@namcity

Биржада доллар биринчи марта 7900 сўмдан пастга тушди

2018-06-08T16:45:51.385Z

Ўзбекистонда доллар илк бор 7900 сўмдан паст даражада - 7896 сўмдан савдо қилинмоқда. Бундан Ўзбекистон Республика валюта биржасининг маълумотлари дарак беряпти.

Сўм 2018 йил февралидан бошлаб фаол мустаҳкамланиб борди – бунга қадар у бир долларга 8190 сўмгача арзонлашиб кетганди. Апрель ойи охирларидаги бироз пасайишдан сўнг валюта яна мустаҳкамланиб борди ва 7900 сўмга яқинлашди.

Евро билан вазият эса бироз бошқача, у ўтган ҳафта нархда кескин ўсди ва 9765 сўмгача чиқди. Масалан, май ойи охирларида у 9395 сўмдан савдо қилинган. Шу ҳафтада эса евро яна пастлади ва икки кун ичида 397 сўмга арзонлашди - 9398 сўмгача.

Эслатиб ўтамиз, аввалроқ биржада доллар 7900 сўмга яқинлашгани, евро кескин равишда 9795 сўмгача кўтарилгани хабар берилганди.

Манба: Кун.уз сайти

РАСМИЙ: Анвар қори Турсунов ҳақида

2018-06-08T04:32:25.196Z

Бугун 8 июнь саҳарда Тошкент шаҳри бош имом хатиби Анвар қори Турсунов оламдан ўтгани ҳақида ижтимоий тармоқларда ёлғон маълумотлар яна тарқалди.

Соғлиқни сақлаш вазирлиги Матбуот хизматининг ЎзАга маълум қилишича, “Анвар қори Турсуновнинг вафот этгани ҳақидаги хабарлар ёлғон, лекин унинг аҳволи айни пайтда оғир, муолажалар эса давом этмоқда”.

Анвар қори Турсунов оиласи билан яқин алоқада бўлган яна бир манба, таниқли шоир Муҳаммад Исмоилнинг uza.uz сайтига хабар йўллашича, “Бугун ижтимоий тармоқларда қорининг ҳаёти билан боғлиқ эълон қилинган маълумотлар ҳеч қандай асосга эга эмас.

Бундай асоссиз хабарлар жамоатчиликни чалғитмоқда”, дейди Муҳаммад Исмоил ўз хабарида.

uza.uz сайти беморларнинг тезда соғайиб кетишини тилайди ва жамоатчиликни норасмий ахборот саҳифаларида эълон қилинаётган маълумотлардан огоҳ бўлишга чақиради.

Манба: uza.uz

Шавкат Мирзиёев шу ҳафтада Хитойга боради

2018-06-07T04:42:24.394Z

Ўзбекистон Республикаси Президенти Шавкат Мирзиёев 2018 йил 8-10 июнь кунлари Хитой Халқ Республикасида бўлиб, Шанхай ҳамкорлик ташкилоти Давлат раҳбарлари кенгашининг Циндао шаҳрида ўтадиган ўн саккизинчи мажлисида иштирок этади. Бу ҳақда ЎзА хабар бермоқда.

ШҲТга аъзо давлатлар раҳбарлари илк бор Ҳиндистон ва Покистоннинг тўла ҳуқуқли аъзо сифатидаги иштирокида йиғилади, ташкилот фаолиятини янада такомиллаштиришнинг истиқболли йўналишлари, минтақавий хавфсизлик, иқтисодий ва инвестициявий шерикликни кенгайтириш, транспорт-коммуникация соҳасидаги ҳамкорликни фаоллаштириш масалалари ҳамда кўп томонлама кооперациянинг бошқа жиҳатларини муҳокама қиладилар.

Давлат раҳбарларининг мажлиси якунида Циндао декларацияси қабул қилиниши, Терроризм, сепаратизм ва экстремизмга қарши курашиш бўйича 2019-2021 йилларга мўлжалланган ҳамкорлик дастури, Узоқ муддатли яхши қўшничилик, дўстлик ва ҳамкорлик тўғрисидаги шартнома қоидаларини амалга ошириш бўйича 2018-2022 йилларга мўлжалланган ҳаракатлар режаси, Ёшларга қўшма мурожаат ва бошқа ҳужжатлар имзоланиши режалаштирилган.

