@balasagyn

📓 «Гениалдуу азык»

2020-08-08T10:07:20.442Z

Автору: Макс Лугавер

Автордун энесине коюлган «Альцгеймер (прогрессивдүү деменция) оорусу» деген коркунучтуу диагноз ийгиликтүү медиа кызматкери Макс Лугавердин жайбаракат жашоосун күтүүсүздөн үзгүлтүккө учуратты. Лугавер узак убакыт бою Альцгеймер оорусунун себептери жөнүндө ойлонуп, көптөгөн изилдөөлөрдүн жыйынтыгын чыгарып, күтүлбөгөн, үрөй учурарлык жыйынтыкка келип, илдеттердин пайда болушун жашоо мүнөзүбүз менен байланыштырат.

1. Иммундук системабыз жана тамак сиңирүү жолундагы микроорганизмдер өз ара байланышта. Бактериялар бардык жерде — абада, сууда, тамак-ашта, денебизде бар. Микроорганизмдердин эң көп саны адамдын ичегилеринде болот, алар бир гана тамак-ашты сиңирүүгө катышпайт. Адам мээси организмдеги бардык процесстерди жөнгө сала албаган үчүн кээ бир жумушту, мисалы, иммундук системаны колдоону, бактерияларга өткөрүп берген. Адам стерилизациялап, тамак даярдоону, андагы бардык пайдалуу жана анча пайдалуу эмес микроорганизмдерди алып салууну үйрөндү. Бирок байыркы адамдын иммунитети ар дайым иштеп турууга дуушар болгон.
Адамдын иммунитетинин мүмкүнчүлүктөрү чексиз эмес, анын жардамчы пробиотиктери — пайдалуу бактериялары бар. Алар негизинен ичегилерде жашашат жана өз алдынча көбөйөт же сырттан, мисалы, ачытылган сүт азыктар, тамак-аш кошулмалар, дары-дармектер аркылуу келиши мүмкүн. Пайдалуу бактерияларды көбөйтөм десеңиз, каалаган жашылча жемиш же чөп-чар колдонуңуз. Романо салаты, шпинат, цуккини, брокколи жана башкаларга өзгөчө көңүл буруу керек. Көк чөптө көптөгөн баалуу микро жана макро-элементтер бар, алар денени жашартат жана мээнин ишин жакшыртат. Чөп-чардан сырткары чийки жаңгак, бадамга көңүл буруңуз. Бадамдын кабыгы зыян микроорганизмдер менен күрөшүүгө жардам берет жана антиоксиданттарга бай. Бадамда ошондой эле баалуу Е витамини бар, ал мээнин жаштыгын узартат.
Адамдын иммунитети ар дайым иштеп турушу керек. Гигиена керек, бирок ашыкча стерилдүү болуунун кажети жок. Организмде патогендердин бар болушу иммунитетибиздин иштеп турушуна жардам берет, бирок патогендердин саны көп болбошу үчүн пробиотиктер керек.

2. Бактылуу болгум келет десеңиз, нейромедиаторлорду "тууралаңыз".
Бук болуу сезими дээрлик баардык адамдарга, айрыкча кыш узак, караңгы жана суук болгон түндүктө белгилүү. Күн нуру менен адамдын маанайынын байланышы бар. Адамдын көңүлүн көтөргөн Д витамини күн нурунан кийин гана пайда болот. Ырахат гормону — серотонин Д витамини жетиштүү учурда гана пайда болот. Серотонин гормонунун деңгээли эс тутум, көзөмөл жана пландаштыруу жөндөмүнө таасир этет.
Дофамин аттуу дагы бир нейромедиатор бар, ал жакшы маанай гормону болуп саналат. Ал биз жыргап, ырахат алып жатканда, мисалы, жагымдуу тамак жегенибизде, жакшы көргөн музыкабызды угуп жатканда же секс учурунда пайда болот. Кээ бир нерселер дофаминди кыйла күчөтүп катуу көз карандылыкты жаратат. Буларга наркотиктер, шекер, жана жогорку углеводдук тамактар кирет. Шекерди колдонбой коюу — оор, биро андан толук баш тартуу керек. Спорт, хобби же адат болуп калган социалдык зонадан чыгуу дофаминдин табигый пайда болушуна алып келет.

3. Гормондоруңуз өз ордунда, маанайыңыз эң жогору, салмагыңыз нормалдуу болушу үчүн жөн гана убагында уктаңыз!
Уйку учурунда мээ толук жаңыланат. Уйкусуздук - чарчоого, тынчсызданууга, алсыроого алып келет. Түнкү уйкунун сапаты көптөгөн факторлор менен аныкталат - стресстин деңгээли, үй-бүлөдөгү жана жумуштагы атмосфера, эс алуу ж.б. Уйкуну жакшыртуу үчүн уктаардын алдында ысык ваннага түшсөңүз болот, түндө бардык жарыкты өчүрүңүз, кечки саат 16дан кийин кофе ичпеңиз, телефонду төшөктөн алыс кармаңыз, жана омега-3 майларын жетиштүү өлчөмдө жеңиз.

4. Стресстин ден-соолукка пайдалуу болгон түрү бар.
Илгери адам коркунучка ар дайым дуушар болгон - жапайы жаныбарлар, ачкачылык, душмандары болгон. Адам кыска мөөнөттүү, бирок катуу стрессти баштан өткөрчү, ошондуктан ар дайым формада болгон. Ал эми биздин заманда стресс созулма өнөкөт болуп калды. Стресстин эки түрүн карап көрөлү:
1. Убактылуу. Ал спорт менен машыгуу, музыкалык аспаптарда ойноо же татаал материалдарды окуу сыяктуу кыйынчылыктарга туш болгондо пайда болот. Мындай стресстин пайдасы чоң, себеби ал гормезисти — жалпы ден-соолукту чыңдаган стресс гормонунун кичинекей дозаларын чыгарат.
2. Созулма өнөкөт. Ал жашоого, жумушка, аз акчага болгон нааразычылыктан улам келип чыгат. Мындай стресс мээге зыян.
Азыркы адамдын көптөгөн жаман адаттары бар. Алардын бири — жумушта, үйдө же транспортто узак убакыт отуруу. Узак отуруу узак стрессти пайда кылат. Окумуштуулардын айтымында, айрым неврологиялык ооруларга отурукташкан жашоо мүнөзү себеп болушу мүмкүн, ал эми кыймылдоо болсо кээ бир ооруларды жөн гана алдын албастан, айыктыра да алат.

5. Мээнин иштешин заматта жакшырта турган азыктар бар.
"Адам мээси 25 жашка чейин өнүгөт да, андан соң өчө баштайт" деп уктуңуз беле? Мындай көз караш илимде 1990-жылдардын ортосуна чейин үстөмдүк кылган. Азыр окумуштуулардын көз карашы башкача. Мээ өмүр бою өрчүп келет, бул нейропластиканын натыйжасында, б.а. мээнин жаңы клеткаларды каалаган жашта пайда кыла алгандыгында. Буга кеңири масштабдуу иликтөөлөр далил.
Ден-соолукка терс таасирин тийгизүүчү факторлор:
1. Аз кыймылдуу жашоо көптөгөн оорулардын өрчүшүнө себеп болот.
2. Адамдын иммундук системасы узак стресстен, ашыкча салмактан жана туура эмес тамактануудан жабыркайт. Натыйжада - кант диабети, депрессия жана башкалар пайда болот.
3. Токсиндер. Көпчүлүк азыкта табигый аналогу жок заттар бар, ошондуктан алар организмге терс таасирин тийгизет. Мисалы, жасалма таттуулагычтар, эмульгаторлор, гидрогенизделген майлар жана башкалар кирет.

6. Майлар адамдын ден-соолугун чыңдайт, бирок ар дайым жана баары эле эмес.
Холестерин көп убакыт бою жүрөк ооруларынын түпкү себеби болуп келген, ошондуктан майсыз тамак-аш өнөр жайы өнүккөн. Кийинчерээк тереңирээк изилдөөлөр пайда болуп, холестерин - "жаман" жана "жакшы" түрү болуп экиге бөлүндү. Майлар адам рационунда маанилүү, анткени мээ дээрлик толугу менен майдан турат. Денебиздеги холестириндин 25% дан ашыгы мээде камтылган. Нейрондорду бузулуудан коргоочу миелин кабыктары да майлардан турат. Мындан тышкары, майлар энергия булагы болуп саналат. Майлардын ар кандай түрлөрү бар. Каныкпаган майлар тобу биз үчүн өтө пайдалуу — алардын көпчүлүгү өсүмдүк майларында жана майлуу балыктарда кездешет. Каныкпаган майларга омега-3 жана омега-6 майлары кирет, аларды адам туура пропорцияда колдонуш керек - тамакта омега-6га караганда омега-3 көп болушу керек. Адамдар үчүн эң пайдалуу азыктардын тизмесинде автор зайтун майы жана авокадо жөнүндө баса белгилеген. Зайтун майынын курамында олеокантал баалуу компоненти бар. Ал сезгенүүгө каршы күчтүү элемент болуп саналат. Зайтун майында Е витамини да көп. Зайтун майын тандоодо майдын түсүнө эмес, анын даамына көңүл буруңуз — жогорку сапаттагы май чөп даамданып турат. Ал эми авокадонун курамында майлар, клетчатка жана Е витамини бар.
Каныккан майлар жөнүндө унутпаңыз - алар аз санда болсо да, керек. Анын негизги булагы сүт азыктары, тоок эти, кокос, зайтун. Жумурткачы? Ал ден-соолукка керекпи? Автор жумуртканы холестериндин жакшы булагы деп эсептейт жана аны пайдаланууну сунуш кылат.
Адам тамакка таптакыр кошпош керек болгон майлар бар — алар транс-майлар деп аталат жана зат алмашууну бузат. Транс майлар тазаланган майларда жана маргаринде, ошондой эле бардык тез тамак-аштарда кездешет.

