UZBEKNEFTEGAZ_LOT

Qazib chiqarish, taʼmirlash va ijro holati yuzasidan tanqidiy yigʻilish oʻtkazildi

2026-05-26T11:02:23.968Z

“Oʻzbekneftgaz” AJ Boshqaruv raisi Abdugʻani Sanginov rahbarligida “Uzbekistan GTL” MCHJ, “Shoʻrtan gaz kimyo majmuasi” MCHJ hamda Shoʻrtan neft va gaz qazib chiqarish boshqarmasida qazib chiqarish holati, taʼmirlash ishlari, texnologik qurilmalar barqarorligi, ishlab chiqarish koʻrsatkichlari hamda moliyaviy majburiyatlar ijrosi joyiga chiqqan holda tanqidiy-tahliliy koʻrib chiqildi.

Taʼkidlanganidek, joriy yil yanvar-aprel oylarida «GTL”zavodida 856 mln kub metr tabiiy gaz qayta ishlanib, 328,9 ming tonna sintetik mahsulot ishlab chiqarilgan. Shu bilan birga, ayrim muhim yoʻnalishlarda reja koʻrsatkichlari toʻliq bajarilmagani qayd etildi.

Muhokamalar davomida ishlab chiqarish barqarorligini taʼminlash, texnologik xavflarning oldini olish va qurilmalar ishonchliligini taʼminlash ishlari talab darajasida tashkil etilmagani koʻrsatib oʻtildi.

Xususan, joriy yil 21-may kuni tashqi elektr tizimidagi nosozlik sabab yagona elektr tarmogʻida chastota pasayishi oqibatida zavodni elektr energiyasi bilan taʼminlovchi ikki tarmoq favqulodda oʻchgani, bu esa bugʻ turbinali generatorning ham toʻxtashiga sabab boʻlib, ishlab chiqarish jarayonlarida uzilishlarni keltirib chiqargani qayd etildi.

Boshqaruv raisi tomonidan har bir texnologik jarayon, taʼmirlash ishlari va ishlab chiqarish barqarorligi ko‘zdan kechirilib, muammolarni kechiktirmasdan bartaraf etish, avariyaviy holatlarning oldini olish va texnologik intizomni kuchaytirish boʻyicha aniq vazifalar belgilandi.

Yigʻilishda debitor qarzdorliklarni undirish, moliyaviy intizomni mustahkamlash va tashqi kredit majburiyatlarini oʻz vaqtida bajarish masalalari ham qattiq tanqid qilindi. Xususan, tizim korxonalari hamda hamkor tashkilotlar hisobidan shakllangan qarzdorliklarni qisqartirish boʻyicha mutasaddilarga qatʼiy topshiriqlar berildi.

Muhokamalar yakunlari boʻyicha “Uzbekistan GTL” MCHJ rahbariga hayfsan intizomiy jazosi qoʻllanilib, belgilangan vazifalar ijrosi taʼminlanmagan taqdirda lavozimidan ozod qilinishi toʻgʻrisida ogohlantirildi.

Shuningdek, yigʻilishda joriy yil may oyida Shoʻrtan gaz kimyo majmuasida amalga oshirilgan texnologik taʼmirlash ishlari qisqa — 10 kun muddatda yakunlangani alohida eʼtirof etildi. Taʼmirlash ishlarining belgilangan muddatdan oldin tugallangani natijasida qoʻshimcha 32,4 mlrd soʻmlik mahsulot ishlab chiqarishga erishilgani taʼkidlandi.

Muhokamalar davomida ishlab chiqarish barqarorligi uchun muhim ahamiyatga ega boʻlgan GT-1201 kompressori masalasi ham atroflicha koʻrib chiqildi. Xususan, “Mitsubishi Heavy Industries Compressor Corporation” (Yaponiya) kompaniyasi tomonidan texnik audit qayta oʻtkazilib, tegishli nuqson dalolatnomalari rasmiylashtirilgani maʼlum qilindi.

