@sgcc_uzb

“Shurtan gaz kimyo majmuasi” MChJda 2026-yilning 9 oylik faoliyati tahliliga bag‘ishlangan yig‘ilish bo‘lib o‘tdi

2026-10-15T11:51:52.548Z

“Shurtan gaz kimyo majmuasi” MChJ boshqaruv apparatida 2026-yilning 9 oylik faoliyati yakunlari, “O‘zbekneftgaz” AJ boshqaruv raisi topshiriqlari ijrosi, ishlab chiqarish reja ko‘rsatkichlarining bajarilishi, kuz-qish mavsumida texnologik qurilmalarning uzluksiz ishlashini ta’minlash hamda kelgusi yil uchun belgilangan vazifalarga tayyorgarlik masalalariga bag‘ishlangan yig‘ilish bo‘lib o‘tdi.

Dastlab, majmuaning joriy yil 9 oyi davomida amalga oshirgan ishlari tahlil qilinib, ishlab chiqarish va moliyaviy-iqtisodiy faoliyat natijalari muhokama qilindi. Yil yakuniga qadar belgilangan reja ko‘rsatkichlarini to‘liq bajarish, ishlab chiqarish jarayonlarining barqarorligini saqlash hamda mavjud imkoniyatlardan samarali foydalanish yuzasidan ustuvor vazifalar belgilab olindi. Bunda rahbar xodimlarning shaxsiy mas’uliyatini oshirish va topshiriqlar ijrosini doimiy nazorat qilish zarurligi ta’kidlandi.

Shundan so‘ng, “O‘zbekneftgaz” AJ boshqaruv raisi rahbarligida o‘tkazilgan videoselektor yig‘ilishida belgilangan vazifalar ijrosi ko‘rib chiqildi. Majmua faoliyatiga oid dolzarb masalalarni o‘z vaqtida hal etish, topshiriqlarning belgilangan muddatlarda va sifatli bajarilishini ta’minlash bo‘yicha mas’ullarga tegishli vazifalar yuklatildi.

Yig‘ilish kun tartibidagi muhim masalalardan biri 2026–2027-yillar kuz-qish mavsumida majmua obyektlari va texnologik qurilmalarining uzluksiz ishlashini ta’minlash bo‘ldi. Mavsumga tayyorgarlik doirasida amalga oshirilayotgan qurilish va ta’mirlash ishlarining holati, zarur moddiy-texnik resurslar zaxirasini shakllantirish hamda kelgusi yil may oyida rejalashtirilgan joriy ta’mirlash ishlariga puxta tayyorgarlik ko‘rish masalalari muhokama qilindi.

Shuningdek, ishlab chiqarish obyektlarida foydalanilayotgan uskuna va qurilmalarning texnik holatini o‘rganish, xizmat muddatini o‘tab bo‘lgan qismlarni qayta xatlovdan o‘tkazish, zarur hollarda ularni almashtirish va modernizatsiya qilish bo‘yicha chora-tadbirlarni ishlab chiqish vazifalari belgilandi. Texnologik jarayonlarga salbiy ta’sir ko‘rsatishi mumkin bo‘lgan omillarni oldindan aniqlash va bartaraf etish, sanoat xavfsizligi hamda mehnat muhofazasi talablariga rioya qilish masalalariga ham e’tibor qaratildi.

Kun tartibida moliyaviy-iqtisodiy faoliyat samaradorligini oshirish va 2027-yil uchun biznes-rejani shakllantirish masalalari ham ko‘rib chiqildi. Kelgusi yil ishlab chiqarish ehtiyojlarini, moddiy-texnik resurslarga bo‘lgan talabni va xarajatlarni puxta rejalashtirish, debitor-kreditor qarzdorliklarni kamaytirish hamda ishlab chiqarilayotgan mahsulotlarni realizatsiya qilish jarayonlarini takomillashtirish bo‘yicha tegishli topshiriqlar berildi.

Yig‘ilish yakunida majmuaning 2026-yil to‘rtinchi choragi va yil yakunlari bo‘yicha belgilangan vazifalarni bajarish, ishlab chiqarish jarayonlarining barqarorligini saqlash, kuz-qish mavsumini xavfsiz o‘tkazish hamda kelgusi yilgi faoliyatga puxta tayyorgarlik ko‘rish yuzasidan mas’ullarga aniq vazifalar belgilab berildi.

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

KUZ-QISH MAVSUMINI BARQAROR O‘TKAZISHGA TAYYORGARLIK

2026-10-08T05:07:16.774Z

Kuz-qish mavsumida ishlab chiqarish jarayonlarining barqaror ishlashi va muhandislik tizimlarining ishonchli faoliyat yuritishi muhim ahamiyatga ega. Shu maqsadda “O‘zbekneftgaz” AJ boshqaruv raisining 2026-yil 18-maydagi 150-sonli buyrug‘i asosida “Shurtan gaz kimyo majmuasi” MChJda 2026–2027-yillar kuz-qish mavsumini barqaror va xavfsiz o‘tkazish bo‘yicha 14 banddan iborat chora-tadbirlar rejasi ishlab chiqilib, undagi vazifalar bosqichma-bosqich amalga oshirildi. Rejada texnologik qurilmalar, elektr, issiqlik, gaz va suv ta’minoti tizimlarining uzluksiz ishlashini ta’minlashga alohida e’tibor qaratilgan.

Tadbirlarni amalga oshirishda korxonaning mavjud moddiy-texnik bazasi, ehtiyot qismlari va ta’mirlash ishlarini bajarish uchun mavjud resurslaridan oqilona foydalanildi. Asosiy ishlarning ichki imkoniyatlar hisobidan bajarilishi resurslardan samarali foydalanish bilan birga, xarajatlarni maqbullashtirish va mablag‘larni tejash imkonini berdi.

Xususan, markaziy qozonxonadagi 2 ta yuqori bosimli bug‘ qozoni hamda ishchilar shaharchasidagi 5 ta suv isitish qozoni — jami 7 ta qozon profilaktik ko‘rikdan o‘tkazildi. Ko‘rik davomida aniqlangan nosozliklar bartaraf etilib, tegishli joriy ta’mirlash ishlari bajarildi. Qozonlar yakuniy sinovlardan o‘tkazilib, kuz-qish mavsumida barqaror ishlashga tayyor holatga keltirildi. Shuningdek, 5 ta bug‘ kondensatini saqlash baki tozalanib, joriy ta’mirlandi.

Elektr ta’minoti tizimlarining ishonchliligini oshirish maqsadida jami 8 ta transformatorning texnik holati tekshirildi. Aniqlangan kamchiliklar bo‘yicha zarur ta’mirlash ishlari amalga oshirilib, transformatorlar tegishli sinovlardan o‘tkazildi va mavsum davomida ishonchli foydalanishga tayyorlandi. Shuningdek, 2 ta dizel elektr stansiyasi, 2 ta uzluksiz elektr ta’minoti manbai hamda 5 ta zaxirani avtomatik ulash qurilmasi joriy ta’mirdan o‘tkazildi.

Issiqlik yo‘qotishlarini kamaytirish ham tayyorgarlik ishlarining muhim yo‘nalishlaridan biri bo‘ldi. Jumladan, bug‘, isitish va issiq suv tarmoqlaridagi jami 169 metr izolyatsiya qoplamasi bo‘yicha ta’mirlash va yangilash ishlari olib borildi. Shundan 60 metr izolyatsiya qoplamasi korxonaning mexanik ta’mirlash sexida ichki imkoniyatlardan foydalangan holda ta’mirlanib, qayta o‘rnatildi. Bu, o‘z navbatida, issiqlik yo‘qotishlarini kamaytirish bilan birga, mavjud resurslardan samarali foydalanish va xarajatlarni maqbullashtirish imkonini berdi.

Suv ta’minoti barqarorligini ta’minlash maqsadida "Suvni qayta haydash" nasos stansiyasidagi 4 ta suv saqlash rezervuari tozalanib, ularning texnik holati tekshirildi. Shu bilan birga, gaz kondensatini saqlash rezervuari hamda 130 ta konteyner-sisterna tozalanib, kuz-qish mavsumida foydalanishga tayyorlandi.

Amalga oshirilgan kompleks chora-tadbirlar kuz-qish mavsumida ishlab chiqarish jarayonlarining barqaror va uzluksiz ishlashini ta’minlash, energiya resurslaridan oqilona foydalanish, mavjud imkoniyatlarni samarali foydalanish hamda xodimlar uchun qulay mehnat sharoitlarini yaratishga xizmat qiladi.

