Інтерфийса

Microsoft выпустили лімітовану колекцію шатя Hardwear

2022-07-16T15:12:58.092Z

Учинити сякый по-свойому носталґічный проєкт закликали дізайнера тай креативного діректора Supervsn Studios Ґевіна Матйи.

Навгул у колекції дивять предметӯв, межи котрыма сут майкы из написами «It’s In You Not On You» («Ушытко в тобі, а не на тобі»), «Never Not Creating» («Ни секунды без творїня»), «Блаженством» — фотьков, котра ся прославила ги мовчана позадина у Windows XP, куртка из «Inbox» на жебі.

У відеови за Hardwear Ґевін розказав як Microsoft май давно іншпіровала го стати дізайнером тай чом вӯн выдїлив особеноє місто Microsoft Paint у свою̄в колекції.

Жерело: Microsoft Life

Читайте нас на Twitter, Telegram тай Instagram

Стрімите? Спеціалный контроллер уд Razer буде вам паровати

2022-07-15T08:27:00.727Z

Образчик Razer

Фірма Razer, ги ся знає, концентрує ся якраз на бавлячах на платформі PC, та ясно ож такоє явліня, гикой стрімінґ бавок, не мӯг быти нима проіґнорованый. Завто Razer розробили шор спеціалізованых контроллерӯв на сякый припад, цїльовов авдіторійов котрых мавут быти стрімеры, бавлячі, создатилї контента. У сись читвирь фірма презентовала новый продукт — Razer Stream Controller, котрый поволит вам управляти стрімом удалено. Из інтересного — контролер є закладеный на софтверови, што ся хосновав на звуковому контролерови Loupedeck.

Razer Stream Controller исе така малинька шкоробыня, на котрӯв найдете 12 проґрамованых ґомб, дотыкову образовку на хоснованя макросӯв, тай 6 аналоґовых кручал, котрі мож хосновати на збавляня/добавляня звука, на зум, ци на хоть-што другоє. По розмірам має 151×101.5×30.2 міліметрӯв тай 210 ґрамм вагы. Капчат ся ид компютерови простым USB шнуром, пуддержує Windows тай macOS.

Девайс быв розробленый тыма такой девелоперами, што робили Loupedeck, хоть пуд брендом Razer, тай фунґує такой из йихньым базовым софтвером из невеликыма кастомізаціями. Сотфер пуддержує не лиш стрімінґові аплікації (гикой OBS, Twitch, vMix, Ecamm Live тай такоє), но ай преповно другого софтвера, котрый хоснувут шелиякі творцї контента, наприклад Adobe Photoshop, Adobe Premiere Pro, Adobe After Effects, Final Cut Pro, Philips Hue Bridge, тай даже чогось Spotify. Кроме того, Loupdeck має щи бӯлше 70 рӯзных профілюв, плаґінӯв, пакункӯв іконок на щи шор другых аплікацій. Софтвер причандалы автоматічно знає запускати профіл пуд аплікацію, яку маєте уключену на компютерови, хоть можете ай вручну запускати спеціфічні профілї хоснувучи ґомбу на корпусови.

Раз вызират так, ож Razer Stream Deck є добрым конкурентом уже еґзістувучому Elgato Stream Deck уд фірмы Corsair. Купити свіжый продукт уд Razor уже мож за $269.99.

Жерело: Tom's Hardware

Читайте нас на Twitter, Telegram тай Instagram

Nothing указали свӯй дебютный смартфон Phone (1)

2022-07-14T10:22:56.060Z

Девайс уд стартапа Карла Пея (спӯвзаложителя OnePlus) дӯстав «пӯвпрозору» задню крышку, много світлодіодӯв, доста скромну цїну у £399–499 (приближно $475–593)… тай не дустав реліз у США. Планує ся, ож Nothing Phone (1) буде ся продавати у Споєному Королю̄встві, Японії, Індії тай крайинох материкової Европы — новый смартфон Nothing навгул увидят лиш 40 крайин.

