Ayyubxon Kamoldinov

O'zgarish

ayyubxon-kamoldinov — Tue, 18 Nov 2025 15:12:12 GMT

Eng kamida o'zimiz uchun to'g'ri bo'lishimiz kerak. Isrof bo'lgan vaqt, potensial, yoshlik, soatlarni boshqalardan yashira olamiz ammo o'zimizdan yashirish eng yomoni. O'zimizni xatolarimizni boshqalar oldida emas, eng kamida o'zimiz bilan yolg'iz qolganimizda balki o'zimizni yaxshi tarafga o'zgartirishimizga turtki bo'lardi.

Bu yil qattiq "ortga qaytish"ga uchradim. Zalni kanda qilmasdim, social mediadan chiqib ketgandim, dietada qat'iy edim, vaqtimni doomscrollingga sarflamasdim, ammo bu yil hammasini qildim. 2025 juda zo'r rasvo qilindi)) Vaznga ega 15kg qo'shildi. 4 yillik tajribaga ega junior dasturchi kim deyishsa mani ko'rsataverasizlar)

Ammo baribir toki 🪦ga kirmagunimizgacha o'zgarish uchun imkon bor. Shu oy gym membership tugadi va ataylab yangilamadim, toki consistent emas ekanman uni turishidan foyda yo'q, o'rniga turnik/brus yetib turibdi, agar shunda qat'iy bo'la olsam shunda o'zimga sovg'a sifatida gym abonement sotib olishim mumkin. Social mediani to'xtatdim, piyoda sayrni, to'g'ri dietani boshladim. Vaqtimni faqatgina o'zimni yaxshilash va imkon boricha yaxshi inson bo'lishga sarflayapman. Kanal to'xtab qolgani ham juda bandligimdan emas, vaqtimni bekor sarf qilganimdan.

Tan olish qiyin, o'zimiz uchun tan olish qiyin, 900ta inson oldida tan olish undan ham qiyin, ammo busiz o'zgarish qiyin ham. Endi doimiy updatelarni yozib boraman, kanal aktivligi ham qaytadi albatta.

Eng zo'r dopamin bu kun oxirida kunimiz juda zo'r o'tganidan, nimagadur erishganimizdan ko'nglim to'lishi. Past balandliklar doim bo'ladi, muhimi chuqurdan chiqa olish.

Bollar, biz yutamiz.

Standart sozlamalarimiz.

ayyubxon-kamoldinov — Sun, 19 Oct 2025 09:17:35 GMT

Kompyuter va telefonlar yoki o'z sozlamasiga ega bo'lgan dasturlar odatda o'zining standard sozlamalari bilan birga keladi, foydalanuvchi esa ularni keyinroq o'z xohishlariga ko'ra o'zgartirishi mumkin.

Har birimizda ham o'zimizning yaxshi va yomon standart sozlamalarimiz bor, buni xulq, fe'l-atvor deb ataladi. Ammo ba'zi "sozlamalarimiz" borki, ularni kamchilik deb atash mumkin. Kimdur tozalikka e'tiborsiz, kimdur jahldor, kimdur esa ogír xarakterga ega va hokazo.

Mabodo o'zimizni yaxshilashni istar ekanmiz, avvalo shunday zararli sozlamalarimizdan voz kechishga urinishimiz kerak. O'zimizga va atrofdagilarga ozor beradigan sozlamalardan qutulish bu faqat foydamizga ishlaydi. Bu oson bo'lmasa-da, albatta yaxshi natija beradi.

Zerikish kerakligi haqida.

ayyubxon-kamoldinov — Thu, 18 Sep 2025 15:29:49 GMT

Hojatxona, dushda bugni fix qilish yoki qandaydir yaxshi g'oyalar kelishi haqida hazillar qilib turamiz, aniq-ki bu hazillar bekordan bekorga paydo bo'lmagan. Biz o'z fikrlarimiz bilan yolg'iz qolgan paytimizda hech qanday foydali ish qilmayotgandek his qilishimiz mumkin, lekin aslida bu biz uchun juda foydali.

