UZBEKNEFTEGAZ_UZ

Qo‘ng‘irot va Mo‘ynoq aholisi uchun bir necha yuzlab yangi ish o‘rinlari yaratiladi

2026-10-08T12:11:13.875Z

“O‘zbekneftgaz” AJ Boshqaruvi raisi Abdug‘ani Sanginov boshchiligidagi ishchi guruhning Qoraqalpog‘istonga navbatdagi tashrifi davom etmoqda.

Ma’lumki, joriy yil boshida Jamiyat tizimida geologiya-qidiruv va burg‘ilash ishlarini kengaytirish, yangi quduqlarni o‘z vaqtida ishga tushirish hamda uglevodorod qazib chiqarish hajmini barqarorlashtirishga qaratilgan keng ko‘lamli islohotlar boshlangan edi. Ishchi guruhning Ustyurt hududidagi navbatdagi o‘rganishlari ham ushbu islohotlarning joylardagi amaliy ijrosini, barpo etilayotgan infratuzilmaning ishlab chiqarish ehtiyojlariga muvofiqligini va har bir obyektning samaradorlikka qo‘shadigan hissasini baholashga qaratilgan.

Tashrif doirasida ishchi guruh dastlab Jamiyat uchun barpo etilayotgan yangi moddiy-texnik resurslar ombori hamda “UNG Burg‘ilash” MCHJ Ustyurt filiali bazasida amalga oshirilayotgan ishlar bilan tanishdi.

Qo‘ng‘irot tumanida qad rostlayotgan ushbu ikki obyekt kelgusida Jamiyatning Ustyurt hududidagi ishlab chiqarish faoliyati uchun muhim tayanch nuqtaga aylanadi. Xususan, markazlashtirilgan ombor kengayib borayotgan burg‘ilash maydonlarini zarur texnika, uskuna va quvurlar bilan uzluksiz ta’minlash, logistika jarayonlarini tizimlashtirish hamda ta’minotdagi ehtimoliy uzilishlarning oldini olish imkonini beradi.

Ombor qurilish jarayonini ko‘zdan kechirgan Boshqaruv raisi ishlarni jadallashtirish va xarajatlarni maqbullashtirish yuzasidan aniq vazifalar belgilab berdi. Jumladan, qurilish materiallarini mahalliy tadbirkorlardan xarid qilish orqali sarf-xarajatlarni kamaytirish, shu bilan birga, hududdagi tadbirkorlik subyektlarini qo‘llab-quvvatlash bo‘yicha ko‘rsatmalar berildi.

Ta’kidlash joizki, joriy yil sentyabr oyi boshida Boshqaruv raisi “UNG Burg‘ilash” MCHJ Ustyurt filiali bazasi qurilishiga oid dastlabki smeta hujjatlari bilan tanishib, loyihani ishlab chiqarish ehtiyojlari va iqtisodiy samaradorlik nuqtayi nazaridan qayta ko‘rib chiqish bo‘yicha qator takliflar bildirgan edi. Xususan, ishlab chiqarish jarayoniga bevosita xizmat qiladigan binolarni saqlab qolish, kam foydalaniladigan va ortiqcha xarajat talab etadigan inshootlarni loyihadan chiqarish vazifasi qo‘yilgandi.

Mazkur topshiriqlar asosida smeta qayta ishlanib, qurilishga yo‘naltiriladigan mablag‘lar va binolar soni maqbullashtirildi. Navbatdagi o‘rganishlar davomida yangilangan loyiha-smeta hujjatlari ishchi guruhga taqdim etildi va ma’qullandi.
Keyingi bosqichda tasdiqlangan yakuniy loyiha asosida tender savdolari e’lon qilinib, qurilish ishlariga kirishiladi.

Shuningdek, mas’ullarga yog‘ingarchilik mavsumi boshlanguniga qadar zarur qurilish materiallarini zaxiralash, ishlarni belgilangan muddatda va sifatli yakunlash bo‘yicha topshiriqlar berildi.

Ushbu obyektlar foydalanishga topshirilgach, Qo‘ng‘irot va Mo‘ynoq tumanlarida bir necha yuzlab yangi ish o‘rinlari yaratilib, mahalliy aholi bandligini ta’minlashga munosib hissa qo‘shilishi kutilmoqda.

Ayni paytda ishchi guruhning Ustyurt hududidagi o‘rganishlari konlar va ishlab chiqarish obyektlarida davom etmoqda.

