UZBEKNEFTEGAZ_LOT

Tashabbus va mas’uliyat: Boshqaruv raisiga bevosita bo‘ysunuvchi departamentlar faoliyati tanqidiy tahlil qilindi

2026-04-11T10:42:03.541Z

Joriy yilning birinchi choragi yakunlariga bag‘ishlangan navbatdagi hisobot yig‘ilishi Jamiyat Boshqaruv raisi Abdug‘ani Sanginov rahbarligida bo‘lib o‘tdi. Unda maslahatchilar, Ijro intizomini nazorat qilish va boshqaruv apparati bilan ishlash, Yuridik, Inson resurslarini boshqarish va rivojlantirish, Sanoat xavfsizligi va mehnatni muhofaza qilish, Markaziy ishlab chiqarish-dispetcherlik departamentlari va Korporativ kotibiyat mas’ullari ishtirok etdi.

Yig‘ilishda Boshqaruv raisi to‘g‘ridan to‘g‘ri bo‘ysunuvchi departament va xizmatlar faoliyatiga alohida to‘xtalib, ularning mas’uliyati ikki barobar yuqori bo‘lishi, boshqa tuzilmalarga namuna bo‘lishi zarurligini ta’kidladi. Shu bilan birga, faqat ijrochi emas, balki tashabbuskorlik ruhini kuchaytirish muhimligi qayd etildi.

Tahlillar shuni ko‘rsatdiki, yil boshida berilgan topshiriqlarning ijro ko‘rsatkichlari qoniqarli emas. Ayniqsa, jamiyat manfaatlari bilan bog‘liq sud ishlarini jadallashtirish, qarzdorliklarni undirishdagi sustkashliklarga chek qo‘yish bo‘yicha aniq topshiriqlar berildi.

Markaziy ishlab chiqarish-dispetcherlik yo‘nalishida esa qazib chiqarish va ishlab chiqarish jarayonlarini to‘liq raqamlashtirish zarurligi alohida ta’kidlandi. Har bir mahsulot hajmini — qancha qazib olinayotgani, ishlab chiqarilayotgani va sotilayotganini aniq hisobga olish faqat raqamli tizimlar orqali ta’minlanishi qayd etildi. Shuningdek, barcha ishlab chiqarish zanjirlarida miqdorlarning shaffofligini ta’minlash bo‘yicha vazifalar belgilab berildi.

Yig‘ilishda kasaba uyushmasi, matbuot xizmati, yoshlar va xotin-qizlar bilan ishlash masalalariga ham e’tibor qaratildi. Bu yo‘nalishlarda tashabbuslar yetishmayotgani tanqid qilinib, muammolarni joyida hal qilish, quyi bo‘g‘in tizimini samarali ishlatish bo‘yicha zarur topshiriqlar berildi.

Yoshlar siyosati doirasida esa til o‘rgatish bo‘yicha grantlar jalb qilinishi, ushbu mablag‘lar sohani rivojlantirishga maqsadli yo‘naltirilishi lozimligi ta’kidlandi.

Kasaba uyushmasi tizimida xodimlarni gigiyenik vositalar bilan ta’minlash holati tanqidiy ko‘rib chiqildi. Shuningdek, chat-bot orqali kelib tushayotgan takliflar asosida, qulay mexanizmlarni joriy etish bo‘yicha mas’ullarga taklif ishlab chiqish vazifasi yuklatildi.

“O‘zbekneftgaz” AJ Axborot xizmati

Iqtisodiy islohotlar natijadorligi – eng avvalo ishchilar manfaatidir

2026-04-10T10:25:36.223Z

Ana shu tamoyil bugun “Oʻzbekneftgaz” AJ tizimida olib borilayotgan barcha oʻzgarishlarning bosh mezoniga aylanib bormoqda. Jamiyat Boshqaruv raisi Abdugʻani Sanginov boshchiligida oʻtkazilgan joriy yilning birinchi choragi yakunlariga bagʻishlangan navbatdagi hisobot yigʻilishida iqtisodiy blok faoliyati atroflicha tahlil qilinib, erishilgan natijalar va kelgusi vazifalar belgilab olindi. Unda moliya, buxgalteriya, gʻaznachilik, xalqaro hisobot, aktivlarni boshqarish, soliq, kreditlar va ESG kabi koʻplab yoʻnalishlar masʼullari ishtirok etdi.