Hozir zerikishga vaqt yo'q. Kun bo'yi ijtimoiy tarmoqlar, reelslar ko'rish, yangiliklar, turli telegramdagi hamjamiyatlarda aktivligimizdan tashqari, o'zimizcha vaqtdan yutish maqsadida hatto shunchaki piyoda sayr qilish davomida podkastlar ham tinglaymiz. Miyamiz doim band, unga kirayotgan ma'lumotlarni qayta ishlash unga og'ir keladi va biz bunday ishlar sababli hatto ishlashdan ko'ra ko'proq ham charchayapmiz.

Har kuni kamida o'zingizga 20 daqiqa vaqt ajrating. Bo'sh qoling, shunchaki sayr qiling, hech kim yo'q xonaga kirib o'tiring. Miyamizga dam kerak, u zerikishi kerak.

Eng ideal holatda esa kuniga 20 daqiqadan ortiq ijtimoiy tarmoqqa vaqt sarf qilmang.

Foydali 2ta iqtibos.

ayyubxon-kamoldinov — Thu, 18 Sep 2025 15:14:34 GMT

Birinchisi John Carmackga tegishli, iqtibos 1:1 emas, u qisman o'zgartirilgan ammo ma'no o'sha o'sha: "Man doim har bir o'zgarishdan keyin compilerni run qilaman. Bu ish rejadagidek ketayotgan yoki yo'qligini har bir qadamda aniq bildirib turadi.

Kod qanday ishlashi haqida miyada tasavvur qilib miyaga ortiqcha yuk berishdan ko'ra, compilerni ishga tushirib bu ishni compilerga topshirish kerak, biz baribir adashamiz. Katta featurelarni compilerni ishga tushirmay turib yozib, keyin u ishlamasa qayerda nima xato ketganini tekshirib chiqishdan ko'ra har bir qadamda compilerni ishga tushirish va natijani ko'rish osonroq". Izoh shart emas deb o'ylayman.

Ikkinchisi internetdagi noma'lum odamdan, afsuski asl egasini saqlab qo'yish esimdan chiqqan: Ägar AI yozgan kodga tushunmasang, AIga kod yozdirma".

Turlicha foyda olish mumkin. AI yozgan kodni tushunmasang demak hali begona dasturlashda yetarlicha tajribaga ega emassan, o'zing qo'lda kod yoz va yaxshilab o'rgan. Keyingisi esa, agar AI yozgan kodni tushunib/tushunmasdan uni o'z holicha qo'ysang, kelajakda codebase rasvo holatga keladi.

Rahmat.

Uzr so'ramang.

ayyubxon-kamoldinov — Mon, 25 Aug 2025 07:32:25 GMT

To'g'ri o'qidingiz. Uzr so'ramang. Aniqrog'i uzr so'rashga loyiq ish qilmaslikka harakat qiling.

Ba'zida biz majlisga kech qolganda, ishni vaqtida bitira olmaganda, uchrashuvga kechikkanimizda uzr so'raymiz. Uzr so'rash ikki shaxs orasidagi ziddiyatni yumshatishi aniq, lekin uzr so'rash oshishi biz ishlarni, bizning bo'ynimizga tushgan majburiyatlarni o'z vaqtida amalga oshirmayotganligimiz ko'payib borayotganidan dalolat.

- Dedlaynlarga ulgurmayapsizmi? Unda aniqroq dedlayn belgilashga urining.

- Uchrashuvga kech qolyapsizmi? Ertaroq ko'chaga chiqing.

Lekin har biridan avval albatta ulgurmayotganingiz haqida ogohlantiring, bu ikkinchi tomonni shunga mos ish tutishiga yordam beradi, ammo o'z vaqtida ishni bitirish uzr so'rab kechikishdan ko'ra afzalligi 100%.

Uzr so'ramang, vaqtida bajaring.

Muscular failure haqida

ayyubxon-kamoldinov — Mon, 09 Jun 2025 15:41:18 GMT

Har bir mushaklarini rivojlantirishni istagan havaskor borki, muscular failure haqida eshitib ko'rgan. Unga qisqacha ta'rifni esa

Muscular failure — bu mushak endi takroriy harakatni to‘g‘ri texnika bilan bajara olmas darajaga yetgan holat.

deyish mumkin.

Zalda muskullarim bajarayotgan mashqlarimni biror marta ham qila olmaydigan darajaga yetgunicha, ya'ni failuregacha shug'ullanishni yaxshi ko'raman, bu og'riq bilan birga o'zgacha zavq keltiradi.