“O‘zbekneftgaz” AJ Axborot xizmati

Konlardagi haqiqiy holatni o‘rganish — qazib chiqarish va kuz-qishga tayyorgarlikda muhim omildir

2026-09-29T18:58:14.371Z

Bugun "O‘zbekneftgaz" AJ Boshqaruv raisi Abdug‘ani Sanginov boshchiligida o‘tkazilgan yig‘ilish kuz-qish mavsumiga tayyorgarlik doirasida maxsus ishchi guruh tomonidan Muborak hamda Sho‘rtan neft va gaz qazib chiqarish boshqarmalarining quyi bo‘g‘inlari, konlardan tortib kompressor stansiyalarida o‘tkazilgan o‘rganishlar natijalari tahliliga bag‘ishlandi.

Jumladan, Muborak va Sho‘rtan boshqarmalarida ayrim kon boshliqlariga bir nechta kon va obyektlarni bir vaqtda boshqarish yuklangani tanqid qilinib, mehnat resurslarini qayta ko‘rib chiqish, takrorlanuvchi shtat birliklarini maqbullashtirish orqali bo‘shaydigan resurslarni ishlab chiqarish uchun zarur bo‘lgan yo‘nalishlarga yo‘naltirish bo‘yicha topshiriq berildi.

Boshqaruv raisi tomonidan konlarda avariyalarga yo‘l qo‘ymaslik, tabiiy pasayishni jilovlash va belgilangan ishlab chiqarish ko‘rsatkichlarini ta’minlash quyi bo‘g‘in rahbarlarining asosiy vazifalaridan biri ekani ta’kidlandi. Shu bilan birga, mehnat natijasiga qarab bir xil yondashuv asosida haq to‘lash amaliyotini qayta ko‘rib chiqish zarurligi qayd etildi. Keyingi yig‘ilishlarda kon boshliqlarining bevosita ishtirok etishini ta’minlash vazifasi qo‘yildi.

Konlarda ishlash uchun zarur sharoitlarni yaratish borasida ham amaliy choralar ko‘rilayotgani qayd etildi. Xususan, Muborak neft va gaz qazib chiqarish boshqarmasiga konlarda harakatlanish va ish jarayonlarini ta’minlash uchun avtotransport vositalarini xarid qilish holati yuzasidan mas’ullardan so‘raldi.

Shuningdek, yig‘ilishda ishchi guruhlar o‘rganishlari natijasida aniqlangan kamchiliklarni bartaraf etish bilan birga, kuz-qish mavsumida uzluksiz ishlash uchun zarur infratuzilmani tayyorlash masalasiga ham alohida e’tibor qaratildi.

Boshqarmalarda mavjud nasoslar, texnologik liniyalar va boshqa ishlab chiqarish obyektlarini mavsumga shay holatga keltirish, yog‘ingarchiliklar boshlanishidan oldin konlarga olib boruvchi yo‘llarni tayyorlash ishlarini yakuniga yetkazish bo‘yicha qo‘shimcha vazifalar belgilandi.

Muborak neft va gaz qazib chiqarish boshqarmasida joylarga chiqib o‘rganishlar natijasida 307 ta chora-tadbir shakllantirilgan. Ularning har biri bo‘yicha ijroni ta’minlash, mas’ullarni belgilash va natijadorlikni nazorat qilish topshirildi.

Shu bilan birga, ushbu boshqarmalarda texnik tadbirlar uchun reja qilingan mablag‘larni o‘zlashtirish talab darajada emasligi tanqid qilindi. Bunda ajratilgan mablag‘larni o‘z vaqtida va maqsadli o‘zlashtirish, ularni, eng avvalo, qazib chiqarish barqarorligini ta’minlashga xizmat qiladigan ishlarga yo‘naltirish bo‘yicha aniq vazifalar qo‘yildi.

O‘rganishlar davomida Muborak boshqarmasi tasarrufidagi chekka hududlarda foydalanilmayotgan obyektlar ham aniqlangan. Bunday obyektlarni saqlash bilan bog‘liq ortiqcha xarajatlarni kamaytirish yuzasidan topshiriqlar berildi.

Yig‘ilishda 9 oy davomida burg‘ilangan quduqlar, ulardan olingan natijalar, shuningdek, burg‘ilanganiga qaramay gaz olish imkoni bo‘lmagan quduqlar holati ham tahlil qilindi.
Bunda har bir quduq bo‘yicha natijaga ta’sir qilgan omillarni chuqur o‘rganish, mavjud imkoniyatlardan samarali foydalanish va keyingi burg‘ilash ishlarida xulosalardan foydalanish zarurligi ta’kidlandi. Xitoy kompaniyalari bilan tuzilgan shartnoma asosida keltirilgan 8 ta burg‘ilash uskunasi ishlatilayotgani, qolgani ham yetib kelishi haqida axborot berildi.

