UZBEKNEFTEGAZ_LOT

Bugungi geologiya qidiruv ishlari — ertangi zaxira: Seysmik qidiruvlar koʻlami 5,7 barobar oshdi

2026-09-18T10:17:30.196Z

“Oʻzbekneftgaz” AJ yangi konlarni izlash, yer osti qatlamlarini chuqur oʻrganish va uglevodorod zaxiralarini koʻpaytirish maqsadida qidiruv ishlari koʻlamini sezilarli darajada kengaytirib, seysmik tadqiqotlarni yangi surʼatda olib bormoqda.

Joriy yilda geologiya-qidiruv ishlarini jadallashtirish hamda uglevodorod xomashyo bazasini kengaytirish maqsadida seysmik qidiruv ishlarining yillik hajmi keskin oshirildi.

Yil oxiriga qadar 11 902 kvadrat kilometr 3D va 1 835 pogon kilometr 2D seysmik qidiruv ishlarini bajarish rejalashtirilgan. Bu tarmoq tarixidagi eng yirik yillik rejalardan biridir.

Yanvar–avgust oylaridagi natijalar bu yoʻnalishda ishlar surʼati sezilarli oshganini yaqqol koʻrsatdi.

Hisobot davrida 6 220 kvadrat kilometr maydonda 3D seysmik qidiruv ishlari bajarildi. Bu koʻrsatkich 2025-yilning mos davrida qayd etilgan 1 083 kvadrat kilometrga nisbatan qariyb 5,7 barobar koʻp.

3D va 2D seysmik tadqiqotlar natijasiga koʻra, sakkiz oyda jami 6 216 kvadrat kilometr maydonda va 317,3 pogon kilometr masofada ishlar amalga oshirildi.

Eʼtiborlisi, belgilangan reja 100,1 foizga bajarildi. Oʻtgan yilning shu davrida esa reja ijrosi 27,7 foizni tashkil etgan edi. Bu raqamlar seysmik qidiruv ishlari nafaqat hajm jihatidan, balki tashkiliy va texnologik jihatdan ham yangi bosqichga koʻtarilganini koʻrsatadi.

Geologiya qidiruv ishlari kengaymoqda

Seysmik tadqiqotlarning yuqori surʼati, avvalo, geologiya qidiruv ishlari olib borilayotgan yangi maydonlar kengayishida xizmat qilmoqda.

Yil boshidan 3 ta — “Jamboʻloq 3D”, “Niyoz 3D” va “Qorovulbozor 3D” loyihalarida ishlar olib borilgan boʻlsa, bugun faol loyihalar soni 8 taga yetdi. Bu loyihalar “Karaumbet 3D”, “Alambek 3D”, “Toshqoʻrgʻon–Dehqonobod 3D”, “Chembar 3D”, “Jamboʻloq 3D”, “Qorovulbozor 3D”, “Tagman 3D” va “Aktumsuk 2D” .

Ushbu loyihalar dala seysmik ishlari tugatildi va hozirda (“Alambek 3D” — 381 kvadrat kilometr, “Chembar 3D” — 1 500 kvadrat kilometr) dala seysmik ishlaridan olingan maʼlumotlar qayta ishlash va interpretatsiya bosqichiga oʻtkazildi.

Ayni paytda “Qorovulbozor 3D”, “Toshqoʻrgʻon–Dehqonobod 3D”, “Tagman 3D”, “Kogon 3D” va “Aktumsuk 2D” loyihalarida dala seysmik qidiruv ishlari davom etmoqda.

Yangi istiqbolli tuzilmalarni aniqlash maqsadida sentyabr oyi yakuniga qadar “Shohpaxta 3D” loyihasida dala tadqiqotlarini boshlash uchun tayyorgarlik ishlari olib borilmoqda. “Ravshan 3D” loyihasida seysmik qidiruv ishlari 15-sentyabrdan boshlandi.

Bugungi geologiya qidiruv ishlari — ertangi zaxira

Seysmik qidiruv yer osti qatlamlarining geologik tuzilishini oʻrganish, istiqbolli zonalarni belgilash va uglevodorodlar toʻplanishi ehtimoli boʻlgan yangi maydonlarni aniqlashdagi asosiy bosqichdir. U kelgusida geologiya-qidiruv ishlarini keng koʻlamda amalga oshirish uchun mustahkam asos yaratadi.

Shu maʼnoda, bugun bajarilayotgan geologik-geofizik tadqiqotlarning har bir kvadrat kilometri kelgusida yangi maydonlarda izlov-qidiruv quduqlarini burgʻilash, yangi uglevodorod konlarini ochish va ishlab chiqarish imkoniyatlarini kengaytirish uchun zamin yaratadi.

Shu bois 2026 yil natijalarini shunchaki raqamlar majmui emas, balki uglevodorod resurs bazasini uzoq muddatda kengaytirishga qaratilgan strategik qadam sifatida baholash mumkin.

