Афғонистоннинг собиқ президенти Ашраф Ғани бир йил аввал “Толибон”* томонидан мамлакат президенти камситилиши ва янги ҳукуматни қонунийлаштирадиган ҳужжат имзолашга мажбурланишига йўл қўймаслик учун Афғонистондан қочиб кетган. Бу ҳақда унинг ўзи маълум қилди.
⠀
“Толибон”* ўтган йилнинг 15 августида Кобулга кириб, Афғонистонни назорат остига олди. Шундан сўнг мамлакатни тарк этган Ғани тўсатдан кетиб қолгани учун танқид қилинди.
⠀
“Кетишимга сабаб, мен “Толибон”* ва уларнинг тарафдорларига Афғонистон президентини яна бир бор ҳақорат қилиш ва ҳукуматнинг қонунийлиги ҳақидаги ҳужжатни имзолашга мажбур қилиш завқини беришни истамаганим эди. Мен ҳеч қачон қўрқмаганман”, - деди Ғани CNN телеканалига берган интервьюсида.
⠀
Афғонистон собиқ президентининг сўзларига кўра, дастлаб у мамлакатни тарк этиш ниятида бўлмаган. Ғани кетаётганда паспорти ёнида бўлган-бўлмагани ҳақидаги саволга ҳам рад жавобини берган. У, шунингдек, катта миқдорда пул олиб қочиб кетгани ҳақидаги хабарларни рад этган.
⠀
2021 йил август ойи бошида “Толибон”* афғон ҳукумат кучларига қарши ҳужумни кучайтириб, 15 август куни Кобулга кириб келди ва эртаси куни уруш тугаганини эълон қилди. Август ойининг сўнгги икки ҳафтасида АҚШ ҳарбийлари ҳимоясида бўлган Кобул аэропортидан Ғарб фуқаролари ва улар билан ҳамкорлик қилган афғонлар оммавий эвакуация қилинган эди. 31 августга ўтар кечаси америкалик ҳарбийлар Кобул аэропортини тарк этиб, АҚШнинг Афғонистондаги қарийб 20 йиллик ҳарбий иштирокига якун ясади.
⠀
* Ҳаракат террорчилик фаолияти учун БМТ санкцияси остида

Тошкент шаҳри Яшнабод туманида аҳолига комплекс хизмат кўрсатадиган ипотека маркази очилди. Шавкат Мирзиёев Тошкент ипотека марказини бориб кўрди.

Қайд этилишича, янги ташкил этилган марказда ипотека бозоридаги таклифлар умумлашган ва шаффоф тизим йўлга қўйилган.

Ташриф буюрувчиларга пойтахтда қурилаётган уйлар, уларга хизмат кўрсатадиган банклар, ипотека кредитлари шартлари ҳақида батафсил маълумотлар берилади.

Олди-сотди, гаров ва ипотека кредити шартномаларини расмийлаштириш тартиби, уй-жойга бўлган ҳуқуқни давлат рўйхатидан ўтказиш масалаларида ҳам ёрдамлашилади. Энг муҳими, барча хизматлар бир жойда кўрсатилади.

Марказда қурилиш ва девелопер компаниялар ўз офисларини ташкил этган. Харидорлар учун барча шароитлар яратилган.

Президент минглаб одамлар томорқа учун ипотекадан фойдалана олмаётганига эътибор қаратиб, мутасаддиларга бу бўйича кўрсатмалар берди.

Маълумот учун, жорий йилда ипотека кредитлари учун тижорат банкларига бюджетдан 13 трлн сўм ажратилиши кўзда тутилган. Лекин олти ойда аҳолига бу маблағларнинг 30 фоизи берилган, холос.

Эслатиб ўтамиз, Тошкентда сўнгги ойларда бирламчи ва иккиламчи бозордаги уй-жойлар арзонлашди. Пойтахтда кўчмас мулк бозорида олди-сотди шартномалари сони шу йилнинг 7 ойи давомида салкам 49 мингтани ташкил этди.

Ўзбекистонда май ойидан бери бирламчи ва иккиламчи бозорда уйлар нархи тушиб келмоқда. Бу ҳақида Прогнозлаш ва макроиқтисодий тадқиқотлар институти хабар берди.

Қайд этилишича, 2021 йил августдан 2022 йил июлгача бўлган давр учун Тошкент шаҳрида уй-жой нархлари ўзгариши таҳлил қилинди.

Унга кўра, Тошкентда кўчмас мулк бозорида олди-сотди шартномалари сони шу йилнинг 7 ойи давомида салкам 49 мингтани ташкил этди.

