UZBEKNEFTEGAZ_UZ

Har bir quduq, har bir soat — shaxsiy nazoratda

2026-08-10T17:08:56.450Z

“O‘zbekneftgaz” AJ Boshqaruv raisi rahbarligida o‘tkazilgan navbatdagi ishchi yig‘ilishda avgust oyida ishga tushirilishi rejalashtirilgan 27 ta quduq bo‘yicha 5–10-avgust kunlari davomida bajarilgan ishlar tahlil qilindi. Mas’ullar har bir quduq kesimida burg‘ilash, o‘zlashtirish va ishga tushirish jarayonlari yuzasidan hisobot berib, aniqlangan muammolarni bartaraf etish bo‘yicha tezkor qarorlar qabul qildilar.

Qayd etilganidek, "Yangi Kultak", "Niyoz", "Qoratau", "Marvarid" va "Tegirmon" konlarida amalga oshirilayotgan ishlar natijasida qo‘shimcha 887 ming kub metr tabiiy gaz qazib chiqarish imkoniyati yaratiladi. Ayni paytda mazkur ishlar orqali gaz qazib chiqarishdagi tabiiy tushish sur’atining oldini olish hamda ishlab chiqarish hajmini barqaror saqlab turish ta’minlanadi. Shu bois har bir quduqning ishga tushish muddati va texnologik jarayonlari shaxsan Boshqaruv raisi nazoratiga olingan.

Yangi quduqlarni ishga tushirish bo‘yicha barcha ishlar soatbay reja asosida tashkil etilib, Boshqaruv raisi har bir bosqichning kunlik ijrosini shaxsan kuzatib bormoqda. Ta’kidlanganidek, bugungi vazifa — quduqni faqat burg‘ilab tugatish emas, balki uni sanoat miqyosida gaz beruvchi obyekt sifatida o‘z vaqtida ishga tushirishdir.

Shu nuqtayi nazardan quduqlarni kapital ta’mirlash ishlari ham alohida tahlil qilindi.

Moliyalashtirish masalasi muhokamasida Boshqaruv raisi muhim tamoyilni belgiladi. Loyihalar imkoni boricha avvalgilardan farqli o‘laroq yuqori foizli kreditlar hisobidan emas, balki ichki moliyaviy imkoniyatlar hisobidan amalga oshirilishi kerakligi, bu orqali qo‘shimcha qarz yukini oshirmasdan, moliyaviy barqarorlikni saqlash dolzarbligi bildirildi.

Shuningdek, burg‘ilash ishlari yakunlanganidan keyin gazni quvurlarga uzatish bilan bog‘liq texnologik jarayonlar ham muhokama qilindi. Boshqaruv raisi har qanday ehtimoliy holat uchun oldindan bir nechta texnik ssenariy ishlab chiqish zarurligini ta’kidlab, burg‘ilash ishlari tugagach, keyingi bosqichlarda yuzaga kelishi mumkin bo‘lgan texnik to‘siqlar gaz qazib chiqarishni kechiktirmasligi shartligini qayd etdi.

Yig‘ilishda yangi tashkil etilgan "UNG Burg‘ilash" MCHJ imkoniyatlaridan ham keng foydalanish masalasiga alohida e’tibor qaratildi. Boshqaruv raisi ichki burg‘ilash kompaniyasining xizmatlaridan samarali foydalanish orqali quduqlarni qurish tannarxini pasaytirish, xarajatlarni optimallashtirish va mahsulot tannarxiga salbiy ta’sirlarni kamaytirish bo‘yicha qat’iy topshiriq berdi.

Raqamlashtirish masalasi yig‘ilishning asosiy mavzularidan biri bo‘ldi. Barcha yangi quduqlarni raqamlashtirish hamda Burg‘ilashni boshqarish markazi orqali real vaqt rejimida nazorat qilish hamda kelgusida mazkur markaz faoliyatiga sun’iy intellekt yechimlarini joriy etish bo‘yicha vazifalar belgilandi.

Boshqaruv raisi raqamlashtirishning amaliy samarasini neft bazalar misolida tushuntirib, raqamli nazorat joriy etilgandan keyin ayrim neft bazalarida mahsulot aylanmasi 60–70 ming litrdan 800 ming litrgacha oshganini qayd etdi. Uning ta’kidlashicha, raqamlashtirish faqat nazorat vositasi emas, balki samaradorlikni bir necha barobar oshiradigan boshqaruv mexanizmi hisoblanadi.

