@mustaqilgazetasi

Tabiatni sevgan bola - kelajakni asraydi

2026-06-23T01:08:34.247Z

Bugungi kunda yosh avlodni tabiatga mehr-muhabbat ruhida tarbiyalash, ularda ekologik madaniyat va mas’uliyat hissini shakllantirish dolzarb vazifalardan biri hisoblanadi. Ayniqsa, maktabgacha ta’lim muassasalarida olib borilayotgan amaliy mashg‘ulotlar bolalarning atrof-muhitga ongli munosabatini rivojlantirishda muhim ahamiyat kasb etadi.

Bulung‘ur tumanidagi 26-davlat maktabgacha ta’lim tashkilotida ana shu ezgu maqsadlar yo‘lida yozgi mavsum munosabati bilan “Ekologik tabiat bolalar nigohida” mavzusida tuman ko`rgazmali seminari tashkil etildi. Tadbir davomida tarbiyalanuvchilar uchun qiziqarli va mazmunli ekologik maydonchalar tashkil qilinib, ular tabiat sirlarini amaliy mashg‘ulotlar orqali o‘rganish imkoniyatiga ega bo‘ldilar.
Seminar doirasida bolajonlar hayvonot bog‘i, tozalik qutilari, Turon teatri, pazandalik bekati, kulolchilik ustaxonasi, o‘simlik yetishtirish hamda o‘g‘it tayyorlash maydonlari bilan yaqindan tanishdilar.

Shuningdek, yozgi sog‘lomlashtirish bekatlarida tashkil etilgan mashg‘ulotlar bolalarning bo‘sh vaqtlarini mazmunli o‘tkazish bilan birga, ularning jismoniy va ma’naviy kamolotiga ham xizmat qilshi o`z aksini topdi.
Har bir bekatda tarbiyalanuvchilar faol ishtirok etib, tabiatni asrash, atrof-muhitni ozoda saqlash, mehnatsevarlik, sog‘lom turmush tarziga rioya qilish kabi hayotiy ko‘nikmalarni egalladilar. Ayniqsa, o‘simlik parvarishi va tabiiy o‘g‘it tayyorlash bo‘yicha amaliy mashg‘ulotlar bolalarda ekologik tafakkurni shakllantirishga xizmat qildi.

Tadbir davomida bolalarning ijodiy qobiliyatlari ham namoyon bo‘ldi. Teatr sahnalari, kulolchilik ishlari va pazandalik ko‘rgazmalari orqali ular o‘z iste’dodlarini namoyish etib, yangi bilim va tajribalarni o‘zlashtirdilar. Bu esa yosh avlodning nafaqat ekologik bilimlarini boyitdi, balki ularning ijodkorlik salohiyatini rivojlantirishga ham zamin yaratdi.
Ko`rgazmali seminarda ishtirok etgan tuman maktabgacha va maktab ta`limi bo`limi mas`ullari, barcha maktabgacha ta`lim tashkilotlari rahbarlari va ota-onalar ta`lim tashkilotimizda olib borilayotgan tarbiyaviy jarayonlarni yuqori baholashdi.

Farida KARIMOVA,

Bulung`ur tumanidagi 26-son DMTT direktori

Aniq maqsad bilan kelajak sari dadil qadamlar

2026-06-01T06:25:37.673Z

Bugungi globallashuv davrida yoshlarning hayotda o‘z o‘rnini topishi, ezgu maqsadlar sari dadil intilishi va o‘z salohiyatini ro‘yobga chiqarishi jamiyat taraqqiyotining muhim omillaridan biri sanaladi. Ana shu ezgu g‘oyalar targ‘iboti yo‘lida Pastdarg‘om tumanidagi 82-umumta’lim maktabida “Aniq maqsad — kelajak poydevori” mavzusida ma’naviy-ma’rifiy tadbir tashkil etildi.