Yig‘ilishda qayd etilganidek, joylardagi o‘rganishlar Gazli hamda Ustyurt boshqarmalarida ham olib boriladi. Bu hududlarda ham qazib chiqarish jarayonlari, mavjud muammolar, infratuzilma va texnika holati, kuz-qish mavsumiga tayyorgarlik hamda qazib chiqarish barqarorligi kompleks tahlil qilinib, natijasi bo‘yicha alohida chora-tadbirlar shakllantiriladi.

Yig‘ilish yakunida "Mustaqillikning 25 yilligi" konida avariya oqibatlarini bartaraf etish bo‘yicha amalga oshirilayotgan ishlar holati ham ko‘rib chiqildi. Belgilangan chora-tadbirlarning ijrosi, mavjud muammolar va ularni tezkor hal etish masalalari tahlil qilindi.

Avariya hududidagi ishlarni zarur texnika va uskunalar bilan ta’minlash maqsadida Xitoydan yetkazib berilayotgan burg‘ilash uskunalari hamda zarur texnikalar ortilgan 238 ta yuk avtomobili yo‘lga chiqqani haqida ma’lumot berildi. Ularning harakati va belgilangan manzilga yetib borishi bilan bog‘liq tashkiliy masalalarni oldindan hal etish, ularni qabul qilish va ishga jalb etish jarayonlarini muvofiqlashtirish bo‘yicha mas’ullarga zarur topshiriqlar berildi.

Yig‘ilishda barcha yo‘nalishlar bo‘yicha muammoni joyida aniqlash, aniq muddat va mas’ulni belgilash, keyin esa natijani talab qilish tamoyil ustuvor ekani belgilab berildi.

"O‘zbekneftgaz" AJ Axborot xizmati

“O‘zbekneftgaz” AJ va Bank of China o‘rtasida qayta moliyalashtirish bo‘yicha Mandat bitimi imzolandi

2026-09-24T04:21:20.507Z

Yaponiyaning Tokio shahrida “O‘zbekneftgaz” AJ Boshqaruv raisining birinchi o‘rinbosari boshchiligidagi delegatsiya hamda Bank of China’ning Yaponiyadagi vakolatxonasi rahbariyati o‘rtasida uchrashuv bo‘lib o‘tdi.

Uchrashuv doirasida “O‘zbekneftgaz” AJning moliyaviy barqarorligini mustahkamlash, kredit portfelini optimallashtirish hamda moliyaviy xarajatlarni maqbullashtirish masalalari muhokama qilindi.

Muzokaralar yakunida Jamiyat tomonidan davlat kafolati ostida ilgari jalb qilingan yuqori foizli kreditlarni qayta moliyalashtirish bo‘yicha Bank of China bilan Mandat bitimi imzolandi. Shuningdek, mazkur moliyalashtirishning asosiy shartlari yuzasidan tomonlar o‘rtasida kelishuvga erishildi.

Qayta moliyalashtirish mexanizmini amalga oshirish Jamiyatning kredit majburiyatlarini yanada samarali boshqarish, foiz xarajatlarini kamaytirish va moliyaviy resurslardan foydalanish samaradorligini oshirishga xizmat qiladi.

Mazkur bitim O‘zbekiston Respublikasi Vazirlar Mahkamasi huzuridagi muvofiqlashtiruvchi komissiya tomonidan belgilangan vazifalar ijrosi doirasida amalga oshirilmoqda.

Uchrashuv davomida, shuningdek, uzoq muddatli investitsiyaviy loyihalarni moliyalashtirish istiqbollari muhokama qilindi. Tomonlar o‘zaro moliyaviy hamkorlikni yanada rivojlantirish va istiqbolli loyihalar doirasida hamkorlik ko‘lamini kengaytirishga kelishib oldilar.

"O'zbekneftgaz" AJ Axborot xizmati

“Aqlli” qo‘riqlash: 21 kilometrlik quvur liniyasi va 5 mlrd so‘mlik samara

2026-09-23T13:44:23.310Z

“O‘zbekneftgaz” AJda yil boshidan boshlangan islohotlar nafaqat ishlab chiqarish ko‘rsatkichlarini oshirish, balki har bir jarayonda samaradorlikni ta’minlash, ortiqcha xarajatlarni qisqartirish va zamonaviy texnologiyalardan keng foydalanishga qaratilgan. Bu yondashuv qo‘riqlash tizimida ham o‘zining amaliy natijasini ko‘rsatmoqda.

