UZBEKNEFTEGAZ_LOT

Umrini yashab boʻlgan eski kondan yangi quduqlar

2026-11-13T10:07:30.643Z

Boshqaruv raisining Qashqadaryo viloyatiga tashrifi arafasida kecha kechqurun “Kultak” konidagi 39R-sonli qidiruv qudugʻidan sanoat ahamiyatidagi tabiiy gaz oqimi olindi. Dastlabki maʼlumotlarga koʻra, quduqning kunlik debiti 300 ming kub metrni tashkil etmoqda.

Mazkur natija qayd etish joizki, uzoq yil foydalanilgan kon va ulardagi quduqlarga nisbatan yangicha yondashuvning amaliy natijasidir. Sababi, Kultak koni dastlab 1963-yil ochilib, 1978-yil ishlatishga qoʻshilgan. Qariyb 50 yildan beri sanoat miqyosida gaz oqimi olib kelinadi. Konda olib borilgan geologiya qidiruv ishlari natijasida yana sanoat miqyosida gaz olinadigan quduqlar topilyapti.

Quduq “Alan” 3D seysmik-qidiruv loyihasi maʼlumotlarini qayta ishlash va tahlil qilish asosida belgilangan nuqtada joylashtirilgan. 2026-yil 1-sentyabrda boshlangan burgʻilash ishlari 3 020 metr chuqurlikkacha davom ettirildi.

Quduqning mahsuldor qatlamlarini sinash jarayonida 2 868–3 020 metr oraligʻidagi karbonat yura yotqiziqlaridan sanoat miqyosidagi gaz oqimi olindi. Hozirda qatlamning tabiiy xususiyatlarini aniqlash, gazodinamik va gazokondensat tadqiqotlarini oʻtkazish ishlari davom etmoqda. Shu sababli keltirilgan debit dastlabki koʻrsatkich hisoblanadi.

Boshqaruv raisi quduqni ishga tushirishga tayyorlash jarayoni bilan tanishar ekan, olingan natijani amaldagi qazib chiqarish koʻrsatkichlariga qisqa fursatlarda qoʻshish muhimligini taʼkidladi.

Eʼtiborlisi, “Kultak” konidagi qidiruv ishlari bitta quduq bilan cheklanmaydi. Ayni paytda navbatdagi 40R-qidiruv qudugʻida burgʻilash ishlari olib borilmoqda, 41R-qudugʻida ham burgʻilash boshlangan. Yil yakuniga qadar 42R-qidiruv qudugʻini ham burgʻilashga kiritish rejalashtirilgan.

“Oʻzbekneftgaz” AJ Axborot xizmati

Qazib olishdagi har qanday imkoniyat ishga solinadi

2026-11-13T09:13:16.781Z

Ayni damda “Oʻzbekneftgaz” AJ Boshqaruv raisi Abdugʻani Sanginov boshchiligidagi ishchi guruh Qashqadaryo viloyatida joylashgan obyektlar ish jarayonlari bilan tanishish maqsadida Muborak neft va gaz qazib chiqarish boshqarmasiga qarashli “Kultak” konida boʻlib turishibdi.

Boshqaruv raisining topshirigʻi bilan “Kultak” konida yangi gaz yigʻish punkti hamda uzunligi 6 kilometr boʻlgan yuqori bosimli gaz quvurini qurish ishlari amalga oshirilmoqda. Ushbu infratuzilma yangi quduqlardan olinadigan yuqori bosimli gazni alohida yigʻish va Gazni kompleks tayyorlash qurilmasiga yoʻnaltirish imkonini beradi.

A.Sanginov bu yerda olib borilayotgan qurilish ishlarining borishini koʻzdan kechirib, gazni yigʻish va uzatish tizimini yangi quduqlarni ishga tushirish jarayoni bilan uygʻunlashtirish zarurligini qayd etdi. Masʼullarga qurilish-montaj ishlarini belgilangan grafik asosida tashkil etish, uskuna va materiallar taʼminotida uzilishlarga yoʻl qoʻymaslik boʻyicha qatʼiy topshiriqlar berildi.