Июль ойида пойтахтда эски уйлар нархлари ўтган йилнинг мос даврига нисбатан ўртача 12%га, янги уйлар эса 8.3%га ошди.

Уйлар нархи юқори туманлар:

Миробод, Яккасарой, Шайхонтоҳур, Мирзо-Улуғбек, Чилонзор ва Юнусобод туманалари. (янги уйлар - 1 м.кв. $957.2, эски уйлар - $888.3).

Уйлар нархи паст туманлар:

Бектемир ва Сергели туманлари.

Айтилишича, Тошкент шаҳри кўчмас мулк бозорида уй-жойга бўлган талаб деярли ўзгаришсиз қолган бир пайтда нархларнинг ошиши қурилиш компаниялари ва мулк эгаларининг инфляция ва сўм алмашув курси бўйича кутилмалари билан изоҳланиши мумкин.

Маълумот учун, мамлакатда январь-июль ойларида 41,44 минг кишига 7.6 трлн сўм миқдорида ипотека кредитлари берилди. Мазкур даврда жами ипотека кредитларининг 30.5% (2.32 трлн. сўм) Тошкент шаҳри ҳиссасига тўғри келади.

Украина зарбаларидан кейин шикастланган электр узатиш линиялари тикланди, ҳозирда Запорожье АЭС нормал ишламоқда. Бу ҳақда вилоят маъмурияти раҳбари Евгений Балицкийга таяниб, РИА Новости хабар берди.

“Ҳозир электр тармоқлари тикланди, шикастланган подстанция тикланди. Блоклар хавфсиз ҳолатда”, деди Балицкий.

Балицкийнинг сўзларига кўра, станцияни ҳимоя қилиш учун ҳаво ҳужумидан мудофаа тизимлари кучайтирилади.

Эслатиб ўтамиз, Украина Қуролли кучлари ҳужумидан кейин Запорожье АЭСнинг иккита энергоблоги тўлиқ қувват билан ишламаган. Аввалроқ ОАВда Украина Қуролли кучлари томонидан станциянинг доимий ўққа тутилиши глобал техноген фалокатга олиб келиши мумкинлиги ҳақида хабар берилган эди.

Тошкент шаҳар Чилонзор туманида шикастланган дарахтларни сақлаб қолиш эҳтимоли паст. Бу ҳақида Давлат экология қўмитаси матбуот котиби Бунёд Абдуллаев Sputnik мухбирига маълум қилди.

Куни кеча ижтимоий тармоқларда Чилонзор туманида дарахтлар шикастланиши юзасидан хабарлар тарқалди. Давлат экология қўмитаси ходимлари воқеа жойига чиқиб дастлабки ўрганиш ишларини амалга оширишди.

Аниқланишича, Чилонзор тумани, 1-мавзе, Чилонзор кўчаси йўлини реконструкция қилиш жараёнида умумий режалаштирилган 1,4 км йўл таъмирлаш лойиҳасининг 300 метр қисмида эски ирригация тармоқлар (лотоклар) олиб ташланиб, йўлни кенгайтириш ва сатҳини 1 метргача пасайтириш ишлари амалга оширилган.

Олиб борилган назорат ишлари натижасида қуйидагилар аниқланди:

— Жами 101 туп дарахт, шу жумладан, 92 туп эман, 1 туп чинор, 5 туп тут, 2 туп арча ва 1 туп мевали беҳи дарахтларининг илдиз қисми шикастланган.

— Диаметри 45 - 98 смгача бўлган 7 туп эман дарахтлари, жами 9 туп эман дарахтларининг илдиз қисмига жиддий шикаст етказилган.

— Қолган 90 дан ортиқ дарахтлар эса ўсишдан тўхтамайдиган даражада шикастланган.

“Тошкент ботаника боғи” илмий ходими тавсиясига биноан, илдиз қисмига жиддий шикаст етказилган 9 туп эман дарахтларини сақлаб қолиш қатор агротехник тадбирларни талаб этади.

Дарахтларни илдиз тизими жиддий шикастлантирилганлиги натижасида ўсимлик дунёсига 420 млн 450 минг сўм миқдорида зарар етказилган.

Аниқланишича, мазкур йўл қурилиш-таъмирлаш объекти бўйича қонунчиликда белгиланган тартибда Давлат экологик экспертиза хулосаси олинмаган. Мазкур ҳолат юзасидан барча ҳужжатлар прокуратура органларига тақдим этилди.

Маълумот учун, амалдаги қонунчилик талабларига кўра, қурилиш лойиҳаларни амалга оширишдан олдин экологик меъёрий лойиҳа ҳужжатлари ишлаб чиқилиши ҳамда мажбурий тартибда Давлат экологик экспертизасидан ўтказилиши белгиланган.

