Bexruz Ibragimovich

Vasiyatnomaning shakliga doir umumiy qoidalar

2023-02-22T05:59:00.486Z

O’zbekiston Respublikasi Fuqarolik Kodeksining 1124-moddasida, vasiyatnoma yozilgan joyi va vaqti ko‘rsatilgan holda yozma shaklda tuzilishi lozimligi belgilangan va vasiyatnomaning shakliga doir umumiy qoidalar belgilab berilgan.

Quyidagi vasiyatnomalar yozma shaklda tuzilgan hisoblanadi:

- notarial tasdiqlangan vasiyatnomalar;

- notarial tasdiqlangan vasiyatnomalarga tenglashtirilgan vasiyatnomalar;

Yozma shakldagi vasiyatnoma vasiyat qiluvchining o‘z qo‘li bilan imzolanishi lozim.

Agar vasiyat qiluvchi jismoniy nuqsonlari, kasalligi yoki savodsizligi tufayli vasiyatnomani o‘z qo‘li bilan imzolay olmasa, uning iltimosiga binoan notarius yoki qonunga muvofiq vasiyatnomani tasdiqlaydigan boshqa shaxs hozir bo‘lganida vasiyat qiluvchi o‘z qo‘li bilan imzolay olmaganligining sabablari ko‘rsatilgan holda vasiyatnomaga boshqa shaxs imzo qo‘yishi mumkin.

Quyidagilar vasiyat qiluvchining o‘rniga vasiyatnomani imzolashi mumkin emas:

- notarius yoki vasiyatnomani tasdiqlovchi boshqa shaxs;

- vasiyatnoma kimning foydasiga tuzilgan yoki kimga nisbatan vasiyat majburiyati yuklatilgan bo‘lsa, o‘sha shaxs, uning eri (xotini), bolalari, ota-onasi, nevaralari va chevaralari, shuningdek vasiyat qiluvchining qonun bo‘yicha merosxo‘rlari;

- to‘liq muomala layoqatiga ega bo‘lmagan fuqarolar; savodsizlar va vasiyatnomani o‘qiy olmaydigan boshqa shaxslar; yolg‘on guvohlik berganlik uchun muqaddam sudlangan shaxslar.

Muallif: Termiz shahar adliya bo‘limi

Yuridik xizmat ko‘rsatish markazi

bosh yuriskonsulti: B.Sharipov.

Kimlarga farzandlikka olishga ruxsat berilmaydi?

2023-01-16T06:05:11.223Z

O’zbekiston Respublikasi Vazirlar Mahkamasining 2020-yilda 21-noyabrdagi 739-son Qarorida, voyaga yetgan erkak yoki ayol fuqarolar farzandlikka oluvchilar bo‘lishi mumkinligi, ammo quyidagi shaxslar bundan mustasno ekanligi belgilangan:

- ota-onalik huquqidan mahrum qilingan yoki ota-onalik huquqi cheklanganlar;

- qonun bilan belgilangan tartibda muomalaga layoqatsiz yoki muomala layoqati cheklangan deb topilganlar;

- asab kasalliklari yoki narkologiya muassasalarida ro‘yxatda turuvchilar;

- qasddan sodir qilgan jinoyatlari uchun ilgari hukm qilinganlar;

- farzandlikka olganligi bekor qilingan sobiq farzandlikka oluvchilar;

- farzandlikka oluvchilar va farzandlikka olinuvchilar yoshidagi farq o‘n

besh yoshdan kam bo‘lmasligi shart, bundan o‘gay ota va o‘gay ona yoxud farzandlikka olinuvchining yaqin qarindoshlari tomonidan farzandlikka olish hollari mustasno.

Termiz shahar adliya bo'limi YXKM xodimlari tomonidan seminar tashkil etildi!