Tadbir maktab o‘quvchilari, pedagoglar hamda faollar ishtirokida ko‘tarinki ruhda o‘tdi. Unda yoshlarni qat’iyatli bo‘lishga, vaqtning qadriga yetishga, kelajak oldidagi mas’uliyatini chuqur his etishga undovchi fikr va mulohazalar o`rtaga tashlandi. Ta’kidlanganidek, insonning bugungi mehnati va izlanishi uning ertangi muvaffaqiyatlari uchun mustahkam zamin yaratadi.

Tadbir davomida o‘quvchilar tomonidan o`zlarining kelajak hayot haqidagi bilim va ko`nikmalari namoyish etildi. Har bir chiqishda ilm-ma’rifatning qudrati, mehnatsevarlikning ahamiyati hamda yurt ravnaqi uchun fidoyilik ruhini tarannum etuvchi g‘oyalar o`z aksini topdi.

Bugun mamlakatimizda yoshlar uchun yaratilayotgan keng imkoniyatlar, zamonaviy ta’lim sharoitlari va davlatimiz tomonidan ko‘rsatilayotgan e’tibor har bir o‘g‘il-qizni ulkan marralar sari chorlamoqda. Biroq bu imkoniyatlardan samarali foydalanish uchun eng avvalo aniq maqsad, mustahkam iroda va tinimsiz izlanish zarur. Tadbirda so‘z olganlar ham aynan shu jihatlarga alohida urg‘u berdilar.

Darhaqiqat, maqsadi aniq insonning yo‘li ham ravshan bo‘ladi. U duch kelgan qiyinchiliklarni yengib o‘tadi, o‘z oldiga qo‘ygan vazifalarni izchil amalga oshiradi. Shu bois yosh avlod qalbida buyuk orzular, yuksak maqsadlar va Vatanga sadoqat tuyg‘ularini shakllantirish bugunning eng dolzarb vazifalaridan biridir.

Zero, kelajakni bunyod etadigan kuch — maqsadiga sodiq, bilimli va fidoyi yoshlar qo‘lidadir. Aniq maqsad esa ana shu porloq kelajakning eng mustahkam poydevoridir.

Bozorgul Xoliqulova,

Pastdarg‘om tumanidagi 82-umumta’lim maktabi psixologi

Yuksak ma`rifatli avlod - kelajak bunyodkorlari

2026-05-25T12:24:35.167Z

Ishtixon tumanidagi 87-umumiy o‘rta ta’lim maktabida 25-may — “So‘nggi qo‘ng‘iroq” tadbiri “Yuksak ma’rifatli avlod — Uchinchi Renessans poydevori” shiori ostida katta shukuh va ko‘tarinki ruhda bo‘lib o‘tdi. Bayramona bezatilgan maktab hovlisi quvonchga to‘la nigohlar, samimiy tabriklar va unutilmas lahzalarga boy bo‘ldi.

Tadbirda maktabning bitiruvchi o‘quvchilari, ustozlar, ota-onalar hamda faxriy mehmonlar ishtirok etib, yoshlarga ezgu tilaklarini bildirdilar. Ayniqsa, bitiruvchilarning hayajon va quvonchga yo‘g‘rilgan qalb kechinmalari tadbirga o‘zgacha ruh bag‘ishladi.

Bayram davomida o‘quvchilar tomonidan tayyorlangan she’rlar, kuy-qo‘shiqlar, sahna ko‘rinishlari va dilbar raqslar yig‘ilganlarga manzur bo‘ldi. Har bir chiqish yosh avlodning iste’dodi, intilishi va Vatanga bo‘lgan muhabbatini namoyon etdi. Tadbir davomida ustozlarga bo‘lgan hurmat va ehtirom alohida e’tirof etildi.

Maktab direktori va tajribali ustozlar bitiruvchilarga samimiy tilaklarini bildirib, ularni kelajakda yurt ravnaqiga munosib hissa qo‘shadigan yetuk insonlar bo‘lib kamol topishga da’vat etdilar. Shuningdek, o‘quv yili davomida namunali xulqi, a’lo o‘qishi va jamoat ishlaridagi faolligi bilan ajralib turgan o‘quvchilar faxriy yorliq hamda esdalik sovg‘alari bilan taqdirlandilar.