Eng muhimi, bu surʼatni kelgusi yilda ham saqlab qolish koʻzda tutilgan. 2027-yilda dala seysmik qidiruv ishlarini 2026 yildagi ish hajmiga nisbatan oʻsish surʼatini saqlagan holda amalga oshirish rejalashtirilgan.

Demak, geologiya-qidiruv ishlari koʻlami izchil kengaymoqda. Geologik maʼlumotlar bazasi boyib, toʻplangan maʼlumotlar raqamlashtirilmoqda, qayta ishlanmoqda va chuqur tahlil qilinmoqda. Natijada yangi istiqbolli maydonlarni aniqlash imkoniyatlari ortib bormoqda.

“Oʻzbekneftgaz” AJ Matbuot xizmati va

“Neftgaz Injiniring” MCHJ hamkorligida tayyorlandi.

Xitoy banki bilan oʻzaro manfaatli moliyalashtirish shartlari koʻrib chiqildi

2026-09-15T12:27:38.185Z

Bugun “Oʻzbekneftgaz” AJ Boshqaruvi raisi Abdugʻani Sanginov Xitoy Xalq Respublikasining Shinjon-Uygʻur avtonom rayonidagi "Eksport-import banki" (Eksimbank) vitse-prezidenti Ye Linszyun bilan videokonferensaloqa orqali uchrashuv oʻtkazdi.

Unda tomonlar oʻzaro manfaatli moliyaviy hamkorlikni yanada rivojlantirish, import loyihalarini moliyalashtirish hamda yangi kredit liniyasi boʻyicha takliflarni muhokama qildilar.

Muzokaralar chogʻida "Eksimbank" tomonidan yangi kredit liniyasi taklif etilgani qayd etildi. Bank moliyalashtirish shartlarini yanada maqbullashtirish, jumladan, foiz stavkasini pasaytirish va kredit muddatini uzaytirishga tayyor ekanini bildirdi.

Tomonlar muhokama etilgan shartlar oʻzaro manfaatli yechimga erishish va uzoq muddatli hamkorlikni davom ettirishga xizmat qilishini qayd ettilar. Muzokaralarni belgilangan yoʻnalishlar boʻyicha davom ettirishga kelishib olindi.

"O‘zbekneftgaz" AJ Axborot xizmati

25 yillik tarix, yangi marralar sari

2026-09-15T05:21:21.099Z

Chorak asrlik taraqqiyot, inson qadri va kelajakka ishonch mujassam boʻlgan yubiley tantanasi

“Tadbirli boʻlsang, taqdir seniki.”

Xalq maqoli.

Qashqadaryo zaminida bunyodkorlik, mehnat va fidoyilik timsoliga aylangan “Shoʻrtan gaz kimyo majmuasi” oʻzining 25 yillik taraqqiyot bosqichini munosib nishonladi.

Chorak asr — bu shunchaki taqvimdagi sana emas. Bu ustozlarga ehtirom, minglab insonlarning mehnati, izlanishi, kasbiy mahorati, masʼuliyati va sadoqati bilan yaratilgan ulkan tarixdir.

2026-yil 12-sentabr kuni SHGKM Ishchilar shaharchasida oʻtkazilgan tantanali tadbir ana shu tarixni yod etish, ustozlarga ehtirom bildirish, marhum hamkasblarni qadrlash, asosiysi bugungi yutuqlarni eʼtirof etish va kelajak marralarga yangi ruh bilan qadam qoʻyish ramziga aylandi.

Tadbirda majmua xodimlari, soha faxriylari, mahalliy hokimiyat vakillari, hamkor korxona va tashkilotlar rahbarlari hamda tarmoq masʼullaridan iborat 1 200 nafardan ortiq kishi ishtirok etdi.

Mehmonlarni kutib olishdan tortib, tadbirning yakuniy qismiga qadar har bir jarayon yuqori tashkiliy saviyada, milliy qadriyatlar va zamonaviy korporativ madaniyat uygʻunligi asosida tashkil etildi.

Yubiley tantanasining eng muhim jihatlaridan biri - tarixni yaratgan insonlarga hurmat, inson qadri va mehnatga boʻlgan yuksak ehtiromning namoyon boʻlganidadir.

Tadbirda Qashqadaryo viloyati hokimi M. Azimov, “Oʻzkimyosanoat” AJ raisi O. Temirov, “Oʻzbekneftegaz” AJ Boshqaruvi raisining birinchi oʻrinbosari S. Hamrayev, Energetika vaziri maslahatchisi S. Qurbonov, tarmoq kasaba uyushma kengashi raisining oʻrinbosari O. Ismoilov ishtirok etib, majmua mehnat jamoasini qutladilar.