7. Дан өсүмдүктөрү мурун ойлогондой ден-соолукка аябай пайдалуу эмес.
Жер-Ортолук деңиз диетасын көбү пайдалуу деп эсептешет, себеби анда дан өсүмдүктөрү көп. Автор изилдөө жүргүзүп, Жер-Ортолук деңиз диетасынын пайдасы данга байланыштуу эмес, ден-соолукка пайдалуу майлардын көп экендигинде аныктаган.
Дан өсүмдүктөрү маанилүү макроэлементтерге жана витаминдерге бай, бирок ошондой эле крахмалга да бай, ал кандагы инсулиндин деңгээлин кескин жогорулатат. Кандагы инсулиндин деңгээли дайым өйдө болсо жагымсыз кесепеттерге семирүү же кант диабетине алып келиши мүмкүн. Ар дайым инсулин деңгээлиңизди туруктуу абалда кармап туруш үчүн ашыкча жебөө, тазаланган кант жана ак нан сыяктуу тез углеводдордон баш тартуу керек. Албетте, ак нанга караганда кара нан ден-соолукка пайдалуураак бирок аны толугу менен ден-соолукка пайдалуу деп айтууга болбойт - андагы крахмалды унутпайлы.
Эгерде сиз таттуу нерсени өтө эле каалап жатсаңыз, анда какао курамы жогору (85% же андан ашык) кара шоколад сатып алыңыз. Какаодо баалуу антиоксиданттар бар, алар карылыкты акырындатат жана мээдеги кан айланууну жакшыртат.

📖 «Эң мыкты эс-тутум»

2020-06-26T10:42:09.136Z

Авторлору: Питер Браун, Генри Рёдигер жана Марк Макдэниэл

Адамзат колдонуп жаткан маалыматтын көлөмү жылдан жылга өсүүдө. Учурда адамдар өмүр бою окуйт, анткени окуу бизге ийгиликтүү иштөө үчүн, же жок дегенде "жашоодон артта калбоо" үчүн керек. Сиз маалыматты көпчүлүктөрдөй эле ойлонбой пайдалансаңыз керек. Же авторлор сунуштаган билимди тереңирээк изилдеп, окуу жөндөмүңүздү өркүндөтүп көрүңүз.
Бул жерде авторлордун 21-кылымдагы окуу процесси жөнүндө негизги ойлору келтирилген.
1. Кадимки «маанисин түшүнбөй жаттоо» — натыйжасыз.
Көпчүлүк адамдар маалыматты өздөштүрүүнүн бирден-бир жолу ушундай жаттоо деп эсептешет. Бул таптакыр туура эмес. Тилекке каршы, маалыматты кайра кайра кайталоо кыска мөөнөттүү гана натыйжа берет. Албетте, студенттер бардык темаларды үйрөнүп, ийгиликтүү тапшырат, бирок бир-эки күндөн кийин алар маалыматтын жарымын да эстешпейт.
Жаңы маалыматты жакшы эстеп калуу үчүн, аны адамдын эсинде болгон нерселер менен байланыштыруу керек. Бул — «эске түшүрүү» техникасынын маңызы. Мезгил-мезгили менен акыры маалыматты эстеп калабыз. Бул ыкманын көптөгөн артыкчылыктары бар.
Эстөө бир нече ыкмалар менен жүзөгө ашырылат:
1.1. Тестирлөө. Окуучулар маалыматты бир аз убакыттан кийин тест менен текшерсе, эстеп калуусу жакшы болот. Эксперимент тестирлөө аркылуу билимин текшерүү натыйжалуулугун көрсөттү. Мугалим материалдын бир бөлүгүн жөн гана түшүндүрүп берген, ал эми калган бөлүгүн түшүндүрүп бергенден кийин, анын негизинде тест өткөргөн. Натыйжалар кызыктуу болду — биринчи учурда, маалыматты сиңирүү деңгээли 79% ды түздү, ал эми тесттен өткөндөн кийин окуучулар 92% маалыматты эстеп калышты.
Демек: билим тесттерин үзгүлтүксүз өткөрүп туруу керек. Сөзсүз эле мугалим эмес, өзүңүз да билимиңизди текшерип туруңүз.
1.2. Топтолгон тажрыйбаны түшүнүп, ага маани берүү.
Нейрохирург Майк Эберсолддун күнү жумуш менен толгон. Ар бир күндүн аягында Майк ошол күнкү окуяларды, жасаган аракеттерин талдайт. Кээ бир ишин туура жасаганын, бирок кээ бир ишин башкача жол менен жасоого болоорун түшүнөт да эмкиде ишин жакшыртат. Ошентип, билими улам жаңыланып, курчуп турат.
1.3. Фидбэк байланыш. Башка бирөөнүн пикирин билүү менен алынган маалыматтын чындыгын же реалдуулугун билүүгө болот.

2. Маалыматты интенсивдүү алуу аны жаттоого өбөлгө түзөт деген ишеним бар. Бирок бул жаңылыштык болсочу? Бир темадан экинчиге өтүү алда канча натыйжалуу болот. Бир нерсени көп саат бою казып иштөөнүн ордуна, иш-аракетиңизди убакыт менен өзгөртүп туруу жакшыраак. Эксперимент жүргүзүлүп, анын жүрүшүндө окуучулардын үч тобу текстти окуп чыгышты. Биринчи топ материалды бир жолу, экинчиси эки жолу, үчүнчү топ бир жолу окуп, кийин башка ишке алаксып, андан соң экинчи жолу окуп чыкты. Эстеп калуу көрсөткүчтөрү экинчи жана биринчи топторго караганда, үчүнчү топто жогору болду. Ошентип, темага башыңыз менен кирбөө, тескерисинче, машыгууну башка нерселер менен алмаштыруу пайдалуу.
Нейрофизиологдор бул эффектти маалыматты эс-тутумунда топтоо процессинин өзгөчөлүктөрү менен түшүндүрүштү. Эс-тутумдагы маалыматты бекемдөө процесси эки сааттан эки күнгө чейин созулат. Билим чогултулуп аяктагандан кийин, маалымат узак мөөнөттүү эс тутумуна өткөрүлөт. Бирок бекитилбеген маалымат кыска мөөнөттүү эс тутумунда калып, тез эле унутулат. Ошондуктан интенсивдүү окуунун натыйжалуулугуна ишенбегиле. Эгер сиз бир нерсени тезинен жатташыңыз керек болсо, аны улам кыска убакыт ичинде интервал менен жаттаңыз, анан башка иш менен алек болуп, кайра кайрылыңыз.
Интервалдык жаттоонун артыкчылыгы эс-тутумдун жогорулашы гана эмес, маалыматты тереңирээк түшүнүү жана алган билимди практикада колдонуу болуп эсептелет.

3. Ийгиликтүү окуу сөзсүз эле ылдам жана оңой болушу шарт эмес.
Азыр жаңы билимди тез үйрөнгөн адам ийгиликтүү деп ойлошот. Биз бул жөнөкөй эрежени мектептен билебиз. Бирок жай үйрөнүү тезге салыштармалуу жаман эмес, тескеринче, айрым учурларда андан да пайдалуу. Билим атүгүл кыйынчылык менен алынса эң жакшы болот. Анткени кыйынчылыктар жаңы алынган маалыматты мурунку маалымат менен байланыштырат. Ал эми бири-бири менен тыгыз байланышкан маалымат адамга «автоматтык түрдө» иштөөгө мүмкүнчүлүк берет. Анда кантип «жасалма кыйынчылыктарды» ойлоп табабыз? Өзүңүзгө, мисалы, төмөнкүдөй кыйынчылыктарды жасоо менен, жаттасаңыз болот.
3.1. Маселени өзүңүз чечүүгө аракет кылыңыз. Эгерде сизде чечилбей турган бир маселе болсо, анын даяр чечимин издегенге шашпаңыз. Эгерде адам өзү чечим издеп, тапса, анда чечимдин өзү эсинде жакшы калат.
3.2. Күтүлбөгөн маалымат аркылуу машыгуу. Көбүнчө бейсбол оюнчулары алгач бир түрүн, андан кийин башкасын уруп үйрөнүшөт. Бирок эң сонун натыйжаларды бейсбол оюнчулары алдын-ала күтүлбөгөн подача менен машыккандар көрсөтүүдө. Алдын-ала билбөө принциби жаңы учкучтарды учуу тренажерунда окутууда дагы колдонулат. Принциптин ийгилиги, адам аны эмне күтүп тургандыгын алдын ала билбегендигине байланыштуу. Бул жагдай адамды чыгармачыл иш-аракет кылууга жана анын жөндөмдүүлүгүнүн чегине жетүүгө мажбур кылат.
3.3. Даяр жооптору жок тест. Жакшы тесттерде студент жообун жөн эле белгилеп койбой, жазыш керек.
3.4. Маалыматты кайра айтып берүү менен жаттоо. Мисалы, лекциянын материалдары окуу китебиндеги материалды кайталабаса, студенттер маалыматты эң жакшы жаттап калышат. Алынган маалыматты салыштыруу зарылдыгы, аны жакшыраак эстеп калууга мүмкүнчүлүк берет.
3.5. Жазуу жүзүндө ой жүгүртүү.

4. Бардык адамдар визуал жана аудиал болуп бөлүнөт имиш. Бул жаңылыш түшүнүк. Эксперименттин жүрүшүндө, тескерисинче, маалымат алуу үчүн чечүүчү болуп канал эмес, аны чагылдыруу стили, жана эң негизгиси - студенттин окууга болгон каалосу эсептелет. Биринчиден, студент билим алууга кызыгышы керек, экинчиден, маалыматты жаттоо стилине же каналына карабастан, өзүнүн бардык таанып-билүү ресурстарын колдоно билиши керек. Акырында, студент маалыматтагы мыйзам ченемдүүлүктөрдү байкап, башына туура киргизе алышы керек.

5. Ашыкча билим жөнүндө ой.
Билимдин жетишсиздигинен кооптуураак нерсе — алардын ашыкча болушу. Адамдын ой жүгүртүүсү өзгөчө кырдаал учурунда эсинде калган нерселерди эстеп түшүнүүгө аракет кылат. Тилекке каршы, бул механизм абдан өрчүбөгөндүктөн көп учурда кайгылуу кесепеттерге алып келет. Мысалы, учкучтар кырдаалды талдоого өтпөй, тескерисинче, эс тутумдагы өз сезимдерине таянып, көбүнчө анысы иштебей калат.
Төмөнкү ыкмалар кайгылуу каталарды кетирбөөгө жардам берет:
5.1. Коллегиялык көзөмөл. Эгер чечим өтө жооптуу болсо, абдан пайдалуу. Мисалы, татаал ишти талкуулоодо врачтардын консилиуму чакырылат.
5.2. Өзүн-өзү текшерүү. Эгерде сиз өзүңүздү мыкты адисмин деп ойлосоңуз, анда сынап көрүңүз. Албетте, тесттин жыйынтыктары сизди бир аз таң калтырышы мүмкүн. Мезгил-мезгили менен ар ким өз билим деңгээлин текшерип турушу керек.
5.3. Объективдүү көрсөткүчтөргө көңүл буруу. Кайсы гана кесип болбосун, анда объективдүү көрсөткүчтөр болот.