Tizimdagi islohotlarda past bosimli quduqlardan olinayotgan tabiiy gazni ham samarali qazib olish va uni Gazni kompleks tayyorlash qurilmasiga barqaror bosimda yetkazib berish masalasiga ham katta eʼtibor qaratilmoqda. Buning uchun “Kultak” konida umumiy quvvati 4,8 MVt boʻlgan, uchta blokdan iborat kichik kompressor stansiyasi qurilmoqda.

Qurilish ishlari bilan tanishgan Abdugʻani Sanginov kompressor stansiyasi jarayonlarni texnik talablarga muvofiq bajarilishi, qurilish va montaj ishlarini oʻzaro muvofiqlashtirish hamda obyektni belgilangan muddatlarda ishga tayyorlash muhimligini taʼkidladi.

Boshqaruv raisi ushbu obyektlardagi jarayonlarni yagona texnologik zanjir sifatida tashkil etish zarurligini taʼkidladi. Zero, yangi quduqni ishga tushirishning oʻzi yetarli emas — undan olinadigan gazni yigʻish, tashish va qayta ishlashgacha boʻlgan barcha bosqichlar oʻz vaqtida va sifatli bajarilishi kerak, deya qayd etdi Sanginov. Shu bois qurilish-montaj ishlarini muvofiqlashtirish, zarur uskuna va materiallar taʼminotini taʼminlash hamda belgilangan muddatlarga qatʼiy rioya etish boʻyicha masʼullarga tegishli topshiriqlar berildi. Oʻrganishlar davom etmoqda.

“Oʻzbekneftgaz” AJ Axborot xizmati

“Har bir xarid — shaffof”: “Oʻzbekneftgaz” tizim tashkilotlarida korrupsiyaga qarshi amaliy seminarlar oʻtkazildi

2026-11-13T05:21:09.576Z

“Oʻzbekneftgaz” AJning Qoraqalpogʻiston Respublikasi, Xorazm, Buxoro, Navoiy, Samarqand va Qashqadaryo viloyatlaridagi tarkibiy korxonalarida xarid jarayoniga masʼul mutaxassislar uchun tizimli oʻquv seminarlari oʻtkazildi.

Maqsad — qonunchilikdagi soʻnggi yangiliklarni ishlab chiqarish amaliyotiga toʻgʻri tatbiq etish, belgilangan tartib-taomillarni chuqur oʻzlashtirish, xarid jarayonini yanada takomillashtirish hamda sohada korrupsiyaga qarshi murosasiz muhitni shakllantirish.

Jamiyat Boshqaruvi raisining koʻrsatmasiga binoan Korrupsiyaga qarshi ichki nazorat departamenti hamda Xaridlar departamenti vakillaridan iborat maxsus ishchi guruh tomonidan tashkil etilgan mashgʻulotlarda oʻrganishlar davomida aniqlangan xarid va shartnomalar ijrosi boʻyicha kamchiliklar batafsil tahlil qilindi. Ular takrorlanmasligi uchun preventiv choralar koʻrish masalasiga alohida eʼtibor qaratildi.

Xarid boʻlinmalari xodimlari korrupsiyaga qarshi koʻrilgan qatʼiy choralar va murosasiz kurash natijalari bilan yaqindan tanishtirildi.

Shuningdek ishchi guruh vakillari hamda zavod va korxonalar rahbariyati oʻrtasida boʻlib oʻtgan uchrashuvlarda xarid jarayonlari, shartnomalar ijrosi va ichki nazorat tizimini takomillashtirish masalalari muhokama qilindi. Shuningdek, korxonalar faoliyati bilan yaqindan tanishish maqsadida ishlab chiqarish maydonlarida boʻlishdi.

Ushbu tashabbus tizimda joriy etilayotgan korrupsiyaga qarshi komplayens-nazorat mexanizmlarining uzviy qismi boʻlib, davlat va jamiyat manfaatlariga tahdid solishi mumkin boʻlgan xatarlarning oldini olishga xizmat qiladi.

“Oʻzbekneftgaz” AJ moliyaviy-xoʻjalik faoliyatida ochiqlik va shaffoflik tamoyillariga qatʼiy amal qiladi. Har bir xarid qonuniy va halol oʻtkazilishini taʼminlash — jamiyatning ustuvor vazifasidir.

