UZBEKNEFTEGAZ_UZ

Boqimandalik o‘tmishda qoldi: neft bazalar iqtisodiy samaradorlik yo‘lida

2026-07-20T17:29:00.356Z

“O‘zbekneftgaz” AJ Boshqaruv raisi Abdug‘ani Sanginov rahbarligida neft bazalar tomonidan 2026-yilning birinchi yarim yilligida amalga oshirilgan ishlar, mavjud muammolar hamda ikkinchi yarim yillikdagi ustuvor vazifalarga bag‘ishlangan kengaytirilgan yig‘ilish bo‘lib o‘tdi.

Unda yil boshidan boshlangan tizimli islohotlarning dastlabki natijalari tahlil qilinib, neft bazalar faoliyatini eski boshqaruv usulidan iqtisodiy samarador, bozor mexanizmlari va natijaga yo‘naltirilgan yangi tizimga o‘tkazish ustuvor vazifa sifatida belgilangani ta’kidlandi.

Qayd etilganidek, hisobot davrida neft bazalar tomonidan jami 98,8 ming tonna neft mahsuloti realizatsiya qilinib, o‘tgan yilning mos davriga nisbatan o‘sish sur’ati 129 foizni tashkil etdi. 14 ta neft bazadan 11 tasi faoliyatini 12,3 mlrd so‘m sof foyda bilan yakunladi. Shtat birliklari 22,3 foizga optimallashtirildi, samarasiz 119 ta FYOTSH to‘liq demontaj qilinib, 14,9 gektar yer maydoni hokimliklar zaxirasiga qaytarilib 2,7 mlrd so‘m mablag‘ iqtisod qilinishiga erishildi. Elektron savdolar orqali 15 ta foydalanilmayotgan obyekt 28,3 mlrd so‘mga sotildi.

Biroq tahlillar ayrim neft bazalarda mahsulot sotish hajmini oshirish, AYOQSHlar salohiyatidan samarali foydalanish va daromadlilikni ta’minlash bo‘yicha ish uslubi hanuz eskicha qolayotgani, ularda boqimandalik kayfiyati sezilib turgani tanqid qilindi.

Xususan, sotish hajmlarining pasayishi, AYOQSHlar orqali kunlik chakana savdo rejasining bajarilmayotgani, Buxoro neftni qayta ishlash zavodi oldidagi bir necha milliard so‘mlik qarzdorlik, iste’molchilardan undirilishi lozim bo‘lgan 330 mlrd so‘mlik debitor qarzdorlik holatlari ko‘rsatib o‘tildi.

Ish faoliyatida yo‘l qo‘ygan kamchiliklari, mahsulot realizatsiyasining pasayishi, zarar bilan ishlashi, AYOQSHlar salohiyatidan to‘liq foydalanilmagani hamda berilgan topshiriqlar ijrosining ta’minlanmagani, boshqaruvda kamchiliklar saqlanib qolayotgani sababli Guliston neft bazasi rahbari egallab turgan lavozimidan ozod etildi. Kuchlik, To‘raqo‘rg‘on neft bazalari rahbarlari hamda bosh buxgalter, iqtisodchilaridan holat yuzasidan tushuntirish xatlari olinishi va Andijon neft bazasi rahbariga oxirgi marotaba ogohlantirish berilishi topshirildi.

Boshqaruv raisi endilikda har bir neft bazasi o‘z xarajatini o‘zi qoplaydigan, bozor talabidan kelib chiqib ishlaydigan va Jamiyatga iqtisodiy samara keltiradigan mustaqil biznes birligi sifatida faoliyat yuritishi shartligini alohida qayd etdi.
Yig‘ilishda birinchi yarim yillikni sof foyda bilan yakunlagan neft bazalar xodimlarining ish haqi 1 avgustdan oshirilishi bo‘yicha mas’ullarga topshiriq berildi.

