Жорий йилги пахта ҳосили учун  Когон туманидаги 239 та фермер хўжалигида жами 7096 гектар майдонда ғўза парваришланмоқда. Маълумотларга кўра, ҳудуддаги 2,5 минг гектар ерда эрта баҳордан плёнка остига чигит экиб парваришланаётган бўлса, бунинг учун туман бўйича 37 та замонавий экишгичдан унумли фойдаланилган.

Бу саъй-ҳаракат Нақшбанд, Ниёзҳожи, Янги ҳаёт, Нурафшон, Туткунда, Ўртачўл каби 12 та маъмурий ҳудудда ишни тўғри ташкил этишга, ҳар бир контурда ғўза парваришига алоҳида эътибор қаратилиб, минерал ўғит ва маханизация ишлари учун ёқилғи-мойлаш материаллари таъминотига, аввало моддий манфаатдорликка эътибор кучайтирилгани туфайлидир.

Ўтган йиллардаги натижаларига тўхталсак, темирйўлчилар туманида 21 минг тонна атрофидаги “оқ олтин” хирмони бунёд этилиб, катта хирмонга муносиб ҳисса қўшилмоқда. Бу борадаги жорий йилги миришкор пахтакорлар мақсад-муддаоси эса “оқ олтин” хирмонини янада юксалтириш.

Ўтган йилда когонликлар умумий пахта майдонининг 1 минг гектарида етиштирилган “оқ олтин” ҳосили “BAHOR CHANCE TEXTILE” МЧЖ агрокластери қабул масканида саранжомланган. “Когон”, “Сиёзпоён”, “Янги ҳаёт”, “Мустақиллик”, “Ўртачўл” МФЙларида етиштирилган 3 минг тоннага яқин сифатли уруғлик пахта ҳосили айнан агрокластер ҳисобига қабул қилинган. Жорий йил мавсумидаги кўзланган ҳосил салмоғи ҳам бултургисидан мўлроқ. Фермер хўжаликларида ҳар гектар пахта майдони ҳосилдорлигини 40 центнерга етказиш мақсад қилинган.

Пахта ҳосилини сифатли йиғиб-териб олишда ғўза дефолиацияси муҳим агротадбирлардан биридир. Дефолиация тўғри ўтказилганда баргларнинг тўлиқ тўкилиши таъминланибгина қолмасдан, ғўзадаги бўлиқ кўсаклар 10-15 кун эрта пишиб етилади, биринчи терим салмоғи 15-20 фоизга ошиб, юқори сифатли хом-ашё ҳажми кўпаяди. Шу қаторда дефолиант ғўза касалликлари ва зараркунандаларига, айниқса, қора шира тушган майдонларга самарали таъсир этади. Мазкур агротехник тадбир қора ширани келтириб чиқарувчи ғўза битларига барҳам бериб, кўсак ва толанинг чиришини кескин камайтиради.

Яқинда когонликларнинг “Чолоки” МФЙда фаолият юритаётган "Sharif gold grand" фермер хўжалигида қишлоқ хўжалиги масъуллари, сектор раҳбарлари, тегишли ташкилот ва корхоналар мутасаддилари, пахта-тўқимачилик кластерлари, фермерлар иштирокида бўлиб ўтган кўргазмали ўқув-амалий семинарида ҳам долзарб дефолиация тадбирини уюшқоқлик билан кечиктирмасдан ўтказишга эътибор қаратилди.

Тадбирда ғўза майдонларини дефолиация қилишга тайёргарлик кўриш, хусусан, ОВХ пуркагичларидан кенг фойдаланиш, дефолиантлар захирасини яратиш, ишчи эритма тайёрлаш майдончаларини ташкил қилиш, дефолиацияни сифатли ўтказилишини таъминлаш масалалари муҳокама қилинди.

Айни пайтда туманда жами 7 минг 96 гектар майдонда пахта етиштирилаётган бўлиб, шундан 6 896 гектар майдонда дефолиация тадбирини юқори даражада ташкиллаштириш чоралари кўрилмоқда. Бунинг учун 17 та ОВХ пуркагич агрегати ҳозирланган бўлиб, ҳудудлар миқёсида 17 та отряд иш олиб бормоқда.

Вилоят ҳокимлиги матбуот хизмати

Республика Шошилинч тиббий ёрдам илмий маркази Бухоро филиалининг юрак-қон томир ва торакал хирургия бўлимида ишга илмий-амалий ва замонавий инновацион услубда ёндошган ҳолда беморларда учрайдиган оғир касалликлар ёки мураккаб жароҳатларга тааллуқли жарроҳлик амалиётларини юқори малакали мутахассислар иштирокида муваффақиятли ўтказиш тажрибаси шаклланмоқда.