Фикр алмашувлардан сўнг 2018-2019 йилларда ташкилотга раислик қиладиган давлат тўғрисида қарор қабул қилиш, кейинги уч йиллик даврга ШҲТ бош котиби ва Минтақавий аксилтеррор тузилмаси Ижроия қўмитаси директори лавозимларига номзодларни тасдиқлаш кўзда тутилмоқда.

Давлатимиз раҳбари ШҲТ саммити доирасида икки томонлама қатор учрашув ва музокаралар ўтказади.

Манба: Кун.Уз

Шерзод Шерматов: «Ҳамма иш билан жуда банд, келажакни ўйлашга эса вақт йўқ»

2018-06-07T04:28:24.020Z

Инновацион ривожланиш вазири ўринбосари Шерзод Шерматов ўзининг Facebook’даги саҳифасида давлат идоралари вакиллари кундалик ишлар билан банд бўлиб, ишдан «бошини кўтариб» мамлакатни ривожлантириш сценарийларини ишлаб чиқишга қўли тегмаслиги билан боғлиқ вазиятни танқид қилди.

Фото: «Texnoman.uz»

«Бугун Инновацион ривожланиш стратегияси лойиҳасини тайёрлашда ҳам инновацион ёндашувни амалга ошириш мақсадида кўпчилик учун янги бўлган форсайт методикасидан фойдаланиб, турли хил экспертлар, тадбиркорлар ва давлат идоралари вакиллари билан муҳокама ташкил этдик. Асосий мақсад номигагина ҳужжат тайёрлаш эмас, балки ҳақиқатда амалда фойдаси тегадиган ҳужжатни ишлаб чиқиш. Шунинг учун ҳам Ўзбекистоннинг Глобал инновацион индексдаги ўрнига боғлиқ асосий муаммолар ва уларнинг келгусида ечимлари қандай бўлиши мумкинлиги ҳақида эркин фикр алмашиб олдик», — деб ёзди вазир ўринбосари.

Шерзод Шерматов тадбир давомида ўзи учун қизиқ ҳолатни қайд этганини айтди. «Аксарият давлат идоралари вакиллари кундалик ишлар билан шунчалик бандки, улардан «бошини кўтариб» мамлакатни ривожлантириш сценарийларини ишлаб чиқиш ва уларга қандай тайёргарлик кўриш мумкин деган муҳим масалаларга вақт ажрата олмайди», — деб ёзди у.

«Муаммолар ва кундалик вазифалар жуда кўп. Лекин асосий мақсад ва приоритетларни аниқлаб олмасдан туриб қанчалик ҳаракат қилинмасин, қаерга етиб бориш кераклигини, ҳаттоки тўғри ҳаракат қилинаётганини ҳам билиб бўлмайди. Собиқ СССРнинг режали иқтисодиёти ҳақида ўта салбий хотира сақланиб қолгани сабабли кўпчиликнинг ҳаёлида режалаштириш ёмон тушунча сифатида шаклланиб қолган. Бироқ, исталган ривожланган давлатни ёки ҳозирги вақтда тез суръатларда ривожланаётган Хитойни мисол қилиб олсак, кўпчилик олим ва мутахассислар 10—20 йиллар ва ундан кейин мамлакатни келажакда кутаётган турли хил сценарийларни ўрганишини ва уларга тайёргарлик режасини тузаётганини кузатишимиз мумкин. Шу сабабли, у давлатларда барча давлат идоралари умумий мақсадга қараб ишлайди. Бирон-бир катта фавқулодда вазиятлар юз берадиган бўлса, ундай ҳолатга тайёрланган режалари асосида унинг оқибатларини тезда бартараф этишга киришилади.

Иккинчи яна салбий кузатиш. Баъзи давлат идоралари вакиллари йиллар давомида амалга ошириб келган ишини мутлақо тўғри деб баҳолаб, янгича фикрларга уларнинг биринчи реакцияси «честь мундира»ни ҳимоя қилиш ва у фикрни инкор қилишдан иборат. Бунинг хавфли томони шундаки, қанчалик янги ғояларга бой ҳужжат тайёрланмасин, вазирлик ва идоралар билан келишув жараёнида ҳужжат айнан шундай «экспертлар» қўлига тушганда, ундаги ғояларнинг кўпчилиги инкор бўлиб кесилиб кетиши мумкин...