6. Мнемотехниканы колдонуу. Мнемотехниканы пайдалануу — укмуштуу пайдалуу нерсе, ал маалыматты эстеп калууну жеңилдеткен ыкма. Анын көп түрү бар, эң негизгилери булар:
6.1. «Эс-тутум сарайы». Байыркы мезгилден бери колдонулуп келген эски ыкма. Чоң көлөмдөгү маалыматты жаттоого болот. Өзүңүз жакшы билген бөлмөнүн ичиндекилери аркылуу жаттоо. Же болбосо үйдөн дүкөнгө чейинки жолдогу нерселер менен жаттоо. Бул ыкма эмне үчүн ушунчалык натыйжалуу болуп саналат? Себеби, адамдын эс тутуму абстракттуу жана белгисиз нерселерди жаттоого караганда конкреттүү образдарды жакшыраак өздөштүрөт.
6.2. Геолокация. Бул ыкма мурункуга бир аз окшоп кетет. Буну Марк Твен өзүнүн балдарына англис падышаларынын ысымдарын жана алардын сүргөн доору тууралуу жакшыраак эстеп калуу үчүн үйрөткөн. Балдары көп басып жүргөн жолдун боюна жазуучу падышалардын портреттерин койгон.
6.3. Сүйүктүү ырларыңызды жана кинолоруңузду колдонуңуз. Бир демкени эстеп калуу үчүн ал маалыматты жакшы көргөн каармандар аркылуу жаттаңыз.
6.4. Сүрөттөрдү жана образдарды колдонуу. Мисалы, бир тизмени жаттоодо, аларды номерлеп, ар бирине белгилүү бир сүрөттү ойлоп коюңуз. Тизмеңиз уйкаш болсо андан жакшы.
6.5. Акронимдер жана кыскартылган сөздөр, фразалар аркылуу жаттоо.

📔Анти-рак

2020-06-23T15:30:38.695Z

Автору: Давид Севан-Шрейбер

Китепти 31 жашында рак оорусуна чалдыккан белгилүү невропсихиатр жазган. Анда мээдеги рактын өтө коркунучтуу түрү болчу. Дэвидди бир нече айдын ичинде «кетет» дешкен, а бирок ремиссиядан кийин дагы 19 жыл жашаган. Ал кандайча ийгиликке жеткен? Заманбап медицинадан тышкары, ал жашоо мүнөзүн өзгөрттү. Автор өзүнүн мисалында жашоо мүнөзүн өзгөртүү боюнча сунуштардын маанилүүлүгүн көрсөткөн, аларды тилекке каршы, онкологдордун баары эле айта бербейт. Доктор Серван-Шрайбердин кеңештери ден-соолукту сактоого жана дарылоонун натыйжалуулугун жогорулатууга жардам берет. Китептин бардык кеңештери кесипкөй онкологдор жана психологдор менен талкууланып, изилдөөлөрдүн натыйжалары менен колдоого алынат.
Жашообуздун рак менен кандай байланышы бар.
Рак - кеңири жайылганы менен көптөр үчүн табышмактуу оору. Айрым адамдар ракты тукум кууйт деп ойлошот, ал эми башкалар ракты жугуштуу деп эсептешет. Онкологиялык оорулардын көпчүлүгү бактериялар же вирустар менен түздөн-түз байланышы жок.
Экинчи дүйнөлүк согуштан кийин Батыштын өнүккөн өлкөлөрүндө рак оорусу күчөдү. Рак оорусунун көбөйүшүнө көп нерсе себепкер болған - химикаттарды өндүрүү, айыл чарбасын химиялаштыруу, адамдагы стресстин деңгээли. Акыркы он жылдыкта Азияда да рак оорусу күчөдү, анткени жергиликтүү калк батыш коңшуларынын жашоо мүнөзүн жана тамактануу стилин кабыл ала баштады.
Ошентип, иммундук система бузулуп, рак клеткалары барган сайын көбөйүүдө. Жашооңузду өзгөртүңүз. Демек, сергек жашоо деген эмне?
1. Айлана-чөйрөнүн зыяндуу таасиринен коргонуу.
2. Диетаны туура сактоо.
3. Иммунитетти жогорулатуу.
4. Жан дүйнөсү тынчтандыруу.
Эң маанилүүсү - бул тамактануу, бирок бардык төрт фактордун айкалышы рактын толук алдын алууну камсыздай алат.

Рак деген эмне.
Рак клеткалары контролсуз көбөйүп, жабыркаган органды жана анын айланасындагы бардык ткандарды ууландырат. Рак клеткалары денеге жайылат. Мындан тышкары, кан тамырлары чоңоюп, шишиктерди азыктандырып турушат.
Рак менен күрөшүүдө организм алсыз эмес. Ал атайын өлтүргүч клеткаларды өндүрө алат. Алар бардык атиптик клеткаларды жок кылышат. Иммундук система рак менен күрөшүүдө маанилүү орунду ээлейт.
Иммундук система рак менен күрөшө алса, шишиктин айланасындагы ткандар сезгенбесе жана кан тамырлары шишикти азыктандырбаса, атиптик клеткалардын жайылышын токтотууга болот.

Тамактануу.
Сезгенүү процесси шишиктин өрчүшүнө чоң өбөлгө түзөт. Андыктан ракка каршы кандайдыр бир диетада сезгенүүнү басаңдатуучу азыктар камтылышы керек. Денеде сезгенүүнү пайда кылган азыктардан баш тартып, жана тескерисинче аны басаңдатуучу азык керек. Таң калыштуусу, азиялыктардан өлгөндөн кийин рак шишиктерин табышкан, бирок тамактануунун жардамы менен өрчүшү болгон эмес. Илгерки адамдын тамак-ашы учурдагыдан таптакыр айырмаланган. Азыркы адам калориянын 56 пайызынан көбүн үч булактан алат - агартылган ундан, тазаланган шекерден (мисалы: байыркы адам шекерди негизинен балдан алышкан жана жылына болжол менен 2 кг керектешкен; 19-кылымда 5 кг чейин керектешкен, ал эми биздин мезгилде адам жылына 70 кг шекер колдонот). Адамдар үчүн табигый эмес үчүнчү продукт - бул омега-3 жана омега-6 анормалдуу катыштары бар гидрогендик майлар. Айтмакчы, шекер рак шишиктерин жакшы өстүрүүчү зат. Шекер жана ак ун глюкозанын деңгээлин жогорулатат жана инсулиндин өсүш факторунун көбөйүшүнө шарт түзөт. Чындыгында, мындай шарттарда рак клеткалары өзүн абдан жакшы сезет. Эгерде сиз бардык сиропторду, таза шекер, ак ун, картошка жана гликемикалык көрсөткүчү жогору болгон бардык нерселерди жок кылсаңыз, анда сиз териңизди тазалап, арыктап эле койбойсуз, ошондой эле рактын алдын алып баштайсыз. Ал эми жемиштерди каалаганча жеңиз. Чай менен кофе шекерсиз, таттуу тамактар өтө аз болушу керек. Шекерден баш тартуу ден-соолукка зыян келтирбейт.

Эми сүт, үй канаттуулары жана жумуртка жөнүндө.
Рак жана семирүү жумуртка, сүт жана башка жаныбарлардан алынган продуктулардын көбөйүшү менен байланышпы? Түздөн-түз! Жалпысынан, чөп менен азыктанган уйлардан алынган сүт, каймак жана быштак заводдордо өндүргөн продукциялардан айырмаланып турат. Жумуртка жана тоок этинен да ушундай. Өнөр жай масштабында өндүрүүчүлөр жаныбарларга жана канаттууларга соя, жүгөрү жана комбикорм беришет, бул омега-6 майларын өзгөртөт. Эгерде анын керектөө нормасы ашып кетсе майдын бул түрү сезгенүү процесстерин күчөтөт.
Байкуш жаныбарлар жасалма гормондор менен азыктанышат - сүттүн түшүмдүүлүгү жогорулайт, малдын массасы өсөт, аягында ал көбүнчө рак оорусунан өлөт. Бир гана чөп менен азыктанган уйдан алынган сыр шишиктердин пайда болушуна жол бербейт. Анын курамында линол кислотасы бар. Эгерде сиз дагы эле эт жана сүт азыктары менен тамактансаңыз, анда мүмкүн болсо, малдын жемине зыгыр өсүмдүктөрүн кошуп берген фермерлерден сатып алыңыз. Көпчүлүк сүйгөн май же маргариндин акыбалы да жакшы эмес. Маргарин - бул транс майлардын эң булагы, ал сизди жай өлтүрөт. Бышырылган азыктардын дээрлик бардыгында маргарин бар. Албетте, май маргаринге караганда пайдалуу. Бирок бирөөнү экинчисинен кантип айырмалайсыз? Жөн гана өндүрүүчүгө ишенесизби? Табигый жем жеген мал болсо да кызыл эт жана чочконун этин таптакыр жебеңиз. Жумасына 300 г ашпашы керек.

Эми балык жана деңиз азыктары жөнүндө сүйлөшөлү. Жалпысынан алганда, эгерде зыяндуу заттар менен булганбаса, алар рактын мыкты алдын алуу катары кызмат кылышат. Кичинекей жандыктарга артыкчылык бериңиз, аларда зыяндуу заттар азыраак. Балыктын чарбалардан эмес деңизден болгону жакшы. Балыкты кууруп эмес, бир аз буу менен же эң төмөнкү температурада жай бышыруу керек. Көрүнүп тургандай, өзүбүзгө зыяндуу заттарды көбүнчө жаныбарлардын тамагынан аласыз.

Ракка каршы тамак-аштын дээрлик бардыгы өсүмдүктөрдөн. Эң эле "ракка каршы" өсүмдүктөр чакан тизмеси: зыгыр (льненное семя), имбир, пияз, сарымсак, татымалдар, куркумин, кара калемпир, үч чыныдан ашык көк чай, зайтун майы, брокколи жана чийки же бууда бышырылган капуста. Помидор, зайтун, вешенка козу карындары, ар кандай жапон козу карындары, ошондой эле мөмө-жемиштер өзгөчө таасир берет. Балырлар, балыктын боору, пробиотиктер менен байытылган йогурт жана селенге бай азыктар, мисалы, деңиз азыктары, иммунитетке жакшы таасир берет.