Жумладан, яқинда филиал қон-томир касалликлари хирурглари томонидан “чап ташқи ёнбош артериясининг посттравматик окклюзияси, чап оёқнинг В.С. Савельев бўйича иккинчи “В” даражали ишемияси” ташхиси билан мурожаат қилган беморга юқори технологик мураккаб реконструктив қон-томир протезлаш операцияси мувафақиятли бажарилди.

Баъзи мулоҳазаларга кўра, исм-шарифи очиқланмаган бемор Х. М. 1998 йилда туғилган. У жорий йилнинг 28 июнь куни йўл-транспорт ҳодисаси натижасида оғир жароҳат олиб, Вобкент туманлараро қўшма шикастланишлар ва ўткир қон-томир касалликлари марказига мурожаат қилган. Беморни кўрикдан ўтказиб текширган марказ мутахассислари томонидан “политравма, қорин бўшлиғини тешиб ўтувчи йиртилган санчилган жароҳати, чап ташқи ёнбош артерияси жароҳати, ингичка ичак ва тутқичи жароҳатлари, геморрагик шок, оғир даражаси, тарқалган гемо ва ахлатли перитонит, чап ёнбош суяги парчаланиб синиб силжиши” ташхиси қўйилган.

Шундан сўнг врачлар концилиумига биноан беморда “юқори-ўрта лапаротомия, қорин аъзолари ревизияси, чап ташқи ёнбош артерияси жароҳатига анастомоз қўйиш, ингичка ичак тутқичи жарохатларини тикиш, ингичка ичак резекцияси ва ёнма-ён энтеро-энтеро анастомоз қўйиш, назоинтестинал интубация, қорин бўшлиғи санацияси ва дренажлаш” операциясини бажаришга қарор қилинди.

Қорин бўшлиғида ўтказилган жарроҳлик амалиётидан кейин, икки босқичда беморга қорин аортаси ва иккала оёқ магистрал артериялари МСКТ-ангиография текшируви қилиниб, чап умумий ёнбош артерияси посттравматик окклюзияси юзасидан чора-тадбир кўрилди. Мутахассис шифокорлар хулосасига кўра, беморда жорий йил 23 августда экстраанатомик ўнг ташқи ёнбош ва чап умумий сон артериялараро аллопротезлаш“ операцияси муваффақиятли бажарилди.

Нисбатан мураккаб ва оғир ўтган жарроҳликдан кейин беморнинг чап сон, тақим ости ва товон артерияларида пульсация пайдо бўлди, оёқдаги кучли оғриқлар, совуқ қотишлар ва уюшишлар йўқолиб, энг асосийси, беморнинг ҳаракати ва сезги функцияси тўлиқ тикланди. Айтиш жоизки, беморда бундай юқори технологик реконструктив қон-томир операцияларини ўтказиш билан унинг оёғи ампутация амалиётидан сақлаб қолиниб, ногиронлигининг олди олинди ва ҳаёт сифати тўлиқ тикланишига эришилмоқда. Муҳими, бу каби юқори технологик қон-томир операциялари келгусида маҳаллий шароитда яна ўтказилиб борилади.

Вилоят ҳокимлиги матбуот хизмати

Яқин-яқингача катта қисми қишлоқ хўжалигида фойдаланиб келинган, ҳатто шўрхок ва ташландиқ ҳолда қаровсиз ётган ҳудуд бир неча йилда обод шаҳарчага айланди. Маъмурий жиҳатдан Бухоро туманига қарашли бўлган бу ҳудуд вилоят марказига қўшиб олиниб, бугун талаб даражасидаги муҳандислик-коммуникация тармоқларига эга бўлган 7-кичик мавзеи, расман Баҳоуддин Нақшбанд маҳалла фуқаролар йиғини, Амир Темур кўчаси замонавий кўринишда бунёд қилинди.

Шаҳар жанубида, аҳолиси нисбатан зич яшаётган 5-мавзеига ёндош, асосан кўп қаватли бино-иншоотлар, элликдан ортиқ 7 қаватли, ўндан ортиқ 9 қаватли турар жой иншоотлари, яна алоҳида умумтаълим мактаби, болалар боғчаси, тиббиёт муассасаси, савдо ва маиший хизмат кўрсатиш шахобчалари каби қатор ижтимоий соҳа иншоотларидан таркиб топган аҳоли турар жой маскани сўнгги йилларда анча гавжумлашди. Қувонарлиси, бунда барпо қилинган кўп қаватли замонавий турар жойларда мингдан ортиқ хонадон ўз бошпанасига эга бўлди. Албатта, ҳудудда кўпайиб бораётган аҳолига сифатли тиббий хизмат кўрсатиш, улар саломатлигини сақлаш ҳар қачонгидан долзарб масалага айланди. Бу ўринда гап мана, иккинчи йилдирки, янги маҳаллада умумий қиймати 5 миллиард 600 миллион сўм маблағ сарфлаб барпо қилинган икки қаватли замонавий тиббиёт поликлиникаси фаолияти хусусида бормоқда.

