Аввало барчангизни касб байрамингиз ­– Тиббиёт ходимлари куни билан чин дилдан табриклайман. Халқимизнинг соғлигини мустаҳкамлашдаги масъулиятли фаолиятингиздан доим ҳурмат ва эъзоз топишингизни тилайман.

Туманимизнинг 280 мингдан ортиқ аҳолиси соғлигини таъминлашда, уларни даволашда тинимсиз меҳнат қилиб, ҳар бирини ўзининг энг яқин инсонидек кўриб, унга тиббий ёрдам кўрсатаётган Сиз азизларнинг меҳнатингизга қанча тасанно айтсак ҳам шунча кам.

Жаҳон тиббиёт илмининг асосчиларидан бири, буюк аллома Абу Али ибн Сино бобомиз айтганларидек, одамлар дардига дармон бўлмоқ – эзгулик ва олижанобликнинг юксак намунасидир.

Халқимиз сизларнинг тимсолингизда ўз ҳаётини ана шундай улуғ ва масъулиятли ишга бағишлаган, аҳоли саломатлигини асраш йўлида бор билими, тажрибаси ва истеъдодини сафарбар этиб келаётган шарафли касб эгаларини кўради. Қилаётган машаққатли меҳнатингизни эса доимо муносиб қадрлайди.

Азиз тиббиёт соҳаси вакиллари!

Халқимиз келажагининг фаровон бўлишида ҳар бирингизнинг ҳиссангиз беқиёс.

Чунки буюк мақсадлар жисмонан соғлом, руҳан тетик инсонлар билан забт этилади. Бунда Сизларнинг туманимиз аҳолиси соғлигини мустаҳкамлаш, уларнинг дардига даво топиб, давлат сиёсатидан, тиббиёт тизимидан рози қилишингиз муҳим аҳамият касб этади.

Қадрли тиббиёт ходимлари!

Сизларни касб байрамингиз билан яна бир бор самимий табриклайман.

Барчангизга сиҳат-саломатлик, улкан зафарлар, оилавий бахт-саодат тилайман. Машаққатли меҳнатингиз ортидан доимо эъзоз топиб, эл ардоғида бўлинг.

Байрамингиз муборак бўлсин!

Зоир Аликулов, Қарши тумани ҳокими.

Сессия ишида туманни ишсизлик ва коррупциядан ҳоли ҳудудга айлантириш ҳамда “Обод хонадон”, “Обод кўча” ва “Обод маҳалла” мезонларини жорий этишда сектор раҳбарлари томонидан “маҳаллабай” ва “хонадонбай” ишлаш бўйича 2024 йилнинг I чорагида амалга оширилган ишлари юзасидан ҳисоботлари эшитилди.
Ҳар бир сектор раҳбарининг жорий йил якунига қадар аҳоли бандлигини таъминлаш бўйича дастурлари тақдимот қилинди.

Шунингдек, танқидий руҳда ўтказилган ушбу йиғилишда тумандаги коммунал соҳа (электр таъминоти, газ, ичимлик суви, йўл) ташкилотлари раҳбарларининг ҳам ҳисоботлари эшитилиб, аҳоли муаммолари билан боғлиқ масалаларни ҳал қилишда улар томонидан йўл қўйилган камчиликлар кўрсатиб ўтилди.

Сессия йиғилишида электр, газ, ичимлик суви таъминотини яхшилаш ва тупроқ йўлларни шағаллаштириш юзасидан ушбу ташкилотларнинг жорий йил якунига қадар ҳар бир маҳалла кесимида режа-жадваллари муҳокама қилинди ва тасдиқланди.

Йиғилишга юқоридаги соҳалар бўйича энг кўп мурожаат қилган фуқаролар таклиф этилиб, уларга маҳаллаларида амалга ошириладиган ишларнинг режа-жадваллари тушунтирилди.

Сессия кун тартибидаги масалалар бўйича тегишли қарорлар қабул қилинди ҳамда тасдиқланган режа-жадвалларни тумандаги ҳар бир маҳалла биносида барча кўринарли жойларга илиб қўйиш белгиланди.