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

MEHNAT FAXRIYLARI UCHUN SAMARQANDGA SAYOHAT TASHKIL ETILDI

2026-10-07T09:57:25.228Z

“Shurtan gaz kimyo majmuasi” MChJning 25 yillik yubileyi munosabati bilan majmua ma’muriyati hamda Kasaba uyushma qo‘mitasi hamkorligida uzoq yillar davomida korxona rivojiga munosib hissa qo‘shgan va bugungi kunda nafaqada bo‘lgan bir guruh mehnat faxriylari uchun Samarqand shahriga sayohat tashkil etildi.

Tarix va ma’naviyat nafasi ufurib turgan Samarqand safari faxriylar uchun unutilmas taassurotlarga boy bo‘ldi. Ular Imom al-Buxoriy ziyoratgohini ziyorat qilib, buyuk alloma xotirasiga hurmat bajo keltirdilar. Shuningdek, Mirzo Ulug‘bek rasadxonasi, Shohi Zinda, Go‘ri Amir, Bibixonim majmualari hamda Samarqandning beqiyos timsoli bo‘lgan Registon ansambli bilan yaqindan tanishdilar. Safar davomida O‘zbekiston Respublikasining Birinchi Prezidenti Islom Karimov maqbarasi ham ziyorat qilinib, xotirasi yod etildi.

Sayohat davomida faxriylar Samarqandning tarixiy obidalari va ziyoratgohlaridan bahramand bo‘lish bilan birga, o‘zaro samimiy suhbatlar qurib, mehnat yillarini yodga oldilar. Ko‘p yillar davomida majmua taraqqiyotiga o‘z hissasini qo‘shgan insonlar uchun bunday e’tibor va ehtirom, shubhasiz, alohida ahamiyat kasb etadi.

Mehnat faxriylarini qadrlash, ularning fidokorona faoliyatini e’zozlash va ular bilan doimo hamnafas bo‘lish — “Shurtan gaz kimyo majmuasi”da shakllangan ezgu qadriyatlarning yorqin ifodasidir.

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

MILLIY YUKSALISH DAVRI

2026-10-06T10:20:30.373Z

“Shurtan gaz kimyo majmuasi” MChJ mas’ul xodimlari “O‘zbekneftgaz” AJ tomonidan Respublika Ma’naviyat va ma’rifat markazi mas’ullari hamkorligida Zoom platformasi orqali tashkil etilgan o‘quv-seminarda ishtirok etdi.

Seminar O‘zbekiston Respublikasi Prezidentining mamlakatimiz davlat mustaqilligining 35 yilligiga bag‘ishlangan tantanali marosimdagi nutqida ilgari surilgan ezgu g‘oya va tashabbuslarning mazmun-mohiyatini keng tushuntirishga qaratildi. Unda “O‘zbekneftgaz” AJ markaziy apparati hamda tizim tashkilotlaridan 100 ga yaqin rahbar va ishchi-xodim qatnashdi.

Tadbir davomida Prezidentimiz tomonidan mamlakatimizning kelgusi taraqqiyoti uchun belgilab berilgan ustuvor vazifalar, xususan, kelgusi o‘n yillikni “Milliy yuksalish davri” sifatida shakllantirish, inson qadrini yuksaltirish va xalq farovonligini ta’minlash masalalariga alohida e’tibor qaratildi.

Shuningdek, yuqori texnologiyali iqtisodiyotni rivojlantirish, mehnat unumdorligini oshirish, zamonaviy va yuqori malakali ish o‘rinlarini yaratish, yoshlarning salohiyatini to‘liq ro‘yobga chiqarish kabi muhim yo‘nalishlar yuzasidan fikr almashildi.

Mazkur o‘quv-seminar mamlakatimizda amalga oshirilayotgan keng ko‘lamli islohotlarning mazmun-mohiyatini xodimlarga yetkazish va ularni yagona maqsadlar yo‘lida birlashtirishga xizmat qiluvchi muhim tadbirlardan biri bo‘ldi.

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

“IBRATLI OILA” TANLOVI G‘OLIBLARI UCHUN SAMARQANDGA SAYOHAT TASHKIL ETILDI

2026-10-05T09:12:26.819Z

O‘zbekiston Respublikasi davlat mustaqilligining 35 yilligi hamda “Shurtan gaz kimyo majmuasi” MChJning 25 yillik yubileyi munosabati bilan majmuada “Ibratli oila” ko‘rik-tanlovi o‘tkazilgan edi.

Tanlovdan ko‘zlangan asosiy maqsad — korxonada uzoq yillar samarali mehnat qilayotgan, jamoat ishlarida faol ishtirok etayotgan, oilaviy qadriyatlarni e’zozlaydigan hamda o‘zi istiqomat qilayotgan mahallasida namunali hayoti bilan boshqalarga o‘rnak bo‘layotgan oilalarni munosib e’tirof etishdan iborat bo‘ldi.

Ana shu ezgu tashabbusning mantiqiy davomi sifatida g‘olib oilalar uchun Samarqand shahriga sayohat tashkil etildi.

Sayohat davomida ishtirokchilar Samarqandning tarixiy obidalari va diqqatga sazovor maskanlarini ziyorat qilib, shaharning boy tarixi, betakror me’morchiligi hamda milliy qadriyatlari bilan yaqindan tanishdilar. Oilalar uchun mazmunli hordiq chiqarish, o‘zaro muloqot va unutilmas taassurotlarga boy kunlar tashkil etildi.

Bunday e’tibor va e’tirof oilaviy qadriyatlarni mustahkamlash, xodimlarning mehnat va jamoat hayotidagi faolligini qo‘llab-quvvatlash hamda jamoada sog‘lom ma’naviy muhitni yanada mustahkamlashga xizmat qilishi shubhasizdir.

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

BILIMDONLAR MAYDONIDA BELLASHUVLAR O‘ZINING QIZG‘IN PALLASIGA KIRMOQDA

2026-10-02T08:17:03.314Z

“Shurtan gaz kimyo majmuasi” mas’uliyati cheklangan jamiyatida ishchi-xodimlarning intellektual salohiyatini yuksaltirish, dunyoqarashini kengaytirish hamda kitobxonlikka bo‘lgan qiziqishini qo‘llab-quvvatlashga qaratilgan ma’naviy-ma’rifiy tadbirlar izchil davom ettirilmoqda.

Ana shunday tadbirlarning navbatdagisi joriy yilning 24-sentabr kuni Majmuaning Ishchilar shaharchasidagi Ma’naviyat markazida o‘tkazilgan “Breyin-ring” intellektual bellashuvi bo‘ldi. Unda Majmuaning turli bo‘linmalarida faoliyat yuritayotgan bilimga chanqoq, izlanuvchan va tashabbuskor ishchi-xodimlardan tarkib topgan to‘rtta jamoa ishtirok etdi. Jumladan, Bug‘ gaz havo ta’minoti sexining yoshlaridan iborat “YOSH ENERGY”, Majmua yoshlarini birlashtirgan “SMART”, Uy-joydan foydalanish xizmati vakillaridan tarkib topgan “SHGKM CITY” hamda yetakchi muhandis-texnologlarni birlashtirgan “TEXNOLOGLAR” jamoalari o‘zaro bilim va zukkoliklarini sinovdan o‘tkazdi.

Bellashuv davomida ishtirokchilarga mantiqiy va ilmiy asoslangan savollar berildi. Savollar ishtirokchilardan keng bilim va teran fikrlash bilan bir qatorda, qisqa vaqt ichida tezkor qaror qabul qilish va jamoaviy hamjihatlikni namoyon etishni talab qildi. Har bir ochko uchun kechgan qizg‘in bahslar bellashuvga yanada ko‘tarinki ruh bag‘ishladi.

Yakuniy natijalarga ko‘ra, o‘zining bilimdonligi, tezkor fikrlashi va jamoaviy hamjihatligini namoyon etgan “TEXNOLOGLAR” jamoasi eng ko‘p ochko jamg‘arib, raqiblaridan ustun keldi. Shu tariqa, muhandis-texnologlardan tarkib topgan jamoa intellektual turnirning keyingi bosqichiga yo‘llanmani qo‘lga kiritdi.

Tadbir doirasida tomoshabinlar uchun ham qiziqarli savol-javoblar tashkil etildi. Zalda o‘tirgan ishchi-xodimlar o‘rtasidagi ushbu bellashuvda eng tezkor va to‘g‘ri javob bergan ishtirokchilar jahon va milliy adabiyot durdonalaridan iborat kitoblar jamlanmasi bilan taqdirlandi.