— Бухоро шаҳар тиббиёт бирлашмасига қарашли поликлиника 250 қатновга мўлжалланган бўлиб, унда айни кунда юздан ортиқ тиббиёт ходими хизматини ўтамоқда, — дейди мазкур 11-сон оилавий поликлиника бош врачи Икром Ҳусенов. — Умумий амалиёт шифокори, стоматолог, кардиолог, ЛОР, инфекционист, окулист, акушерь-гинеколог, иммунолог, уролог, онколог, жарроҳ, лаборант врач сингари мутахассислар ҳудуднинг 26 минг нафарга етган аҳолисига бирламчи тиббий–санитария хизматини кўрсатмоқда. Ҳолбуки, бу кўрсаткич дастлабки йили 21 минг нафарни ташкил қилган. Бундан ташқари, муассасада иккита кундузги станционар, физиотерапия хонаси, стерилизация, лаборатория, ультратовуш таммографияси, электрокардиограмма, “Аёллар маслаҳатхонаси” ва дорихона фаолияти йўлга қўйилган.

Ўрганишлардан сўнг, ҳудудда тиббий хизмат кўрсатилаётган аҳолининг 15 минг 600 дан ортиғини ёши катталар, яъни 20 ёшдан ошганлар ташкил этаётган бўлса, қарийб 300 нафари жисмоний имконияти чекланганлар, 60 дан ошиғи болаликдан ногирон фуқаролар, деярли минг нафари эса кекса қариялардан иборат. Шу боис, замонавий диагностик ва физиотерапевтик аппаратлар (УЗИ, ЭКГ, ЭХО), лаборотор текширув ускуналари билан таъминланган, беморлар қабули замонавий компьютерларда электрон тарзда олиб борилаётган муассасада тиббий хизмат сифатига эътибор кучайтирилган. Бунда “электрон поликлиника” ахборот тизими йўлга қўйилгани боис шифокор қабулига кириш учун навбат кутишга ҳожат йўқ. Ҳар бир мутахассис қабули учун электрон монитор ўрнатилган оилавий поликлиника юқори тезликдаги оптик толали интернет тармоғига уланган.

— Фаолият доирасида поликлиникада Баҳоуддин Нақшбанд маҳалласи билан бирга шу атрофдаги Абдумуин Сифатмуний, Зарманоқ, Лоша, Маҳмуд Таробий каби маҳаллалар аҳолиси, ижтимоий кам таъминланганлар оилалар аъзоларини жалб қилган ҳолда мунтазам тиббий кўриклар ташкил этиб келинмоқда, — дейди поликлиника бош врачи Икром Ҳусенов. — Тиббий кўрикка келолмаган ётоқдаги ногиронлар ва қариялар ҳам назоратдан четда қолдирилмасдан, уларни уйларига бориб тиббий кўрувлар ташкил қилинмоқда. Бунинг натижасида касаллик билан оғриганларга зарур 120 турдаги дори-дармон бепул таркатилмоқда.

Поликлиника оилавий шифокорлари ва патронаж ҳамширалари томонидан айни пайтда турли дардга чалиниб, оғир аҳволда тўшакда ётган йигирмага яқин кекса-ногирон ҳолидан хабар олинмоқда. Жумладан, биринчи гуруҳ ногиронлари Матлуба Орзиева, Солиҳа Шариповалар, бош мия фалажи касаллиги билан тўшакка михланиб қолган Лубат Соҳибова, қандли диабет билан оғриган Ҳамрогул Рўзиева, нафас йўли—бронхиал астма касаллигига чалинган Моҳира Абдуллаева, шизофрения билан оғриган Гулнора Рўзиева, косоартроз хасталиги билан оғриган Мавжуда Саломова, юқори қон босимига чалинган Хурсанд Шодиева, ўткир ичак касаллиги—долихостигмага оид жарроҳлик операциясини бошидан кечирган Комилжон Муродов сингари беморлар саломатлиги назоратга олинган бўлиб, уларга зарур дори-дармон воситалари уйларига элтиб берилмоқда.

— Кўп йилдирки, қандли диабет касаллигига чалиниб, ётиб қолдим, — дейди Гулобиён кўчасида яшовчи 70 ёшли онахон Шарифа Жўраева. — Тез-тез ҳолимдан хабар олиб, менга зарур муолажаларни қўллаб, инсулин дорисини етказиб бераётган врач қизим Болтаева ҳамда унинг поликлиникасидагиларга ўз миннатдорлигимни билдираман. Мен сингари касалманд қарияларни иззат қилиб, ўз ҳолига ташлаб қўймасдан, соғлом ҳаётга қайтариш учун қайғураётган ҳукуматимизга раҳмат!