Экологиялык факторлор
Химия өнөр жайы. Химия тармагында бир жылда канча жасалма, кээде уулуу кошулмалар келип чыгат деп айтуу кыйын. Чындыгында, миллиондогон тонна. Жалпысынан, жасалма химиялык кошулмалардын саны 100 миңден ашкан. Үчүнчү миң жылдыкта адам күн сайын орто эсеп менен 3-7 миң кошулмага туш болот. Албетте, алар аз концентрацияда болот. Бирок алар бардык жерде бар. Эң кеңири таралган жана коркунучтуусу - мээнин жана репродуктивдик системанын рак оорусуна алып келген бензол, көптөгөн пластмассада, жабыштыруучу заттарда, майлоочу майларда, жуугуч заттарда жана жасалма түстөрдө, пестициддер жана гербициддерде, тамеки чеккен бензопирендер жана ксеноэстрогендерде бар. Атүгүл катуу пластиктен жасалган көптөгөн буюмдарда канцерогендер бар. Табигый жуугучтарга (мисалы, горчица порошогуна) артыкчылык берип, айнек, керамикалык идиштерди колдонуңуз. Пластик эч качан жылытылбашы керек. Активдүү жана пассивдүү тамеки тартуудан алыс болуңуз.
Уюлдук телефондор. Уюлдук телефонду азыраак колдонуу керек, анткени алар нурлануунун булактары болуп саналат жана анын адамдын нерв системасына таасири али толук изилдене элек. Ал эми 12 жашка чейинки балдарды катуу чектеши керек. Гарнитура же катуу сүйлөмө сыяктуу шаймандар дагы пайдалуу болот. Мобилдик телефонду жаздыктын же керебеттин жанына койбоңуз. Уйку учурунда учак режимин күйгүзгөн жакшы.

Эмоциялар жана рак
Психикалык көйгөйлөр рак оорусуна алып келбейт, бирок алар биздин иммунитетибизге олуттуу таасирин тийгизет. Көптөрү рак менен ооруганга чейин, узак убакыт стресс болуп, өзүн алсыз, керексиз сезгени таң калыштуу эмес.
Бул сезимдер бизди ичибизден жок кылат, өзүн-өзү жок кылуу механизмин ишке киргизет. Стресс лейкоциттердин активдүүлүгүн басат, ал эми норадреналин жана кортизол уктап жаткан рак клеткаларын азыктандырат.
Экспериментте алсыз абалда калган келемиштер рак оорусуна каршы дарыны башка келемиштерге караганда кыйла начар кабыл алышкан.
Тынч, жайбаракат абал рак оорусун алдын алганга же аны менен күрөшүүгө жардам береби? Ооба. Медитация жана релаксация практикасы чексиз ойлордон арылууга, гармонияга жетүүгө, дене менен акылдын ортосундагы байланышты түзүүгө жардам берет. Күнүнө 5 мүнөттөн баштап медитация же йога жасаңыз. Эгер сиз бүгүн мурункуга караганда такыр башка адам экендигиңизди сезе алсаңыз, алсыздык сезимин жеңе аласыз. Эс алуу менен, иммундук системаңызга чоң жардам бересиз. Спорт, медитация, туура тамактануу - бунун барлыгы жардам берет.
Рак менен күрөшүп жаткандар үчүн.
Медицина тез өнүгүп жатат, жаңы дары-дармектер тынымсыз ойлоп табылууда. Мүмкүн болсо, сиз алдыңкы дарылоону алуу менен жашоо мүнөзүңүздү өзгөртүшүңүз керек.

Дарыгерден кеңеш:
1. Кыймылдаңыз - мүмкүн болсо, спорт менен машыгыңыз, жамааттык иш алып барыңыз жана эч качан ачык маанайды жоготпоңуз.
2. Онкологдун дарылоосунан баш тартпаңыз, далилденбеген кымбат дары-дармектер менен дарыланбаңыз. Заматта айыгуу убадаларга ишенбеңиз.
Эч качан: "жасай албайм" дебеңиз.
Жакын адамыңыз ооруп калса ...
Бирөөгө рак жөнүндө айтуу кыйын. Мүмкүн болушунча эмоционалдык комментарий берүүдөн баш тартып, фактыларды гана билдирүү.
Түшүнүүгө убакыт берүү.
Дарылануу жөнүндө сүйлөшүү.
Терс эмоцияларга туруштук берүүгө жардам көрсөтүү.
Ооз менен гана эмес, иш-аракет менен да колдоо - кээде жөн эле кучактоо да жетиштүү.
Сөздөрдү кылдаттык менен тандап, жылуу жана көңүлдүү болуу. Адамга чын ыкластан кам көрүү рак оорусун дарылоодо таң калаарлык жардам бере алат.

📖 Майда жумуштардын чоң пайдасы

2020-06-23T15:19:58.816Z

Автору: Марк Санборн

Бул китеп мамиле жөнүндө. Өзүңүзгө жана башкаларга карата туура мамиле жөнүндө. Чыныгы мамилелер сейрек эмес, күнүмдүк майда-чүйдө иштерде кездешет. Анда чакан жумушубузду баштайлы.
1. Жаңы жашоонун принциптери.
1.1. Чыныгы ийгиликтин ачкычы - жакшы мамилени сактоого умтулуу. Бекем мамилелер бул ишеним. Ар бир адам аны түшүнүшү керек. Жетекчиби, досбу же тууганбы баары бир. Айланадагы адамдардын бардыгына урмат көрсөтүү керек. Сатып алуучу менен болгон мамилеңиз канчалык деңгээлде ишенимдүү болсо сиздин компаниянын товарларынын же кызматтардын ийгилиги ошончо болот.

1.2. Ар бир күндү жаңы барактан баштоо. Эски жашообузду, эски катачылыктарды эстегенде көңүлүбүз чөгөт. Тынчсыздануу бизди бардык жерде коштойт. Жашоо тездик менен көнүмүшкө айланат. Жашоонун жаңы мазмунун, өнүгүүнүн жаңы жолдорун издеңиз. Иш-аракеттериңизге бир аз башкача көз чаптырыңыз. Азыр кайда баратасыз? Мунун мааниси кандай? Балким, приоритеттериңизди кайрадан карап чыгышыңыз керектир.

1.3. Ооба, адам жашоосунда көп нерсени өзгөртө алат. Албетте, бардыгын эмес. Тышкы факторлор абдан күчтүү, бирок адам - чоң күчкө ээ! Эсиңизде болсун: адамдарга кандайча пайда алып келишиңизди жеке тандооңуз түзөт. Сизде көптөгөн мүмкүнчүлүк бар - жасаңыз. Өзгөчө болуп, кесиптештериңизге жардам берүүгө аракет кылыңыз. Кандай жумуш аткарсаңыз да өз жумушуңузда мыкты болуңуз. Сиз өзүңүздүн баалуулугуңузду түшүнсөңүз, жумушуңуздагы ордуңузду да түшүнүп каласыз. Акча үчүн гана эмес, жакшы натыйжа үчүн дагы иштеңиз. Баарынан ушунуңуз менен айырмаланасыз.

1.4. Чын дили менен баалуу нерсени жаратуу. Эгерде сиз өзүңүздү баалуу кызматкермин деп санасаңыз, кесиптештериңиз жана жетекчилериңиз аны билсе, анда жумушуңузду жоготом деп кабатыр болбойсуз. Себеби өз жөндөмүңүзгө жараша жаңы, татыктуу иш таба аласыз. Эгерде сиз баалуулугуңузду жаңы эле түшүнүп баштасаңыз, анда бардык керектүү билимди өздөштүрүүгө аракет кылыңыз. Өзүңүздүн бааңызды билүү да пайдалуу жөндөм.

1.5. Бул принциптерди билүү менен чектелбестен, эң негизгиси аларды колдонушуңуз керек.
Жумушта жоопкерчилик менен бирге адатка айланган жүрүм-турушуңузду өзгөртсөңуз болот. Бир гана эмгек акы үчүн гана жашабаңыз. Бардык жерде, бардык нерседен пайдалуу жактарын издеңиз. Башкаларга жан-дилден жардам берүүгө, алардын көйгөйлөрүн билүүгө аракет кылыңыз. Ошону менен бирге өзүңүздүн артыкчылыктарыңызды табыңыз.

2. Кемтиксиздикке карай жолдо.
Албетте, бир нерсеге өз көз-карашыңыз болсо жакшы. Андыктан, принциптерди өзүңүздүн жеке жашооңузга киргизе баштаңыз. Сиздин жашооңуздагы эң сонун сыйлыгыңыз жетекчинин мактоосуна ээ болуу эмес. Эмне кылгыңыз келсе, ошону жасоого мүмкүнчүлүккө ээ болуу - бул эң жогорку байлык. Жумушуңузду роботтой жасабай анын маңызына жетиңиз. Ага кызыгуу, көңүл менен мамиле кылыңыз. Жетекчи, кесиптештериңиз муну баалашат. "Чөйрөгө бергениңиздин баары, бир күнү өзүңүзгө кайтып келет" деген сөз бар го. Мүмкүн болушунча, тандооңуз жана иш-аракетиңиз ойлонуп жасалсын. Бакытка жетүү биз ойлогондон да жеңилирээк - болгону көрө албастыкты жана терс эмоцияларды унутуш керек. Эгерде учурдагы жумушуңуз сизге жакпаса, анда эмне иш жасай аласыз, эмне жагат ойлонуп көрүңүз. Балким, сиздин хоббиңиз жаңы жумушуңуз болуп калар.

Өзүңүздү жана дүйнөнү өзгөртө алаарыңызга дагы деле ишенбейсизби? Кичинекей кадамдан баштаңыз:
1. Сиздин айланаңызда эмне болуп жатканын байкаңыз. Жакшы ниет оң өзгөрүүлөрдү алып келет. Буга сиз себепкер боло аласыз.
2. Адаттагыдан башкачараак жүрүм-турум же мүнөз менен эсте каласыз.
3. Эрте менен тураар замат мен ааламдын бир бөлүкчөсүмүн деп айлана чөйрөңүздү иш-аракеттериңиз менен жакшы жакка өзгөртө бериңиз. Мисалы, жылмаюу. Ачууңузду азайтсаңыз - жашооңуз сөзсүз жакшырат.
4. Фантазия бардык жерде жаңы идеяларды издеп табууга жардам берет.
5. Болгон мүмкүнчүлүктөрдү колдонуңуз. Дагы бири болбошу мүмкүн.
6. Сиздин бардык иш-аракеттериңиз автоматтык түрдө эмес, мазмундуу болушу керек.
7. Сиздин аракеттериңиз кардарларга, үй-бүлөңүзгө, башчыларыңызга, досторуңузга жана башкаларга же чоочундарга болобу, ачык-айкын болуш керек.
8. Өзгөрүңүз, бирок өзгөчөлүгүңүздү жоготпоңуз. Амалданган митаамдар башкалардын ишенимине ээ боло албайт.
9. Сөзүңүзгө бек туруңуз, ал - кадыр-баркыңыз.
10. Убакыт - чектелген ресурс. Аны баалаганды үйрөнүңүз.
11. Боорукердикти өрчүтүңүз. Көпчүлүк адамдарда ал жокко эсе. Сиздин маектешиңиз учурда эмнени сезип жаткандыгын сезип көрүңүз.
12. Көйгөйлөрү байкалса адамдар аны жакшы туят.
13. Маектешиңизди кунт коюп уккула! Сурап, ал жөнүндө көбүрөөк билүүдөн тартынбаңыз.
14. Бара-бара айлана-чөйрө менен болгон мамилеңиз бир нече эсе жакшырат. Эсиңизде болсун, ар дайым көп күч-аракет жумшаңыз, адамдар маанилүү же кереги жок болуп бөлүнбөйт. Ар бирин сыйлаш керек.