Мазкур ҳолат юзасидан Жиноят кодексининг 198-моддаси 3-қисми (Экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, дарахтларнинг нобуд қилиниши ортидан Ўзбекистон президенти топшириғи билан Тошкент шаҳар Чилонзор тумани ҳокими ва прокурори лавозимидан озод этилди. Шунингдек, масъулиятсизликка йўл қўйгани учун пойтахт ҳокими Жаҳонгир Ортиқхўжаевга ҳамда прокурори Улуғбек Қосимовга қаттиқ ҳайфсан берилди.

Ҳозирда Тошкент шаҳрида экологик рейд тадбирлари ҳам бошланди. Экологик назорат рейд тадбирларини самарали бир тарзда ўтказиш бўйича аниқ чора-тадбирлар белгиланган.

Касб-ҳунар мактабларига ҳужжатлар қабул муддати узайтирилди. Бу ҳақида Олий ва ўрта махсус таълим вазирлиги хабар берди.

Айтилишича, ҳужжатларни қабул қилиш муддати 15 августга қадар узайтирилди.

Ҳужжатлар kasb.edu.uz электрон платформаси орқали қабул қилинади.

Платформага киритиладиган ҳужжатлар:

– туғилганлик ҳақидаги гувоҳнома ёки ID карта маълумотлари;

– 3х4 ҳажмидаги фотосурат.

Маълумот учун, 2022/2023-ўқув йили учун 330 та касб-ҳунар мактабига жами 78 минг 490 та қабул параметрлари тасдиқланган.

Шундан, 75 470 та ўзбек, 930 та рус ва 2090 та қорақалпоқ тили гуруҳлари учун белгиланди.

Касб-ҳунар мактабларида ўқиш тўлиқ давлат бюджети ҳисобидан амалга оширилади.

Эслатиб ўтамиз, касб-ҳунар мактабларига ҳужжатлар қабули 1 июлдан бошланган.

Эндиликда кўп квартирали уйларнинг умумий мулки ҳудудида қўшимча объект қуриш тақиқланади. Бу ҳақида президент қабул қилган ПҚ–346-сонли қарорда назарда тутилган.
⠀
Ҳужжат билан 1 сентябргача муаммоли кредит қарзи бор уй-жой мулкдорлари ширкатининг (ЖЕК) бошқарув усулини ўзгартириш бўйича умумий йиғилиш қарори қабул қилинса, улар давлат томонидан қўллаб-қувватланади.
⠀
Бунда:
⠀
— Муаммоли банк кредитлари бор ширкатлар банкнинг хулосаси олинган тақдирда тугатилиши мумкин;
⠀
— Тугатилган ёки бошқариш усули ўзгартирилган ширкатлар бошқарувидаги кўп квартирали уйларни бошқариш учун, қоида тариқасида, рейтинги юқори бўлган бошқарувчи ташкилотлар жалб қилинади;
⠀
— Уй-жой коммунал хизмат кўрсатиш вазирлиги жалб қилинган бошқарувчи ташкилот фаолиятини, хизматлар сифатини 6 ой мониторинг қилади ва кўп квартирали уйларни бошқариш фаолиятини амалга ошириш қоидаларига риоя қилмаган бошқарувчи ташкилотларга чораларни қўллайди.
⠀
Шунингдек, 1 ноябрдан кўп квартирали уйларни бошқариш органлари бошқарув фаолиятини, улар электрон реестрга киритилгандан сўнг амалга оширади.
⠀
Уйларни қуриш лойиҳа ҳужжатларида, кадастр паспортида умумий фойдаланишдаги мулк рўйхати аниқ кўрсатилади.
⠀
Қурилиши тугалланган кўп квартирали уйларга рухсатнома берилганидан сўнг лойиҳа ҳужжатлари, кадастр паспорти ва мазкур рухсатномага умумий мол-мулкни камайтириш ва туташ ерда қўшимча объект қуриш учун ўзгартириш киритиш тақиқланади.