Hisobot davrida amalga oshirilgan iqtisodiy islohotlar oʻz samarasini bergani qayd etildi. Xususan, yirik ishlab chiqarish korxonalari – Buxoro neftni qayta ishlash zavodi, Shoʻrtan gaz kimyo majmuasi va "Uzbekistan GTL" zavodlari oʻtgan yilning mos davriga nisbatan foydaga chiqqan.

Debitor qarzdorliklarni qisqartirish boʻyicha koʻrilgan choralar ham ijobiy natija berdi. Muammoli qarzdorliklar bosqichma-bosqich undirilib, moliyaviy aylanma mablagʻlar samaradorligi oshirildi. Bu esa jamiyatning likvidlik darajasini mustahkamlashga xizmat qilmoqda.

Boshqaruv raisi taʼkidlaganidek, iqtisod boʻyicha qabul qilinayotgan har bir qaror avvalo, gaz qazib chiqarish, qayta ishlashni koʻpaytirish va ishchi-xizmatchilar farovonligiga xizmat qilishi shart.

Jamiyatda moliyaviy barqarorlikni taʼminlash orqali ish haqini oʻz vaqtida toʻlash, uni bosqichma-bosqich oshirish, ijtimoiy kafolatlarni kuchaytirish, kabi muhim vazifalar amalga oshirilmoqda.

Shuningdek, foydalanilmayotgan yer maydonlari hamda obyektlarni konservatsiya qilish ishlarini jadallashtirish orqali soliq yuki optimallashtirilmoqda.

Yigʻilishda ESG (ekologik, ijtimoiy va korporativ boshqaruv) yoʻnalishiga alohida eʼtibor qaratildi. Jamiyatning xalqaro reytingdagi oʻrnini yaxshilash maqsadida uni 50-pogʻonadan 65-pogʻonaga koʻtarish boʻyicha aniq vazifalar belgilab berildi. Bu borada ekologik masʼuliyatni oshirish, korporativ shaffoflikni taʼminlash, ijtimoiy loyihalarni kengaytirish kabi ustuvor yoʻnalishlar tilga olindi.

Yigʻilishda barcha boshqarmalarda gaz va undan olinadigan mahsulotlar harakatini toʻliq raqamlashtirish — bugungi kunning eng ustuvor vazifalaridan biri sifatida belgilab berildi. Yaʼni, har bir kondan olinayotgan gaz hajmidan tortib, uni qayta ishlash jarayonlari va yakuniy mahsulot sifatida zavoddan chiqishiga qadar boʻlgan barcha bosqichlar aniq hisob-kitob va nazoratga olinishi shart.

“Bu boylik — xalqniki. Shuning uchun uning har bir hissasi ustidan qatʼiy nazorat oʻrnatish, noqonuniy yoʻqotishlarga yoʻl qoʻymaslik bizning eng muhim vazifamizdir. Raqamlashtirish esa bu boradagi eng ishonchli va zamonaviy yechimdir”, — deya qayd etildi.

Agar har kim oʻz vazifasini sidqidildan bajarib, kamchiliklarini tan olib, ularni bartaraf etishga qatʼiyat bilan yondashsa, shundagina islohotlar amalda oʻz samarasini berishi qayd etildi.

Bajarilmay qolgan ayrim topshiriqlar tanqidiy koʻrib chiqilib, ularni tezkor bartaraf etish boʻyicha aniq choralar belgilab olindi.

“Oʻzbekneftgaz” AJ Axborot xizmati

Yirik ekologik loyiha: yiliga 421 ming m³ suv iqtisod qilinadi

2026-04-10T05:53:17.140Z

Global iqlim oʻzgarishi va suv taqchilligi sharoitida tabiiy resurslardan samarali foydalanish dolzarb vazifaga aylanmoqda. Shu maqsadda “Oʻzbekneftgaz” AJ tizimidagi Shoʻrtan gaz kimyo majmuasida yangi ekologik loyiha amalga oshirilmoqda.

Loyiha doirasida oqova suvlarni chuqur tozalash va qayta foydalanish tizimi joriy etiladi. Ilgari tozalash imkoniyatlari cheklangani sabab suvning bir qismi tashqi tarmoqlarga chiqarilar edi. Yangi texnologiyalar esa bu muammoni bartaraf etadi.