Ўзбекистон Республикаси Жиноят-процессуал кодексининг 13-моддасида ўта оғир жиноятлар судларда халқ маслаҳатчилари иштирокида кўрилиши белгиланган.

Иш биринчи инстанция суди томонидан ҳайъатда кўрилганда суд таркибига судья ва икки нафар халқ маслаҳатчиси киради.

Ўзбекистон Республикасининг 2021 йил 28 июлдаги “Судлар тўғрисида”ги қонунининг 59-моддасига кўра, ўттиз беш ёшдан кичик бўлмаган, фуқароларнинг яшаш ёки иш жойидаги йиғилишида очиқ овоз бериш йўли билан икки ярим йил муддатга сайланган Ўзбекистон Республикаси фуқароси халқ маслаҳатчиси бўлиши мумкин.

Ҳақиқий ҳарбий хизматни ўтаётган, сайлов кунида ўттиз беш ёшга тўлган, ҳарбий қисмлар ҳарбий хизматчиларининг йиғилишларида очиқ овоз бериш йўли билан икки ярим йил муддатга сайланган Ўзбекистон Республикаси фуқароси ҳарбий суднинг халқ маслаҳатчиси бўлиши мумкин.

Ҳар бир суд учун халқ маслаҳатчилари сони судьяларнинг тегишли малака ҳайъатлари томонидан белгиланади.

Халқ маслаҳатчилари одил судловни амалга оширишда судьянинг ҳуқуқларидан фойдаланади.

Халқ маслаҳатчилари судлардаги ўз вазифаларини бажаришга бир йилда кўпи билан икки ҳафтага навбатма-навбат чақирилади, бундан уларнинг иштирокида бошланган суд ишини кўришни тугаллаш зарурати бу муддатни узайтиришни тақозо этган ҳоллар мустасно. Шу даврда уларнинг иш жойидаги ўртача иш ҳақи сақланиб қолади

О.Шукуров,

Жиноят ишлари бўйича Қарши туман суди раиси

Assalomu alaykum, tumanimizning navqiron yoshlari

Avvalam bor bugungi ommaviy axborot vositalariga chiqish orqali Siz aziz yoshlarga “Yoshlarga oid davlat siyosati” doirasida 2023 yilda  tuman yoshlarini har taraflama qo‘llab-quvvatlash bo‘yicha amalga oshirilgan ishlar va 2024 yil “Yoshlar va biznesni qo‘llab-quvvatlash” yilida yoshlarni xar tomonlama qo‘llab-quvvatlashdik ustuvor yo‘nalishlarda hisobot berayotganimdan benihoyat xursandman.

Sizlarga hisobot berishimdan oldin, tumanimizning demografik ko‘rsatkichi bilan tanishtirsam;

Tuman aholisi soni 270 ming 564 nafarni tashkil etib, shundan0-30 yoshdagi yoshlar soni 149 500 nafarni, 18-30 yoshdagi yoshlar soni53 777 nafarni, 14-30 yoshdagi yoshlar soni – 67 188 nafar (uyushgan – 43 467 nafar, uyushmagan 23 721 nafar), migratsiyada yaʼni xorijdagi yoshlar soni 1 356 nafar tashkil etadi.

“Yoshlarga oid davlat siyosati” doirasida o‘tgan 2023 yilda olib borilgan islohotlar yuzasidan qisqacha to‘xtalib o‘tmoqchiman.

Tumanda 2023 yil davomida ijtimoiy og‘ir ahvolda bo‘lgan yoshlarni har tomonlama qo‘llab-quvvatlash borasida mahalliy byudjetning ortirib bajarilgan qismi hisobidan “Yoshlar daftari” jamg‘armasiga 2 mlrd 500 mln so‘mlik mablag‘lar o‘tkazilib, jami 4 ming 174 nafar yoshlarimizga 16 turdagi yo‘nalishlar bo‘yicha 4 mlrd 855 mln 195 ming so‘mlik yordamlar ko‘rsatilgan.