Shu bilan birga, dunyoda kuzatilayotgan geosiyosiy vaziyat sharoitida ishlab chiqarish jarayonlari uzluksizligini taʼminlash uchun zarur boʻlgan moddiy-texnik resurslar va ehtiyot qismlar xaridini jadallashtirish zarurligi taʼkidlandi.

Muhokamalar davomida Shoʻrtan majmuasi ishga tushirilganidan buyon yangi turdagi yuqori qoʻshilgan qiymatli mahsulotlar ishlab chiqarish boʻyicha yetarli ishlar amalga oshirilmagani tanqidiy baholandi. Shu munosabat bilan “Uzbekistan GTL” hamda Shoʻrtan gaz kimyo majmuasining mavjud xomashyo bazasi negizida bozorbop va raqobatbardosh mahsulotlar ishlab chiqarishga qaratilgan yangi investitsiya loyihalarini ishlab chiqish boʻyicha topshiriqlar berildi.

Yigʻilishda Shoʻrtan gaz kimyo majmuasining 25 yillik yubiley tadbirlarini yuqori saviyada tashkil etish masalalari ham koʻrib chiqildi. Xususan, neft-gaz sohasi va majmua faoliyatini oʻzida aks ettiruvchi zamonaviy stella barpo etish, yubiley tadbirlarini munosib darajada oʻtkazish boʻyicha chora-tadbirlar rejasini ishlab chiqish vazifasi qoʻyildi.

Shuningdek, safar davomida Shoʻrtan neft va gaz qazib chiqarish boshqarmasining mavjud ishlab chiqarish holati, quduqlar samaradorligi, geologik-texnik tadbirlar, burgʻilash jarayonlari, kompressor stansiyalari faoliyati va elektr taʼminoti bilan bogʻliq masalalar ham joyida o‘rganildi.

Qayd etilganidek, 2026-yil 23-may holatiga boshqarma tomonidan 2 mlrd 623,5 mln kub metr tabiiy gaz, 37,4 ming tonna gaz kondensati, 74,9 ming tonna suyultirilgan gaz va 220 tonna oltingugurt ishlab chiqarilgan. Shu bilan birga, ayrim yoʻnalishlarda oʻsish surʼatlari kutilgan darajada taʼminlanmagani, xususan, tabiiy gaz va gaz kondensati ishlab chiqarish hajmlarida pasayish kuzatilayotgani taʼkidlandi.

Yigʻilishda bugungi murakkab sharoitda qazib chiqarishni barqaror saqlash har bir quduq, har bir texnologik jarayon va har bir boshqaruv qarorini chuqur tahlil qilishni talab etishi qayd etildi. Shu munosabat bilan Boshqaruv raisi tomonidan barcha jarayonlarni qoʻlbola yondashuv emas, aniq hisob-kitob va tizimli reja asosida tashkil etish boʻyicha qatʼiy vazifalar belgilab berildi.

Xususan, “Shlyumberje” kompaniyasi bilan hamkorlikda "Shoʻrtan" va "Niyoz" konlaridagi tabiiy tushish holatini qayta tahlil qilish, yangi quduqlarni qisqa muddatlarda ishga tushirish, konservatsiyadagi quduqlarni qayta tiklash hamda burgʻilash ishlarini jadallashtirish boʻyicha aniq muddatli topshiriqlar berildi.

Muhokamalarda avariyaviy toʻxtalishlar ham alohida koʻrib chiqildi. Hisobot davrida yuz bergan toʻxtalishlarning asosiy qismi kompressor stansiyalari va elektr taʼminoti bilan bogʻliq ekani qayd etildi. Shu munosabat bilan kompressor agregatlarini taʼmirlash, ehtiyot qismlar zaxirasini shakllantirish, elektr tarmoqlarini modernizatsiya qilish hamda sozlash ishlarini tezlashtirish boʻyicha tezkor choralar belgilandi.