“Oʻzbekneftgaz” AJ Axborot xizmati

Rahbarlar yoshlarni eshitdi: qanday masalalar koʻtarildi?

2026-11-12T13:51:48.500Z

“Oʻzbekneftgaz” AJ tizim tashkilotlarida yoshlar bilan ochiq muloqotlar boʻlib oʻtdi. “Rahbar va yoshlar” mavzusida tashkil etilgan uchrashuvlarda yosh mutaxassislar oʻzlarini qiziqtirayotgan masalalar, taklif va tashabbuslarini bevosita rahbarlarga yetkazish imkoniyatiga ega boʻldi.

Samimiy ruhda oʻtgan muloqotlarda yoshlarning kasbiy rivojlanishi, malaka oshirish imkoniyatlarini kengaytirish, zamonaviy bilim va koʻnikmalarni egallash, mehnat sharoitlarini yanada yaxshilash hamda ish jarayonida uchrayotgan muammolarni bartaraf etish masalalari muhokama qilindi.

Ayniqsa, yoshlar tomonidan ilgari surilgan yangi gʻoya va tashabbuslarga alohida eʼtibor qaratilib, ularni amalga oshirish imkoniyatlari yuzasidan fikr almashildi. Koʻtarilgan masalalar boʻyicha tegishli masʼullarga aniq vazifalar va topshiriqlar berildi.

Bunday muloqotlar nafaqat muammolarni aniqlash, balki isteʼdodli va tashabbuskor yoshlarni qoʻllab-quvvatlash, ularning salohiyatini roʻyobga chiqarish uchun muhim maydon vazifasini oʻtamoqda.

“Oʻzbekneftgaz” AJ va uning tizim tashkilotlarida rahbarlar boshchiligida shunday uchrashuvlar davom etmoqda.

"Oʻzbekneftgaz" AJ Axborot xizmati

“Oʻzbekneftgaz” — neft-gaz tarmogʻini xalqaro dekarbonizatsiya qilish boʻyicha global tashabbus ishtirokchisi

2026-11-11T07:11:05.327Z

2026-yil 10-noyabr kuni COP31 doirasida Neft-gaz tarmogʻini dekarbonizatsiya qilish xartiyasining (Oil & Gas Decarbonization Charter — OGDC) “OGDC 2026 Status Report: Strengthening Delivery” hisoboti eʼlon qilindi.

Xartiyani imzolagan kompaniyalardan biri sifatida “Oʻzbekneftgaz” AJ ham neft-gaz tarmogʻida issiqxona gazlari tashlamalarini kamaytirish, ekologik masʼuliyatni kuchaytirish va sohaning barqaror rivojlanishiga qaratilgan xalqaro saʼy-harakatlarni qoʻllab-quvvatlamoqda.

Bugungi kunda "Oʻzbekneftgaz" AJ Xartiyani imzolagan 56 ta kompaniya qatorida. Ushbu kompaniyalar dunyoning 100 dan ortiq mamlakatida faoliyat yuritib, jahon neft va gaz qazib chiqarish hajmining qariyb uchdan bir qismini taʼminlaydi. Bu esa tashlamalarni kamaytirish boʻyicha mazkur tashabbusning global ahamiyatini yanada oshiradi.

COP28 doirasida yoʻlga qoʻyilgan Xartiya faoliyatiga uch yil toʻldi. Yangi hisobot ishtirokchi kompaniyalar tomonidan belgilangan ekologik maqsadlarga erishish borasida amaliy choralar koʻlami kengayib borayotganini koʻrsatadi. Xususan, issiqxona gazlari tashlamalari toʻgʻrisidagi maʼlumotlarni ochiq eʼlon qilayotgan, oraliq maqsadlarni belgilayotgan, metan tashlamalarini kamaytirish va gazni mashʼalada muntazam yoqishni bartaraf etish boʻyicha harakat rejalarini joriy qilayotgan kompaniyalar soni ortib bormoqda.

Hisobotda, shuningdek, xalqaro hamkorlik va tajriba almashishning amaliy natijalari yoritilgan hamda 2030-yilga qadar amalga oshirilishi lozim boʻlgan ustuvor vazifalar belgilab berilgan.