Shuningdek, foyda bilan ishlayotgan AYOQSH operatorlari uchun KPI asosida har oylik ish haqining 50 foizigacha qo‘shimcha rag‘batlantirish tizimi joriy etilishi aytildi. «Mehnatga haq to‘lash endi moliyaviy natija va samaradorlik bilan uzviy bog‘lanadi» - dedi boshqaruv raisi.

Yig‘ilishda shuningdek, yil oxirigacha sig‘imlarni mukammal ta’mirlash, neft bazalardagi yaroqsiz, ma’nan eskirgan transport vositalarini sotish va hisobdan chiqarish, sotishdan tushgan mablag‘larni esa yangi transport vositalarini sotib olishga yo‘naltirish, Buxoro zavodini raqamlashtirish, sig‘imlarga kameralar o‘rnatish shuningdek, mijozlarga sifatli mahsulotlar yetkazib berish yuzasidan topshiriqlar berildi.

Ta’kidlanganidek, islohotlar sharoitida rahbar faqat jarayonni boshqarishi emas, balki aniq iqtisodiy natija uchun shaxsan javob berishi lozim.

Yig‘ilish yakunida AYOQSHlarni rekonstruksiya qilish, mahsulot realizatsiyasini yilning ikkinchi yarmida kuniga 1,5 million litrga yetkazish, operatsion xarajatlarni qisqartirish, qarzdorliklarni kamaytirish, yil yakuniga qadar barcha AYOQSHlarni yangi namunaviy dizaynda rekonstruksiya qilish hamda to‘liq raqamlashtirishni yakunlash, uchinchi chorakda 12 ta FYOTSHni AYOQSHga aylantirish hamda aylanma mablag‘larni shakllantirishga yo‘naltirish, boshqaruvning zamonaviy iqtisodiy modelini joriy etish bo‘yicha aniq vazifalar belgilandi.

"O’zbekneftgaz" AJ Axborot xizmati

Korrupsiyaga qarshi profilaktik ishlar davom etmoqda

2026-07-17T13:23:52.340Z

“O‘zbekneftgaz” AJ Korrupsiyaga qarshi ichki nazorat departamenti tomonidan Sho‘rtan neft va gazni qayta ishlash boshqarmasida korrupsiyaning oldini olish, xodimlarning huquqiy ongi va korrupsiyaga qarshi madaniyatini yuksaltirishga bag‘ishlangan seminar-trening tashkil etildi.

Tadbirdan ko‘zlangan asosiy maqsad xodimlarning ushbu illatga qarshi kurashish sohasidagi bilim va ko‘nikmalarini mustahkamlash, ularda korrupsiyaga nisbatan murosasiz munosabatni shakllantirish hamda profilaktik chora-tadbirlar samaradorligini yanada oshirishdan iborat bo‘ldi.

Seminar davomida “Korrupsiyaga qarshi kurashish to‘g‘risida”gi Qonunning mazmun-mohiyati tushuntirilib, korrupsiyaviy xavf-xatarlarni barvaqt aniqlash va bartaraf etish, davlat xaridlarida ochiqlik va shaffoflikni ta’minlash, manfaatlar to‘qnashuvining oldini olish hamda komplayens talablariga qat’iy rioya etish masalalari muhokama qilindi.

Shuningdek, har bir xodimning shaxsiy mas’uliyatini oshirish, ushbu yo‘nalishga oid huquqbuzarliklarning salbiy oqibatlari va amaldagi qonunchilikda belgilangan javobgarlik choralari haqida atroflicha ma’lumot berildi.

Tadbir yakunida bu kabi profilaktik ishlarni tizimli davom ettirish, xodimlarning huquqiy savodxonligini muntazam oshirish, komplayens nazorati mexanizmlarini takomillashtirish hamda tashkilotda halollik, ochiqlik va shaffoflik tamoyillarini yanada mustahkamlash bo‘yicha ustuvor vazifalar belgilab olindi.

