Natsumeku

Haqiqiy qirolicha.

2026-05-23T17:48:44.373Z

4 qism: faqat ishonch biln tinchlikka erishib bo'lmaydi

Janglar boshlanganidan biroz vaqt o‘tib, Yahud podshohiga maktub yuborildi.
— Ulug‘ Yahud podshohi, ikki davlatimiz o‘rtasidagi urush sabab begunoh insonlar aziyat chekmoqda. Keling, bu nizoga chek qo‘yaylik va sulh tuzaylik. Hozirgi holatda siz ham, biz ham bu urushni davom ettirishga qodir emasmiz. Bu jang ikkalamizga ham foyda keltirmaydi.
Albatta, Yahud podshohi bu taklifni darhol qabul qilmadi. Amira esa xalqining yanada ko‘proq azob chekayotganini ko‘rib, oziq-ovqat zaxiralari va askarlar soni tobora kamayib borayotganini anglab, urushning tezroq tugashini astoydil xohlardi.
Endi nima qilaman?.. — deb o‘ylardi u. Qaysi yo‘l tinchlikka olib boradi? Yahud podshohi aslida nimani xohlaydi? Bizda endi bu urushni davom ettirishga kuch qolmagan. Vaqt kerak… vaqt yutishim kerak.
Shu xayollar bilan band bo‘lgan Amira xonaga kirib kelgan farzandlarini ham darhol payqamadi. So‘nggi paytlarda u ularga deyarli vaqt ajrata olmayotgan edi.
— Ona? Ona!
— Ha… ha, Feruza, mening go‘zal qizim. Nima gap? Yaqinroq kel… Sen ham, Yoqut. Nima bo‘ldi? Hamma narsa joyidami?
— Onajon… yana urush bo‘ladimi?
— Buni senga kim aytdi, Yoqut?
— Amakim Vard aytdi. U yana urush bo‘lishini va siz o‘lib ketishingizni aytdi. Onajon, nega amakim siz o‘lasiz dedi? Men sizni yo‘qotishni xohlamayman…
Bolalar yugurib kelib unga yopishishdi. Amira ularni mahkam bag‘riga bosdi.
— Qo‘rqmanglar, — dedi u muloyim ovozda. — Amakingiz shunchaki hazillashgan. Men sizlarni tashlab ketmayman.
— Rostdan va’da berasizmi?
— Ha, va’da beraman. Endi xonangizga borib uxlanglar.
Bolalarni kuzatib qo‘ygach, Amira yana o‘z ishlariga qaytdi. Ammo uning fikrlari tinchimadi.
Vard nega bolalarga bunday gaplarni aytadi? U meni yoqtirmasligini bilaman, lekin… bu gapni hatto o‘z jiyanlariga aytish… Agar u Umarning ukasi bo‘lmaganida, uni allaqachon saroydan haydardim. Ammo hozir bunga vaqt yo‘q.
Amira Yahud bilan sulh tuzish uchun yangi yo‘llarni izlay boshladi. U o‘z xavfsizligini ham o‘ylamay, saroyni tark etdi va xalq orasida muzokaralar olib bora boshladi. U faqat davlat elchilari bilan emas, oddiy odamlar bilan ham gaplashdi, saroy tashqarisida xalq bemalol kirib-chiqadigan asosiy darvoza oldiga taxt o'rnatib u yerda o‘tirgancha, ularni tingladi.
Bu Yahudning ishonchini qozonishga yordam beradimi? Ular menda dushmanlik yo‘qligini tushunisharmikan?.. Ey Alloh, yordam ber. Meni to‘g‘ri yo‘ldan adashtirma. Men begunoh xalqimning azoblanishini xohlamayman.
Shu tariqa Amira muzokaralarini yakunlab, saroyga qaytdi va butun vaqtini farzandlari hamda davlat ishlariga bag‘ishladi. U o‘z uyqusi va onalik huquqidan xalq tinchligi uchun voz kechdi.
Uning tinimsiz mehnati va duolari sabab Kusuful Shams bir necha yil tinchlikda yashadi. Xalq uni chuqur hurmat qildi, buyruqlarini so‘zsiz bajardi va uni eng dono malika deb bildi.
Ammo bu tinchlik yillari oxir-oqibat Umar akasi Vard tomonidan barbod qilindi. U Yahudga qo‘shilib, o‘z xalqiga xiyonat qildi.
Sen mening o‘rnimni olganing uchun javob berasan, Amira… boshqaning haqqini tortib olish jazosiz qolmaydi!
Shu g‘azab bilan u Yahudga Kusuful Shamsning qurol omborlari va harbiy zaxiralari joylashgan manzillarni yetkazdi va ularni yo‘q qilishga sabab bo‘ldi. Uning maqsadi oddiy edi — taxtni egallash.
Shu xiyonat tufayli Yahud qo‘shinlari Kusuful Shamsga bostirib kirdi.
Amira Vardning xiyonatini bilib, uni huzuriga olib kelishgach, so‘radi:
— Nega, Vard? Nega xiyonat qilding?
— Sen… sen hammasiga sababchisan! — deb baqirdi u. — Hammasi sen tufayli bo‘ldi! Agar sen bo‘lmaganingda, agar Umarga yordam bermaganingda, taxt meniki bo‘lardi! Umar vafotidan keyin tojni menga berishing kerak edi! Hammasi sening aybing!
— To‘g‘ri, — dedi Amira sovuqqonlik bilan. — Akangdan keyin taxtga chiqishing mumkin edi. Ammo men bu xalqni senga o‘xshagan nodonga ishonib topshirmasdim.
U qo‘riqchilarga yuzlandi:
— Uni zindonga tashlanglar. Urush tugagach, hukm chiqariladi. Hozircha u mahbus bo‘lib qoladi.
Qo‘riqchilar Vardni olib ketishdi. Amira yolg‘iz qoldi.

