@dunyovadavr

“Наманган ҲЭТК” АЖ томонидан 2019 йил мобайнида амалга оширилган ишлар ва келгусидаги режалар

2020-01-17T12:41:39.372Z

“Наманган ҳудудий электр тармоқлари” акциядорлик жамияти томонидан вилоятда 2019 йил мобайнида амалга оширилган ишлар ва уларнинг таҳлили бўйича 2020 йил 17 январь куни ОАВ вакиллари билан матбуот анжумани бўлиб ўтди. Унда “Наманган ҲЭТК” АЖ бош директори Жаҳонгир Риззаев бошчилигида соҳа мутахассислари ҳамда журналист ва блогерлар иштирок этишди.

Анжуманда таъкидланганидек, “Наманган ҲЭТК” АЖ томонидан бугунги кунда вилоятимиз бўйлаб электр энергияси таъминотида бир қатор ишлар амалга оширилмоқда.

Хусусан, 2019 йил мобайнида “Обод қишлоқ” ҳамда “Обод маҳалла” дастурларига асосан вилоят бўйича 188 дона трансформатор пунктлари ўрнатилди. 349,3 км узунликда тармоқ тортилди. Ушбу қурилишларни амалга оширишда 9657 дона темир бетон таянчлар ўрнатилди.

2019 йил мобайнида 1211,4 км 0,4-110 кВли ЭУТ тармоқ, 74 дона 35-11 кВли ўчиргичлар, 6 та 35-110 кВли нимстанция, 5 та 110 кВли куч трансформатори, 537 дона 6-10/0,4 кВли трансформатор пунктлари ҳамда 282 дона Тармоқ трансформаторлари мукаммал таъмирланди.

Қайд этиш керакки, электр энергиясини ҳисобга олиш ва назорат қилишнинг автоматлаштирилган тизими (АСКУЭ)ни жорий этиш ишлари Наманган вилоятида ҳам жадал суратларда амалга оширилмоқда. Ўтган 2019 йил якунларига кўра 194 150 та янги ҳисоблагичлар алмаштирилди. Жорий йил январь ойидан бошлаб Мингбулоқ, Чуст ва Янгиқўрғон туманларида ҳисоблагичларни алмаштириш ишлари бошланди.

Корхона томонидан 2020 йил учун 398 130 дона ақлли ҳисоблагичлар ўрнатиш режалаштирилган ва бугунги кунда ушбу режани амалга ошириш учун самарали ишлар ташкил этилган. Алоҳида таъкидлаш керакки, ушбу замонавий электр ҳисоблагичлар истеъмолчиларга “Ҳудудий электр тармоқлари” АЖ маблағлари эвазига бепул ўрнатиб берилмоқда.

Авваллари темир бетон таянчлари етишмас, талаб қилинган муддатга ишлаб чиқарувчи корхоналар томонидан етказиб беришда муаммолар келиб чиқар, узоқ масофадан ташиб келинганда ортиқча сарф-ҳаражатлар юзага келар эди. 2019 йилдан бошлаб “Наманган ҲЭТК” АЖ қошида ташкил этилган “Темир бетон таянч” МЧЖ томонидан темир бетон таянчларини тез фурсатларда етказиб берилиши орқали юқоридаги муаммолар бартараф этилди. Ҳозирда ушбу корхонада 25 та янги иишчи ўрни яратилган бўлиб, корхонанинг кунлик ишлаб чиқариш қуввати 56 донани ташкил этса, йиллик ишлаб чиқариш қуввати эса 18000 дона темир бетон таянчини ташкил этади. Жамият қошида темир бетон таянчлар ишлаб чиқарилиши ҳисобига йил давомида 6,1 млрд маблағ тежаб қолишга эришилди.

Шунингдек, фуқаролар томонидан 2019 йил мобайнида “Наманган ҲЭТК” АЖга 3148 та мурожаатлар келиб тушган бўлиб, булардан 3146 та мурожаатнинг ижроси таъминланган. 2 мурожаат эса ҳал этиш жараёнида.

Қолаверса бугунги кунда тадбиркорлик субъектларига қулайлик яратиш мақсадида Ўзбекистон Республикаси Президентининг Қарор ва Фармонларига асосан Наманган шаҳри ва туманлар ҳудудида жами 15 та кичик саноат зоналари ташкил этилиб, кичик саноат зоналарини электр энергияси билан таъминлаш учун 30,1 км 3-10 кВли узатиш тармоқлари, Чуст туманида ташкил этилган эркин иқтисодий зонанинг электр таъминоти учун узунлиги 3,2 км бўлган 110 кВли электр узатиш тармоғи ва ҳар бирининг қуввати 40000 кВА бўлган 2 трансформаторли подстанция қурилиши ишлари амалга оширилмоқда.