2022-12-14T05:17:05.826Z

Joriy yilning 13-dekabr kuni Termiz shahar adliya bo'limi Yuridik xizmat ko'rsatish markazi xodimlari tomonidan O'zbekiston Respublikasi Prezidentining 2022-yil 18-martdagi PQ 173-sonli "Yuridik xizmat ko'rsatish markazlari faoliyatini yanada kengaytirish bo'yicha qo'shimcha-chora tadbirlar to'g'risida"gi Qarorining ijrosini ta’minlash va Surxondaryo viloyat adliya boshqarmasining 2022-yil 2-dekabrdagi 1-248/8 ko’rsatmasiga asosan, 2022-yil 1-avgustdan yuridik xizmat ko'rsatilib kelinayotgan tashkilot rahbarlari va mas’ul xodimlari ishtirokida shahardagi 26-umum ta’lim maktabining majlislar zalida seminar tashkil etildi.

Seminarda Yuridik xizmat ko’rsatish markazining taklifi bilan, shahar Aholi bandligiga ko’maklashish markazi va “Madad” nodavlat notijorat tashkilotidan ham vakillar ishtirok etishdi.

Seminar tashkilotchilari tomonidan, qatnashchilarga o’tgan davr mobaynida “E-huquqshunos” tizimi orqali hujjat loyihlarini jo’natishda yo’l qo’yilgan tizimli kamchiliklar bilan bir qatorda ularning mehnat va sohaviy qonunchilik bilim-ko’nikmalarini yanada oshirish maqsadida tushuntirishlar berildi. Jumladan, O'zbekiston Respublikasi Vazirlar Mahkamasining 2005-yil 21-dekbardagi 275-sonli "Xalq ta’limi xodimlari mehnatiga haq to‘lashning takomillashtirilgan tizimini tasdiqlash to‘g‘risida"gi, 2018-yil 28-martdagi 244-sonli "Bolalarni davlat maktabgacha ta’lim tashkilotlariga qabul qilish bo‘yicha davlat xizmatlari ko‘rsatishning ma’muriy reglamentini tasdiqlash to‘g‘risida"gi, 2022-yil 2-avgustdagi 425-sonli "Xalq ta’limi vaziri jamg‘armasi faoliyatini tashkil etish chora-tadbirlari to‘g‘risida"gi qarorlari yuzasidan ma'lumotlar berib o'tildi.

Seminarga taklif etilgan Aholi bandligiga ko'maklashish markazi xodimi M.Abdulvahobov tomonidan tashkilot xodimlariga, mehnat qonunchiligi yuzasidan ish beruvchi va xodimlarning huquq-majburiyatlari doirasida yuzaga kelayotgan muammoli holatlar ularni oldini olish choralari va ijtimoiy ta'tillar bo'yicha o'z fikr va mulohazalarini bildirib o'tdi.

Bundan tashqari hozirgi ilg'or raqamlashtirish va elektronlantirish jarayonlarining davomi sifatida ishlab chiqilgan Mobile-ID (tizimlariga kirishda shaxsni identifikatsiyalash va tasdiqlashning yangi moduli) tizimi va uning qulayliklari bo'yicha ham to'xtalib o'tildi. Ushbu modul yordamida fuqarolar doimo yonida olib yuruvchi mobil telefon raqami orqali ro‘yxatdan o‘tib, barcha davlat xizmatlaridan elektron raqamli imzosiz foydalanishi mumkinligi bo'yicha qo'shimcha tushuntirish berildi.

Seminar yakuni qizg'in savol va javoblar tarzida bo'lib o'tdi. Qatnashchilarni qiziqtirgan mehnat va qonunchilikning boshqa sohalari bo'yicha bergan savollariga YXKM va ABKM xodimlari tomonidan atroflicha javoblar berildi.

Termiz shahar adliya bo‘limi

yuridik xizmat ko‘rsatish markazi

bosh yuriskonsulti B.Sharipov.

Termiz shahar adliya bo'limi YXKM va ABKM xodimlari hamkorligida targ'ibot tadbiri o'tkazildi!