“So‘nggi qo‘ng‘iroq” tadbiri nafaqat bitiruvchilar uchun unutilmas xotira, balki barcha o‘quvchilar uchun yangi orzu va marralar sari ilhom manbai bo‘ldi. Tadbir yakunida yangragan so‘nggi qo‘ng‘iroq sadolari yoshlarni katta hayot sari chorlab, ularning qalbida ezgu orzular va porloq kelajakka ishonch uyg‘otdi.

Darhaqiqat, bugungi bilimli, ma’rifatli va intiluvchan yoshlar — Yangi O‘zbekistonning ertangi bunyodkorlari, Uchinchi Renessansning mustahkam poydevoridir.

Sharof SHAHRIDDINOV,

Ishtixon tumanidagi 87-maktab direktorining o`rinbosari

Ифлос ҳаво мияни “секинлаштираяпти”

2026-05-24T14:38:46.432Z

Кундалик нафас олинаётган ҳаво инсон мияси фаолиятига жиддий таъсир кўрсатиши мумкин. Канаданинг МакМастер университети олимлари томонидан ўтказилган янги тадқиқот ҳаво ифлосланиши когнитив қобилиятларни пасайтириши, хотира ва фикрлаш тезлигини сусайтиришини кўрсатди.

Тадқиқот доирасида 45 ёшдан 85 ёшгача бўлган 40 мингдан ортиқ инсоннинг саломатлиги ва улар яшайдиган ҳудудлардаги ҳаво сифати таҳлил қилинган. Олимлар ҳатто расман “хавфсиз” деб баҳоланадиган меъёрлар доирасида ҳам ифлос ҳаво инсон миясига салбий таъсир кўрсатишини аниқлашган.

Мутахассислар мия фаолиятига энг кўп зарар етказувчи икки асосий омилга алоҳида эътибор қаратган.

Биринчиси, автомобиллар ва саноат чиқиндиларидан ажраладиган азот диоксиди (NO2). Бу модда юқори бўлган муҳитда яшовчи инсонларда диққатни жамлаш, режалаштириш ва қарор қабул қилиш каби ижро этувчи функциялар анча сусайгани кузатилган.

Иккинчи хавфли омил эса, ҳаводаги ўта майда PM2.5 заррачалари бўлиб, улар инсон миясининг маълумотни қайта ишлаш ва реакция бериш тезлигини секинлаштириши аниқланган. Бу заррачалар чанг, куя ва ёнилғи ёнғинларидан ҳосил бўладиган микроскопик моддалардан иборат.
Олимлар ушбу заррачалар нафас орқали ўпкага киргач, организмнинг табиий ҳимоя тўсиқларини четлаб ўтиб, ҳатто тўғридан-тўғри бош миягача етиб бориши мумкинлигини аниқлашган. Қон айланиш тизими орқали тарқалган токсинлар эса, мияни зарарли моддалардан ҳимоя қилувчи гематоэнцефалик барьерни заифлаштиради.

Бу жараён миядаги иммун ҳужайралари — микроглияларни фаоллаштириб, сурункали нейрояллиғланишни келтириб чиқаради. Натижада нейронлар ўртасидаги синаптик алоқалар издан чиқади ва вақт ўтиши билан Альцгеймер, деменция каби оғир неврологик касалликлар ривожланиш хавфи ортиб боради.

Тадқиқот муаллифлари ҳаво ифлосланишига қарши кураш нафақат экологик, балки жамоат саломатлиги учун ҳам устувор вазифага айланганини таъкидламоқда. Улар кундалик ҳаётда инсонлар ўз миясини ҳимоя қилиш учун оддий эҳтиёт чораларига амал қилиши кераклигини қайд этган.

Хусусан, уйларда ҳавони тозаловчи фильтрли қурилмалардан фойдаланиш, тирбанд йўлларда автомобил ойналарини ёпиқ ҳолда сақлаш ва ҳавони ички айланиш режимида ишлатиш тавсия этилмоқда. Шунингдек, мутахассислар серқатнов йўллар ёқасида спорт билан шуғулланмасликни ҳам маслаҳат берган, чунки интенсив нафас олиш пайтида зарарли заррачалар организмга янада кўпроқ кириб боради.