Вилоят ҳокимлиги матбуот хизмати

Вилоят ҳокимлиги катта мажлислар залида “Юксалиш” умуммиллий ҳаракати вилоят ҳудудий бўлинмаси томонидан Ўзбекистон Республикаси Президентининг “Ўзбекистон – 2030” стратегияси тўғрисида”ги Фармони ва “Ўзбекистон – 2030” стратегиясини 2023 йилда сифатли ҳамда ўз вақтида амалга ошириш чора-тадбирлари тўғрисида”ги Қарори лойиҳаси бўйича жамоатчилик муҳокамаси бўлиб ўтди.

Йиғилишда халқ депутатлари Бухоро вилояти Кенгаши депутатлари, вилоят ҳокимининг ўринбосарлари, котибият мудирлари, тиббиёт, халқ таълими ва бошқа соҳалар мутасаддилари, нодавлат-нотижорат ташкилотларининг раҳбарлари, сиёсий партияларнинг масъуллари, ёшлар ҳамда оммавий ахборот воситалари ходимлари иштирок этдилар.

Тадбирда эътироф қилинганидек, “Ўзбекистон—2030” стратегиясининг мақсадлари ва самарадорлик кўрсаткичлари осон қабул қилиш ва тушуниш учун қулай шаклда ифодаланган бўлиб, унда 5 та устувор йўналиш бўйича 100 та мақсад назарда тутилганлиги иштирокчиларга етказилди. Аниқроқ айтганда, мазкур стратегиянинг 5 та устувор йўналиши қиёсий олиб қараганда, жами 44 та мақсади ҳар бир инсонга ўз салоҳиятини рўёбга чиқариши учун муносиб шарт-шароитни яратиш, 17 та мақсади барқарор иқтисодий ўсиш орқали аҳоли фаровонлигини таъминлаш, 12 та мақсади сув ресурсларини тежаш ва атроф-муҳитни муҳофаза қилиш, 16 та мақсади қонун устуворлигини таъминлаш, халқ хизматидаги давлат бошқарувини ташкил этиш, 11 та мақсади мамлакатни хавфсиз ва тинчликсевар давлатга айлантириш ишларини давом эттиришга қаратилган.

Тадбирдан кўзланган асосий мақсад, янги Ўзбекистон тараққиёт стратегиясини амалга ошириш жараёнида орттирилган тажриба ва жамоатчилик муҳокамаси натижалари асосида ишлаб чиқилган «Ўзбекистон – 2030» стратегияси кенг жамоатчилик муҳокамасига қўйилиб таклифлар олиш ҳамда олинган таклифларни regulation.gov.uz, jamoatchilik.uz ва 2030.strategy.uz порталларида кенг жамоатчилик муҳокамаси учун жойлаштирдан иборатдир.

Муҳокамада вилоят ҳокимининг ўринбосари Феруза Ибрагимова, “Юксалиш” умуммиллий ҳаракати вилоят ҳудудий бўлинмаси бошлиғи Ҳамза Рўзиев, вилоят мактабгача ва мактаб таълими бошқармаси бошлиғининг ўринбосари Ҳалим Ражабзода, вилоят ҳокимлиги соғлиқни сақлаш бошқармаси бошлиғининг ўринбосари Ихтиёр Абдулхаков, Ўзбекистон Ёшлар иттифоқи вилоят Кенгаши раиси Миршод Очилов ва бошқалар ўз фикр-мулоҳазалари ва таклифларини билдирдилар.

Таъкидланганидек, “Ўзбекистон – 2030” стратегияси 100 та мақсадни, хусусан, тиббий ёрдамга муҳтож аҳолининг 70 фоиз мурожаатларини бирламчи бўғиннинг ўзида ҳал этиш, камбағалликни 2 баробарга камайтириш, мактабгача таълим билан қамров даражасини 100 фоизга етказиш, сувни ишлатиш самарадорлигини 25 фоизга ошириш, республика ҳудудининнг яшиллик даражасини 30 фоизга етказиш каби қатор кўрсаткичларни ўз ичига қамраб олган. Стратегияда белгилаётган мақсад ва вазифалар, Барқарор Ривожланиш Миллий Мақсадларини амалга ошириш учун ўзига хос «йўл харитаси» вазифасини ўтайди, десак, муболаға бўлмайди.

Чунончи, “Ўзбекистон – 2030” стратегияси бешта устувор йўналишининг учинчиси сув ресурсларини тежаш ва атроф-муҳитни муҳофаза қилишга қаратилган мақсадларни ўзида жамлагани билан аҳамиятли. Хусусан, стратегия лойиҳасида сув ишлатиш самарадорлигини 25 фоизга ошириш, барча экин майдонларини тўлиқ сув тежайдиган технологияларга, ички суғориш тармоқларининг 50 фоизини ёпиқ қувурли суғориш тизимларига ўтказиш чора-тадбири кўрилади.