Shu bilan birga, mavjud quduqlar imkoniyatlaridan samarali foydalanish, geologik-texnik tadbirlarni oʻz vaqtida bajarish va texnologik yoʻqotishlarni kamaytirish hisobidan yil yakuniga qadar kunlik qazib chiqarish hajmini qoʻshimcha 1 mln kub metrga oshirish vazifasi qoʻyildi.

Yigʻilish yakunida Boshqaruv raisi tomonidan har bir yoʻnalish kesimida shaxsiy masʼuliyat kuchaytirilishi, belgilangan vazifalar ijrosi qatʼiy nazorat qilinishi hamda qazib chiqarish barqarorligini taʼminlash boʻyicha barcha zarur choralar koʻrilishi taʼkidlandi.

“Oʻzbekneftgaz” AJ Axborot xizmati

Ijro intizomi — samaradorlik va natijadorlik mezoni

2026-05-25T13:11:25.155Z

Bugun “Oʻzbekneftgaz” AJda oʻtkazilgan apparat yigʻilishida jamiyatda ijro intizomini taʼminlash holati, may oyi yakunlari, iyun oyi rejalari, shuningdek 2026-yil I -chorak KPI koʻrsatkichlari ijrosi va II-chorakda kutilayotgan natijalar muhokama qilindi.

Yigʻilishda taʼkidlanganidek, ijro intizomi davlat organlari va tashkilotlar faoliyati samaradorligini taʼminlovchi muhim tizim hisoblanadi. Xususan, davlat rahbari, Prezident Administratsiyasi hamda hukumat tomonidan “Ijro.gov.uz” tizimi orqali berilgan nazorat topshiriqlari ijrosi yuzasidan amalga oshirilgan ishlar tahlil qilindi. Qayd etilishicha, may oyida nazoratda turgan barcha topshiriqlarning ijrosi toʻliq taʼminlangan.

Shu bilan birga, iyun oyida nazoratda turgan topshiriqlar soni sezilarli darajada ortishi munosabati bilan ularni barvaqt va sifatli bajarish boʻyicha “yoʻl xaritalari” hamda kalendar jadvallari ishlab chiqilgani maʼlum qilindi. Masʼullarga topshiriqlarni belgilangan muddatdan kamida 5 kun oldin taʼminlash, ijro jarayonini doimiy nazoratda ushlash va tegishli idoralar bilan hamkorlikda ish olib borish vazifasi yuklatildi.

Yigʻilishda, shuningdek, 2026-yil I-chorak KPI natijalari ham koʻrib chiqildi. “Oʻzbekneftgaz” AJ respublika tashkilotlari reytingida 17-oʻrinni egallab, oʻtgan yilning mos davriga nisbatan 5-pogʻonaga yuqorilagani qayd etildi. Ayni paytda, II-chorakda bajarilishi kutilayotgan koʻrsatkichlar, jumladan aholi muammolarini tinglash maqsadida hududlarda sayyor qabullar oʻtkazish masalalariga alohida eʼtibor qaratildi.

Yigʻilish yakunida Boshqaruv raisi tomonidan berilgan topshiriqlar ijrosini qatʼiy nazoratga olish, muddati oʻtgan vazifalarni qisqa muddatlarda bartaraf etish hamda kelgusida har bir topshiriqning oʻz vaqtida va sifatli bajarilishini taʼminlash yuzasidan masʼullarga tegishli koʻrsatmalar berildi.

“Oʻzbekneftgaz” AJ Axborot xizmati

Vakant lavozimiga tanlov

2026-05-25T05:44:05.869Z

“Oʻzbekneftgaz” AJ Strategiya loyiha ofisi bosh mutaxassisi
lavozimiga nomzodlarni jalb qilish uchun ochiq tanlov eʻlon qiladi.