"O‘zbekneftgaz" AJ Axborot xizmati

2 833 ta yangi ish o‘rni: “O‘zbekneftgaz”dagi islohotlarning amaliy natijasi

2026-07-17T07:40:59.441Z

"O‘zbekneftgaz" AJda amalga oshirilayotgan transformatsiya jarayonlari yagona maqsadga — samarali va raqobatbardosh kompaniyani shakllantirishga qaratilgan. Bu yo‘nalishda tashkiliy tuzilmalar takomillashtirilib, boshqaruv tizimi optimallashtirilmoqda. Bir-birini takrorlovchi va samarasiz shtat birliklari maqbullashtirilib, mehnat unumdorligini oshirish hamda resurslardan samarali foydalanishga xizmat qiluvchi zamonaviy boshqaruv mexanizmlari joriy etilmoqda.

Amalga oshirilayotgan tarkibiy islohotlar va yangi ishlab chiqarish loyihalari nafaqat tarmoq samaradorligini oshirish, balki aholi bandligini ta’minlashga ham xizmat qilmoqda.

Xususan, Sho‘rtan, Muborak va Gazli neft va gaz qazib chiqarish boshqarmalarida maxsus qo‘riqlash xizmatlarining tashkil etilishi hisobiga 625 ta yangi ish o‘rni yaratildi.

Ustyurt gaz qazib chiqarish boshqarmasida yangi siquv kompressor stansiyalarining ishga tushirilishi esa 123 nafar mutaxassisning doimiy ish bilan ta’minlanishi uchun imkoniyat bo‘ldi.

Shuningdek, "Neftgazmontaj" MCHJning "O‘zbekneftgaz" AJ tasarrufiga o‘tkazilishi, korxona faoliyati va ish hajmining kengayishi natijasida 992 ta yangi ish o‘rni tashkil etildi.

Yana bir muhim qadam sifatida tashkil etilgan "UNG Burg‘ilash" korxonasi faoliyatining yo‘lga qo‘yilishi hisobidan 1 093 ta yangi ish o‘rni yaratildi.

Natijada, amalga oshirilgan islohotlar va ishlab chiqarish quvvatlarini kengaytirish hisobiga tizimda jami 2 833 ta yangi ish o‘rni tashkil etildi. Bu raqamlar bir muhim haqiqatni ko‘rsatadi: transformatsiyaning mohiyati ish o‘rinlarini qisqartirish emas, balki boshqaruvda samaradorlikni oshirish bilan bir vaqtning o‘zida ishlab chiqarishni kengaytirish, yangi loyihalarni amalga oshirish va zamonaviy ish o‘rinlarini yaratishdan iborat.

Ya’ni, samarasiz va takrorlanuvchi vazifalar maqbullashtirilar ekan, ishlab chiqarish ehtiyoji yuqori bo‘lgan yangi yo‘nalishlarda minglab ish o‘rinlari tashkil etilmoqda.

"O‘zbekneftgaz" AJ Axborot xizmati

Yarim yilda 5,7 ming tonnadan ortiq sanoat chiqindisi qayta foydalanishga yo‘naltirildi

2026-07-17T06:22:49.153Z

“O‘zbekneftgaz” AJda ishlab chiqarish chiqindilarini atrof-muhitga zarar yetkazmagan holda samarali boshqarish va ulardan ikkilamchi xom ashyo sifatida foydalanish bo‘yicha ishlar izchil davom etmoqda.

Joriy yilning birinchi yarim yilligida jamiyat tizimida hosil bo‘lgan 5 687,24 tonna sanoat chiqindisi qayta ishlash va ikkilamchi foydalanish maqsadida shartnomalar asosida realizatsiya qilinib, 8,4 mlrd so‘mdan ortiq iqtisodiy samaraga erishildi.

Bu yo‘nalishda eng yuqori natija Sho‘rtan gaz kimyo majmuasi tomonidan qayd etildi. Korxonada 1 090,7 tonna sanoat chiqindisi qurilish va xo‘jalik mahsulotlari ishlab chiqarish uchun xom ashyo sifatida topshirilib, 4,8 mlrd so‘mlik iqtisodiy samara ta’minlandi.