Balki Vard haqdir… balki taxtni unga berish kerakmidi?.. Yo‘q. Bu o‘ylash uchun vaqt emas. O‘zingni bos, tinchlan, Amira. Sen bu davlat malikasisan. Har bir jon uchun javobgarsan.
U qanchalik harakat qilmasin, urushni to‘xtata olmadi. Yahudga berilgan sulh takliflari, boylik va sovg‘alar — hech biri foyda bermadi. Oxir-oqibat, u jangdan boshqa yo‘l qolmaganini tushundi. Xalq esa unga to‘liq ishonardi.
Ammo bu dunyoda faqat ishonch bilan tinchlik saqlab bo‘lmaydi. Urush Yahud foydasiga og‘ib borardi — zaxiralar tugayotgan, qurol kamayayotgan edi.
So‘nggi paytlarda Amira tushida Umarning yuzini ko‘ra boshladi. U har doimgidek mehr bilan unga qarar, qo‘lida atirgul tutardi. Ammo bu safar gul qizil emas — oppoq edi.
Amira gulni oldi va Umar uni oq atirgullar bilan to‘la bog‘ga olib kirdi. U bog‘ga kirishi bilan atirgullar birdan qizarib ketdi, Umar esa g‘oyib bo‘ldi.
Amira bu tushlarning ma’nosini izlay boshladi va oxir-oqibat tushundi: o‘lim yaqin edi. Va u tez orada uni o‘z bag‘riga oladi.

Men yosh qizning tanasiga isekay qildim va sobiq qalig'imning bobosini sevib qoldim.(Restart)

2026-05-21T15:54:31.901Z

Yovuzni qayta yozish.

2026-05-20T14:31:35.119Z

Haqiqiy qirolicha.

2026-05-19T15:10:27.303Z

3 qism: Bu hayotda baxt bormi?