Strategiya loyiha ofisi bosh mutaxassisi lavozimi uchun malakaviy talablar:

• Jamiyat rivojlanish strategiyasini ishlab chiqish va yangilash jarayonida ishtirok etish;
• Rahbariyat uchun tahliliy materiallar, taqdimotlar va hisobotlar tayyorlash;
• Strategik tashabbuslar va loyihalarni amalga oshirishni analitik jihatdan qoʻllab-quvvatlash;
• Asosiy samaradorlik koʻrsatkichlari (KPI)ni yigʻish, tahlil qilish va monitoring olib borish;
• Strategik loyihalar boʻyicha moliyaviy-iqtisodiy modellalarni ishlab chiqishda ishtirok etish;
• Strategik koʻrsatkichlar boʻyicha muntazam boshqaruv hisobotlarini tayyorlash;
• Maʻlumotlarni yigʻish va strategik tashabbuslarni amalga oshirish masalalarida biznes boʻlinmalar bilan hamkorlik qilish;
• Qiyosiy tahlil (benchmarking) oʻtkazish hamda ilgʻor xalqaro tajribalarni oʻrganish.

Professional talablar

• Iqtisodiyot, moliya, menejment, injiniring, neft-gaz sohasi yoki turdosh yoʻnalishlar boʻyicha oliy maʻlumot;
• Strategiya, analitika, konsalting yoki loyiha boshqaruvi sohasida kamida 3 yillik relevant ish tajribasi;
• Quyidagi yoʻnalishlarda ishonchli koʻnikmalar:
- maʻlumotlarni analitik qayta ishlash;
- taqdimot materiallarini tayyorlash (PowerPoint);
- Excel dasturidan ilgʻor darajada foydalanish;
• Moliyaviy tahlil va investitsion loyihalarni baholash asoslarini bilish;
• Moliyaviy modellashtirish boʻyicha bazaviy bilim va tajriba;
• Neft-gaz sohasi hamda asosiy biznes jarayonlarini tushunish — ustunlik hisoblanadi;
• Maʻlumotlarni tizimlashtirish va ular bilan ishlash koʻnikmasi;
• Analitik va BI vositalari bilan ishlash tajribasi — ustunlik hisoblanadi;
• Jamoada samarali ishlash va belgilangan muddatlarga rioya qilish qobiliyati.
• Til boʻyicha talablar: Oʻzbek, rus, ingliz tillarini erkin darajada bilish majburiy (qoʻshimcha xorijiy tillarni bilish ustunlik beradi).

Quyidagilar ustunlik beriladi:

• Boshqaruv konsaltingi yoki yirik sanoat kompaniyalarida ish tajribasi;
• Moliyaviy modellashtirish boʻyicha kuchli koʻnikmalar;
• Maʻlumotlarni tahlil qilish va BI vositalari (Power BI, SQL va boshqalar)ni bilish;
• Strategik loyihalarda ishtirok etganlik tajribasi.

Rezyume/obyektivlarni ushbu havola orqali yuborish mumkin: https://www.ung.uz/about/vacancy/21/sub/46/1
Muddat: 2026-yil 1 iyuniga qadar

Qo‘shimcha ma’lumot uchun murojaat: +(99871) 207-27-72 (23-36, 25-69).

“Oʻzbekneftgaz” AJ Axborot xizmati

Xitoy kompaniyasi bilan burgʻilash va geofizika xizmatlari muhokama qilindi

2026-05-22T10:42:13.047Z

"Oʻzbekneftgaz" AJ Boshqaruv raisi Abdugʻani Sanginov Xitoyning yirik neft-gaz korporatsiyasi "CNPC"ga qarashli "CNLC" kompaniyasi rahbariyati bilan uchrashuv oʻtkazdi.

Unda burgʻilash uskunalarini yetkazib berish, geofizika xizmatlari va yuqori haroratga chidamli quduq uskunalarini xarid qilish masalalari muhokama qilindi.

Dastlab “CNPC” kompaniyasi bilan soʻnggi vaqtda yaqin va oʻzaro ishonchli hamkorlik munosabatlari yoʻlga qoʻyilgani, kompaniya tarkibidagi tashkilotlar bilan qator manfaatli shartnomalar imzolanib, bugungi kunda amaliy ishlar olib borilayotganini alohida taʼkidlandi.