Shu bilan birga sohani ilm-fan bilan integratsiya qilish masalasi ham ko‘rib chiqildi. Boshqaruv raisi "O‘zlitineftgaz" institutining yosh olimlari va muhandislarini xalqaro tajribaga ega qilish, ularni xorijiy markazlarda malaka oshirish orqali geologiya, 3D modellashtirish va loyihalash sohasini yangi bosqichga olib chiqish zarurligini ta’kidladi.

“Bugungi taraqqiyotning kaliti — ilmda. Ilmiy yondashuvsiz na quduqlar samarasi, na ishlab chiqarish natijasi kutilgan darajada bo‘ladi,” deya qayd etdi Boshqaruv raisi.

Shuningdek, yig‘ilishda kuz-qish mavsumiga tayyorgarlik ham atroflicha muhokama qilindi. Elektr ta’minoti tizimini to‘liq xatlovdan o‘tkazish, podstansiyalar, transformatorlar, elektr uzatish tarmoqlari va avtomatlashtirish tizimlarini ta’mirlash hamda avariyalarning oldini olish bo‘yicha har bir boshqarma kesimida aniq chora-tadbirlar ishlab chiqish topshirildi. Ta’kidlanganidek, energiya ta’minotidagi har qanday uzilish gaz qazib chiqarish jarayoniga salbiy ta’sir ko‘rsatmasligi lozim.

Yig‘ilish yakunida Boshqaruv raisi gaz qazib chiqarish faqat ishlab chiqarish bo‘linmalarining vazifasi emasligini alohida ta’kidladi. Uning qayd etishicha, xarid, moliya, logistika, ta’minot va boshqa tayanch tuzilmalar ham yagona maqsad yo‘lida bir jamoa sifatida ishlashi, bir-biriga to‘siq emas, aksincha, amaliy yordamchi bo‘lishi kerak. Faqat shunda belgilangan vazifalar o‘z vaqtida va yuqori samara bilan bajarilishi mumkin.

“O‘zbekneftgaz” AJ Axborot xizmati

Polimer ishlab chiqarishda kamchiliklar bormi? — Infratuzilma bo‘yicha yangi vazifalar

2026-08-08T07:06:07.755Z

Boshqaruv raisi topshirig‘iga ko‘ra, moliya, transformatsiya va xususiylashtirish bo‘yicha birinchi o‘rinbosar boshchiligidagi ishchi guruh o'rganish ishlari olib borish jarayonida Sho'rtan gaz kimyo majmuasida bo`lib, polimer mahsulotlarini ishlab chiqarishga iqtisoslashgan bo'linmalarni ko'zdan kechirdi va sohani rivojlantirish bo`yicha takliflarini bildirdi.

Dastlab majmuaning Qarshitermoplast bo'limida ishlab chiqarilayotgan polimer mahsulotlari, texnologik jarayonlarning tashkil etilishi, mahsulot sifati va ishlab chiqarish quvvatlaridan foydalanish darajasi ko‘zdan kechirildi. Bo'linmada ishlab chiqarish quvvatlaridan samarali foydalanish, mahsulot sifatini oshirish va ishlab chiqarish hajmini ko‘paytirish masalalari muhokama qilindi.

Ikkinchi manzilda Xitoyning “Yunnan Xinchengpeng Polymer Technology” kompaniyasi bilan hamkorlikda tashkil etilgan “NASAF XCP TECHNO” qo‘shma korxonasi faoliyati o‘rganildi. Quvvatlardan samarali foydalanish hamda raqobatbardosh mahsulot ishlab chiqarish hajmini oshirish bo‘yicha tavsiyalar berildi.

Shundan so‘ng ishchi guruh majmuaning "Geolog" sog‘lomlashtirish markazi faoliyatiga ham alohida eʼtibor qaratdi. Markazdagi mavjud infratuzilma obyektlari, bino va inshootlarning joriy holati ko‘zdan kechirildi.

Shuningdek, "Gissarneftgaz" QK tasarrufidagi mehmonxonani taʼmirlash masalalari ko‘zdan kechirildi. Mehmonxona infratuzilmasini zamonaviy talablar asosida takomillashtirish, taʼmirlash ishlarini sifatli va belgilangan muddatlarda yakunlash, mavjud imkoniyatlardan unumli foydalanish yuzasidan masʼullarga tegishli topshiriqlar berildi.

"Shurtan gaz kimyo majmuasi" MCHJ Matbuot xizmati

Ishchilar ahvoli qanday? Ularni nimalar qoniqtirmayapti?

2026-08-08T06:30:12.569Z

Neft va gaz sanoati mamlakat iqtisodiyotining muhim tarmoqlaridan biri hisoblanadi. Mazkur tizimdagi neft va gaz quduqlari, kompressor stansiyalari va milliardlab so‘mlik yirik zavodlar qatori og‘ir iqlim sharoiti, jazirama issiq, qum bo‘ronlar ostida mehnat qilayotgan insonlar uning eng katta boyligidir.