Jamiyatda qo‘riqlash xizmati bilan bog‘liq xarajatlarni maqbullashtirish hamda zamonaviy texnologiyalar asosida idoraviy harbiylashtirilgan qo‘riqlash xizmatlarini tashkil etish bo‘yicha yangi yondashuvlar yo‘lga qo‘yilmoqda. Jamiyat tasarrufidagi obyektlarda xorijiy kompaniyalarning ilg‘or tajribasi o‘rganilib, qo‘riqlash jarayonlariga axborot-kommunikatsiya texnologiyalarini joriy etish imkoniyatlari tahlil qilindi.

O‘rganishlar natijasida Sho‘rtan neft va gaz qazib chiqarish boshqarmasiga qarashli gazkondensat quvur liniyasining dastlabki 21 kilometrlik qismida avtomatlashtirilgan optik tolali akustik monitoring — DAS tizimini joriy etishga qaror qilindi. Bu texnologiya quvur liniyasi bo‘ylab yuzaga kelishi mumkin bo‘lgan noqonuniy harakatlarni tezkor aniqlash va markazlashgan raqamli nazoratni yo‘lga qo‘yish imkonini beradi.

Loyihaning muhim jihati — ilgari jismoniy kuch bilan qo‘riqlangan 10 ta postdagi nazoratni raqamlashtirish imkoni yaratilganidir. Natijada qo‘riqlash jarayonida inson omili sezilarli darajada kamayib, nazoratning uzluksizligi va tezkorligi ta’minlandi. Dastlabki hisob-kitoblarga ko‘ra, mazkur yechim qo‘riqlash bilan bog‘liq xarajatlarni yiliga 5 milliard so‘mgacha optimallashtirish imkonini bermoqda.

Loyiha Boshqaruv raisiga taqdim etilganidan so‘ng, belgilangan topshiriqlar asosida uni amalga oshirish ishlari boshlandi. “O‘zbekneftgaz” AJ va “SMART TECHNOLOGY SYSTEM” MCHJ o‘rtasida tegishli shartnoma imzolanib, loyihani amalga oshirish uchun Xitoyning “Hikvision” kompaniyasi bilan hamkorlikda zarur qurilma va jihozlar xarid qilindi. Shu bilan birga, ichki imkoniyatlardan foydalangan holda quvur liniyalarida zarur qurilish-montaj ishlari bajarildi, kabellar yotqizilib, DAS qurilmasi dasturlandi va tizim to‘liq ishga tushirildi.

Bugun mazkur tizim quvur liniyalaridagi xavfsizlikni ta’minlashning zamonaviy vositasi sifatida ishlamoqda. Uning yana bir muhim jihati — alohida infratuzilma sharoitlarini yaratishga katta qo‘shimcha xarajat talab etmasligi va mavjud sharoitlarga moslashtirilganidir.

Eng muhimi, bu — yil boshida boshlangan islohotlarning amaldagi natijalaridan biri. Ya’ni samaradorlik faqat mablag‘ni tejash bilan emas, kamroq resurs bilan yanada ishonchli, tezkor va zamonaviy natijaga erishish bilan o‘lchanmoqda.

Qo‘riqlash tizimidagi ushbu tajriba bilan cheklanib qolinmaydi. Kelgusida “O‘zbekneftgaz” AJ tasarrufidagi boshqa obyektlarda ham raqamlashtirilgan axborot texnologiyalarini joriy etish imkoniyatlari o‘rganilmoqda.

"O‘zbekneftgaz" AJ Axborot xizmati

Neft-gaz sohasidagi xalqaro tanlov ilk bor O‘zbekistonda start oldi

2026-09-22T09:52:22.078Z

Bugun Andijonda "O‘zbekneftgaz" AJ mezbonligida Rossiya neft-gaz kompaniyalar guruhi “Eng yaxshi kasb egasi” korporativ tanlovining tantanali ochilishi bo‘lib o‘tdi. Bu yilgi tanlovning tarixiy ahamiyati shundaki, u ilk bor Rossiya hududidan tashqarida — O‘zbekistonda, “O‘zbekneftgaz” AJ hamkorligida “ANDIJANPETRO” MCHJ qo‘shma korxonasida o‘tkazilmoqda.

Tanlovning O‘zbekistonda tashkil etilishi “O‘zbekneftgaz” AJning xorijiy hamkorlar bilan ishlab chiqarish samaradorligini oshirish, ilg‘or korporativ tajribani o‘zlashtirish va inson kapitalini rivojlantirishga qaratilgan hamkorlik siyosatining amaliy natijalaridan biridir.