Modernizatsiya jarayonida yangi yogʻ tutgich inshooti quriladi va aktivlashtirilgan koʻmir filtrlari orqali zararli moddalar 10 barobarga kamaytiriladi.

Natijada oqova suvlar toʻliq tozalanib, qayta ishlatiladi. Yiliga 421 ming m³ toza suv iqtisod qilinadi, tozalangan suvlar koʻkalamzorlashtirishga yoʻnaltiriladi.

Loyihaning qiymati 2,5 mlrd soʻmni tashkil etib, sarflangan mablagʻ resurs tejash hisobiga oʻzini oqlashi kutilmoqda.

Loyihani 2027-yil II-choragiga qadar yakunlash rejalashtirilgan. Bu tashabbus ekologik barqarorlikni taʼminlash va “yashil iqtisodiyot”ni rivojlantirishda muhim qadam hisoblanadi.

“Oʻzbekneftgaz” AJ Axborot xizmati

Muborak zavodi xodimlari uchun sayohat va davra suhbati oʻtkazildi

2026-04-10T05:24:33.896Z

“Oʻzbekneftgaz” AJ Boshqaruvi raisi tomonidan olib borilayotgan izchil islohotlar doirasida xodimlarning ijtimoiy faolligi va masʼuliyatini oshirishga qaratilgan qator tadbirlar amalga oshirilmoqda.

Shu maqsadda kasaba uyushmalari tomonidan ishchi-xodimlar uchun maʼnaviy-maʼrifiy sayohat tashkil etildi. Tadbir Amir Temur tavalludining 690-yilligi munosabati bilan oʻtkazilib, unda Muborak gazni qayta ishlash zavodi xodimlari ishtirok etdilar.

Sayohat davomida ishtirokchilar tarixiy obidalar va muzey eksponatlari bilan yaqindan tanishib, xalqimizning boy madaniy merosi, milliy qadriyatlari va koʻp asrlik tarixi haqida batafsil maʼlumotlarga ega boʻldilar.

Shuningdek, “Oʻzbekneftgaz” AJ Birlashgan kasaba uyushma qoʻmitasi raisi U. Gaziyev boshchiligida Muborak gazni qayta ishlash zavodi kasaba uyushma faollari ishtirokida ishchi-xodimlar bilan ochiq muloqot va davra suhbati tashkil etildi.

Muloqot davomida kasaba uyushmalarining xodimlar manfaatlarini himoya qilishdagi oʻrni, mehnat sharoitlarini yaxshilash boʻyicha amalga oshirilayotgan ishlar, jamoa shartnomasining mazmun-mohiyati keng tushuntirildi. Shu bilan birga, ishchi-xodimlar tomonidan berilgan savollarga atroflicha javoblar berildi.

Mazkur tadbir xodimlarning boʻsh vaqtini mazmunli tashkil etish, jamoada birdamlik muhitini mustahkamlash, ichki turizmni qoʻllab-quvvatlash hamda jamiyatda amalga oshirilayotgan islohotlarga faol ishtirok etishga undashda muhim ahamiyat kasb etdi.

"Oʻzbekneftgaz" AJ Axborot xizmati

Xitoy kompaniyasi gazni qayta ishlash zavodidagi raqamlashtirish jarayonlari bilan tanishdi

2026-04-09T05:31:26.441Z

“O‘zbekneftgaz” AJ Boshqaruv raisining topshirig‘iga asosan Muborak gazni qayta ishlash zavodiga Xitoy Xalq Respublikasining nufuzli CPECC (China Petroleum Engineering & Construction Corporation) kompaniyasi vakillaridan iborat delegatsiya tashrif buyurdi.

Delegatsiya a’zolari zavodda amalga oshirilayotgan raqamlashtirish va avtomatlashtirish jarayonlari, shuningdek ishlab chiqarish samaradorligini oshirishga qaratilgan zamonaviy boshqaruv yechimlari bilan yaqindan tanishdilar.

Xususan, nordon gazlar tarkibidan oltingugurt ajratib olish qurilmasidagi uchta blokning ASUTP va nazorat-o‘lchov asboblari tizimlarini modernizatsiya qilish orqali texnologik jarayonlarni boshqarish sifatini oshirish, inson omilini kamaytirish hamda ishonchlilikni ta’minlash bo‘yicha amalga oshirilayotgan ishlar muhokama qilindi.