Xartiyaning asosiy maqsadlari 2050-yilga qadar yoki undan oldin operatsion faoliyat natijasida yuzaga keladigan issiqxona gazlari tashlamalarini sof nol darajaga yetkazish, 2030-yilga qadar neft va gaz qazib chiqarish jarayonlaridagi metan tashlamalarini deyarli nol darajaga tushirish, 2030-yilga qadar gazni mashʼalada muntazam yoqish amaliyotini tugatishdan iborat.

Shuningdek, Xartiya ishtirokchi kompaniyalar zimmasiga Scope 1 va Scope 2 toifalariga kiruvchi tashlamalar boʻyicha 2030-yilga moʻljallangan oraliq maqsadlarni belgilash va ularni jamoatchilikka ochiq eʼlon qilish vazifasini ham yuklaydi.

Metan sizib chiqish holatlarini aniqlash va bartaraf etish (LDAR), energiya samaradorligini oshirish, issiqxona gazlari tashlamalarini hisobga olish va ular boʻyicha hisobdorlik shaffofligini taʼminlash “Oʻzbekneftgaz” AJning ekologik yoʻnalishdagi ustuvor vazifalari sirasiga kiradi.

Tadbir doirasidagi ishtirok kompaniyaga xalqaro tajriba almashish, ilgʻor texnologiya va yondashuvlarni oʻrganish, shuningdek, tashlamalarni boshqarish samaradorligini oshirishga qaratilgan hamkorlik imkoniyatlarini kengaytirishga xizmat qiladi.

"Oʻzbekneftgaz" AJ Axborot xizmati

Universitetdagi islohot: professor-oʻqituvchilarning ilk guruhi Xitoyda malaka oshirdi

2026-11-10T07:44:07.052Z

“Oʻzbekneftgaz” AJ Boshqaruv raisi Abdugʻani Sanginov I.M. Gubkin nomidagi neft va gaz universitetining Toshkent shahridagi filiali rahbariyati va professor-oʻqituvchilari bilan uchrashuvda taʼlim muassasasini zamon talablariga javob beradigan, sohadagi ilgʻor bilim va texnologiyalarni oʻzlashtirgan mutaxassislar tayyorlaydigan maskanga aylantirish zarurligini taʼkidlagan edi. Buning uchun, eng avvalo, taʼlim mazmunini yangilash, oʻqituvchilarning kasbiy salohiyatini oshirish va nazariy bilimlarni ishlab chiqarish amaliyoti bilan uzviy bogʻlash muhim vazifa sifatida belgilandi.

Bugun ushbu yondashuvning dastlabki natijalari koʻzga tashlanmoqda. Joriy yilning 10–19-oktyabr kunlari filialning uch nafar professor-oʻqituvchisi Xitoy Xalq Respublikasida xalqaro kasbiy amaliyotda ishtirok etib, neft-gaz sanoatida qoʻllanilayotgan ilgʻor texnologiyalar va ishlab chiqarish tajribasini oʻrganib qaytishdi.

Amaliyot doirasida oʻqituvchilar Pekin hamda Chjanszyan shaharlaridagi “Sinopec” kompaniyasining neftni qayta ishlash korxonalarida boʻldilar. Ular uglevodorod xomashyosini qayta ishlashning zamonaviy texnologiyalari, ishlab chiqarish jarayonlarini avtomatlashtirish, raqamli boshqaruv tizimlari va energiya samaradorligini oshirishga qaratilgan yechimlar bilan tanishdilar. Shuningdek, Szinchjou shahridagi “SJ PETROLEUM MACHINERY CO.” korxonasida kasbiy tayyorgarlikdan oʻtib, zamonaviy burgʻilash qurilmalari, ulardan foydalanish xususiyatlari, chuqur va oʻta chuqur quduqlarni burgʻilashda qoʻllaniladigan texnologik yechimlarni oʻrganishdi.

Muhimi, amaliyot nazariy bilim va maʼlumotlar bilan cheklanmadi. Ishtirokchilar belgilangan oʻquv dasturlarini muvaffaqiyatli oʻzlashtirib, egallagan bilim va kasbiy salohiyatlarini tasdiqlovchi xalqaro sertifikatlarga ham ega boʻldilar.