Bunga misol sifatida 671 nafar yoshlarga 1,3 millard so‘m professional va Oliy taʼlim muassasalariga to‘lov kontrakti summasining 50 foizgacha bo‘lgan qismi, 176 nafar yoshlarga zamonaviy kasblarni o‘rganishlari uchun 570,9 mln so‘m, 333 nafar yoshlarni davolanish xarajatlari uchun 639,9 mln so‘m, 95 nafar yoshlarga 604,5 mln so‘mlik safarbarlik chaqiruvidagi rezerv xarajatlari to‘lab berilgan.

Bundan tashqari tumandagi 1 894 nafar ishsiz, 1 672 nafar maktab bitiruvchilaridan ish izlab doimiy daromadga ega bo‘lish maqsadida mehnat bozoriga kirib kelgan jami 3 566 nafar uyushmagan daromad manbasiga ega bo‘lmagan yoshlarimizni, bandligi taʼminlangan. 

Ishsiz yoshlarni bandligini taʼminlashda doimiy ish o‘rinlariga joylashtirish orqali 453 nafar, tadbirkorlik subyektlari tomonidan yangi loyihalar tashkil etish orqali 249 nafar, 115 nafar yoshlarga o‘z tadbirkorligini yo‘lga qo‘yishlari uchun 2 mlrd 343 mln so‘mlik imtiyozli kreditlar, 257 nafar yoshlarimizga 154 mln so‘mlik subsidiyalar va 161 nafar yoshlarga 40 ga er maydonlari ajratish orqali bandligi taʼminlanib, yoshlarning doimiy daromad manbasiga ega bo‘lishlariga erishildi.

Yoshlarni bo‘sh vaqtlarini mazmunli tashkil etishda tumanda “Besh bosqichli besh tashabbus” olimpiadasining 1-2 mavsumlarida mahalla, sektor, tuman, viloyat, Respublika bosqichlariga 14-30 yoshdagi jami 29 863  nafar yoshlarimiz madaniyat, sanʼat, axborot texnologiyalari va sport musobaqalariga jalb qilinib, viloyat bosqichi musobaqalarida jami 22 ta o‘rinlar (1-o‘rin 9 ta, 2-o‘rin 5 ta, 3-o‘rin 8 ta,) qo‘lga kiritilgan bo‘lsa, Respublika bosqichida 3 ta yo‘nalish bo‘yicha 3 ta o‘rin (1-o‘rin 1 ta, 2-o‘rin 2 ta,) qo‘lga kiritildi.

Yoshlarimizning doimiy tarzda sport bilan shug‘ullanishi va ularni chiniqtirish uchun ham keng imkoniyatlar yaratilgan, tumanda 1 ta sport maktabi mavjud bo‘lib, jami 53 nafar ishchi xodim faoliyat ko‘rsatib kelmoqda, shundan 39 nafari trener-o‘qituvchi, 14 nafari oliy maʼlumotli, 12 nafari tugallanmagan oliy, 9 nafari o‘rta-maxsus, 11 nafari oliy toifali, 4 nafari birinchi toifaga ega.

2023 yil davomida sport maktabida 3 nafar sport ustasi, 2 nafar sport ustaligiga nomzod, 131 nafar sportchi o‘quvchi yoshlar unvonli va o‘smirlar hamda kattalar sport razryadlarni qo‘lga kiritishdi va 3 nafar yoshlar Osiyo chempionatlarida yuqori natijalarga erishilgan.

Muhtaram Prezidentimizning topshiriqlariga asosan yoshlar bandligini taʼminlash va ularni dehqonchilik bilan shug‘ullanishi uchun tuman hokimligi zaxirasidan jami hisobda 711,6 gektar er maydoni 1 541 nafar ajratilishi rejalashtirmoqda. Ayni kunlarda dehqonchilik qilish istagidagi mehnatkash yoshlarga yer ajratish ishlari davom etmoqda.

Сўнгги йилларда мамлакатимизда кўкаламзорлаштириш, ўсимликларни муҳофаза қилиш ҳамда яшил майдонларни кенгайтириш борасида кенг кўламли ишлар амалга оширилмоқда.