2022-10-10T04:30:22.867Z

Joriy yilning 7-oktyabr kuni Termiz shahar adliya bo'limi Yuridik xizmat ko'rsatish markazi xodimlari tomonidan O'zbekiston Respublikasi Prezidentining 2022-yil 18-martdagi PQ 173-sonli "Yuridik xizmat ko'rsatish markazlari faoliyatini yanada kengaytirish bo'yicha qo'shimcha-chora tadbirlar to'g'risida"gi Qaroriga asosan xizmat ko'rsatilib kelinayotgan shahardagi barcha Davlat maktabgacha ta'lim tashkilotlari direktorlari va tizim ma'sullariga huquqiy targ'ibot tadbiri o'tkazildi.

Targ'ibot seminar tarzida tashkil etilib, qatnashchilariga tizim orqali hujjat jo'natishlar bo'yicha yana bir bor batafsil tushuntirishlar berildi, bundan tashqari DMTT direktorlariga mehnat qonunchiligi bo'yicha nazariy tushuntirishlar berildi, jumladan ish beruvchi va xodimning huquq va majburiyatlari, ariza va buyruqlarni rasmiylashtirish tartibi, tashkilotlar tomonidan yo'l qo'yilayotgan kamchiliklarni bartaraf etish bo'yicha tushuntirishlar berildi.

Bundan tashqari seminarda shahar Aholi bandligiga ko'maklashish markazi hamda "Madad" huquqiy maslahat byurosi vakilllari ishtirok etib o'z fikrlarini bildirib o'tishdi.

Yig'ilish seminari qizg'in savol va javoblar tarzida bo'lib o'tdi. Qatnashchilarni qiziqtirgan mehnat va qonunchilikning boshqa sohalari bo'yicha bergan savollariga markaz xodimlari tomonidan atroflicha javoblar berildi.

Yer fondi toifalarini bilasiz-mi?

2022-09-30T03:49:30.364Z

O‘zbekiston Respublikasida yer fondi yerlardan foydalanishning belgilangan asosiy maqsadiga ko‘ra quyidagi toifalarga bo‘linadi:

1) qishloq xo‘jaligiga mo‘ljallangan yerlar — qishloq xo‘jaligi ehtiyojlari uchun berilgan yoki ana shu maqsadga mo‘ljallangan yerlar. Qishloq xo‘jaligiga mo‘ljallangan yerlar sug‘oriladigan va sug‘orilmaydigan (lalmikor) yerlar, haydaladigan yerlar, pichanzorlar, yaylovlar, ko‘p yillik mevali dov-daraxtlar va tokzorlar egallagan yerlarga bo‘linadi;

2) aholi punktlarining (shaharlar, posyolkalar va qishloq aholi punktlarining) yerlari — shaharlar va posyolkalar, shuningdek qishloq aholi punktlari chegarasi doirasidagi yerlar

3) sanoat, transport, aloqa, mudofaa va boshqa maqsadlarga mo‘ljallangan yerlar — ko‘rsatilgan maqsadlarda foydalanish uchun yuridik shaxslarga berilgan yerlar;

4) tabiatni muhofaza qilish, sog‘lomlashtirish va rekreatsiya maqsadlariga mo‘ljallangan yerlar — muhofaza etiladigan tabiiy hududlar egallagan, ustuvor ekologik, ilmiy, madaniy, estetik, rekreatsiya va sanitariya-sog‘lomlashtirish ahamiyatiga molik yerlar;

5) tarixiy-madaniy ahamiyatga molik yerlar — moddiy madaniy meros ob’ektlari joylashgan yerlar;

6) o‘rmon fondi yerlari — o‘rmon bilan qoplangan, shuningdek o‘rmon bilan qoplanmagan bo‘lsa ham, o‘rmon xo‘jaligi ehtiyojlari uchun berilgan yerlar;

7) suv fondi yerlari — suv ob’ektlari, suv xo‘jaligi inshootlari egallagan yerlar va suv ob’ektlarining qirg‘oqlari bo‘ylab ajratilgan mintaqadagi yerlar;

8) zaxira yerlar.

Termiz shahar adliya bo‘limi

yuridik xizmat ko‘rsatish markazi

bosh yuriskonsulti B.Sharipov.

Ixtisoslashtirilgan ta’lim muassasalarida o‘quv-tarbiya jarayonini tashkil etish tartibi.