Marosimda ta’kidlanganidek, bu kabi kasbiy bellashuvlar xodimlarning nazariy bilimi va amaliy ko‘nikmalarini sinovdan o‘tkazish bilan birga, tajriba almashish, ilg‘or ish usullarini ommalashtirish, mehnat madaniyati va xavfsiz mehnat tamoyillarini mustahkamlashga xizmat qiladi.

12-marta o‘tkazilayotgan korporativ tanlovda bu yil “O‘zbekneftgaz” AJ jamoasi ilk bor ishtirok etmoqda. Ishtirokchilar neft va gaz qazib chiqarish operatori, texnologik qurilmalar operatori, slesar-ta’mirchi, elektrgazpayvandchi, kimyoviy tahlil laboranti, texnolog, geolog, burg‘ilash va quduqlarni ta’mirlash bo‘yicha muhandis kabi 11 ta nominatsiyada kuch sinashadi.

22–23 sentyabr kunlari o‘tkaziladigan bellashuvning nazariy va amaliy bosqichlarida ishtirokchilardan nafaqat chuqur kasbiy bilim, balki aniqlik, tezkor qaror qabul qilish, xavfsiz mehnat talablariga qat’iy rioya etish va jamoada samarali ishlash ko‘nikmalari talab etiladi.

Eng muhimi, tanlov doirasida orttiriladigan tajriba “O‘zbekneftgaz” tizimida ishlab chiqarish samaradorligi, mehnat unumdorligi va kasbiy mahoratni yanada oshirishga xizmat qiladi.

"O‘zbekneftgaz" AJ Axborot xizmati

Neft-gaz sohasidagi hamkorlik istiqbollari ko‘rib chiqildi

2026-09-10T14:10:19.796Z

“O‘zbekneftgaz” AJ Boshqaruv raisi Abdug‘ani Sanginov Birlashgan Arab Amirliklarining “Sakson Drilling & Oil Services” kompaniyasi ijrochi direktori Amir Sakkal bilan uchrashuv o‘tkazdi.

Muloqot davomida tomonlar sohadagi mavjud istiqbolli yo‘nalishlar va kelgusida amalga oshirilishi mumkin bo‘lgan loyihalar yuzasidan fikr almashdilar.

“O‘zbekneftgaz” AJ tomoni “SAKSON Group” vakillarining takliflarini ko‘rib chiqish, o‘zaro manfaatli hamkorlikning amaliy mexanizmlarini muhokama qilish hamda konstruktiv muloqotni yo‘lga qo‘yishga tayyor ekanini bildirdi.

Uchrashuv yakunida tomonlar hamkorlik imkoniyatlarini chuqur o‘rganish, istiqbolli tashabbuslar bo‘yicha fikr almashish muhimligini qayd etdilar.

"O‘zbekneftgaz" AJ Axborot xizmati

“Asia Trans Gas” faoliyati va qo‘shma loyihalar bo‘yicha muhim masalalar ko‘rib chiqildi

2026-09-10T13:45:44.147Z

“O‘zbekneftgaz” AJ Boshqaruv raisi Abdug‘ani Sanginov Xitoyning "Trans-Asia Gas Pipeline Company Limited" (TAPLine) Direktorlar kengashi raisi Chjan Szyachjen bilan uchrashuv o‘tkazdi. Unda tomonlar o‘rtasidagi ko‘p yillik hamkorlikning bugungi holati, qo‘shma loyihalarni amalga oshirish, shuningdek, istiqboldagi o‘zaro manfaatli yo‘nalishlar muhokama qilindi.

Muloqot davomida “O‘zbekneftgaz” AJ va Xitoy davlat neft-gaz korporatsiyasi “CNPC” o‘rtasidagi sheriklik izchil rivojlanib borayotgani, bunda har ikki kompaniya rahbariyati tomonidan ko‘rsatilayotgan alohida e’tibor muhim ahamiyat kasb etayotgani ta’kidlandi.

Tomonlar “TAPLine” kompaniyasini “Asia Trans Gas” qo‘shma korxonasi faoliyati doirasida ishonchli va uzoq yillik hamkor sifatida e’tirof etdilar.

Muzokaralarda “Asia Trans Gas” qo‘shma korxonasi kuzatuv kengashi tarkibi va ichki nizomlarini amaldagi qonunchilik talablariga muvofiqlashtirish masalalari ham ko‘rib chiqildi.

Shuningdek, qo‘shma korxonani “Birinchi darajali kompaniya” sifatida rivojlantirish tashabbusi, aksiyadorlar o‘rtasida o‘zaro hamkorlik va muvofiqlashtirish mexanizmlarini takomillashtirish, foydani taqsimlash yuzasidan fikr almashildi.