Кўчат экиб, боғ яратиш – халқимизнинг азалий қадриятларидан бири. Зеро, ўзимиз яшаб турган жойни ободонлаштириш ва кўкаламзорлаштириш туфайли кўнглимиз шодликка тўлади, турмушимиз файзли ва фаровон бўлади.

Айни чоғда боғлар, кўчалар ҳамда йўл четларида яшнаб турган дарахтлар теварак-атрофга кўрк улашиши баробарида ҳаво мусаффолигини таъминлаб, дастурхонимизни мевалар билан тўлдиради.

Дарахтларга меҳр бериш, уларни парваришлаш энг эзгу ва хайрли амал саналади. Кўчат экиб, боғ яратиш, атроф-муҳитни тоза ва озода сақлаш халқимизнинг асрлар синовидан ўтган миллий қадриятидир. Зеро, аждодларимиз оилада янги туғилган фарзандга атаб ерга ниҳол қадаган. Ўша дарахт билан бирга фарзанд ҳам улғайган.

Демак, халқимизнинг  ибратли ўтмиши ўзимиз яшаётган муҳитда табиатга оқилона муносабатда бўлиб, уни асраб авайлаш, келгуси авлодлар ҳам яшаши учун қулай макон барпо этишга ундайди.

Муҳтарам Президентимизнинг жорий йилнинг 29 октябрь куни бўлиб ўтган йиғилишда “Яшил макон” умуммиллий лойиҳасини амалга ошириш борасида берган кўрсатмалари ана шундай эзгулик йўлидаги жуда ҳам муҳим ташаббусдир.

Президентимиз раислигида «Яшил макон» умуммиллий лойиҳасини амалга ошириш бўйича 2024 йилдаги устувор вазифалар юзасидан бўлиб ўтган йиғилишда бу борадаги ишларни кенгайтириб, “Яшил макон” умуммиллий лойиҳаси доирасида жорий йил 2024 йил баҳор ойида 10 миллион 174 минг дона, куз ойида 6 миллион 130 минг 500 дона дарахт кўчатлари экиш вазифаси белгилаб берилди.

Шунингдек, ушбу йиғилишда «Яшил макон» умуммиллий лойиҳаси бир йиллик тадбир эмаслиги, келгуси беш йилда

80 миллион туп дарахт кўчатини экиш мақсад қилингани таъкидланди.

«Яшил макон» умуммиллий лойиҳа амалга оширилиши ҳар бир ҳудуднинг иқлимига мос, кам сув талаб қиладиган кўчатларни танлаб уларни етиштириш учун кўчатхоналар кўпайтирилиши айни муддаодир.

Қайд этиш керакки, жорий йилнинг баҳор ойларида маҳаллаларда, фермер ва деҳқонларимиз далалари четларига ва аҳоли томорқаларида 10 миллион 469 мингдан зиёд кўчат экилди. Албатта, бу савобли ишларда кўплаб ташкилотлар, маҳаллалар, умуман, кенг жамоатчилик қатори Сиз меҳнаткаш деҳқон ва фермерларимизнинг ҳам муносиб улуши бор.

Ҳурматли фермерлар!

Сиз ҳам далангиз четидаги бўш ерларга тут, ток ва бошқа дарахт кўчатлари экиб “Яшил макон” умуммиллий лойиҳасига ўз ҳиссангизни қўшинг.

Бунинг учун  вилоятмиздаги кўчат етиштирувчи фермер, деҳқон  хўжаликларида ва томорқа ер эгаларида 7 миллиондан зиёд тут, ток, тол, ёнғоқ ва бошқа дарахт ниҳоллари мавжуд.

Сиз улар билан ҳамкорлик қилсангиз, вилоятимиз яшиллик оламига ўзингизнинг муносиб ҳиссангизни қўшган бўласиз.

Меҳнаткаш деҳқонлар!

Муҳтарам Президентимизнинг алоҳида қарорлари билан жорий йилдан бошлаб пахта-ғалладан бўшаган майдонлардан деҳқон хўжаликлари учун ер ажратилиб, Сизлар бу ерлардан самарали фойдаланиб, юқори даромад олишни бошладингиз.

