Toshkent davlat yuridik universiteti 2-sonli Talabalar turar joyi Axborot xizmati

Yong‘in va texnika xavfsizligi bo‘yicha profilaktik tadbir o‘tkazildi

2025-07-07T16:02:57.368Z

✅ Joriy yilning 2-iyul kuni Olmazor tumanidagi 2-sonli Talabalar turar joyida xodimlar ishtirokida yong‘in va texnika xavfsizligi bo‘yicha tushuntirish ishlari olib borildi.

📆 Tadbirda Olmazor tuman Favqulodda vaziyatlar bo‘limi (FVB) PvaNB inspektori kapitan K. Badriddinov, shuningdek Olmazor tumani Ichki ishlar organlari faoliyatini muvofiqlashtirish boshqarmasi profilaktika katta inspektori, podpolkovnik G‘anijon Sobitov va 1-sonli TTJ mudiri H. Imomnazarov faol ishtirok etdilar.

📝 Uchrashuv davomida xodimlarga yong‘in xavfsizligi qoidalariga qat’iy rioya etish, binolarni yong‘inga qarshi texnik jihozlash, avariyaviy vaziyatlarda harakatlanish tartibi yuzasidan batafsil tushuntirishlar berildi. Mutaxassislar tomonidan yong‘in sodir bo‘lganda birinchi navbatda bajarilishi lozim bo‘lgan harakatlar, o‘t o‘chirish vositalaridan to‘g‘ri foydalanish bo‘yicha amaliy ko‘rsatmalar ham o‘tkazildi.

⚡️ Shuningdek, texnika xavfsizligini ta’minlashda xodimlarning shaxsiy mas’uliyati va umumiy jamoaviy nazoratning o‘rni alohida ta’kidlandi. Tadbir davomida mavjud xavfsizlik vositalarining texnik holati ko‘rib chiqildi, ulardan to‘g‘ri foydalanish bo‘yicha zarur tavsiyalar berildi.

📊 Uchrashuv yakunida xodimlar o‘zlarini qiziqtirgan savollarga javob olishdi va yong‘in xavfsizligini ta’minlash bo‘yicha amaliy ko‘nikmalarini mustahkamlashdi. Bunday tushuntirish ishlari muntazam ravishda olib borilib, Talabalar turar joyida xavfsiz va osoyishta muhitni ta’minlashga xizmat qiladi.

2-SONLI TALABALAR TURAR JOYIDA “JAHON ASALARILAR KUNI” MUNOSABATI BILAN INSHOLAR TANLOVI O‘TKAZILDI

2025-05-22T23:08:38.209Z

📆 Joriy yilning 20-may kuni Toshkent davlat yuridik universiteti 2-sonli Talabalar turar joyida O‘zbekiston Respublikasi Prezidentining “Ekologiya, atrof-muhitni muhofaza qilish va iqlim o‘zgarishi vazirligi faoliyatini samarali tashkil etish chora-tadbirlari to‘g‘risida”gi qarorini ijro etish doirasida, “Jahon asalarilar kuni” munosabati bilan “Asalarilarsiz hayot tasavvur qilinishi mumkinmi?” mavzusida insholar tanlovi tashkil etildi.

🐝 Mazkur tanlov tabiat muhofazasi, biologik xilma-xillikni asrash va ekologik ongni yuksaltirishga qaratilgan muhim tashabbuslardan biri sifatida o‘tkazildi. Unda talabalar asalarilarning ekologik tizimdagi beqiyos o‘rni, insoniyat hayoti va oziq-ovqat xavfsizligi bilan bog‘liq jihatlar haqida o‘z qarashlarini bayon etdilar.

📝 Tanlovda taqdim etilgan insholar Talabalar kengashi raisi S. Sayfiddinov hamda tarbiyachi pedagog G. Xakimova tomonidan shaffoflik tamoyili asosida baholab chiqildi.

📊 Natijalarga ko‘ra quyidagi talabalar faxrli o‘rinlarni egallashdi:

🥇 1-o‘rinni – Yerxo‘jayeva Asemgul;
🥈 2-o‘rinni – Murodova Marjona;
🥉 3-o‘rinni – G‘aniyeva Rayxona.

📚 Tanlov ishtirokchilari o‘z asarlarida ekologik barqarorlik, tabiatga mehr va mas’uliyat, asalarilarning insoniyat hayotidagi roli kabi mavzularni chuqur yoritib berdilar.