Shu bois, Jamiyat boshqaruv raisi Abdug‘ani Sanginovning xalqchil siyosati natijasida ishchilar sharoitini yaxshilash, ular uchun xavfsiz mehnat muhitini yaratish, munosib yashash sharoitlarini ta’minlash va ijtimoiy infratuzilmani rivojlantirish masalasi kun tartibidagi eng dolzarb masalalardan biriga aylangan. Ishlab chiqarish va ma’muriy binolarda qulay muhitni yaratish, ovqatlanish sifatini yaxshilash hamda ijtimoiy obyektlarni zamonaviy talablar asosida qurish shular jumlasidan.

Ana shu vazifalar ijrosini ta’minlash maqsadida “Ustyurt” neft va gaz qazib chiqarish boshqarmasining Qo‘ng‘irot va Mo‘ynoq tumanlari hududida joylashgan qator obyektlarda jamoatchilik nazorati tashkil etilib, jamoa shartnomasining ijrosi o‘rganildi.

Tumanlardagi 10 ta obyektda jumladan, kondensat quyish estakadasi, “Arslon”, “Surgil” hamda “Shimoliy Berdaq” koni, “Sharqiy Berdaq” va “Urga” siquv kompressor stansiyalari (SKS), GKTQ, “Uchsoy” ishchilar yotoqxonasi hamda yangidan barpo etilayotgan “Uchsoy” shaharchasida atroflicha o‘rganishlar olib borildi.

Natija ayrim mas’ul rahbarlar va xizmat ko‘rsatuvchi bo‘linmalar tomonidan yo‘l qo‘yilgan beparvolik natijasida yig‘ilib qolgan muammolar mavjudligini ko‘rsatdi. Obyektlarning aksariyatida eng oddiy talablar ham bajarilmagan. Ko‘plab binolar va yotoqxonalarning peshtoq qismida obyekt nomi ko‘rsatilmagan. Bir qarashda ahamiyatsiz bo‘lib ko‘ringan bu holat, aslida, ichki intizom va tartibga bo‘lgan munosabatning o‘ziga xos ko‘rsatkichidir. Ayrim ijtimoiy obyektlar uzoq vaqt davomida ta’mirlanmagan. Havo muzlatkichlari ishlamaydi, xonalarning sanitariya holati talab darajasida emas, yuvinish xonalari va hojatxonalardagi jihozlar eskirgan yoki umuman yaroqsiz holga kelib qolgan.

Suv isitish vositalari yetishmagani sababli xodimlar qo‘lbola sharoitlarda yuvinish joylarini tashkil qilishga majbur bo‘lgan. Bu esa sanitariya talablarining qo‘pol ravishda buzilishiga olib kelgan.

Cho‘l hududlarda joylashgan obyektlarda xavfsizlik choralari yetarli darajada ta’minlanmagani aniqlandi. Ayrim vagon-yotoqxonalarning atrofi himoya panjaralari bilan o‘ralmagan. Bu esa nafaqat mol-mulk, balki inson hayoti uchun ham jiddiy xavf tug‘diradi. Joriy yilning boshida quturgan tulkining vagon-yotoqxona hududiga kirishga uringani bu xavfning naqadar jiddiy ekanini yaqqol ko‘rsatdi.

Shuningdek, obyektlarda ilon va zaharli hasharotlar chaqishiga qarshi zardoblar ham yetarli emasligi ma’lum bo‘ldi. Mavjud dori vositalari belgilangan tartibga zid ravishda oddiy shkaflarda saqlangan. Bu esa favqulodda holat yuz bergan taqdirda, inson hayotini saqlab qolish imkoniyatini keskin kamaytirishi mumkin.

O‘rganishlar davomida yong‘in xavfsizligi bilan bog‘liq ko‘plab kamchiliklar ham aniqlandi. Ayrim obyektlarda o‘t o‘chirish vositalarining yo‘qligi, mavjudlarining bir qismi esa sinovdan o‘tkazilmagani ma’lum bo‘ldi. Ba’zi joylarda esa yong‘inga qarshi shitlar ishchilar yashaydigan hududdan 150–200 metr uzoqlikda joylashtirilgan.

Yotoqxonalarda mobil qurilmalarni yostiqlar ostida yoki yonida quvvatlash odatiy holga aylangan. Elektr uzaytirgichlarining tarmoqdan uzilmasdan qoldirilishi esa yong‘in xavfini yanada kuchaytirmoqda. O‘rganish yakuni bilan mazkur kamchiliklar ham bartaraf etildi.