Ko‘pchilik ularning muhabbatining chuqurligiga havas bilan qarardi. Ammo insonlar orasida doimo hasad va yomon niyatga berilganlar ham topiladi. Vard — Umarning ukasi — Umarning Kusuful Shams taxtiga chiqqanini hech qachon qabul qila olmadi.
“Nega aynan Umar?” — u ichidan g‘azab bilan yonardi. “Faqat to‘ng‘ich o‘g‘il bo‘lgani uchun taxtga o‘tirishi kerak degani emas-ku. Men undan kuchliman — unda nega Amira unga turmushga chiqdi? Bularning hammasiga Amira sababchi. Agar u bu nikohga rozi bo‘lmaganida, agar doimo Umarni qo‘llab-quvvatlamaganida, bugun taxtda o‘tirgan o‘sha ahmoq Umar emas, men bo‘lardim.”
Bu fikrlar Vardga tinchlik bermasdi. Ammo inson dunyoga qanchalik yopishsa, uning aslida sinovlar dunyosi ekanini shunchalik unutadi.
Ana shunday sinov Amiraning boshiga ham keldi. U o‘zining ilk muhabbati — umrida faqat bir marta sevgan insoni Umarni yo‘qotdi. Umar Yahud bilan bo‘lgan jangda shahid bo‘ldi. U Amirani ikki farzandi bilan yolg‘iz qoldirdi: o‘g‘li Yaqoud va qizi Feroza.
Bu xabar yetib kelgan tun Amira uzoq soatlarni ibodatda o‘tkazdi, Alloh huzurida ko‘z yosh to‘kdi.
— Ey Allohim… mening halol erim, bolalarimning otasi, butun bir xalqning himoyachisini O‘zing jannat ahlidan qilgin. Mening kabi ojiz bandangning duosini qabul etgin. Menga shunday mehribon qalbni uchratganing, uni mening halol umr yo‘ldoshim qilganing uchun Sendan minnatdorman.
Ey Alloh, Sen menga bu dunyoda muhabbat berding, keyin uni qaytarib olding. Senga iltijo qilaman — vafotimdan keyin uni menga yana qaytar. Oxiratda uni yonimda abadiy yashashimni nasib etgin. Omin.
Amiraning motami uzoqqa cho‘zilmadi. U xalqini o‘ylab, erining o‘rniga o‘zi Yahudga qarshi jangga otlandi. Urush uzoq davom etdi va Amira o‘zining aql-zakovati hamda jang mahorati bilan ko‘plab dushman askarlarini va bir necha qudratli sarkardalarni mag‘lub etdi.
Janglardan bir muddat o‘tib, Amira Yahud podshohiga maktub yo‘lladi.

Men yosh qizning tanasiga isekay qildim va sobiq qalig'imning bobosini sevib qoldim.(Restart)

2026-05-18T15:03:55.333Z

Haqiqiy qirolicha.