Ammo yaqinda bir failure nima degan videoning komment qismida bir kishining "Ikki xil failure bor - muscular failure va miyamizning failuresi, sen miya emas muskullaring failurega erishgandagina haqiqiy failurega erishasan, miyang avvalroq taslim bo'ladi" degan fikrini o'qib qoldim va buni sinab ko'rishga ahd qildim. Ertasi kuni sport zalga bordim va haqiqatan ham miyam muskullardagi zo'riqish va og'riqni his qilishi bilanoq mashqlarni bajarishni istamay "failure"ga muskullarimdan ancha avvalroq erishayotganini ko'rdim. Ba'zi holatlarda muscular failurega erishmay turib, miyam to'xtash haqida yolvorishi bilanoq to'xtayotganimni tushunib yetdim. Muskullar rivojlanishi uchun esa haqiqiy muscular failure kerak.

Ko'pincha biror ishni boshlamasdanoq uni ko'rib taslim bo'lamiz. XYZ ish men uchun emas, men uni uddalay olmayman deb o'ylaymiz ammo vaholanki bizning tanamiz, aqlimiz, xotiramiz, potensialimiz bu ishdan karrasiga ko'proq ishlarni qila oladi.

Bilishimcha miyamiz shunday tuzilgan, u katta ishlar qilishni istamaydi, imkon boricha resurslarni tejashni istaydi. Lekin o'ylashimcha, kattaroq ishlar aynan mana shu miyaning mag'lub bo'lishga chaqiriqlariga labbay demasdan yana davom etaverganda, miya emas "muscular" failuregacha borganimizdagina sodir bo'ladi.

Ungacha esa shu o'zimiz loyiq bo'lgan muhitda yashab turishimiz zarur :)

Sun'iy intellekt va junior dasturchilar.

ayyubxon-kamoldinov — Wed, 12 Mar 2025 15:01:42 GMT

Hammamiz maktabda, kollejda, universitetda imtihon topshirganmiz. Har doim "cheater"lar bo'lgan, o'zlarining bilimsizliklari sababli birovdan ko'chirish kabi ishlar orqali boshqalar bilimi hisobiga imtihonlar topshirishgan, qo'lga tushishgan ham, o'tib ham ketishgan. Ammo cheating ularni bilimli bo'lishiga yordam bermaydi.

Hozir sun'iy intellekt hayotimizga internet kabi kirib keldi. Undan kundalik kod yozishda ham foydalanyapmiz. Ammo buning o'ziga yarasha muammolari borligini unutdik va bu ayniqsa dasturlashga endi kirib kelgan odam uchun tas'iri katta.

Biz AIga biror vazifa bajarishni buyuramiz, u ish o'xshamaguncha uni fix qilishni qayta-qayta takrorlayveramiz, bizning o'rnimizga AI ishlayapti. Bunda muammo yo'q, qachonki bu vazifalarni biz hech qanday muammosiz bajara olsak yoki vazifalarni o'zimiz bajarish jarayonimizda undan so'rab-so'rab o'zimiz ishlaganimizda, bu orqali ham ishimiz tezlashadi, ham o'zimiz allaqachon tayyor tajriba orqali o'rganamiz.

Ammo agar biz o'zimiz tushunmay turib, ko'r-ko'rona AIga buyruq berib o'tirsak va bizga u taqdim etgan kodni tushunmasak, nima yozdi, qanday amallar bajarilyapti e'tiborsiz bo'lsak, bu huddi imtihonlardagi cheatingga o'xshaydi - aslida biz bosh qotirishimiz kerak bo'lgan o'rinda boshqa birov bosh (AI) bosh qotiryapti, biz esa faqat natija haqida qayg'uryapmiz, dasturchi, ayniqsa yosh dasturchi sifatida esa bizga natijadan ham muhimrog'i jarayon edi, biz jarayon davomida o'rganishimiz, tajriba orttirishimiz, boshimiz devorga urilib oxiri to'g'ri ishlaydigan dastur yozishimiz muhimroq edi.

AIdan foydalanish juda muhim ko'nikma, unga tushunmasdan ergashish va o'zimizni o'sishimizga yordam beradigan ishlarni unga bajartirish esa bizni rivojlanishimizda to'siq bo'ladi.