Albatta, bu tajribaning ahamiyati uch nafar oʻqituvchining malaka oshirishi bilangina cheklanmaydi. Xitoyning yetakchi korxonalarida oʻzlashtirilgan bilim va amaliy koʻnikmalarni filialdagi oʻquv jarayoniga tatbiq etish, maʼruza va amaliy mashgʻulotlar mazmunini boyitish, talabalarni zamonaviy ishlab chiqarish texnologiyalari bilan yaqindan tanishtirish uchun yangi imkoniyatlar yaratadi.

Eng muhimi, bu jarayon taʼlim va ishlab chiqarish oʻrtasidagi aloqalarni mustahkamlash, professor-oʻqituvchilarning kasbiy salohiyatini oshirish hamda kelgusida sohaning yangi avlod mutaxassislarini tayyorlashga xizmat qiladigan tizimli oʻzgarishlar uchun zamin yaratadi.

"Oʻzbekneftgaz" AJ Axborot xizmati

Amerikaning “Gulf Oil” brendi bilan $100 mlnlik AYOQSHlar va “Saneg” konlari taqdiri nima boʻldi

2026-11-06T05:03:46.641Z

Matbuot anjumanida jurnalist bergan ushbu savollarga “Oʼzbekneftgaz” AJ Boshqaruv raisining oʼrinbosari A.Xudoyberganov quydagicha javob berdi:

— Amerikaning “Gulf” kompaniyasi bilan AYOQSHlar tarmogʻini tashkil etish loyihasida bizning asosiy vazifamiz — hamkor sifatida investorlarga mahalliy bozorni oʻrganishda toʻgʻri yoʻnalish koʻrsatish va zarur koʻmakni berish boʻlgan. Loyiha boʻyicha respublikaning deyarli barcha viloyatlari, jumladan, transport qatnovi gavjum boʻlgan asosiy katta trassalar va yoʻl yoqalari toʻliq oʻrganildi hamda barcha birlamchi hujjatlar jamlandi. Hozirda investor (“Gulf”) tomonidan loyihaning iqtisodiy samaradorligi hisob-kitob qilinmoqda. Xususan, ushbu hududlardagi transport oqimi, ichki bozordagi mavjud AYOQSHlar zichligi va elektromobillar sonining ortishi hisobga olingan holda, qayerda shoxobcha qurish oʻzini qanchalik oqlashi tahlil etilmoqda. “Oʻzbekneftgaz” ushbu loyihada qaysidir ulush (foiz) bilan ishtirok etishi boʻyicha hali yakuniy qaror qabul qilinmagan. Investor iqtisodiy tahlillar asosida yakuniy xulosaga kelganidan soʻnggina keyingi bosqichga oʻtiladi.

— Yaqinda Davaktiv tomonidan “Saneg” kompaniyasining neft konlari boʻyicha litsenziyalari bekor qilingani eʼlon qilindi. Ayni damda ushbu konlarning operatsion va moliyaviy nazorati kimda?

— Birinchidan, “Saneg” — mutlaqo alohida mustaqil kompaniya boʻlib, “Oʻzbekneftgaz”ga hech qanday boʻysunmaydi va biz bilan bu masalada hamkorlik aloqalari mavjud emas. Ikkinchidan, litsenziyalarning bekor qilinishi haqidagi xabar Davlat aktivlarini boshqarish agentligi tomonidan eʼlon qilindi, shu sababli bu borada toʻliq maʼlumotni Davaktiv yoki “Saneg” rahbariyatidan olish maqsadga muvofiqdir. Uchinchidan litsenziyalari bekor qilingan konlar, ularning ulushi yoki operatsion nazorati “Oʻzbekneftgaz” AJga oʻtkazilmagan va tizimga berilmagan.

“Oʻzbekneftgaz” AJ Axborot xizmati

Benzin zaxirasi 2,5 barobar oshgan boʻlsa, qishda AYOQSHlarda navbatlar qisqaradimi?

2026-11-04T05:28:31.796Z

Matbuot anjumanida jurnalistlar tomonidan berilgan ushbu savolga “Oʻzbekneftgaz” AJ Boshqaruv raisining oʻrinbosari A.Xudoyberganov javob berdi.