Mehnat jamoasi uchun bu tabriklar oddiy tilaklar emas, balki 25 yil davomida yaratilgan mehnat natijalariga berilgan yuksak baho boʻldi. Ayniqsa, uzoq yillar davomida majmua taraqqiyotiga munosib hissa qoʻshgan xodimlarni ragʻbatlantirishga alohida eʼtibor qaratildi.

Tadbirda majmua tarixini yaratgan faxriylar eʼzozlandi, 100 nafarga yaqin ilgʻor xodim munosib ragʻbatlantirildi. Ularga koʻkrak nishonlari, faxriy yorliqlar, xorijiy sihatgohga yoʻllanmalar, muzlatkichlar, televizorlar va gilamlar topshirildi.

Bu ragʻbatlar zamirida bir muhim gʻoya — mehnat qadrlansa, inson yangi marralar sari yanada katta ishonch bilan intiladi, degan hayotiy haqiqat mujassam.

Yubiley munosabati majmua muzeyi ham mehmonlar eʼtiborida boʻldi. Ular korxonaning tarixi, uning shakllanish va taraqqiyot bosqichlari, mehnat jamoasi erishgan natijalar bilan tanishdilar.

Qashqadaryo viloyat hokimi M.Azimovning Faxriy mehmonlar kitobiga qoldirilgan minnatdorchiligi va ezgu tilaklari esa majmua tarixiga boʻlgan hurmatning yana bir ifodasi boʻldi. Zero, muzeyda saqlanayotgan har bir eksponat ortida muayyan davr, inson taqdiri va mehnat mashaqqati bor.

Tadbir davomida ekranda gavdalangan 25 yillik solnoma - maxsus hujjatli film namoyish etildi va 25 yillik tarixini yana bir bor koʻz oʻngimizda gavdalantirdi. Unda korxonaning shakllanishi, rivojlanish bosqichlari, mehnat jamoasining izlanishlari va erishilgan yutuqlar oʻz aksini topdi. Ekrandagi har bir lavha bir haqiqatni eslatdi. Yirik sanoat korxonasining tarixi, avvalo, uni barpo etgan va uning rivojiga hissa qoʻshgan insonlar tarixidir. 25 yillik solnoma — raqamlar va sanalar yigʻindisi emas, balki, uch avlodning mehnat maktabi, tajribasi va hayot yoʻli ekanligi katta taassurotga ega boʻldi.

Koʻp yillik faxriylar, sohadosh hamkorlar va xodimlar bir dasturxon atrofida dildan suhbatlashishdi. Bu bayram hammaning korporativ va ahil jamoaviy ruhini togʻdek koʻtardi. Xizmat koʻrsatish, dasturxon, ovoz va yorugʻlik tizimlari — xullas, hammasi risoladagidek boʻldi.

Tantanali kechaning badiiy qismi ham yubileyning yuksak maqsadiga munosib tarzda tashkil etildi. Sahnadagi teatrlashtirilgan koʻrinishlar, milliy raqslar, folklor chiqishlari va konsert dasturi tadbir ishtirokchilariga koʻtarinki kayfiyat bagʻishladi.

Kechaning eng katta quvonchi sahnada emas, jamoa qalbida namoyon boʻldi. Chunki bir maqsad atrofida birlashgan insonlar uchun bayram — bu, avvalo, umumiy tarix va umumiy gʻurur tuygʻusidir.

Bugun zamonaviy majmua muvaffaqiyati faqat ishlab chiqarish hajmi yoki iqtisodiy koʻrsatkichlar bilan emas, balki uning inson kapitali, korporativ madaniyati va jamoadagi sogʻlom muhit bilan ham belgilanadi.

Shu nuqtayi nazardan, 25 yillik yubiley tadbiri “Shoʻrtan gaz kimyo majmuasi”da shakllangan jamoaviy birdamlikning yorqin ifodasi boʻldi.

Tadbir xodimlar oʻrtasidagi oʻzaro hurmat va hamjihatlikni yanada kuchaytirdi, yosh avlodda korxonaga daxldorlik tuygʻusini mustahkamladi, faxriylar va bugungi avlod oʻrtasidagi maʼnaviy bogʻliqlikni jipslashtirdi. Eng muhimi — har bir xodim oʻz mehnati majmua tarixining bir qismi ekanini yana bir bor his qildi. “Daraxt ildizi bilan, inson doʻstlari va safdoshlari bilan qudratlidir” -degan aytimlar tadbirning tub mohiyatini o`zida aks ettirdi.

Bugun “Shoʻrtan gaz kimyo majmuasi” oldida yangi vazifalar turibdi. Ilg`or texnologiyalarni joriy etish, ishlab chiqarish samaradorligini oshirish, mehnat unumdorligini yuksaltirish, texnologik va ekologik barqarorlikni taʼminlash, inson kapitali salohiyatidan yanada samarali foydalanish, kam xarajat bilan koʻp foyda olish — kelgusi taraqqiyotning muhim omillaridir.