Президентимиз томонидан келажакни ўйлаб иш қилиш муҳимлиги ҳақида бир неча бор таъкидланганлиги ва мамлакат ривожланиши учун энг асосий приоритетлар қаторида иқтисодиётнинг ўсиши, ишчи ўринларнинг яратилиши, ҳамда экспорт салоҳиятини ошириш белгиланган экан, масъул вазифалардаги давлат хизматчиларининг асосий эътиборини «текучка» ва «контролка»ларни ёпишга эмас, балки ушбу асосий приоритетлар бўйича нима ишлар қилиниши кераклигига қаратилса мақсадга мувофиқ бўлар эди.

Бунинг учун марказий Think Tank – «мозговой центр» бўладиган муассасаларнинг ролини ва мақомини тубдан қайта кўриб чиқиш ёки бутунлай янгисини тузиш, ҳамда иқтисодиётимизнинг барча жабҳаларига тегишли бўлган статистик маълумотлар йиғиш ва қайта ишлаш тизимини ҳам такомиллаштириш зарур бўлади», — дея қайд этди Шерзод Шерматов.

Манба: Дарё.уз

ЙҲХБ МЕЪЁРИДАН ОРТИҚ ҚОРАЙТИРИЛГАН ОЙНАЛАРГА ҚАРШИ РЕЙД УЮШТИРМОҚДА

2018-06-06T07:50:54.410Z

2018 йилнинг 4 июнь кунидан бошлаб бутун Ўзбекистон ҳудуди бўйлаб меъёридан ортиқ ойналари қорайтирилган автомашиналарга қарши рейд бошланди.

Фото:UzNews.uz

“UzNews.uz”нинг ҳуқуқ-тартибот идораларидаги ишончли манбасига кўра, Ички ишлар вазири Пўлат Бобожоновнинг буйруғига асосан рейд бошлаб юборилган. Ушбу рейд бўйича берилган буйруқнинг оғзаки ёки ёзма шаклда эканлиги тўғрисида эса аниқ маълумот берилмади.

Эслатиб ўтамиз, Маъмурий жавобгарлик тўғрисидаги кодексининг 126-моддасига асосан, автомашиналарнинг ён ва орқа томонлари қорайтирилган тақдирда, қуёш ўтказувчанлиги 70 фоиздан кам бўлмаслиги керак.

Маълумот ўрнида айтиш керакки, бу каби қоидабузарлик энг кам ойлик иш ҳақи миқдоридаги жаримага сабаб бўлади. Бир йил ичида такрор содир этилса, энг кам иш ҳақининг икки баробари – 344.480 сўм.

Манба: Uznews

Мусулмонлар учун фарз бўлган ва бошқа хайрия тўловларни Click орқали тўлаш имконияти яратилди

2018-06-05T11:20:20.969Z

«Вақф» хайрия жамоат фонди Click компанияси билан ҳамкорликда мусулмонлар учун фарз бўлган ва бошқа хайрия тўловларни онлайн тарзда амалга ошириш имконини тақдим қилади.

«Вақф» хайрия жамоат фонди билан ҳамкорлик қисқа вақт ичида Ислом динида мусулмонлар учун фарз бўлган ва бошқа тўловларни амалга ошириш каби уникал имкониятни мамлакатимизда жорий қилишга йўл очиб берди. Ушбу тўловлар тизим фойдаланувчилари томонидан исталган пайтда ва исталган жойдан туриб амалга оширилиши мумкин.

«Вақф» хайрия фондининг таклифига биноан, тўловлар тизимда 3 категорияга ажратилган:

Хайрия
Вақф
Закот, Фитр, Ушр, Фидя

Ушбу категориялар бўйича қабул қилинган пул маблағлар «Вақф» хайрия жамоат фондининг махсус ҳисоб-рақамларига 3 категория бўйича алоҳида-алоҳида жойлаштирилади.

Тўловлар исталган пайтда мобил телефондан турли интерфейслар орқали амалга оширилиши мумкин: USSD, “CLICK Узбекистан” мобил иловаси ёки Телеграм месенжери орқали.