Сизлар ҳар бир қарич ердан унумли фойдаланган ҳолда “Бир контур-бир маҳсулот” тамойилини амалга ошириш доирасида дала четига ва кўча бошига  тут, ток ва бошқа кўчатларини экишни ташкил этишга чақирамиз.

Муҳтарам томорқачилар!

Вилоятимиздаги 819 та маҳалла фуқаро йиғинларида

611 мингдан зиёд томорқа ер эгалари фаолият юритади.

Натижалар ҳисоб-китобларда аниқ кўринади. Агар ҳар бир томорқачи ўз томорқасига, маҳалла гузарига ва кўча бошига 10 тупдан кўчат экса, вилоятимиз бўйича 100 минг туп кўчат экилади. Бундай саховатпешалик билан қилинган ишларингиз таҳсинга сазовор бўлади!

Сизларга тут, ток ва бошқа кўчатлар керак бўлса туманлардаги фермер, деҳқон хўжаликлари ва томорқа ер эгалари кенгашларига мурожаат этишингиз мумкин.

Айни пайтда вилоятимизда 7 миллиондан зиёд ток, тут ва бошқа мевали дарахт кўчатлари заҳираси яратилган, ушбу кўчатларни харид қилиб, маҳаллангиз гузарига ва кўча бошларига ҳамда томорқангизга экиб обод қилишга чақирамиз.

Ҳурматли туман кенгаш раислари!

Фермер, деҳқон хўжаликлари ва томорқа ер эгаларига сифатли кафолатланган тут, ток ва бошқа кўчатлар билан таъминлаш юзасидан маълумотлар бериб боринг.

Фермер, деҳқон хўжаликлари ва томорқа ер эгаларига кўчатлар харид қилиш бўйича Кенгаш ҳузуридаги Жамғарма маблағларидан имтиёзли кредитлар бериш бўйича тушунтириш ишларини ташкил қилингизлар!

Туман ҳокимликлари билан биргаликда дарахтларни парваришлаш, суғориш, зараркунандалардан ҳимоя қилиш борасида тизим яратиш бўйича ишларни ташкил этишда фаол иштирок этинг;

Кўчатларни етказиб бериш ва нарх-навонинг барқарорлигини таъминлаш мақсадида вилоятимиз туманларида етиштирилган ток, тут ва бошқа мевали дарахт кўчатларини фермер, деҳқон хўжаликлари ва томорқа ер эгаларига тизимли етказиб бериш бўйича ҳар бир туман марказларида кўчат сотиш ярмаркалари ва савдо расталарини ташкил этинг.

Ҳурматли ва азиз фермерлар, деҳқонлар ҳамда томорқа ер эгалари!

Сизларни вилоятимизнинг юксак ишончини оқлаб, мамлакатимиз ва вилоятимиз равнақи ва фаровонлигига муносиб ҳисса қўшиш учун фаол иштирок этиб тут, ток ва бошқа дарахт кўчатлари экишга чақирамиз!

Бу билан сиз халқимизга хос эзгу фазилатларга ўзингизнинг муносиб ҳиссангизни қўшган бўласиз! Зеро, нафақат ҳовли ва уйларимиз мана шу, маҳалла, шаҳар, туман ва мана шу ватан ҳам ўзимизники. Унинг озодалиги ва кўркамлигига барчамиз масъулмиз.

Ватанимиз ободлигига ўз ҳиссамизни қўшайлик!

Қашқадарё вилоят фермер, деҳқон хўжаликлари ва томорқа ер эгалари кенгаши

Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ-6013-сонли Фармони 3-бандига асосан Коррупцияга қарши курашиш агентлиги жойларда коррупциянинг олдини олишга қаратилган ҳудудий дастурлар ишлаб чиқиши ва амалга оширилишини ташкил этиши белгиланган. Мазкур Фармон талабларининг ижросини таъминлаш мақсадида Коррупцияга қарши курашиш агентлиги ва Қашқадарё вилояти ҳокимлиги ўртасида Қарши туманида “Коррупциясиз ҳудуд” лойиҳасини амалга ошириш бўйича 28 та чора-тадбирлардан иборат “Йўл харитаси” тасдиқланган.