Kechagi avlod yaratgan poydevor bugungi avlod uchun tajriba boʻlsa, bugungi natijalar ertangi avlod uchun yangi imkoniyatlar manbaiga aylanadi.

Zero, katta natijalar ortda katta jamoaning mehnati turadi. 25 yillik tarixni raqamlar bilan ifodalash mumkin. Ammo uning haqiqiy qiymati — insonlar mehnati, sadoqati va ishonchida. Shoʻrtanning bugungi salohiyati ham, ertangi taraqqiyoti ham ana shu insonlarga bogʻliq.

Kasaba uyushmasi aʼzosi sifatida meni eng quvontirgani — xodimlarning yuzidagi tabassum va ularga koʻrsatilgan yuksak eʼtibor boʻldi. Ilgʻor hamkasblarimizning rahbariyat tomonidan munosib ragʻbatlantirilishi butun jamoaga juda katta motivatsiya va yangi kuch bagʻishladi.

Fursatdan foydalanib, ushbu katta toʻyni tashkil etishda bizni har tomonlama qoʻllab-quvvatlagan “Oʻzbekneftgaz” AJ Boshqaruvi, “Shoʻrtan gaz kimyo majmuasi” va Birlashgan kasaba uyushmasi qoʻmitasi rahbariyatga va ahil jamoamizga oʻz minnatdorchiligimni bildiraman. 25 yillik ildizimiz yanada baquvvat boʻlib, yangi marralarni birgalikda zabt etaveramiz.

Habibulla Azizov,

“Oʻzbekneftgaz” AJ Birlashgan kasaba uyushmasi

qoʻmitasi raisi oʻrinbosari

"Bu majmua — inson mehnati va qadriga boʻlgan eʼtibor ifodasi" — A. Sanginov

2026-09-09T10:00:07.194Z

Bugungi kunda “Oʻzbekneftgaz” AJ tizimida davlatimiz rahbari tomonidan ilgari surilayotgan inson qadrini ulugʻlash va odamlarni rozi qilish tamoyili asosiy mezonga aylangan. Jamiyat Boshqaruvi Raisi Abdugʻani Sanginov rahbarligida xodimlarning ijtimoiy himoyasini kuchaytirish hamda farovonligini taʼminlash ishlari yangi bosqichga koʻtarildi.

Bu eʼtiborning amaliy ifodasi sifatida, bugun — 9-sentabr kuni Ustyurt gaz qazib chiqarish boshqarmasi obyektlarining asosiy qismi joylashgan Moʻynoq tumanida yana bir muhim ijtimoiy majmua foydalanishga topshirildi. “Uchsoy” shaharchasida xodimlar uchun yangidan qurilgan zamonaviy majmuaning tantanali ochilish marosimi boʻlib oʻtdi. Yangi majmua nafaqat ishchi-xizmatchilar uchun qulay sharoit yaratish, balki chekka hududlarda mehnat qilayotgan mutaxassislarni qoʻllab-quvvatlash va ular uchun munosib yashash sharoitlarini taʼminlashga qaratilgani bilan ahamiyatli.

Majmua 144 oʻrinli shinam yotoqxona, 80 oʻrinli zamonaviy oshxona, yangi maʼmuriy bino hamda sport va sogʻlomlashtirish maydonini oʻz ichiga olgan boʻlib, ishchi-xodimlarning madaniy va maishiy ehtiyojlarini toʻliq taʼminlashga xizmat qiladi.

Tadbirda “Oʻzbekneftgaz” AJ Boshqaruv raisi A.Sanginov, Qoraqalpogʻiston Respublikasi Vazirlar Kengashi raisi Farhod Ermanov, Moʻynoq tuman hokimi Baxtiyar Menglibekovlar hamda nuroniylar, soha vakillari ishtirok etdi.

Tadbirning eng hayajonli va tarixiy voqealaridan biri — “Uch avlod stellasining ochilishi boʻldi.

— Biz bugun shunchaki yangi bino yoki stella ochmayapmiz, balki inson mehnatiga boʻlgan yuksak hurmat va avlodlar davomiyligiga muhr qoʻyapmiz. Poydevorsiz bino boʻlmaganidek, ustozsiz kasb, oʻtmishsiz esa kelajak boʻlmaydi. Tizimda kim qayerda va qanday ogʻir sharoitda ishlashidan qatʼi nazar, har bir xodimimiz uchun munosib sharoit yaratish borasidagi ishlarimiz izchil davom etadi. Ustozlar qadrlangan joyda inson qadri yuksaladi, mehnatga hurmat va kelajakka ishonch mustahkamlanadi, — dedi tadbirni kirish soʻzi bilan ochib bergan “Oʻzbekneftgaz” AJ Boshqaruv raisi.