Дагы бир нече маанилүү кеңештер:
1. Элге жаңы, оригиналдуу нерсени сунуштоо.
2. Ал үчүн, башкалардын муктаждыктарын изилдөө.
3. Өзүңүздүн да жана товардын да сырткы көрүнүшү маанилүү.
4. Катачылыктар, кечигүүлөр жана ушул сыяктуу терс факторлорду азайтыңыз.
5. Соода сунушуңуз боюнча ар дайым алдыга умтулуп, керектөөчүлөрдү оригиналдуу жаңылыктар менен таң калтырууга аракет кылыңыз.
6. Продукция мүмкүн болушунча көбүрөөк жеткиликтүү болушу керек.
Эсиңизде болсун, өзүңүздүн баалуулугуңузду сезе алгандан соң, башкалар да баалайт. Эгер терс тажрыйбаңыз көп болсо, капа болбоңуз. Ошондой эле, идея жөн эле ой түрүндө гана калса, иштебей тургандыгын унутпаңыз. Аны ишке ашыруу боюнча күн сайын иштешибиз керек. Сиз башка адамдардын идеяларын колдонсоңуз болот, бирок аларды өзүңүзгө ылайыктап алыңыз.

3. Башкаларга жардам берүү
Туура жолду досторуңузга, кесиптештериңизге да көрсөтө аласыз.
Биринчиден, ким чындап өзгөрүүнү кааласа.
Экинчиден - үлгүлүү болсоңуз көп адамдарды кызыктырасыз.
Үчүнчүдөн, сизге жакын көз караштагы адамдарды топтоп алыңыз.
Кызматкердин эмгегин маал-маалы менен кошумча сыйласаңыз, иштөөгө көбүрөөк даяр болот, сөзүңүздү жакшы угат. Сыйлык жакшы түрткү берет. Бирок, кызматкерге сыйлык берүүнүн алдында айрым кеңештерди эстеп алыңыз:
1. Сиз баардык кызматкерлерге алардын ишинин маанилүүлүгүн жеткиришиңиз керек.
2. Белгилүү иш-аракеттери үчүн белгилүү бир сыйлык болсун.
3. Сыйлык жеке болушу мүмкүн.
4. Кайра байланыш болушу керек.
5. Бардык кызматкерлерге, алардын иш-аракеттери чоң өзгөрүүлөргө алып келгенин көрсөтүңүз.
Башкаларга дем-кубат берүү менен эле эмес, пайдалуу нерсени үйрөтүп да жардам бере аласыз. Мисалы, сиз аларга келип түшкөн идеялардын бардыгын талдап, арасынан жакшысын тандоону үйрөтсөңүз болот. Бардык маселелерде кысым көрсөтпөө, тескерисинче, ишендирерлик болуу маанилүү. Эгерде сиз өз оюңузду текебер үн менен жеткирсеңиз, анда сырдаш, чогуу иштешкен адамдарды табуу оңой болбойт.
Жеке үлгү - бул адамдарды "кызыктыруунун" мыкты жолу экендигин унутпаңыз. Жеке тажрыйбаңызга таянып, сиз өз кызматкерлериңизди кандайча шыктандырып, алар менен биргелешкен пландоону үйрөнөсүз.

Жыйынтыктоо
Автор көптөгөн майда, бирок абдан позитивдүү өзгөрүүлөрдү сунуштайт.

Китептин негизги идеялары төмөнкүлөр:
1. Мыктылыктын чеги жок.
2. Чоочун адамдар сизге дос болуп калышы мүмкүн, бардыгы менен ачык жана достук мамиледе болуңуз.
3. Алтын кеңеш - өзүңүзгө кандай мамиле кааласаңыз, башкаларга да ошондой мамиле жасаңыз.
4. Коркуу сезими сизге жолтоо. Мүмкүнчүлүктү колдон чыгарып коем деп гана корксоңуз болот.
5. Жакшы иштер жакшы маанай тартуулайт.
6. Айрыкча, бирөөнү шыктандырсаңыз, алдыга карай умтулуңуз.
Көрүнүп тургандай, жашооңузду жакшы жакка өзгөртүү сөзсүз эле тоодой өзгөрүүлөрдүн жардамы менен эмес, кээде майда, туруктуу пайдалуу бир катар нерселер жетиштүү. Акырындык менен жакшы жакка өзгөрүп, жашоодон, эмгектенүүдөн жана адамдар менен мамилелешүүдөн коркпогула!

📔 Таттуу уйку

2020-06-23T15:03:50.264Z

Автору: Арианна Хаффингтон

Арианна - белгилүү журналист. Бул жолу ал үчүнчү миң жылдыктын көйгөйү - уйкунун жетишсиздиги менен алек. Анын китебиндеги негизги идеялар төмөндөгүлөр.

1. Айрыкча, уйку жетишпегендиктен максаттуулар "азап чегишет". Күнү-түнү маалымат, технологияларды колдонуу мүмкүнчүлүгү адамдын иш күнүн узартып койду. Көптөгөн ийгиликтүү адамдар бардык убактысын уйкуга эмес, жумушка жумшашат. Бирок андай мамиле ден-соолуктун начарлашына алып келет. Уйкунун жетишсиздиги дененин көптөгөн функцияларына терс таасирин тийгизип, жүрөк кризисине, инсультка, семирүүгө жана диабетке алып келет. Мелатонин организмдеги эң маанилүү гормондордун бири, уйкунун жетишсиздиги анын пайда болушуна тоскоол болот. Мелатониндин аз болушу рак оорусуна алып келиши мүмкүн. Уйкунун жоктугу кортизолдун көбөйүшүнө жана иммунитеттин алсырашына алып келет. Уйку учурунда организм биоматериалдык таштандылардан тазаланат. Эгер мээге зат алмашуу продуктуларынан өз убагында арылууга жол берилбесе, анда көптөгөн психикалык бузулуулардын (тынчсыздануу, биполярдык бузулуу жана депрессия) коркунучу күчөйт. Ошондой эле, уйкунун жетишсиздиги Альцгеймер оорусун өрчүтүшү мүмкүн. Дофамин - бул "ырахат гормону", уйкунун жетишсиздиги дофаминдин жетишсиздигине алып келет. Ар бирибиз узак, уйкусуз түндөн кийинки жай реакциябызды билебиз го. Андыктан уйкуну жумуштан кийин койбойбуз.

2. Дени сак уйкунун сырлары.
Толук уйку төрт этаптан турат. Биринчиси - үргүлөө. Ал убакта адамды ойготуу оңой.
Экинчиси - тереңирээк түш, ойготуу бир аз оор. Дене температурасы жана басым акырындык менен төмөндөй баштайт.
Үчүнчүсү - терең, жай уйку. Адамды ойготуу кыйын.
Төртүнчү этапта көздүн ылдам кыймылдары байкалат. Уйку өтө терең эмес. Дем алуу жана тамыр согуу тез-тез болуп турат. Температура жана басым кадимки абалына кайтат. Түштөрдү адам ушул стадияда көрөт.
Кызыктуусу, 24 саат уктабаган адам кадимки мас адамдын абалындай болот.
Төрт этаптан турган циклдин узактыгы бир жарым саат. Түн ичинде цикл 4-5 жолу кайталанат. Ар бир жолу жай уктоонун узактыгы азаят, ал эми төртүнчү этаптын узактыгы көбөйөт.
Уйку көйгөйлөрүнө адамдын бир гана жашоо образы күнөөлүү деп айтууга болбойт. Уйкусуздук бир катар оорулардын белгиси да болушу мүмкүн.

3. Көптөгөн мыкты ойлор адамга түшүндө келет.
Көптөгөн илимпоздорго илхамы түшүндө келди. Мисалы, америкалык Элиас Хоу XIX кылымдын орто ченинде тигүүчү машинанын ийнесин ойлоп тапты. Ал ийне түшүндөгү узун ичке кылычка окшош эле.
Атактуу швейцариялык психоаналитик Карл Густав Юнгтун айтымында, кыялдар - кудайдын үнү. Түштөргө олуттуу мамиле жасоо керек, алар адамдын аң-сезиминен жашыруун нерселерди ачып беришет. Түштөр чындыгында көптөгөн адамдарга өздөрүн жакшыраак түшүнүүгө, чечим чыгарууга жардам берет. Сизди да узак убакыт бою кандайдыр бир жашоо жагдайы кыйнап келсе жана аны кантип чечүүнү билбесеңиз, жатарда, өзүңүзгө кайра кайра так суроо бериңиз. Ойгонгондо, турбай, түштөрүңүздү эстөөгө аракет кылыңыз да, баарын кагазга жазыңыз. Сөзсүз эле жооп биринчи түндө келбейт. Бирок чечим болот, анткени биздин мээ суроого жооп табууга кызыкдар.

4. Уйкунун жалпы эрежелери.
Уйку пайдалуу болушу үчүн, акыл тынч болушу керек. Бардык тажаткан ойлордон арылышыбыз керек. Эң кызыктуу жана натыйжалуу чаралар бул - йога, цигун жана медитация. Бирок алардан да жөнөкөй ыкмалар бар. Мисалы, доктор Эндрю Вил байыркы индиялык дем алуу искусствосуна негизделген 4-7-8 техникасын сунуш кылды. Төрткө чейин санап дем алабыз, жетиге чейин санап дем албай турабыз, сегизге чейин санап оозубуздан демибизди катуу чыгарабыз. Тажаткан ойлордон арылуунун жакшы жолу - кийинки күнү эмне кылуу керек тизмесин түзүү болуп саналат.
Кийинки жөнөкөй бир нече эрежелер уйкуну жакшыртат.
1. 14.00 дөн кийин кофеинден алыс болуу.
2. Оор тамакты жатаарга 2 саат калганда жебөө.
3. Спорт менен мүмкүн болушунча көп машыгуу.
4. Сейилдөө, жөө басуу.
5. Уйкуга жарым саат калганда смартфондорду, телевизорлорду, компьютерлерди жана башка ушул сыяктуу нерселерди колдонуудан баш тартуу.
6. Бөлмөгө лаванда эфир майын чачуу жакшы эс алдырат.
7. Уйку таблеткалардын ордуна дары чөп (валериана, пустырник) ичүү.
8. Бөлмөдөгү оптималдуу температураны сактоо, болжол менен 15-19 С.

