақ әкелінді. Балалар да үстел жағалап отырған болатын. Төрде отырған Ерік ағай әңгіме бастады. Балалар оның әңгімелерін екрешк сүйіп тыңдайтын. Әли достарымен де ойнағысы келіп тұр, Ерік ағаны да тыңдағысы келіп тұр. Әли бір керемет шешім ойлап тапты. Залдағы есіктің түбінде достарымен ойнайтын болды. Бір құлағы Ерік ағада, оның даусы зор болатын, есіктің сыртына дейін жақсы етіліп тұрды. Әли достарымен машиналарын тізіп гонка ойнап кетті.

Есіл дерті ойынға ауып кете береді, бірақ өзін қайтадан жігерлендіріп Ерік ағаның даусына құлағын түріп қояды. Құран туралы айтып жатыр. Құранның қандай керемет бір кітап екенін, Алланың сөзі екенін. Оның ішінде бізге сабақ боларлық өте көп хикаялар, Алладан тікелей нұсқаулар бар екен. Әли ешқашанда Құран оқып көрмеген. Әлі оқи да алмайды ғой, бірақ қатты оқығысы келіп кетті. Құран Алла Тағала мен Мұхаммед пайғамбардың (с.а.у) сөйлесуі, бұл жерде Пайғамбарымыздың жауап қатқаны аятта кездеспесе де, Алла Тағала жүректердің иесі ғой, Пайғамбарымызға тілмен сұрақ қойдырмастан, жауабын аятпен түсіріп отырған екен.

Ең бірінші рет Жебірейіл періште аят алып келіп, Пайғамбарымызға берген екен. “Оқы” деп келіпті алғашқы аят. Пайғамбарымыз (с.а.у) Құраннан аяттар айтқанда, барлығы ерекше тыңдайды екен. Себебі, ол кезде көп адам сөзге шешен болыпты, сондықтан бұндай әдемі сөздерді адам ойлап таба алмайды, мүмкін емес деп таңғалған екен. Сөйтіп, сол кезде көбісі Алланың барлығына, бірлігіне, Пайғамбарымыз оның елшісі екеніне иман келтіріпті. Рамазан айы - сол айда Құран түскені үшін 12 айдың сұлтаны, Қадір түні - сол түні Құран түскені үшін 83 жылға тең қадірлігі бар, басқа үмметтерге берілмеген, бізге ғана тән Алланың сыйларының бірі.

Бұл түні Алла барлық тілеулерді, ғибадаттарды қабыл етіп, орасан зор сауап береді, иншалла” деп барып тоқтады. Әли мұқият тыңдап қалыпты, қолындағы машиналарын кеудесіне қысып алғанын да байқамапты. Ерік аға әңгімесін аяқтағанда бірақ жан-жағына қарады, сөйтсе достары да болған әңгімеге құлақ асып қалыпты..

Ана мен әке маxаббаты

2020-05-17T05:09:23.404Z

Бүгін Раянаның көңіл күйі болмады. Өзін ерекше мұңды сезінді. Анасы бұл жағдайды байқап Раянанаың қасына келді. “Қызым, мұңайып жүргеніңді байқадым, не болды?” деп сұрады. Раяна да: “ана мен сізге қатты ренжіп отырмын” деді. Алғашқыда анасы Раянадан бұндай жауап күтпеген еді, сондықтан не айтарын білмей сәл абдырап тұрды да: “Ммм, ренжіген себебін білуге бола ма?” деді жұмсақ үнмен.

Раяна да: “Иә”, деп жылап жіберді. “Мені жақсы көрмей кеткен сияқтысыз. Мен шақырсам маған келмейсіз, Әлиге көп көмектесесіз. Маған көңіл бөлмей кеттіңіз ғой. Әли шақырса, бірден барасыз”,- деді аузы бұртиып. Анасы Раянаны құшағына алып, “Ботам сол! Мен сені түсінемін. Сен қатты ренжіп отырсың маған. Саған көңіл бөлмей кеткенім үшін сенен кешірім сұраймын. Менің саған қолым тимей кетсе, жақсы көрмей кеттім деген сөз емес қой. Менің жүрегім мына екі қолымның арасы сияқты өте кең. Қараш менің құшағыма үшеуің де сыйып кетесіңдер.

Жүрегімде Аллаға деген махаббат та, Пайғамбарымызға, сахабаларға, сендердің әкелеріңе, Омарға, саған, Әлиге де, екі ата-әжелеріңе де, бауырларыма, достарыма барлығына орын бар. Мен олармен күнде хабарласып, көріспесем де, оларды жақсы көремін. Әлиге көп көмектессем, ол сенен төрт жас кішкентай. Білмейтін нәрселері өте көп, әрі біз, әкең, Омар, сен де ерекше қамқорлық көрсететін жаста. Сен де Әлидің жасында болғанда, семен өте көп ойнаушы едік қой, Омар да саған қарайтын, есіңде ме?” деді анасы Раянаның шашын сипап отырып.