Tantanali marosim doirasida koʻp yillar davomida soha rivojiga hissa qoʻshgan zahmatkash faxriylar va ayni paytda fidokorona mehnat qilayotgan bir guruh Ustyurt gaz qazib chiqarish boshqarmasi xodimlariga hamda Rossiyada boʻlib oʻtgan nufuzli “PROFNEFT” xalqaro kasb mahorati tanlovida 1-oʻrinni qoʻlga kiritgan “Ustyurt geofizika ekspeditsiyasi” filialining Ustyurt kon-geofizika partiyasi xodimlariga qimmatbaho esdalik sovgʻalari va Boshqaruv raisining faxriy yorliqlari topshirildi. Ushbu eʼtibor soha xodimlariga boʻlgan yuksak hurmat va ehtiromning yana bir yorqin namunasi boʻldi.

Mehmonlar majmuada yaratilgan yuqori darajadagi sharoitlar va qulayliklar bilan yaqindan tanishdilar. Ishchi-xodimlar yangi ishga tushirilgan, bayramona bezatilgan oshxonaning ilk mehmonlari sifatida tushlik qildilar. Toʻkin dasturxon atrofidagi bayram tadbiri Moʻynoq tumani milliy folklor “Aydin” ashiqlar ansamblining kuy-qoshiqlari va jozibali konsert dasturi bilan davom etdi.

Qayd etish joizki, umumiy maydoni 110 ming kv.km boʻlgan Ustyurt mintaqasining 98 foizi neft va gazga boy istiqbolli hudud hisoblanadi. Bu yerda geologiya-qidiruv ishlari 1960-yillardan boshlangan boʻlib, mustaqillik yillarida 25 ta gazkondensat koni kashf etilishi natijasida, 1997-yilda konlarni tizimli boshqarish uchun Ustyurt gaz qazib chiqarish boshqarmasi tashkil etilgan.

Bugungi kunda boshqarmada 939 nafar ishchi-xodim faoliyat yuritmoqda. Ayni paytda korxona tomonidan 13 ta gaz va gazkondensat konlari hamda 299 ta quduq samarali ishlatilmoqda.

"Oʻzbekneftgaz" AJ Axborot xizmati

Shoʻrtanda yarim yillik natijalar tanqidiy tahlil qilindi: ikkinchi yarim yillik uchun ustuvor vazifalar belgilandi

2026-07-31T12:40:44.718Z

Shoʻrtan neft va gaz qazib chiqarish boshqarmasida “Oʻzbekneftgaz” AJ Boshqaruv raisi oʻrinbosari A.Xudoyberganov rahbarligida 2026-yilning yanvar–iyun oylaridagi ishlab chiqarish faoliyati yakunlariga bagʻishlangan tanqidiy-tahliliy yigʻilish boʻlib oʻtdi.

Unda boshqarma rahbariyati, tarkibiy boʻlinmalar boshliqlari, mutaxassislar hamda masʼul xodimlar ishtirok etdi. Hisobot davridagi ishlab chiqarish natijalari atroflicha tahlil qilinib, erishilgan koʻrsatkichlar, mavjud muammo va kamchiliklar hamda ikkinchi yarim yillikda amalga oshirilishi lozim boʻlgan ustuvor vazifalar muhokama qilindi.

Taʼkidlanganidek, joriy yil birinchi yarim yilligida tabiiy gaz qazib chiqarish rejasi 100,4 foizga bajarilgan boʻlsada, asosiy konlarda zaxiralarning tabiiy kamayishi va ayrim quduqlar debitining pasayishi natijasida tabiiy gaz qazib chiqarish hajmi oʻtgan yilning mos davriga nisbatan kamayganini koʻrsatmoqda.

Yigʻilishda mazkur holatga taʼsir etuvchi omillar tanqidiy tahlil qilinib, texnologik obyektlarning uzluksiz va ishonchli ishlashini taʼminlash, quduqlarni taʼmirlash va rekonstruksiya qilish ishlarini jadallashtirish, geologiya-qidiruv ishlarini kengaytirish hamda yangi istiqbolli maydonlarni oʻzlashtirish boʻyicha aniq vazifalar belgilandi.

Shuningdek, ishlab chiqarish quvvatlaridan samarali foydalanish, energiya resurslarini tejash, mahsulot tannarxini kamaytirish, mehnat unumdorligini oshirish va ijro intizomini yanada mustahkamlash masalalariga alohida eʼtibor qaratildi.

Muhokamada joriy yilning ikkinchi yarimi uchun tabiiy gaz qazib chiqarish hajmlarini barqarorlashtirish, investitsiya loyihalarini belgilangan muddatlarda amalga oshirish, yangi quduqlarni burgʻilab foydalanishga topshirish, raqamli texnologiyalarni keng joriy etish hamda ishlab chiqarish samaradorligini yanada oshirish ustuvor vazifalar sifatida belgilandi.