Бунга кўра, қишлоқ хўжалигига мўлжалланган ер майдонларидан фойдаланишда коррупциявий ҳолатларнинг олдини олиш, тадбиркорлик ва шаҳарсозлик фаолиятини амалга ошириш учун мўлжалланган ер майдонларидан фойдаланишда коррупциявий ҳолатларнинг олдини олиш мақсадида туман ҳокимлиги давлат мулки сифатида давлат рўйхатидан ўтказилган ер майдонларини қишлоқ хўжалиги корхонаси ёки деҳқон хўжалиги ташкил этиш учун очиқ электрон танловга чиқариш бўйича лойиҳалар ишлаб чиқилди.

Давлат ва маҳаллий бошқарув органларига ишга қабул қилиш жараёнини ва Давлат ва маҳаллий бошқарув органларида ишловчи ходимларнинг бошқа тадбиркорлик субъектларида фаолият юритиш ҳолати ҳам ўрганилди.

Қарши туман Камбағалликни қисқатириш ва бандликка кўмаклашиш Давлат меҳнат ҳуқуқ инспектори томонидан туманда фаолият кўрсатиб келаётган 7 та бюджет ташкилотларига текшириш ўтказилиб аниқланган хато ва камчиликлар юзасидан Ўзбекистон Республикасининг МЖтК нинг 49-моддаси 1-қисми бўйича 15 млн 600 минг сўм жарима қўлланилди. Мисол учун Қарши туман тиббиёт бирлашмаси масъули Т.Шга 3.0 млн сўм, Қарши туман Йўл қурилиш бўлими ходими Қ.Сга нисбатан 1 млн 650 минг сўм жарималар қўлланилган.

Тадбиркорлик ва шаҳарсозлик фаолиятини амалга ошириш учун мўлжалланган ер майдонларидан фойдаланишда коррупциявий ҳолатларни олдини олиш, маҳаллий аҳамиятга молик объектларни қуришга доир шаҳарсозлик ҳужжатларини ишлаб чиқиш бўйича буюртмачи вазифаларини бажариш ва бу обектларнинг молиялаштирилишини таъминлаш, маҳаллаларда йўл-транспорт ва муҳандислик-коммуникация тармоқларини, ижтимоий соҳа ва бошқа инфратузилма обектларини қуриш-таъмирлаш ишларининг манзилли дастурига мувофиқ объектларнинг лойиҳа смета ҳужжатлари ишлаб чиқилишини таъминлаш маҳаллий ички автомобил йўлларини ва транспорт коммуникация тизимини таъмирлаш, ичимлик суви ва оқава сув таъминотини яхшилаш, электр энергияси ва газ таъминоти ҳамда кўчаларни ёритиш тизимини тиклаш, иссиқлик тармоқларини модернизация қилиш, маҳалла аҳолисининг фаровон турмуш кечириши учун муносиб шароит яратиш мақсадида ижтимоий ва муҳандислик инфратузилмаларини сақлаш ва асраб-авайлаш бўйича ўрнатилган тартибда тегишли чора тадбирлар белгиланган.

Умуман олганда Ўзбекистон Республикаси Коррупцияга қарши курашиш агентлиги билан ҳамкорликда туман хокимлиги, туман Адлия бўлими, тумандаги ҳуқуқни мухофаза қилувчи органлар, барча ташкилот ва корхоналар, МФЙлар ва жамоат ташкилотлари билан биргаликда Қарши туманида “Коррупциясиз ҳудуд” лойиҳаси доирасида ишлар олиб борилмоқда ҳамда туманимизни Коррупциядан ҳоли туманга айлантириш мақсадида барча зарурий чоралар кўрилмоқда.

Фейсбукда тарқатилган "Янги боғобод" МФЙ ҳудудида чиқинди ташиш техникалари ярим ойда бир маротаба хизмат кўрсатаётганлиги бўйича танқидий фикрлар юритилган.