USSD орқали тўлаш учун *880*1100# сўрови терилиши ва юзага келган менюда керакли категория танланиши лозим. Шу билан бирга тўлов бош USSD -менюдаги (*880#) «Тўлов» бўлимида “Хайрия” пункти орқали ҳам амалга оширилиши мумкин.
“CLICK Узбекистан” мобил иловаси орқали тўлаш учун “Оплата на местах” (“Жойларда тўловлар”) бўлимида “Хайрия” пунктини танлаш керак.
@clickuz Телеграм - ботида ушбу тўловлар “Тўловлар” бўлимидаги “Хайр-эҳсон” пунктида жорий қилинган.

Қайд этиш керак, фондга келиб тушган маблағлар масжидлар ва диний таълим муассасаларининг биноларини қуриш, таъмирлаш, реконструция қилиш, диний таълим муассасалари профессор-ўқитувчилари, тадқиқотчилари, мутахассислари ва ўқувчи-талабаларини моддий ва ижтимоий қўллаб-қувватлаш, аҳолининг ижтимоий ҳимояга муҳтож қатламлари, шу жумладан имконияти чекланган шахсларни моддий ва маънавий қўллаб-қувватлаш каби бир қатор ишлар учун сарфланади.

Манба: Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита

“Gul bayrami” g‘oliblari munosib taqdirlandi

2018-06-04T17:45:53.108Z

2018 yil 2 iyun kuni Namangan shahridagi “Uch favvora” xiyobonida 58-an’anaviy “Gul bayrami”ning tantanali yopilish marosimi bo‘lib o‘tdi. Unda viloyatdagi boshqarma, tashkilot va muassasalarning rahbar va xodimlari, xorijlik mehmonlar, keng jamoatchilik vakillari ishtirok etdilar.

Viloyat hokimi, Oliy Majlis Senati a’zosi Xayrullo Bozarov sifat jihatidan takomillashib borayotgan asl va navqiron “Gul bayrami” bilan yig‘ilganlarni samimiy tabrikladi. Har bir hududning o‘ziga xos an’analari borligi, shu ma’noda dunyoning sanoqli davlatlardagina o‘tkaziladigan “Gul bayrami” namanganliklarga faxr va g‘urur bag‘ishlashini ta’kidladi.

Tanlov natijalariga ko‘ra, oliy o‘ringa sazovor bo‘lgan “Namangan hududiy elektr tarmoqlari korxonasi” aksionerlik jamiyati hamda professional gulchi Mirzohid Xolmirzayevlar “Spark” avtomobili bilan taqdirlandi.

Shuningdek, 10 dan ortiq nominatsiyalar bo‘yicha g‘oliblikni qo‘lga kiritgan korxona, tashkilot va muassasa rahbarlari hamda gulchilar ham munosib taqdirlandilar.

O‘zbekiston xalq artistlari Abduhoshim Ismoilov, Zulayho Boyxonova, Mirza Azizov, O‘zbekistonda xizmat ko‘rsatgan artistlar Yahyobek Mo‘minov, Samandar Hamroqulov, estrada xonandalari Otabek Mamazoitov, Malika Egamberdiyeva, Gulasal Abdullayeva, Munisa Rizayeva, Qilichbek Madaliyev hamda “Toshkent zebolari” raqs guruhining chiqishlari bayram tantanalariga ko‘rk bag‘ishladi

Манба: namangan.uz

Қайси ташкилотда ишловчи ходимлар Тошкент шаҳри ва Тошкент вилоятида доимий прописка қилинади?

2018-06-04T17:39:17.234Z

Ҳукумат қарори билан Раҳбарлари ходимларни Тошкент шаҳри ва Тошкент вилоятида доимий прописка қилиш тўғрисида илтимоснома киритиши мумкин бўлган давлат органлари ва бошқа давлат ташкилотлари рўйхати тасдиқланган. Бу ҳақда “Ҳуқуқий ахборот” канали хабар бермоқда.

Ушбу рўйхатга 65 та давлат ташкилоти киритилган, хусусан:

1. Ўзбекистон Республикаси Президенти девони.

2. Ўзбекистон Республикаси Олий Мажлиси палаталари.

3. Ўзбекистон Республикаси Вазирлар Маҳкамаси.

4. Ўзбекистон Республикаси Конституциявий суди.

5. Ўзбекистон Республикаси Олий суди.

6. Ўзбекистон Республикаси Судьялар олий кенгаши.

7. Ўзбекистон Республикаси Бош прокуратураси*.

8. Ўзбекистон Республикаси Миллий хавфсизлик хизмати*.