Шунингдек, қишлоқ хўжалигида сувни тежайдиган суғориш технологияларини жорий қилиш ва суғориладиган майдоннинг ҳар бир гектарига бериладиган сув ҳажмини 20 фоизга камайтириш орқали сувнинг маҳсулдорлиги оширилади. Ерларнинг мелиоратив ҳолатини яхшилаш орқали 1 метр куб ҳажмдаги сув билан суғорилган ер майдонидан 3,7 доллар миқдорида даромад олишга эришилади. “Оби ҳаёт”дан самарали фойдаланишда замонавий бошқарув тизимининг ҳам ўрни юқори саналади. Шу боис, 2030 йилгача камида 100 та йирик сув хўжалиги объектида автоматлаштирилган бошқарув тизимини жорий қилиш, ирригация соҳасига хусусий секторни жалб этиш, давлат-хусусий шериклик механизмларини кенг жорий қилиш ҳисобига хусусий инвестициялар оқимини кўпайтириш мақсад қилинган.

Умуман, жамоатчилик эшитувида билдирилган таклиф ва мулоҳазалардан келиб чиққан ҳолда “Ўзбекистон–2030” стратегиясини амалга оширишда фуқаролик жамияти институтларининг роли ва аҳамияти, айниқса, масъул идоралар томонидан юклатилган вазифаларни ўз вақтида ва сифатли бажарилиши юзасидан жамоатчилик мониторинги ва назоратини олиб бориш юзасидан йиғилганларга тушунтиришлар берилди.

Якунда Янги Ўзбекистон-2030 стратегияси ижросини таъминлашда барча бирдек масъул эканлиги ва белгиланган мақсадларга бу борадаги саъй-ҳаркатларни бирлаштириш орқалигина эришиш мумкинлиги ҳақида хулоса қилинди.

Вилоят ҳокимлиги матбуот хизмати

Мамлакатимиз Президенти Шавкат Мирзиёев раислигида шу йил 18 апрелда бўлиб ўтган қишлоқ хўжалигида маҳсулот етиштиришда сувдан самарали фойдаланиш технологияларини ислоҳ қилиш бўйича видеоселектор йиғилишида соҳа масъул мутасаддилари, тегишли вазирлик ва идоралар раҳбарлари қаторида тизимда истиқболли лойиҳаларни молиялаштиришда тегишли тижорат банклари зиммасига ҳам қатор вазифалар юклатилди.

Шу нуқтаи назардан, республика Сув хўжалиги вазирлиги, акционерлик тижорат “Агробанк” ҳамда Тошкент ирригация ва қишлоқ хўжалигини механизациялаш муҳандислари институти Миллий тадқиқотлари университетининг Бухоро табиий ресурсларни бошқариш институти билан ҳамкорликда вилоят туманларида ҳам “Сувчилар мактаби” ташкил қилинди. Бу мактабни ташкил этишдан асосий мақсад давлат раҳбарининг топшириғига асосан ҳар бир сектор мутасаддиси билан биргаликда қишлоқ хўжалиги соҳаси вакилларига айни кунда аграр тармоқда қўлланилаётган инновацион технологиялар, хорижий илғор мамлакатлар амалиётидан яхши хабардор бўлган ҳолда янги кўникмаларни эгаллаш, шу орқали сув танқислиги кучайиб бораётган маҳаллий шароитда фаолиятни такомиллаштириб, сувдан самарали фойдаланиш ва маҳсулдорликни оширишдир.

Таҳлиллардан кўринишича, ҳозирда туман қишлоқ хўжалигида пахта ва ғалла етиштиришга мўлжалланган жами 15 минг 300 гектар майдоннинг 3 минг 61 гектарида замонавий технология асосида томчилатиб ва ёмғирлатиб суғориш ускуналари жорий этилган. Худди шундай, 2024-2030 йиллар мобайнида мураккаб шароитда ҳосил салмоғини ошириш мақсадида сув танқислигини инобатга олиб, қолган экин майдонларида ҳам сув тежовчи ускуналардан самарали фойдаланишни даврнинг ўзи тақозо этмоқда. Бу борада кўрилиши лозим бўлган чора-тадбирлар, манзилли кўзланган лойиҳалар куни кеча Шофиркон туманида “Сувчилар мактаби”нинг ўқув-амалий кўргазмали семинарида муҳокама қилинди.