Tekshiruvlar davomida kuz-qish mavsumiga tayyorgarlik ishlarida ham jiddiy nuqsonlar borligi ma’lum bo‘ldi. Ayrim yotoqxonalarda isitish tizimlari ishdan chiqqan. Ba’zi joylarda esa hanuzgacha eski turdagi pechkalardan foydalanilmoqda. Qimmati milliardlab so‘m bo‘lgan dizel generatorlarining yomg‘ir, qor va issiq havo ta’sirida ochiq holda saqlanayotgani aniqlandi. Vaholanki, ularni tashqi ta’sirlardan himoya qilish uchun juda kam mablag‘ talab qilinar edi.

Ovqatlanish sifati masalasi ham alohida o‘rganildi. Ma’lum bo‘lishicha, oziq-ovqat ta’minoti autsorsing asosida tashkil qilingan. Biroq, bu tizim kutilgan natijani bermayotgani kuzatilgan. Ishchi-xodimlar bilan gaplashilganda issiq ovqat sifati bo‘yicha ko‘plab e’tirozlar bildirildi.

Asosiy muammolardan biri mahsulotlarning Buxoro viloyatidan yetkazib berilishi bilan bog‘liq bo‘lib, uzoq masofa tufayli mahsulotlarning sifati yomonlashgan. Oshxonalarda sanitariya-gigiyena talablariga to‘liq rioya qilinmagan. Ovqat tayyorlash joylari, idish-tovoqlarni yuvish xonalari va oshxona jihozlari talablarga javob bermaydi. Eng tashvishli holatlardan biri sifatida oshxona xodimlarining o‘z vaqtida tibbiy ko‘rikdan o‘tmagani qayd etildi. Bundan tashqari, tasdiqlangan taomnomalarga o‘zboshimchalik bilan o‘zgartirishlar kiritilgani, sariyog‘ o‘rniga margarin ishlatilgani ham aniqlandi.

O‘rganishlar yana bir muhim muammoni yuzaga chiqardi. Rasmiy hisobotlarga ko‘ra, boshqarma tasarrufida 90 ta yotoqxona va 424 ta yotoq o‘rni mavjudligi ko‘rsatilgan bo‘lsa, amalda ularning soni 115 ta yotoqxona va 430 ta yotoq o‘rnini tashkil etgan. Shuningdek, beshta yotoqxona kapital ta’mirga muhtoj ekani, yana uchta yangi yotoqxona qurilishi lozimligi ma’lum bo‘ldi.

“Surgil” siquv kompressor stansiyasi hududida 70 o‘rinli yotoqxona qurilishi yarim yo‘lda qolib ketgan.Kondensat quyish estakadasida ham qo‘shimcha yotoqxona qurilishi yakunlanmagan.“Uchsoy” ishchilar yotoqxonasidagi holat alohida e’tibor talab qiladi. 70 nafar xodim uchun mo‘ljallangan yotoqxonada tekshiruv vaqtida 165 nafar kishi yashayotgani aniqlandi.

Bundan tashqari, suv tozalash filtrlari, ovqatlanish anjomlari va boshqa jihozlar ham yangilanishi lozimligi ma’lum bo‘ldi. Xizmat safari davomida ishchi-xodimlar bilan yuzma-yuz va dildan suhbatlar tashkil etildi. Muloqotdarda ularning mehnat sharoitlari, yashash muhiti, ovqatlanish sifati, tibbiy xizmat, transport ta’minoti, xavfsizlik masalalari va kundalik hayotda duch kelayotgan muammolari tinglandi.

Eng muhimi, xodimlar o‘zlarini qiynab kelayotgan masalalarni ochiqchasiga bayon qilish imkoniyatiga ega bo‘ldilar. Chunki ko‘pincha rasmiy hisobotlarda aks etmaydigan haqiqatni oddiy ishchining o‘zi aytib beradi. Biz ishchilar bilan faqatgina uchrashmadik, balki ularning dardini eshitdik. Chunki mehnatkash insonning kayfiyatini hech qanday hisobot, hech qanday raqam va hech qanday taqdimot to‘liq ifodalay olmaydi.

Xulosa o‘rnida aytish joizki, Kasaba uyushmalarining asosiy vazifasi inson manfaatlarini himoya qilish, muammolarni o‘z vaqtida aniqlash va ularni hal etish uchun amaliy mexanizmlarni ishga tushirishdan iborat. Shuning uchun ham har bir rahbar o‘z faoliyatini kabinetdagi hisobotlar bilan emas, balki ishchilar yashaydigan yotoqxonalar, ular ovqatlanadigan oshxonalar va mehnat qiladigan ish joylarining haqiqiy ahvoli bilan baholashi lozim.