Shuningdek, uchrashuv doirasida mavjud bug‘ energiyasidan samarali foydalanish, bug‘ turbinasi orqali elektr energiyasi ishlab chiqarish imkoniyatlarini kengaytirish, energiya resurslaridan oqilona foydalanish va ilg‘or texnologiyalarni joriy etish masalalariga alohida e’tibor qaratildi.

Tomonlar ishlab chiqarishni yanada takomillashtirish, energiya tejamkor texnologiyalarni keng joriy etish, xalqaro hamkorlikni rivojlantirish, mutaxassislar o‘rtasida tajriba almashish hamda istiqbolli innovasion loyihalarni birgalikda amalga oshirish imkoniyatlarini ko‘rib chiqdilar.

"O‘zbekneftgaz" AJ Axborot xizmati

Amir Temur merosi – zamonaviy nigohda: Xodimlar Islom sivilizatsiyasi markaziga ekskursiya qilishdi

2026-04-08T10:30:47.897Z

Sohibqiron Amir Temur tavalludining 690-yilligi munosabati bilan “Oʻzbekneftgaz” AJ Markaziy apparati, tizim korxona va tashkilotlarida faoliyat olib borayotgan ishchi-xodimlar uchun Islom sivilizatsiyasi markazida tarixchilar ishtirokida maʼrifiy uchrashuv hamda ekskursiya tashkil etildi.

Muloqotda olimlar tomonidan Amir Temurning davlat boshqaruvi, harbiy sanʼati, adolatli siyosati hamda ilm-fan va madaniyat rivojiga qoʻshgan ulkan hissasi haqida batafsil maʼlumotlar berildi. Shuningdek, uning “Kuch – adolatda” tamoyiliga asoslangan boshqaruv tizimi bugungi kunda ham oʻz dolzarbligini yoʻqotmaganligi alohida taʼkidlandi.

Tadbir savol-javoblar, ochiq muloqotlar ruhida oʻtib, xodimlarda tarixiy merosimizga boʻlgan qiziqishni yanada oshirishga xizmat qildi.

Mazkur maʼrifiy tadbirlar doirasida markaz fondini boyitish maqsadida “Oʻzbekneftgaz” AJ tomonidan mamlakatimizda amalga oshirilayotgan keng koʻlamli islohotlar, bunyodkorlik ishlari hamda ijtimoiy-iqtisodiy rivojlanish jarayonlarini aks ettiruvchi kitob va albomlar toʻplami taqdim etildi.

Shuningdek xodimlar Markazning zamonaviy kutubxonasidagi nodir qoʻlyozmalar va tarixiy manbalar bilan tanishish imkoniga ham ega boʻlishdi.

Ekskursiya davomida ishtirokchilar qadimgi davrlardan to bugungi kungacha boʻlgan tarixiy taraqqiyot bosqichlarini oʻzida mujassam etgan noyob ilmiy-tarixiy manbalar, qoʻlyozmalar va artefaktlarni zamonaviy interaktiv va multimedia vositalari orqali koʻzdan kechirdilar.

Ayniqsa, Markazda joriy etilgan ilgʻor texnologiyalar — raqamli panellar, 3D vizualizatsiyalar va multimedia taqdimotlar orqali tarixiy maʼlumotlarning jonli va taʼsirchan shaklda taqdim etilishi ishtirokchilarda katta taassurot qoldirdi.

“Oʻzbekneftgaz” AJ Axborot xizmati

Natija bor, intizom yetishmayapti: geologiya va qazib chiqarishda jiddiy kamchiliklar

2026-04-07T08:32:23.464Z

“Oʻzbekneftgaz” AJ Boshqaruv raisi Abdugʻani Sanginov ishtirokida masʼul yoʻnalishlar, departamentlarning joriy yil boshida belgilangan ustuvor vazifalar ijrosiga bagʻishlangan choraklik taqdimotlar sarhisobi boshlandi.