Жерело: Nothing

Світлодіоды на задню̄в части Nothing Phone (1) сут не лиш декоративным елементом — они будут мати шор практичных функцій, котрі авторы назвали Glyph Interface. Приміром, ушыткі діоды будут ся загорати, кидь вам прийде новоє голошіня авадь клїпати у такт 10 закладеным у смартфон рінґтонам; кроме того, у штімованьох Glyph Interface буде шпеціална функція Flip to Glyph, котра позволит покласти смартфон долӯв екраном тай дӯставати голошіня беззвучно, орієнтувучи ся чисто на пӯдсвітку. Вертикална лампа у нижню̄в части задньої крышкы буде указовати уровинь батеркы, кой смартфон пӯдкапчаный ид сїти, а щи «ґліф» мож буде хосновати ги пӯдсвітку про фотьканя. Кроме Glyph Interface у Nothing Phone (1) є черленый світлодіод — індікатор накручованя відеа.

Жерело: Nothing

Конфіґурація на 8 Ґб памняти тай 128 Ґб міста буде стойити £399 (~$475); 8 Ґб памняти тай 256 Ґб міста — £449 (~$535); а верзія из 12 Ґб памняти тай 256 Ґб міста має цїнник у £499 (~$593).

Nothing Phone (1) годен ся похвалити 6.55-дюймовым 1080p OLED-дісплейом из дінамічнов частотов уд 60 до 120 Гц (залежит уд того, што ся удбыват на екранї) тай світлотов у 1200 нітӯв. Удну смартфон має процесор Qualcomm Snapdragon 778G Plus, батерку на 4500 mAh тай ходит на NothingOS, учиненӯв на основі Android — розробникы обіцявут 3 рокы обновлїнь тай 4 рокы безпековых печӯв кажді два місяця.

Жерело: Nothing

У девайса є основна 50-меґапікселна камера (из пӯдпоров оптичної тай електронної штабілізації, нӯчного, портретного режімӯв, скенованя документӯв) тай 114-ґрадусна шырококутна, годна чинити макрофотькы из далностьов до 4 см. Фронтална камера має 16 меґапікселӯв. Phone (1) приступный у двох цвітовых варіаційох: білӯв тай чорнӯв.

Жерело: Nothing

Жерело: Nothing Intl

Читайте нас на Twitter, Telegram тай Instagram

Новый телефон уд Nokia має такой жебик на ваші наушникы

2022-07-12T08:55:49.121Z

Образчик уд HMD.

Фірма HMD презентовала три нові телефоны пуд брендом Nokia, помежи котрыми найдеме ай Nokia 5710 XpressAudio из елеґантным жебиком на ваші безпроводні наушникы. Сяку ідею видиме далеко не у первый раз, бо щи у рокови 2019. сякоє нам понукала фірма Servo, айбо інтересно видїти таку експеріменталну іновацію уд такої ґлобално знамої фірмы.

Nokia 5710 XpressAudio — доста стандартный телефон (тийґлофон) из образовков на 2.4", класічнов 12-кнопковов клавешницьов из пуддержков T9. Айбо иззаду маєме читаву пластікову феделку, котра ся изсуват удолину. На дниська знаєме за сись телефон лиш тото, ож буде коштовати 69 евро, тай зачне ся продавати у Анґлії у кӯнци сього місяця. За другі державы раз ся не споминало.

Феделка иззаду удкрыват жебик на наушникы. Образчик уд HMD.

Наушникы, што йих найдете у комплектови, будут играти музику до чотырьох годин на єдному зарядови батеркы, авадь 2.4 годины приказованя из даткым телефоном. Но тай сам телефон має доста велику батерку, обы не переживати за заряжаня щи ай наушникох уд нього. HMD кажут ож Nokia 5710 XpressAudio кажут ож у комплектови иде батерка на 1,450mAh, котра, за запервоє, унимат ся гет кидь треба, а за другоє — дає вам до 6 годин приказованя у сїтї 4G, авадь до 20 днӯв (!) у режімови готовности (кидь лежит а не хоснуєте го). Телефон пуддержує роботу из двома картями SIM нараз.