Унда ҳудуддаги фермер-деҳқон хўжаликлари раҳбарлари, қишлоқ хўжалигига дахлдор корхона ва идоралар масъуллари ҳозир бўлдилар. Семинарда аграр соҳада кўп йиллик тажрибага эга, томчилатиб ва ёмғирлатиб суғориш технологиялари бўйича Туркия давлатидан келиб, маҳаллий хўжаликлар тажрибасини ўрганаётган мутахассис Қаҳраман Дилек ўз фикр-мулоҳазалари билан ўртоқлашди. Сувни тежовчи ускуналар ва уларнинг афзалликлари борасида йиғилганларга тушунтиришлар берди.

Семинар иштирокчилари қишлоқ хўжалигида “оби ҳаёт” сарфини қисқартириш ва баракали ҳосил етиштириш технологияси, бу борада баъзи пешқадам хўжаликларда бошланган иш услуби билан яқиндан танишдилар. Дастлабки манзил “Султон Жўра” ҳудудидаги "Ориф Ҳомид" фермер хўжалиги экин ерлари бўлди.

Илғор деҳқонлардан Туроб Орипов раҳбарлигидаги мазкур хўжалик миришкорлари айни кунда 34 гектар майдонда деҳқончилик қилиб келишаётган бўлсалар, шундан 27 гектар ерда “оқ олтин” етиштирмоқдалар. Ўтган ойда 7,5 гектарда етиштирилган сара буғдойдан баракали хирмон кўтарилган. Муҳими, мазкур хўжалик ғўза парваришида икки йилдирки, сув тежовчи замонавий воситалардан фойдаланмоқда.

Шу ерда туркиялик мутахассис Қаҳраман Дилек фермер хўжалигида қўлланилаётган “оби ҳаёт” тежовчи технологиянинг афзаллиги, уни ўрнатиш билан боғлиқ сарф-харажат, якунда экин ерини эмас, балки ўсимлик ва унинг илдизини суғориш ва ундан баракали ҳосил етиштиришдаги тажриба, эришилган натижа хусусида атрофлича маълумот олиб, йиғилганлар билан муҳокамага киришди. Сув танқислиги шароитида томчилатиб суғоришни жорий этишнинг мақбул жиҳатлари ва устуворлиги ўз эътирофини топди. Албатта, ўрганишларда тармоқда дуч келинаётган ташвиш ва муаммолар, нуқсон ва камчиликлар ечимига эътибор қаратилгани ҳолда замонавий конструкцияни ўрнатиш қа қўллашга доир маҳорат сабоғи ҳам берилди.

Вилоят ҳокимлиги матбуот хизмати

Панжоблик расмийлар, инвестор ва тадбиркорлар ташриф дастурига киритилган йирик корхоналар фаолияти билан танишди. Дастлабки манзил Шофиркон туманида 1 минг 200 ўринли “AZTEX” тикувчилик фабрикаси бўлди.

Замонавий тикув цехлари, хом ашё ва тайёр маҳсулот омборлари, офис ва қўшимча биноларига эга бўлган яхлит мажмуа фаолияти меҳмонларда илиқ таассурот уйғотди.

Таъкидлаш лозимки, “Гулистон” маҳалла фуқаролар йиғинида барпо қилинган бу иншоот – Туркия давлати технологияси асосида қурилган 120 метрга 108 метр ўлчамидаги катта цех замонавий тикув ускуна ва дастгоҳлари билан жиҳозланди. Лойиҳа умумий қиймати 50 миллиард 700 миллион сўмга тенг.

Ушбу корхонада 14 миллиард 170 миллион сўм маблағ эвазига Япониядан 660 дона замонавий тикув машинаси келтирилган ва яна маблағлар зарур ускуна харид қилишга йўналтирилди. Фабрикада ҳар бирида 30 та тикув машинасидан иборат 22 та гуруҳ ишлаб чиқариш тикув йўналишлари йўлга қўйилмоқда. Жараёнда 10 миллиард 900 миллион сўм маблағ ишлаб чиқариш учун зарур ярим тайёр хом ашё – мато учун сарфланмоқда.

Туманда ушбу йирик ишлаб чиқариш корхонасининг фаолият бошлаши ҳудуд иқтисодий-ижтимоий ҳаётида ўзига хос янгилик. Сабаби туманнинг 1 минг 200 дан ошиқ чевар хотин-қизи мазкур корхона туфайли ишли, ўнлаб, юзлаб оилалар моддий манфаатдор бўлди.

Мартабали меҳмонлар айни пайтда маҳсулотларини Европа мамлакатларига экспорт қилаётган корхона салоҳиятига юқори баҳо берди. Жамият таъсисчиси Азамат Султонов покистонликлар билан ўзаро ҳамкорликда инвестициявий лойиҳаларни амалга оширишга тайёр эканлигини билдирди.

Покистон делегацияси аъзолари Bukhara Cotton Textile корхонаси фаолияти билан ҳам танишди.

