👉 https://t.me/Sirdaryo

2018 yil 28 iyun kuni Sirdaryo viloyat Fermerlar uyushmasining “Anjumanlar zali”da O‘zbekiston Respublikasi Milliy gvardiyasi 86528 va 97948 harbiy qismlar shaxsiy tarkibi hamda viloyat axborot – kutubxona markazi bilan hamkorlikda harbiy xizmatchilarni oilalarining ijtimoiy himoyasini ta’minlash, ularga shart-sharoitlar yaratish hamda sog‘lom turmush tarzini targ‘ib qilish maqsadida “Sog‘lom oila – sog‘lom jamiyat” mavzusida davra suhbati bo‘lib o‘tdi.

Tadbirda O‘zbekiston Respublikasi Milliy gvardiyasi 86528 va 97948 harbiy qismlar shaxsiy tarkibi xodimlari va oilalari ishtirok etishdi. Tadbirni harbiy qism komandir o‘rinbosari M. Rahimov olib bordi. Tadbirga O‘zbekiston Respublikasi Milliy gvardiyasi 86528 va 97948 harbiy qismlar shaxsiy tarkibi boshqarma boshlig‘i D.Xusainov hamda viloyat “Oila” markazi rahbari S.Zunnunova tashrif buyurdi va ma’ruza so‘zladilar. Tadbirdan ko‘zlangan asosiy maqsad oilalarda yashovchi har bir oilalar bilan yaqindan tanishib borish, ularni sog‘ligidan habar olish, muammolarini o‘rganib borish va ularni muammolarini ko‘rib chiqib, yordam berishdir. Tadbirda so‘zga chiqqanlar yuqorida ko‘zlangan maqsadlar xususida fikr bildirishdi.

Shuningdek, tadbir davomida viloyat axborot – kutubxona markazi xodimi X.Riskulova so‘zga chiqib, sog‘lom oilarda sog‘lom muhitni shakllantirishda oilalarda kitobga mehr berish, oilada bolalarga alohida xona ajratish va albatta kichkina kitob javonini tashkil etish kerakligi xususida to‘xtaldi.

Tadbir so‘ngida viloyat axborot – kutubxona markazi xodimlari tomonidan “Yangi kelgan adabiyotlar” mavzusida ko‘rgazma tashkil etildi. Ushbu ko‘rgazmadan tadbir ishtirokchilari o‘zlariga kerakli adabiyotlar haqida ma’lumotlar ega bo‘ldi.

Tadbirda 62 kishi ishtirok etdi.

Sirdaryo viloyati axborot – kutubxona markazi

👉 https://t.me/Sirdaryo

✅ 2018 yil 3 iyul kuni Sirdaryo viloyati Yangiyer shahrida "Obod mahalla" dasturida belgilangan ishlar yuzasidan T.Malik mahallasida sektor rahbarlari yig'ilish o'tkazildi.

Yangiyer shahar hokimligi

👉 https://t.me/Sirdaryo

Guliston kompyuter va axborot texnologiyalari kasb-hunar kolleji bitiruvchilariga diplom topshirish marosimi bo'lib o'tdi.

Tadbirda Guliston shahar hokimi, sektor raxbari Dadaboyev To'lqin Tulanovich, shahar prokurori Bozorov Sarvar Tuxtamurodovich, Yoshlar ittifoqi shahar kengashi raisi Begzod Almamatov, ish beruvchi va hamkor tashkilotlar raxbarlari, matbuot hamda televideniya vakillari ishtirok etishdi.

Guliston kompyuter va axborot texnologiyalari kasb-hunar kolleji axborot xizmati

👉 https://t.me/Sirdaryo

O'zbekiston Xalq demokratik partiyasi Sirdaryo viloyat Kengashi raisi vazifasini bajaruvchisi Xolbek Jalolov Xalq deputatlari viloyat Kengashiga deputat etib saylangan kundan boshlab tinib-tinchigani yo'q. U doimo xalq bilan yanada yaqinroq bo'lishga, mamlakatimiz hayotida yuz berayotgan ijobiy o'zgarish va yangilanishlarni amalga oshirishda shaxsiy namuna ko'rsatishga harakat qilib kelmoqda. Jumladan, joriy yil boshidan shu kungacha unga o'ndan ziyod fuqarodan turli xil masalalarda yozma va og'zaki murojaatlar kelib tushgan bo'lsa, ulardan ettita masala ijobiy hal etildi. Qolganlari tegishli tartibda hal bo'lish arafasida turibdi.