Yigʻilish yakunida masʼul rahbar va mutaxassislarga aniqlangan kamchiliklarni qisqa muddatlarda bartaraf etish, berilgan topshiriqlar ijrosini qatʼiy taʼminlash hamda yil yakuniga qadar barcha ishlab chiqarish koʻrsatkichlarini toʻliq bajarish yuzasidan tegishli topshiriqlar berildi.

“Shoʻrtan NGQCHB” Matbuot xizmati

Shoʻrtan neft gaz qazib chiqarish boshqarmasida sayyor qabul oʻtkazildi

2026-07-31T12:17:02.282Z

Shoʻrtan neft gaz qazib chiqarish boshqarmasida "Oʻzbekneftgaz" AJ Boshqaruv raisining qayta ishlash masalalari boʻyicha oʻrinbosari A.Xudoyberganov ishtirokida boshqarma ishchi-xodimlari bilan navbatdagi sayyor qabul tashkil etildi.

Mazkur sayyor qabuldan koʻzlangan asosiy maqsad ishlab chiqarish jarayonlarida faoliyat yuritayotgan xodimlarning murojaatlari, taklif va tashabbuslarini bevosita tinglash, ularni oʻylantirayotgan masalalarni joyida oʻrganish hamda mavjud muammolarga amaliy yechim topishdan iborat boʻldi.

Ochiq va samimiy muloqot ruhida oʻtgan qabul davomida xodimlar tomonidan korxona faoliyatini yanada takomillashtirish, mehnat unumdorligini oshirish, ilmiy-innovatsion faoliyatni rivojlantirish hamda xodimlarni ijtimoiy va moddiy qoʻllab-quvvatlashga doir qator muhim takliflar bildirildi.

Xususan, ishlab chiqarish samaradorligini oshirishga xizmat qiluvchi ratsionalizatorlik takliflarini kengroq qoʻllab-quvvatlash, amaliyotga tatbiq etilgan tashabbuslar mualliflarini munosib ragʻbatlantirish hamda mazkur tizimni yanada takomillashtirish yuzasidan fikr-mulohazalar bildirildi.

Shuningdek, xalqaro IELTS hamda davlat tomonidan tan olingan milliy til sertifikatiga ega boʻlgan xodimlarni moddiy ragʻbatlantirish tizimini qayta joriy etish, bu orqali xodimlarning xorijiy tillarni oʻrganishga boʻlgan qiziqishini yanada oshirish taklif etildi.

Muloqot davomida xodimlarning ijtimoiy himoyasini kuchaytirish maqsadida avval amalda boʻlgan 13 oylik ish haqini qayta joriy etish masalasi ham koʻtarildi.

Bundan tashqari, ish haqi nisbatan kam boʻlgan xodimlarning mehnat yuklamasi, bajarilayotgan ish hajmi va lavozim maoshlarini qayta tahlil qilish hamda ushbu masalalarni adolat tamoyillari asosida ijobiy hal etish yuzasidan takliflar ilgari surildi.

Ilm-fan va innovatsiyalarni qoʻllab-quvvatlash masalasiga alohida eʼtibor qaratilib, PhD ilmiy darajasi uchun ilmiy izlanishlar olib borayotgan xodimlarga zarur sharoitlar yaratish, ilmiy faoliyat bilan shugʻullanishlari uchun amaliy koʻmak berish, ularni har tomonlama qoʻllab-quvvatlash va ragʻbatlantirish boʻyicha ham takliflar bildirildi.

Sayyor qabul davomida bildirilgan barcha murojaat, taklif va tashabbuslar tinglanib, ularni amaldagi meʼyoriy hujjatlar hamda mavjud imkoniyatlar doirasida oʻrganish, tegishli mutaxassislar ishtirokida koʻrib chiqish va ijobiy yechim topish boʻyicha masʼullarga topshiriqlar berildi.

“Shoʻrtan NGQChB” Matbuot xizmati

“O‘zbekneftgaz” AJ biznes hamjamiyati bilan strategik hamkorlikni mustahkamlamoqda

2026-07-31T12:12:21.951Z

Bugun Buxoro viloyatining Qorovulbozor tumanida “O‘zbekneftgaz” AJ rahbariyati tomonidan mahalliy tadbirkorlar, ishlab chiqarish sohasi va akademik doira vakillari bilan uchrashuv o‘tkazildi.

Unda Boshqaruv raisi o‘rinbosari, departamentlar rahbarlari, Buxoro NQIZ rahbariyati, Davlat xaridlari agentligi vakillari, shuningdek sanoat korxonalari va yetakchi ilmiy-tadqiqot institutlari vakillari ishtirok etishdi.

Tadbir O‘zbekiston Prezidenti bilan biznes hamjamiyati o‘rtasida an’anaviy yillik uchrashuvga tayyorgarlik doirasida ochiq muloqot shaklida tashkil etildi.