9. Марказий сайлов комиссияси.

10. Ўзбекистон Республикаси Марказий банки.

11. Ўзбекистон Республикаси Ҳисоб палатаси.

12. Тошкент шаҳри ҳокимлиги.

13. Тошкент вилояти ҳокимлиги.

14. Ўзбекистон Республикаси Иқтисодиёт вазирлиги.

15. Ўзбекистон Республикаси Молия вазирлиги.

16. Ўзбекистон Республикаси Қишлоқ ва сув хўжалиги вазирлиги.

17. Ўзбекистон Республикаси Меҳнат вазирлиги.

18. Ўзбекистон Республикаси Олий ва ўрта махсус таълим вазирлиги.

19. Ўзбекистон Республикаси Халқ таълими вазирлиги.

20. Ўзбекистон Республикаси Соғлиқни сақлаш вазирлиги.

21. Ўзбекистон Республикаси Маданият вазирлиги.

22. Ўзбекистон Республикаси Мудофаа вазирлиги.

23. Ўзбекистон Республикаси Ички ишлар вазирлиги*.

24. Ўзбекистон Республикаси Фавқулодда вазиятлар вазирлиги.

25. Ўзбекистон Республикаси Ташқи ишлар вазирлиги.

26. Ўзбекистон Республикаси Адлия вазирлиги*.

27. Ўзбекистон Республикаси Ташқи иқтисодий алоқалар, инвестициялар ва савдо вазирлиги.

28. Ўзбекистон Республикаси Ахборот технологиялари ва коммуникацияларини ривожлантириш вазирлиги.

29. Ўзбекистон Республикаси Уй-жой-коммунал хизмат кўрсатиш вазирлиги.

30. Ўзбекистон Республикаси Давлат статистика қўмитаси.

31. Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси.

32. Ўзбекистон Республикаси Давлат солиқ қўмитаси.

33. Ўзбекистон Республикаси Давлат божхона қўмитаси.

34. Ўзбекистон Республикаси Экология ва атроф муҳитни муҳофаза қилиш давлат қўмитаси.

35. Ўзбекистон Республикаси Давлат геология ва минерал ресурслар қўмитаси.

36. Ўзбекистон Республикаси Давлат архитектура ва қурилиш қўмитаси.

37. Ўзбекистон Республикаси Ер ресурслари, геодезия, картография ва давлат кадастри давлат қўмитаси.

38. Ўзбекистон Республикаси Туризмни ривожлантириш давлат қўмитаси.

39. Ўзбекистон Республикаси Жисмоний тарбия ва спорт давлат қўмитаси.

40. Ўзбекистон матбуот ва ахборот агентлиги.

41. Ўзбекистон стандартлаштириш, метрология ва сертификатлаштириш агентлиги.

42. Ўзбекистон Автомобиль ва дарё транспорти агентлиги.

43. Ўзбекистон Республикаси Интеллектуал мулк агентлиги.

44. «Ўзархив» агентлиги.

45. Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмитаси.

46. Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита.

47. Ўзбекистон Республикаси Парвозлар хавфсизлигини назорат қилиш давлат инспекцияси.

48. Ўзбекистон Республикаси Темир йўлларда юк ва йўловчилар ташиш хавфсизлигини назорат қилиш давлат инспекцияси.

49. «Ўзбекнефтгаз» миллий холдинг компанияси.

50. «Ўзбекэнерго» акциядорлик жамияти.

51. «Ўзкимёсаноат» акциядорлик жамияти.

52. «Ўзбекистон темир йўллари» акциядорлик жамияти.

53. «Ўздонмаҳсулот» акциядорлик компанияси.

54. «Ўзавтосаноат» акциядорлик компанияси.

55. «Ўзпахтасаноат» акциядорлик жамияти.

56. «Ўзбекозиқовқатхолдинг» холдинг компанияси.

57. Ўзбекистон Республикаси Автомобиль йўллари давлат қўмитаси.

58. «Ўзбекистон ҳаво йўллари» миллий авиакомпанияси.

59. Ўзбекистон миллий телерадиокомпанияси.

60. Ўзбекистон Республикаси Фанлар академияси.

61. «Олмалиқ кон-металлургия комбинати» акциядорлик жамияти.62. Ўзбекистон Республикаси Президенти ҳузуридаги Стратегик ва минтақалараро тадқиқотлар институти.