Habibulla Azizov
Birlashgan kasaba uyushma
qo‘mitasi raisi o‘rinbosari

Avgust va sentyabr oylari O‘zbekneftgazda tabiiy gaz qazib chiqarish hajmini oshirish oylari bo‘ladi – A.Sanginov

2026-08-07T16:11:33.015Z

"O‘zbekneftgaz" AJ boshqaruv raisi boshchiligida o‘tkazilgan navbatdagi ishchi yig‘ilishda gaz qazib chiqarish hajmini oshirish, konlarni samarali ekspluatatsiya qilish, ishlab chiqarish infratuzilmasini modernizatsiya qilish hamda xodimlar uchun munosib mehnat sharoitlarini yaratish masalalari atroflicha muhokama qilindi.

Yig‘ilishda qazib chiqarish ko‘rsatkichlarini barqaror ta’minlash uchun ekspluatatsiya tizimini yangi bosqichga olib chiqish, elektr ta’minoti va energetika obyektlarining ishonchliligini oshirish, transformator xo‘jaligini yangilash, izolatorlarni almashtirish hamda gaz porshenli stansiyalarning samarali ishlashini ta’minlash bo‘yicha aniq topshiriqlar berildi.

Majlisda avgust oyi uchun belgilangan gaz ko‘paytirish chora-tadbirlari har 10 kunlik rejasi kunbay, quduqlar va konlar kesimida birma bir tahlil qilindi. Qayd etilganidek, yil boshida boshlangan islohotlar natijasi o‘laroq avgust va sentyabr oylari gaz qazib chiqarishni oshirish oylari sifatida belgilangan. Raqamlarga ko‘ra, avgust oyi davomida 27 ta quduqni ishga tushirish reja qilingan.

Quduqlar fondidan samarali foydalanish, mukammal va joriy ta’mirlash ishlarini jadallashtirish bu jarayonda javobgarlik chegaralarini aniq belgilash hamda Xitoyning ilmiy institutlari bilan hamkorlikda quduqlarni ta’mirlash texnologiyalarini takomillashtirish bo‘yicha vazifalar berildi.

Shu bilan birga, 2026 yilning manzilli va investitsiya dasturlari hisob-kitobida yo‘l qo‘yilgan tizimli kamchiliklardan xulosa chiqarib, hozirdan 2027 yil uchun mukammal dasturlarni boshlash vazifasi berildi. Loyihalarni tartibga solish, 3D seysmika ishlarini jadallashtirish, 2027 yil uchun geologiya-qidiruv dasturini shakllantirish, yangi bloklardagi ishlarni o‘z vaqtida tashkil etish, qurilish obyektlarida kechikishlarga yo‘l qo‘ymaslik hamda moddiy-texnika ta’minotini kuchaytirish masalalari ham kun tartibida dolzarblik kasb etdi.

Hududlarda amalga oshirilishi rejalashtirilgan burg‘ilash ishlarni belgilangan muddatlarda bajarilishini ta’minlash maqsadida xorijdan keltirilayotgan uskunalarni yetkazib kelishni tezlashtirish va ular uchun yo‘l va infratuzilmalarni belgilangan muddatdan oldin tayyorlash hamda qo‘shimcha texnika jalb qilish bo‘yicha ham aniq topshiriqlar berildi.

Yig‘ilish yakunida zamonaviy texnologiyalarni joriy etish, avtomatlashtirilgan boshqaruv tizimlarini kengaytirish, xalqaro hamkorlar talablariga javob beradigan zamonaviy uskunalardan samarali foydalanish hamda ishlab chiqarish samaradorligini yanada oshirish ustuvor vazifalardan biri ekani ta’kidlandi.

Yig‘ilishda Ustyurt hududidagi ishlab chiqarish obyektlarida mehnat sharoitlari qoniqarsiz deb baholanib, holatni yaxshilashga alohida e’tibor qaratildi. Ishchilar yotoqxonalarini to‘liq ta’mirlash, maxsus kiyim-bosh bilan ta’minlash, maishiy sharoitlarni zamonaviy talablar darajasiga olib chiqish vazifalari belgilandi. Jumladan, 25 avgustga qadar Ustyurtda barpo etilayotgan yangi yotoqxonani foydalanishga topshirish hamda yil yakuniga qadar Ko‘kdumaloq, Pomuq va Alan konlaridagi yotoqxonalarni to‘liq yangilash topshirildi.

Shuningdek, barcha tizim tashkilotlarida yurtimiz mustaqillik shodiyonalarining 35 yilligini munosib kutib olishga tayyorgarlik ishlarini yuqori saviyada tashkil etish zarurligi ta’kidlandi.

