Axborot 24/7

Navoiyda zarur xarajatlar uchun ikki milliard so‘mdan oshiq pul ajratildi

2024-05-15T17:03:56.736Z

Jumladan, ta’lim sohasiga 1,2 milliard so‘m mablag‘ beriladi.

Navoiy viloyati hokimi Normat Tursunov pul ajratish bo‘yicha farmoyishni imzoladi.

Unga ko‘ra, kechiktirib bo‘lmaydigan choralar ko‘rilishi talab etiladigan va boshqa xarajatlar uchun yo‘naltirilgan mablag‘ hisobidan 1 mlrd. 780 mln. so‘m, viloyat mahalliy budjetining zaxira mablag‘lari hisobidan 307 mln. so‘m, jami 2 mlrd. 93 mln. so‘m pul ajratildi.

Jumladan, viloyat hokimligi vakillarining Samarqand viloyatiga xizmat safari uchun 27 million so‘m, Ma’naviyat va ma’rifat bo‘limiga 90 mln. so‘m beriladi. Viloyat maktabgacha va maktab ta’limi boshqarmasiga umumta’lim maktablarini zamonaviy kompyuter jihozlari bilan ta’minlash uchun 1 mlrd. 200 mln. so‘m taqdim etiladi, shuningdek obodonlashtirish boshqarmalarishga ham mablag‘ beriladi. Jumladan, Navoiy viloyati obodonlashtirish boshqarmasi 300 million so‘m oladi.

Ta’kidlash kerakki, Normat Tursunov bir oycha avval ham maktabgacha va maktab ta’limi tizimi, Yozuvchilar uyushmasi va obodonlashtirish sohasiga 2,5 mlrd. so‘m pul ajratgandi.

HUMO to‘lov tizimi aksiyadorlik jamiyatiga aylantirildi

2024-05-15T16:53:16.147Z

Hozirda "Milliy banklararo protsessing markazi" aksiyalarini birlamchi chiqarish bo‘yicha ishlar olib borilmoqda.

"Milliy banklararo protsessing markazi" MCHJ (HUMO) aksiyadorlik jamiyatiga aylantirildi. Bu haqda Davlat aktivlarini boshqarish agentligi xabar berdi.

2023 yil 30 noyabrdagi PQ–381-son qarorining 1-bandiga asosan 2024 yil 1 iyuldan boshlab to‘lov tizimi operatorlari faqat aksiyadorlik jamiyati shaklida tashkil etilishi belgilangan.

Qaror ijrosini ta’minlash maqsadida "Milliy banklararo protsessing markazi" mas’uliyati cheklangan jamiyatini aksiyadorlik jamiyati shaklida qayta tashkil etish to‘g‘risida Davaktiv agentligining tegishli buyrug‘i qabul qilindi va jamiyatning yangi tahrirdagi ustavi 2024 yil 13 may kuni Davlat xizmatlari markazidan davlat ro‘yxatidan o‘tkazildi.

Hozirda "Milliy banklararo protsessing markazi" aksiyadorlik jamiyatining aksiyalarini birlamchi chiqarish bo‘yicha tegishli ishlar amalga oshirilmoqda.

Internetda G‘azo fojiasiga befarq bo‘lgan yulduzlarni bloklashmoqda

2024-05-15T16:46:18.675Z

Jastin Biber, Selena Gomes, Zendaya, Dreyk, Kardashyan va Teylor Svift kabi ko‘plab mashhur yulduzlar tanqidlar yomg‘iri ostida qolgan.

Isroil armiyasining G‘azo sektoridagi vahshiyliklariga va Falastin xalqiga qarshi ochiq-oydin genotsid uyushtirayotganiga jahon afkor ommasi jim qarab turgani yo‘q. Ular Yahudiy davlatining (Isroilning konstitutsiyadagi rasmiy nomi) qonxo‘rligidan noroziliklarini hech bo‘lmasa tinch namoyish, flesh-mob, iqtisodiy boykot yoki internet orqali aksiyalar yo‘li bilan oshkor etmoqda. Fojiani ko‘rib-ko‘rmaslikka olayotgan omma e’tiborini tortishga urinmoqda.