Bunday intellektual bellashuvlar ishchi-xodimlarda tezkor va mantiqiy fikrlash, keng dunyoqarash hamda jamoada samarali ishlash ko‘nikmalarini rivojlantirish, ularning intellektual salohiyatini yanada oshirishga xizmat qilmoqda.

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

“Shurtan gaz kimyo majmuasi” MChJda pensiya tizimini isloh qilish bo‘yicha takliflarga bag‘ishlangan seminar o‘tkazildi

2026-09-23T04:26:45.925Z

“Shurtan gaz kimyo majmuasi” MChJda pensiya tizimini isloh qilish bo‘yicha takliflarni tushuntirish va targ‘ibot qilishga bag‘ishlangan seminar tashkil etildi.

Unda O‘zbekiston Respublikasi Iqtisodiyot va moliya vazirligi huzuridagi Budjetdan tashqari Pensiya jamg‘armasi Qashqadaryo viloyati boshqarmasi vakillari taqdimot bilan ishtirok etdilar.

Seminar davomida majmua xodimlariga mamlakatimizda pensiya tizimini takomillashtirish bo‘yicha ishlab chiqilgan takliflarning mazmun-mohiyati borasida batafsil ma’lumotlar berildi.

Xususan, taqdimotda:

🔹 pensiya xizmatlarini raqamlashtirish;
🔹 ijtimoiy adolatni yanada mustahkamlash;
🔹 jamg‘arib boriladigan pensiya tizimini takomillashtirish;
🔹 pensiya tizimining moliyaviy barqarorligini ta’minlash;
🔹 pensiya tizimi qamrovini oshirish;
🔹 eng kam ish staji talabini bosqichma-bosqich oshirish;
🔹 pensiya yoshi va pensiya olish davrini muvofiqlashtirish kabi masalalar yuzasidan tushuntirishlar berildi.

Seminarda Majmuaning barcha tarkibiy bo‘linmalaridan mas’ul vakillar ishtirok etdi. Tadbirda berilgan ma’lumot va tushuntirishlarning har bir tarkibiy bo‘linmada xodimlarga yetkazilishi hamda pensiya tizimini isloh qilish bo‘yicha takliflar mazmun-mohiyatini kengroq tushuntirishga alohida e’tibor qaratilishi kerakligi ta'kidlab o'tildi.

Tadbir yakunida ishtirokchilar o‘zlarini qiziqtirgan savollar bilan murojaat qilib, mutaxassislardan tegishli javob va tushuntirishlar oldilar.

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

“Shurtan gaz kimyo majmuasi” MChJda Integratsiyalashgan boshqaruv tizimining kuzatuv auditi muvaffaqiyatli o‘tkazildi

2026-09-10T11:14:21.540Z

“Shurtan gaz kimyo majmuasi” MChJda xalqaro standartlar talablari asosida joriy etilgan Integratsiyalashgan boshqaruv tizimining kuzatuv auditi muvaffaqiyatli o‘tkazildi.

Audit “Management Certification” MChJning xalqaro auditorlari tomonidan o‘tkazilib, unda korxonada ISO 9001:2015 — sifat menejmenti, ISO 14001:2015 — ekologik menejment, ISO 45001:2018 — mehnat xavfsizligi va sog‘liqni saqlash hamda ISO 50001:2018 — energiya menejmenti xalqaro standartlari talablari asosida olib borilayotgan ishlar o‘rganildi.

Kuzatuv auditi davomida Integratsiyalashgan boshqaruv tizimining amaldagi holati, uning samaradorligi, belgilangan talablarning bajarilishi hamda tizimni doimiy takomillashtirishga qaratilgan chora-tadbirlar tahlil qilindi.

Audit natijalari korxonada xalqaro standartlar talablariga muvofiq boshqaruv tizimi samarali yo‘lga qo‘yilganini ko‘rsatdi. Xususan, majmuada ishlab chiqarish jarayonlarida sifatni ta’minlash, ekologik xavfsizlikni mustahkamlash, xodimlar uchun xavfsiz mehnat sharoitlarini yaratish va energiya resurslaridan samarali foydalanish bo‘yicha tizimli ishlar olib borilmoqda.

Integratsiyalashgan boshqaruv tizimi korxonamiz faoliyatining muhim yo‘nalishlarini yagona tizim asosida boshqarish va xalqaro talablar asosida takomillashtirish imkonini bermoqda. Kuzatuv auditining muvaffaqiyatli o‘tkazilgani bu boradagi ishlarimizning muntazam davom etayotganini tasdiqlaydi, — deydi Integratsiyalashgan boshqaruv tizimi bo‘yicha rahbariyat vakili, majmua bosh direktorining axborot texnologiyalari va sifatni boshqarish bo‘yicha o‘rinbosari Faxriddin Kuvatov.

“Shurtan gaz kimyo majmuasi” MChJda Integratsiyalashgan boshqaruv tizimini yanada takomillashtirish, xalqaro standartlar talablarini amaliyotga samarali tatbiq etish va xodimlarning bu boradagi bilim hamda ko‘nikmalarini oshirishga qaratilgan ishlar davom ettirilmoqda. Bu esa korxonaning barqaror rivojlanishi va mamlakatimiz sanoat salohiyatini mustahkamlashda muhim ahamiyat kasb etadi.

Ma’lumot uchun:

ISO 9001:2015 — sifat menejmenti tizimi bo‘lib, mahsulot va xizmatlar sifatini ta’minlash, iste’molchilar talablarini qondirish hamda ishlab chiqarish jarayonlarini takomillashtirishga xizmat qiladi.

ISO 14001:2015 — ekologik menejment tizimi bo‘lib, atrof-muhitga salbiy ta’sirni kamaytirish, chiqindilarni qisqartirish va ekologik talablarning bajarilishini ta’minlashga qaratilgan.

ISO 45001:2018 — mehnat xavfsizligi va xodimlar salomatligini muhofaza qilish menejmenti tizimi bo‘lib, xavfsiz mehnat sharoitlarini yaratish, ishlab chiqarishdagi baxtsiz hodisalar va kasb kasalliklarining oldini olishga xizmat qiladi.

ISO 50001:2018 — energiya menejmenti tizimi bo‘lib, energiya resurslaridan samarali foydalanish, energiya sarfini optimallashtirish va energiya samaradorligini oshirishga xizmat qiladi.

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

25 YILLIKKA — 25 TA IJTIMOIY LOYIHA: CHORAK ASR SHUKUHI, EZGU TASHABBUSLAR VA UNUTILMAS LAHZALAR

2026-09-04T12:02:45.537Z

Yigirma besh yil — shunchaki vaqt emas!

Bu — chorak asrlik mehnat, izlanish, fidoyilik va bunyodkorlik bilan yaratilgan katta tarix. Bu tarixda minglab insonlarning taqdiri, o‘z kasbiga sadoqati, tun-u kun qilgan mehnati, erishilgan yutuqlar va unutilmas xotiralar mujassam.

Shu bois “Shurtan gaz kimyo majmuasi” MChJning 25 yillik yubileyi oddiy sana sifatida emas, balki chorak asrlik yo‘lni sarhisob qilish, shu tarixni yaratgan insonlarni qadrlash va kelajak sari yangi maqsadlarni belgilash imkonini beruvchi ulkan voqea sifatida nishonlandi.

O‘zbekiston Respublikasi davlat Mustaqilligining 35 yilligi bilan uyg‘unlashgan ushbu qutlug‘ sana munosabati bilan majmuada “25 yillikka — 25 ta ijtimoiy loyiha” dasturi ishlab chiqilib, keng ko‘lamli ijtimoiy, ma’naviy-ma’rifiy, sport va ijodiy tadbirlar amalga oshirildi.

Bu loyihalarning har biri ortida katta tashkiliy mehnat, izlanish va fidoyilik mujassam. Zero, yubileyni munosib nishonlash uchun birgina tantanali marosimning o‘zi kifoya emas edi. Shu sababli chorak asrlik yubiley butun jamoani qamrab olgan katta ijtimoiy harakatga aylandi.

Bugun “Shurtan gaz kimyo majmuasi”da ushbu keng ko‘lamli tashabbuslarning mantiqiy yakuni — loyiha doirasida o‘tkazilgan tanlov va sport musobaqalari g‘oliblarini taqdirlash marosimi bo‘lib o‘tdi. Tadbir davomida chorak asrlik yubiley munosabati bilan amalga oshirilgan ezgu tashabbuslar sarhisob qilinib, faol ishtirok etgan xodimlar, tanlov g‘oliblari va sportchilar munosib e’tirof etildi.