"O’zbekneftgaz" AJ Axborot xizmati

“Uzbekistan GTL”da 2026-yilning birinchi yarim yilligi yakunlari sarhisob qilindi

2026-08-07T08:39:00.695Z

“Uzbekistan GTL” zavodida “O‘zbekneftgaz” AJ Boshqaruvi raisining birinchi o‘rinbosari ishtirokida 2026-yilning birinchi yarim yilligi yakunlariga bag‘ishlangan kengaytirilgan yig‘ilish bo‘lib o‘tdi.

Unda korxonaning birinchi yarim yillikda erishgan ishlab chiqarish va moliyaviy natijalari, belgilangan ko‘rsatkichlar ijrosi hamda asosiy faoliyat yo‘nalishlari bo‘yicha mas’ul rahbarlarning hisobotlari tinglandi.

Muhokamalar davomida korxona tarixida ilk bor ishlab chiqarish quvvatlaridan foydalanish darajasi 100 foizga yetkazilgani alohida qayd etildi. Shuningdek, korxona tomonidan ishlab chiqarish va moliyaviy ko‘rsatkichlar bo‘yicha erishilgan natijalar ijobiy baholanib, faoliyat samaradorligini yanada oshirish yuzasidan ustuvor vazifalar belgilandi.

Ikkinchi yarm yillikda erishilgan yuqori natijalarni saqlab qolish hamda belgilangan rejaviy ko‘rsatkichlarning so‘zsiz bajarilishini ta’minlash ustuvor vazifa sifatida belgilandi. Xususan, kuz-qish mavsumiga puxta tayyorgarlik ko‘rish, ishlab chiqarish quvvatlarining barqaror va uzluksiz ishlashini ta’minlash maqsadida rejalashtirilgan ta’mirlash ishlarini sifatli va belgilangan muddatlarda amalga oshirish bo‘yicha mas’ullarga aniq vazifalar yuklatildi.

Shuningdek, yil yakuniga qadar ishlab chiqarish quvvatlaridan foydalanish darajasini 100 foizda saqlab qolish, ishlab chiqarish va moliyaviy ko‘rsatkichlarning to‘liq bajarilishini ta’minlash yuzasidan mas’ullarga qat’iy topshiriq va ko‘rsatmalar berildi.

“O‘zbekneftgaz” AJ Axborot xizmati

Ochiq muloqot — amaliy yechimlar sari

2026-08-06T12:21:02.386Z

Sho‘rtan gaz kimyo majmuasida “O‘zbekneftgaz” AJ Boshqaruvi raisining moliya, transformatsiya va xususiylashtirish bo‘yicha birinchi o‘rinbosari S. Hamroyev ishtirokida navbatdagi sayyor qabul tashkil etildi.

Ochiq muloqot tarzida o‘tgan qabul davomida ishchi-xodimlar tomonidan yashash sharoitlarini yaxshilash, ijtimoiy va moddiy qo‘llab-quvvatlash, davolanish hamda salomatlikni tiklashga ko‘maklashish, shuningdek, mehnat faoliyati va bandlik bilan bog‘liq masalalar yuzasidan murojaatlar bildirildi.

Har bir murojaat mas’ullar ishtirokida atroflicha ko‘rib chiqildi. Tezkor hal etish imkoniyati mavjud bo‘lgan masalalar bo‘yicha joyida amaliy yechimlar qabul qilindi. Qo‘shimcha o‘rganishni talab etadigan arzlar esa tegishli tarkibiy bo‘linmalar va mutaxassislarga biriktirilib, ularning ijrosini ta’minlash uchun aniq muddatlar belgilandi.

Sayyor qabul yakunida kelib tushgan murojaatlar ijrosini belgilangan muddatlarda ta’minlash, ularning bajarilishini tizimli nazorat qilib borish hamda qabul qilingan qarorlar yuzasidan murojaatchilarni o‘z vaqtida xabardor etish bo‘yicha mas’ullarga tegishli topshiriqlar berildi.

“Sho‘rtan gaz kimyo majmuasi” MChJ Matbuot xizmati

Yarim yillik natijalar sarhisobi: barqarorlik, samaradorlik va yangi ustuvor vazifalar belgilandi

2026-08-06T10:47:18.710Z

Sho‘rtan gaz kimyo majmuasida “O‘zbekneftgaz” AJ boshqaruvi raisining birinchi o‘rinbosari S.Xamrayev ishtirokida 2026-yilning birinchi yarim yilligi yakunlariga bag‘ishlangan tahliliy yig‘ilish o‘tkazildi.