2026-05-16T14:32:44.403Z

2 qism: yangi shahar yangi hayot

O‘sha kuni Amira o‘z vatani — Qomarni tark etib, Shams saltanati sari yo‘l oldi. U hali oldinda uni qanday yangi hayot, cheksiz sinovlar, baxt va haqiqiy muhabbat kutayotganini tasavvur ham qilolmas edi. Bir necha haftalik uzoq safardan so‘ng, nihoyat u Shamsning ulug‘vor saroyiga yetib keldi.
Amira o‘z bo‘lajak erini atigi bir marta — Qomarda bo‘lib o‘tgan nikoh marosimida ko‘rgan edi. Hatto o‘shanda ham yuzidagi parda ortidan xolos. Nikoh vaqtida ularning orasini parda to‘sib turgan, to‘y davomida esa ular bir-biriga tik qarashga ham jur’at etishmagandi.
Men bu yerga moslasha olarmikanman?..
Erim qanday inson ekan?..
Otam menga faqat eringga suyan, unga doimo ishon, degandilar… Ammo men deyarli tanimaydigan insonimga qanday ishonaman?..
Amira shu xayollar girdobida yurarkan, qanday qilib Umarning xonasiga kirib kelganini ham sezmay qoldi.
Umar qo‘lida kitob ushlagancha javon qarshisida turardi. Amirani ko‘rishi bilan u kitobni ohista joyiga qo‘ydi-da, unga tomon yurdi. Amira esa ko‘zlarini yerga tikib turardi. Negadir unga qarashdan cho‘chirdi… yo‘q, bu qo‘rquv emas edi. Bu yuragini titratayotgan hayajon edi. Umrida otasidan boshqa bir erkak bilan ilk bor bir xonada yolg‘iz qolish hissi edi.
Umar unga yaqinlashib, asta Amiraning yuzidagi pardani tushirdi.
Zulmatdek qop-qora, uzun sochlari yelkalari uzra to‘kildi. Umar ko‘zlarini undan uzolmay qoldi. Qarshisida xuddi ertaklardagi pari misol bir ayol turardi — oppoq chinnidek teri, g‘unchaday lablar, uzun kipriklar, tun kabi qora ko‘zlar va ochilgan qizil atirgulni eslatuvchi chehra…
Qisqa sukunatdan so‘ng Umar mayin ovozda dedi:
— Aytishlaricha, oy husnining yarmini sizga bergan emish… Ammo men bu gap yolg‘on deb o‘ylayman. Alloh sizga shunday go‘zallik ato etganki, hatto oyning o‘zi ham sizning qarshingda uyalar edi.
Bu so‘zlardan Amiraning yuragi tez ura boshladi, yonoqlariga qizillik yugurdi. U asta boshini ko‘tardi va ilk bor Umarning ko‘zlariga tik boqdi.
Qora tun kabi chuqur nigohlar, egilgan uzun kipriklar va qalin qoshlari unga qarab turardi.
Amira past ovozda, zo‘rg‘a eshitilar darajada dedi:
— Maqtovingiz uchun… rahmat.
— Eshitishimcha, siz kitoblarni yaxshi ko‘rarkansiz, — dedi Umar muloyim ohangda. — Men bilan yuring.
U uning qo‘lidan ehtiyotkorlik bilan tutib, kitob javoni oldiga olib bordi.
— Bular mening eng sevimli kitoblarimdan ayrimlari. Istaganingizni tanlashingiz mumkin. Qachon xohlasangiz, saroy kutubxonasiga kirib, istagan kitobingizni o‘qishingiz ham mumkin.
— Bu kitoblar juda noyob ekan… Katta rahmat. Men albatta ularni o‘qiyman, — dedi Amira samimiy tabassum bilan.
U boshini ko‘tarib Umarga qaraganida, Umar javon orasidan olingan, xuddi uning lablaridek qip-qizil atirgulni unga uzatayotgan edi.
Amira gulni qo‘liga olib, uning iforini hidladi va yuzida mayin tabassum paydo bo‘ldi. Yuragi esa tobora tezroq urardi.
— Ayollarga qanday muomila qilishni yaxshi bilar ekansiz, — dedi u.
— Yo‘q, — dedi Umar sekin. — Men hech bir ayolga sizga bo‘lgani kabi munosabatda bo‘lmaganman. Atirgulimni qabul qilasizmi?
— …Albatta. Bunday gulni qanday rad etish mumkin?
Shu tariqa ikki yosh qalbning ilk suhbati, ilk muhabbati va ilk oqshomi oddiy, ammo iliq so‘zlar bilan boshlandi.
Amiraning Shams saltanatidagi hayotga ko‘nikishi uchun biroz vaqt kerak bo‘ldi. Ammo otasi aytganidek, Umar doimo uning yonida edi. U Amiraga bilan ko‘p gapilashar, ular birga bo‘lganida esa go‘yo butun dunyo yo‘qolib ketardi.
— Ey mening Amiram, qalbim malikasi… sening borliging menga berilgan eng buyuk ne’matdir. Bizning uchrashuvimizga sabab bo‘lgan shu tinchlik uchun Allohga hamd bo‘lsin.
— Ha, — dedi Amira sokin tabassum bilan. — Ikki saltanat orasidagi tinchlik ikki oshiq qalbni birlashtirdi.
— Amira, menga bir va’da berasanmi?
— Qanday va’da?
— Mendan boshqa hech kimniki bo‘lmasligingni… va jannatda ham mening ayolim bo‘lishingni.
Amira kulimsirab unga qaradi.
— Nimalar deyapsiz?.. Men azaldan sizniki bo‘lganman. Siz ham faqat menikisiz. Biz bir-birimiz uchun yaratilganmiz. Buni hech qachon unutmang.
— Albatta, ey qalbimning Amirası…

— Ha, ey qalbimning podshohi…
Ularning muhabbatiga hamma havas bilan qarardi. Ammo odamlar orasida birovning baxtini ko‘rolmaydigan, hasad va yomon niyat bilan yashaydiganlar hamisha topiladi.
Umarning ukasi — Vard esa Umarning Kusuful Shams taxtiga o‘tirganini hech qachon qabul qila olmas edi.

Nan Hao va Feng Shen.

2026-05-14T13:11:02.905Z

Men yosh qizning tanasiga isekay qildim va sobiq qalig'imning bobosini sevib qoldim.(Restart)

2026-05-11T15:25:28.777Z

Haqiqiy qirolicha.