Uchrashuvning asosiy yo‘nalishi mahalliy ishlab chiqaruvchilar bilan ishonchli va uzoq muddatli hamkorlikni yo‘lga qo‘yish, shuningdek mamlakat sanoat salohiyatini rivojlantirish uchun samarali qo‘shma yechimlarni izlashdan iborat bo‘ldi.

Ochiqlik ruhida o‘tgan muloqotda ishtirokchilar neft-gaz kompleksi obyektlarida kooperatsiya aloqalarini kengaytirish hamda mahalliy innovatsion ishlanmalarni joriy etish imkoniyatlarini muhokama qilishdi.

Biznes vakillari o‘z ishlab chiqarish imkoniyatlarini taqdim etdi, ish jarayonlarini optimallashtirish bo‘yicha takliflar bildirishdi hamda hamkorlikni yanada chuqurlashtirishga qaratilgan tashabbuslarni ilgari surishdi.

O‘z navbatida, “O‘zbekneftgaz” AJ rahbariyati mahalliy hamkorlar uchun eng qulay shart-sharoitlarni yaratishga qiziqish bildirdi. Kompaniyaning o‘zaro hamkorlik mexanizmlarini takomillashtirishga tayyorligi ta’kidlanib, jumladan tajriba-sanoat sinovlaridan o‘tish jarayonlarini soddalashtirish, xarid qilinadigan mahsulotlar bo‘yicha to‘liq shaffoflikni ta’minlovchi ochiq raqamli xizmatlarni joriy etish, shuningdek amaliy ilmiy tadqiqotlarni har tomonlama qo‘llab-quvvatlash masalalariga alohida e’tibor qaratildi.

“Buxoro NQIZ” PR-xizmati

Javobgarlik chegarasi aniq boʻlsa, mavsumga tayyorgarlik ham puxta boʻladi

2026-07-30T12:59:19.251Z

“Oʻzbekneftgaz” AJda Boshqaruv raisi ishtirokida kuz-qish mavsumiga tayyorgarlik, ishlab chiqarish barqarorligi hamda tabiiy gaz qazib chiqarish koʻrsatkichlarini taʼminlash masalalariga bagʻishlangan tanqidiy-tahliliy yigʻilish oʻtkazildi.

Unda Prezidentimiz tomonidan yoqilgʻi-energetika sohasi oldiga qoʻyilgan vazifalar — aholi, ijtimoiy soha obyektlari va iqtisodiyot tarmoqlarini energiya resurslari bilan barqaror taʼminlash, mavsumga tayyorgarlik ishlarini oʻz muddatida va sifatli yakunlash hamda avariyalarning oldini olish talablari asosiy mezon sifatida belgilandi.

Boshqaruv raisi taʼkidlaganidek, bugungi asosiy vazifa — ishlarni toʻgʻri tashkil etish, har bir yoʻnalish boʻyicha masʼullarni aniq belgilash va kuz-qish mavsumiga puxta tayyorgarlikni amalda taʼminlashdan iborat. Shu maqsadda qazib chiqarish boshqarmalari, burgʻilash, taʼmirlash, texnologik obyektlar, elektr taʼminoti va kompressor stansiyalaridagi mavjud holatlar tahlil qilindi.

Yigʻilishda avariyaviy toʻxtalishlar alohida muhokama qilindi. Quvur va shleyflarda sizib chiqish holatlari, elektr energiyasi taʼminotidagi uzilishlar, texnologik qurilma va uskunalardagi nosozliklar boshqarmalar kesimida koʻrib chiqilib, ularning har biri boʻyicha sabab va oqibat emas, balki oldini olish mexanizmlari asosiy eʼtibor markaziga qoʻyildi.

“Ishchi kuchi ham, mablagʻ ham yetarli boʻlgan sharoitda avariyasiz ishlashni taʼminlash — har bir rahbarning shaxsiy masʼuliyatidir”, — dedi Boshqaruv raisi. Mavsumga tayyorgarlik qogʻozdagi reja bilan emas, har bir obyektda amaliy natija, texnik shaylik va intizom bilan baholanishi taʼkidlandi.

Shuningdek, Boshqaruv raisi avariyalar boʻyicha javobgarlik chegarasini aniq belgilash zarurligini qayd etdi. Jumladan, qazib chiqarish boshqarmalari quduqlarning ekspluatatsiyasi va kunlik barqaror ishlashi uchun masʼul boʻlishi, burgʻilash, taʼmirlash, sozlash, elektr taʼminoti va texnologik ishlar esa tegishli korxona va xizmatlar javobgarligi doirasida qatʼiy nazorat qilinishi belgilab qoʻyildi.