Бухородаги BCT Cluster пахта-тўқимачилик кластери мамлакатда энг биринчи тузилганлардан. У давлат раҳбарининг 2017 йил 19 майдаги қарорига асосан ташкил этилган.

Мазкур кластер пахта етиштиришдан тортиб уни чуқур қайта ишлашгача бўлган барча технологик жараёнларни яхши ўзлаштирган. Хусусан, Ромитан туманидаги 8 минг гектар майдонда пахта етиштирилса, унинг толасидан ип йигириш, калавани бўяш, мато тўқиш ва кийим тикиш йўлга қўйилган. Bukhara Cotton Textile корхонаси ушбу ишлаб чиқариш занжирининг охирги ҳалқаси ҳисобланади. Уни ташкил этиш учун 65 миллион АҚШ долларидан зиёд инвестиция йўналтирилган.

Яна бир муҳим жиҳати шундаки, ушбу корхона илгари қаровсиз бўлиб қолган собиқ тўқимачилик комбинати ўрнида пайдо бўлди. Бу ерда битта эски бино капитал реконструкция қилиниб, 19 та янги бино ва иншоотлар барпо этилди. Германия, АҚШ, Бельгия ва Франциядаги технологик линиялар, асбоб-ускуна ва дастгоҳлар билан жиҳозланди.

Пахта хом ашёсини тайёр маҳсулотга айлантираётган мазкур корхонада ҳаётга тадбиқ этилаётган йирик истиқболли лойиҳа хорижлик инвесторларни қизиқтирди. Улар маҳсулотлар сифати, корхонанинг истиқболда амалга ошириладиган лойиҳалари, экспорт географияси, хом ашё манбалари юзасидан амалий таклифларини билдирди.

Шу куни меҳмонлар Бухоронинг диққатга сазовор тарихий обидаларини ҳам бориб кўришди.

Шунинг билан Покистон делегациясининг Бухоро вилоятига ташрифи ўз якунига етди.

Вилоят ҳокимлиги матбуот хизмати

Панжоблик расмийлар, инвестор ва тадбиркорлар ташриф дастурига киритилган йирик корхоналар фаолияти билан танишди. Дастлабки манзил Шофиркон туманида 1 минг 200 ўринли “AZTEX” тикувчилик фабрикаси бўлди.

Замонавий тикув цехлари, хом ашё ва тайёр маҳсулот омборлари, офис ва қўшимча биноларига эга бўлган яхлит мажмуа фаолияти меҳмонларда илиқ таассурот уйғотди.

Таъкидлаш лозимки, “Гулистон” маҳалла фуқаролар йиғинида барпо қилинган бу иншоот – Туркия давлати технологияси асосида қурилган 120 метрга 108 метр ўлчамидаги катта цех замонавий тикув ускуна ва дастгоҳлари билан жиҳозланди. Лойиҳа умумий қиймати 50 миллиард 700 миллион сўмга тенг.

Ушбу корхонада 14 миллиард 170 миллион сўм маблағ эвазига Япониядан 660 дона замонавий тикув машинаси келтирилган ва яна маблағлар зарур ускуна харид қилишга йўналтирилди. Фабрикада ҳар бирида 30 та тикув машинасидан иборат 22 та гуруҳ ишлаб чиқариш тикув йўналишлари йўлга қўйилмоқда. Жараёнда 10 миллиард 900 миллион сўм маблағ ишлаб чиқариш учун зарур ярим тайёр хом ашё – мато учун сарфланмоқда.

Туманда ушбу йирик ишлаб чиқариш корхонасининг фаолият бошлаши ҳудуд иқтисодий-ижтимоий ҳаётида ўзига хос янгилик. Сабаби туманнинг 1 минг 200 дан ошиқ чевар хотин-қизи мазкур корхона туфайли ишли, ўнлаб, юзлаб оилалар моддий манфаатдор бўлди.

Мартабали меҳмонлар айни пайтда маҳсулотларини Европа мамлакатларига экспорт қилаётган корхона салоҳиятига юқори баҳо берди. Жамият таъсисчиси Азамат Султонов покистонликлар билан ўзаро ҳамкорликда инвестициявий лойиҳаларни амалга оширишга тайёр эканлигини билдирди.

Покистон делегацияси аъзолари Bukhara Cotton Textile корхонаси фаолияти билан ҳам танишди.

Бухородаги BCT Cluster пахта-тўқимачилик кластери мамлакатда энг биринчи тузилганлардан. У давлат раҳбарининг 2017 йил 19 майдаги қарорига асосан ташкил этилган. Мазкур кластер пахта етиштиришдан тортиб уни чуқур қайта ишлашгача бўлган барча технологик жараёнларни яхши ўзлаштирган. Хусусан, Ромитан туманидаги 8 минг гектар майдонда пахта етиштирилса, унинг толасидан ип йигириш, калавани бўяш, мато тўқиш ва кийим тикиш йўлга қўйилган. Bukhara Cotton Textile корхонаси ушбу ишлаб чиқариш занжирининг охирги ҳалқаси ҳисобланади. Уни ташкил этиш учун 65 миллион АҚШ долларидан зиёд инвестиция йўналтирилган.