E’tibor markazida — inson qadri!

Dastur doirasidagi ilk tashabbuslar bevosita xodimlar va ularning oilalarini qo‘llab-quvvatlashga qaratildi.

Jumladan, “Ibratli oila” tanlovi orqali majmuada uzoq yillar samarali mehnat qilgan, jamoat ishlarida faol va o'zi yashab istiqomat qiladigan mahallasida o‘zining namunali hayoti bilan boshqalarga o‘rnak bo‘layotgan oilalarni e’tirof etish hamda ular uchun yurtimizning tarixiy shaharlaridan biriga oilaviy sayohat tashkil etish belgilangan edi.

Bu tashabbusning o‘ziga xos jihati shundaki, tanlovda 21 nafar xodim ishtirokchi sifatida qayd etilib, yakunda barchasi g‘olib deb topildi. Ularga turmush o‘rtoqlari bilan birga Samarqand shahriga sayohat qilish uchun sertifikat topshirildi. Sertifikatni tanlov g'oliblari nomidan majmua bosh texnologi Xujamberdi Toshboyev qabul qilib oldi. Shuningdek, ularning xonadonlariga “Bu xonadonda SHGKM ibratli oilasi istiqomat qiladi” mazmunidagi maxsus yorliqlar o‘rnatildi.

“Baxtli bolalik” loyihasi esa 8 yoshgacha bo‘lgan 200 nafar xodim farzandini qamrab oldi. Bolajonlar uchun qo‘g‘irchoq teatri tomoshasi tashkil etildi.

Ijtimoiy himoyaga muhtoj xodimlarni qo‘llab-quvvatlash maqsadida “Mehr fondi”, insonparvarlik va ezgulik g‘oyalarini targ‘ib qiluvchi “Beg‘araz donorlik aksiyasi” ham tashkil etildi. Donorlik aksiyasi viloyat qon quyish markazi bilan hamkorlikda o‘tkazilib, xodimlarning ixtiyoriy ravishda qon topshirishi uchun sharoit yaratildi.

Shuningdek, “Mehrli jamoa” loyihasi doirasida nafaqada bo‘lgan yoki davolanayotgan xodimlarning holidan xabar olindi, ularning sharoitlari o‘rganilib, zarur ijtimoiy-moddiy ko‘mak ko‘rsatish ko‘zda tutildi.

G‘uzor tumanidagi ijtimoiy himoyaga muhtoj oilalar farzandlaridan 25 nafari yozgi oromgohlarga yuborilib, ularning sog‘lomlashtirilishi va mazmunli hordiq chiqarishi uchun imkoniyat yaratildi.

“Ota-onam mening faxrim”: farzandlar uchun unutilmas kun loyihasi doirasida majmua xodimlarining farzandlari ota-onalari mehnat qilayotgan maskan, ularning kasbi va kundalik faoliyati bilan yaqindan tanishdilar. Korxona tarixi muzeyi hamda ishlab chiqarish hududiga uyushtirilgan sayohat bolajonlarda mehnatga hurmat va ota-onalarining kasbiga nisbatan faxr tuyg‘usini yanada kuchaytirdi desak adashmagan bo'lamiz.

Shuningdek, bugungi majmua poydevorini yaratgan, uning shakllanishi va taraqqiyotiga o‘z hissasini qo‘shgan insonlar ham e’tibordan chetda qolmadi.

“Mehnat faxriylari sayohat dasturi” doirasida majmuada 20 yildan ortiq mehnat qilib, nafaqaga chiqqan 45 nafar faxriy uchun yurtimizning diqqatga sazovor joylari va ziyoratgohlariga madaniy-ma’rifiy sayohat tashkil etildi.

Salomatlik — e’tibor markazida

Yubiley dasturida xodimlar salomatligiga ham alohida e’tibor qaratildi.

“Sog‘lom ayol — sog‘lom jamiyat” loyihasi doirasida 45–60 yosh oralig‘idagi 250 nafar ayol xodim uchun “Ko‘krak saratoniga qarshimiz” shiori ostida bepul professional tibbiy va ultratovush skrining ko‘riklari tashkil etildi.

Bu tashabbus yubiley tadbirlarining mazmuni faqat bayram va tantanadan iborat emasligini, xodimlar salomatligi va farovonligiga amaliy g‘amxo‘rlik ham dastur markazida bo‘lganini ko‘rsatdi.

25 yil — ijod, tafakkur va iste’dod nigohida

Yubiley munosabati bilan majmua xodimlari o‘rtasida ijodiy va intellektual tanlovlarning butun bir turkumi tashkil etildi.

Jumladan:

“Majmuam 25 yoshda” videoroliklar tanlovi;
“Majmuam 25 yoshda” maqolalar tanlovi;
“SHGKM bilimdoni” onlayn intellektual tanlovi;
“Men SHGKM bilan faxrlanaman, chunki...” videotilaklar tanlovi;
“Bir surat ortidagi hikoya” tanlovi;
“SHGKM — 25 yoshda!” bolalar ijodiy chellenji;
“Eng yaxshi insho”;
“Eng yaxshi she’r”;
“Eng yaxshi qo‘shiq”;
“Zakovat” intellektual bellashuvi.

Bu tanlovlarning har biri majmua tarixiga turlicha nigoh bilan qarash imkonini berdi.

Kimdir korxona tarixini maqola orqali hikoya qildi, kimdir videotasvirlarda jamoa hayotini aks ettirdi. Kimdir eski suratlar ortidagi unutilmas xotiralarni qayta jonlantirdi, yana kimdir she’r va qo‘shiq orqali o‘z tuyg‘ularini ifodaladi. Bolalar esa ota-onalari mehnat qilayotgan majmuaga o‘zlarining samimiy tilaklarini yo‘lladilar.

Quyida tanlovlar g‘oliblari bilan tanishishingiz mumkin:

“Majmuam 25 yoshda” videoroliklar tanlovi g‘olibi — SHGKM poliklinikasi navbatchi shifokori Xushnarov Xusan Farhod o‘g‘li.

“Majmuam 25 yoshda” maqolalar tanlovi g‘olibi — Kapital qurilish xizmati muhandisi Rahmatov Shamsiddin Abdisalom o‘g‘li.

“SHGKM bilimdoni” onlayn intellektual tanlovi g‘olibi — Etilen ishlab chiqarish sexi muhandisi Boltayev Ahror Soxib o‘g‘li.

“Men SHGKM bilan faxrlanaman, chunki...” videotilaklar tanlovi g‘olibi — Tayyor mahsulot va xomashyo sexi ish yurituvchisi Davronova Dinora Baxtiyor qizi.

“Bir surat ortidagi hikoya” tanlovi g‘olibi — Temir yo‘l transporti bilan ta’minlash xizmati boshlig‘i Jovliyev Ergash Qurbonaliyevich.

“Eng yaxshi insho” tanlovi g‘olibi — Polietilen ishlab chiqarish sexi xodimi Xudoynazarov Og‘abek Ulug‘bek o‘g‘li.

“Eng yaxshi she’r” tanlovi g‘olibi — Sanoat xavfsizligi xizmati muhandisi Shomuratova Anna Xalilovna.

“Eng yaxshi qo‘shiq” tanlovi g‘olibi — Temir yo‘l transporti bilan ta’minlash xizmati markazlashgan pult operatori Egamberdiyev Aziz Xamidovich.

Shuningdek, “SHGKM — 25 yoshda!” bolalar ijodiy chellenjida majmua xodimlarining 41 nafar farzandi ishtirok etdi. Tanlov hay’ati barcha bolajonlarni g‘olib deb topdi va ular teatr tomoshasiga sertifikatlar bilan taqdirlandi. Sertifikatni Xotin-qizlar va gender masalalari bo'limi mutaxassisi Gulzoda Mirzayeva qabul qilib oldi.

“Zakovat” — bilim va jamoaviy fikr maydoni

“Bir jamoa — bir maqsad” shiori ostida tashkil etilgan “Zakovat” intellektual bellashuvi ham yubiley dasturining eng muhim yo‘nalishlaridan biri bo‘ldi.

Unda quyidagicha natija qayd etildi:

🥉 3-o‘rin — Polietilen ishlab chiqarish sexining “UzClear” jamoasi;

🥈 2-o‘rin — Nazorat-o‘lchov asboblari va avtomatika sexining “Avtomatika” jamoasi;

🥇 1-o‘rin va musobaqa chempioni — Avtotransport bilan ta’minlash xizmatining “Transportchilar” jamoasi.