Бир сўз билан айтганда бу ишларнинг барчаси, мамлакатимиз электр энергияси таъминотининг янада яхшиланиши йўлидаги муҳим омил бўлиб хизмат қилади.

Тадбир давомида бугунги кундаги асосий муаммо бўлиб турган электр энергиясидаги узилишлар бўйича ҳам кўплаб саволлар ўртага ташланди. Ҳозирда вужудга келган ушбу вазият “Талимаржон иссиқлик электр станцияси”(ИЭС)нинг электр энергияси ишлаб чиқаришга мўлжалланган қурилмасидаги носозлик туфайли таъмирлаш ишлари олиб борилаётгани билан боғлик эканлиги, носозлик бартараф этилгач, электр таъминоти яхшиланиши айтиб ўтилди.

Матбуот анжуманида журналистларни қизиқтирган саволларга мутахассислар томонидан атрофлича жавоблар берилди.

Дониёр Юсуфжонов.

14 январда «жанозаси ўқилган» Windows 7 ҳақида 7 факт

2020-01-16T17:02:39.941Z

Microsoft корпорацияси 2020 йилнинг 14 январида расман эълон қилишича, у энди Windows 7’нинг истеъмолчиларга мўлжалланган версияси учун апдейтлар чиқармайди. Бу эса бир пайтлар ўта оммабоп бўлган ушбу операцион тизимнинг «ўлган»ини англатади.
Компания аввалроқ бу тизимни қўллаб-қувватлашни тугатиш ҳамда унинг учун пулли янгиланишни жорий этиш режасини эълон қилганди. У ҳатто кишиларни янги Windows’га ўтишга мажбурлашнинг антиқа йўлини қўллашга ўтганди. Аммо 2020 йилнинг 3 ноябрига белгиланган АҚШ президенти сайлови муносабати билан, Windows 7 фойдаланувчиларига бир қулайлик тақдим этганди.
Умуман олганда, Windows 7 тизимли компьютер ва ноутбуклар ҳали ишлашда давом этаверади, аммо уларда тизимнинг ўзи янгиланмайди, хавфсизлик патчлари чиқарилмайди ва бора-бора ушбу тизим учун янги дастурлар чиқмай қолади. Шу сабабли ҳам Microsoft унинг фойдаланувчиларига Windows 10’га янгиланиб олишни қаттиқ тавсия қилмоқда.

Қуйида эса тарихга айланиб бораётган Windows 7 тизими ҳақидаги еттита факт билан танишамиз.

1. Windows 7 операцион тизимини яратиш устида 2500 киши ишлаган
Microsoft корпорацияси Win7 устида иш бошлаганида, хато қилишга ҳаққи йўқлигини англаб турарди – яқиндагина чиққан Windows Vista тизими «хом»лиги сабабли танқидларга дучор бўлган. Шу боисдан ҳам Windows 7 ундаги хатоликларни тўғрилаши ва компаниянинг тушиб кетган нуфузини кўтариб бериши лозим эди.
Бунинг учун IT-гигант икки ярим минглик ходимларини бу ишга жалб этган – ҳар ҳолда, оммавий ахборот воситаларининг ҳисоб-китобларига кўра. Microsoft ҳар бири 100 кишилик 25 та гуруҳ ташкил этган, улар қаторида дастурчилар, тестерлар ва менежерлар бўлган. Ҳар бир юзталик гуруҳ ўзига қарашли қисм устида ишлаган: бирлари ядрони тайёрлаган, бошқалари интерфейс билан шуғулланган...

2. Windows 7 ҳали сотувга чиқмай туриб Гарри Поттердан ҳам машҳур эди
Ундан олдинги «чала» чиққан тизим ўрнига Microsoft зўрини ваъда қилди ва халқ бунга ишониб кутди. Англиядаги Amazon онлайн дўконида Win7 учун саккиз соатда олдиндан берилган буюртмалар сони Vista тизимининг бурча аввалдан сотишлари сонидан ошиб кетган! Бугина эмас – Amazon UK тарихида энг кўп олдиндан буюртма қилинган товар айни шу Windows 7 бўлган ва оммабоплиги бўйича ҳатто Гарри Поттер ҳақидаги сўнгги китобдан ҳам ошиб кетган.

3. Win7 деярли 11 йил умр кўрди

Vista’нинг муваффақиятсиз дебютилан икки йил ўтибоқ – 2009 йилнинг 22 октябрида Windows 7 тақдим этилган. Унда қайта ишланган Aero-интерфейс, сенсорли қурилмалар учун мультитач, виртуал қаттиқ дисклар қўллови кабилар бор эди. Лекин энг асосийси – операцион тизим барқарор ишлар ва олдинги дастурлару драйверлар унга бемалол тушар эди.