5. Уйку сапатын жакшыртууга арналган ар кандай заманбап шаймандар жана программалар толгон токой. Мисалы, уйку трекерлери, уктоонун баскычтарын байкап, ойготкучту белгилүү бир учурда гана өчүрүүгө мүмкүндүк берет. Билериктен алынган бардык маалымат смартфонго өтүп, анда анын ээсинин уйку сапаты жөнүндө толук отчет берилет. Кечинде жарыктык деңгээлин жөндөө үчүн атайын программаларды колдонуу пайдалуу.

Уйку жөнүндө кошумча кызыктуу маалымат.
1. Уйкунун узактыгы. Ар бир адам үчүн уйкунун узактыгы ар башка. Бирок, орточо эсептегенде 18 жаштан 60 жашка чейинкилер үчүн суткасына 7 ден 9 саатка чейин. Ден-соолукка таасирин тийгизбестен, аз эле адамдар уктай алышпайт. Андайлар дүйнөдө 1% ашпайт.
2. Күндүз уктоо. Эгерде адам түнкүсүн уктабаса, анда күндүз жарым саат уктоо денеге келтирилген зыяндын бир аз болсо да ордун толтура алат.
3. Өзүнчө же чогуу уктоо. Эреже катары, биз жолдошубуз менен чогуу уктагыбыз келет. Бирок бири-бириңизге тоскоол болсоңуз чогуу уктабасаңыздар болот. Күчтүү мамиленин ачкычы - бул чогуу уйку эмес, ак-ниет, ишеним жана кам көрүү болуп саналат.
4. Жетлаг. Жетлаг - бул убакыт алкагын өзгөртүү менен пайда болгон уйкусуздук. Мындай учурда 16 саат ачка болуп турсаңыз бат эле уйкуңуз ордуна келет.

Балага туура сүйлөөнүн жолдору Авторлору: Роберта Кавалло, Антонио Панарезе

2020-05-31T12:06:03.999Z

Ата-эне баланы урушпай, сабабай тарбиялоодо кыйын болубатам деп ойлойт. А бирок, кылымдар бою жүргүзүлгөн изилдөөлөр көрсөткөндөй, кыйкырык менен гана эмес, жөнөкөй жай үн менен айтылган күнүмдүк фразалар менен деле балага зыян келтиришет.
Бул көйгөйдү чечүү үчүн, авторлор кеңири маалымат берген.

1. Ата-эненин сөзү ар бир адамдын жашоосундагы эң маанилүү сөз. Ата-энелер биздин мээбизге эң негизги нерселерди - биздин бул дүйнө менен байланышты түшүндүрөт.
Авторлор курулушта иштеген эки жигит жөнүндө окуяны айтып беришет. Эки жигит тең кедей дыйкан болушкан. Экөө тең бирдей жумуш аткарганы менен, эки башка ой жүгүртөт.
Биринчиси бардыгын жек көрчү. Баары, айрыкча байлар, ага окшогон кичинекей жумушчу кумурскага маани беришпейт, деп ойлочу.
Ачууланып, ата-энеси ар дайым: "мышыктар жолбор төрөбөйт", деп айтышчы. Демек, мындай оор жашоо анын өмүрүнүн аягына чейин болоорун билдирчи. Ата-энеси ага кичинекей нерсеге жетип отура бергенге, эч нерсеге ишенбөөгө, колундагы нерсеге кам көрбөгөнгө үйрөтүшкөн. Ошондуктан ал этият болушу керек болчу.
Экинчиси тескеринче, ысык күнгө карабастан, жайдары жана шайыр болчу. Ал өз ишин аз тыйын төлөшсө да, тажрыйба катары кабыл алган.
Биринчисинин атасынын малы уурдалганда, чөгүп, жашоосуна нааразы болгон.
Экичисинин атасы андайды сабак катары кабыл алып, үйдү уурулардан коргой турган тосмо менен бекемдечи.
Бул мисал бизге ата-энелерибиз тарабынан берилген дүйнөгө болгон көз карашты так көрсөтөт. Жада калса, жөнөкөй сөздөр балдарда коркуу сезимин, комплекстерин пайда кылып, жолу болбой калышына алып келет.

2. Балдарды өз алдынча болгонго үйрөткүлө.
Ата-эне баланы али эч нерсе үйрөнө элек деп, жаныбарды кандай багышса, аларды да ошондой багышат.
Баланын энергиясын чыгарыш үчүн бир жерди уюштуруунун ордуна, аны эрежелер жана чектөө менен жүктөшөт.
Эгерде бала бир нерсе кылгысы келбесе же туура эмес иш кылса, анда баланы коркутуп же кыйкырышат. Натыйжада, бала өз алдынча болбой калат, анткени аны урушушат.
Авторлордун айтымында, балдар чоңдордун көп учурда туура эмес кам көрүүсүнөн улам эркин жана бактылуу боло албайт.

3. Балаңызды «эң мыкты бол» деп кыстабаңыз.
Жакшы кыз бол! Жакшы бала бол! Бул сөздөрдү ата-энеден өмүр бою же жок дегенде бир жолу угабыз.
Баары менен сылык бол, рахмат айт, чачпа, жакшы баа ал, чоңдорду ук.
Андан соң, жакшы жумуш тап, турмушка чык же үйлөн, балалуу бол. Чындыгында, бул сөздөр «башкалардан айырмаланбай, жөнөкөй бол», дегенди билдирет. Ата-энеге алардын ата-энелери да ошентип айтышкан.
Бала «жакшы» эмес, өзү каалагандай болуш керек.
Өзүн-өзү баалоосу төмөн ата-энелер, аны балдарынын эсебинен көтөрүшөт.
Бала өз сезимдерин жана муктаждыктарын билген, жашоодон ырахат алууну,
убакытты жакшы өткөрүүнү каалаган, өзүнө, жашоого ишенген, кемчиликтерин мойнуна алган жана өзүн айыптабаган бала болушу керек.
Авторлордун кеңеши жөнөкөй.
«Акылдуу бол», дегендин ордуна «көңүлдүү өткөр!» же «досторуң менен көңүл ач», «мен сени жакшы көрөм!» деп айткыла.

4. Балдардын терс эмоцияларын чыгарууга жардам бергиле.
Бала ыйласа же ачууланса, эмне кылуу керек?
Аны түшүнгөнүңүздү, жакшы көрөрүңүздү айтыңыз. Сиз да кичинекей кезиңизде ага окшогонуңузду айтсаңыз болот. Баланы кучактаңыз.
«Ыйлаба» же «балдар ыйлабайт!» деп алаксытпагыла, анткени анын көйгөйү анчалык деле маанилүү эмес деп ойлойт.
Мындай каталар баланы өзүнүн алсыз жактарын жашырыш үчүн мыкаачы кылат, же сезимдерин тереңирээк өзүнө жашырат.
Эң жакшысы боорукер, түшүнүктүү болуу, баладан ал-акыбалын сурап, зарыл болгон учурда жардам берүү.

5. Үйрөнүүнүн негизи - бул туурап жасоо.
Китептин авторлору ата-эне менен баланын ортосундагы байланыштын эң маанилүү үч түрүн аныкташкан.
Бул оозеки байланыш, "билинбеген" байланыш жана чөйрөдөгү байланыш.
Сөздөрдү бала аны менен байланышкан ар бир чоң кишиден кездемедей сиңирип алат. Ата-эне "жасай албайсың" десе, бала чындап эле ийгиликке жетпейм деп ойлоп, аракетин токтотот.
"Билинбеген" байланыш - бул мимика, интонация жана эмоциялар. Бала сезгич келет.
Курчап турган чөйрө менен байланыш - бул баланын белгилүү бир жерде белгилүү бир адамдар менен өткөргөн убактысы. Ал адамдар оң же терс таасирин тийгизиши мүмкүн.
Бала атасынын спорт менен машыкканын көрүп, «мен да ошондой кылам!» деп ойлойт.
Бала сизден көргөнүн түзмө-түз үйрөнөт. Ошондуктан ал сиз менен бир нерсе кылгысы келсе, ага жолтоо болбоңуз! Сиз менен чогуу убакыт өткөрүп, идиш жууп, бөлмөнү тазалап же чогуу тамак жасасын.
Сиз чогуу жасаган бардык ишиңиз, сезимдериңиз, сөздөрүңүз анын эсинде калат жана анын адамдар менен болгон мамилесинин негизин түзөт.

6. Сөздөрүңүз иш-аракеттериңиз менен дал келиши керек.
Бала ата-энесинин сөздөрүнө, ал иш аркылуу көрсөтсө ишенет.
Ошондуктан, бардык сөздөрүңүз иш-аракеттериңиз менен туура келиши керек.
Мээрим төксөңүз, балаңыз толук кандуу жана гармониялуу инсан болуп өсүп, сүйүүгө жана жакын адамдарына карата жылуулукту чагылдырууга жөндөмдүү болот.
Ата-энем мени жакшы көрбөйт, деп ойлосо, бала кадимки сүйүүнү чагылдырууга жөндөмсүз, кысылган адамга айланат.

7. Баланын өзүн-өзү баалоосу бир гана сиздин колуңузда.
Баланы жашоодо ар нерсе күтөт, анын арасында терс нерселер да болот. Ал эми сиз менен болгон жакшы мамиле ага жөлөк болсун.
Бул жерде ата-эненин негизги милдети баласын көйгөйлөрдөн коргоо эмес, балдарына бул көйгөйлөрдү кантип чечүү керектигин үйрөтүү.
Эгер чоңдор баланын жашоосуна ар дайым кийлигишсе, анын проблемаларын дароо эле чечип берсе, анда өзүн-өзү баалоо сезими пайда болбойт, натыйжада бала өз алдынча бирөөнүн жардамысыз чечим чыгара алат деп ишенбейт.
Бала идеалдуу, өзүн-өзү жакшы көрүү сезими өтө бийик төрөлөт. Ичинде эч кандай кемчиликтерди көрбөйт, эмнени каалаарын билет, бардыгына ыраазы. Аны сулуу эмес, келесоо, эч нерсе кыла албайт десеңиз, чындык катары кабыл алат.
Балаңызга үлгү болуңүз. Аны ар дайым сүйүп, колдоп туруңуз, ошондо сиз ага эч кандай зыян келтирбей, өзөгүн бекемдей аласыз.