Shuningdek:

• Buxoro neftni qayta ishlash zavodi tomonidan 167,94 tonna sanoat chiqindisi qayta foydalanishga yo‘naltirilib, 349,2 mln so‘mlik;

• Muborak gazni qayta ishlash zavodida 556,99 tonna chiqindi realizatsiya qilinib, 1 mlrd so‘mdan ortiq iqtisodiy samaraga erishildi;

Chiqindilarni ikkilamchi maqsadlarda foydalanish nafaqat iqtisodiy samara beradi, balki ularni chiqindixonalarga joylashtirish hajmini kamaytiradi, atrof-muhitga salbiy ta’sirning oldini oladi va ularni joylashtirish uchun to‘lanadigan kompensatsiya xarajatlarini qisqartiradi.

“O‘zbekneftgaz” AJda ishlab chiqarish chiqindilarini resurs sifatida baholash, ularni qayta ishlashga yo‘naltirish hamda aylanma iqtisodiyot tamoyillarini keng joriy etish bo‘yicha ishlar izchil davom ettirilmoqda.

"O‘zbekneftgaz" AJ Axborot xizmati

Korrupsiyaga qarshi murosasiz yondashuv — “Uzbekistan GTL”da yarim yillik natijalar sarhisob qilindi

2026-07-16T12:28:12.002Z

"Uzbekistan GTL" zavodida "O‘zbekneftgaz" AJ tomonidan joriy yilning birinchi yarim yilligida korrupsiyaga qarshi kurashish sohasida amalga oshirilgan ishlar tahlil qilinib, erishilgan natijalar va kelgusi ustuvor vazifalar belgilab olindi.

Yig‘ilishda mamlakatimizda korrupsiyaning oldini olish, ochiqlik va shaffoflikni ta’minlash hamda korporativ boshqaruvda komplayens tizimini yanada takomillashtirishga qaratilgan islohotlarning amaliy ijrosiga alohida e’tibor qaratildi. Xususan, davlatimiz rahbari tomonidan belgilangan vazifalar, tegishli Farmon, ISO 37001:2016 xalqaro standarti hamda korrupsiyaga qarshi kurashish samaradorligini oshirishga qaratilgan Qonun talablarining mazmun-mohiyati atroflicha muhokama qilindi.

Tadbirda Qashqadaryo viloyati prokuraturasining mas’ul xodimi ishtirok etib, "Uzbekistan GTL" MCHJda korrupsiyaga qarshi kurashish sohasida amalga oshirilayotgan islohotlar, qonunchilikdagi yangiliklar, huquqbuzarliklarning oldini olish mexanizmlari, profilaktik chora-tadbirlarni kuchaytirish hamda ochiqlik va shaffoflikni ta’minlashning dolzarb ahamiyati yuzasidan ma’ruza qildi.

Shuningdek, korrupsiyaviy xavflarni baholash, davlat xaridlari ustidan komplayens nazoratini kuchaytirish, sanksiya komplayensi talablariga qat’iy rioya etish, manfaatlar to‘qnashuvini samarali boshqarish, ichki nazorat mexanizmlarini takomillashtirish hamda xodimlarda korrupsiyaga nisbatan murosasiz munosabatni shakllantirish borasida amalga oshirilayotgan ishlar yuzasidan axborot berildi.

Ta’kidlanganidek, Korrupsiyaga qarshi kurashish agentligi reyting baholash yakunlariga ko‘ra, "O‘zbekneftgaz" AJ ilg‘or tashkilotlardan biri sifatida e’tirof etildi. Bu esa Jamiyatda korrupsiyaga qarshi kurashish, komplayens madaniyatini mustahkamlash va korporativ boshqaruvning zamonaviy mexanizmlarini joriy etish borasida olib borilayotgan tizimli ishlar samarasi ekani qayd etildi.

Yig‘ilish yakunida korrupsiyaviy xavflarni barvaqt aniqlash va bartaraf etish, raqamli komplayens vositalarini keng joriy qilish, davlat xaridlari ustidan nazoratni yanada kuchaytirish hamda barcha jarayonlarda ochiqlik, shaffoflik va hisobdorlik tamoyillarini izchil ta’minlash bo‘yicha aniq vazifalar belgilab olindi.