Уларнинг фикрича, ҳаво сифати инсоният саломатлиги учун кутилгандан ҳам каттароқ таҳдидга айланган ва бу муаммо келажакда неврологик касалликлар сонининг кескин ортишига сабаб бўлиши мумкин.

Rost24

Тарқалган видео ортидаги аччиқ ҳақиқат ва таълим фожиаси!

2026-05-23T17:20:42.108Z

Тошкентдаги 275-мактабда ўқитувчи ва ўқувчи ўртасидаги воқеанинг "калтакдан олдинги" видеотасвирлари тарқалди. Бу видеони кўриб, соғлом фикрлайдиган ҳар қандай инсоннинг юраги ачийди. Дарс пайтида синфхона ичида нималар бўляпти? Ўқувчилар бир-бирига сув сочиб ўйнаб юрибди, бемалол телефон кўтариб, бу тартиббузарликни видеога оляпти. Назоратсизлик, бебошлик ва ўзидан каттани ҳурмат қилиш одобининг тобора йўқ бўлиб бораётгани мана шу қисқа тасвирларда бутун бўй-басти билан кўриниб турибди!

Жамоатчилик фаоли сифатида бу вазият бўйича қатъий талабларим ва айтар сўзим бор:

1. Синфхонадаги назоратсизлик ва телефонбозлик
Бу видео мактабларда мажбурий қамров борлигини, лекин синфхона ичида реал назорат йўқлигини кўрсатди. Ўқувчи дарс вақтида қўлига телефон олиб, бемалол тасвирга тушириб ўтирибдими — демак, у мактабга билим олиш учун эмас, шоу кўриш ва кўрсатиш учун келган!
Мактаб маъмурияти ва синф раҳбарлари қаерга қараяпти? Нима учун дарс жараёни бу даражада совуққонлик билан назоратсиз қолдирилган?

2. "Бола ҳуқуқи" ниқоби остидаги тарбиясизлик: Ким кимни эзғилаяпти?
Бугун биз энг катта хатони қаерда қиляпмиз? Ота-оналар "бола ҳуқуқи" деган тушунчани нотўғри талқин қилиб, фарзандларининг ҳар қандай тарбиясизлиги, бебошлиги ва устозини оёқости қилишини хаспўшлаш учун қалқон қилиб олишди! Ҳуқуқ фақат бир томонлама бўлмайди. Боланинг ҳуқуқи устознинг қадр-қимматини топташ, таълим даргоҳини эзғилаш ҳисобига таъминланиши шарт эмас!
Айнан мана шу сохта "эркинлик" ва жазосизлик ҳисси ўқувчиларни ҳаддидан оширди. Ўқитувчи синфга кирганда юрагини олдириб қўядиган, болага қаттиқроқ гапирса, ота-онаси мактабга югуриб келиб, "менинг боламнинг ҳуқуқи бор" деб дағдаға қиладиган замонга келиб қолдик. Оқибатда нима бўлди? Олий даргоҳ ҳисобланган мактабнинг қадри оёқости бўляпти!

3. Таълим даргоҳида ўқувчининг мажбуриятларини кескин кучайтириш шарт!
Бугун таълим тизимидаги қонунчиликни қайта кўриб чиқиш вақти келди. Ўқувчиларнинг фақат ҳуқуқларини эмас, балки таълим даргоҳи олдидаги қатъий мажбуриятларини ва жавобгарлигини кучайтиришимиз шарт!
Дарс жараёнига халақит берганлик учун,
Устозни мазах қилиб, руҳий босим ўтказганлик учун,
Мактаб ички тартиб-қоидаларини бузганлик учун ўқувчига ва унинг ота-онасига нисбатан жазо чоралари, йирик миқдордаги жарималар тизими кескинлаштирилиши лозим.
Мактаб қонун устувор бўлган ҳудудга айланиши керак, бебошлар ўйнаб куладиган кўнгилочар шоу-майдончасига эмас!