2022-09-21T05:59:08.426Z

O‘zbekiston Respublikasi Vazirlar Mahkamasining, 2021 yil 12 oktabrdagi 638-sonli “Alohida ta’lim ehtiyojlari bo‘lgan bolalarga ta’lim berishga oid normativ-huquqiy hujjatlarni tasdiqlash to‘g‘risida”gi Qaroriga ko‘ra Jismoniy yoki psixik rivojlanishida nuqsoni bo‘lgan bolalarning ta’lim olishi quyidagi tamoyillar asosida amalga oshiriladi:

- ta’lim-tarbiyaning nuqsonlarni tuzatish (korreksiya)ga yo‘naltirilganligi;

- ta’lim va tarbiya jarayonida tashxisning qo‘yilishiga maxsus yondashuv;

- o‘quv-tarbiya jarayonini tashkil etishda tabaqalashtirilgan yondashuvni amalga oshirish.

Ixtisoslashtirilgan ta’lim muassasasida o‘qitish va tarbiyalash jarayoni o‘quvchilarning alohida xususiyatlarini hisobga olgan holda tashkil etiladi. O‘quvchilarning bilimlari ulardagi nuqsonlarning o‘ziga xosligini hisobga olgan holda belgilangan tartibda baholanadi.

Ta’lim-tarbiya jarayoni davlat ta’lim standartlariga muvofiq vazirlik tomonidan belgilangan tartibda, o‘quv rejalari va dasturlari asosida, maxsus korreksion tuzatish usullaridan foydalanilgan holda olib boriladi.

O‘qish hamda ixtiyoriy ravishda ijtimoiy foydali mehnat va dam olish ko‘zda tutiladigan kun tartibi bolalarning ixtisoslashtirilgan ta’lim muassasasida yashashini hisobga olgan holda tashkil etiladi.

Nuqsonlarni tuzatish (korreksiya) ta’lim jarayonidagi barcha darslarda, sinfdan tashqari va boshqa tadbirlarda amalga oshiriladi.

O‘quv xonalari zarur maxsus jihozlar bilan ta’minlanadi.

Ixtisoslashtirilgan ta’lim muassasasida rivojlanishdagi nuqsonlarni bartaraf etish maqsadida butun guruh bilan va yakka tartibda mashg‘ulotlar olib boriladi.

Ixtisoslashtirilgan ta’lim muassasalarida rivojlanishida murakkab nuqsonli (2 ta va undan ko‘p nuqsoni bor bo‘lgan) bolalar uchun maxsus tuzatuvchi (korreksion) guruhlar (sinflar) ochilishi mumkin.

Ushbu guruhlarga ta’lim oluvchilar psixologik-tibbiy-pedagogik komissiyaning xulosasi va bolaning ota-onasi yoki ularning o‘rnini bosuvchi shaxslar roziligi bilan joylashtiriladi.

Termiz shahar adliya bo‘limi

yuridik xizmat ko‘rsatish markazi

bosh yuriskonsulti B.Sharipov.

Aholiga birlamchi tibbiy-sanitariya xizmatini ko’rsatish sifati oshiriladi!

2022-09-15T03:51:40.687Z

Davlat rahbarimiz tomonidan 2022-yil 25-aprel kuni “Birlamchi tibbiy-sanitariya yordamini aholiga yaqinlashtirish va tibbiy xizmatlar samaradorligini oshirish bo‘yicha qo‘shimcha chora-tadbirlar to‘g‘risida”gi PQ-215-sonli Qarori imzolangan.

Qarorga muvofiq tibbiyot sohasida:

- 2022 yilda 136 ta yangi oilaviy shifokor punktlari va oilaviy poliklinikalar hamda 2023 yilda yana 140 ta yangi oilaviy shifokor punktlari va oilaviy poliklinikalar faoliyatini yo‘lga qo‘yish choralarini ko‘rish;

- Olis va chekka hududlardagi davolash-profilaktika muassasalarida shifokorlarga bo‘lgan ehtiyojni mahallalar kesimida aniqlash, bo‘sh shifokor ish o‘rinlari ro‘yxatini shakllantirish va muntazam yangilab borish.