“O‘zbekneftgaz” AJ Boshqaruv raisi tomonidan bugungi kundagi ustuvor vazifalarni inobatga olgan holda, ayrim tashabbuslar bo‘yicha iqtisodiy samaradorlik, xarajatlar va amalga oshirish muddatlarini qo‘shimcha ravishda chuqur o‘rganish zarurligi bildirildi.

Uchrashuv yakunida tomonlar mavjud hamkorlikni yanada mustahkamlash, qo‘shma korxona faoliyati samaradorligi hamda o‘zaro manfaatli loyihalarni amalga oshirish bo‘yicha muloqotni davom ettirishga tayyor ekanliklarini ta’kidladilar.

“O‘zbekneftgaz” AJ Axborot xizmati

Chuqurlikdagi imkoniyatlar: Ustyurtda 5 ta quduqni burg‘ilash orqali yangi zaxiralar o‘rganilmoqda

2026-09-08T12:50:57.829Z

“O‘zbekneftgaz” AJ Boshqaruv raisi Abdug‘ani Sanginov boshchiligidagi ishchi guruhning o‘rganishlari Mo‘ynoq tumani hududida joylashgan “Qiziljar” va “Shag‘irlik” konlarida burg‘ilanayotgan 5 ta quduqda davom ettirildi.

Loyihalardan ko‘zlangan asosiy maqsad — yangi uglevodorod zaxiralarini aniqlash, istiqbolli qatlamlarni o‘rganish va mamlakat energiya ta’minoti barqarorligini mustahkamlashdan iborat.

Boshqaruv raisi mazkur maydonlarda amalga oshirilayotgan ishlar bilan joyida tanishib, burg‘ilash jarayonlari, ish sur’ati, texnik xavfsizlik talablariga rioya etilishi va belgilangan rejalar ijrosini ko‘rib chiqdi.

Qayd etish joizki, joriy yil aprel oyidan boshlab Ustyurt hududidagi “Qiziljar” va “Shag‘irlik” maydonlarida chuqur burg‘ilash ishlari izchil yo‘lga qo‘yilib, qisqa muddat ichida ularning qamrovi sezilarli darajada kengaytirildi.

Bugungi kunda ishchi guruh tomonidan o‘rganilgan beshta quduqning ayrimlari loyihaviy chuqurlikka yaqinlashmoqda, yangi boshlanganlarida esa rejalashtirilgan vazifalar bosqichma-bosqich amalga oshirilmoqda.

Ishlar “Oʻzneftgaz burgʻilash ishlari” MCHJ hamda Xitoyning “CNPC Xibu Drilling Engineering Company Ltd” kompaniyasi tomonidan bajarilmoqda. Shu bilan birga, Boshqaruv raisining topshirigʻi bilan xorijiy kompaniyaning ilgʻor tajribasini amaliyotda oʻrganishga ham alohida eʼtibor qaratilmoqda. Xususan, ayni paytda yuqori kurslarda tahsil olayotgan 4 nafar talaba Xitoy kompaniyasi mutaxassislari bilan birga ish jarayonlarida ishtirok etib, zamonaviy burgʻilash texnologiyalari va ishlash usullarini bevosita amaliyotda oʻzlashtirmoqda.

Boshqaruv raisi chuqur quduqlarda ish olib borish yuqori texnologik yondashuv, aniq hisob-kitob va katta tajribani talab etishini ta’kidladi. Qatlamlarni puxta o‘rganish orqali yangi uglevodorod zaxiralarini aniqlash imkoniyatlarini kengaytirish muhim ekanini qayd etdi. Mas’ullarga esa texnika imkoniyatlaridan samarali foydalanish, jarayonlarda asossiz to‘xtalishlarga yo‘l qo‘ymaslik hamda belgilangan vazifalarni muddatida va sifatli bajarish bo‘yicha tegishli topshiriqlar berildi.

"O‘zbekneftgaz" AJ Axborot xizmati

Yangi ombor, baza va zamonaviy texnika: Ustyurtda katta maqsadlar uchun puxta zamin yaratilmoqda

2026-09-08T07:38:02.110Z

"Oʻzbeknetgaz" AJ Boshqaruv raisi Abdugʻani Sanginov boshchiligidagi Ishchi guruhning Qoraqalpogʻiston Respublikasiga navbatdagi safari davomida Jamiyatga qarashli Ustyurt hududida qurilayotgan muhim obyektlar holati va ularning amaliy samarasi tanqidiy-tahliliy jihatdan koʻrib chiqildi.