Matbuot va ommaviy axborot vositalari xodimlari kuni arafasida O'zbekiston Xalq demokratik partiyasi viloyat va shahar Kengashlari xayrli tashabbus bilan chiqqanlari viloyatda faoliyat yuritayotgan ko'pgina jurnalistlarni behad suyuntirdi. Viloyat Kengash raisi vazifasini bajaruvchisi Xolbek Jalolov, shahar Kengashi raisi Vohidjon Xasanov boshchiliklarida bir gurux partiya faollari o'zlarining bir kunini ana shunday ezgu va savobli ishlarga bag'ishladilar. Ular dastlab O'zbekiston Yozuvchilar uyushmasi viloyat bo'limi mas'ul kotibi, O'zbekiston Jurnalistlar Ijodiy uyushmasi a'zosi, keksa jurnalist Hayotxon Ortiqboevani bayram bilan tabriklab, unga anvoyi guldasta sovg'a qildilar.

Hayotxon Ortiqboeva kutilmaganda partiya faollarining tashrifidan behad quvonib, ularga 1989 yilda “Guliston yangiliklari” - “Gulistanskie novosti” gazetalarining ochilishi, O'zbekiston Xalq demokratik partiyasi dastlabki oyoqqa turish tarixi haqida to'lqinlanib gapirdi. Shundan so'ng, mehnat faxriylari Abdujalil Umarov hamda Elmurod Mavlonovlarning xonadonlariga tashrif buyurilib, ularga bayram dasturxoni uchun oziq-ovqat mahsulotlari sovg'a qilindi.

— E'tibor uchun rahmat, — deydi mehnat faxriysi Abdujalil Umarov. – Biz keksalarni yo'qlab kelganingiz uchun behad mamnunman. Ilohim, Yurtimiz tinch, Yurtboshimiz omon bo'lsinlar.

Shuningdek, marhum, keksa jurnalistlar Saminjon Sultonov, Ergash Xalilov hamda Abdurahmon Eshpo'latovlar xonadonlarida bo'lishib, o'tganlar ruhini shod etish maqsadida ularning oilalari holidan xabar olindi va Qur'on tilovat qilindi.

Qaranki, 25 – iyun ustoz jurnalist Saminjon Sultonov vafot etgan kun ekan. Shu munosabat bilan mana besh yildirki, xuddi shu sanada ustozni tanigan, u kishining ikki og'iz shirin so'zidan bahramand bo'lgan insonlar ushbu xonadonga tashrif buyurib, tilovat o'qib ketishni o'zlariga odat qilib olishgan.

— Jurnalistlik kasbi sharafli, ammo mashaqqatlidir. Otam Saminjon Sultonovni shu sohada umrining oxirigacha mehnat qilgan. U kishini xotirlab kelganingiz uchun ming bor tashakkur, — deydi qizi Nodira Sultonova. — Bu xayrli tadbir doimo saqlanib qolishini istayman.

Ha, bugun hayotimizni, davr taraqqiyotini ommaviy axborot vositalarisiz tasavvur qilib bo'lmaydi. Buni yaxshi anglagan O'zbekiston Xalq demokratik partiyasi viloyat va shahar Kengashi 27 iyun - Matbuot va ommaviy axborot vositalari xodimlari kunida ham bir guruh fidoiy jurnalistlarni kasb bayrami bilan tabriklab, ularga sovg'a-salomlar ulashdilar.

Jamol ANDAQULOV,

O'zbekiston XDP Sirdaryo viloyat kengashi bo'lim boshlig'i.

👉 https://t.me/Sirdaryo

O‘zbekiston Respublikasining soliq siyosatini takomillashtirish konsepsiyasi to‘g‘risidagi Prezident Farmoni qabul qilindi.