🪴 Mazkur tadbir yoshlar orasida ekologik tarbiyani mustahkamlash, tabiatni asrashga bo‘lgan ongni shakllantirish yo‘lida yana bir muhim qadamlardan biri bo‘ldi.

JINOYATCHILIK VA GIYOHVANDLIKKA QARSHI: TALABALAR BILAN OCHIQ MULOQOT

2025-05-21T07:57:30.732Z

📆 Joriy yilning 20-may kuni Toshkent davlat yuridik universiteti huzuridagi 2-sonli Talabalar turar joyida talabalarning huquqiy ongi va madaniyatini oshirish, jinoyatchilik va giyohvandlik kabi salbiy illatlarning oldini olish maqsadida navbatdagi profilaktik tadbir bo‘lib o‘tdi.

📝 Mazkur tadbirda Xalqaro huquq va qiyosiy huquqshunoslik fakulteti Yoshlar masalalari va ma’naviy-ma’rifiy ishlar bo‘yicha dekan o‘rinbosari Bobodo‘stov Shahriddin Muxammadiyevich, fakultet tyutori Abdurazzakov Ixtiyor Kuvandikovich, shuningdek, Olmazor tumani Ichki ishlar organlari faoliyatini muvofiqlashtirish boshqarmasi profilaktika katta inspektori, podpolkovnik G'anijon Sobitov ishtirok etdi.

👮‍♂️ Tadbir davomida talabalar bilan jinoyatlarning sabablari, oqibatlari va ularni bartaraf etish yo‘llari xususida ochiq va samimiy muloqot o‘tkazildi. Podpolkovnik G‘. Sobitov jinoyat sodir etilishiga olib keladigan asosiy omillar, yoshlar orasida uchrayotgan huquqbuzarlik holatlari va ayniqsa giyohvand moddalar ta’sirida sodir bo‘layotgan jinoyatlar haqida aniq faktlar asosida ma’lumot berdi. U o‘z nutqida ta’kidladi:

“Yoshlarning o‘z hayoti uchun javobgarlikni his etishi – jinoyatlarning oldini olishdagi eng muhim omillardandir. Talaba yoshlar nafaqat o‘z kelajagi, balki jamiyat xavfsizligi uchun ham mas’uldir.”

📚 Shuningdek, Bobodo‘stov Shahriddin Muxammadiyevich jinoyatchilikka qarshi kurashda huquqiy savodxonlikning o‘rni, ota-ona nazorati va universitet jamoatchiligining roli haqida so‘z yuritdi. U talabalarga universitet ichki tartib-qoidalariga qat’iy amal qilish zarurligini eslatib, har bir yosh o‘zining kelajagini ongli ravishda barpo etishi kerakligini alohida ta’kidladi.

📊 Tadbir yakunida talabalar o‘zlarini qiziqtirgan savollar bilan murojaat qilishdi. Ular jinoyat va ma’muriy javobgarlik, giyohvand moddalarning huquqiy taqiqlari, internet orqali tarqatilayotgan noqonuniy axborotlar bilan bog‘liq masalalarda huquqiy tushunchalarga ega bo‘lishdi.

🤝 Bunday uchrashuvlar nafaqat huquqiy ongni yuksaltiradi, balki yoshlarni hayotda to‘g‘ri yo‘l tanlashga undaydi. Talabalar tadbir yakunida bunday ochiq muloqotlar tez-tez o‘tkazilishini istaganliklarini bildirgan holda, tashkilotchilarga minnatdorchilik izhor etishdi.

YASHIL KELAJAK SARI QADAM: UNIVERSITET YOSHLARI EKOLOGIK TASHABBUSDA

2025-05-19T21:21:25.571Z

📆 Xabaringiz bor, “Yashil makon” umummilliy harakati doirasida ekologik muhitni yaxshilash va aholining tabiatga bo‘lgan mehrini oshirish maqsadida respublika miqyosida keng ko‘lamli daraxt ekish ishlari olib borilmoqda. Ushbu tashabbusdan Toshkent davlat yuridik universiteti jamoasi ham chetda qolmay, o‘zining amaliy ishtirokini ko‘rsatib kelmoqda.

🍀 Avvalroq universitet jamoasi tomonidan Toshkent viloyati Bo‘stonliq tumani G‘azalkent massividagi bo‘sh turgan yerlarga 2000 tupdan ortiq mevali daraxt ko‘chatlari ekilgan edi. Ushbu ekish ishlari nafaqat hududning ekologik holatini yaxshilash, balki kelajak avlodlar uchun toza va sog‘lom muhit yaratish yo‘lidagi muhim qadamlardan biri bo‘ldi.