Shu tariqa bilim, tezkor fikrlash va jamoaviy hamjihatlik uyg‘unlashgan bellashuv o‘z chempionini aniqladi. Shuningdek, intellektual tanlovlarni tashkil etishda faollik ko'rsatgan tashkilotchilar Bo'riyev Doston va Himmatov Jahongirbek ham munosib taqdirlandilar.

Yoshlar va xotin-qizlar — kelajak bunyodkorlari

Yubiley dasturida yoshlar va xotin-qizlarning ijtimoiy faolligini oshirishga ham alohida e’tibor qaratildi.

“Rahbar va yoshlar” uchrashuvida yosh xodimlar majmua bosh mutaxassislari bilan ochiq muloqot qildilar, o‘zlarini qiziqtirgan masalalar yuzasidan fikr va takliflarini bildirish imkoniga ega bo‘ldilar.

Shuningdek, faol yoshlar va xotin-qizlar uchun sayohat dasturi doirasida yurtimizdagi tarixiy, ziyorat va diqqatga sazovor maskanlarga madaniy-ma’rifiy sayohatlar tashkil etildi.

Sport — sog‘lom raqobat va jamoaviy ruh

Yubiley dasturining eng keng qamrovli yo‘nalishlaridan biri, shubhasiz, sport musobaqalari bo‘ldi.

“Yagona Vatan, yagona xalq bo‘lib, yangi hayot va kelajak yaratamiz!” g‘oyasi asosida xodimlarni sportga keng jalb qilish, sog‘lom turmush tarzini targ‘ib etish, jamoaviylik va sog‘lom raqobat muhitini kuchaytirish maqsadida sportning 11 turi va jami 19 ta yo‘nalishi bo‘yicha musobaqalar tashkil etildi. Dasturda mini futbol, voleybol, stol tennisi, badminton, stritbol, suzish, shaxmat, shashka, arqon tortish va “Quvnoq sport” kabi yo‘nalishlar qamrab olingan.

Quyida sport musobaqalarining g‘olib va sovrindorlari bilan tanishishingiz mumkin:

Yakkalik bahslarda:

🏸 Badminton, erkaklar

🥇 1-o‘rin — Shuxrat Aslanov — SHGKM bosh direktori
🥈 2-o‘rin — Sherali Jurayev — Avtotransport bilan ta’minlash sexi xodimi

🏸 Badminton, ayollar

🥇 1-o‘rin — Tozagul Shoberdiyeva — SHGKM poliklinikasi xodimasi
🥈 2-o‘rin — Shaxnoza Xidirova — Qorovullik qo‘riqlash xizmati xodimasi

🏓 Stol tennisi, erkaklar

🥇 1-o‘rin — Azim Davlatov — Ishonchlilikni boshqarish xizmati xodimi
🥈 2-o‘rin — Eson Chorshanbiyev — Etilen ishlab chiqarish sexi xodimi

🏓 Stol tennisi, ayollar

🥇 1-o‘rin — Kamola Aminova — Oqova suvlarni tozalash sexi xodimasi
🥈 2-o‘rin — Zarnigor Maxmudova — Maishiy xo‘jalik xizmati xodimasi

🏊 Suzish, erkaklar

🥇 1-o‘rin — Rustam Jurayev — Ichki suv ta’minoti sexi xodimi
🥈 2-o‘rin — Anvar Shomurodov — Ichki suv ta’minoti sexi xodimi

🏊 Suzish, ayollar

🥇 1-o‘rin — Dilbar Ro‘ziboyeva — Tashqi suv ta’minoti sexi xodimasi
🥈 2-o‘rin — Shaxnoza Axmedova — Maishiy xo‘jalik xizmati xodimasi

♟ Shaxmat, erkaklar

🥇 1-o‘rin — Iskandar Kenjayev — Ko‘kalamzorlashtirish tarmog‘i xodimi
🥈 2-o‘rin — Jamshid Nigmatov — Polietilen ishlab chiqarish sexi xodimi

♟ Shaxmat, ayollar

🥇 1-o‘rin — Xurshida Kuziyeva — Ko‘kalamzorlashtirish tarmog‘i xodimasi
🥈 2-o‘rin — Kamola Aminova — Oqova suvlarni tozalash sexi xodimasi

♟ Shashka, erkaklar

🥇 1-o‘rin — Ulug‘bek Rajabov — Markaziy laboratoriya xodimi
🥈 2-o‘rin — Umirzoq Xushvaqtov — Tayyor mahsulot va xomashyo sexi xodimi

♟ Shashka, ayollar

🥇 1-o‘rin — Fazilat Uzoqova — Maishiy xo‘jalik xizmati xodimasi
🥈 2-o‘rin — Muborak Yo‘ldosheva — Maishiy xo‘jalik xizmati xodimasi

Jamoaviy bahslarda

⚽ Mini futbol — 40 yoshdan kattalar

🥇 1-o‘rin — Etilen ishlab chiqarish sexi jamoasi
🥈 2-o‘rin — Ichki suv ta’minoti sexi jamoasi

⚽ Mini futbol — 40 yoshgacha

🥇 1-o‘rin — Ichki suv ta’minoti sexi jamoasi
🥈 2-o‘rin — Polietilen ishlab chiqarish sexi jamoasi

🏐 Voleybol, erkaklar

🥇 1-o‘rin — Tayyor mahsulotlar va xomashyo sexi jamoasi
🥈 2-o‘rin — Mexanika ta’mirlash sexi jamoasi

🏐 Voleybol, ayollar

🥇 1-o‘rin — Maishiy xo‘jalik xizmati jamoasi
🥈 2-o‘rin — Uy-joydan foydalanish xizmati jamoasi

🏀 Stritbol, erkaklar

🥇 1-o‘rin — Metrologiya xizmati jamoasi
🥈 2-o‘rin — Nazorat-o‘lchov asboblari va avtomatlashtirish sexi jamoasi

🏀 Stritbol, ayollar

🥇 1-o‘rin — Uy-joydan foydalanish xizmati jamoasi
🥈 2-o‘rin — Ko‘kalamzorlashtirish tarmog‘i jamoasi

💪 Arqon tortish, erkaklar

🥇 1-o‘rin — Tayyor mahsulotlar va xomashyo sexi jamoasi
🥈 2-o‘rin — Polietilen ishlab chiqarish sexi jamoasi

💪 Arqon tortish, ayollar

🥇 1-o‘rin — Majmua poliklinikasi jamoasi
🥈 2-o‘rin — Uy-joydan foydalanish xizmati jamoasi

🏃‍♀️ “Quvnoq sport”, ayollar

🥇 1-o‘rin — Umumiy ovqatlanish sexi jamoasi
🥈 2-o‘rin — Majmua poliklinikasi jamoasi

Bu musobaqalar orqali majmuaning turli bo‘linmalarida faoliyat yuritayotgan xodimlar bir maydonda jamlanib, nafaqat sport mahoratini, balki o‘zaro hamjihatlik va jamoaviy ruhni ham namoyon etdilar.

25 loyiha — bitta katta maqsad

Aslida, 25 ta ijtimoiy loyihaning har biri alohida yo‘nalish bo‘lsa-da, ularni yagona g‘oya — insonni qadrlash, jamoani birlashtirish va ezgulikni amalda namoyon etish maqsadi birlashtirib turadi.

Bu jarayonda oilalar e’tirof etildi.

Bolalarga quvonch ulashildi.

Xodimlar salomatligiga e’tibor qaratildi.

Mehnat faxriylariga hurmat ko‘rsatildi.

Ijtimoiy ko‘makka muhtoj insonlar qo‘llab-quvvatlandi.

Yoshlar va xotin-qizlarga imkoniyat yaratildi.

Ijodkorlar o‘z iste’dodini namoyon etdi.

Bilimdonlar “Zakovat” maydonida kuch sinashdi.

Sportchilar esa jamoasi sharafini himoya qildilar.

Shu ma’noda, “25 yillikka — 25 ta ijtimoiy loyiha” dasturi majmuaning chorak asrlik yubileyi uchun munosib tuhfa bo'ldi. U — Majmua tarixini yaratib kelayotgan insonlarga berilgan e’tibor va minnatdorlikning amaliy ifodasi bo‘ldi.