4. Биринчи йили Win7 сониясига 7,6 донадан сотилган
Олдиндан буюртма беришларнинг динамикаси ушбу операцион тизимнинг муваффақиятидан дарак берарди, аммо очиқ сотувга чиққанидан сўнг убарча рекордларни синдирди. Windows 7 бир йилнинг ўзидаёқ 240 миллион нусхадан ортиқ сотилди ва бу ҳар сонияга 7,6 донадан тўғри келади! Таққослаш учун келтириб ўтамиз: ундан кейинги Windows 8 операцион тизимининг 260 миллион нусхада сотилиши учун уч йил вақт керак бўлган.

5. Унга фақат Windows 10 бас келди, шундаям 2019 йилда!

Windows 8 операцион тизими ҳам, унинг Windows 8.1 талқини ҳам Windows 7 каби оммалаша олмади. Ушбу афсонавий операцион тизимни қувиб ўтишга фақат Windows 10 муваффақ бўлди. Шундаям унинг бу ғалабаси 2019 йилга тўғри келди – Windows 7 ўз тақдимотидан ўн йил ўтибгина енгилди. Ўтган йили дунё бозорида ўнинчи авлод Windows улуши 39 фоизни ташкил этган бўлса, еттинчиси ҳиссасига 36 фоиз тўғри келган.

6. 200 миллион киши ҳалиям Windows 7 ишлатяпти

Бугунги кунда жаҳон бўйлаб фойдаланувчилар компьютерларининг тахминан 12 фоизи Windows 7 операцион тизими бошқаруви остида ишламоқда, бу эса тахминан 200 миллионта қурилма, деганидир. Бизнес-секторда эса унинг улуши анча юқори – ўтган йилги маълумотларга кўра, корхона-ташкилотларнинг тахминан ярми ҳали ундан воз кечмаган.

7. Сайловлар ва корпоратив мижозлар шарофати билан Windows 7 ҳали яшайверади
Қўполроқ қилиб айтганда, Windows 7 «жанозаси ўқилган» бўлса-да, уни буткул «дафн этиш»га ҳали эрта: шахсий компьютерларда бу тизим қўллаб-қувватланмаса-да, бизнес сегментида ҳали тўлақонли фаолият юритади. Бунинг биринчи сабаби, юқорида ёзганимиздек, АҚШдаги президентлик сайлови билан боғлиқ; иккинчидан, Microsoft ўзининг корпоратив мижозлари учун Windows 7 тизимини 2023 йилгача қўллаб-қувватлашда давом этади.

ТерабайтУз сайтидан олинди.

Марказий Осиёдаги давлатларнинг барчаси билан чегарадош бўлган минтақадаги ягона мамлакат - Ўзбекистон

2020-01-16T14:07:26.332Z

* Ўзбекистон – Марказий Осиёнинг барча мамлакатлари билан чегарадош бўлган минтақадаги ягона мамлакат. Унга қўшни давлатларнинг барчаси “стон” билан якунланади - Қозоғистон, Қирғизистон, Тожикистон, Афғонистон, Туркманистон.

* Ер юзида ўзидан ташқари, қўшнилари ҳам дунё океанига тўғридан-тўғри чиқилмайдиган иккита мамлакат бўлса, улар - Ўзбекистон ва Лихтенштейндир.

* Тошкентда Марказий Осиёдаги биринчи метрополитен жойлашган. У 1977 йилда қуриб битказилган. Ушбу метрополитен ўзининг жозибаси ва тозалиги билан оламга машҳур.

Ундаги бекатлар олтин, чинни, мармар ва шиша билан безатилган.

* Ўзбекистон олтин захираси бўйича дунёда 4-ўринда, олтин қазиб олиш бўйича МДҲ давлатлари ичида 2-ўринда туради. Уран захираси бўйича дунёда 7-ўринни, уран экспорти бўйича 3-ўринни эгаллайди. Мис захираси ва қазиб олишда Ўзбекистон дунёнинг 10 мамлакати сафида. Пахта етиштиришда бешталикда, пахта толаси экспорти бўйича 3-ўринда.

* Ислом Каримов номидаги “Тошкент” халқаро аэропорти Марказий Осиёдаги энг йирик аэропорт ҳисобланади.

* Аҳоли сони бўйича Ўзбекистон Марказий Осиёда 1-ўринни, МДҲ давлатлари ичида Россия ва Украинадан кейинги ўринни банд этган. Аҳолиси 33 миллиондан ошган Ўзбекистон аҳоли сони жиҳатидан туркий ҳалқлар орасида Туркия ва Озарбайжондан кейин 3-ўринда туради.

* 375 метр баландликка эга Тошкент телеминораси Марказий Осиёдаги энг баланд телеминора ҳисобланади.