Barbar Oakleyning "Learning how to learn" videosidan olgan ba'zi xulosalarim

ayyubxon-kamoldinov — Sun, 29 Dec 2024 01:20:19 GMT

1. Uyqu juda muhim, o'rganayotgan odam tez-tez yoki uyqusi kelishi bilanoq uxlashi uning o'rganganlarini yaxshiroq o'zlashtirishi va eslab qolishiga yordam beradi. Uyqu vaqtida bizning vaqtinchalik xotiramizdagi bilimlar doimiy xotiraga o'tish jarayoni amalga oshadi.
2. Bir ishni tugataman deb ishni boshlash noto'g'ri. Pomodoro texnikasidan foydalanish, shu ish vaqtida esa ishni tugatishni o'ylash o'rniga bizni ishdan chalg'itadigan hamma narsadan uzoqlashib, ishga fokus qilish va pomodoro vaqti tugasa aylanib kelish, chalg'ish, miyaga dofamin olishiga qo'yib berishimiz kerak. Biz fokus qilib uzoq vaqt ishlaganimizda tor doirada fikrlaymiz, dam olganimizda, uxlaganimizda esa kattaroq doiradagi miyaning qismlari aktivlashadi va masalaga kechroq qaray olamiz. Uzluksiz uzoq ishlash miyaning faqat fokus rejimini ishga solib, ijodkorlikni cheklaydi, dam olish esa ko'proq ijodkorlikka sabab bo'ladi.
3. Miyada umumiy ikki xil mode bor: focus va diffuse mode. Focus modeda tor doirada chuqur ishlasa, diffuse mode yengil ammo miyaning turli qismlari ham birga ishlashini ta'minlaydi.
4. Jismoniy mashqlar bajarishning roli o'rganishda jdua katta. O'rganuvchi mashqlar bajarib turishi kerak.
5. Biz ishlamayotgan yoki o'qimayotgan vaqtimizda, masalan sayr qilayotganimiz, o'yin o'ynayotganimiz, suhbatlashayotganimizda ham miyamiz biz avval o'rgangan ishlarni tahlil qiladi, qayta ishlaydi va mustahkamlaydi. Bu jarayon diffuse modeda amalga oshadi. Diffuse rejimda miya erkinroq ishlaydi va bu holat ma'lumotlarni bir biriga bog'lash va yangi g'oyalarni shakllantirishga yordam beradi.
6. Ikki xil xotira mavjud - working memory va permanent memory. bilimlarni working memorydan doimiy permanent olishning yo'li bu - amaliyot (practice). Agar biz biror mavzuni birinchi marta o'rgansak, hatto yaxshilab tushunib olsak ham, uni takrorlab, amaliyot bilan birlashtirmas ekanmiz, u tezda unutilib ketadi, neyronlar orasidagi aloqalarni mustahkamlash uchun amaliyot va takrorlash muhim. Masalan dushanba kuni o'rganilgan mavzuni seshanba, chorshanba va Juma kuni takrorlash kerak. Bir bilimni doimiy xotiraga olib o'tishning yana bir yo'li uni boshqalarga tushuntirish ham.
7. Unchalik ham zo'r bo'lmagan working memoryga ega bo'lish aslida yomon emas, to'g'ri, ba'zida bu sabab qattiq mehnat qilishga to'g'ri keladi, lekin ilmiy izlanishlarning ko'rsatishicha - poor working memoryga ega insonlar ko'proq kreativ bo'lishadi, bu esa kreativlik talab qilinadigan ishlarda juda qo'l keladi.
8. Sekin fikrlayman deb tushkunlikka tushmang, zamonaviy neurosciencening otasi bo'lgan Santiago R.y Cajal sekin fikrlashini aytgan, ammo bu unga qo'l kelgan - u boshqa tez fikrlaydiganlar ko'rmagan narsalarni ilg'ay olgan, tez fikrlaydiganlar birdan xulosa qlishga o'tib ketishganda u mayda detallarga ham e'tibor qarata olgan. Tez fikrlaydiganlarni poyga avtomobillariga qiyoslasak, ular o'rmondan juda katta tezlikda o'tib ketishadi - ammo sekin fikrlaydiganlar ko'ra oladigan quyon uylari, gullar, o'rmon isidan bebahra qolishadi.
Maryam Mirzakhani - matematikada Nobel darajasidagi sovrin egasi, yaxshi matematik bo'lish uchun sekin fikrlaydiganlardan bo'lish kerak deydi va o'zi ham o'shalardan bo'lgan.
9. Ba'zida juda ko'p bilim olayotgandek bo'lamiz, ammo keyinroq unutib yuboramiz. Bundan qochishning yaxshi yo'llaridan biri - testlar. Bir soat o'rganishdan ko'ra ba'zan 1 soat test yechish ko'proq o'rgatishi mumkin. Biz har doim o'z bilimlarimizni testdan o'tkazib borishimiz kerak.
Recal haqida bu yerda ko'ring: https://www.tes.com/magazine/archive/learn-learn-power-recall#:~:text=Recall%20means%20bringing%20an%20idea,to%20do%20better%20on%20tests.
10. 10 yoshlik bola tushunadigan qilib tushuntiring. Nimani o'rganishingizdan qat'iy nazar, agar o'sha mavzuni juda sodda qilib tushuntirib bera olarkansiz, demak siz bu mavzuni chuqur anglab yetgan bo'lasiz.
11. O'zingizni o'sha mavzuning ichida tasavvur qiling. Barbara McClintock - genetika bo'yicha Nobel sovrindori, o'zini genetik daraja ichida tasavvur qilishga uringan. Biz tasavvurimizni ishga solganimizda, uni miyamizda tasvirlashga uringanimizda o'sha mavzuni yanada chuqurroq egallashimiz mumkin. Bu juda ko'p buyuk odamlar tomonidan qo'llanilgan usul.
12. O'zingiz qiziqqan, sevgan narsaga ergashing. Matematikada zo'rsiz, juda qiziqasiz, ammo Ronaldoni misol keltirib, sizdan futbolchi yasashmoqchi bo'lishsa, ammo futbolga qiziqmasangiz, matematikada keting. O'zingiz sevib o'rganadigan bilimlarni egallang.Ammo shunchaki qiziqishlaringizga ergashmang - qiziqishlaringiz sonini ko'paytiring va o'zingiz eng zo'ri bo'lganida davom eting, chunki ba'zan biz qiziqishlarimizda iste'dodli bo'lmasligimiz va yuqori darajalarga chiqishda juda katta resurs sarf qilishimizga to'g'ri kelishi mumkin.