Не позиравучи на інтересну цукорку у видї жебика из наушниками, нич не было чути за пуддержку можерных сістем играня музикы, гикой Spotify авадь Apple Music, тай скорше всього, такых там не буде. Причинов того є тот факт, ож сись телефон, разом из братовами си, буде бігати на доста старинькӯв операційнӯв сістемі — S30 Plus. Фірма HMD раз вам понукат играти музику через MP3 плеєр тай слухати радіо, на сюм раз курта бисїда.

Новопрезентовані: планшет T10, Nokia 8210 4G, Nokia 2660 Flip (жабка), тай Nokia 5710 XpressAudio.

Попиля нашого Nokia 5710 XpressAudio, фірма HMD презентовала ай пару другых телефонӯв из унікалными особностями (фічами). Ушыткі будут доступні у кӯнци місяця на брітанськӯм торгови.

Спомежи сих девайсӯв варта спомнити щи Nokia T10 — восьмидюймовый планшетный компютер, котрый буде мати лишек Wi-Fi из комунікацій, тай вкусну цїну — 159 евро.

Жерело: The Verge

Читайте нас на Twitter, Telegram тай Instagram

Ілон Маск передумав куповати Twitter

2022-07-11T08:44:25.231Z

Майбогатый на днишньый динь чилядник світа заявив, ож на позадині «дакӯлкох нарушень соглашиня з бока Twitter» уже не хоче куповати свою облюблену соціалну сїтку — вӯн уже уповістив за вто SEC (комісію цїнного папіря тай бірж США).

При тому у Маска щи ся лишавут його 9.2% акцій Twitter — исе значит, ож властник Tesla тай SpaceX не страчає свӯй статус майзначного акціонера компанії.

Припускає ся, ож єднов из причин, чого Ілон Маск «дав узад» из куплїньом Twitter є число ботӯв тай спам-акаунтӯв на платформі, а конкретно то, што у Twitter, як вӯн заявляє, збрехали за йих зуправдашньоє число.

Подля соглашеня за куплїня, Маска чекат внос розміром у єден міліард доларӯв, котрі вӯн мав бы заплатити SEC за удкликаня куплїня.

Хоть у інтернетї шырят ся образчикы, де акаунт Ілона Маска у Twitter гибы заблокованый, на момент написаня статї профіл twitter.com/elonmusk обстає ся приступным тай никым не заблокованым.

Жерело: SEC Archive

Читайте нас на Twitter, Telegram тай Instagram

Портативна конзола GPD Win Max 2 дӯстала цїну

2022-07-09T09:07:18.435Z

Конкурент Steam Deck оказав ся многым май дорогым ги творїня Valve — цїны на GPD Win Max 2 зачинавут ся из $899 тай сягавут $1299. Продавати ся девайс буде кампанійов на кравдфандінґовому вебсайтови Indiegogo.

Жерело: GPD

Ушыткі конфіґурації мавут 10-дюймовый «безрамковый» екран, процесор Intel Alder Lake i7 1260P вадь AMD Ryzen 7 6800U на выбор, 16–32 Ґб LPDDR5-памняти, уд 128 Ґб до 2 Тб міста на SSD-нагромадникови.

Майбазовый варіант конзолы буде мати AMD 6800U APU (8 ядер, 16 потокӯв, 12 ядер GPU), 16 Ґб памняти тай 128 Ґб міста; иппен вӯн стойит $899 тай буде ся продавати «не про рітейл» дуже лімітованым тіражом — лиш 50 штук.

Жерело: GPD

Основный фокус иде на другу конфіґурацію, котра буде мати ушытко ги у верзії за $899, кроме нагромадника, котрый юв «пуднимут» ид 1 терабайту — за йсю варіацію просят $999. «Апґрейднута» на 32 Ґб памняти буде стойити $1199, а майдорога конфіґурація из 32 Ґб памняти тай 2 Тб міста має цїнник у $1299.