* Китоб туманида фазони кузатувчи дунёнинг бешта кенглик станцияларидан бири жойлашган. 2010 йилдан буён бу станция ер атрофидаги хавфли астероидларни кузатиб келмоқда.

* Тошкентда жойлашган “Мўйи муборак” мадрасасининг “Қуръон музейи”да “Усмон Мусҳафи” номи билан машҳур Қуръони каримнинг бизгача сақланган энг қадимий намунаси сақланади.

* “Тошкент – Самарқанд” йўналиши бўйича қатнайдиган “Афросиёб” тезюрар поезди темир йўли Марказий Осиёдаги ягона тез юрар темир йўл саналади.

* Ўзбекистон Қуролли Кучлари Марказий Осиё давлатлари ичида энг қудратлиси ҳисобланади.

Бекзод МУСУРМОНОВ тайёрлади.

Қисқача қизиқарли фактлар…

2020-01-16T12:56:33.813Z

- Таниқли актёр Чарли Чаплин ўз қиёфадошлари ўртасида бўлиб ўтган танловда иштирок этиб, учинчи ўринни эгаллаган.

- Ҳар 5 сонияда дунёда 5 нафар чақалоқ дунёга келади.

- Бир кунда болалар ўртача 400 марта, катталар эса 15 маротаба кулар экан.

- Одам ҳаёти давомида 5 та ер экваторига тенг масофани босиб ўтади.

- Болалар олти-етти ойлик пайтида ҳам овқат еб, ҳам баравар нафас ололади. Катталар бу ишни уддалай олишмайди.

- 2003 йили яна бир спорт тури расман таъсис этилган экан. У «Шахбокс» деб аталиб, бокс ва шахматни ўзида бирлаштирган.

- 100 ёшгача ва ундан кўп умр кўрганларнинг 80 фоизини аёллар ташкил этар экан.

- Одам терисидаги тирик организмлар ер юзининг жами аҳолисидан бир неча ўн карра кўпроқни ташкил этади.

- Дунё бўйича 365 миллион одам ўз шахсий компьютерига эга. Ер юзининг тенг ярим аҳолиси эса компьютер ва телефон нималигини билмайди.

- Дунёдаги энг новча халқ - голландияликлар.

ОИЛА-МУҚАДДАС ҚЎРҒОН!

2020-01-16T10:30:02.349Z

Оила пойдевори, унинг мустаҳкам қалъаси, эр-хотин ўртасини маҳкам боғловчи ришта никоҳдир. Никоҳ-инсонлар жамиятида энг муқаддас битим ҳисобланади. Оилалар мустаҳкамлигини таъминлаш, эрта турмушни олдини олиш, турли кўнгилсиз холатларга барҳам бериш ва ажримлар сонини кескин камайтириш бугунги куннинг долзарб масалаларидан бири саналади. “Оила” илмий-амалий тадқиқот маркази Наманган вилояти бошқармаси томонидан вилоятдаги маҳаллаларда фаолият олиб бораётган хотин-қизлар билан ишлаш ва оилаларда маънавий-ахлоқий қадриятларни мустаҳкамлаш бўйича мутахассисларни қайта тайёрлов курсларида турли хил мавзуларда дарслар ташкил этилган.

Ана шундай дарс жараёнларида ДХА Наманган вилояти бошқармаси ходимлари ҳам бевосита иштирок этмоқдалар. Бошқарма томонидан Ижтимоий ҳамкорлик, оилани ривожлантириш бўйича давлат ва жамияти институтлари билан ҳамкорлик масалалари бўйича маҳалла мутахассисларига ҳуқуқий тушинтиришлар берилди. Мавзуга оид саволларга бошқарма бошлиғининг ўринбосари Хусниддин Аҳмедов ҳамда ФҲДЁ органлари фаолиятида ҳуқуқни қўллаш амалиётини мувофиқлаштириш ва методик таъминлаш бўйича бош маслаҳатчи Ширин Исақовалар томонидан батафсил жавоблар берилди.

Давлат хизматлари агентлиги Наманган вилоят бошқармаси матбуот хизмати.

БУГУН ВИЛОЯТИМИЗ РАҲБАРИ ТУҒИЛГАН КУН

2020-01-16T04:58:46.761Z

Республикада энг намунали, маданиятли деб топилган ва ҳокимлар рейтингида 3-ўринни эгаллаган Хайрулло Бозоров 1976 йилнинг 16 январи куни, Наманган вилояти Чортоқ туманида таваллуд топган. 1997 йилда Наманган саноат-технология институтини иқтисодчи-менежер мутахассислиги бўйича тамомлаган.

Хайрулло Бозоров меҳнат фаолиятини Наманган вилоят Давлат солиқ бошқармаси инспектори лавозимидан бошлаб, Наманган шаҳар Давлат солиқ инспекцияси бошлиғигача давом эттирган.