Dastlabki muhokamalar markazida sohaning hal qiluvchi yoʻnalishlari — geologiya, burgʻilash, konlarni ishlatish va qazib chiqarish jarayonlari boʻlib, ularning birinchi chorakdagi faoliyati tanqidiy va tahliliy koʻrib chiqildi. Unda Boshqaruv raisining oʻrinbosarlari va departament rahbarlari, “O’zbekgeofizika” AJ, “OʻZLITINEFTGAZ” AJ, “Neftgazmontaj” MCHJ, “UZ-GAZ PROJECTS” MCHJ boshliqlari hamda 4 ta neft va gaz qazib chiqarish boshqarmalari mutasaddilari videokonferens aloqa orqali ishtirok etdi.

Qayd etilganidek, davlat rahbari tomonidan jamiyat oldiga eng muhim vazifa sifatida geologiya-qidiruv ishlari samaradorligini oshirish, yangi gaz zaxiralarini aniqlash va ularni koʻpaytirish ustuvor yoʻnalish etib belgilab berilgan edi.

Shu maqsadda yer qaʼrini chuqur oʻrganishda nafaqat Geologiya qoʻmitasi bilan hamkorlik kengaytirilmoqda, balki tajribali xorijiy investorlar ham jalb qilinmoqda. Bu esa, sohaga zamonaviy yondashuvlar va qoʻshimcha moliyaviy resurslarni jalb qilish imkonini yaratmoqda.

Mazkur vazifalar ijrosi esa toʻgʻridan-toʻgʻri ikki muhim kompleks — Bosh geolog rahbarligidagi geologiya yoʻnalishi hamda Boshqaruv raisining qazib chiqarish va burgʻilash boʻyicha oʻrinbosari boshchiligidagi tegishli departamentlar faoliyatiga bogʻliq ekani qayd etildi.

Ayni paytda ushbu ikki kompleksda jami 152 ta shtat birligi mavjud. Eʼtiborli jihati shundaki, Jamiyat Markaziy apparatida maqbullashtirish choralari amalga oshirilganiga qaramasdan, mazkur yoʻnalishlarda qisqartirishlar boʻlmadi. Aksincha, boshqa boʻlimlar hisobiga qoʻshimcha yana 10 ta geolog shtat birligi joriy etildi.

Biroq, olib borilgan tahlillar geologiya yoʻnalishining joriy yil birinchi chorakdagi faoliyatida kutilgan natijalar bermaganini koʻrsatdi.

Gaz va gaz kondensati xajmini oʻstirishga qaramasdan, geologiya yoʻnalishidagi asosiy ishlar bajarilishida ortda qolishlar kuzatildi. Xususan, 3D seysmik-qidiruv ishlari rejasi 84,7 foizga, izlov-qidiruv burgʻilash ishlari esa 91,8 foizga bajarilgan, xolos.

Burgʻilash ishlarida ham shunga oʻxshash holat kuzatildi. Rejaga koʻra, 13 ta quduqni ishga tushirish belgilangan boʻlib, amalda ijrosi toʻliq taʼminlandi. Ammo, izlov-qidiruv quduqlari boʻyicha reja 10 ta boʻlgan boʻlsa, amalda 7 ta quduq ishga tushirilgan. Ishga tushirilishi rejalashtirilgan 3 ta quduqning dastlabki sinov ishlaridan sanoat miqyosidagi gaz oqimi olinmaganligi sababli ushbu quduqlarda sinov ishlari davom ettirilmoqda. Shu sababdan kunlik 500 ming kub metrgacha gaz qazib chiqarish imkoniyati boy berilmoqda.

Quduqlarni taʼmirlash ishlarida esa nisbatan ijobiy koʻrsatkichlar qayd etildi. Jami 25 ta quduqda taʼmirlash rejalashtirilgan boʻlsa, amalda 26 ta quduqda ishlar bajarildi. Joriy taʼmirlash ishlari ham rejadan ortiq bajarilib, 16 ta oʻrniga 17 ta quduq ishga tushirildi.

Boshqaruv raisi tomonidan joriy yil birinchi choragida yoʻl qoʻyilgan qoloqliklar — xususan, 3D seysmika, burgʻilash va murakkab taʼmirlash ishlaridagi kamchiliklarni birinchi yarim yillik yakunlariga qadar bartaraf etish boʻyicha qatʼiy topshiriqlar berildi.