Yaqindan boshlab, Internetdagi ijtimoiy tarmoqlarda norozilikni namoyon etishning yangi shakli paydo bo‘ldi. Ijtimoiy tarmoq foydalanuvchilari G‘azo fojiasi bo‘yicha o‘z munosabatini bildirishdan qo‘rqib, sukut saqlayotgan mashhur yulduzlarning sahifalarini ommaviy ravishda bloklashni yo‘lga qo‘ydi.

Jastin Biber, Selena Gomes, Zendaya, Dreyk, Kardashyan va Teylor Svift kabi ko‘plab mashhur yulduzlar tanqidlar yomg‘iri ostida qolgan. Hatto Teylor Svift kabi “yorqin” san’at yulduzlarining ko‘p yillik muxlislari ham uni bloklashga qaror qilishdi.

NBC news'ning ma’lum qilishicha, mazkur jarayon ishtirokchilari Yahudiy davlati armiyasining G‘azo sektoriga bostirib kirib, falastinlik ayollar va bolalarni bir boshidan qirishni boshlagan kunlardan beri o‘z noroziliklarini namoyish eta boshlagan edi. Lekin qudratli davlatlarning homiyligi va xalqaro tashkilotlarning ojizligidan quturgan Isroilning barcha kelishuv va va’dalarni buzgan holda Rafah shahriga hujum qilganida bu jarayon ko‘lami yanada kengaya boshladi.

Yahudiy armiyasi askarlari G‘azoda tinch aholini ayamay qira boshlagan bir paytda yulduzlarning surbetlarcha Met Gala noyob kiyimlar ko‘rgazmasini o‘tkazishgani tarmoqlar foydalanuvchilarining ayniqsa g‘azabini keltirdi. Ko‘pgina foydalanuvchilar bu namoyishni haddan oshish va sionist askarlar qo‘lida o‘lim topgan (va topayotgan) o‘n minglab begunoh ayollar va bolalar xotirasiga hurmatsizlik, deya baholashdi.

Mashhur bloger Xeyli Kalil o‘zining Met Gala libosida suratga tushgani va “Let Them Cake” ovozi bilan sinxronlashtirilgan videoni internetga joylaganidan keyin ayniqsa noroziliklar kuchaygan.

Ma’lumki Let Them Cake (aniqrog‘i Let them eat cake) naqli 1793 yilda qatl etilgan qirolicha Mari Antuanetta bilan bog‘liq. U non yo‘qligi bois och qolib, isyon ko‘targan qashshoqlardan g‘azablangan va "Nonlari yo‘q bo‘lsa, ana, tort yesinlar!" degan ekan. Xeyli Kalilning shu sahnaga taqlid qilib, video joylagani G‘azo sektorida Yahudiy davlati askarlari o‘ldirayotgan qurbonlar ustidan kulish, deya baholandi.

Keyinchalik Kalil foydalanuvchilardan uzr so‘rab chiqib chiqdi. “Yulduz” qiz uni shunchaki Met Gala arafasida o‘tkazilgan ziyofatga chaqirishganini, tadbirda ishtirok etmaganini bildirdi. G‘azo fojialari haqida gapirmaganini esa, “yetarlicha ma’lumotga ega emasligi” bilan izohladi.

"Mashhur yulduzlarni va inflyuenserlarni bloklash kerak. Muhtojlarga yordam berish uchun biz ularga bergan hamma narsamizni: layklar, sharhlar va pullarimizni qaytarib olish vaqti keldi”, deyishmoqda flesh-mob ishtirokchilari.

Ta’kidlash kerak, Isroilning insoniyatga qarshi jinoyatlari va xunrezliklariga qarshi chiqayotganlarning ko‘p qismi musulmonlar emas, ular shunchaki insoniyligini yo‘qotmagan, turli millat va dinlarga mansub odamlardir.