🌱 Bugun esa mazkur ko‘chatlarga g‘amxo‘rlik ko‘rsatilib, ular universitet talabalari tashabbusi bilan sug‘orildi. Mazkur amaliy tadbirda 1 va 2-sonli Talabalar turar joyida istiqomat qiluvchi Talabalar kengashi a’zolari va faol talabalar faol ishtirok etishdi.

🌿 Ular birgalikda daraxtlarni parvarishlab, har bir ko‘chatga hayot suvi bo‘lgan suvni yetkazishdi. Bu esa nafaqat ekilgan daraxtlarning yashovchanligini ta'minlash, balki talabalar orasida ekologik madaniyatni shakllantirish borasida muhim ahamiyat kasb etadi.

🤝 Tadbir yakunida barcha ishtirokchilarga universitet ma’muriyati tomonidan chuqur minnatdorchilik bildirildi. Bu kabi amaliy tashabbuslar talabalarning ijtimoiy faolligini oshirish bilan birga, ularni vatanparvarlik, tabiatga mehr-oqibat va mas’uliyat ruhida tarbiyalashga xizmat qilmoqda.

JISMONIY TAYYORGARLIK – JAMOANING FAXRI: “QALQON” GURUHI KUCH SINOVIDA

2025-05-14T21:41:11.636Z

Sayfullo Sayfiddinov tomonidan tayyorlandi

✅ Yoshlarning jismoniy faolligini oshirish, sog‘lom turmush tarzini targ‘ib etish va jamoada birdamlikni mustahkamlash maqsadida “Qalqon” jamoatchilik guruhi a’zolari o‘rtasida kuch sinashuv musobaqasi tashkil etildi. Tadbir 2-sonli Talabalar kengashi raisi S.Sayfiddinov (https://t.me/SayfulloSayfiddinov) boshchiligida o‘tkazildi.

📊 Musobaqa uchta asosiy yo‘nalishda bo‘lib o‘tdi: turnikda tortilish, brusda mashq bajarish va tosh ko‘tarish. Har bir yo‘nalishda ishtirokchilar o‘z kuch-g‘ayratini, matonatini va irodasini sinovdan o‘tkazdi.

📝 Natijalarga ko‘ra:

⏺Turnikda tortilish bo‘yicha Sharifov Ozodbek eng yaxshi natija bilan g‘oliblikni qo‘lga kiritdi.
⏺Brus olish bahslarida esa Ilhomjonov Muhammadqodir o‘z raqiblaridan ustun keldi.
⏺Tosh ko‘tarish musobaqasida kuch va bardoshda hech kimga imkon qoldirmagan Samadov Behruz birinchi o‘rinni egalladi.

⚡️ Tadbir yuqori ruhda o‘tdi va ishtirokchilarning sportga bo‘lgan qiziqishini yanada oshirdi. “Qalqon” guruhi a’zolari ushbu bellashuv orqali nafaqat jismoniy salohiyatini sinab ko‘rishdi, balki bir-birlariga bo‘lgan ishonch va jamoaviy birdamlikni ham mustahkamlashdi.

“Fuqarolik kodeksi loyihasi” mavzusida navbatdagi ilmiy-amaliy uchrashuv tashkil etildi.

2025-05-14T19:40:27.241Z

Sayfullo Sayfiddinov tomonidan tayyorlandi

📆 Joriy yilning 8-may kuni Toshkent davlat yuridik universitetining 2-sonli Talabalar turar joyida “Fuqarolik kodeksi loyihasi” mavzusida navbatdagi ilmiy-amaliy uchrashuv tashkil etildi.

📚 Tadbir fuqarolik huquqi sohasida olib borilayotgan islohotlar mazmuni, yangi tahrirdagi kodeks loyihasi mohiyatini talabalarga yetkazish maqsadida o‘tkazildi.

📝 Uchrashuvda Fuqarolik huquqi kafedrasi o‘qituvchilari — Daminov Husniddin va Xodjiyev Yunus ishtirok etib, loyihaning asosiy yangiliklari, zamonaviy yondashuvlar va xalqaro tajriba asosida ishlab chiqilgan normalar haqida atroflicha ma’lumot berdilar.