Uchrashuv davomida tomonlar oʻrtasida imzolangan yuk koʻtarish quvvati 650 tonna boʻlgan ZJ90 rusumli burgʻilash qurilmasini yetkazib berish boʻyicha amalga oshirilayotgan ishlar koʻrib chiqildi.

Muzokaralarda geofizika xizmatlari sohasidagi hamkorlik yoʻnalishlari ham muhokama qilindi. Xususan, 4500-6000 metrgacha boʻlgan chuqur quduqlarda karotaj, sinov va perforatsiya ishlarini amalga oshirish boʻyicha takliflar koʻrib chiqildi.

“Oʻzbekneftgaz” tomonidan yuqori haroratli — 200°S gacha boʻlgan quduqlarda geofizika ishlarini amalga oshirish uchun "CNLC" kompaniyasi taqdim etgan tijorat takliflarini raqobatbardosh va maqbul shartlar asosida qayta koʻrib chiqish bildirildi.

Shuningdek, “Oʻzbekgeofizika” AJ uchun yuqori harorat va bosimga chidamli geofizik quduq uskunalarini xarid qilish masalasi ham kun tartibidan oʻrin oldi. Tomonlar ushbu yoʻnalishda texnik talablar, uskunalarning ishonchliligi va narx parametrlarini atroflicha muhokama qildilar.

Muzokaralar davomida perforatsiya ishlarini mahalliylashtirish va sohada zamonaviy texnologiyalarni joriy etish maqsadida qoʻshma korxona tashkil etish taklifi ham bildirildi. Bu borada alohida ishchi guruh tuzish, loyihani xalqaro standartlar va zamon talablari asosida shakllantirish zarurligi qayd etildi.

Uchrashuv yakunida hamkorlikni oʻzaro manfaatli shartlar asosida rivojlantirish, texnik yechimlarni takomillashtirish va raqobatbardosh tijorat takliflarini ishlab chiqish boʻyicha kelishuvlarga erishildi.

“Oʻzbekneftgaz” AJ Axborot xizmati

Gazli konlarida burgʻilash va qazib chiqarish ishlari tanqidiy oʻrganilmoqda

2026-05-20T09:27:30.061Z

“Oʻzbekneftgaz” AJ Boshqaruv raisi Abdugʻani Sanginov boshchiligidagi ishchi guruh Gazli neft va gaz qazib chiqarish boshqarmasiga qarashli “Kulbeshkak” konida joylashgan 83-sonli ishlatish qudugʻida konlarda 2026-yilda izlov-qidiruv quduqlarini burgʻilash boʻyicha belgilangan chora-tadbirlar ijrosi, amalga oshirilayotgan geologiya va ishlab chiqarish ishlari holati bilan yaqindan tanishdi.

Shuningdek, masʼullar tomonidan olib borilayotgan ishlar, burgʻilash jarayonlari va quduqlarni ishga tushirish boʻyicha taqdimotlar qilindi.

Oʻrganishlar davomida Boshqaruv raisi tomonidan geologiya-qidiruv ishlarini tizimli tashkil etish, har bir quduq boʻyicha natijadorlikni oshirish, texnologik jarayonlarni qatʼiy nazorat qilish va ishlab chiqarishda uzilishlarga yoʻl qoʻymaslik boʻyicha tegishli topshiriqlar berildi.

Xususan, quduqlarni burgʻilash va kapital taʼmirlash ishlari boʻyicha namunaviy loyiha ishlab chiqish taklifi ilgari surildi. Unda quduq turidan qatʼi nazar, ishlarni amalga oshirish muddatlari, texnik parametrlar, bosqichma-bosqich jarayonlar, zarur texnika va resurslar hamda kutilayotgan natijalar aniq belgilab qoʻyilishi zarurligi taʼkidlandi.

Qayd etilganidek, bunday yagona tizim asosida ishlash orqali ortiqcha vaqt yoʻqotish, tashkiliy uzilishlar va kechikishlarning oldini olish, shuningdek, har bir jarayon boʻyicha aniq masʼuliyat va nazorat mexanizmlarini shakllantirish mumkin boʻladi.