- Tibbiyot brigadasi» tomonidan xonadonlarda salomatlik holatini o‘rganish va kasalliklarning xavf omillaridan kelib chiqib, tegishli maslahat va tavsiyalar berishni yo‘lga qo‘yish, brigadalarni targ‘ibot materiallari bilan ta’minlash.

- Bemorlarni kunduzgi shifoxona va uy shifoxona sharoitida davolashning yangilangan mezonlari va tartibini ishlab chiqish va amaliyotga joriy etish

- Birlamchi tibbiy-sanitariya yordami muassasalari, tuman (shahar) markaziy shifoxonalari faoliyatini belgilovchi idoraviy normativ-huquqiy hujjatlarni qayta ko‘rib chiqish va tizimlashtirish.

- Birlamchi tibbiy-sanitariya yordami muassasalarini tibbiy jihozlar bilan ta’minlash me’yorlarini qayta ko‘rib chiqish va tasdiqlash.

- Qoraqalpog‘iston Respublikasi Sog‘liqni saqlash vazirligi, viloyatlar va Toshkent shahar sog‘liqni saqlash boshqarmalari qoshida muntazam faoliyat yurituvchi call-markaz tashkil etish belgilangan.

Veterinariya va chorvachilikni rivojlantirish sohasidagi kadrlar tizimi takomillashtiriladi.

2022-09-08T04:33:21.962Z

O‘zbekiston Respublikasi Prezidentining 2022-yil 31-mart kuni PQ 187-sonli “Veterinariya va chorvachilik sohasida kadrlar tayyorlash tizimini tubdan takomillashtirish to‘g‘risida” Qarori qabul qilindi. Qarorda veterinariya va chorvachilik sohasida yuqori malakali kadrlar tayyorlash tizimini yanada takomillashtirish, Samarqand veterinariya meditsinasi instituti faoliyati ko‘lamini kengaytirish, xalqaro nufuzini oshirish, ilmiy tadqiqotlarni tizimli olib borish, innovatsion ta’lim va texnologiyalar transferini qo‘llab-quvvatlash tizimini yaratish, ta’lim va ishlab chiqarishni uzviy bog‘lash maqsadida ko’plab yangiliklar amalga oshirilishi rejalashtirilgan. Shuningdek davlat rahbarining qarorida, Samarqand veterinariya meditsinasi instituti negizida Samarqand davlat veterinariya meditsinasi, chorvachilik va biotexnologiyalar universitetini tashkil etish rejalashtirilgan. Tashkil etiladigan universitetning vazifasi etib quyidagilar belgilangan:

- veterinariya, chorvachilik, biotexnologiya, agrotexnologiya, agroiqtisodiyot tarmoqlari uchun oliy ma’lumotli kadrlarni tayyorlash;

- zamonaviy o‘quv va ilmiy-laboratoriya bazasini shakllantirish, uni ilg‘or texnologik asbob-uskunalar bilan jihozlash hamda sohani rivojlantirishga qaratilgan ilmiy-innovatsion tadqiqotlarni kengaytirish;

- o‘quv jarayonini amaliy ko‘nikmalarni shakllantirishga yo‘naltirish, xalqaro ta’lim standartlariga asoslangan ilg‘or pedagogik texnologiyalar, o‘quv dasturlari va innovatsion o‘quv-uslubiy materiallarni keng joriy etish, veterinariya klinikasi, o‘quv va ilmiy laboratoriya, o‘quv-tajriba xo‘jaligi, ishlab chiqarish va qayta ishlash korxonalarida nazariy bilim hamda amaliyotning uyg‘unligini ta’minlash uchun zarur sharoitlar yaratish;

- ilmiy va ilmiy-pedagogik kadrlar tayyorlash, qayta tayyorlash va ularning malakasini oshirish bo‘yicha uzluksiz ta’lim tizimini yaratish;