Qazib chiqarish yoʻnalishida ham holat qoniqarli emasligi qayd etildi. Uglevodorodlarni qazib chiqarish boʻyicha 13 ta texnik tadbir rejalashtirilgan boʻlib, amalda 5 ta (38 %) tadbir bajarilgan. Texnologik tadbirlarning kechikishi natijasida kunlik gaz qazib chiqarish koʻrsatkichlari bajarilmagan.

Shu bilan birga, avariyaviy toʻxtalishlar soni ham oʻtgan yilning mos davriga nisbatan ortgani jiddiy tanqid qilinib, barcha boshqarmalarga elektr taʼminotini barqarorlashtirish, tizimlarni ishchi holatga keltirish, sozlash va sinovdan oʻtkazishni toʻliq amalga oshirish hamda eskirgan datchiklarni yangisiga almashtirish boʻyicha topshiriqlar berildi.

Yigʻilish yakunida yoʻl qoʻygan jiddiy kamchiliklari uchun masʼul departament rahbariga hayfsan berildi, Geologiya departamenti boʻlim boshligʻi egallab turgan lavozimidan ozod etildi. Shuningdek, samarasiz ishlagan deb topilgan departament xodimlari sonini 50 foizga qisqartirish chorasini koʻrib chiqish topshirigʻi berildi.

Yigʻilish yakunida barcha boshqarmalar oldiga tabiiy gaz qazib chiqarish koʻrsatkichlarini rejaga nisbatan barqaror oʻsish surʼati bilan taʼminlash topshirigʻi yana bir bor uqtirildi.

"Oʻzbekneftgaz" AJ Axborot xizmati

Komplayens nazorat: chorak sarhisobi va vazifalar ustuvorligi

2026-04-04T08:35:48.432Z

Taʼkidlash joizki, Prezidentimiz tashabbusi bilan mamlakatimizda korrupsiyaga qarshi kurashishda davlat siyosatining samarali amalga oshirilishini taʼminlash hamda ushbu illatning oqibati bilan emas, balki sabab va shart-sharoitlarini bartaraf etish boʻyicha milliy amaliyot tatbiq etilgan.

Bu borada davlatimiz rahbari taʼkidlaganidek, korrupsiya illatining oldi olinmasa, haqiqiy ishbilarmonlik va investitsiya muhitini yaratib boʻlmaydi, umuman, jamiyatning birorta tarmogʻi rivojlanmaydi.

“Oʻzbekneftgaz” AJ Boshqaruv raisining Komplayens va korrupsiyaga qarshi kurashish boʻyicha oʻrinbosari Zohid Karayev boshchiligida oʻtkazilgan yigʻilishda Jamiyat komplayens nazorat tizimining joriy yil 1-chorak faoliyati sarhisob qilinib, kelgusidagi ustuvor vazifalari belgilab olindi.

Yigʻilish kun tartibidagi masala yuzasidan Korrupsiyaga qarshi ichki nazorat departamenti tomonidan joriy yilning 1-choragi davomida xavf-xatarlarni baholash va minimallashtirish, moliyaviy xato-kamchiliklarni aniqlash, bartaraf etish va oldini olish yoʻlida amalga oshirilgan ishlar sarhisob qilindi. Shu bilan birga, ayrim korxona va tashkilotlarda mavjud kamchiliklar tanqidiy tahlil qilinib, ularni bartaraf etish boʻyicha aniq koʻrsatmalar berildi.

Shuni alohida taʼkidlash joizki, korporativ madaniyatning ajralmas qismi sifatida “Oʻzbekneftgaz” AJ xodimlari tomonidan respublika qonunchiligi, ichki siyosat va jarayonlar, shuningdek korrupsiyaga qarshi kurashish sohasidagi yuqori professional va ahloqiy meʼyorlarga rioya etilishi taʼminlanmoqda.

Shunday boʻlishiga qaramasdan, tizimdagi korxona va tashkilotlarda 2026-yilning 1-choragi davomida oʻtkazilgan oʻrganishlar natijasida, qonunchilik normalari buzilishi holatlari aniqlanib, ularni bartaraf etish va kelgusida yoʻl qoʻyilmasligi yuzasidan tegishli choralar koʻrilmoqda.