2005 йилда у фаолиятини Наманган вилояти ҳокимлигининг Ахборот-таҳлил гуруҳи бош мутахассиси, кейинчалик ушбу гуруҳ раҳбарлиги билан давом эттирган.

2007 йилда Хайрулло Бозоров Наманган вилояти ҳокимининг иқтисодиёт ва ижтимоий ривожлантириш масалалари бўйича ўринбосари лавозимида ишлади.

2008 йилдан у Наманган вилоятининг учта туманига кетма-кет ҳоким этиб тайинланди. Даставвал у Учқўрғон, 2009 йилдан Чуст тумани ва 2014 йилдан Мингбулоқ туманларига раҳбарлик қилган.

2015 йил 26 ноябрдан ҳозирга қадар Наманган вилояти ҳокими сифатида фаолият олиб бормоқда.

Фурсатдан фойдаланиб, таваллуд куни муносабати билан биз Хайрулло Ҳайитбоевич Бозоровга вилоят аҳли номидан самимий табригимизни, эзгу тилакларимизни йўллаймиз!

Эътирофлар бардавом бўлсин, Наманганимиз ривожланаверсин!

Михаил Мишустин Россиянинг янги бош вазири бўлади

2020-01-16T04:05:15.942Z

Россия президенти Владимир Путин Россия Федерал солиқ хизмати (ФНС) раҳбари Михаил Мишустин номзодини федерация бош вазири лавозимига таклиф этди. Бу ҳақда Кремл матбуот хизмати хабар қилган.

Путин Мишустин билан ишчи учрашув ўтказган ва унга бош вазир лавозимини эгаллашни таклиф қилган. Мишустин розилик билдирган.

15 январь куни Владимир Путин Россия конституциясини ўзгартиришни таклиф қилди ва Дмитрий Медведев бошчилигидаги ҳукуматини истеъфога чиқарди.

Медведев Путин билан учрашувда давлат раҳбарининг конституцияга ўзгартиришлар киритиш тўғрисидаги таклифи фонида бу қарорни тўғри деб ҳисоблашини, таклиф қилинган ўзгаришлар ижро этувчи, қонун чиқарувчи ва суд ҳокимияти ўртасидаги мувозанатни ўзгартиришини таъкидлаган.

Путин Медведев учун Хавфсизлик кенгаши раиси ўринбосари лавозимини таклиф қилди.

Михаил Мишустин ҳақида

Михаил Мишустин 1966 йилнинг 3 мартида Москвада туғилган. 1989 йилда Москва станкоинструментал институтини (СТАНКИН) тамомлаган. Иқтисодий фанлар доктори, Россия Федерациясининг I тоифадаги давлат маслаҳатчиси ҳисобланади.

У 1989-1992 йилларда - СТАНКИН аспиранти, 1992-1995 йилларда - Халқаро компьютер клубининг синов лабораторияси директори, 1995-1996 йилларда - клуб бош директори ўринбосари, клуб бошқарув раиси бўлган.

1998 йил августида Россия Федерал солиқ хизмати раиси ўринбосари лавозимига тайинланган. 1999 йил мартидан 2004 йил мартига қадар РФ солиқ ва йиғимлар вазири ўринбосари бўлган, 2004 йил мартидан 2006 йил декабригача Кўчмас мулк объектлари кадастри федерал агентлигини бошқарган. 2007 йил январидан 2008 йил мартига қадар эса Махсус иқтисодий зоналарни бошқариш бўйича федерал агентликка раҳбарлик қилган.

2008 йил мартида Мишустин UFG («ОФГ Инвест») инвестиция компанияси президентига айланган.

У 2010 йил 6 апрелидан буён Россия Федерал солиқ хизмати раиси ҳисобланарди.

“YouTube” ижтимоий тармоғида “Кулбада яшаётган Наманганлик оилага ёрдам керак” номли тарқалган материал юзасидан Янгиқўрғон тумани ҳокимлигининг МУНОСАБАТИ