Nukusda ko‘zi ojizlar kutubxonasiga ajratilgan pullar talon-toroj qilindi

2024-05-15T16:25:57.047Z

Jami 530,4 mln. so‘mlik ishlar bajarilmagan bo‘lsada, qo‘shib yozib yuborilgan.

Nukusda ko‘zi ojizlar maxsus kutubxonasi uchun ajratilgan mablag‘lar talon-toroj qilindi. Aytilishicha, Bosh prokuror o‘rinbosari Sh.To‘xtaboyev boshchiligidagi ishchi guruh tomonidan Qoraqalpog‘istonda nogironligi bo‘lgan shaxslarni ijtimoiy himoya qilish va ularning ta’lim olishi uchun yaratilgan sharoitlar ahvoli o‘rganilgan.

Ushbu maxsus kutubxona ma’muriy binosini yangidan qurish va jihozlash bo‘yicha amalga oshirilgan qiymati 10,4 mlrd. so‘mlik pudrat ishlari o‘rganilib, jami 530,4 mln. so‘mlik ishlar haqiqatda bajarilmagan bo‘lsada, hisobotlarga qo‘shib yozish yo‘li bilan budjet mablag‘lari talon-toroj qilingani aniqlandi.

Kutubxonani jihozlash maqsadida ajratilgan 2 ta “brayl” printeri uchun 90 mln. so‘m va 1 ta ovoz yozish studiyasi uchun 50 mln. so‘m mablag‘lar ham o‘zlashtirib yuborilgani oqibatida ko‘rish qobiliyatida nuqsoni bor shaxslarni qoraqalpoq tilida zarur adabiyot va audio materiallar bilan ta’minlash imkoni cheklangan.

Mazkur holat yuzasidan JKning 167-moddasi (O‘zlashtirish yoki rastrata yo‘li bilan talon-toroj qilish) 3-qismi “a” bandi hamda 209-moddasi (Mansab soxtakorligi) 1-qismi bilan jinoyat ishi qo‘zg‘atildi.

Hozirda tergov harakatlari olib borilib, yetkazilgan zararni qoplash choralari ko‘rilmoqda.

Qishloq xo‘jaligi bo‘limi bosh hisobchisi katta pulni o‘zlashtirdi

2024-05-15T16:22:14.882Z

Sudlanuvchi olti yil davomida Konimex tuman qishloq xo‘jaligi bo‘limi bosh hisobchisi lavozimida ishlagan.

Jinoyat ishlari bo‘yicha Konimex tuman sudining ochiq sayyor sud majlisida mablag‘larni o‘zlashtirgan qishloq xo‘jaligi bo‘limi bosh hisobchisiga jazo tayinlandi. Sud hukmi Platina.uz ixtiyorida mavjud.

Sudlanuvchi 2017 yil 6 noyabrdan 2023 yil 1 sentyabr kuniga qadar Konimex tuman qishloq xo‘jaligi bo‘limi bosh hisobchisi lavozimida ishlagan.

U bo‘lim boshlig‘ining moddiy rag‘batlantirish hamda mukofot pullari ajratish to‘g‘risidagi buyruqlariga asosan o‘ziga ajratilgan rag‘batlantirish mablag‘lariga biror-bir asoslarsiz 2019 yil davomida 4.865.524 so‘m, 2020 yil davomida 6.007.000 so‘m, 2021 yil davomida 22.860.000 so‘m, 2022 yil davomida 67.781.000 so‘m miqdordagi ortiqcha rag‘batlantirish mablag‘larini “UzASBO” elektron dasturi orqali to‘lovga taqdim qilib, o‘ziga tegishli bo‘lgan bank plastik kartasiga tushirib olib o‘zlashtirgan.