Кроме того, мож буде докупити 4G LTE модул за $79 тай додаточный SSD-нагромадник на 1 Тб у другоє M.2-гнїздо за $139.

Єднов из майвеликых софтверных удлик GPD Win Max 2 уд конкурента є схоснована операційна сістема — Steam Deck має «пӯд капотом» дістрібутив Linux, а GPD Win Max 2 — Windows 11. Исе має свої плусы тай мінусы: приміром, навгул у Windows май файна пӯдпора бавок, хоть она не така легка ги сістемы на основі Linux; при тӯм нитко не мішат май знакомым из техніков хосновачам покласти си таку сістему, яка йим ся май любит.

Сяк GPD Win Max 2 из читавым удрывом обганят свого конкурента Steam Deck по спеціфікаційох — конзола Valve не дотїгат ни екраном, ни жилїзом, айбо є два-три раз май дешевов ги «чажкоатлет» GPD Win Max 2.

Жерело: Tom’s Hardware

Читайте нас на Twitter, Telegram тай Instagram

Фірма HTC презентовала новый планшет! Но нитко за тото не чув

2022-07-06T08:22:08.289Z

Колись читавый тай знамый у світови выробник смартфонӯв на Android, фірма HTC, на днях презентовала новый планшетный компютер, но доста непривычный про таку компанію. Новинка, именована A101, ото планшетный компютер из 10.1" дісплейом, из престарым уднушньым напарованьом. Сам девайс анонсовав ся мовчкы, ниґде за нього не давали знати, но кидь віровати репортови Wayback Machine, та продавати го ладят ся у державах Африкы в основному.

Чажко крітіковати сякі кылаві характерістикы девайса, розумівучи ож вӯн є орієнтованый на торгы, што лиш зачинавут рости. Айбо чудно в сюв ситуації другоє, ож чого фірма, котра буквално учинила первый у історії смартфон на Android, котрӯв Google не раз довіряв выробляти девайсы пуд брендом Nexus (даже недавньый планшет Nexus 9) — зачинат выробляти адсякі неінтересні продукты. У планшета A101 даже операційна сістема 2020. рока — Android 11, хоть потенціално мож было покласти ай адаптовану на великі образовкы Android 12L.

По спеціфікаційох у планшета выд HTC процесор Unisoc T618, 8 ґіґабайт оперативної памняти, тай нагромадник на 128 ґіґ (мож розшырити через microSD). Основна камера на 16 меґапікселюв, в додачу до 2-меґапікселової широкоуглової тай 5-меґапікселової фронталної камеры. Дале скурта: порт 3.5 jack, тай батерка на 7,000 mAh.

У ситуації чудно якраз тото, ож новый планшетный компютер домак не інтересный, даже позором даякого 2019 года. Фірма, што ся перич переганяла из Samsung за лідерство у сеґментови преміалных телефонӯв, дниська мовчкы презентує никус не інтересный девайс, котрый даже в медіа запримітили аж за пару днӯв як ся быв появив на сайтови.

Тяжко уповісти што собі планує фірма HTC, котра щи у рокови 2018 продала ґуґлови своє крыло розробкы смартфонӯв, кроме ги мачати ногы у нові проєкты по «метасвітови», из котрых раз нич не выростло.

Жерело: The Verge

Читайте нас на Twitter, Telegram тай Instagram

Изглядовникы з UPNA/NUP учинили акустичный «левітатор»

2022-07-02T07:39:38.842Z

Командї из Universidad Pública de Navarra дало ся розробити сістему, котра хоснує акустичну левітацію на збераня предметӯв без фізичного контакта.