8. Эч качан салыштырбаңыз!
Балаңызды башка бирөө менен салыштырганда, өзүн төмөн баалоосуна алып келет, эч нерсе кыла албайт, анткени өзүнүн күчүнө ишенбеген адам болуп чоңоет.
Башка бирөө менен эмес, ӨЗҮ менен атаандашуу туура. Мурункуңдан жакшыраак болушуң керек, классташ, достордон эмес. Балаңызга ушул нерсени үйрөтүү керек.
Өзүн-өзү менен атаандашуу - сөзсүз түрдө өркүндөтөт, мында утулуп калгандар жана жеңүүчүлөр жок.
Көбүнчө, ата-эненин өзүнүн төмөн баалоосунан балдарын атаандашууга мажбур кылышат. Мындай балдарды алар каалабаса да экзаменде, музыкалык же спорт же искусство мектептеринде көрсө болот.
Бала өмүр бою өз каалоосун эске албай, башка адамдардын каалоосун аткарууга аракет кылат.

9. «Ат коюудан» алыс болгула.
Мисалы, орой сүйлөсө «тартипсиз» деп урушабыз.
Адегенде, балага түшүндүрүп берүү керек. Натыйжа ошондо чыгат.
Эгер бала үй тапшырмасын аткарууну каалабаса, дароо эле «жалкоо» деп ыргыта салбай, эң биринчиден, ал ишти аткарышы керектигин, андан кийин ойнойтурганын түшүндүрүү керек.

10. Байлык жөнүндө.
Кимдир бирөө ийгиликке жетсе, адамдар аны алдап, уурдап байыды дешет. Же «эмне үчүн муктаж болгондорго акча бербейт» дешет.
Мындай түшүнүктөн улам, көптөгөн балдар чоңойгондо, бактысыз кедей болушат.
Бала кезинен бул балдарга чоң акча арам жол менен гана табылат деп айтышчу. Аларга көп нерсени кыялданбоого үйрөтүшкөн.
Эгер үй-бүлөдө акча боюнча көп талаш-тартыштар болсо, бала келечекте молчулукка умтулбайт.
Акча тартыш болсо, балдарыңыздын келечеги үчүн, арыздануудан алыс болуңуз. Балдарга акчанын маанисин, алар кандай функция аткарышын жана ар бир адам чыдамдуулук, тырышчаактык жана тартип менен ийгиликке жете тургандыгын түшүндүрүңүз. Ошол эле учурда, адамды бактылуу кылган акча эмес, ал жөн гана алмашуу куралы деп түшүндүрүңүз.

11. Жубайлардын бир-бири менен болгон мамилеси баланын келечегине таасир этет.
Өз-ара проблемаңарды бала менен бөлүшүүнүн же ага айтуунун кажети жок. Чыр-чатакты баланын көңүлүн бурбастан чечип алыңыздар.

12. Коркутуп-үркүтүүгө эч качан аракет кылбагыла.
«Укпасаң, сени тиги же бу алып кетет!» Ушул сыяктуу сөздөр толгон токой.
Андайда бала коркок, бош болуп чоңоет.
Түшүндүрүү жана жеке мисал болуу гана иштейт.
Ушундай олуттуу жана туура мамиле менен сиз укмуштуу ийгиликтерге жетип, татыктуу, акылдуу, дени сак баланы тарбиялайсыз.

5 секунд эрежеси Автору: Мел Роббинс 5 секундада жашообузду кантип жакшырталабыз

2020-05-25T12:52:04.887Z

Идея № 1. Сиз бир нерсе жасаарда, бештен бирге чейин санап, кыймылдай баштаңыз.

Автордун айтымында, ал үчүн эң оор нерсе бул өзгөрүү болчу. Өзгөрүү кайраттуулукту талап кылат жана беш секунд эрежеси бизге жардам берет.

Ден-соолугуңузду жакшыртууну чечтиңиз дейли. Үйдө жүргөндө, эч нерсе болбойт. Акылыңыз залга барбоо үчүн миңдеген себептерди таап, жана ден-соолугуңуз, албетте, жакшырбайт. Бирок сиз бештен бирге чейин санап, көнүгүүлөрүңүздү баштай бериңиз.

Ички сезимиңизге кулак салыңыз. Эгерде сиз аларга көңүл бурбасаңыз, анда сиз мыкты ойду, идеяны, же позитивдүү өзгөрүүлөрдү өткөрүп жиберишиңиз мүмкүн.

Ички сезимин угуп, англиялык химик Джон Уокер 1826-жылы идишке химиялык заттарды аралаштыруу үчүн таякчаны колдонуп, ширенкени ойлоп тапкан.
Жорж де Местрал ити менен сейилдеп жүрүп, боосун чечибатып, жабышкак боо ойлоп тапты.
Биринчи фраппучино кофесин 1992-жылы Санта-Моникадагы Старбакс башкаруучусу ойлонду. Ал ысыкта кофенин жай сатылуусун байкап, муз кошулган кофени сунуштады. Ички сезимдин күчү ушундай, беш секунд эрежесин колдонуу сизди кайраттуу болууга жардам берет да максатыңызга бир кадам жакындайсың, дейт Роббинс.

Идея №2: Беш секунд эрежеси жөнөкөй аракеттерди жасоого жардам берүү менен сизге ишенимдүүлүк жана өндүрүмдүүлүк алып келет.

Саноо биз үчүн ритуал сыяктуу болуп аракетти баштайбыз да маңдайдагы мээ кыртышын активдештирип, жүрүм-турумдун өзгөртүүсүнө жардам беребиз.

Маңдайдагы мээ кыртышы бизге максатка жетүүгө, бир нерсени өзгөртүүгө жана максаттуу иш-аракеттерди жасоого жардам берет. Ошентип, Роббинс жөнөкөй эреженин жардамы менен, бутуна туруп өзгөрдү. Аябай чарчап калганда, ал эрежени колдонуп, чуркап кетчи. Ал ичүүнү каалаганда, санап, алкоголь бөтөлкөсүн кайра ордуна ачпай туруп койчу. Күйөөсүнө кыйкыргысы келгенде, бештен бирге чейин санап, туура сөздү тандап, оңолду.

Анын досу Рейчел, 5 секунд эрежесин алгач эрте туруу үчүн колдонсо, кийин башка жумушта иштетип, арыктады, акчаны көбүрөөк таба баштады, үй сатып алды, болбой жаткан никесин жандандырды. Жөнөкөй сөз менен айтканда, ал башка адам болуп өзгөрдү.

Идея № 3. Өзүңүздүн жашооңузду, иш-аракеттериңизди жана келечегиңизди канчалык деңгээлде контролдосоңуз, ошончолук ийгиликке жетесиз.
Эмнегедир, көпчүлүгү иш-аракет үчүн атайын стимул болуш керек деп эсептейт, бир демкени күтөт. Бул таптакыр туура эмес. Эгер жашооңузду жакшыртууну кааласаңыз, янтар ичиндеги чымын сыяктуу болбойм десеңиз, отура бербей, отургучтан (керебеттен, телевизордон) туруп, аракет кылыңыз, тагдырыңызды башкарыңыз. Беш секунд эрежеси жардам берсин.

Эрежени канчалык узак колдонсоңуз, ошончолук тезирээк өзүңүздү ишенимдүү сезе баштайсыз.

Роббинстин күйөөсү Крис аялы өзгөргөнүн байкап, эрежени өзү да колдоно баштады. Муну менен ал ичүүнү токтотуп, күнүгө эртең менен медитация жасап, көнүгүү кыла баштады. Экөө чогуу акча маселесин чечип, кайра бутуна турушту. Крис ошондой эле эрежени өзүнүн бизнесинде да колдонду: өнөктөшү менен, алар бара-бара ресторан бизнесин түзүшкөн. Ал өзүнүн терс жана оң ойлорун башкарууну жана кемчиликтерин жеңе билүүнү үйрөндү.

Роббинстин айтымында, эреже бизде жашоону өзгөртө турган кандайдыр бир күчтү ойготот. Ушундан улам, досторунун бири чечкиндүү болуп, көп жылдык ийгиликсиз никеден кийин ажырашты, экинчиси 73 килограммга арыктады, үчүнчүсү тамекини чындап эле таштады. Андан тышкары, дүйнө жүзү боюнча миңдеген адамдар Роббинске анын эрежеси иштээрин жазышат.

Идея № 4. Кандайдыр бир иш-аракетти баштаарда, биз күмөн санасак көбүнчө зыян гана болот.

Миңдеген шылтоону айтып, кичинекей бир кадам жасоодон баш тартабыз. Бул кичинекей нерселер бардыгына таасир этет. Эгер термелбей, иш-аракет кылууга бел байласаңыз, жашооңуздун канчалык тез өзгөрөрүнө таң каласыз. Жүрөгүбүздү ооруткан нерсени өзгөрткүбүз келсе да, биз баарыбыз көнүмүш адат болуп жата беребиз. 5 секунд эрежеси ар дайым иштейт.

Бул дагы бир теория эмес, бул иштетүүчү курал. Убакыттын өтүшү менен сиз өзгөрүүлөрдү, кандайдыр бир ички күчтүн ойгонушун сезесиз. Шылтоолор, күмөн саноолор бир нече жолу кайра келиши ыктымал, бирок ал табигый нерсе. Санап коюп, ишти улантабериңиз.

Тартынсаңыз, корксоңуз бештен бирге чейин санаңыз. Бул көңүл топтоого, бардык коркуулардан арылууга жана акылды тынчтандырууга жардам берет.

5-идея. Ар дайым күмөн санаган сайын бир нерсе туура эмес болубатат деп мээбизге сигнал барат. Мээ коргоо режимин күйгүзөт, тормоз басылат, иш, ошентип, жасалбайт.

Бара бара беш секунд эрежеси бизге мээнин иштөө тутумун айланып өтүүгө жардам берет. Убакыттын өтүшү менен эрежени кайталап, сиз жаңы тутумду түзөсүз. Мындан ары күмөн саноо жана коркуу сезими сизди тынчсыздандырбайт.

Унчукпаган, өзүнө өзү ишенбеген, аракетсиз, ачуулуу адам болбой каласыз. Бул эреже эски үлгүлөрдү алып салып, аларды жаңы оң жүрүм-турум менен алмаштырууга жардам берет.

Эреже менен жетишкен майда жеңиштер сизге өзүңүзгө ишенүүгө жардам берет. Чечим чыгарууну үйрөнүңүз - бул сиздин жашооңузду өзгөртөт.