Ушбу ҳолат туман ҳокимлиги масъули Даврон Абдурашидов тегишли масъуллар билан боғланиб, вазият ўрганилганда чиқинди ташиш техникалари ҳаракатланиш графигига асосан хизмат қилиб келаётганлиги аниқланган. Мурожаатларнинг асосли эканлиги “Қарши - эко ҳаёт” МЧЖ га тушунтирилиб, маҳаллага чиқинди ташиш техникалари қатнови сони ортиши бўйича кўрсатма берилди.

Қарши тумани ҳокимлиги ахборот хизмати.

Ассалому алайкум, азиз туманимиз аҳолиси!

Ҳаммамизга маълумки, жорий йилнинг 9-10 январь кунлари Ўзбекистон ҳудудига Россиянинг Европа қисмида шаклланган совуқ ҳаво оқими кириб келиши билан кўплаб ҳудудларда қалин қор ёғди.

Совуқ ҳарорат ҳозирга қадар аста-секинлик билан чекинишда давом этмоқда. Юртимизга кириб келган ушбу совуқ иқлим сабабли Қарши тумани ва қолаверса бутун Ўзбекистоннинг барча ҳудудларида совуқ тушиши билан аҳолининг газга бўлган талаби ошиши натижасида газ босими кескин пасайиб кетди. Газ босимининг пастлиги боис аҳолининг электр энергияга бўлган талаб ва эҳтиёжи ошиб кетмоқда. Юзага келган электр энергия ва газ инқирозини юмшатиш учун аксарият саноат корхоналари ва газ қуйиш шахобчалари фаолиятига чеклов ўрнатилди.

Вужудга келган электр-энергия ва газ таъминотидаги узилишлар, шунингдек, бошқа аниқланган носозликларни тезкор бартараф этиш бўйича мутасадди корхона ҳамда ташкилотлар мутахассислардан (туман газ корхонаси – 75-572-20-56, туман электр тармоқлари – 75-572-14-63, туман сув таъминоти – 75-572-15-36, туман маҳалла бўлими – 75-572-10-43) иборат бўлган “Тезкор штаб” (75-572-11-21) тузилиб, хизмат кўрсатиш бўйича ташкил этилган штабнинг телефон рақамлари туман ҳокимлигининг ижтимоий тармоқларида ёритилди.

Туман Ички ишлар бўлимида ташкил этилган “Тезкор штаб”да узлуксиз туну-кун 24 соатлик хизмати амалга оширилиб, маҳаллаларда содир бўлган газ ва электр таъминоти билан боғлиқ аварияларини бартараф этиш ҳамда оғир аҳволда қолган хонадонларга ёрдам бериш тизими йўлга қўйилди.

Фуқароларнинг газ, электр-энергияси таъминоти ва кўмир ёқилғисини етказиб бериш бўйича мурожаатлари тезкорлик билан ишчи гуруҳи томонидан ўз ечимини топмоқда. Қолаверса, тумандаги 58 та маҳалла фуқаролар йиғинида етарли миқдорда кўмир захиралари мавжуд бўлиб, ҳозирги кунда жамғарилган кўмир ёқилғисидан эҳтиёжманд оилаларга етказиб берилмоқда.

Ҳурматли туманимиз фуқаролари!

Туманимизда табиий газ таъминоти Қарши-Ғузор йўналишидаги 6 км да “АГРС-1” тармоғи орқали етказиб берилмоқда. Бу туманнинг марказигача 19 км масофани ташкил этади. Аномал иқлим ўзгариши, яъни ҳаво ҳароратининг кескин 20-22 даража совуқ тушиши ҳолати яқин йиллар давомида такрорланмаганлигини ҳамда бугунги кунда об-ҳавонинг кескин совиб кетиши натижасида темир қувурларидаги табиий газ оқимининг ҳаракатланишига салбий таъсир кўрсатиб газ босими пасаймоқда ва газга бўлган талаб ортиб бормоқда.