4. Айблов йўналиши ўзгариши шарт: Жисмоний жароҳат эмас, Руҳий ҳолат!
Тергов ва суд органларидан ушбу ишга фақатгина "енгил жароҳат етказиш" призмасидан эмас, балки ўқитувчининг ўша пайтдаги руҳий ҳолатидан келиб чиқиб баҳо беришларини сўраб қоламиз. Ҳар қандай темир асабли инсонни ҳам чиқариб бўлмайдиган даражага олиб борадиган бундай психологик босим, мазах қилиш ва тартиббузарлик олдиндан режалаштирилган провокация эмасми? Ўқитувчини бу ҳолатга кимлар мажбур қилди? Айблов тарозиси икки томонга ҳам тенг қўйилиши шарт!

5. Ота-она ва Маҳалла ҳамкорлиги: Тарбия қани?
Боласига инсонпарварлик руҳига мутлақо зид равишда, устозини менсимаслик, жамият қоидаларини оёқости қилиш кайфиятида тарбия бераётган ота-оналарнинг масъулияти маҳалла фаоллари билан биргаликда, кенг жамоатчилик ўртасида кўриб чиқилиши шарт!
Бола мактабда дарс вақтида сув сочиб, уни видеога олиб мазах қиляптими — демак, оилада катта муҳит бузилган. Бундай оилаларни маҳалла раиси, хотин-қизлар фаоллари ва профилактика инспекторлари жалб қилинган ҳолда жиддий муҳокама қилиш вақти келди.

Таълим ва Тарбиясизлик тарозида!
Бугун биз таълим тизимига миллионлаб маблағ тикяпмиз, янги бинолар қуряпмиз, лекин оддий тарбияни бой беряпмиз. Тарбиясиз берилган билим — жамият учун энг хавфли қуролдир. Бугун таълим билан тарбиясизлик тарозига қўйилди. Агар биз бугун устозини мазах қилган бебошларни "у бола-ку" деб оқласак, эртага бутун таълим тизимидан айриламиз.
Ушбу видео далил сифатида ишга тиркалиши, ўқувчининг ота-онасига фарзандини назоратсиз қолдиргани, тарбиясига совуққонлик билан қарагани ва дарс жараёнига халақит бергани учун қатъий қонуний чора кўрилиши лозим.
Мактаб — сув сочиб ўйнайдиган ёки TikTokга видео оладиган жой эмас! Устознинг асаби ва шаъни билан ўйнашишга ҳеч кимнинг ҳаққи йўқ!

Жамоатчилик назорати фаоли сифатида ушбу воқеликнинг барча ички ва ташқи омиллари адолатли ўрганилишини ва ўқувчининг мажбуриятлари қонунан кучайтирилишини талаб қилишда давом этаман.
Муносабатингизни изоҳларда қолдиринг.

Жамоатчилик назорати фаоли Йўлчибой Исмоилов
Фарғона вилояти, Учкўприк тумани

Айрим давлатларда ҳантавирус инфекцияси тарқалаётгани айтилмоқда

2026-05-13T17:38:50.680Z

Айрим давлатларда ҳантавирус инфекцияси тарқалаётгани ҳақидаги хабарлар ортидан Санитария-эпидемиологик осойишталик ва жамоат саломатлиги қўмитаси Ўзбекистондаги эпидемиологик вазият юзасидан расмий маълумот берди.

Қўмита раисининг биринчи ўринбосари Нурмат Отабековнинг маълум қилишича, ҳозирча мамлакатда ҳантавирус билан касалланиш ҳолатлари аниқланмаган. Унга кўра, вирусологик мониторинг ишлари доимий равишда олиб борилмоқда ва эпидемиологик вазият барқарор ҳисобланади.