2020-01-15T15:28:53.199Z

Жорий йилнинг 14 январ куни “YouTube” ижтимоий тармоғида “Кулбада яшаётган Наманганлик оилага ёрдам керак” номли тарқалган материал юзасидан вилоят ҳамда туман ҳокимлиги томонидан тузилган ишчи гуруҳи иштирокида ўрганиб чиқилди.
Жумладан, Янгибоғистон маҳалла фуқаролар йиғинида яшовчи фуқаро Жўраев Тўхтасин Хайитмирзаевич шаръий никоҳ йўли билан яшаб келаётган аёли Абдурасулова Гулхаё ва 2014 йилда туғилган фарзанди Абдурасулов Жаҳонгир билан биргаликда яшаб келаётганлиги, хонадони 1 хонадан иборатлиги ва таъмирталаблиги аниқланди.
Ўрганиш давомида фуқаро Жўраев Тўхтасин Хайитмирзаевич яшаб турган хонадон ноқонуний равишда қурилганлиги, яшаш манзили Янгиобод маҳалла фуқаролар йиғинида эканлиги маълум бўлди.
Янгибоғистон маҳалла фуқаролар йиғини раиси Муталов Ахмаджонни таъкидлашича фуқаро Жўраев Тўхтасин Хайитмирзаевич 1968 йилда туғилганлиги ушбу хонадонда 2019 йилнинг октябрь ойидан бошлаб яшаб келаётганлиги, мавсумий иш билан банд бўлганлиги хонадонининг таъмирталаблигига асосий сабаб этиб кўрсатди.
Шунингдек, маҳалла фуқаролар йиғини раиси Жўраев Тўхтасинни сурункали ичкиликбозликка берилганлиги, ушбу хонадонда доимий равишда яшамаслигини ҳамда фуқаро Жўраев Тўхтасин Хайитмирзаевичнинг фарзанди Ж.Абдурасуловга туман ҳокимлиги томонидан 2017 йилда хатна тўйи қилиб берилганлиги ва унга банкда ҳисоб-рақам очилганлигини айтиб ўтди.
Бундан ташқари Жўраев Тўхтасин Хайитмирзаевичнинг қайнотаси Убайдуллаев Абдусалом билан суҳбатлашилганда қизи Абдурасулова Гулхаё билан 2014 йилдан бери шаръий никоҳ йўли билан яшаб келаётганлиги шу вақт ичида бир нафар фарзандли бўлганлиги, Т.Жўраевни дангасалиги, иш билан банд бўлишга ҳоҳиш ва тоқати йўқлиги, сурункали равишда ичкиликбозликка берилганлиги сабабли, уларни қарамоғига олиб, ўзини номида бўлган бўш турган хонадонини доимий яшаш учун ажратиб беришига қарамасдан, куёви ушбу хонадонда яшашни истамаганлиги боис, ҳозирги ҳолатга тушиб қолганлигини афсус ва надомат билан таъкидлаб ўтди.
Убайдуллаев Абдусалом ўз сўзининг давомида ҳозирда қизи Абдурасулова Гулхаё иккинчи фарзандига тўрт ойлик ҳомиладор эканлиги, сурункали бетоб бўлаётганлиги, бироқ куёви Жўраев Тўхтасин Хайитмирзаевич бунга бефарқ билан қараши оқибатида тиббиёт муассасаларига мурожаат қилмаганлиги натижасида қизи бетоб бўлганлигини таъкидлади.

Ишчи гуруҳ томонидан фуқаро Жўраев Тўхтасин Хайитмирзаевичнинг шаръий никоҳ йўли билан яшаб келаётган аёли Абдурасулова Гулхаё туман марказий шифохонасига ётқизилди ва унинг соғлиги шифокорлар томонидан назоратга олинди.
Фуқаро Жўраев Тўхтасин Хайитмирзаевичнинг хонадони ноқонуний равишда қурилганлиги ҳамда ушбу хонадонга нисбатан туман ҳокимлиги томонидан Фуқаро Жўраев Тўхтасин Хайитмирзаевич номига уй-жойга эгалик ҳуқуқини эътироф этилиши ҳамда 2020 йилнинг феврал ойидан бошлаб, ўзи ва турмуш ўртоғи Абдурасулова Гулхаёни жамоатчилик асосида ишга қабул қилиниши ва шу орқали хонадонини таъмирлаб олиши мумкинлиги тушунтирилди.

Янгиқўрғон туман ҳокимлиги Ахборот хизмати.

ҲАМДАРДЛИК. Наманган вилояти ҳокимининг собиқ ўринбосари Манзурахон Азизова оламдан ўтди

2020-01-15T11:33:06.993Z

Хотин-қизлар қўмитаси 2020 йил 14 январь куни юз берган автоҳалокат сабаб оламдан ўтган Манзурахон Азизованинг оила аъзоларига, фарзандларига, шогирдларига, бутун Наманган халқига ҳамдардлик билдиради.

Манзурахон Азизова 40 йиллардан буён Наманган аҳлининг хизматидаги меҳнаткаш, камтар, талабчан раҳбар сифатида республика фаоллари ўртасида ҳам обрў-эътиборга эга эди.

2008 йилда Учқўрғон туман Хотин-қизлар қўмитаси раиси, 2009-2015 йилларда Наманган вилоят ҳокимининг ўринбосари – Хотин-қизлар қўмитаси раиси лавозимларида ишлаб вилоят аёллари ҳаётининг янада яхшиланишига, тизимнинг ривожланишига ўзининг муносиб ҳиссасини қўшганди.

2017 йилдан Учқўрғон туманидаги кўп тармоқли марказий поликлиника бош врачи лавозимида ишлаб келаётган эди.