🎓 Tadbir davomida talabalar amaldagi kodeks bilan loyihadagi asosiy farqlar, shuningdek, shaxslar o‘rtasidagi mulkiy va shaxsiy nomulkiy munosabatlarning tartibga solinishi bo‘yicha o‘zlarini qiziqtirgan savollarga javob olish imkoniga ega bo‘ldilar. Ayniqsa, mulk huquqi, shartnomaviy majburiyatlar, shaxsiy huquqlar kabi masalalarda interaktiv muhokamalar bo‘lib o‘tdi.

⚡️ Uchrashuv talabalarning nazariy bilimlarini mustahkamlash, yurtimizda olib borilayotgan huquqiy islohotlarga nisbatan huquqiy ong va faollikni oshirishda muhim ahamiyat kasb etdi.

15-MAY - XALQARO OILA KUNI MUNOSABATI BILAN "OILAGA SHARQONA SADOQAT" MAVZUSIDA MA'NAVIY-MA'RIFIY TADBIR O‘TKAZILDI

2025-05-13T18:24:37.515Z

📆 15-may – Xalqaro oila kuni munosabati bilan Toshkent davlat yuridik universitetining 1 va 2-sonli talabalar turar joyida "Oilaga sharqona sadoqat" mavzusida ma'naviy-ma'rifiy tadbir o'tkazildi. Tadbirning asosiy maqsadi talabalar o'rtasida oilaviy qadriyatlar, farovon oilaning jamiyatdagi o'rni va ahamiyatini keng targ'ib qilish edi.

📝 Tadbirda Jinoiy odil sudlov fakulteti dekan maslahatchisi Qodirova Mohigul , Ma'naviyat va ma'rifat markazi xodimi Radjapova Maftuna hamda tarbiyachi-pedagog Xakimova Gulnoza qatnashdilar va talabalarga mavzuga oid qimmatli maslahatlar berdilar.

🎭 Tadbir davomida talabalar tomonidan sahnalashtirilgan sovchilik va yoshlarning oilaviy hayotidan sahna ko'rinishlari namoyish etildi. Sahna ko'rinishlari orqali yoshlarga oilaviy hayotdagi tushunmovchiliklarni qanday hal qilish mumkinligi, farovon va baxtli oilaning siri haqida qiziqarli tarzda tushuntirildi.

⚡️ Tadbir qatnashchilari tomonidan talabalar bilan interfaol suhbatlar olib borilib, ular oilaviy qadriyatlar, nikoh va oilaviy masalalarga oid fikrlarini ochiq-oydin bildirdilar. Tadbirning qiziqarli o'tgani talabalar tomonidan alohida e'tirof etildi.

🤝 Mazkur tadbir universitetda oilaviy qadriyatlarni yoshlar orasida mustahkamlash, ularning oilaviy hayotga mas'uliyat bilan yondashishiga ko'maklashish borasidagi ishlarni samarali davom ettirishning muhim bosqichi bo‘ldi.

QIZLAR O‘RTASIDA MINI-FUTBOL: DO‘STLIK VA SPORT RUHINI BIRLASHTIRGAN O‘RTOQLIK UCHRASHUVI

2025-05-09T19:51:57.055Z

Sayfullo Sayfiddinov tomonidan tayyorlandi

⚡️ Toshkent davlat yuridik universitetining 2-sonli Talabalar turar joyida “Talabalar kengashi” tashabbusi bilan sport va sog‘lom turmush tarzini targ‘ib qilish, shuningdek, talaba-qizlar o‘rtasida do‘stlik va jamoaviylik ruhini mustahkamlash maqsadida mini-futbol bo‘yicha o‘rtoqlik uchrashuvi tashkil etildi.

⚽️ Uchrashuvda “Ovsinlar” va “Dugonalar” nomli jamoalar maydonga tushdi. O‘yin qizg‘in va murosasiz kurashlarga boy tarzda kechdi. Har ikkala jamoa bir-biriga munosib raqib bo‘lib, ko‘plab texnik harakatlar va jamoaviy o‘yin namoyon etildi.

📊 Asosiy o‘yin vaqti 4:4 hisobida yakunlandi, bu esa jamoalar o‘rtasidagi kuchlar tengligini yaqqol ko‘rsatdi. Penaltilar seriyasi ham murosasiz kechib, yana durang natija qayd etildi.

🏆 Yakunda hakamlar qaroriga ko‘ra, bu uchrashuvda eng muhim g‘alaba – do‘stlik bo‘ldi. Ishtirokchilar va tomoshabinlar o‘yindan katta zavq olishdi, sport orqali bir-birlariga yaqinlashishdi va sog‘lom raqobat muhitida vaqtni mazmunli o‘tkazishdi.