Shu asosda maxsus ishchi guruh tuzilib, sozlash va taʼmirlash ishlari, elektr taʼminoti, texnologik qurilmalar holati hamda kompressor stansiyalarining barqaror faoliyatini joylarda oʻrganish va aniqlangan kamchiliklarni tezkor bartaraf etish boʻyicha topshiriqlar berildi.

Shuningdek, xodimlar uchun munosib mehnat va yashash sharoitlarini yaratish masalasi ham eʼtibordan chetda qolmadi. Gazli neft va gaz qazib chiqarish boshqarmasidagi 160 oʻrinli ishchilar yotoqxonasini tezroq fursatda qurib, sovuq mavsum oldidan foydalanishga topshirish, zarurligi aytildi.

Taʼkidlanganidek, Prezident topshiriqlariga hamohang ravishda kuz-qish mavsumiga tayyorgarlikda eng muhim talab — masʼuliyatni umumiy gaplar bilan emas, aniq ijrochilar, muddatlar va natijalar bilan belgilashdir. "Zero, javobgarlik chegarasi aniq boʻlgan joyda ish ham puxta tashkil etiladi, mavsum ham barqaror oʻtadi", - dedi Boshqaruv raisi.

"Oʻzbekneftgaz" AJ Axborot xizmati

AQSH kompaniyasi bilan hamkorlikni kengaytirish masalalari muhokama qilindi

2026-07-30T12:21:41.859Z

“Oʻzbekneftgaz” AJda AQSHning muhandislik, loyihalarni boshqarish va texnologik yechimlar sohasidagi yetakchi kompaniyalaridan biri — “Kellogg Brown & Root” (KBR) delegatsiyasi bilan uchrashuv bo‘lib o‘tdi.

Qayd etish joizki, “KBR” kompaniyasi “Shell”, “ExxonMobil”, “Chevron”, “BP”, “Saudi Aramco”, “ADNOC”, “TotalEnergies”, “SOCAR” kabi yirik xalqaro kompaniyalar uchun murakkab sanoat va energetika loyihalarini muvaffaqiyatli amalga oshirib kelmoqda.

Muloqot davomida neft va gaz sanoatida amalga oshirilayotgan hamda rejalashtirilayotgan investitsiya loyihalari doirasida o‘zaro hamkorlikni kengaytirish masalalari muhokama qilindi. Xususan, zamonaviy muhandislik yechimlarini joriy etish, loyihalash jarayonlarini takomillashtirish, loyihalarni boshqarish, texnik ekspertiza o‘tkazish, xalqaro standartlar asosida loyiha hujjatlarini ishlab chiqish hamda yirik sanoat obyektlarini samarali va belgilangan muddatlarda ishga tushirish bo‘yicha fikr almashildi.

Uchrashuv yakunida tomonlar hamkorlikni yanada rivojlantirish, istiqbolli loyihalar bo‘yicha amaliy muloqotni davom ettirish hamda o‘zaro manfaatli yo‘nalishlarda sheriklikni kengaytirish yuzasidan kelishuvga erishdi.

"O‘zbekneftgaz" AJ Axborot xizmati

Korrupsiyaga qarshi profilaktik tadbirlar davom etmoqda

2026-07-30T12:02:43.332Z

“Oʻzbekneftgaz” AJ Korrupsiyaga qarshi ichki nazorat departamenti tomonidan “Termiz neft bazasi” MCHJda korrupsiyaning oldini olish, xodimlar oʻrtasida halollik tamoyillarini mustahkamlash hamda korrupsiyaga qarshi madaniyatni yuksaltirishga qaratilgan profilaktik tadbir oʻtkazildi.

Unda korrupsiyaning kelib chiqish sabablari va shart-sharoitlarini barvaqt aniqlash, ularning oldini olish boʻyicha chora-tadbirlarni kuchaytirish, xizmat vazifalarini halol va vijdonan bajarish, manfaatlar toʻqnashuviga yoʻl qoʻymaslik hamda komplayens talablariga qatʼiy rioya etish masalalari yuzasidan tushuntirish ishlari olib borildi.

Shuningdek, xodimlarga korrupsiyaviy xavf-xatarlarni oʻz vaqtida aniqlash va bartaraf etish, tashkilotda ochiqlik va shaffoflikni taʼminlash, ichki nazorat mexanizmlarining samaradorligini oshirish hamda har bir xodimning shaxsiy masʼuliyatini kuchaytirish yuzasidan amaliy tavsiyalar berildi.

Tadbir ishtirokchilariga korrupsiya bilan bogʻliq huquqbuzarliklarning salbiy oqibatlari, ularning oldini olishda har bir xodimning faol ishtiroki muhimligi, shuningdek, tashkilotda halollik va qonuniylik muhitini mustahkamlash boʻyicha olib borilayotgan ishlar haqida maʼlumotlar taqdim etildi.

“Oʻzbekneftgaz” AJ Axborot xizmati