— "Oʻzbekneftgaz" AJga qarashli AYOQSHlarda kuz-qish mavsumi uchun kafolatlangan zaxiralar shakllantirilgan boʻlib, hech qanday uzilishlar kuzatilmaydi. Yil boshida tizimda atigi 31 ta AYOQSH mavjud boʻlgan boʻlsa, bugungi kunga kelib ularning soni 152 taga yetkazildi (qariyb 5 karra kengaydi). AYOQSHlar tarmogʻi kengayishi bilan yonilgʻi realizatsiyasi yil boshiga nisbatan 5–6 barobarga koʻpaydi. Har bir shoxobchada avtobenzinning (AI-92, AI-95) va dizel yonilgʻisining (Yevro-4, Yevro-6, Eko-dizel) kamida 2–3 xil turi doimiy sotuvda mavjud va zarur zahiralarga ega. Oxirgi 9–10 oy davomida benzin narxi 12 000 soʻmdan oshmadi, yaʼni 10 500 — 11 500 soʻmlik barqaror yoʻlakda qatʼiy ushlab turilibdi.

Viloyatlar, shahar markazlari va chekka qishloqlarda “Oʻzbekneftgaz” tizimiga qarashli boʻlgan AYOQSHlar boʻlgan, ammo ular toʻliq faoliyat yuritmagan. Noldan yangi AYOQSH qurish oʻrniga, birinchi bosqichda mavjud bino va hududlar yengil taʼmirlanib, foydalanishga yaroqli holga keltirildi. Ularga 90 ga yaqin yangi, yuqori aniqlikdagi yonilgʻi tarqatish kolonkalari olib kelinib oʻrnatildi. Shu tariqa, yil boshida faqat 31 ta AYOQSH ishlab turgan boʻlsa, ushbu qayta tiklash ishlari orqali ularning soni 152 taga yetkazilgan va sotuv hajmi ham 5–6 barobarga oshirildi.

Toshkent shahri va Toshkent viloyatidagi 10 ta AYOQSH toʻliq raqamlashtirilib, sigʻimlarga elektron sath oʻlchagichlar qoʻyildi. Markaziy binomizda tashkil etilgan Vaziyatlar markazi orqali shoxobchalardagi yonilgʻi qoldigʻi, kunlik tarqatilish miqdori va belgilangan narxlar real vaqt rejimida onlayn monitoring qilib borilmoqda. Bundan tashqari, metrolog mutaxassislarimiz joylarga muntazam chiqib, kolonkalar yonilgʻini grammigacha toʻgʻri quyayotganini davlat standartlari asosida uzluksiz tekshirib bormoqda.

Maʼlumot uchun, ushbu kafolatlar bevosita “Oʻzbekneftgaz” AJ tarmogʻiga tegishli boʻlib, respublikadagi boshqa xususiy yonilgʻi tarmoqlari ham oʻz navbatida bozor qoidalari asosida ish olib boradi. Tez orada “Oʻzbekneftgaz” AJga qarashli AYOQSHlar joylashgan manzillar boʻyicha maʼlumot beriladi.

"Oʻzbekneftgaz" AJ Axborot xizmati

"Oʻzbekneftgaz" qishdan qanchalik qoʻrqadi?

2026-11-03T07:15:55.574Z

Matbuot anjumanida jurnalistlar tomonidan berilgan ushbu savolga “Oʻzbekneftgaz” AJ Boshqaruv raisining birinchi oʻrinbosari S.Hamroyev javob berdi.

- Bizda kuz-qish mavsumida elektr energiya, gaz, neft mahsulotlariga boʻlgan talab ortib boradi. Ortib borgandan keyin, albatta, biz soha xodimlariga juda katta masʼuliyat yuklaydi. Qoʻrqish bu tabiiy hol. Qoʻrqish kerak, qoʻrquv hissi boʻlmaganda odam masʼuliyatni yoʻqotadi. Masʼuliyat boʻlgan odam esa qoʻrqadi.

Biz kuz-qish mavsumiga tayyorgarlikni bahordan boshlaganmiz. Necha mingta izolyatorlar almashtirildi, dvigatellar taʼmirlandi, zaxira omborlari yaratib boryapmiz, narxlarni ushlab turish boʻyicha ishlar olib boryapmiz, yetmaganini import qilyapmiz. Hammasi mana shu kuz-qish mavsumidan betalofat chiqib olish, xalqimizni shu kuz-qish mavsumida taʼminlashga qaratilgan. Shuning uchun bu qoʻrqish emas, bizga katta masʼuliyat yuklaydi.