Videoga link: https://youtu.be/vd2dtkMINIw?feature=shared

Jangga kirmay turib mag'lubiyatni tan olmang.

ayyubxon-kamoldinov — Sun, 01 Dec 2024 16:50:47 GMT

Idishdan chiqaman deb sakrayvergan, atrofdagilarni gapini qulog'i eshitmasligi sababli tinglamasdan, boshqa baqalar imkonsiz deb o'ylagan idishdan sakrab chiqib ketgan baqa haqidagi masalni ko'pchiligimiz o'qiganmiz. U shunchaki atrofdagi bu qiyin yo imkonsiz degan gaplarni eshitmasdan urinavergandi.

Dasturlashni o'rganishni boshlaganimda bu kasb qiyinligi haqida hozirgidan ko'ra kamroq eshitardim, ruhiyatimga ta'sir qilmagan, bir nima qilib o'rganib oldim va hozir shu sohada ishlayman. Jonas Schmedtmannning JavaScript kursi 60 soatdan ortiq edi, ko'p deb o'ylamay o'shani tugatganman o'rganish davomida. Sababi esa - shunchaki qiyin deb birov aytmagandi, qilish kerak ekan deb qilganman. Oson bo'lgan demoqchi emasman, shunchaki qiyin deb o'ylamaganman.

Hozir bu sohani o'rganish payida yurgan odamga eng birinchi uqtiriladigan narsa bu - bu kasbning qiyinligi. Hali o'rganmasidan qiyinligi haqida aytilaveradi, o'quvchi esa yarmiga bormasdan o'qishni tashlab qo'yishi mumkin, manga shuncha boshog'riq kerakmi deb.