Жерело: UPNA/NUP

Прінціп роботы такый, ож сістема ґенерує акустичні поля, котрі «держат» у воздухови дрӯбні детайлы ги цяпкы клея тай швабликы, повертавут тай переносят йих, обы зберати тривымірні штруктуры. Ултразвукові поля, хосновані сяков технолоґійов, проходят через тканины, сїткы тай другі матеріалы.

Авторы: Асіер Марзо, Іньїґо Езкурдія, Рафаел Моралес, Марко Андраде — назвали свою розробку «LeviPrint» тай опубликовали за ниї статю «LeviPrint: Безконтактна фабрикація через повноє акустичноє удержаня продовгастых предметӯв». Позӯр дає ся и на сферы, де бы мож захосновати сістему — она бы ся пригодила на технікы, на котрі традіційна 3D-печать нетрїбна: приміром, на вонкашнї маніпулації удну запертых контейнерӯв авадь даже збераня дачого удну жывых орґанізмӯв.

Планує ся, ож розробникы будут презентовати свою технолоґію на єднӯв из майважных конференцій из компютерної ґрафікы тай інтерактивных технолоґій SIGGRAPH у Ванкуверї, Канада.

У відеови, опубликованому командов, мож увидїти, як из швабликӯв тай цяпок клея, котрый твердїє уд ултрафіолета, зберавут ся шелиякі конштрукції.

Жерело: EurekAlert!, Universidad Pública de Navarra

Читайте нас на Twitter, Telegram тай Instagram

За 2FA-аплікації

2022-07-01T07:37:28.521Z

Дниськы показкуєме за аплікації про двофакторну автентикацію (2FA). Як они фунґувут, нашто йих си пӯдключати, чим сут лїпші выд єдноразовых кодӯв на імейл авадь у SMS? Розбераєме ся.

0. Што вто двофакторна автентикація?

Доброє звіданя. Ися страшно розумна пара слӯв, кидь описати накурто тай простыми словами, означає роздїленя процеса дӯставаня приступа д дачому (приміром, вашому акаунтови у соціалнӯв сїтцї) на два рӯзні крокы. Иппен «рӯзні», бо иншак бысьме говорили за двокрочну веріфікацію — Two-Step Verification авадь 2SV — айбо тото тема на докус другый текст.

Тота рӯзнота помежи кроками автентикації ся проявляє у тому, з якым «фактором» маєме дїло — выдїлявут ся згруба три тіпа такых факторӯв:
• што хосновач знає (приміром парол авадь PIN-код)
• што хосновач має (приміром, смартфон авадь фізичный ключ)
• кым хосновач є (біометрія, приміром выдбиток перста авадь сїтчаткы ока)

Кидь захоснуєме даякі два из сих факторӯв, будеме мати двофакторну автентикацію. Сяк ся пӯднимат безпека: даже у сітуації, кой ткось даґде утягне ваш парол, є высока шанса, ож тот ткось не прӯйде дале, бо не буде мати код из SMS, імейла авадь аплікації-автентикатора.

1. Як фунґувут 2FA-аплікації?

Типирь перейдеме ид иппен аплікаціям про двофакторну автентикацію. Примірӯв універзалных автентикаторӯв є повно: Google Authenticator, Microsoft Authenticator, Authy Authenticator.

Як думаєте, як они ся капчавут из другыми сайтами тай ушелиякыми сервісами?

Прінціп роботы такый: аплікація кажді N секунд ґенерує код, котрый вы вписуєте/копіруєте, обы зайти у свӯй акаунт. Обы пӯдкапчати аплікацію, єден раз скануєте QR-код, зґенерованый сервісом, на котрый хочете мати 2FA.

Айбо у сьому процесови сут інтересні нюансы.

Приміром, вам не трїбен інтернет на телефонї, обы там ся ґенеровали коды у Google Authenticator. Ґенерація удбыват ся офлайн — про неї аплікації даже не треба споєня з сайтом, де вы введете код!