- yetakchi xorijiy oliy ta’lim muassasalari bilan qo‘shma ta’lim dasturlari va ilmiy loyihalarni amalga oshirish, Universitet professor-o‘qituvchilarining malakasini oshirish, bitiruvchilarning respublika va xorijiy oliy ta’lim muassasalarida (ilmiy markazlarda) magistratura va doktorantura dasturlari bo‘yicha tahsil olishlarini tashkil etish;

- o‘quv jarayonini talabalarda mustaqil ta’lim olish, tizimli tahlil qilish, ijodiy fikrlash va amaliy, jumladan tadbirkorlik ko‘nikmalarini shakllantirishga yo‘naltirish;

- sohadagi ilmiy-tadqiqot institutlarining yetakchi olimlarini Universitetda tahsil olayotgan iqtidorli talabalarga biriktirgan holda, fan, ta’lim va ishlab chiqarish integratsiyasini ta’minlash;

- Universitetning yuqori bosqich talabalari hamda ilmiy izlanuvchilarining ilmiy-tadqiqot institutlari laboratoriyalarida faoliyat yuritishi uchun sharoit yaratish;

- tasarrufidagi ta’lim muassasalari faoliyatini muvofiqlashtirish, ularning moddiy-texnika bazasini mustahkamlash.

Xulosa qilib aytganda mazkur qaror orqali Veterinariya va chorvachilikni rivojlantirish sohasidagi kamchilik va bo’shliqlarni to’ldirish, izchillik bilan soha taraqqiyotini yana bir pog’onaga ko’tarish maqsad qilingan.

Veterinariya va chorvachilikni rivojlantirish bo‘limi xodimlarining ustama pullari undirib berildi!

2022-08-29T05:10:31.820Z

Termiz shahar adliya bo‘limi va Yuridik xizmat ko‘rsatish markazi hamkorligida O‘zbekiston Respublikasi Vazirlar Mahkamasining 2017-yil 4-dekabrdagi “Davlat veterinariya xizmati xodimlari mehnatiga qo‘shimcha haq to‘lash va ularni moddiy rag‘batlantirish chora-tadbirlari to‘g‘risida”gi VM 963-son Qarori bilan tasdiqlangan “O‘zbekiston Respublikasi Veterinariya va chorvachilikni rivojlantirish davlat qo‘mitasi va uning tizimiga kiruvchi tashkilotlar xodimlarini moddiy rag‘batlantirish shartlari va tartibi to‘g‘risida Nizom” ning tegishli bandlari asosida shahar Veterinariya va chorvachilikni rivojlantirish bo‘limining 11 nafar xodimiga to‘lanmay kelinayotgan 143 mln so‘mdan ortiq ustama pullarini undirish bo‘yicha Sudning hal qiluv qarorini chiqarishga erishildi, xodimlarning huquqlari tiklab berildi.

Yuridik texnikumlarga talabgorlar hujjatlarini qabul qilish davom etadi!

2022-08-10T11:08:29.468Z

Adliya vazirligi yuridik texnikumlarida tahsil olib yuridik ma'lumotga ega bo'lish istagini bildirgan talabgorlar safini kengaytirish maqsadida Termiz shahar adliya bo'limi Yuridik xizmat ko'rsatish markazi xodimlari tomonidan texnikum qabuli bo'yicha fuqarolarga tushuntirishlar berildi va ularga hujjatlarni topshirish, qabul jarayonlari tartibi va yuridik texnikumlarda o'qishning qulaylik jihatlari bo'yicha ma'lumotlar berildi. Jumladan qabul jarayonlari 2022-yil 1-avgust kunidan boshlanganligi, o'qishga kirish uchun abiturientlar my.gov.uz va my.dtm.uz saytlari orqali hujjatlari yuborish mumkinligi, talabgorlar davlat-huquqiy faoliyati, yuridik xizmat va sud-huquqiy faoliyati yo'nalishlari bo'yicha hujjat topshirishlari, hatto texnikumda sirtqi shaklda o'qishlari mumkinligi bo'yicha tushuntirishlar berildi. Fuqarolarga qabul jarayonlari bo'yicha batafsil ma'lumotlar yozilgan bukletlar tarqatildi.