Shu bilan birga, ishchi-xodimlar uchun xavfsiz va munosib mehnat sharoitlarini taʼminlash, obyektlarda texnik va texnologik talablarga qatʼiy rioya qilish zarurligi alohida taʼkidlandi.

"Oʻzbekneftgaz" AJ Axborot xizmati

Xalqaro investorlar va J.P.Morgan vakillari bilan uchrashuv oʻtkazildi

2026-05-20T04:33:07.367Z

“Oʻzbekneftgaz” AJ da AQShning J.P.Morgan kompaniyasi vakillari hamda xalqaro investitsiya kompaniyalari va evrobond investorlaridan iborat delegatsiya bilan uchrashuv boʻlib oʻtdi.

Unda Jamiyat tomonidan soʻnggi yillarda erishilgan moliyaviy natijalar, transformatsiya jarayonlari, korporativ boshqaruv tizimini takomillashtirish boʻyicha amalga oshirilayotgan ishlar hamda kompaniyaning moliyaviy barqarorligini mustahkamlashga qaratilgan chora-tadbirlar haqida maʼlumot berildi.

Shuningdek, davlat tomonidan koʻrsatilayotgan tizimli qoʻllab-quvvatlash, geologiya-qidiruv ishlarini kengaytirish, ishlab chiqarish hajmlarini oshirish hamda istiqboldagi investitsiya loyihalari yuzasidan taqdimot oʻtkazildi.

Investorlar oʻzlarini qiziqtirgan masalalar yuzasidan maʻlumotlarga ega boʻlishdi hamda kelgusida ochiq va konstruktiv muloqotni davom ettirishga tayyor ekanliklarini taʻkidladilar.

"Oʻzbekneftgaz" AJ Axborot xizmati

Boshqaruv raisi Uchsoydagi qurilish loyihasiga yangi talablar qo‘ydi

2026-05-19T14:27:05.894Z

Ayni paytda Ustyurt gaz qazib chiqarish boshqarmasining Uchsoy ishchilar shaharchasida 60 o‘rinli ishchilar yotoqxonasi hamda oshxona faoliyat yuritib kelmoqda.

Joriy yil yanvar oyida “O‘zbekneftgaz” AJ Boshqaruv raisi mazkur hududga tashrifi davomida istiqbolli maydonlarda gaz qazib chiqarish hajmlari bosqichma-bosqich oshirilayotgani, ishlar ko‘lami kengayib borayotganini inobatga olgan holda ishchilar shaharchasida 144 o‘rinli yangi yotoqxona, 80 o‘rinli zamonaviy oshxona, majlislar zali va ma’muriy bino qurish vazifalari belgilab berilgan edi.

Navbatdagi ishchi safar davomida Boshqaruv raisiga qurilish loyihasi taqdim etildi. Taqdimot jarayonida Boshqaruv raisi loyiha yuzasidan qator e’tiroz va takliflarni bildirdi.

Xususan, ishchilar uchun nafaqat yashash, balki mazmunli dam olish muhitini ham yaratish zarurligi ta’kidlandi. Majmua hududida “yashil zona” tashkil etish, ma’naviy hordiq chiqarishi uchun sharoitlar yaratish bo‘yicha ko‘rsatmalar berildi.

Shuningdek, hududda “Uch avlod” stellasini barpo etish taklifi ilgari surildi. Bu esa jamoada ma’rifiy muhitni yaxshilash, avlodlar vorisiyligi, mehnat an’analari va korporativ qadriyatlarni mustahkamlashga xizmat qilishi qayd etildi.

Boshqaruv raisi binolarni loyihalashtirishda hududning iqlim sharoitlarini inobatga olish muhimligini ham alohida ta’kidladi. Sovuq iqlim sharoitida ishlaydigan xodimlar uchun binolar issiq, qulay va energiya tejamkor bo‘lishi lozimligi bo‘yicha mas’ullarga tegishli topshiriqlar berildi.