Xabaringiz bor, joriy yil boshida Jamiyat tizimida geologiya-qidiruv va burgʻilash ishlarini kengaytirish, yangi quduqlarni oʻz vaqtida ishga tushirish orqali qazib chiqarish hajmini barqarorlashtirishga qaratilgan katta islohotlarga start berilgan edi. Ustyurt hududidagi mazkur oʻrganishlar ana shu islohotlarning joylardagi amaliy ijrosi, yaratilayotgan infratuzilmaning real ehtiyojlarga mosligi va har bir obyektning ishlab chiqarish samaradorligiga xizmat qilish darajasini baholashga qaratilgan.

Uglevodorod zaxiralariga boy Ustyurt hududida qidiruv-burgʻilash hajmining ortishi aynan shunday zamonaviy, tejamkor va ishlab chiqarishga bevosita xizmat qiladigan infratuzilmani talab etmoqda. Shu maqsadda moddiy-texnik resurslar ombori, burgʻilash bazasi va transport taʼminotini oʻz ichiga olgan yaxlit tizim bosqichma-bosqich yaratilmoqda.

Qoʻngʻirot tumanida “UNG Burgʻilash” MCHJ uchun barpo etilayotgan yangi moddiy-texnik resurslar ombori mazkur tizimning muhim tayanch nuqtasiga aylanadi. Markazlashtirilgan ombor kengayib borayotgan burgʻilash maydonlarini zarur texnika, uskuna va quvurlar bilan uzluksiz taʼminlash, taʼminotdagi ehtimoliy uzilishlarning oldini olish imkonini beradi. Boshqaruv raisi ushbu obyekt loyihasi bilan tanishish jarayonida qurilishda belgilangan talablar toʻliq taʼminlanishi, har bir yechim amaliyotda oʻzini oqlashi va ortiqcha sarf-xarajatlarga yoʻl qoʻyilmasligi zarurligiga alohida eʼtibor qaratildi.

Xususan, omborga kirish yoʻlagining haddan tashqari keng loyihalashtirilgani tanqidiy baholanib, ortiqcha xarajatlarga yoʻl qoʻymaslik, har bir kvadrat metr va har bir soʻm aniq natijaga xizmat qilishi shartligi taʼkidlandi. Shu asosda loyihani optimallashtirish, kamxarajat va unumdor yechimlarni tanlash, qurilish muddatlarini qisqartirish hamda energiya samarador yoritish tizimlarini joriy etish boʻyicha masʼullarga aniq vazifalar belgilab berildi.

“UNG Burgʻilash” Ustyurt filiali bazasining qurilishi ham aynan shu mezonlar asosida tahlil qilindi. Mazkur baza kelgusida burgʻilash xizmatlarini kengaytirish, moddiy resurslarni saqlash va vaxta xodimlari uchun zarur sharoitlarni yaratishga xizmat qiladi. Shu bilan birga, obyektlar tashqi koʻrinishi yoki hajmi bilan emas, avvalo, ishlab chiqarishdagi amaliy foydasi bilan baholanishi lozimligi qayd etildi. Shu nuqtayi nazardan, kam foydalaniladigan va ortiqcha xarajat talab qiladigan mehmonxona tipidagi inshootlarni loyihadan chiqarish, asosiy eʼtiborni ishlab chiqarish jarayoniga bevosita xizmat qiladigan binolarga qaratish vazifasi belgilandi.

Ishchi safar doirasida Ustyurt gaz qazib chiqarish boshqarmasining transport parki ham koʻzdan kechirildi. Vaxta avtobuslari va ogʻir yoʻl sharoitida ishlaydigan xoʻjalik texnikalarining holati oʻrganilib, mavjud ehtiyojdan kelib chiqqan holda yangi yoʻl tanlamas mashinalar xarid qilingani qayd etildi. Ushbu texnikalarning nafaqat xarid qilinishi, balki ularni qisqa muddatda ishlab chiqarish jarayonlariga jalb etish va samarali foydalanish muhimligi taʼkidlandi.

Ishchi safar doirasidagi keyingi oʻrganishlar Moʻnoq tumanida joylashgan obyektlarda davom ettiriladi.

"Oʻzbekneftgaz" AJ Axborot xizmati

“Vaziyatni yashirish emas, muammoni ochiq koʻrsatish kerak”- A. Sanginov

2026-09-07T13:08:35.202Z

Bugun “O’zbekneftgaz” AJda Boshqaruv raisi Abdugʻani Sanginov ishtirokida kengaytirilgan apparat yigʻilishi oʻtkazildi. Unda 9 oylik yakuni bilan kutilayotgan ishlab chiqarish-iqtisodiy koʻrsatkichlar, mavjud risklar hamda yil yakuniga qadar amalga oshirilishi shart boʻlgan ustuvor vazifalar atroflicha muhokama qilindi.