Манзурахон Азизова моҳир шифокор, тажрибали раҳбар сифатида юзлаб шогирдларни тарбиялади. Ишлаганда ҳам бор салоҳиятини сафарбар этиб, ўта фидойилик билан ишлай олди. Одамларга очиқ юз ва хушмуомалада бўлди.

Чуқур ҳамдардлик ила Манзурахон Азизованинг руҳи шод, охирати обод бўлишини Яратгандан тилаймиз!

Ўзбекистон Хотин-қизлар қўмитаси.

Инсоният тарихидаги “буюк” жиноятчилар

2020-01-15T08:45:53.775Z

Жиноятлар ва зўравонликлар инсоният тарихида қора доғ бўлиб қолади, афсуски, бироқ ўша доғлар келажакнинг ҳам бир қисмидир. Жиноятчиларни жиноий амаллари баъзида инсонларни ҳайратга ёки ваҳимага солади. Жиноятлар ҳақида китоблар ёзилади ва фильмлар суратга олинади, ток-шоулар ўтказилади. Мазкур рўйхатга уларнинг бешта энг машҳурлари киритилди. Улар вафотларидан кейин ҳам инсонларни ваҳимага соладиган, шафқатсиз ёвузлар ва наркобаронлардир.

Пабло Эскобар

Биринчи бўлиб айтадиганимиз, Пабло Эскобар бўлади. Ҳали ёш болалигидан, у жиноий фаолиятга жалб қилинган, улғайгач эса Колумбия наркобаронига айланди. Кўплаб наркотик савдоси тармоқлари унинг қўл остида эди. Наркотик моддалари дунё бўйлаб минглаб инсонларнинг ҳаётига зомин бўлмоқда. Эскобар замонавий тарихда, жиноят оламининг энг қўрқинчли ва нуфузли раҳбари эди. Наркотик тарқатиш бўйича бутун бошли авиаҳавойўллари унинг ҳукми остида эди. Унинг ифлос пуллари миллиардлаб долларларни ташкил қиларди.

Босқинчилик билан шуғулланадиган жангчи ва ёлланма қотиллар унинг уй-жойини қуриқлашарди ва ҳар қандай ҳизматга шай туришарди. Пабло Эскобар қўл остидаги ёлланма қотиллар унинг буйруғига биноан бизнесини йўқ қилмоқчи бўлган бир неча полиция ходимларини ўлдиришган. Унинг жиноий фаолияти бутун Жанубий Американи қуршаб олган. Пабло Эскобар 1993 йил 2 декабрда полициячилар билан отишма чоғида ўлдирилди. У 45 ёшда эди.

Грисельда Бланко

Грисельда Бланко ҳам наркотик савдоси устаси эди, уни кокаиннинг бувиси деб аташарди. У Майамида биринчи бўлиб кокаинни йирик сотувчисига айланди. Ёшлигида бу хоним чўнтак ўғриси ва болалар ўғриси бўлган. Бироз улғайгандан сўнг фоҳишалик фаолияти билан шуғулланди. Турмушга чиққач, турмуш ўртоғи билан биргаликда наркотик савдоси билан шуғулланди. Кўп ўтмай Грисельдани ҳибсга олишди ва наркотик савдоси учун 10 йил қамоқ жазоси тайинлашди.

Аммо устаси фаранг кокаин бувиси, панжара ортида ҳам ўзининг жиноий фаолиятини давом эттирди. Махфий тармоқ ёрдамида Грисельда кокаин савдосини давом эттирган. У жиноий бизнесини ўтган асрнинг 70-80 йилларида қурган. Грисельда “Кокаин ковбойлари жанги” иштирокчиси бўлган. Унинг бўйнида 200 дан ортиқ қотиллик жавобгарлиги мавжуд. Унинг жиноий тармоғи Колумбиядан Майами, Жанубий Каролина ва Нью-Йоркка кокаин ташиш билан шуғулланган. Грисельда Бланкони 2012 йил 3 сентябрьда 69 ёшида ёлланма қотиллар отиб ўлдиришди.

Жесси Жеймс

Жесси Жеймс машҳур босқинчи бўлган. У поездлар ва банкларни ўмариш билан шуғулланадиган жиноий гуруҳ тузган. Ушбу жиноий гуруҳнинг ҳисобида бир қанча қотиллик мавжуд. Жесси Жеймсни яна Америка Робин Гуди деб аташган. Лекин у ушбу олийжаноб қаҳрамонга умуман ўхшамайди, чунки у талон-тарож қилиб топилган ўлжасини ҳеч қачон, ҳеч ким билан бўлишмаган. Жесси Жеймс АҚШдаги фуқаролик уруши вақтида партизанлар ҳаракатида иштирок этган.