Так є спозад того, ож 2FA-аплікації контактувут из сервісом лиш єден раз — товды, кой пӯдкапчуєте йих ид тому сервісови. Ушыткі далші разы аплікація просто ґенерує коды прямо на девайсови, а сервіс просто йих у себе провіряє. Исе щи май читаво збиват планы ушелиякым злодїям: як мож перехватити код, кидь вӯн ся ниґде не передає?

Смысел у тому, ож тот QR-код, котрый скануєте на етапови актівації 2FA, переносит автентикаторови ушытку трїбну на ґенерацію єдноразовых кодӯв інформацію. Сяк обадва бокы будут годни раз у даякый інтервал давати єднакі коды: аплікація — про указованя йих хосновачови, а сервіс — про валідацію уведеного хосновачом кода.

Годни сьте си тото представити ги звіряня годинок: сервіс тай автентикатор так гибы єден раз крутят свої годинкы на тот час, за котрый обоє ся договорили. Пак хосновач у любый час годен зазвідати «кулко годин?» аплікацію тай уповісти удповідь сервісови — тому доста поникати на свою годинку, при тому не говорячи з аплікаційов напряму.

2. Нашто си уключати тоты 2FA-аплікації?

Почасти на йсе звіданя уже удповідаєме у спередущых абзацох. Айбо грїх не дати сяку хосенну інформацію окреме.

Майглавным плусом аплікацій про двофакторну автентикацію є йихня бізӯвнӯсть. Уломити акаунт, захыщеный єдным лиш паролом, легко: парол ся не мінят (кидь вы го не поміняєте), про нього не треба брати ваш телефон, а у векшинї припадӯв єден парол удперат злодїйови нараз пару акаунтӯв, бо люде часто не хотят / забывавут удумововати рӯзні паролы на рӯзні акаунты. Айбо двофакторна автентикація ушытко мінят: типирь обы зайти у ваш акаунт, злодїй мусит не лиш знати ваш парол, айбо и мати фізичный приступ ид вашому смартфону, при тому даже кидь вӯн даяк выдурит у вас на секундочку телефон тай увидит код, у нього буде лиш 30–60 секунд, обы го захосновати, иншак код просто перестане быти платным.

3. Чим 2FA-аплікації сут лїпші выд єдноразовых кодӯв из імейлӯв авадь SMS?

Главна удлика у тому, ож SMS тай імейлы мож перехватити без приступа ид вашӯв SIM-картї авадь поштовӯв ладичцї — сесе особено платно про тоталітарні державы. Сякі трафункы уже были, приміром, у Іранї, де перехвачовали ся авторізаційні SMS-коды про Telegram через операторӯв, обы взламовати акаунты горожан.

Бонусом: як си наштімовати авторізацію через 2FA-аплікацію?

Кидь сервіс, котрый хочете захыстити 2FA, не має свої аплікації на сякоє дїло, мусите раз покласти дашто сторонньоє: приміром, Google Authenticator, Microsoft Authenticator авадь Authy Authenticator.

Дале треба буде перейти у штімованя безпекы удну сервіса, на котрый хотїли бысьте повісити двофакторный «замок»: там має быти пункт «Two-Factor Authentication» («Двофакторна автентикація») авадь «Two-Step Verification» («Двокрочна веріфікація»). Убераєте «Third-party authenticator app» («Стороння аплікація-автентикатор»), кидь вам давут такый выбор.

На сьому етапови дӯстаєте QR-код тай шорик из букв тай чисел — исе два способы припойити автентикатор на ваш выбор, не є розликы што з сього уберати. QR-код треба скеновати у 2FA-аплікації, а шорик мож увести вручну. Кой вы зъяжете сервіс из аплікаційов, автентикатор вам укаже код, котрый будете мусїти увести у сервісови — готово, типирькы у вас наштімована двофакторна автентикація!

Важно: фурт думайте за запасні способы зайти у свӯй акаунт — на случай кидь стратите телефон авадь у вас його украдут. Про то сут запасні коды (backup codes), котрі фунґувут лиш по разу тай записувут ся даґде у дуже секретному тай безпечному містї, авадь алтернативні способы авторізації у обход 2FA.