Раяна расымен де ата-анасымен көп ойнайтынын, бұрынырақта өте көп бірге уақыт өткізгенгенін есіне алды. Анасы: “Қызым, мен сені қатты жақсы көремін!”. Раяна: “Мен де сізді қатты жақсы көремін. Сізге деген махаббатым қандай екенін білесіз бе?”, деді анасының тізесіне қолын қойып. Анасы: “Қандай?”, деп қызыға сұрады. Раяна екі қолын екі жаққа жайып “мынандай” деді. Анасы менің саған деген махаббатым “Мынандаай” деп екі қолын екі жаққа жайды. Анасының құшағы Раянадан қарағанда ұзын еді, Раяна бірден түрегіліп тұрды, қолын жоғарыға созып “менікі болса мынандай” деп көрсетті.

Анасы да тұрып қолын созды да “менікі мынандай” деп еді, анасының махаббаты ауыр басты. Раяна бөлмеге көзін жүгіртіп, “Менікі болса, мына бөлменің үлкендігіндей” деді. Анасы: “Менікі мына үйдегі барлық бөлмелердікін қосқандағы көлемдей”. Раяна: “Менікі осы тұрғын үйдің көлеміндей”, анасы: “осы қаланікіндей”, Раяна: “менікі жердің көлеміндей”, анасы: “Менікі галактиканың”. Раяна “Мәссаған қандай көп”,- деп ойлады. Анасына бір мезет жалт қарап: “Бәрімізге де сондай көп па махаббатыңыз”,- деді. Анасы: “Әрине, ботам! Әке мен аналардың жүректерінің сондай ерекше сиқыры бар, барлық баласына үлкен махаббатты сыйғыза алады”,-деді, жәй ғана. Анасы мен қызы тағы да бір-бірін құшақтай түсті.

Бақыттың кілті

2020-05-16T16:12:42.009Z

Раяна бүгін “Бақыттың кілті” деген әңгімені оқып ерекше әсерленді. Өткеде Омар ағасының шүкір туралы Әлиге айтқаны да есінде. Бұл да бір шүкірдің түрі екен ғой деген ойға батты: Раянаның оқыған әңгімесі мынау еді:

Бостонның кедей аудандарынан бір топ бала сол жердің беделді адамдары Алис Фримен Палмерге барып:

- Біз қалай бақытты бола алатынымызды айтыңызшы?! − деп өтініпті.

Тәжірбиелі әйел оларға күніге әдемі бірнәрсе іздеп тауып, сол туралы ойланыңдар деп кеңес береді.

- Бір күн таппай қалсаңдар, пайдасы болмайды. Барлығың бірнәрсе таба аласыңдар. Бір жапырақ, бір гүл, бір бұлт болсын. Тек оның әдемілігін көру үшін тапқан заттарыңа жақсылап, әдемі көзбен қарауларың керек, − дейді.

Алғашқы аптаның соңында Палмер ханым өзіне келген қыздардың бірі кіші бауырын көшеде қыдыртып жүргенін көрді. Қыз:

- Айтқаныңызды орындадым. Бір күн де өткізбедім. Бірақ қиын болды. Паркке барған күндерімде бұл оңай болатын. Бірақ бір күні өте қатты жаңбыр жауды. Бауырым ауырып қалғандықтан далаға шыға алмадым. Сол күні әдемі нәрсе көрмейтініме сенімді едім. Мұңайып терезеден далаға қарап отыр едім, жаңбырдың ағып жатқан құбырдың түбінде бір торғайдың шомылып жатқанын көрдім. Мойнындағы қара қауырсындары тап бір торғайдың пиджагі тәріздес еді. Торғай шынымен әдемі. Келесі күні кіші бөпеміз ауырып қалып, далаға тағы шыға алмадым. Бауырымның шаштарына қарадым. Терезеден түскен күн сәулесі оның шаштарының арасынан ойнаған сияқты болды.

Осы сөздерден кейін қып-қызыл шашты бөпені Палмер ханымға берді.

- Өте әдемі ғой иә? Енді өзімді еш бақытсыз немесе жалғыз сезінбеймін, − деді.

Періштелер

2020-05-15T05:11:09.386Z

Раянаға анасы тарауих намазының дұғасын түсіндіріп отырған кезде Әли ойнап отырғанымен барлық есіл дерті анасының әңгімесінде еді. Оған ерекше қызық болғаны- періштелер. Осы пікірі ойында қалып кеткен болу керек, таңертең тұра сала анасынан: “Анашым, періштелер туралы айтып беріңізші. Кеше Алла Жәбірейіл періштенің де Раббы дедіңіз ғой. Олардың аттары бар ма?”

