Болмады ҳеш жалыныш,
Сынап-минеп, ҳал салыў.
Енди бәри - сағыныш,
Енди бәри – тамсаныў.

Еркин еди шабыспа,
Шаршаў да жоқ жолдағы.
Болмады аяқ шалыспа,
Адасыў да болмады.

Ықты бизди дарға алып,
Ескексиз я желқомсыз.
Кеўил деген дәрьялық
Ағып турды селтеңсиз.

Гә лаўладық жалындай,
Түспеди ҳеш ким үскини,
Енди бәри сағымдай,
Енди бәри түс киби.

Гейде ақыл қонбады,
Жөн айтқанды қас уқтық.
Әрманымыз сондағы:
Үлкейсек деп асықтық.

Шынлық пенен жалғаны
Өмирден дәм татады.
Балалықтың қалғаны-
«Барса келмес» атаўы.

Болмап еди аўдаңлаў,
Болған емес бузылыў.
Енди бәри - әрманлаў,
Енди бәри – қызығыў.

Болған менен жол тәўир,
Еттик талай салақлық.
Енди бизге ол дәўир
Болып қалды сабақлық.

Ашамыз да бир бетин,
Шыжбайлаймыз тахтаны.
Тыңламаса перзентиң,
Өзимизге тартқаны.

1986-ж.

@Kitap_me - onlayn kitapxana.

Бул халқым майда ма, ири ме?
Ана тил керек ғой тириде.
Ҳәммесин бағышлап кетермен,
Ана деп айттырған тилиме.

Миллетке тийдирмең бир ушын,
Досларым, тил керек тири ушын.
Өзимди қурбанлық етермен,
Ата деп айттырған тил ушын.

Ана тил-әрманым аңсаған,
Ләззети дәрьядай мол сағам.
Усы тил болмаса, қалайша
Перзентим дер едим мен саған…

@Kitap_me - onlayn kitapxana

Маған қанат байлап әжеп жайлары,
Сыңғырлап суў аққан жалға-сайлары,
Атландырып жаслығымның майданы,
Мен уштым асығып саған, әй, Ўатан!

Қанша узақ кетсем сеннен жыраққа,
Шерли қосықларың жетер қулаққа.
Әрмансыз аўнаўға ана-топыраққа,
Мен уштым асығып саған, әй, Ўатан!

Шертиўди сағындым Бердақ дуўтарын,
Шапсам Әжинияздың қосық тулпарын,
Көрип шарықлаған Аббаз суңқарын,
Мен уштым асығып саған, әй, Ўатан!

Бәҳәриң излесе жылдың қуслары,
Оларға парқсыздур жол алыслары...
Көкирекке сыймас ел толғаныслары,
Мен уштым асығып саған, әй, Ўатан!

Гул былғап шақырар мухаббат бағым,
Маўқымды баса алмас жазған хатларым,
Еситтирмең айралықтың атларын,
Мен уштым асығып саған, әй, Ўатан!

@Kitap_me - onlayn kitapxana.

Адамлар бар, күлим қаққан хош қылық
Адамлар бар, жасатады өш кылып.
Бириншиси-бул дүньяның сүйеўи
Екиншиси-бул дүньяның шүйели.

Адамлар бар, қуўаныштан жылайсан
Адамлар бар, жүрген жери ылайсан.
Бириншиси-бул дүньяның шырайы
Екиншиси-бул дүньяның ылайы.

Адамлар бар, баҳа таўып бергисиз
Адамлар бар, көзин қайта көргисиз.
Бириншиси-бул дүньяға салтанат
Екиншиси-бул дүньяға жарғанат.

Адамлар бар, қуштар етер өмирге
Адамлар бар, асықтырар өлимге.
Бириншиси-бул дүньяға муҳаббат
Екиншиси-бул дүньяға гүлли апат.

Адамлар бар, көзге түсер алыстан
Адамлар бар, ата менен алысқан.
Бириншиси-бул дүньяның таўы ғой
Екиншиси-бул дүньяның жаўы ғой.

Адамлар бар, дуўа оқыйсан ҳаққына
Адамлар бар, түн әкелер жақтыға.
Бириншиси...екиншиси... баршылық
Бул дүньяда болған емес таршылық.

@Kitap_me - onlayn kitapxana.

Ҳақыйқатлық болмас мазалы,
Қай жерде де болар жазалы.
Жалғанлықлар қулатыў ушын
Жолларына орлар қазады.

Ҳақыйқатлық аршыл болады,
Жақсы затқа жаршыл болады.
Сапарларда тулпарларыңа да,
Өзиңе де қамшы болады.

Бүгип қалсаң ишиңде оны,
Жақсылыққа апармас соңы.
Ҳақыйқаттан жүзиңди бурма,
Тикенекли болса да жолы.

Шынлық пенен жасайды заман,
Шынлық пенен даңқ келер саған.
Бул дүньяда барман демесин,
Ҳақыйқатшыл болмаған адам.

Мейли, шайыр, журналистписен,
Достым, мениң гәпиме исен:
Шынлық пенен ашырқап жаса,
Жалған менен толғанша кисең….

@Kitap_me - onlayn kitapxana.

Көзинше қанша мақтады,
"Айрықша туўған дана" деп,
Кеткеннен кейин жақпады,
"Ақмақлығын қара" деп.

Берип түрли тамақты,
Сыйлаўдан әрман қалған жоқ,
Кеткен соң сөкти қонақты,
Жақсы атақ алған жоқ.

Ҳәмелиң барда мақталып,
Күншиллик жағы тағы бар,
Бәрин де билер ҳақ ҳалық,
Қуласаң жала жабылар.

@Kitap_me - onlayn kitapxana

Болса шамның санасы,
Өртемec eди ашығын.
Сен де байқап қарашы,
Мухаббаттың басымын.

Маған басқа не керек? —
Келдим сендей еркеме.
Сен — шам, мен — бир гүбелек,
Ашығыңды өртеме!

@Kitap_me - onlayn kitapxana.

От ышқында жанып күйдим шоқ болып,
Бул дүньядан кетсем де мен жоқ болып,
Муҳаббаттың күйигинен айырсаң,
Шығар едим саған дəри шөп болып...

@Kitap_me - onlayn kitapxana.

Taw bar jerde, bulaq bar 
Kóz bar jerde qulaq bar. 
Qulaq bar jerde, kóz bolar 
El bar jerde, sóz bolar. 
Molla bar jerde, quran bar 
Uris bar jerde, qural bar 
Paxta bar jerde, shigit bar 
Qiz bar jerde, jigit bar. 
Kól bar jerde, baliq bar 
Suw bar jerde, xaliq bar . 
Kún bar jerdiń túni bar 
El bar jerdiń mini bar . 
Suwiǵi bolar issiniń 
Oylap qarań qis kúnin. 
Bilgir bar jerde, nadan bar 
Jaqsı bar jerde, jaman bar 
Jorǵa bar jerde, jortaq bar 
Batir bar jerde, qorqaq bar . 
Qosshi bar jerde, basshi bar 
Dushshi bar jerde, ashshi bar . 
Toy bar jerde, jiraw bar 
Ólim bar jerde, jilaw bar . 
Qilmis bar jerde, jaza bar 
Jan bar jerde qaza bar 
Quwanish penen uwayim - 
Egiz tuwǵan aǵayin. 

@Kitap_me - onlayn kitapxana.

@Kitap_me - onlayn kitapxana.