2026-05-11T14:22:29.278Z

Haqiqiy qirolicha
1 qism: Amira

Tavsiya: Bu hikoya Xo‘tak Hotun (yoki Hotun) haqidagi rivoyatlardan ilhomlangan bo‘lib, u bir necha yil davomida Buxoroni arab bosqinlaridan himoya qilib, yurtiga tinchlik olib kelgan malikadir. Asarda ayrim voqealar tarixiy manbalarga tayansa-da, ko‘plab ism va hodisalar to‘qima bo‘lib, hikoya to‘liq tarixiy asar hisoblanmaydi. Faqat ayrim jihatlargina Xo‘tak Hotun hayotidan ilhomlangan.
Qahramonlar
Amira — hikoya bosh qahramoni. Urush ichida ulg‘aygan, kuchli, dono va go‘zal malika.
Umar — Amiraning bo‘lajak eri.
Podshoh (otasi) — xalqini sevuvchi, oqil va mehribon hukmdor.
Ilmu Fattoh — Amiraning ustoz va murabbiysi.
Qo‘shimcha ma’nolar
Qomar — arab tilida Oy.
Shams — arab tilida Quyosh.
Kusuful Shams — Quyosh tutilishi, ya’ni oy va quyoshning birlashuvi.
Tarix sahifalarida minglab podshohlar, amirlar, xonlar va sarkardalar nomi bitilgan. Ammo xalqini, yurtini, e’tiqodini va or-nomusini himoya qilgan bir ayol haqida juda oz inson biladi… U — buyuk malika Amira edi.
Amira o‘n uch yoshga kirganidan beri uning vatani — Qomar davlati qo‘shni Shams saltanati bilan urush ichida yashardi. U nega yoshligidan janglar orasida ulg‘aydi? Bu o‘zini himoya qilish uchunmidi? Yo‘q. Buning sababi u taxtning yagona vorisi edi.
Otasi unga boshqa malikalar kabi musiqa va rassomlikni emas, balki qilich tutishni, jang san’atini, strategiya va diplomatiyani o‘rgatishni afzal bildi. Shu sabab Bag‘doddan o‘zining eng yaqin do‘sti va buyuk olimi — Ilmu Fattohni olib keldi.
Boshqa malikalar saroy devorlari ichida san’at bilan mashg‘ul bo‘lib ulg‘aygan bir paytda, Amira madrasa eshiklari soyasida, ilm va qilich tarbiyasi ostida voyaga yetdi. U ilmni ham, jangni ham mukammal egalladi.
Amira o‘n sakkiz yoshga to‘lganida, qo‘shni davlat tinchlik shartnomasini taklif qildi. Shamsning eski podshohi vafot etgan, taxt esa uning to‘ng‘ich o‘g‘li — Umarga o‘tgan edi.
Shams va Qomar uzoq yillik urushni tugatib, tinchlik ostida birlashishga qaror qildi. Bu ittifoqni mustahkamlash uchun Amira o‘zi hech qachon ko‘rmagan inson — Umar bilan turmush qurishi kerak edi. Ular birgalikda yangi birlashgan saltanat — Kusuful Shamsni boshqarishardi.
Amira Qomardan Shamsga jo‘nab ketadigan kunida, otasi uni yolg‘iz chaqirib dedi:
— Qizim, hozir men sen bilan podshoh sifatida emas, ota sifatida gaplashmoqdaman. Sen begona yurtga, notanish insonlar orasiga ketmoqdasan. Ammo u yerda ishonishing va suyanishing mumkin bo‘lgan bir inson bor. U — bo‘lajak ering, bilaman bu ishim hato seni ko'rmagan va bilmaydigan insoninga turmushga berish menga ham oson emas. ammo qirol sifatida men hallqimni yana urishdan azoblanishini istamayman. iltimos meni to'g'ri tushunva va mendan hafa bo'lma.
Amira otasining so‘zini muloyimlik bilan bo‘ldi:
— Yo‘q, ota. Bunday demang. Men bu nikohga o‘z ixtiyorim bilan rozi bo‘ldim. Hayotimda nima yuz bermasin, sizni ayblamayman. Bu mening taqdirim. Agar shu ittifoq ikki xalqga tinchlik olib kelsa, men bunga qarshi chiqishga haqli emasman.
Qizining bu so‘zlarini eshitgan podshoh uning peshonasidan o‘pdi. Axir hech bir ota-onaga yagona farzandini begona yurtga kuzatish oson emas edi.
Va nihoyat o‘sha kun…
Amira o‘z vatani — Qomarni tark etdi va taqdiri tomon, Shams saltanatiga yo‘l oldi.

Nan Hao va Feng Shen.

2026-05-09T15:10:21.551Z