Yigʻilish davomida korrupsiyaviy xavf-xatarlarni bartaraf etish, manfaatlar toʻqnashuviga yoʻl qoʻymaslik, xarid jarayonlarini muntazam monitoring qilish, korxona va tashkilotlarda seminar-treninglar oʻtkazib borish kabi bir qator ishlar va bajarilishi lozim boʻlgan rejalar belgilab olindi.

Taʼkidlanganidek, belgilangan vazifalarning izchil amalga oshirilishi yarim yillik va yil yakuni boʻyicha yuqori natijalarga erishishda muhim omil boʻlib xizmat qiladi.

"Oʻzbekneftgaz" AJ Axborot xizmati

Neft bazalarda “favqulodda holat”: 3 oydagi xulosa qanday?

2026-04-03T08:25:21.750Z

“Oʻzbekneftgaz” AJ Boshqaruv raisi Abdugʻani Sanginov boshchiligida neft bazalar faoliyatiga bagʻishlangan navbatdagi tanqidiy-tahliliy yigʻilish boʻlib oʻtdi. Unda amalga oshirilgan ishlar bilan bir qatorda bajarilmay qolgan vazifalar, sustkashlik va tizimli muammolar keskin tanqid qilindi.

Joriy yil boshida jamiyatga qarashli 14 ta neft baza, 38 ta filial, 8 ta ombor va 468 ta shoxobchani oʻz ichiga qamrab olgan tarmoqda aniqlangan jiddiy kamchiliklar sabab “favqulodda holat” eʼlon qilingan edi. Shuningdek, 6 ta neft baza rahbari lavozimidan ozod etilib, masʼullar oldiga ortiqcha xarajatlarni qisqartirish, tizimdagi talon-tarojliklarga chek qoʻyish maqsadida raqamlashtirish va avtomatlashtirishni jadallashtirish, yer uchastkalarini konservatsiya qilish boʻyicha aniq vazifalar belgilangan edi.

1-kvartal yakunlari bilan topshiriqlar ijrosi koʻrib chiqildi.

153,8 mlrd soʻm iqtisod qilish mumkin

“Dolzarb 100 kunlik” dasturi doirasida 2026-yil uchun biznes rejalar qayta koʻrib chiqilib, samarasiz shtat birliklari, aktivlar qisqartirildi. Natijada boshqaruv tizimi soddalashtirilib, 153,8 mlrd soʻm miqdorida iqtisod qilish imkoniyati yaratildi.

Biroq, Boshqaruv raisi taʼkidlaganidek, iqtisod koʻrsatkichlarining mavjudligi — tizim toʻliq isloh qilinganini anglatmaydi. Asosiy vazifa — barqaror, shaffof va samarali boshqaruvni taʼminlashdan iborat boʻlishi kerak.

Raqamlashtirish: qimmat loyiha emas, ishlaydigan yechim kerak

Yigʻilish kun tartibidan oʻrin olgan yana bir muhim masala — neft bazalarni raqamlashtirish va zamonaviy boshqaruv modelini joriy etish masalalari. Bu borada xorijiy ilgʻor tajribalar oʻrganilib, milliy modelni ishlab chiqish boʻyicha vazifa belgilangan edi.

Shu munosabat bilan masʼullar tomonidan Kuchlik, Andijon (Mozorgurunch va Poytugʻ) hamda Termiz (Denov va Boldir) neft bazalarini kameralashtirish, kirish-chiqish nazorati va sunʼiy intellekt texnologiyalarini joriy etish pilot loyihasi taqdimoti oʻtkazildi.

Boshqaruv raisi loyiha chuqur tahlildan yiroq, yuzaki yondashuv va undan iqtisodiy samara sezilmayotganini qayd etdi.

925 ta avtoyonilgʻikash: har beshinchisi — muammo

Yigʻilishda shuningdek, neft bazalarda uzoq yillardan beri foydalanib kelinayotgan, iqtisodiy samaradorligi past yoki zarar keltirayotgan eski texnikalardan voz kechish zarurligi ham alohida urgʻulandi.

Olib borilgan oʻrganishlar natijasida 119 ta fermerlarga yoqilgʻi tarqatish shoxobchalarini demontaj qilib, hammasini mahalliy hokimliklar balansiga oʻtkazish, qolgan FYOTSHlarni 79 ta AYOQSHga aylantirib samaradorligidan unumli foydalanish topshirildi.