Жаҳон соғлиқни сақлаш ташкилоти маълумотларига кўра, ҳантавирус коронавирус каби тез тарқалиш хусусиятига эга эмас ва глобал пандемия хавфини юзага келтирмайди. Вируснинг 20 дан ортиқ тури мавжуд бўлиб, уларнинг фақат айримлари инсонларда оғир касаллик чақириши мумкин.
Касаллик асосан Лотин Америкаси давлатларида – Аргентина, Чили ва Бразилияда кўпроқ учраши айтилмоқда. Ҳантавирус одатда кемирувчилар орқали юқади. Инфекция кемирувчиларнинг сийдиги, ахлати ёки сўлаги билан ифлосланган чанг, буюм ва озиқ-овқат маҳсулотлари орқали инсонга ўтиши мумкин.

Касаллик иситма, бош оғриғи, ҳолсизлик, кўнгил айниши, қусиш, мушак ва қорин соҳасидаги оғриқлар билан кечиши мумкин. Оғир ҳолатларда эса буйрак етишмовчилиги, юрак-қон томир ҳамда нафас олиш тизими билан боғлиқ асоратлар кузатилиши хабар қилинган.

ССВ маълумотига кўра, ҳозирча ҳантавирусга қарши махсус вакцина ёки алоҳида даволаш протоколи мавжуд эмас. Беморларга асосан симптоматик ва қўллаб-қувватловчи терапия қўлланади.

Мутахассислар аҳолига шахсий гигиена қоидаларига қатъий риоя қилиш, яшаш ва иш жойларини озода сақлаш, озиқ-овқат маҳсулотларини хавфсиз шароитда сақлаш, мева-сабзавотларни яхшилаб ювиш ҳамда омбор ва ёпиқ хоналарни мунтазам шамоллатиб туришни тавсия қилган.

Шунингдек, эндемик ҳудудларга сафар қилиб келган фуқаролардан бу ҳақда оилавий поликлиникаларга хабар бериш сўралмоқда. Айни вақтда мамлакатдаги 53 та чегара пунктида юқумли касалликларнинг кириб келишини олдини олиш бўйича кучайтирилган санитария назорати олиб борилмоқда.
Эслатиб ўтамиз, 12 май куни Жаҳон соғлиқни сақлаш ташкилоти раҳбари Тедрос Адҳаном Гебреесус MV Hondiusда вирус тарқалганидан сўнг давлатларни эҳтиёткорликка чақирган эди.

Avlodlarni bog‘lagan ezgu rishta

2026-05-08T17:54:37.816Z

Nurobod tumanidagi 4-davlat maktabgacha ta’lim tashkilotida “Xotira va qadrlash kuni” munosabati bilan qalblarni ezgulikka chorlovchi, ma’naviy tarbiya va milliy qadriyatlar uyg‘unligini aks ettirgan “Uch avlod uchrashuvi” tadbiri bo‘lib o‘tdi. Tadbir “Navro‘z” mahallasi bilan hamkorlikda tashkil etilib, unda nuroniy otaxon va onaxonlar, tarbiyachilar, ota-onalar hamda jajji bolajonlar ishtirok etdilar.

Uchrashuv davomida nuroniylar tomonidan o‘tgan kunlar xotiralari, hayotiy saboqlar va yurt tinchligi yo‘lida fidokorona xizmat qilgan insonlar haqida samimiy suhbatlar qilindi. Ayniqsa, otaxon va onaxonlarning duoga yo‘g‘rilgan nasihatlari yosh avlod qalbida chuqur taassurot qoldirdi. Jajji bolalarning she’r va qo‘shiqlari esa tadbirga o‘zgacha fayz bag‘ishladi.

Tadbirning eng ahamiyatli jihati shundaki, unda uch avlod vakillari bir davrada jam bo‘lib, mehr-oqibat, hurmat va ehtirom kabi qadriyatlarni yanada mustahkamladi. Zero, ajdodlarni e’zozlash, yoshi ulug‘ insonlarni qadrlash xalqimizning azaliy fazilatlaridan biridir.

Bugungi kunda ana shunday ma’naviy-ma’rifiy tadbirlarning tashkil etilishi yoshlar qalbida Vatanga muhabbat, ajdodlar merosiga hurmat va yurt ravnaqi uchun daxldorlik hissini kuchaytiradi. Chunki millatning kelajagi — o‘z tarixini unutmagan, nuroniylarning duosini olgan va milliy qadriyatlariga sodiq yoshlar qo‘lidadir.