"O’zbekneftgaz" AJ Axborot xizmati

Xitoyning “XIBU” kompaniyasi bilan hamkorlik yangi bosqichda

2026-07-16T08:29:28.907Z

“O‘zbekneftgaz” AJ Boshqaruv raisi Abdug‘ani Sanginov boshchiligidagi ishchi guruh ayni damda hamkorlik aloqalarini yangi bosqichga olib chiqish maqsadida Xitoy Xalq Respublikasida xizmat safarida bo‘lib turibdi.

“XIBU” kompaniyasi rahbariyati bilan bo‘lib o‘tgan uchrashuvda tomonlar Ustyurt hududida 30 ta chuqur izlov-qidiruv qudug‘ini burg‘ilash bo‘yicha yirik investitsiya loyihasining bugungi holati, amalga oshirilayotgan ishlar va ustuvor vazifalarni muhokama qildilar.

Xususan, loyihani belgilangan muddatlarda va yuqori sifatda amalga oshirish maqsadida qisqa muddat ichida 9 ta zamonaviy burg‘ilash qurilmasini safarbar etish, ularni montaj qilish ishlarini yakunlash hamda burg‘ilash jarayonlarini jadallashtirish bo‘yicha aniq chora-tadbirlar belgilab olindi.

Muzokaralar chog‘ida barcha quduqlarda burg‘ilash ishlarini shartnomada belgilangan grafikdan oldin boshlash, yil yakuniga qadar esa birinchi navbatdagi quduqlarda kutilayotgan geologik natijalarga erishish har ikki tomonning ustuvor vazifasi ekani alohida ta’kidlandi.

Uchrashuv konstruktiv va ishchan ruhda o‘tdi. “XIBU” kompaniyasi rahbariyati bugungi geosiyosiy vaziyat tufayli xalqaro logistika zanjirlarida ayrim murakkabliklar mavjudligini qayd etib, shunga qaramay burg‘ilash qurilmalarini yetkazib berish, montaj ishlarini tezlashtirish hamda loyihani belgilangan muddatdan ilgari amalga oshirish uchun barcha zarur choralar ko‘rilishini ma’lum qildi.

Tashrif doirasida shuningdek kompaniyaning Burg‘ilash ishlarini boshqarish markazi faoliyati bilan ham yaqindan tanishildi. Markazda dunyoning turli hududlarida olib borilayotgan burg‘ilash ishlari 24/7 rejimida onlayn monitoring qilinishi, barcha texnologik jarayonlar real vaqt rejimida kuzatib borilishi hamda yuzaga keladigan texnik masalalar bo‘yicha tezkor muhandislik qarorlari qabul qilinishi haqida batafsil ma’lumot berildi.

Shuningdek, delegatsiya kompaniyaning zamonaviy texnologiyalari, innovatsion ishlanmalari hamda yuqori texnologik mahsulotlari namoyish etilgan ko‘rgazmani ham ko‘zdan kechirdilar.

"O'zbekneftgaz" AJ Axborot xizmati

Tadbirkorlar bilan ochiq muloqot: mahalliy ishlab chiqaruvchilarni qo‘llab-quvvatlash va hamkorlikni kengaytirish

2026-07-16T04:48:11.040Z

Joriy yilning 20-avgust — Tadbirkorlar kuni arafasida Prezidentimizning tadbirkorlar bilan o‘tkaziladigan ochiq muloqotiga tayyorgarlik doirasida Farg‘ona viloyatida “O‘zbekneftgaz” AJ rahbariyati hamda mutaxassislari ishtirokida tadbirkorlik subyektlari vakillari bilan ochiq muloqot bo‘lib o‘tdi.

Tadbirning asosiy maqsadi tadbirkorlarning murojaatlari, taklif va muammolarini tizimli o‘rganish, ularning yechimi yuzasidan amaliy choralarni belgilash hamda biznes vakillari bilan ochiq va samarali muloqotni yo‘lga qo‘yishdan iborat bo‘ldi.