Авторськый текст Інтерфийсы.

Читайте нас на Twitter, Telegram тай Instagram

Учені учинили з саранчи кіборґӯв тай научили вынюхововати ракові клїткы

2022-06-30T08:18:19.522Z

Сякому чудному на першый позӯр прорыву найшли хосен: «ауґментована» саранча годна проводити тесты, у котрых по дыханю буде глядати хвороту у пацієнта. Кроме того, авторы изглядованя думавут, ож сесе годно іншпіровати людство на вытвореня штучної серсамы из сякым иппен прінціпом.

Исе не першый раз, кой жывотину учат упознавати хвороты у люди — май давно варовати на падїня уровня цукра у крови, рак, туберкулоз авадь даже ковід, треніровали псӯв. Они, ги ся тримле учеными, вынюхововали запахы тіла тай дыханя, котрі ся появляли у люди кой они хворїли. Айбо метод из псами оказав ся надміру дорогым, а розробка девайса, котрый бы мімікровав пӯд псячый нӯс — процес дуже помалый тай тяжкый, каже изглядовник тай невроінженер Мічіґанського універзітета Дебаджіт Сага.

Вмісто того Сага из колеґами найшов май легкый спосӯб: «залїзти» у мозоґ жывотины. А конкретно саранчи, котра у послїднї рокы много ся штудовала.

Обы досягти такого резултата, ґрупа ученых хірурґічно удкрыла мозоґ жывої саранчи тай припойила ид ньому електроды, обы дӯставати сіґналы з антенок, котрыми саранча чуствує запахы.

Товды Сага из колеґами выростили три рӯзні тіпы рака ротової ямины тай клїткы людського рота, у котрых рака не было; зобрали ґаз, спродукованый каждым тіпом клїток тай перенесли го ид антенкам саранчи.

Мозоґ саранчи удреаґовав на каждый тіп по-рузному — записані мінты електричної активности были натӯлко рӯзні, ож чисто по них мож было опридїлити, котрі клїткы мали рак.

У свойому експеріментови команда хосновала нараз 6–10 особин саранчи — обы дӯстати ясный сіґнал, треба слїдити за 40 невронами. Айбо Дебаджіт Сага надїє ся, ож у будучному зможе хосновати електроды, котрі будут имати сіґнал уд май великого числа невронӯв, што має позволити му хосновати лиш єдну особину саранчи на експерімент. Щи вӯн ся надїє розробити даяку май портативну направу на сесе дїло — обы мож было протестовати ефективнӯсть способа на реалных людьох.

Джеймс Ковінґтона, інженер Ворвікського універзітета, крітикує ідею, указувучи на то, ож хоть «научно исе направду дуже інтересно, дӯйти ид хоснованю дачого у выявленьови рака надміру тяжко». Кроме того, Ковінґтон кыват звіданя комфорта люди тай етичности сякого хоснованя саранчи: кидь, приміром, пчӯл, наученых находити выбуховину, пущавут назад на волю, та туй про саранчу исе робота до кӯнця жывота. Мало того, хоть Дебаджіт Сага каже, ож анестезія не трїбна, бо саранча не чуствує боли, подакотрі изглядованя навборот указувут на то, ож інсекты годни спознавати тай сокотити ся уд речи, котрі сьме годни назвати «болячыми», а щи дӯстати май высоку чуствителнӯсть пӯсля травмы, похожу на хронічный бӯль. Сага каже: «Саранча є мертва у планї свойих тїлесных функцій, мы лиш держиме жывым єї мозоґ». Кидь команда годна буде порозуміти, котрі конкретно рецепторы на антенкох майтрїбні на впознаваня рака, они зможут хосновати аналоґы, вытворені у лабораторных условійох.

Жерело: MIT Technology Review

Читайте нас на Twitter, Telegram тай Instagram