Аҳоли уй-жой хонадонларни иситиш мақсадида электр-энергиясидан фойдаланмоқда. Электр-энергиясининг белгиланган кучланиш режасига нисбатан қувватнинг ортиб бориши оқибатида электр-энергия етказиб берувчи электр станцияларда авария ҳолатлари вужудга келмоқда. Қиш мавсумини беталофат ўтказиш ҳамда аҳолини ҳозирги кундаги электр-энергиясига нисбатан бўлган юқори талабини инобатга олиб, ҳудудлар кесимида белгиланган вақтбай чекловлар ўрнатилган. Бу албатта ҳар биримизга ноқулайликларни келтириб чиқармоқда.

Шу боис, Сизлардан барча чекловларни тўғри қабул қилишингизни сўраб қоламан!

Ўз навбатида, мен ва сектор раҳбарлари ҳамда тегишли идоралар билан ҳамкорликда зиммамизга юклатилган жавобгарликни тўла ҳис этиб, халқимизнинг тинч ва осойишта ҳаёт кечиришлари учун доимий хизмат қиламиз.

Ҳурматли нуронийлар, ҳожи оталар, ҳожи оналар, оқсоқоллар, ака-укалар ҳамда опа-сингиллар!

Юзага келаётган муаммоларни бартараф этишга, иситиш учун фойдаланиб келаётган ҳар хил турдаги иситиш мосламаларидан белгиланган техник хавфсизлиги қоидаларига риоя қилиб ишлатишингизни ҳамда табиий газ ва электр энергия ресурсларидан самарали фойдаланиб, ис гази, ёнғин ва бошқа фавқулоддаги вазиятларни олдини олиш бўйича оиламизга тарғиботлар ўтказишни илтимос қилиб қоламан.

Иссиқ кунлар олдинда, туманимизни аҳил фуқаролари билан синовли кунларни ҳам ортда қолдирмоқдамиз.

Халқимизнинг ўзаро бир-бирларига бўлган ишонч ва садоқатлари, меҳр-мурувватларининг самимий бўлиши юртимиздаги осойишта ҳаёт ва тинчликнинг самарасидир. Юртимиздаги ана шу хотиржамлик ва барқарорлик неъматларига чин маънода шукрона қилиш ва унинг қадрига етиш керак.

Бир неча кунлик табиатнинг қиш мавсумидаги иқлим ўзгаришидан, яъни бу синов давридан эсон омон ўтишимизга Аллоҳнинг ўзи қўлласин.

ҚАРШИ ТУМАНИ ҲОКИМИ
Б.ЮСУПОВ.

Ижтимоий тармоқлар орқали тарқатилган Қарши тумани Мирмирон маҳалласи "Обод маҳалла" дастури доирасида бажарилаётган ободонлаштириш ва бунёдкорлик ишлари "Зиёли" кўчасига етиб бормаганлиги бўйича қилинган мурожаатлар туман ҳокими ўринбосари томонидан жойига бориб ўрганилган.

Ўрганишлар давомида қайд этилишича, "Мирмирон" МФЙ Зиёли кўчаси саноат зонаси ҳудудида, бир томондан темир-бетон ишлаб чиқарувчи завод, иккинчи томонида эса вилоят Наркология шифохонаси жойлашган. Уй-жойлар мавжуд кўчаларнинг 800 метр қисми қум-шағал аралашмаси билан таъмирланган. Шунингдек, Зиёли кўчасининг 250 метр узунликдаги таъмирталаб ички йўли цемент-бетон қопламаси билан таъмирланиши 2023-йил дастурига киритлди.

Шунингдек, ижтимоий тармоқ фаоли Дилшод Набиев томонидан эълон қилинган Жаннатмакон кўчасида “Обод қишлоқ” дастури доирасида бажарилган ишлар чала ташлаб кетилганидан шикоят қилинган мурожаат тезда ўрганилиб, сув ўтказиш қурилиш ишлари якунланди. Ҳозирда ички йўлни таъмирлаш ишлари олиб борилмоқда.

Каналга уланиш: 👉@qarshitumaniuz