25 yil — yakun emas, yangi tarixning boshlanishi

Bugun “Shurtan gaz kimyo majmuasi” chorak asrlik tarixiga nazar tashlar ekan, bu tarix ortida ulkan ishlab chiqarish salohiyati bilan bir qatorda minglab insonlarning taqdiri, mehnati, orzulari va unutilmas xotiralari mujassam ekanini ko‘ramiz.

“25 yillikka — 25 ta ijtimoiy loyiha” dasturi ana shu tarixning yana bir yorqin sahifasiga aylandi.

Bu loyihalar orqali oilalarga e’tibor, bolalarga quvonch, faxriylarga hurmat, xodimlarga g‘amxo‘rlik, yoshlarga imkoniyat, xotin-qizlarga e’tibor, ijodkorlarga maydon, bilimdonlarga sinov, sportchilarga raqobat va butun jamoaga birlik muhiti yaratildi.

Chorak asrlik yo‘l — ortda qolgan katta tarix.

Ammo 25 yil — yakun emas.

Bu — yangi marralar sari dadil qadam tashlash uchun mustahkam poydevor.

Kecha — tarix. Bugun — faxr. Ertaga — yangi marralar!

25 yoshing muborak bo‘lsin, aziz “Shurtan gaz kimyo majmuasi”!

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|

Majmuam — 25 yoshda

2026-09-03T17:19:29.960Z

Yigirma besh yil... Inson umri uchun salmoqli, korxona hayoti uchun esa butun bir davrni anglatadigan muddat. Yigirma besh yil davomida bir avlod voyaga yetadi, yangi kasblar egallanadi, yangi texnologiyalar paydo bo‘ladi, kechagi orzular bugungi voqelikka aylanadi. Ayrim inshootlar quriladi, ayrimlari rekonstruksiya qilinadi, zamonaviy ishlab chiqarish quvvatlari ishga tushiriladi, tajribali mutaxassislar shakllanadi. Eng muhimi, vaqt o‘tishi bilan oddiy ish joyi inson hayotining bir qismiga, korxona esa butun bir jamoaning taqdiri bilan bog‘liq qadrli maskanga aylanadi.

“Shurtan gaz kimyo majmuasi”ning chorak asrlik tarixi ham aynan shunday jarayonlar, izlanishlar, mehnat va bunyodkorlik bilan chambarchas bog‘liq. Majmuaning 25 yillik tarixiga nazar tashlar ekanmiz, bu davrni faqat sanalar, ishlab chiqarish hajmlari yoki iqtisodiy ko‘rsatkichlar bilan baholash kamlik qiladi. Chunki majmuaning har bir yutug‘i ortida inson mehnati, izlanishi, tajribasi, mas’uliyati va kelajakka bo‘lgan ishonchi mujassam. Bugun Qashqadaryo viloyatining G‘uzor tumanidagi Sho‘rtan hududini tilga olganda, ko‘z oldimizga nafaqat keng cho‘l manzarasi, balki zamonaviy texnologiyalar, murakkab ishlab chiqarish jarayonlari, ulkan muhandislik inshootlari va o‘z kasbiga sadoqat bilan mehnat qilayotgan insonlar gavdalanadi.

Bu qiyofaning shakllanishi esa chorak asrlik bunyodkorlik va taraqqiyot yo‘lining natijasidir. Bir vaqtlar cho‘l hududida barpo etilgan ushbu majmua bugun mamlakatimizning muhim sanoat korxonalaridan biriga aylangan. Bu o‘zgarishning o‘ziyoq 25 yillik taraqqiyot yo‘lining naqadar salmoqli ekanini ko‘rsatadi. Majmuaning joylashuvi ham bejiz emas. O‘zbekistonning tabiiy gaz zaxiralari mavjud bo‘lgan hududlaridan birida zamonaviy qayta ishlash korxonasining tashkil etilishi xomashyodan samarali foydalanish, uni chuqur qayta ishlash va yuqori qo‘shilgan qiymatga ega mahsulotlar ishlab chiqarish imkonini berdi. Aslida, sanoat taraqqiyotining mohiyati ham shunda: mavjud tabiiy boylikni shunchaki iste’mol qilish emas, balki uni zamonaviy texnologiyalar yordamida qayta ishlab, inson ehtiyojlari va iqtisodiyot uchun yanada katta qiymatga aylantirish. Majmua faoliyatini ana shu nuqtayi nazardan baholasak, uning mamlakat iqtisodiyotidagi o‘rni yanada yaqqol namoyon bo‘ladi.

Bugungi kunda bu taraqqiyot natijalarini, eng avvalo, majmuada yo‘lga qo‘yilgan ishlab chiqarish jarayonlari va yaratilayotgan mahsulotlar misolida ko‘rish mumkin. Tabiiy gaz qayta ishlanib, bir qator yuqori rentabelli mahsulotlar ishlab chiqarilmoqda. Polietilen, suyultirilgan gaz, yengil kondensat, oltingugurt, tozalangan tabiiy gaz va boshqa tayyor mahsulotlar — bularning har biri mamlakatimiz sanoati va iqtisodiyotining turli yo‘nalishlari bilan bog‘langan.

Majmua ishlab chiqarish koʻrsatkichlari internet manbalari orqali maʻlum. Biroq bu raqamlarga oddiy statistika sifatida qaramaslik kerak. Chunki har bir raqam ortida murakkab texnologik jarayonlar, yuzlab mutaxassislarning bilim va tajribasi, koʻplab ishlab chiqarish uchastkalari va oʻzaro bogʻlangan muhandislik tizimlari mavjud. Bir qarashda milliardlab kub metr gaz yoki yuz minglab tonna mahsulot faqat raqamdek koʻrinadi. Ammo uning ortida kecha-yu kunduz davom etadigan mehnat, nazorat, tahlil, texnik xizmat va masʻuliyat bor.

Majmuaning ishlab chiqarish ko‘rsatkichlari haqida ochiq manbalarda yetarlicha ma’lumotlar mavjud. Biroq bu ko‘rsatkichlarga shunchaki statistika sifatida qarash to‘g‘ri emas. Chunki har bir raqam zamirida murakkab texnologik jarayonlar, yuzlab mutaxassislarning bilim va tajribasi, o‘nlab ishlab chiqarish uchastkalari hamda bir-biri bilan uzviy bog‘langan muhandislik tizimlarining uzluksiz faoliyati mujassam.

Bir qarashda milliardlab kub metr gaz yoki yuz minglab tonna mahsulot oddiy raqamdek ko‘rinishi mumkin. Aslida esa bu ko‘rsatkichlar ortida kecha-yu kunduz davom etadigan mehnat, doimiy nazorat va tahlil, texnik xizmat ko‘rsatish, tezkor qarorlar hamda yuksak mas’uliyat turadi. Shu jihatdan, majmuaning har bir ishlab chiqarish natijasi nafaqat erishilgan ko‘rsatkich, balki minglab jarayonlarning uyg‘unligi va inson mehnatining aniq ifodasidir.

Bugun polietilen asosidagi mahsulotlarni qurilishda, qishloq xo‘jaligida, kommunal xo‘jalikda, sanoatda va kundalik hayotda keng uchratish mumkin. Suv va gaz quvurlaridan tortib turli idishlar, texnik buyumlar, tomchilatib sug‘orish tizimi detallari va boshqa ko‘plab mahsulotlargacha — ularning aksariyati polietilen xomashyosini qayta ishlash natijasida yaratiladi. Demak, Majmuada ishlab chiqarilgan xomashyoning qiymati korxona hududidan chiqishi bilan tugamaydi — u boshqa tarmoqlarda yangi mahsulot, yangi imkoniyat va yangi iqtisodiy qiymatga aylanadi.

Bu jihatni “Qarshitermoplast” sexi faoliyatida yanada yaqqol ko‘rish mumkin. Bu yerda polietilen quvurlar, fitinglar, kanistrlar, xo‘jalik yashiklari, alyuminiy-kompozit panellar, tomchilatib sug‘orish tizimi detallari, masterbatch bo‘yoqlari hamda turli o‘lchamdagi polietilen listlar tayyorlanadi.

Bunday ishlab chiqarishning ahamiyatini faqat mahsulot turlarining ko‘pligi bilan o‘lchab bo‘lmaydi. Uning asl mohiyati — xomashyoni imkon qadar chuqur qayta ishlash, tayyor mahsulot ulushini oshirish va yaratilayotgan iqtisodiy qiymatning katta qismini mamlakat ichida shakllantirishdir. Ya’ni tabiiy gazdan polietilenga, polietilendan tayyor mahsulotgacha bo‘lgan uzluksiz zanjir nafaqat qo‘shimcha qiymat yaratadi, balki yangi ishlab chiqarishlar, yangi ish o‘rinlari va yangi iqtisodiy imkoniyatlar uchun zamin yaratadi.