Ma’lum qilinishicha, qurilish ishlarini joriy yil avgust oyida yakunlab, majmuani Mustaqillik bayrami arafasida foydalanishga topshirish rejalashtirilgan. Yangi majmua ishchilar uchun munosib tuhfa bo‘lishi ta’kidlandi.

"Oʻzbekneftgaz" AJ Axborot xizmati

Qazib chiqarish jarayonlarida ishonchli elektr taʼminoti mustahkamlanmoqda

2026-05-19T06:01:22.492Z

“Oʻzbekneftgaz” AJ tomonidan gaz qazib chiqarish jarayonlarini barqaror tashkil etish hamda texnologik obyektlarni uzluksiz elektr energiyasi bilan taʼminlash maqsadida tizim korxonalarida keng koʻlamli ishlar amalga oshirilmoqda.

Xususan, kuz-qish mavsumiga puxta tayyorgarlik koʻrish, avariyaviy holatlarning oldini olish va elektr tarmoqlari ishonchliligini yanada oshirish masalalariga alohida eʼtibor qaratilmoqda.

Shu maqsadda Shoʻrtan neft va gaz qazib chiqarish boshqarmasi tasarrufidagi “Shoʻrtan–1” va “Shoʻrtan–2” 110 kVli havo elektr uzatish tarmoqlarida kapital taʼmirlash ishlari olib borilmoqda.

Qayd etish joizki, 1983–1984-yillarda foydalanishga topshirilgan, har biri 48 kilometr uzunlikka ega mazkur elektr uzatish tarmoqlari orqali “Shoʻrtan-8” va “Shoʻrtan-40” podstansiyalari hamda qator ishlab chiqarish obyektlari elektr energiyasi bilan taʼminlanadi.

Taʼmirlash ishlari davomida eskirgan elektr uskunalari yangilanib, simlar va izolyatorlar almashtirilmoqda, tayanch ustunlar esa mustahkamlanmoqda. Ayni vaqtda “Shoʻrtan–1” tarmogʻidagi kapital taʼmirlash ishlari toʻliq yakunlanib, liniya kuchlanish ostiga qoʻyildi. “Shoʻrtan–2” tarmogʻida esa taʼmirlash ishlari izchil davom ettirilmoqda.

Amalga oshirilayotgan mazkur ishlar elektr taʼminoti barqarorligini taʼminlash, texnologik jarayonlar uzluksizligini saqlash hamda qazib chiqarish samaradorligini yanada oshirishda muhim ahamiyat kasb etmoqda.

"Oʻzbekneftgaz" AJ Axborot xizmati

Xalqaro koʻrgazmalar samaradorligi va ijtimoiy masalalar muhokamasi

2026-05-18T11:50:24.275Z

Bugun “Oʻzbekneftgaz” AJ Boshqaruv raisi Abdugʻani Sanginov rahbarligida oʻtkazilgan Apparat yigʻilishida jamiyatning xalqaro maydondagi ishtiroki, investitsiyaviy hamkorlikni yanada kengaytirish hamda ishchi-xodimlarni ijtimoiy qoʻllab-quvvatlashga oid muhim masalalar muhokama qilindi.

Yigʻilish kun tartibida dastlab joriy yil 12–14-may kunlari oʻtkazilgan “Oʻzbekiston neft va gazi – OGU-2026” 28-xalqaro koʻrgazma va anjumani yakunlari tanqidiy-tahliliy koʻrib chiqildi. Qayd etish joizki, mazkur tadbirda 34 davlatdan 580 ga yaqin kompaniya va moliyaviy tuzilmalar ishtirok etib, “Oʻzbekneftgaz” AJ tomonidan 50 dan ortiq uchrashuv va muzokaralar oʻtkazildi.

Shu bilan birga, tadbirga tayyorgarlik koʻrish, uni tashkil etish va oʻtkazish jarayoni tahlil qilinib, masʼullarga kelgusi yilgi tadbirni bundan ham yuqori saviyada tashkil etish boʻyicha aniq takliflar ishlab chiqish topshirildi.