“Uch avlod uchrashuvi” nafaqat bir tadbir, balki avlodlarni bir-biriga bog‘lovchi, qalblarni yaqinlashtiruvchi ezgu ma’naviyat bayramiga aylandi.

Gulchiroy JO`RAYEVA,

Nurobod tumanidagi 4-son DMTT direktori o`rinbosari

Xotira - qalblarni munavvar etdi

2026-05-08T13:45:41.202Z

Kattaqo‘rg‘on tumani "Yonboshsoy" mahallasidagi 101-umumta’lim maktabida 9-may — Xotira va qadrlash kuniga bag‘ishlangan adabiy-ma’rifiy, badiiylashtirilgan tadbir yuksak saviyada ko‘tarinki kayfiyat bilan nishonlandi. Vatan tinchligi, inson qadri va ajdodlar xotirasiga ehtirom g‘oyalari ustuvor bo‘lgan ushbu tadbir ishtirokchilar qalbida unutilmas taassurot qoldirdi.

Tadbirni maktab direktori Munira Xo‘jamova ochib, yurt tinchligi va osoyishtaligi yo‘lida jonini fido qilgan insonlar xotirasi hamisha e’zozda ekanini ta’kidladi. U o‘z tabrik so‘zida yosh avlodni vatanparvarlik, milliy qadriyatlarga hurmat va inson qadrini ulug‘lash ruhida tarbiyalash bugungi kunning muhim vazifasi ekanini alohida ta`kidladi.

Tadbirda Do‘rmon ijodkorlar klubi a’zosi Safar Turon, afg‘on urushi qatnashchisi va shoir Sherquvot Primov, shuningdek, shoirlar Salim Yusupov, Qahramon Eshmurodov hamda Otabek Mirzaqobilovlar tomonidan o‘qilgan she’rlar yig‘ilganlarga manzur bo`ldi. Vatanni madh etuvchi, tinchlikni ulug‘lovchi she’rlar yoshlar qalbida faxr va iftixor tuyg‘ularini uyg‘otdi.

Uchrashuvda Afg‘on urushi qatnashchisi Sherquvot Primovning hayot haqiqatlari bilan yo‘g‘rilgan chiqishi o‘quvchilarni befarq qoldirmadi. Urushning achchiq saboqlari, tinchlikning beqiyos qadri haqidagi fikrlar yosh avlod uchun hayotiy ibrat bo‘ldi.

Maktabning harbiy ta’lim o‘qituvchisi Husniddin Omonov rahbarligida tayyorlangan o‘quvchilarining chiqishlari yig‘ilganlarga yanada ko‘tarinki kayfiyat bag‘ishladi. O‘quvchilarning sahnadagi vatanparvarlik ruhidagi chiqishlari va jonli ijrolari tadbirga alohida fayz kiritdi.

Xotira va qadrlash kuni — bu faqat o‘tmishni eslash emas, balki tinch va osuda hayotning qadriga yetish, inson sha’nini ulug‘lash, Vatanga muhabbatni yuraklarga jo etish demakdir. 101-maktabda o‘tkazilgan ushbu madaniy - ma’rifiy tadbir ham ana shu ezgu g‘oyalarning yorqin ifodasi bo`ldi.

Qahramon ESHMURODOV,

shoir

Ustoz xotirasi yod etildi

2026-05-08T12:29:52.998Z

Oqdaryo tumanidagi 46-umumta’lim maktabida 9-may — Xotira va qadrlash kuni munosabati bilan ma’naviy - ma`rifiy tadbir tashkil etildi. Inson qadri, ustozlarga ehtirom va o‘tmish saboqlarini yod etish g‘oyasi ustuvor bo‘lgan ushbu tadbirlar o‘quvchi-yoshlar qalbida katta taassurot qoldirdi.