Shuningdek, neft-gaz sohasiga zamonaviy texnologiyalar va innovatsion yechimlarni joriy etish, oliy ta’lim muassasalari hamda ilmiy-tadqiqot institutlari tomonidan yaratilgan ishlanmalarni ishlab chiqarishga tatbiq etish, ilm-fan, ishlab chiqarish va tadbirkorlik o‘rtasidagi hamkorlikni mustahkamlash yuzasidan fikr almashildi.

Tadbirda “O‘zbekneftgaz” AJ tomonidan amalga oshirilayotgan xarid jarayonlari, investitsiya loyihalarida mahalliylashtirish ulushini oshirish, import o‘rnini bosuvchi mahsulotlar ishlab chiqarishni kengaytirish va mahalliy korxonalar ishtirokini faollashtirish borasidagi ishlar yuzasidan batafsil ma’lumot berildi.

Ta’kidlanganidek, joriy yil boshidan buyon mahalliy ishlab chiqaruvchilar bilan hamkorlikda 5 ta korxona ishtirokida umumiy qiymati 14 mlrd so‘mlik 9 turdagi import o‘rnini bosuvchi mahsulot va xizmatlar o‘zlashtirildi.

Shuningdek, davlatimiz rahbari topshiriqlari asosida shakllantirilgan 2026-yil investitsiya loyihalari doirasida importni maqsadli qisqartirish dasturi taqdim etildi. Dasturga muvofiq, joriy yilda 36 mln AQSH dollari miqdoridagi mahsulot va xizmatlarni mahalliy ishlab chiqaruvchilardan xarid qilish rejalashtirilgani qayd etildi.

Muloqot davomida ichki bozorda sifatli yoqilg‘i mahsulotlari bilan ta’minlash va tadbirkorlar uchun qulay sharoitlar yaratish borasida amalga oshirilayotgan islohotlar ham alohida e’tirof etildi. Xususan, “O‘zbekneftgaz” AJ rahbariyati tashabbusi bilan neft bazalariga Respublika tovar-xom ashyo birjasining alohida savdo seksiyasida ta’minotchi sifatida ishtirok etib, kichik lotlarda dizel yoqilg‘isi sotish imkoniyati yaratildi.

Natijada joriy yilning mart–iyun oylarida mazkur savdo mexanizmi orqali 26,6 ming tonna dizel yoqilg‘isi realizatsiya qilindi. Shu bilan birga, ichki bozorda GTL Euro K6 markali ekologik toza va sifatli dizel yoqilg‘isiga talab ortib bormoqda. Bugungi kunda ushbu mahsulot iste’molchilarga neft bazalari orqali to‘g‘ridan-to‘g‘ri hamda "Uzbekistan GTL" zavodi tomonidan Respublika tovar-xom ashyo birjasi orqali yetkazib berilmoqda.

Hududiy neft bazalari tomonidan 25,4 ming tonna GTL Euro K6 dizel yoqilg‘isi sotildi. Mazkur ko‘rsatkich natijasida respublikadagi 14 ta hududiy neft bazasi joriy yilning birinchi yarim yilligida 5,4 mlrd so‘m foyda olishi kutilmoqda.

Ochiq muloqot yakunida tadbirkorlar tomonidan bildirilgan taklif va tashabbuslar tinglanib, ularni amaliy hal etish, sanoat kooperatsiyasini yanada kengaytirish, mahalliylashtirish darajasini oshirish hamda mahalliy tadbirkorlarni neft-gaz sohasidagi yirik investitsiya loyihalariga keng jalb etish bo‘yicha ustuvor vazifalar belgilab olindi.

"O'zbekneftgaz" AJ Axborot xizmati

Islohotlar sur’ati oshiriladi: “Oʻzbekgeofizika” AJda yangi rahbar ish boshladi

2026-07-15T13:50:24.881Z

“Oʻzbekneftgaz” AJ Boshqaruv raisining birinchi oʻrinbosari Suhrob Xamrayev “Oʻzbekgeofizika” AJda tanqidiy-tahliliy yigʻilish oʻtkazdi.