63. Ўзбекистон ёшлар иттифоқи.

64. «Ўзбекипаксаноат» уюшмаси.

65. «Ўзагротехсаноатхолдинг» акциядорлик жамияти.

Изоҳ: 1, 2 ва 3-бандларда кўрсатилган давлат ҳокимияти органлари (Ўзбекистон Республикаси президенти девони, Ўзбекистон Республикаси Олий Мажлиси палаталари ва Ўзбекистон Республикаси Вазирлар Маҳкамаси) аппаратлари ходимларини Тошкент шаҳрида ва Тошкент вилоятида доимий прописка қилиш тўғрисидаги илтимоснома Ўзбекистон Республикаси президентининг давлат маслаҳатчилари, Ўзбекистон Республикаси президенти девони Ишлар бошқарувчиси, Ўзбекистон Республикаси Олий Мажлиси Сенати Раиси ва Қонунчилик палатаси Спикери (улар жойида бўлмаганда — уларнинг ўринбосарлари), шунингдек тегишли равишда Ўзбекистон Республикаси бош вазирининг ўринбосарлари ва Ўзбекистон Республикаси Вазирлар Маҳкамаси Аппаратининг бошқарувчиси томонидан имзоланади.

* 7, 8, 23 ва 26-бандларда кўрсатилган давлат ҳокимияти органлари аппаратлари ходимларини Тошкент шаҳрида ва Тошкент вилоятида доимий прописка қилиш тўғрисидаги илтимоснома тегишли равишда ушбу органлар раҳбарларининг ўринбосарлари томонидан ҳам имзоланади.

16, 27, 36, 39, 42-бандларда кўрсатилган ташкилотларнинг номлари ўзгарганлиги муносабати билан ҳозирда мазкур рўйхатга ўзгартириш киритилмоқда.

Манба: Кун.уз

ТОНГДА АЙТИЛАДИГАН ЗИКР

2018-06-04T02:35:53.241Z

Расулуллоҳ соллаллоҳу алайҳи васаллам: "Бирор бир банда ҳар тонгда ва кечда

«Бисмиллаҳиллазий лаа йазурру маъасмиҳи шайун фил арзи ва лаа фис самааи ва ҳувас самийъул ъалийм»,

بِسْمِ اللهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ

деб 3 марта айтса, унга бирор нарса зарар бермайди", дедилар (Абу Довуд ва Термизий ривояти).

(Маъноси: «Аллоҳнинг исми билан бошлайман, зеро, Унинг исми туфайли еру осмонда бирор нарса зарар бера олмайди. У эшитувчи ва билувчи Зотдир»)

Аксарият мультқаҳрамонларнинг нима учун сариқ рангда тасвирланишини биласизми?

2018-06-03T17:38:21.843Z

Аксарият мультфильмларда энг эсда қолувчи қаҳрамонларнинг сариқ рангда тасвирланиши сабаблари аниқланди. Бу ҳақда NME хабар бермоқда.

Биринчи сабаб, сариқ рангда тасвирланган Симпсонлар, Миньонлар, Губка Боб, Баттерс ва Винни Пух каби мультқаҳрамонлар ҳаворанг осмон ёки сув фонида яхшироқ кўринади. Бу ранглар назарияси билан тушунтирилади, унга кўра телевидение нуқтаи назаридан, сариқ ранг кўк рангга тескари ҳисобланади.

Channel Frederator тармоғи вакили Жейкоб Аткинсоннинг фикрича, сариқ ва кўк бирикмаси кўплаб мультфильмларда аксарият воқеалар осмон фонида юз бериши ҳисобга олинса, ўзидан энг ёрқин ранглар жуфтлигини намоён қилади.

Иккинчи сабаб ранглар психологияси бўлиб, унга кўра сариқ ранг мультқаҳрамонлар учун хос бўлган жиҳатлар – қувонч, шижоат ва фаолликни ифодалайди.

Ниҳоят учинчи сабаб, сариқ рангни бошқа ранглар билан адаштириб бўлмайди. Мисол учун, дальтониклик ҳолатида (бунда фақатгина қизил ва яшил ранглар фарқланмайди). Айнан шу сабабли кўзга ташланиши керак бўлган буюмлар – такси, тўсиқлар ва огоҳлантириш белгилари сариқ рангда бўлади.