“Oʻzbekneftgaz” AJ Axborot xizmati

Ustyurtdagi istiqbolli loyihalar gaz qazib chiqarish barqarorligini taʼminlash hamda tabiiy tushishga qay darajada taʼsir qiladi?

2026-11-03T07:03:47.909Z

Matbuot anjumanida jurnalistlar tomonidan berilgan ushbu savolga “Oʻzbekneftgaz” AJ bosh geologi Nodir Muhiddinov javob berdi.

— Bizning ham asosiy umidimiz aynan Ustyurt mintaqasidan. Yetakchi geologlarimizning xulosasiga koʻra, yangi zaxiralarni aniqlash hamda qazib chiqarish hajmlarini oshirishda asosiy salohiyat Ustyurtga toʻgʻri keladi. Chunki ayni paytda yangi konlar aynan shu hududning oʻta chuqur qatlamlaridan topilmoqda. Biroq buning jiddiy texnik murakkabliklari mavjud: agar ilgari oʻzlashtirilgan konlarimiz 3 000 – 3 500 metr chuqurlikda boʻlgan boʻlsa, hozirgi yangi konlar 5 000 metrdan ortiq chuqurlikda joylashgan. Chuqurlikning ortishi esa burgʻilash va qazib chiqarish xarajatlarining logarifmik (keskin) darajada oshishiga hamda texnologik murakkabliklarga olib keladi. U yerda qatlam bosimi 1 000 atmosferagacha, harorat esa 200 darajagacha yetadi. Quduq usti uskunalari 1 000 atmosfera bosimiga dosh beradigan boʻlishi shart. Bunday ekstremal bosim va 200 darajali haroratda ishlay oladigan texnologiyalar dunyoda sanoqli kompaniyalardagina mavjud boʻlib, biz ana shunday ilgʻor texnologiyalarni jalb qilgan holda 5 000 metrdan chuqur qatlamlarni oʻzlashtirmoqdamiz.

— Bu qazib olinadigan gazning tannarxi ham oshishini anglatadimi?

— Albatta, narx ham oshadi. Chuqurlik va texnologik qiyinchiliklar olib borilayotgan geologiya-qidiruv ishlari bahosini ham, bevosita qazib olish xarajatlarini ham oshiradi. Ammo gaz qazib chiqarishni koʻpaytirishning boshqa asosiy muqobili boʻlmagani sababli, bor salohiyat shunga bogʻliq deb bilib, aynan shu yoʻnalishda “Oʻzbekneftgaz” ning oʻz kuchi bilan qatʼiy ish olib boryapmiz.

— Ozarbayjonning “SOCAR” va Britaniyaning “BP” kompaniyalari bilan hamkorlikdagi Ustyurt megaloyihasi esa mutlaqo alohida loyiha hisoblanadi. Uning shartlari va mexanizmi boshqacha. Ayni paytda mazkur hamkorlik doirasida 3 000 kvadrat kilometrdan ortiq maydonda seysmoqidiruv (3D seysmorazvedka) ishlari oʻtkazildi. Hozirda olingan seysmik maʼlumotlarni chuqur qayta tahlil qilish jarayoni bormoqda va kelgusi yilda ilk qidiruv qudugʻini burgʻilash rejalashtirilgan. SOCAR va BP mutaxassislarining xulosasiga koʻra, aynan 5 000 metr chuqurlikda ulkan gaz zaxiralarini ochish salohiyati mavjud. Biroq bir muhim jihatni toʻgʻri tushunish kerak: bu hududda hali kon ochilgani yoʻq! Loyiha hozircha faqat dastlabki geologiya-qidiruv bosqichida turibdi. Kelgusi yilda quduq burgʻilanib, tijoriy zaxira tasdiqlanganidan soʻnggina keyingi iqtisodiy va texnologik hisob-kitoblarga oʻtiladi. Shu sababli hozircha gaz tannarxi yoki xarajatlar miqdori haqida gapirishga hali juda erta, buning uchun vaqt talab etiladi.

"O‘zbekneftgaz" AJ Axborot xizmati