Dastlab, majmuaning olti oylik ishlab chiqarish va moliyaviy-iqtisodiy faoliyati har tomonlama tahlil qilinib, erishilgan natijalar hamda mavjud masalalar muhokama etildi. Xususan, ishlab chiqarish reja-topshiriqlarining bajarilishi, moliyaviy ko‘rsatkichlar, texnologik jarayonlar samaradorligi hamda korxonaning barqaror faoliyatini ta’minlashga qaratilgan ishlar yuzasidan mas’ullarning hisobotlari tinglandi.

Yig‘ilishda mahsulot tannarxini pasaytirish, ishlab chiqarish xarajatlarini optimallashtirish hamda resurslardan samarali foydalanish bo‘yicha amalga oshirilayotgan ishlar atroflicha ko‘rib chiqildi. Shuningdek, transformatsiya va operatsion samaradorlik yo‘nalishidagi chora-tadbirlarni jadallashtirish, mazkur jarayonlar natijadorligini oshirish yuzasidan mas’ullarga tegishli topshiriqlar berildi.

Bundan tashqari, majmua tarkibidagi ulush kiritilgan tashkilotlar faoliyati ham muhokama qilinib, ularni bosqichma-bosqich mustaqil xo‘jalik yurituvchi subyektlar sifatida faoliyat yuritishga o‘tkazish bo‘yicha mas’ullarga aniq vazifalar yuklatildi.

Yig‘ilish yakunida joriy yilning ikkinchi yarmida ishlab chiqarish va moliyaviy-iqtisodiy ko‘rsatkichlar bo‘yicha belgilangan reja-topshiriqlarni so‘zsiz bajarish, ishlab chiqarish hajmlari hamda moliyaviy natijalar bo‘yicha prognoz ko‘rsatkichlariga erishish, sof foyda ko‘rsatkichini ta’minlash va dividend majburiyatlarini yil yakuniga qadar to‘liq bajarish yuzasidan mas’ullarga tegishli topshiriqlar berildi. Belgilangan vazifalar ijrosi doimiy nazoratga olinishi ta’kidlandi.

“Sho‘rtan gaz kimyo majmuasi” MCHJ Matbuot xizmati

Obod hudud, sifatli xizmat — neft bazalarda keng ko‘lamli ishlar davom etmoqda

2026-08-06T04:23:21.630Z

O‘zbekiston Respublikasi davlat mustaqilligining 35 yilligini munosib kutib olish doirasida neft bazalarda obodonlashtirish va ko‘kalamzorlashtirish ishlari izchil amalga oshirilmoqda.

Xususan, "Farg‘ona neft bazasi"da hududlarni tartibga keltirish, yashil maydonlarni kengaytirish, tashqi qiyofani yanada jozibador qilish hamda mijozlar uchun qulay muhit yaratishga alohida e’tibor qaratilmoqda. Bu esa shahobchalarning nafaqat tashqi ko‘rinishini yaxshilash, balki aholiga ko‘rsatilayotgan xizmatlar sifatini yanada yuksaltirishga xizmat qilmoqda.

“O‘zbekneftgaz” AJ mas’ullari tomonidan “Kuchlik neft baza” MCHJ tomonidan Toshkent viloyatining Bekobod, Bo‘ka, Piskent va O‘rta Chirchiq tumanlarida joylashgan Bekobod neft ombori hamda korxona tasarrufidagi AYOQSH va FYOQSHlarda xizmat ko‘rsatish sifati, yaratilgan shart-sharoitlar, sanitariya holati hamda obodonlashtirish ishlarining borishi joyiga chiqqan holda o‘rganildi. Tahlillar asosida mijozlarga yanada tezkor, sifatli va qulay xizmat ko‘rsatish, shahobchalarni zamonaviy talablar asosida rivojlantirish yuzasidan tegishli taklif va tavsiyalar berildi.

Mazkur ishlar “O‘zbekneftgaz” tizimida xizmat ko‘rsatish madaniyatini yuksaltirish, hududlarni yanada obod va fayzli qilish hamda aholi uchun zamonaviy va qulay infratuzilmani shakllantirishga qaratilgan tizimli islohotlarning amaliy ifodasi hisoblanadi.

"O‘zbekneftgaz" AJ Axborot xizmati

Davlat rahbari topshiriqlari ijrosi: Yil yakuniga qadar muhim vazifalar belgilandi

2026-08-04T13:33:44.527Z

“O‘zbekneftgaz” AJ Boshqaruv raisi Abdug‘ani Sanginov rahbarligida jamiyatning ishlab chiqarish va investitsiya yo‘nalishlari bo‘yicha ustuvor vazifalarga bag‘ishlangan yig‘ilish o‘tkazildi.