9 oylik yakuniga 24 kun qolgan. Shu bois har bir yoʻnalish boʻyicha reja ijrosi, mavjud kamchiliklarning aniq sabablari va qisqa muddatda koʻriladigan choralar yuzasidan qatʼiy yondashuv shakllantirildi.

“Bugun har bir yoʻnalish boʻyicha aniq savol qoʻyilishi kerak: nimani reja qilgandik, nimalarga erishildi, nima bajarilmay qoldi, qolgan qisqa muddatda yana nimalar qilish lozim va qanday natijaga erishiladi?”, — dedi Boshqaruv raisi.

Tabiiy gaz qazib chiqarish boʻyicha 9 oylik reja ijrosi yuzasidan mavjud holat atroflicha koʻrib chiqilib, belgilangan koʻrsatkichlarga erishish uchun qoʻshimcha imkoniyatlarni safarbar etish zarurligiga eʼtibor qaratildi. Shuningdek, oʻtgan yilning shu davri bilan solishtirilganda qazib chiqarish surʼatlarini barqarorlashtirish va mavjud zaxiralardan samarali foydalanish muhim vazifalardan biri sifatida koʻrsatib oʻtildi. Har bir kon, quduq va obyekt kesimida tahlilni kuchaytirish, ishni manzilli tashkil etish hamda yil yakuniga qadar reja ijrosini taʼminlash boʻyicha amaliy choralarni jadallashtirish lozimligi qayd etildi.

Avgust oyida ishga tushirilishi rejalashtirilgan quduqlar sarhisobi, sentyabr oyiga rejalashtirilgan quduqlarni 9 oylik yakuniga qadar ishga tushirish va bu orqali kunlik qazib chiqarishni 3,9 mln kub metrga oshirish vazifasi qoʻyildi.

Shuningdek, 16 ta quduqda kapital taʼmirlash ishlarini amalga oshirish hisobiga kunlik qazib chiqarishni yana 460 ming kub metrga oshirish topshirildi.

Qayta ishlash yoʻnalishida gaz kondensati, oltingugurt va suyultirilgan gaz ishlab chiqarish koʻrsatkichlari tahlil qilindi. Xususan, tizim korxonalari tomonidan yil yakuniga qadar mazkur mahsulot ishlab chiqarish hajmini 120 %ga bajarish vazifasi belgilandi. Neft mahsulotlarini qayta ishlash uchun xomashyo taʼminoti ham alohida koʻrib chiqildi.

Yigʻilishda avariyaviy toʻxtalishlar, kuz-qish mavsumiga tayyorgarlik, transport vositalari holati, raqamlashtirish, mahalliylashtirish va investitsiya loyihalari ijrosi boʻyicha ham aniq tadbirlar belgilab olindi. Xususan, siquv kompressor stansiyalarini 1-oktyabrga qadar toʻliq shay holatga keltirish boʻyicha masʼullarga vazifalar yuklatildi.

Raqamlashtirish borasida esa natijadorlik asosiy mezon boʻlishi taʼkidlandi. “Raqamlashtirishni taqdimot va hisobotlarda emas, ishlab chiqarish samaradorligida koʻrishimiz kerak”, — dedi A. Sanginov. “E-Kon”, “Burgʻilash markazi”, ERP va BI tizimlarini joriy etish, neft bazalarida raqamlashtirishni yakuniy muddati belgilandi.

Shu bilan birga, 2027-yilga tayyorgarlik ishlarini hozirdan boshlash , geologiya-qidiruv dasturi, geologik-texnik tadbirlar, qazib chiqarish va ishlab chiqarish balansi, qurilishlar manzilli dasturi, investitsiya dasturi hamda xaridlar portfelini shakllantirish boʻyicha ishlarni jadallashtirish topshirildi.

“9 oylikni ijobiy yakunilashimiz uchun bizda 24 kun bor. 24 kun — qisqa muddat. Lekin barcha yoʻnalishda ishlarni toʻgʻri tashkil etsak, kunlik nazorat bilan natija qilish mumkin. Har bir rahbar oʻz yoʻnalishining yakuniy natijasi uchun shaxsan javob beradi”, — dedi Boshqaruv raisi.

Belgilangan barcha vazifalarning yanada qatʼiy nazorat asosida ijrosini taʼminlash, qoloqliklarni bartaraf etish, moliyaviy va ishlab chiqarish samaradorligini oshirish yigʻilishning asosiy maqsadi boʻldi.

“Oʻzbekneftgaz” AJ Axborot xizmati