Ayni paytda tizimdagi mavjud 925 ta avtoyonilgʻikashning 187 tasi nosoz. 78 tasi muddatini oʻtagan. 148 tasi sotuvda.

Bozor mexanizmlariga moslashish

Yigʻilishda neft bazalar tijorat faoliyatini kengaytirishga doir mexanizmlarni ham takomillashtirish masalasi koʻrib chiqildi. Bugungi kunda yangi tashkil etilgan Neft bazalar faoliyatini muvofiqlashtirish departamenti tashabbusi bilan dizel yonilg‘isini kichik hajmlarda birja orqali sotishdan olinayotgan daromadlar tahlil qilindi. Ushbu tajriba samarali deb topilib, endilikda benzinni ham kichik lotlarda realizatsiya qilishni yo‘lga qo‘yish bo‘yicha Boshqaruv raisi tomonidan tegishli topshiriqlar berildi. Bu bozor mexanizmlarini chuqurlashtirish va raqobat muhitini kuchaytirishga xizmat qiladi.

Soliq yukini optimallashtirish maqsadida samarasiz obyektlarni qisqartirish, demontaj va realizatsiya qilish ishlari tanqidiy tahlil qilinib, ulardan samarali foydalanish boʻyicha aniq choralar belgilandi.

Yigʻilish yakunida Boshqaruv raisi neft bazalar tizimida islohotlar boshlanganini, ammo kutilgan natijalar hali toʻliq namoyon boʻlmaganini taʼkidladi. Bundan buyon barcha masʼullarga hisobotlar emas, aniq, amaliy natija talab qilinishi uqtirildi.

"Oʻzbekneftgaz" AJ Axborot xizmati

“NEFTGAZMONTAJ” korxonasi ishchi-xodimlari bilan ochiq muloqotlar tashkil etildi

2026-04-02T12:28:40.502Z

“Oʻzbekneftgaz” AJ ishchi guruhi tomonidan Qashqadaryo viloyatida joylashgan qator korxona va tashkilotlarda amalga oshirilgan oʻrganishlar doirasida “NEFTGAZMONTAJ” MCHJ obyektlari tahliliy-tanqidiy koʻrib chiqildi.

Oʻrganishlar davomida korxonaning moliyaviy holati bilan bogʻliq ayrim muammolar ham aniqlandi. Xususan, ishchi-xodimlarga oylik ish haqi toʻlovlarida uzilishlar mavjudligi, shuningdek, ayrim ish joylari va yashash sharoitlari belgilangan talablarga toʻliq javob bermayotgani qayd etildi.

Ishchi guruh ishtirokida ish joylari, mehnat sharoitlari, yotoqxonalar holati, sanitariya qoidalariga rioya etilishi va ovqatlanish maskanlari faoliyati batafsil tahlil qilindi.

Aniqlangan muammolarning dolzarbligi inobatga olingan holda, ularni bartaraf etish, ishchi-xodimlar uchun munosib mehnat va ijtimoiy-maishiy sharoitlarni yaratish hamda korxona faoliyati samaradorligini oshirish boʻyicha masʼullarga tegishli topshiriq va tavsiyalar berildi.

Maʼlumot uchun, ushbu korxona 2004-yilda tashkil etilgan boʻlib, qurilish-montaj ishlarini amalga oshirishga ixtisoslashgan. 2019-yil korxona ustav kapitalidagi davlat ulushi xususiylashtirish jarayonlari doirasida Davlat aktivlarini boshqarish agentligi ixtiyoriga oʻtkazilgan edi.

Bugungi kunda “Oʻzbekneftgaz” AJda qazib chiqarish bilan bogʻliq ishlar koʻlamining sezilarli darajada kengayishi, ayniqsa quduqlar qurish, burgʻilash va quduq usti infratuzilmasini barpo etishga boʻlgan ehtiyojning ortishi mazkur korxonaning ishlab chiqarish salohiyatidan yanada samarali foydalanishni taqozo etmoqda. Shu munosabat bilan “NEFTGAZMONTAJ” MCHJ "Oʻzbekneftgaz" AJ tarkibida faoliyatini boshladi. Ishchilar sonini ikki barobarga oshirish va ish hajmini oʻn barobarga koʻpaytirish rejalashtirilmoqda.

"Oʻzbekneftgaz" AJ Axborot xizmati