Unda davlat rahbari huzurida “O‘zbekneftgaz” AJning 2026 yil birinchi yarim yillik faoliyati yakunlari, erishilgan natijalar hamda yil oxiriga qadar amalga oshirilishi lozim bo‘lgan vazifalar muhokamasi yuzasidan o‘tkazilgan taqdimot yakunlari atroflicha ko‘rib chiqildi.

Qayd etish joizki, prezidentimiz tomonidan “O‘zbekneftgaz” oldiga kuz-qish mavsumiga puxta tayyorgarlik ko‘rish, aholi, ijtimoiy soha obyektlari hamda iqtisodiyot tarmoqlarini tabiiy gaz va neft mahsulotlari bilan barqaror ta’minlash bo‘yicha aniq vazifalar belgilangan. Shu munosabat bilan uglevodorod xomashyosi resurs bazasini mustahkamlash, tabiiy gaz qazib chiqarish hajmlarini barqaror saqlash va oshirish, mavjud konlarda qazib chiqarish pasayishining oldini olish, geologiya-qidiruv ishlarini jadallashtirish hamda geologik-texnik tadbirlar samaradorligini oshirishga alohida e’tibor qaratildi.

Yig‘ilishda sohada raqamli texnologiyalar va innovatsion yechimlarni keng joriy etish, geologik ma’lumotlarni tahlil qilish tizimini takomillashtirish, ishlab chiqarish jarayonlarida tahliliy yondashuvni kuchaytirish hamda boshqaruv qarorlari samaradorligini oshirish ustuvor vazifalardan biri ekani ta’kidlandi.

Shuningdek, moddiy-texnika resurslari ta’minotini tizimli tashkil etish, 2027 yilgi geologik-texnik tadbirlar uchun ehtiyojlarni oldindan shakllantirish, aviakerosin va dizel yonilg‘isi ishlab chiqarish hajmlarini ko‘paytirish bo‘yicha takliflar tayyorlash, paxta yig‘im-terimi mavsumida fermer xo‘jaliklarini dizel yonilg‘isi bilan uzluksiz ta’minlash choralarini ishlab chiqish yuzasidan mas’ullarga topshiriqlar berildi.

Tabiiy gaz qazib chiqarish hajmlarini barqarorlashtirish maqsadida Muborak neft va gaz qazib chiqarish boshqarmasi konlarida qazib chiqarish pasayishini kamaytirish bo‘yicha aniq chora-tadbirlar rejasini ishlab chiqish, shuningdek, joriy yil sentyabr oyi yakuniga qadar “Shimoliy Berdaq” va “Sharqiy Berdaq” konlaridagi kichik kompressor stansiyalarini barcha obodonlashtirish ishlari bilan birga to‘liq tayyor holda foydalanishga topshirish yuzasidan topshiriqlar berildi.

Muhokama yakunida Boshqaruv raisi barcha mas’ul rahbarlar zimmasiga belgilangan vazifalarining so‘zsiz ijrosini ta’minlash, ishlab chiqarish ko‘rsatkichlarini bajarish, yangi quduqlarni o‘z vaqtida ishga tushirish, infratuzilma obyektlarini belgilangan muddatlarda foydalanishga topshirish va ijro intizomini yanada kuchaytirish talabini qo‘ydi.

“O‘zbekneftgaz” AJ Axborot xizmati

“O‘zbekgeofizika” AJda yarim yillik natijalar tanqidiy tahlil qilindi

2026-08-03T06:53:12.163Z

“O‘zbekgeofizika” AJda 2026-yilning I yarim yilligi yakunlari hamda yilning ikkinchi yarmida amalga oshiriladigan ustuvor vazifalarga bag‘ishlangan tanqidiy hisobot yig‘ilishi bo‘lib o‘tdi.

Unda joriy yil boshida belgilangan vazifalar ijrosi, erishilgan natijalar va yo‘l qo‘yilgan kamchiliklar tanqidiy tahlil qilinib, mavjud muammolarni bartaraf etish, ish samaradorligi va natijadorligini oshirish bo‘yicha aniq vazifalar belgilandi.

Shuningdek, jamiyatni isloh qilish doirasida zamonaviy 3D seysmik qidiruv va kon-geofizika uskunalarini xarid qilish, maxsus texnikalarni yangilash, ishlab chiqarish jarayonlarini modernizatsiya va raqamlashtirish, mehnat sharoitlarini yaxshilash hamda xodimlarni erishilgan natijalar asosida rag‘batlantirish masalalari muhokama qilindi.

Yig‘ilish yakunida mas’ul rahbarlarga belgilangan topshiriqlar ijrosini o‘z vaqtida va sifatli ta’minlash yuzasidan tegishli ko‘rsatmalar berildi.

"O'zbekneftgaz" AJ Axborot xizmati