Yigʻilish davomida geologiya-qidiruv ishlarining bugungi kun talablariga mos kelmayotgani, uglevodorod zaxiralarini koʻpaytirish, zamonaviy seysmik tadqiqotlarni kengaytirish hamda ishlab chiqarish samaradorligini oshirish borasida mavjud kamchiliklar sanab o‘tildi. Jamiyat faoliyatida islohotlarni jadallashtirish, ilmiy-texnik salohiyatni mustahkamlash va boshqaruv tizimini tubdan takomillashtirish zarurligi alohida taʼkidlandi.

Shuningdek, davlatimiz rahbari tomonidan Jamiyat tarkibidagi geologiya tarmogʻini rivojlantirish yuzasidan belgilangan ustuvor vazifalarning ijrosi, zamonaviy texnologiyalarni joriy etish va geologiya-qidiruv ishlarining natijadorligini oshirish kechiktirib bo‘lmaydigan masalalar ekani ta’kidlandi.

Yigʻilishda neft va gaz sohasida katta tajriba to‘plagan Shokir Jabborov “Oʻzbekgeofizika” AJ Boshqaruv raisi lavozimiga tayinlangani eʼlon qilinib, jamoaga tanishtirildi.

Yangi rahbar oldiga geologiya-qidiruv ishlarini sifat jihatidan yangi bosqichga olib chiqish, sohada zamonaviy boshqaruv yondashuvlari va eng ilg’or texnologiyalarni joriy etish, uglevodorod zaxiralarini koʻpaytirish boʻyicha ishlarni tez fursatlarda jadallashtirish hamda belgilangan vazifalarning oʻz vaqtida va sifatli ijrosini taʼminlash boʻyicha aniq vazifalar belgilab berildi.

"O'zbekneftgaz" AJ Axborot xizmati

“Neftgazmontaj”da yangi rahbar, yangi vazifalar

2026-07-15T07:17:34.511Z

“O‘zbekneftgaz” AJ Boshqaruv raisining o‘rinbosari Fozil Mahmudov bugun Jamiyat tarkibidagi “Neftgazmontaj” MCHJda yig‘ilish o‘tkazdi.

Unda korxona faoliyatidagi qator tizimli kamchiliklar haqida so‘z bordi. Xususan, 2026-yilda 2 trillion so‘mdan ortiq shartnomalar rasmiylashtirilgan bo‘lishiga qaramay, birinchi yarim yillikda qurilish ishlari rejasining atigi 27 foizi bajarilgani, 220 ta obyektdan bor-yo‘g‘i 10 tasida qurilish-ta’mirlash ishlari yakunlangani qayd etildi.

Shuningdek, xodimlarga bir necha oy davomida ish haqi o‘z vaqtida to‘lanmagani, bu esa jamoada qo‘nimsizlikni kuchaytirayotgani ta’kidlandi. Ajratilgan mablag‘larga qaramay, maxsus texnika va avtotransport vositalarini ta’mirlash ishlari ham qoniqarsiz darajada bajarilgan.

Korxonada o‘tkazilgan kompleks o‘rganishlar davomida ayrim mansabdor shaxslar tomonidan amaldagi qonunchilik va moliyaviy intizom talablariga rioya etilmagani, buning oqibatida samarasiz xarajatlar, kamomadlar hamda korxonaning iqtisodiy holati yomonlashishiga olib kelgan qator salbiy holatlar aniqlangan.

Shuningdek, korxona balansidagi samarasiz aktivlar, foydalanilmayotgan obyektlar hamda yaroqsiz holatga kelgan texnika va uskunalardan oqilona foydalanilmayotgani tanqid qilindi. Davlat xaridlari sohasida amaldagi qonunchilik talablariga to‘liq rioya etilmagani, xarid jarayonlarida shaffoflik va samaradorlikni ta’minlash bo‘yicha ishlarni kuchaytirish zarurligi alohida ta’kidlandi.