Сербия президенти Александр Вучич Россия Ташқи ишлар вазирлигига Косоводаги вазият кескинлашувида кўрсатган ёрдами учун миннатдорлик билдирди. Унинг сўзларидан РИА Новости иқтибос келтирмоқда.
⠀
Қайд этилишича, Вучич душанба куни кечқурун Бош штабга ташриф буюрган ва Косоводаги кескинлашув сабаб Сербия армияси қўмондонлиги билан суҳбатлашган.
⠀
“Мен айниқса Россия Федерацияси Ташқи ишлар вазирлигига нима бўлаётганини аниқ тушунгани ва жуда тўғри муносабатда бўлгани учун раҳмат айтмоқчиман”, - дея таъкидлаган у.
⠀
Шунингдек, Сербия президенти Европа Иттифоқи дипломатияси раҳбари Жозеп Боррель ва Европа Иттифоқининг бошқа вакилларига “тўғри муносабат” учун миннатдорлик билдирган.
⠀
Аввалроқ, Россия ТИВ расмий вакили Мария Захарова Приштинани провокацияларни бас қилишга ҳамда Косоводаги серблар ҳуқуқларини ҳурмат қилишга чақирганди.
⠀
6 июль куни Сербия президенти Александр Вучич Европарламент резолюциялари ва чақириқларига қарамай Белград ўзини ўзи эълон қилган Косово Республикаси билан ўзаро тан олиш тўғрисидаги битимни имзолашдан бош тортганини маълум қилди.

28 июль куни АҚШ президенти Жо Байден ва Хитой раҳбари Си Цзиньпин ўртасида телефон суҳбат бўлиб ўтди. Суҳбат 2 соат 17 дақиқа давом этди. Икки давлат етакчилари мулоқот чоғида Украина инқирози масаласига ҳам тўхталиб ўтди.

“Икки давлат раҳбарлари Украина инқирози ва бошқа масалалар юзасидан фикр алмашди. Си Цзиньпин бу масалаларда Пекиннинг принципал позициясини яна бир бор таъкидлади”, дейилади Хитой марказий телевиденияси хабарида.

Хитой Тайвандаги вазиятга ташқи кучларнинг аралашувини кескин қоралаган ва Байденга “олов билан ўйнашиш яхшимас”лигини айтган Унинг таъкидлашича, аҳолиси 1,4 миллиард кишидан ошган Хитой халқининг иродаси мамлакатнинг давлат суверенитети ҳамда ҳудудий яхлитлигини ҳимоя қилишда “мустаҳкамдир”.

“Биз айирмачилик ва “Тайвань мустақиллиги”, шунингдек, ташқи кучларнинг аралашувига қатъий қаршимиз. Халқ иродасига қарши бора олмайсиз, олов билан ўйнашган одам ўзини ёқиб юборади”, деган Си Цзиньпин Байденга.

Икки давлат раҳбарларининг суҳбати самимий ва пухта ўтган, томонлар алоқаларни давом эттиришга келишиб олган.

Ўзбекистонда йил якунигача 2,3 млн хотин-қизлар бирламчи онкологик скрининг текширувидан ўтказилади. Бу ҳақида Соғлиқни сақлаш вазирлиги хабар берди.

Айтилишича, шу йилнинг ўтган 6 ойида 643 минг нафар хотин-қиз скрининг текширувларидан ўтказилди. Касалликлар аниқланган 3 214 нафаридан 2 983 нафари соғломлаштирилди.
"Барча туғиш ёшидаги аёллларнинг ягона электрон базаси яратилади", дейилади хабарда.

Шунингдек, 18 ёшгача бўлган 11 млндан зиёд болаларни педиатр, стоматолог, эндокринолог ва ортопед кўригидан ўтказиш режалаштирилган.

Қуйидагилар бир қатор препаратлар билан таъминланади:

Йод препарати - 400 минг нафар ҳомиладор ва бола эмизувчи аёллар ҳамда 4 млн 3-15 ёшдаги ўғил-қизлар;

Темир ва фолий кислотаси препарати - 2 млн 15-35 ёшгача туғиш ёшидаги аёллар;

Спинал мушак атрофияси ташхиси қўйилган 75 нафар болага зарур дори воситалари етказиб берилади.

Шу йилнинг ўтган 6 ойида амалга оширилган ишлар:

Пренатал ультратовуш текширувидан ўтказилган 333,5 минг нафар бўлажак онанинг 7,9 минг нафарида ҳомиласида нуқсон ва акушерлик патологияси аниқланиб, зарур чоралар кўрилди;

Тошкент шаҳрининг барча туғуруқхоналарида чақалоқларда эшитиш нуқсонларини эрта аниқлашга қаратилган аудиоскрининг жорий этилди.

Қайд этилишича, шу йил 1 июлдан бошлаб болалар, ҳомиладор ва бола эмизувчи аёлларни махсус профилактик дори-дармонлар, 3-15 ёшдаги болаларни йод препарати билан бепул таъминлашга киришилди.

Республика “Она ва бола скрининги” маркази 38,4 млн сўмлик гематологик анализаторлар билан таъминланди.

Нукус, Бухоро, Самарқанд, Фарғона “Она ва бола скрининги” марказлари эса 1,1 млрд сўмлик рақамли микроскоплар ҳамда лаборатория ускуналари етказиб берилди.