Shuningdek, u jinoiy harakatlarini davom ettirib, bo‘lim bosh mutaxassisi B.Tileukulovga biror-bir asoslarsiz 2021 yil davomida 3.110.000 so‘m, bo‘lim boshlig‘i lavozimida ishlagan B.Xatamovga 840.000 so‘m ortiqcha mablag‘larni qo‘shib yozib to‘lovga taqdim qilib, jami 105.458.439 so‘m ko‘p miqdordagi pullarni o‘zlashtirish yo‘li bilan talon-taroj qilgan. Bundan tashqari bosh hisobchi rag‘batlantirish, ustama hamda mukofot pullarini soxta ma’lumotlar kiritilgan holda tayyorlangan to‘lov xabarnomalarini “UzASBO” elektron dasturi orqali to‘lovga taqdim qilib, davlat va jamiyat manfaatlariga jiddiy zarar yetkazgan.

Oqibatda sud ayblanuvchini JKning 167-moddasi 2-qismi “a,g” bandlari va 209-moddasi 1-qismi bilan javobgarlikka tortishni lozim topdi. Sud aybdorni uzil-kesil 1 (bir) yil 6 (olti) oy muddatga muayyan huquqdan ya’ni qishloq xo‘jaligi bo‘limlarida mansabdorlik va moddiy javobgarlik vazifasini egallash huquqidan mahrum qilib, ish haqining 15 foizi miqdorini davlat daromadi hisobiga ushlab qolgan holda 2 (ikki) yil muddatga axloq tuzatish ishlari jazosiga hukm qildi. Jazo tayinlashda yetkazilgan zarar qoplangani inobatga olingan.

Bundan tashqari 42 mln. 430 ming so‘m mablag‘ davlat budjetiga o‘tkaziladi

Chekka hududlarda IT-shaharchalar tashkil etiladi

2024-05-14T05:05:04.594Z

Ular dastlab respublikaning 15 ta tuman va shaharlarida faoliyat yuritadi.

Kunikecha Prezidentga mamlakatimizda raqamli texnologiyalarni rivojlantirish, bu sohada yoshlarni va loyihalarni qoʻllab-quvvatlash chora-tadbirlari boʻyicha axborot berildi.

Maʼlum boʻlishicha, joriy yilning oʻtgan toʻrt oyida IT sohasidagi xizmatlar hajmi 20 foiz oʻsib, 200 million dollarlik eksport qilingan. Yana 5 mingta yangi ish oʻrni yaratilgan.

Ammo hududlar kesimida bu soha faqatgina Toshkent shahriga yaxshi rivojlangan. Masalan Oʻzbekiston boʻyicha faoliyat yuritayotgan IT mutaxassislarining 80 foizi shu yerda yashaydi.

Shu bois, bu sohani chekka hududlarda ham rivojlantirish maqsadida IT-shaharchalar tashkil etish rejalashtirilgan.

Loyihaga koʻra, bunday maskanlar dastlab 15 ta hududda – Chimboy, Gʻijduvon, Zomin, Sharof Rashidov, Forish, Xatirchi, Pop, Shahrisabz, Qoʻshrabot, Sariosiyo, Sirdaryo, Parkent, Toshloq va Tuproqqalʼa tumanlari hamda Xonobod shahrida tashkil qilinadi.

Ularda yiliga 10 mingga yaqin yoshlar IT, chet tili va boshqa zamonaviy kasblar boʻyicha bepul oʻqitiladi.

Prezident shaharchalar yoshlar uchun qulay joyda boʻlishi, ularda yuqori malakali mutaxassislar dars berishi zarurligini taʼkidlagan.

“Shiddat bilan oʻzgarayotgan davrda hamma sohaga axborot texnologiyalarini biladigan kadrlar kerak. Bu sohada xizmatlar uchun ham, eksport uchun ham eng asosiy resurs bu – malakali mutaxassislar. IT-shaharchalar bu yoʻlda yoshlarga qanot boʻladigan, zamonaviy kasblarga oʻrgatadigan tizim boʻlishi kerak”, – degan Shavkat Mirziyoyev.

Maktab o‘quvchilari “Bitiruv kechalari” o‘tkazishi taqiqlandi

2024-05-14T04:52:39.447Z

"So‘nggi qo‘ng‘iroq"da maktab o‘quvchilari sonidan kelib chiqqan holda faqatgina 1-, 4-, 9-, 11-sinf o‘quvchilari jalb etiladi.