Бироқ, у аъзо бўлган гуруҳ фаолиятига кўра жиноий гуруҳ эди. Ушбу жиноятчилар поездларни тунашарди. Ёш йигитча АҚШнинг энг машҳур жиноятчиларидан бирига айланди. Жесси Жеймс ўзининг акаси Френк билан биргаликда Канзас ва Миссуридаги жиноятчилар билан ҳамкорлик олиб боришарди. Гуруҳ бошлиғининг вафотидан сўнг ака-укалар гуруҳга бошчилик қилишди. Жеймс 34 ёшида вафот этди. Уни ўз гуруҳининг аъзоси, губернатор томонидан ваъда қилинга мукофот пули туфайли отиб ўлдирди. Мазкур сенсацияли хабар бутун АҚШ матбуотида кенг ёритилди.

Габриэль Капоне (Аль Капоне)

Альфонс Габриэль Капоне Америкада жиноий ҳокимиятнинг бошлиғи бўлган. У криминал бизнес билан шуғулланган зўравон (гангсер) эди. Унинг фаолияти етти йил давом этди. Унинг бизнеси фоҳишабозлик ва АҚШда “қуруқ қонун” даврида спиртли ичимлик сотишга асосланган эди. Аль Капоне қимор бизнеси билан ҳам шуғулланган. “Рэкет” тушунчаси ҳам ушбу мафиячига тегишли. У жиноий гуруҳ аъзосига айланганда, жуда ёш эди. “Қуруқ қонун” даврида катта махфий ташкилот унга тегишли эди. Гуруҳ аъзолари бошқа гуруҳлар билан жиноий намойишларда иштирок этишарди.

Бу таъсир доирасини кенгайтириш, ҳудуд талашишдаги, ҳақиқий жанг эди. Уни ушбу жиноятлари учун суд қилишолмади, чунки ҳеч қанақа исбот далил йўқ эди. Аль Капонени солиқ тўлашдан қочгани учун ҳибсга олишди ва Алькатрас оролидаги қамоққа жўнатишди. Унинг машҳур зирхланган “кадиллак” автомобили мусодара қилинди ва давлат хизматига ўтказилди. Машҳур мафиячи қамоқдан чиққанидан сўнг инсульт оқибатида шол бўлиб қолди. Капоне 1947 йил 25 январда инфаркдан вафот этди. Машҳур мафиячининг ҳаёти ҳақида Голливудда фильм суратга олинган.

Кичкинтой Билли

Кичкинтой Билли Америкада қотил сифатида танилган. Бу ўқчини Ғарбда яхши эслашади. У ўттиздан ортиқ инсонларнинг ўлимида айбдор бўлган. Унга туғилганида берилган ҳақиқий исми Уильям Генри Маккарти. Лекин у ҳаммага Билли Кид бўлиб танилган. Биринчи марта уни 1875 йилда озиқ-овқат ўғирлагани учун ҳибсга олишган. Кейинги ҳибс ўқ отар қурол ва ювиш хонасидан кийим ўғирлагани учун бўлган. Ушбу жиноят озодликка чиққанидан беш ой ўтиб содир қилинган. Ҳибсга олинганидан икки кун ўтиб у қочиб кетади. Кейин у ўгай отасини тунайди, у ердан Билли Кид кийим ва тўппонча ўғирлайди. Полиция уни қидирувга беради.

У зўравонга (гангстер) айланади. Биринчи қотилликни Кичкинтой Билли ўн саккиз ёшида содир этади. Бу қотиллик тасодифий эди. Билли ва унинг дўстлари фермерларнинг отларини ўғирлашардилар. Айтишларича, у кимни жиноятчи деб ҳисобласа, фақат ўшаларни ўлдирган. Линкольн туманида жиноий гуруҳлар ўртасида жанг бўлган. Жиноий гуруҳларнинг бирига Кичкинтой Билли бошчилик қилган. У жуда қобилиятли: ақлли эди. Бироқ сўнгги ҳибсдан кейин уни осишга ҳукм қилишди. Кичкинтой Билли соқчини алдаб қочишга муваффақ бўлган. 1881 йилда яна ҳибсга олинаётган вақтида ёш жиноятчи шахсан таниш бўлган ва қачонлардир дўстона муносабатда бўлган шериф Пэт Гаррет томонидан отиб ўлдирилган. Кичкинтой Билли бор йўғи 21 ёшда эди.

Сиз ушбу мақолада машҳур жиноятчиларнинг камчилиги билан танишдингиз. Уларнинг жиноятлари ўзгача ваҳшийлик ва очкўзлик билан ажралиб туради. Уларнинг айримлари қонун олдида жавоб беришган, айримлари эса худонинг қаҳрига дучор бўлишган.

Интернет материаллари асосида Бекзод Мусурмонов тайёрлади.