Shuningdek, “OGU-2026” doirasida “SOCAR”, “British Petroleum”, “Baker Hughes”, “Schlumberger”, “Burintech”, “SinoSure” kabi yetakchi xorijiy kompaniyalar bilan erishilgan qator muhim kelishuvlarni amaliy bosqichga olib chiqish yuzasidan “yoʻl xaritalari”ni tayyorlash topshirigʻi berildi.

Joriy yil 1–3-iyun kunlari Ozarbayjon poytaxti Boku shahrida boʻlib oʻtadigan “Baku Energy Week – 2026” xalqaro koʻrgazmasida “Oʻzbekneftgaz” AJning munosib ishtirokini taʼminlash yuzasidan aniq vazifalar belgilandi.

Boshqaruv raisi ishchi-xodimlarni ijtimoiy qoʻllab-quvvatlash va sogʻlomlashtirish masalalari, xususan, tibbiy koʻrik natijalari asosida tizim korxonalarida mehnat qilayotgan xodimlar salomatligini tiklash, ularni malakali shifokorlar ishtirokida davolash, jarrohlik amaliyotlarini tashkil etish hamda farzandlarining yozgi dam olishini samarali yoʻlga qoʻyish boʻyicha masʼullarga vazifalar yuklatildi.

Yigʻilishda ishchi-xodimlarga sanatoriy va dam olish maskanlariga yoʻllanmalar ajratish jarayonlarini raqamlashtirish, ortiqcha qogʻozbozlikni qisqartirish, shuningdek, sanatoriylar bilan hamkorlikni kengaytirish boʻyicha ham aniq chora-tadbirlar belgilab olindi.

"Oʻzbekneftgaz" AJ Axborot xizmati

“O‘zbekneftgaz” yoshlari energetika sohasidagi "Business Quiz" g‘olibiga aylandi

2026-05-14T12:38:53.182Z

"O‘zbekiston neft va gazi — OGU 2026" ko‘rgazmasi doirasida energetika sohasi yoshlari va mutaxassislarini birlashtirgan Business Quiz intellektual turniri bo‘lib o‘tdi. Tadbir Uzbekneftegaz hamda Yoshlar yetakchilari kengashi hamkorligida tashkil etilib, professional bilim, mantiqiy fikrlash va jamoaviy hamkorlikni uyg‘unlashtirgan o‘ziga xos maydonga aylandi.

Intellektual musobaqada energetika va neft-gaz sohasiga oid vazirliklar, tarmoq korxonalari, xalqaro hamda servis kompaniyalari vakillaridan iborat 20 ta jamoa ishtirok etdi. Turnir davomida qatnashchilar nafaqat sohaviy bilimlari, balki tezkor fikrlash, tahliliy yondashuv va jamoada samarali ishlash ko‘nikmalarini ham namoyon etdilar.

Business Quiz dasturi energetika, neft-gaz sanoati, innovatsiyalar, xalqaro hamkorlik, korporativ madaniyat va zamonaviy texnologiyalarga bag‘ishlangan turli intellektual bosqichlarni qamrab oldi. Savollar ishtirokchilardan nafaqat nazariy bilim, balki amaliy tajriba va keng dunyoqarashni ham talab qildi.

Tadbir davomida shakllangan do‘stona va sog‘lom raqobat muhiti yosh mutaxassislar o‘rtasida yangi aloqalar o‘rnatish, tajriba almashish va korporativ muloqotni mustahkamlash uchun muhim imkoniyat yaratdi.

Yakunlarga ko‘ra, intellektual bellashuvda eng yuqori natija qayd etgan jamoalar g‘olib deb topildi:

1-o‘rin — "O‘zbekneftgaz" AJ jamoasi.

2-o‘rin — "Uzgastrade" AJ jamoasi.

3-o‘rin — "O‘ztransgaz" AJ jamoasi.

"OGU 2026" doirasida tashkil etilgan mazkur intellektual turnir energetika sohasida bilim va professional salohiyat eng katta kuch ekanini yana bir bor namoyon qildi.

"O‘zbekneftgaz" AJ Axborot xizmati