Maktabgacha va maktab ta’limi vazirligi "So‘nggi qo‘ng‘iroq" tadbirlarini o‘tkazishga doir tavsiyalarni e’lon qildi.
Unga ko‘ra, umumiy o‘rta ta’lim muassasalarida "So‘nggi qo‘ng‘iroq" tadbirlari:
- joriy yilning 25 may kuni soat 8:00 dan 9:00 ga qadar tashkil etiladi;
- maktab o‘quvchilari sonidan kelib chiqqan holda faqatgina 1-, 4-, 9-, 11-sinf o‘quvchilari jalb etiladi;
- mahalla faollari, ota-onalar va huquqni muhofaza qilish idoralari vakillari bilan hamkorlikda yong‘in va texnika xavfsizligi qoidalariga amal qilingan holda tashkil etiladi;
- faxriy o‘qituvchilar, ota-onalar, mahalla faollari, o‘rnak bo‘ladigan maktabning sobiq bitiruvchilari taklif etiladi;
- yil davomida namunali xulq va a’lo baholarga o‘qib, eng yuqori reyting ko‘rsatkichlariga erishgan iqtidorli bitiruvchilar rag‘batlantiriladi;
- maktab hayotida faol ishtirok etayotgan, odob-axloqi, intiluvchanligi bilan tengdoshlariga o‘rnak bo‘layotgan o‘quvchilarning ota-onalariga "Eng faol ota", "Jonkuyar ona", "Mas’uliyatli ota-ona", "A’lochi o‘quvchi otasi", "Bilimli qiz onasi" nominatsiyalari bo‘yicha tashakkurnomalar beriladi.
2023-2024-o‘quv yilini yakunlash va "So‘nggi qo‘ng‘iroq" tadbirlarini o‘tkazish davomida quyidagilar taqiqlanadi:
- turli restoran va kafelar, xonadonlarda "Bitiruv oqshomlari"ni o‘tkazish, bosqichli nazorat imtihonlari va yakuniy davlat attestatsiyalarini o‘tkazishda, ta’lim muassasalarini yangi o‘quv yiliga tayyorlash borasida o‘quvchi va bitiruvchilar hamda ularning ota-onalaridan turli xil pul mablag‘larini yig‘ish;
- bitiruv tadbirlarida o‘quvchilardan qimmatbaho sovg‘alar uchun pul yig‘ish, bitiruv kechalariga atab qimmat kiyimlar olish, yengil avtomashinalarda sayr tashkil etish.
- o‘quvchilarning guruh-guruh bo‘lib xiyobonlar, istirohat bog‘lari, cho‘milish havzalariga borishi.

Nogironlik nafaqasi toʻgʻrilab berishi evaziga 200 dollar soʻragan shifokor ushlandi

2024-05-14T04:35:36.582Z

Voqea Buxoro viloyati Jondor tumanida boʻlib oʻtgan.

Maʼlum boʻlishicha, Jondor tuman tibbiyot birlashmasi rentgenolog vrachi bir fuqaroga nogironlik nafaqasiga chiqishda kerakli boʻladigan hujjatlarni tayyorlab berishni vaʼda qilgan. Bunda u vakolatli tanishlari borligini aytgan.

Joriy yilning 25-aprel kuni oʻtkazilgan tezkor tadbirlar davomida shifokor tibbiyot birlashmasiga qarashli poliklinikaning maʼmuriy binosida talab qilingan pulni olgan vaqtida ushlangan.

Hozirda mazkur holat yuzasidan jinoyat ishi qoʻzgʻatilib, dastlabki tergov harakatlari olib borilmoqda.

382 nafar mutasaddi ishdan olindi

2024-05-11T13:35:00.353Z

Ular Sayxunobod tajribasining joylardagi ijrosiga sustkashlik bilan yondashgan.