“O‘zbekneftgaz” AJ Boshqaruvi tomonidan korxona rahbariyatiga faoliyatni tubdan yaxshilash, moliyaviy sog‘lomlashtirish va boshqaruv tizimini takomillashtirish yuzasidan aniq vazifalar yuklatilib, uch oylik sinov muddati belgilangan edi. Biroq ushbu davr mobaynida belgilangan vazifalar to‘liq bajarilmagani sababli korxona direktori o‘z arizasiga ko‘ra egallab turgan lavozimidan ozod etildi.

Yig‘ilishda Husanov Baxtiyor Rustamovich “Neftgazmontaj” MCHJ direktori lavozimiga tayinlangani e’lon qilinib, jamoaga tanishtirildi.

Yangi rahbar oldiga korxonaning moliyaviy holatini sog‘lomlashtirish, ishlab chiqarish samaradorligini oshirish, samarasiz aktivlardan oqilona foydalanishni yo‘lga qo‘yish, davlat xaridlari tizimida shaffoflikni ta’minlash, korporativ boshqaruvni zamonaviy talablar asosida takomillashtirish hamda “Neftgazmontaj” MCHJni qisqa muddatda barqaror va samarali faoliyat yurituvchi ilg’or korxonaga aylantirish bo‘yicha qat’iy vazifalar qo‘yildi.

"O'zbekneftgaz" AJ Axborot xizmati

Bokuda xalqaro stajirovka: "UNG Academy" bo‘lajak o‘zbek neft treyderlarini tayyorlamoqda

2026-07-14T05:14:07.442Z

“O‘zbekneftgaz” AJning inson kapitalini rivojlantirishga qaratilgan ustuvor yo‘nalishlaridan biri sifatida "UNG Academy" tomonidan xalqaro ta’lim dasturlari izchil amalga oshirilmoqda. Ana shunday loyihalardan biri — “Internship Program – 2026” xalqaro stajirovka dasturi Ozarbayjonning Boku shahrida "UNG Overseas" ko‘magida bo'lib o'tmoqda.

Ushbu uch haftalik dastur neft savdosi (Physical Commodity Trading) sohasida faoliyat yuritayotgan hamda ushbu yo‘nalishda o‘z kasbiy salohiyatini oshirish istagida bo‘lgan mutaxassislar uchun mo‘ljallangan. Dasturning asosiy maqsadi ishtirokchilarga jahon neft bozorida qo‘llaniladigan zamonaviy savdo mexanizmlari, xalqaro standartlar va amaliy jarayonlar bo‘yicha chuqur bilim hamda ko‘nikmalar berishdan iborat.

O‘quv jarayoni davomida ishtirokchilar neft treydingi va operatsion faoliyat, Incoterms qoidalari, xalqaro savdo logistikasi, neftni qayta ishlash asoslari, neft va neft mahsulotlarining sifat hamda miqdor nazorati, Trade Finance va xom neft savdosiga oid boshqa muhim yo‘nalishlar bo‘yicha nazariy bilimlar bilan bir qatorda amaliy tajriba ham orttiradilar.

Shuningdek, dastur doirasida xalqaro ekspertlar ishtirokida master-klasslar, ochiq muloqotlar hamda neft-gaz sohasining muhim infratuzilma obyektlariga o‘quv tashriflari tashkil etilishi rejalashtirilgan. Bu esa ishtirokchilarga sohadagi ilg‘or xalqaro tajribalar bilan yaqindan tanishish imkonini beradi.

Mazkur dasturda “O‘zbekneftgaz” tizimi korxonalarida faoliyat yuritayotgan mutaxassislar ham ishtirok etmoqda. Ular xalqaro tajriba va zamonaviy bilimlarni o‘zlashtirish orqali mamlakatimiz neft-gaz sohasida treyding yo‘nalishini yanada rivojlantirishga munosib hissa qo‘shishi kutilmoqda.

"O‘zbekneftgaz" Matbuot xizmati
Boku shahridan maxsus