Majmuaning iqtisodiy ahamiyati haqida gap ketganda, uning ijtimoiy hayotdagi o‘rnini ham alohida ta’kidlash lozim. Chunki har qanday yirik korxona, avvalo, insonlar taqdiri bilan bog‘liq. Korxonada yaratilgan har bir ish o‘rni ortida bir inson, bir oila, ba’zan esa butun bir xonadonning kelajagi turadi. Shu ma’noda, Majmuaning hududda bandlikni ta’minlash, yangi ish o‘rinlari yaratish va aholi farovonligiga hissa qo‘shishdagi o‘rni ham uning iqtisodiy natijalari qatori muhim ahamiyat kasb etadi.

Bu katta tizimda turli kasb va mutaxassislik egalarining mehnati bir nuqtada tutashadi. Ishchilar, operatorlar, muhandislar, texnologlar, mexaniklar, energetiklar, iqtisodchilar, quruvchilar, texnik nazoratchilar, laboratoriya xodimlari, dasturchilar va boshqa ko‘plab mutaxassislar yagona maqsad yo‘lida faoliyat yuritmoqda. Ularning vazifalari va mas’uliyat doirasi turlicha bo‘lsa-da, barchasini birlashtirib turadigan maqsad bitta — Majmuaning barqaror, xavfsiz va samarali faoliyatini ta’minlash.

Zero, yirik sanoat korxonasining haqiqiy kuchi faqat uning quvvatlari yoki ishlab chiqarish hajmi bilan emas, balki ana shu jarayonlarni har kuni harakatga keltirayotgan insonlar salohiyati bilan ham belgilanadi.

Menimcha, Majmuaning 25 yillik tarixidagi eng katta boylik ham ana shu insonlardir. Chunki zamonaviy texnologiyaning o‘zi yetarli emas. Uni tushunadigan, boshqaradigan, rivojlantiradigan va takomillashtiradigan mutaxassis bo‘lmasa, texnologiya o‘z imkoniyatini to‘liq namoyon qila olmaydi. Shuning uchun Majmuaning 25 yillik taraqqiyotini texnologiyalar tarixi bilan bir qatorda, insonlarning kasbiy mahorati shakllangan davr sifatida ham baholash mumkin.

Yillar davomida korxonada shakllangan tajriba bugungi yosh mutaxassislar uchun katta maktab vazifasini bajarmoqda. Kechagi yosh xodimlar bugun tajribali mutaxassislarga aylangan. Ular, o‘z navbatida, yangi avlodga o‘z bilim va tajribalarini yetkazmoqda. Bu jarayon korxonada avlodlar davomiyligini ta’minlaydi.

Ustoz-shogird an’anasi har qanday sanoat korxonasi uchun muhim. Chunki kitobda yoki yo‘riqnomada yozilmagan ko‘plab amaliy bilimlar yillar davomida shakllangan tajriba orqali avloddan avlodga o‘tadi. Ustozning “shoshilma, avval yaxshilab tekshir”, “ishni boshlashdan oldin hammasini ko‘zdan kechir”, “buni shunday qilganing ma’qul”, degan oddiy maslahatlari yosh mutaxassis uchun keyinchalik katta kasbiy saboqqa aylanishi mumkin. Ba’zan bir og‘izgina aytilgan gap, birgina ko‘rsatma yoki ustozning ish jarayonida ko‘rsatib bergan oddiy usuli yillar davomida esda qoladi. Ana shunday kundalik saboqlar orqali kasbning nozik jihatlari, mas’uliyat hissi va ishga bo‘lgan munosabat shakllanadi. Shuning uchun 25 yillik yubiley munosabati bilan Majmua tarixida o‘z mehnati bilan iz qoldirgan faxriylarni, tajribali mutaxassislarni va bugungi jamoani alohida qadrlash lozim.** Bizda ushbu qadriyatlar rahbariyatimizning doimiy e’tibor markazida.** Zero, korxonaning tarixi faqat rasmiy hujjatlarda emas, insonlar xotirasida ham saqlanadi.

Yuqoridagi fikrlardan kelib chiqib, Majmuaning taraqqiyotini uning ishlab chiqarish obyektlari va infratuzilmasida ham ko‘rish mumkin. Yirik sanoat korxonasining barqaror ishlashi uchun ishlab chiqarish binolaridan tortib muhandislik tarmoqlarigacha bo‘lgan ulkan tizim ham doimiy ravishda rivojlanib borishi kerak. Yangi obyektlarni qurish, mavjudlarini rekonstruksiya qilish, ta’mirlash, modernizatsiyalash, ishlab chiqarish va ma’muriy infratuzilmani takomillashtirish — bularning barchasi korxona taraqqiyotining ajralmas qismidir.

Men kabi qurilish sohasida ishlaydigan mutaxassis uchun esa bu jarayonni yanada yaqinroq his qilish mumkin. Chunki har bir yangi bino yoki inshoot ortida katta maqsad bor. Bugun qog‘ozdagi loyiha bo‘lgan obyekt ertaga real infratuzilmaning bir qismiga aylanadi. Unda ishlaydigan insonlar uchun sharoit yaratiladi, ishlab chiqarish imkoniyatlari kengayadi, xavfsizlik va samaradorlik oshadi. Bir qarashda oddiygina bino yoki inshootdek ko‘ringan obyekt, aslida, korxonaning kelajakdagi imkoniyatlarini belgilaydigan muhim bo‘g‘inlardan biri bo‘lishi mumkin.

Bugungi kunda raqamlashtirish ham korxona taraqqiyotining muhim yo‘nalishlaridan biriga aylanmoqda. Ish jarayonlarini elektronlashtirish, ma’lumotlarni markazlashtirish, monitoringni avtomatlashtirish, texnik holatni raqamli nazorat qilish, xarajatlarni tahlil qilish kabi yondashuvlar ish samaradorligini oshirish bilan birga, boshqaruv qarorlarining yanada asoslangan bo‘lishini ta’minlaydi. Kelajakda raqamli texnologiyalarning sanoatdagi o‘rni yanada ortishi tabiiy.

Ammo raqamlashtirishning asosiy maqsadi texnologiyaning o‘zi emas. Uning maqsadi — inson mehnatini yengillashtirish, vaqtni tejash, xatolarni kamaytirish, ma’lumotlarni aniq va tez olish hamda to‘g‘ri qaror qabul qilish imkoniyatini oshirish. Shu jihatdan, zamonaviy texnologiyalar insonning o‘rnini egallash uchun emas, uning imkoniyatlarini kengaytirish uchun xizmat qilishi kerak.

Majmua faoliyatida sifat, ekologik xavfsizlik, mehnat xavfsizligi va energiya samaradorligiga alohida e’tibor qaratilishi ham korxonaning zamonaviy boshqaruv tamoyillariga intilayotganini ko‘rsatadi. ISO 9001, ISO 14001, ISO 45001 va ISO 50001 xalqaro standartlari talablariga asoslangan integratsiyalashgan boshqaruv tizimi aynan shu yo‘nalishlarni yagona tizimda uyg‘unlashtirishga xizmat qiladi.

Bu standartlarning har biri korxona faoliyatining muayyan jihatini qamrab oladi. Biroq ularning ahamiyati faqat alohida yo‘nalishlar bilan cheklanmaydi. Chunki sanoat korxonasida sifatni xavfsizlikdan, xavfsizlikni ekologik mas’uliyatdan, ishlab chiqarish samaradorligini esa energiya va resurslardan oqilona foydalanishdan ajratib bo‘lmaydi. Sifatli mahsulot ishlab chiqarish bilan birga, xodimlar uchun xavfsiz mehnat sharoitini yaratish, atrof-muhitga ehtiyotkorona munosabatda bo‘lish va mavjud resurslardan samarali foydalanish — bularning barchasi bir-biri bilan chambarchas bog‘liq.

Shu ma’noda, integratsiyalashgan boshqaruv tizimini faqat xalqaro standartlar talabi sifatida emas, balki Majmuaning barqaror va mas’uliyatli rivojlanishiga xizmat qiladigan yaxlit yondashuv sifatida baholash mumkin.