Kitobni hali o'qib ko'rmasimizdan uning qalin ko'rinishini ko'riboq taslim bo'lib qo'yamiz, bu kitobni o'qiy olmayman deb. Hali dasturlashni o'rganmasdan oldin bu kasbni o'rganish qiyin deb yengilamiz. Hali sog'lom turmushni boshlamay turib uni qiyinligini eshitib sekin eski hayot tarzimizga qaytib olamiz.

Hali yo'lga chiqmasdan turib yengilish yaramaydi. Bizning potensialimiz har doim biz qilayotganimizdan ko'ra ko'proq, har doim yaxshilanishga, yaxshiroq qilishga imkon bor. Ko'z qo'rqoq, qo'l botir.

Umuman aqlga sig'maydigan ishga umrni sarflash kerak demoqchi emasman. Shunchaki astoydil bo'lsak qo'limizdan keladigan ishlarni yaxshilab, chalg'imasdan, qiyin deb o'ylamasdan qilishimiz kerak demoqchiman.

t.me/aIfarghani

Maslahat berish haqida.

ayyubxon-kamoldinov — Tue, 22 Oct 2024 14:50:23 GMT

Har birimizdan hech bo'lmasa qaysidir bir yo'nalishda yaxshi bo'lish uchun maslahat so'rashgan.

Futbolni yaxshiroq o'ynasak qanday qilib yaxshi futbol o'ynash, biz egallab turgan biror-bir kasb o'rganish, til yoki matematika o'rganishda eng oson va effektiv yo'llar haqida. Yoki birov maslahat so'ramagan bo'lsa ham, o'zimiz kimgadir bir narsalarni uqtirganmiz, xatosini to'g'rilashni, bir ishda yaxshiroq bo'lishni o'rgatishga uringanmiz.

Agar mandan kimdir biror narsada maslahat so'rashini tasvirlaydigan bo'lsam - shu ishni bajarishda o'zim bilgan eng ideal narsalarni aytaman. O'rganishda bo'lsa chalg'imay o'rganish, o'rganganlarini tezda amaliyotda sinab ko'rish, bir emas bir nechta manbaalardan o'rganish, eng yaxshi, eng zo'r yo'lini aytishga harakat qilaman o'zim bilganimcha. Yoki birovni xatosini u so'ramasa ham to'g'rilash hayolimdan o'tsa boshqalardan eng ideal hatti-harakatlarni bajarishni kutaman.

O'ylab qoldim, nega shuni o'zimdan so'ramayman/kutmayman? Ahir odamni tabiati har doim o'zini eng birinchi o'ringa qo'yadi, o'zimga bo'lsin deydi, eng zo'ri bo'lay deydi, o'ziga eng zo'r narsalarni ravo ko'radi. Moddiy narsalar eng afzalini tanlaymiz, ammo bir ishni bajarishga kelganda nega har doim shunday (eng zo'r ishni) qilmaymiz?

Tasavvur qilishga urinib ko'raman, agar har bir ishimizni rejalashda va uni amalga oshirayotganda hammamiz boshqalarga maslahat berayotgandek o'zimiz ham shunday qunt qilganimizda dunyo qanday ko'rinishda bo'lardi? O'rganishda, ishlashda eng zo'r narsalarni izlanib, ularni har bir detallargacha amalda qo'llasak qanday yashayotgan bo'lardik?

Ko'ryapsizmi, inson tabiati shunday, man ideallikka yaqin ish bajarishni o'zimdan talab qilish o'rniga yana boshqalardan kutyapman. Agar 8 milliard odam shunday qilsa deb hayollarim boshqalarni aybdor qilyapti, agar o'zim qilganimda qanday bo'lardi deb emas, chunki postning shu qismi postni yozish davomida fikrga keldi, tartiblanganida ehtimol bu qismini, ya'ni haqiqiy miyamdagi fikrni yozmagan bo'larmidim.

Yana bir chellenj deymizmi, odat deymizmi, amalga oshirishga urinadigan rejam - o'zim boshqalar biror mavzuda maslahat so'raganida nimani aytadigan bo'lsam, ana o'shanday qilishga harakat qilaman. Har bir ishda, u xoh til o'rganish, xoh ishlash, xoh sport bo'lsin. Natijasini esa albatta o'z telegram kanalimda bo'lishaman, Xudo xohlasa.