Charm va ipak sanoatini rivojlantirish masalalariga bag‘ishlangan yig‘ilishda Shavkat Mirziyoyev tuman darajasidagi 382 nafar mas’ul ishdan olinganini ma’lum qildi.
Qayd etilishicha, aprel oyining o‘zida 365 ming aholi bandligi ta’minlangan va tadbirkorlikka jalb qilingan. Banklar o‘z mijozlarining muammolarini hal qilib, 115 ming kishining ishli bo‘lishiga sharoit yaratgan. Mahallalarda 70 mingta mikroloyiha amalga oshirilgan. 465 ming gektar tomorqaga ekin ekilgan.
"Lekin ayrim hududlarda sustkashliklar ham bor. Masalan, o‘rganish o‘tkazilgan 7 ta tumanda o‘nlab tomorqalarda mahsulot ekilmagan. Sustkashlikka yo‘l qo‘ygani uchun tuman darajasidagi 382 nafar mas’ullar ishdan olingani ma’lum qilindi", deyiladi prezident matbuot xizmati xabarida.
Davlat rahbari bandlik va aholi daromadi masalasi birlamchi ahamiyatga ega ekanini yana bir bor ta’kidlab, barcha darajadagi rahbarlarni ogohlantirdi.
Sayxunobod tajribasi bo‘yicha ishlarni tuman va mahalla kesimida sifatli tashkil etish, aholiga doimiy ish o‘rni va daromad manbai yaratish bo‘yicha vazifalar ko‘rsatib o‘tildi.

Yerda so‘nggi 20 yildagi eng kuchli magnit bo‘roni kuzatilmoqda

2024-05-11T13:30:15.923Z

Ushbu hodisa qutb yorug‘liklarining dunyo bo‘ylab ko‘rish imkoniyatini yuzaga chiqardi.

So‘nggi 20 yildagi eng kuchli magnit bo‘roni shimoliy qutb yorug‘liklarni Tasmaniyadan Britaniyagacha kuzatish imkoniyatini yuzaga chiqardi, deb yozadi AFP.
Agentlik qayd etishicha, energetika kompaniyalari, aviakompaniyalar va sun’iy yo‘ldosh operatorlari hokimiyatdan Yer magnit maydonidagi o‘zgarishlar tufayli yuzaga kelishi mumkin bo‘lgan uzilishlar haqida ogohlantirish olgan.
Rasmda Liverpuldagi Krosbi-Bich tasvirlangan bo‘lib, u Shimoliy chiroqlarning ajoyib manzarasiga ega edi.
AQSHda uni hatto janubda - Alabama va Shimoliy Kaliforniyada ko‘rish mumkin edi. Rossiyada - hatto Rostov-na-Donda ham bu hodisa kuzatildi.
"Quyosh bo‘roni - bu quyosh faolligi tufayli Yerning magnit maydonidagi buzilish. Bu hodisa magnit maydonning tebranishlariga olib kelishi mumkin, bu esa o‘z navbatida o‘tkazgichlarda, jumladan, inson tanasida elektr tokining paydo bo‘lishiga olib keladi”, deb ogohlantirdi Rossiya Fanlar akademiyasi Koinot tadqiqotlari instituti Quyosh astronomiyasi laboratoriyasi rahbari Sergey Bogachev. RBK bilan suhbatda.
" 7—8 ballik geomagnit bo‘ron qo‘zg‘alishi kun davomida kuzatilishi prognoz qilinmoqda. Ertaga xavfsiz qo‘zg‘alishlarga qaytadi...
Bu kabi ta’sirga moyil kishilar spirtli ichimliklar ichishdan tiyilishi, ko‘p ovqatlanmaslik, jismoniy zo‘riqish bilan bog‘liq turli mashqlar bajarmaslik, ko‘proq dam olishi, ko‘proq suv, yalpiz-ko‘k choy damlarini ichish tavsiya etiladi.
Hozirda dunyoda radioaloqa bilan bog‘liq mini (balki mega) blekautlar kuzatilayotgan bo‘lishi kerak" deya yozadi o‘zbek meteorologi Erkin Abdulahatov.