Shuningdek, majmuaning hududdagi ijtimoiy ahamiyatini ham alohida taʻkidlash lozim. Yirik korxona atrofida mehnat bozori, xizmat koʻrsatish sohasi, transport, qurilish va boshqa koʻplab yoʻnalishlar rivojlanadi. Korxonada ishlayotgan insonlarning oilalari, farzandlari va ularning kelajagi ham shu iqtisodiy jarayon bilan bogʻlanadi.

Shu sababli majmuaning har bir yangi ish oʻrni, har bir yangi ishlab chiqarish yoʻnalishi va har bir investitsion loyihasi faqat korxona manfaati emas, balki hudud taraqqiyoti uchun ham ahamiyatlidir.

Majmua oldida turgan vazifalar orasida xodimlarning mehnat sharoitlarini yaxshilash, ijtimoiy infratuzilmani rivojlantirish va ishchilar hamda ularning oila aʻzolari hayot sifatini yaxshilashga qaratilgan dasturlarni amalga oshirishning belgilanganligi ham bejiz emas.

Chunki zamonaviy korxona faqat ishlab chiqarish hajmi bilan emas, insonga boʻlgan munosabati bilan ham baholanadi. Inson oʻzini qadrlangan, xavfsiz va munosib sharoitda his qilsa, uning mehnatga munosabati ham boshqacha boʻladi. Shu nuqtayi nazardan mehnat sharoitlarini yaxshilashni iqtisodiy xarajat emas, balki inson kapitaliga kiritilgan investitsiya sifatida qarash mumkin.

Yana bir muhim vazifa — yuqori malakali mutaxassislarni tayyorlash. Chunki zamonaviy sanoatning kelajagi malakali kadrlarga bogʻliq. Majmuada bu borada Ilgʻor muhandislik maktabi tashkil etilgan.

Bugungi texnologiyalar bilan ishlay oladigan mutaxassis ertaga yanada murakkab texnologiyalarni oʻzlashtirishi kerak boʻladi. Shuning uchun bilim olish, malaka oshirish, yangi texnologiyalarni oʻrganish va kasbiy salohiyatni doimiy ravishda rivojlantirish har bir xodim uchun muhim vazifaga aylanmoqda.

Ayniqsa, yoshlar uchun majmua katta maktabdir. Bu yerda yosh mutaxassis nafaqat oʻz kasbini oʻrganadi, balki yirik korxonada masʻuliyat, intizom, jamoaviy mehnat va xavfsizlik madaniyatini ham oʻzlashtiradi.

Bugungi yosh xodim — ertangi ustoz.

Bugungi shogird — ertangi tajribali mutaxassis.

25 yillik tarixni yana bir muhim tushuncha — mustaqillik bilan bogʻlash mumkin. Majmuaning taraqqiyot yoʻli mamlakatimizning mustaqillik yillaridagi iqtisodiy va sanoat taraqqiyoti bilan hamohang.

Mustaqillik — faqat siyosiy tushuncha emas. U oʻz tabiiy boyliklarimizdan samarali foydalanish, oʻz sanoatimizni rivojlantirish, oʻz mutaxassislarimizni tayyorlash, yangi texnologiyalarni oʻzlashtirish va mamlakatning iqtisodiy salohiyatini oshirish imkoniyati hamdir. Majmuaning 25 yillik taraqqiyotini ana shu jarayonning bir qismi sifatida koʻrish mumkin. Mamlakatimiz mustaqil taraqqiyot yoʻlidan borar ekan, tabiiy resurslarni chuqur qayta ishlash, yuqori qoʻshilgan qiymatga ega mahsulotlar ishlab chiqarish va eksport salohiyatini oshirish kabi vazifalar tobora muhim ahamiyat kasb etmoqda. Majmuaning faoliyati ham ana shu maqsadlar bilan uygʻun.

25 yillik yubiley munosabati bilan ortga nazar tashlar ekanmiz, eng avvalo, bugungi natijalar qanday mehnat bilan yaratilganini anglash muhim. Tarixdan xulosa chiqarib, Majmuaning keyingi 25 yili qanday bo‘lishi haqida o‘ylarkanmiz, bugungi texnologiyalar bilan cheklanib qolmaslik kerak. Chunki kelajakda sanoat yanada raqamlashtiriladi va avtomatlashtiriladi, energiya samaradorligiga bo‘lgan talab oshadi, ekologik standartlar kuchayadi, yangi materiallar va yangi ishlab chiqarish texnologiyalari paydo bo‘ladi.

Bunday sharoitda Majmuaning raqobatbardoshligini saqlash va yanada rivojlantirish uchun doimiy izlanish, yangilikka intilish va o‘z ustida ishlash zarur. Kechagi yutuq bugun biz uchun faxr bo‘lishi mumkin, ammo u ertangi kun uchun kafolat emas. Ertangi natija esa bugun qilinayotgan mehnat, to‘planayotgan bilim, o‘zlashtirilayotgan yangi texnologiyalar va qabul qilinayotgan to‘g‘ri qarorlarga bog‘liq.

Shuning uchun 25 yillik yubileyni “biz hammasini amalga oshirdik” degan yakuniy nuqta sifatida emas, balki “endi yanada katta maqsadlar sari harakat qilamiz” degan yangi bosqich sifatida qabul qilish kerak.

Majmua oldida yangi vazifalar, yangi texnologiyalar, yangi mahsulotlar, yangi loyihalar va yangi imkoniyatlar turibdi. Chorak asr davomida yaratilgan tajriba esa ana shu yangi marralarni zabt etish uchun mustahkam poydevor bo‘lib xizmat qiladi.

Majmuam — 25 YOSHDA!

Bugun “Shurtan gaz kimyo majmuasi” 25 yoshda.

Ammo men uchun uning tarixi endigina boshlanganday.

Chunki har bir avlod o‘zidan keyingi avlod uchun yangi imkoniyat qoldiradi. Bugun bizgacha yetib kelgan natijalarni asrash, ularni yanada rivojlantirish va kelajak avlodga yanada taraqqiy etgan korxonani qoldirish — bugungi jamoaning eng katta vazifalaridan biridir.

Ertaga farzandlarimiz bizdan:

“Siz Majmuada ishlaganmisiz?” — deb so‘rashi mumkin.

Biz esa:

“Ha, men Majmuada ishlaganman. Uning rivojiga o‘z hissamni qo‘shganman”, — deb faxr bilan ayta olishimiz kerak.

Chunki inson uchun o‘z mehnati bilan qilgan ishidan kattaroq faxr bo‘lmasa kerak.

Majmuaning har bir binosida, har bir ishlab chiqarish sexida, har bir texnologik jarayonida, har bir mahsulotida kimningdir mehnati bor.

Ularning barchasi birlashib, bugungi “Shurtan gaz kimyo majmuasi”ni yaratgan.

Shuning uchun 25 yillik yubileyda biz faqat korxonani emas, shu korxonani bunyod etgan va rivojlantirgan insonlarni ham sharaflaymiz.

Ustozlarni eslaymiz.

Faxriylarni qadrlaymiz.

Bugungi jamoa bilan faxrlanamiz.

Yoshlarga ishonch bilan qaraymiz.

Va kelajakka umid bilan qadam tashlaymiz.

“Shurtan gaz kimyo majmuasi” — kechadan kelajak sari borayotgan korxona.

“Shurtan gaz kimyo majmuasi” — ilm, texnologiya va inson mehnati uyg‘unlashgan maskan.

“Shurtan gaz kimyo majmuasi” — mamlakat iqtisodiyotiga xizmat qilayotgan sanoat dargohi.

“Shurtan gaz kimyo majmuasi” — o‘z tarixiga ega, o‘z buguniga ega va o‘z kelajagini yaratayotgan katta jamoa.

Ammo bitta qadriyat o‘zgarmasin:

Mehnatga sadoqat, insonga hurmat va Vatan taraqqiyotiga xizmat qilish.

25 yoshing muborak bo‘lsin, aziz “Shurtan gaz kimyo majmuasi”!

Kechagi davring — tariximiz.

Bugungi faoliyating — faxrimiz.

Ertangi taraqqiyoting — umidimiz.

Yashna, Majmua!

Yuksalaver, Majmua!

Kelajak sari yanada dadil qadamlar bilan boraver!

Muallif: Raxmatov Shamsiddin Abdisalom oʻgʻli

Kapital qurilish xizmati muhandisi

Tanlov g'olibni samimiy muborakbod etamiz va ijodiy faoliyatida ulkan zafarlar tilaymiz!

"Shurtan gaz kimyo majmuasi" MCHJ Matbuot xizmati

|web-sayt|telegram |YouTube|