Яна бир муҳим жиҳати шундаки, ушбу корхона илгари қаровсиз бўлиб қолган собиқ тўқимачилик комбинати ўрнида пайдо бўлди. Бу ерда битта эски бино капитал реконструкция қилиниб, 19 та янги бино ва иншоотлар барпо этилди. Германия, АҚШ, Бельгия ва Франциядаги технологик линиялар, асбоб-ускуна ва дастгоҳлар билан жиҳозланди.

Пахта хом ашёсини тайёр маҳсулотга айлантираётган мазкур корхонада ҳаётга тадбиқ этилаётган йирик истиқболли лойиҳа хорижлик инвесторларни қизиқтирди. Улар маҳсулотлар сифати, корхонанинг истиқболда амалга ошириладиган лойиҳалари, экспорт географияси, хом ашё манбалари юзасидан амалий таклифларини билдирди.

Шу куни меҳмонлар Бухоронинг диққатга сазовор тарихий обидаларини ҳам бориб кўришди.

Шунинг билан Покистон делегациясининг Бухоро вилоятига ташрифи ўз якунига етди.

Вилоят ҳокимлиги матбуот хизмати

Ёз ва қиш чилласида айнан йўлларда дуч келинадиган қийинчиликларга барҳам бериш мақсадида шу кеча-кундузда Вобкент туманида ҳам бир қатор ишлар амалга оширилмоқда. Айниқса, бу борада ички йўллар босқичма-босқич таъмирланиб, асфальт-бетон қилинаётгани аҳолига катта қулайлик.

Ўзбекистон Республикаси Президентининг 2022 йил 25 октябрдаги “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги қарорига мувофиқ Вобкент туманида мавжуд йўлларни таъмирлаш масаласига алоҳида эътибор қаратилмоқда.

Ҳудудда Халач маҳалласи аҳолисини узоқ йиллардан бери йўл муаммоси қийнаб келарди. Мазкур аҳоли маскани йўли яроқсиз ва абгор ҳолатга келиб қолгани албатта, бу йўлдан қатновчи йўловчилар, транспорт ҳайдовчилари ва пиёдаларнинг ҳақли эътирозларига сабаб эди.

Ниҳоят, аҳоли мурожаатлари инобатга олиниб, айни кунда "Вобкент йўллардан мунтазам фойдаланиш" унитар корхонаси йўлсозлари томонидан Қуйи Халач, Юқори Шехон, Одоқариқ қишлоқлари йўлларининг жами 5,5 километрдан ошиқ қисмида асфальтлаштириш ва бетонлаштириш ишлари жадал олиб борилмоқда.

Худди шундай, ички йўл таъмири навбати "Тераклик" маҳалла фуқаролар йиғинининг Тешиктепа қишлоғига етиб келди. Ҳозирда бу қишлоқнинг ички йўлларини асфалтьлаштириш ишлари "Менинг йўлим" дастури туфайли, бошқача айтганда, жами 11 минг 545 нафар фуқаронинг овоз бериши туфайли ютиб олинди. Эндиликда умумий қиймати 805 миллион сўм маблағ ҳудуддаги йўлнинг 1,5 километрини таъмирлашга сарфланмоқда.

— Умуман, жамоамиз томонидан бугунга келиб ҳудуддаги 178 километрдан ошиқ йўл қисмига хизмат кўрсатилаётган бўлиб, шундан 32 километр йўл қисми республика аҳамиятидаги, 147 километри эса маҳаллий аҳамиятидаги йўл ҳисобланади, — дейди туман Йўллардан фойдаланиш унитар корхонаси раҳбари Неъмат Қурбонов. — Энг кўп маблағ тақозо қилинадиган йўл тармоғида ўтган йил давомида "Обод қишлоқ" давлат дастури асосида умумий қиймати 15 миллиард 700 миллион сўм маблағ эвазига 40 километр йўл қисми асфальтлаштирилиб, қарийб 50 километрга тенг ички йўлга шағал бостирилгани аҳоли талаб ва мурожаатларига ечим бўлди.

Шунингдек, туман марказий кўчаларини обод қилиш ва кўркам қиёфага келтириш мақсадида ўтган йили пиёдалар ҳамда велосипед йўлакларини қуришга 6 миллиард сўм маблағ сарфланган бўлса, бугун ҳудудда бораётган йўл таъмирига доир ишлар салмоғи бултургисидан салмоқлироқ.

Вилоят ҳокимлиги матбуот хизмати