Идея № 6. Баштоого күчүңүз бар болсо, ийгиликке жетүү үчүн да күч бар болот.
Роббинс 5 секунд эрежесин жети жылдан бери күнүмдүк турмушта колдонуп келет.

Бизге күн сайын эрдик керек. Мисалы, жетекчиликке айлык акыны көтөрүү боюнча кайрылуудан коркобуз. Бирок, Мел Роббинстин жолдоочуларынын бири Фейсбукта жазгандай, ал ушундай чечимдин жардамы менен, чынында эле айлыгы көтөрүлүп, премия алган. Анын Брайс аттуу дагы бир досу эки жыл бою китеп жазган жана беш секунд эреженин жардамы менен аны басып чыгарууга кайраттанган. Бирок ал ушуну менен эле токтоп калган жок: ал китеп соодасы боюнча эң ири компания болгон Barnes & Noblesден автограф сессиясын өткөрүүнү өтүндү. Брайстын болгону 15 жашта экендигин эске алганда, эсте каларлык нерсе. Буга окшогон мисалдар абдан көп.

Проблеманын бетине тике кароо телевизордун маңдайында мас болуп жатканга караганда оор.

Ар бир чечимде беш секундага барабар эрдик бар, бул чоң өзгөрүүлөргө алып келет. Эрдик бизге бардык нерсени жеңүүгө жардам берет. Көйгөйгө эмес, аны чечүүгө көңүл буруңуз. Акыр-аягы, 5 секунд эреженин жардамы менен сиз дүйнөнү өзгөртө албайсыз, тескерисинче, өзүңүздү жакшы жакка өзгөртө аласыз.

Идея № 7. Чечкинсиздигиңизди актоо менен, сиз жаңылышасыз.
Унчукпай, аракетсиз жүрүү менен жашооңузду өзгөртүүгө ылайыктуу убакыт эч качан келбейт. Кечиктирбеңиз.

Кээ бир кылган ишке адам өкүнөт, бирок кылбай калган ишке көбүрөөк өкүнөсүз.

Көбүнчө биз ийгиликсиздиктен же күлкүлүү көрүнүүдөн коркобуз. Ошондуктан, башыбызды кумга катып, аракет кылгыбыз да келбейт. Ошентип, каалаган нерсебизди алуу мүмкүнчүлүгүн жоготобуз. «Эгер сен жаңылып жатсаң эмне болот? Биз бул суроону дээрлик эч качан бербейбиз, бирок беришибиз керек.

Кайра-кайра аракет кылып, эрдикке үйрөнүңүз, эртеби-кечпи ийгиликке жетесиз.

Кийинки мүмкүнчүлүк болбой калышы мүмкүн. Күтө бербей, азыр аракет жасаңыз. Кыялыңызга каршы жүрбөңүз.

Идея № 8. Сиз өзүңүздүн сезимдериңизди башкара албайсыз, бирок 5 секунд эрежесинин жардамы иш-аракет кылса болот.
Баарыбыз белгисиздиктен коркобуз, аракеттенүүдөн мурун кепилдикти каалайбыз. Бирок бир оюн ойнош үчүн, аны баштоо керек да. Жеңишке жетүү үчүн, улантуу керек да.

Ровио иштеп чыккан Angry Birds оюну 51 ийгиликсиз оюндан кийин пайда болду. Актер Марк Руффало биринчи ролду аткарардан мурун 600гө жакын сынактан өткөн. Пикассону даңазалаган 100гө жакын шедеври белгилүү, бирок жалпысынан анын эмгектеринде 50 миң сүрөт жана скульптуралар бар. Бул күндө эмгек деген сөз.

Идея № 9. Сизди баалабаган адам ар дайым болот.
Өзунө өзү ишенүү тубаса касиет эмес, аны өздөштүрсө болот.
Роббинс өзү деле беш секунд эрежесинен мурун өзүн ушундай болгонун ырастайт. Ал өзүн, идеяларын жана жөндөмдөрүн толук билген эмес.

Идея № 10. Эң чоң тобокел - бул чыныгы жашоону баштаардан мурун өлүп кетүү.
Идеялары сизге жактыбы? Анда, күнүнө 18 мүнөт жашооңузду кандайча өзгөртө тургандыгын Питер Брегмандын “18 мүнөт” деген китебинен көрсөңүз болот. Эрдик жана кайраттуулук менен сиз тоолорду жылдыра аласыз. Өткөндү өзгөртө албайбыз, бирок беш секунд эрежеси менен келечекти өзгөртө алабыз.
Кыймылдап баштаңыз. 5 секунда бир иш күнүңүздү өзгөртө алат. Бир күнүңүз жашооңузду өзгөртө алат. Сиздин жашооңуз дүйнөнү өзгөртүшү мүмкүн. Ар бирибизде улуулук бар, дейт Роббинс, аны ачышыңыз керек. Биринчи кадам жасасаңыз, калгандары өзүнөн өзү келет.

Таңкы сыйкыр

2020-05-24T17:29:02.087Z

Автору: Хэл Элрод

Саат эрте чырылдап, жылуу төшөктөн чыгыш керек деп нааразы болуп жатасызбы? Ойгонгондон кийинки биринчи саат калган күн кандай өтөөрүн түзөт, ага таасир этет.
Эгерде сиз ордунда турбаган, өз алдынча өнүгүү менен алектенген адам болсоңуз, анда сиз үчүн эртең мененки убакытты туура баштоо методикасы пайдалуу болот, анткени ал сиздин жашооңуздун бардык тармактарын өркүндөтөт.
Таңкы маал - бул өтө маанилүү нерселерге толгон убакыт, ошондуктан китепте талкууланган нерселерди ойгонгондон кийин дароо аткарыш керек.
1. "Күн ойгонгондо башталат"
Таңкы маал сыйкырга толуш үчүн, ойгонууну туура үйрөнүш керек. Эртеңки күндү кечинде баштаңыз.
1.1. Жатаардан мурун эртеңки күнгө карата ниетиңизди так билдирүү. Ошондо гана эртең менен абдан позитивдүү, тынч жана бактылуу болуп ойгоносуз.
1.2. Саатты мүмкүн болушунча төшөктөн алыс коюуу.
1.3. Гигиена. Тишти жууп, жылуу суу менен жуунуу.
1.4. Эртең менен бир стакан жылуу суу ичип, денеңиздин бардык системаларын жандандыруу. Эсиңизде болсун, адегенде мээбиз, андан кийин гана денебиз ойгонот.
1.5. Спорт кийимин кийүү.
2. "6 практика"
"Сырдуу таң" алты практикадан турат, алар ырааттуу түрдө аткарылышы керек. Бул иш-аракеттердин ар бири сизге бардык максаттарыңызга жетүүгө күч берет, ошондой эле сиз буга чейин билбеген ички күчтөруңузгө жол ачат.
Сиздин "сырдуу таң" 60 мүнөткө созулат, натыйжада бактылуу жана жемиштүү күндү өткөрүүгө толугу менен даяр болосуз. Бирок күтүлбөгөн жерден убактыңыз болбой калса, "сырдуу таңдын" 6 мүнөттөн турган кыскасын жасайсыз.
2.1. Тынч 5 мүнөт.
Релаксация, аң-сезим, бейпилдик, тазалык, тынчтык - бул ушул этапты мүнөздөгөн сөздөр. Максат - ызы-чуудан, стресстен арылуу.
Бул этапта медитация жасаса болот же дуа кылсаңыз болот же терең дем алып, өзүңүздүн жашооңузга бакыт алып келген адамдар жана окуялар үчүн ыраазычылык билдирип, өз оюнузду тазалай аласыз.
2.2. 5 мүнөт аффирмация (ырастоо)
Аффирмация - бул сиз айтуучу сөздөр. Позитивдүү аффирмация механикалык түрдө эмес эмоционалдуу айтылсын.
Аффирмация түзүү үчүн, адегенде эмнени каалайсыз чечишиңиз керек. Андан кийин сиз каалаган нерсеге жетүү үчүн кандай адам болушуңуз керектигин ойлонушуңуз керек. Каалооңузду ишке ашыруу үчүн эмне кылышыңыз керектигин түшүнүңүз.
Майда-чүйдөсүнө чейин так сүрөттөлсө, аффирмация ошончолук жакшы иштейт. Сиздин милдетиңиз - каалаган жашоону жана каалаган натыйжаны сөз менен бекитүү. Улуу адамдардын, философтордун цитаталары колдонулса болот.
2.3. Визуализация, 5 мүнөт.
Каалооңузду кыялдануу. Ыңгайлуу жерди таап, отуруп, эс алыңыз. Көздү жумуп, эмнени алгыңыз келгенин элестетип көрүңүз, жеңишти, максатка жетүүнү же кандайдыр бир окуяны элестетип, аны ишке ашырууга бүт күчүңүз менен аракет кылып жатасыз. Оюңузда кармап, жыттап, угуп каалаган нерсеңизди элестетиңиз. Сиздин элестеткен сүрөтүңүз канчалык реалдуу болсо, анын аткарылгандыгы чындыкка жакыныраак болот.
План ишке ашкандан кийин кандай жашай турганыңыз жөнүндө ойлонуп, өзүңүздү максатына жеткен адамдай сезиңиз.
2.4. Көнүгүү - 20 мүнөт.
Эгер буга чейинкилер учкун болсо, күч көнүгүүлөр учкундан жалынды тутандырат.
Күч көнүгүү же кардиологиялык көнүгүүлөр же йога ылайыктуу. Спорт менен байланышкан нерселердин бардыгы сизге кубаныч тартуулайт.
2.5. Окуу, 20 мүнөт.
Сиз кеминде 10 барак окуйсуз. Сүйүктүү жазуучуңуздун романы, фантастикалык эмес же өзүн-өзү өнүктүрүү боюнча же каалаган китеп болушу мүмкүн.
2.6. Күндөлүк жазуу, 5 мүнөт.
Окуу аркылуу мээңизди активдештиргенден кийин, өзүбүз менен маектешип, талдап чыгышыбыз керек. Ал үчүн каалаган форматта күндөлүк жүргүзүңүз. Кагазда, аудио, санарип. Кыялдарыңыз жана максаттарыңыз, күнүңүздүн пландары жана сиз эмнеге карай бара жатканыңыз жөнүндө жазуу.
Бул иш дененин бардык системаларын ишке киргизип, сизди жемиштүү күндүн башталышына алып келет.
Дал ушул этапта укмуштудай "сырдуу таң" аяктап, сиз көптөн бери кыялданган сонун күн келет.