Анасы, Әлидің таңғы асын беріп жатып: “Иә, ботам, олардың аттары бар. Тіпті, періштелер өте көп екенін білесің бе? Олар соншалықты көп, адамды айнала періштелер қоршап жүреді. Ой, қара далада жаңбыр жауып жатыр, әрбір жаңбыр тамшысын жерге түсіріп жатқан періштелер бар, әрі сен ішімде болған кезде, сенімен бірге бір періште болды. Періштелердің әрқайсысың аттарын білмейміз, бірақ бізге білдірілген бірнеше періштелердің аттары бар,”- деді анасы.

Әлидің ботқасы дайын болып қалған екен, соны табаққа құйып назары ауып, әңгімесі үзіліп қалды. Әлидің қызыққаны сонша - “Анашым, әріқарай не болды, айтыңызшы”,- деп өтінді.

Анасы жалғастырып: “Тарауиx дұғасындағы аты кездесетін періште - Жебірейіл, ол Алланың елші періштесі. Пайғамбарымызға Алланың хабарларын жеткізіп тұрған. Оның қанаттары өте көп, көзбен қарағанда қанаттары аспанды жауып қалатындай алып екен.

Алла Тағала Микаил періштеге жаратылыстағы оқиғалардың, жер бетіндегі тіршілік иелерінің рызықтарын қадағалу міндетін жүктеген. Микаил періште жел мен бұлттарды да қадағалап, оларды қажетті жақтарға бағыттайды.

Перішетелер адамдар сияқты тамақ жемеді, олар әдемі хош иіспен қоректенеді және әрқашанда Аллаға құлшылық етумен болады. Біз олар туралы Құран Кәрімнен білеміз,- деп аяқтады. Әли сәл үнсіздіктен соң: “Ана біз оларды көре алмаймыз ба?”,-деп сұрады. Анасы: “Иә, балам, біздің көзімізге көрінбейді. Бірақ үйге қонаққа келуі мүмкін. Үйде көп Алланың есімдерін зікір етсек, кеше сен “Лә иләһә илаллаһ” деп зікір айттың ғой, сол кезде де періштелер, келіп тыңдайды. "Мына жақта Алланың аты еске алынып жатыр" деп, бір-біріне айтып, көп болып келеді. Тек үйімізді тап таза ұстауымыз керек. Себебі, періштелер лас үйге кірмейді”,- деді. Әли қатты қызығып, ойға шомып кетіпті. Анасының “Әли ботқаңды жеп ал, суып қалды”,- деген даусы оны ас үйге қайта алып келді.

Ас дұғасы

2020-05-14T05:52:46.856Z

Әли бала бақшадан

“Тамақ беріп тойдырған,

Сусын беріп қандырған,

Және де бізді мұсылман қылған

Аллаға шүкір рахмет” деген сөздерді айқайлап айтып, үйге кіріп келді. Есіктен кірген әкесі де “Аллаға шүкір рахмет” деп қуанып Әлидің артынан қайталады. Анасы Әлиді қарсы алып, мерейлене сүйіп алды да, “Ботам сол балабақшадан жаттаған жаңа тақпағың ба?” деп сұрады. Әли “Жоқ бұл тақпақ емес, тамақ жеп болғаннан кейін айтатын ас дұғасы, ана” деп қайтадан:

Тамақ беріп тойдырған,

Сусын беріп қандырған,

Және бізді мұсылман қылған,

Аллаға шүкір рахмет” деп тақылдап айтып берді. Әкесі мен анасы әбден қуанды. “Жарайсың құлыным, енді ас батасын өзің бересің” деді әкесі.

Ауыз ашар асын аяқтағанда да Әли өзінің дұғасын айтып берді. Үйдегілердің барлығы "керемет" деп қол соқты. Омар сол кезде, “Әли, ас ішіп болғандағы дұғаң керемет екен. Тамақты енді ішіп жатқанда дұға айттың ба?”, деп сұрады. Әли бетін басып “Ұмытып кетіппін”, деді. Сонда Омар: “Тамақ жегенде ең бірінші “Бисмиллах” деп айту керек, бұл ас бастар дұғасы. Алланың атымен дегенді білдіреді. Негізі әрбір істі “Бисмиллах” деп бастау керек екен ғой, иә?!,"- деп Омар әкесіне қарады. Әкесі Омардың әңгімесін бөлгісі келмей, “дұрыс, дұрыс” деп басын изеді. Омар жалғасытырып: “Әрбір ісімізді Алланың атымен бастасақ, сол кезде береке болады екен, сонда әуелі зікір болу керек. Бұл - “Бисмиллах”. Тамақтың ортасында да пікір болу керек, ойлану керекпіз бұл тамақты не үшін жеп отырмыз, қандай пайда әкеліп жатыр, Алла қандай қамқор бізге осы дәмді сездіріп, жегізіп жатыр деп ойланған соң, аяғында шүкір, тура сенің дұғаң”,-Әлижан деді. Әли енді көп нәрсе үйренгендей сезінді. Әрқашан да “Бисмиллах” деп айтып жүрді.