🤝 Mazkur uchrashuv talabalar turar joyidagi sport hayotini jonlantirishga, ayniqsa, qizlar o‘rtasida faol va sog‘lom turmush tarzini targ‘ib qilishga xizmat qildi.

“PLOGGING” AKSIYASI: TOZALIK, SOG‘LOM HAYOT VA JAMOAVIYLIK UYG‘UNLIGI

2025-05-04T21:23:46.766Z

📆 2025-yilning 29-aprel, seshanba kuni Toshkent davlat yuridik universiteti 2-sonli Talabalar turar joyida atrof-muhitni muhofaza qilish, sog‘lom turmush tarzini targ‘ib qilish hamda jamoaviy birdamlikni mustahkamlash maqsadida “Plogging” aksiyasi tashkil etildi. Ushbu tashabbus jamiyatda ekologik ongni rivojlantirish va yoshlar orasida mas’uliyat hissini oshirish yo‘lida yana bir muhim qadamlardan biri bo‘ldi.

☘️ Aksiya doirasida “Tabiat Posbonlari”, “Eko yulduzlar” va “Yashil gvardiya” nomli jamoalar shakllantirildi. Har bir jamoa talaba-yoshlar va xodimlardan iborat bo‘lib, ular belgilangan yo‘nalishlar bo‘ylab yugurish davomida chiqindilarni yig‘ish, saralash va ekologik tozalikka hissa qo‘shishdi.

⚡️ Aksiya nafaqat jismoniy faollik, balki jamoaviylik, muomala madaniyati va tabiatga nisbatan mas’uliyatni oshirish bilan yodda qoldi. Ishtirokchilar o‘zaro bahsli va do‘stona muhitda bellashdilar, bir-birlarini rag‘batlantirishdi va har bir topilgan chiqindini o‘z g‘alabasi deb bildilar.

📊 Tadbir yakunida jamoalarning ishtiroki va ekologik faolligi hakamlar hay’ati tomonidan baholanib, quyidagi natijalar e’lon qilindi:

🥇 1-o‘rin – Tabiat Posbonlari
🥈 2-o‘rin – Yashil gvardiya
🥉 3-o‘rin – Eko yulduzlar

🏆 G‘olib va faol ishtirokchilar esdalik sovg‘alari va faxriy yorliqlar bilan taqdirlandi.

❗️ “Plogging” tashabbusi TTJda muntazam davom ettiriladigan an’anaviy tadbirlar qatoriga kiritilishi rejalashtirilmoqda.

"SIZNING FIKRINGIZ MUHIM": 2-SONLI TALABALAR TURAR JOYIDA OCHIQ QABUL O‘TKAZILDI

2025-04-30T15:40:57.432Z

Sayfullo Sayfiddinov tomonidan tayyorlandi

✅ Toshkent davlat yuridik universiteti huzuridagi 2-sonli talabalar turar joyida "Talabalar kengashi" tashabbusi bilan navbatdagi ochiq qabul bo‘lib o‘tdi. “Sizning fikringiz muhim” shiori ostida tashkil etilgan mazkur uchrashuvda talabalar bilan ochiq va samimiy muloqot qilindi.

📝 Tadbirning asosiy maqsadi — talabalar yashash sharoitlarini o‘rganish, mavjud muammolar va takliflarni eshitish, shuningdek, talabalar va mas’ullar o‘rtasida ochiq muloqotni yo‘lga qo‘yishdan iborat bo‘ldi.

📬 Ochiq qabul davomida talabalar o‘zlarini qiziqtirgan savollar, takliflar va muammolar bilan murojaat qilishdi.

⚡️ Talabalar kengashi vakillari har bir murojaatni sinchkovlik bilan tinglab, amaliy yechimlar ishlab chiqishga va tegishli tashkilotlarga murojaat qilishga va’da berishdi. Qolaversa, ayrim masalalarga joyida yechim topildi, bu esa talabalar orasida ijobiy taassurot qoldirdi.

❗️Ushbu ochiq qabul Talabalar kengashining faoliyati faqat tashkiliy emas, balki talabalarning haqiqiy manfaatlarini himoya qilishga qaratilganini yana bir bor ko‘rsatdi.

🤝 Tadbir yakunida bunday ochiq muloqotlar muntazam tashkil etilishini va talabalar bilan fikr almashish doimo ustuvor yo‘nalishlardan biri bo‘lib qolishini ta’kidlandi.