Tadbirga mehnat faxriylari, nuroniy ustozlar va jamoatchilik vakillari taklif etildi. Maktab sahnida yangragan samimiy so‘zlar, ezgu tilaklar va xotiraga yo‘g‘rilgan chiqishlar barchani o‘yga toldirdi. Ayniqsa, maktabda uzoq yillar samarali mehnat qilgan, ko‘plab shogirdlar qalbida chuqur iz qoldirgan faxriy ustoz Akbarali Muhammadiev xotirasiga bag‘ishlangan “Ustoz xotirasi — shogirdlar qalbida abadiy” nomli xotira kechasi barchani to`lqinlantirdi.

Kechada ustozning hayot yo‘li, fidokorona mehnati va yosh avlod tarbiyasidagi xizmatlari haqida iliq xotiralar aytildi. Shogirdlar ustoz haqidagi esdaliklarini hayajon bilan so‘zlab, uning insonparvarligi, talabchanligi va mehribonligini alohida ta’kidladilar.
Tadbirda tarix fani o‘qituvchilari o‘quvchi-yoshlarga Ikkinchi jahon urushi xotiralari, urushning og‘ir va mashaqqatli yillari haqida ta’sirchan hikoyalar aytib berdilar.

O‘quvchilar tomonidan ijro etilgan she’rlar, sahna ko‘rinishlari va vatanparvarlik ruhidagi chiqishlar tadbir mazmunini yanada boyitdi.

Mu`tabar NURIDDINOVA,
Oqdaryo tumanidagi 46-umumta`lim maktabi direktori

Orzularga yo`l ochgan uchrashuv

2026-05-07T17:36:09.566Z

Samarqand shahridagi 40- umumta`lim maktabida yosh avlodni kelajak hayotga yo`naltirishga qaratilgan tadbir bo`lib o`tdi. Unda kelajak haqidagi orzular, katta maqsadlar va hayot yo‘llarini belgilaydigan muhim qarorlar haqida so‘z bordi. Bitiruvchi o‘quvchilar uchun tashkil etilgan ushbu uchrashuv go‘yoki ularning orzulariga ochilgan yangi eshik bo‘ldi.

Samarqand davlat arxitektura va qurilish institutining tajribali o‘qituvchilari maktabga tashrif buyurib, yoshlar bilan samimiy muloqot o‘tkazdilar. Ular nafaqat oliy ta’limga kirish sirlari, balki insonning o‘zini anglashi, o‘z yo‘lini topishi haqida ham qalblarga yetib boradigan fikrlarini bayon etdilar. Har bir so‘z, har bir maslahat o‘quvchilar qalbida yangi umid uchqunlarini yoqdi.

Zalda o‘tirgan har bir yosh qalbda bir savol — “Men kim bo‘laman?” degan o‘y jonlanardi. Ana shu savolga javob topish yo‘lida ularga yo‘l ko‘rsatuvchi ustozlar o‘z tajribalari va bilimlari bilan yo‘lchi yulduz kabi porladilar.

Maktab rahbari Suxrob Shodiyevning so‘zlari esa go‘yoki barchaga bir da’vat bo‘ldi:
— Kelajak sizlarning qo‘lingizda! Har biringiz o‘z taqdiringizni o‘zingiz yaratasiz, — degan ma’nodagi fikrlar o‘quvchilarni yanada ruhlantirdi.

Shuningdek, kimyo fani o‘qituvchisi A. Chorshanbiyev va maktab maslahatchisi M. Suyunova o‘z chiqishlarida bilim va mehnat orqali har qanday orzuga yetish mumkinligini ta’sirli hayotiy misollar bilan tushuntirib berdilar. Ular yoshlarga faqatgina kasb tanlash emas, balki inson sifatida kamol topish yo‘lida ham muhim saboqlar berishdi.

Bu uchrashuv shunchaki seminar emas, balki orzularga qanot bag‘ishlagan, ishonch uyg‘otgan, kelajakka ishtiyoqni oshirgan bir ma’naviy sayohat bo‘ldi.

Chunki orzularga ishongan yoshlar — ertangi kun bunyodkorlaridir.