“Huquqiy axborot” kanalii bergan ma’lumotga ko‘ra, mazkur Farmonga muvofiq 2019 yil 1 yanvardan boshlab:

a) mehnatga haq to‘lash fondiga soliq yuki quyidagilar orqali kamaytiriladi:

barcha fuqarolar uchun jismoniy shaxslardan olinadigan daromad solig‘ining yagona stavkasini 12 foiz miqdorida joriy etish, shundan 0,1 foizini shaxsiy jamg‘arib boriladigan pensiya hisobvaraqlariga yo‘naltirish. Bunda, fuqarolarning ayrim toifalari uchun eng kam oylik ish haqining 4 baravari miqdoridagi daromadlarini soliq solishdan ozod qilishning amaldagi tartibi saqlab qolinadi;

fuqarolarning mehnatga haq to‘lash turidagi daromadlaridan byudjetdan tashqari Pensiya jamg‘armasiga ushlab qolinadigan sug‘urta badallarini bekor qilish;

byudjet tashkilotlari va davlat korxonalari, ustav jamg‘armasida davlat ulushi 50 foiz va undan ko‘proq bo‘lgan yuridik shaxslar hamda ularning tarkibiy tuzilmalari uchun yagona ijtimoiy to‘lov miqdori 25 foiz etib, qolgan yuridik shaxslar uchun 15 foizdan 12 foizgacha pasaytirilgan stavkada belgilash;

b) ikkinchidan, aylanmadan (yalpi tushumdan) soliqlarni optimallashtirish bilan umumbelgilangan va soddalashtirilgan soliqlar to‘lovchilarni soliqqa tortish, shuningdek, soliq solishning soddalashtirilgan tartibiga o‘tish mezonlari quyidagilar orqali takomillashtiriladi:

davlat maqsadli jamg‘armalariga yuridik shaxslarning aylanmasidan (yalpi tushumidan) undiriladigan majburiy ajratmalarni bekor qilish;

yuridik shaxslardan olinadigan foyda solig‘i stavkasini 14 foizdan 12 foizgacha, tijorat banklari uchun – 22 foizdan 20 foizgacha pasaytirish, shuningdek, mobil aloqa xizmati ko‘rsatayotgan yuridik shaxslar (uyali aloqa kompaniyalari) uchun, rentabellik darajasidan kelib chiqib ular uchun qo‘shimcha foyda solig‘i hisoblash tartibini bekor qilgan holda 14 foizdan 20 foizgacha oshirish;

dividendlar va foizlar ko‘rinishidagi daromadlar bo‘yicha to‘lov manbaidan ushlab qolinadigan foyda solig‘i stavkasini 10 foizdan 5 foizgacha pasaytirish;

o‘tgan yil yakunlari bo‘yicha yillik aylanmasi (yalpi tushumi) 1 milliard so‘mdan oshgan yoki joriy yil davomida ushbu belgilangan chegaraviy miqdorga yetgan korxonalarni umumbelgilangan soliqlarni to‘lashga o‘tkazish. Bunda, yillik aylanmaning (yalpi tushumning) 1 milliard so‘m etib belgilangan chegaraviy miqdori har 3 yilda kamida bir marta qayta ko‘rib chiqiladi;

barcha tadbirkorlik subyektlari, shu jumladan, aylanmasi (yalpi tushumi) 1 milliard so‘mgacha bo‘lgan yuridik shaxslar uchun yuridik shaxslarning mol-mulk solig‘i, yer solig‘i va suv resurslaridan foydalanganlik uchun soliqni joriy etish;

qo‘shimcha foyda solig‘ini hisoblash va to‘lash tartibini, shu jumladan, royalti to‘lashni joriy etish orqali takomillashtirish;

v) uchinchidan, soliq solishning soddalashtirilgan tartibi bo‘yicha soliq to‘lovchilarga soliq siyosatini takomillashtirishning salbiy ta’sirini kamaytirish choralari quyidagilar orqali amalga oshiriladi:

yuridik shaxslarning mol-mulkiga solinadigan soliq stavkasini, bino va inshootlardan, shu jumladan, ilgari xususiylashtirilgan obyektlardan samarasiz foydalanayotgan yuridik shaxslar uchun yuqori stavkada soliq hisoblash tartibini saqlab qolgan holda 5 foizdan 2 foizga pasaytirish;

yillik aylanmasi (yalpi tushumi) 1 milliard so‘mgacha bo‘lgan soliq to‘lovchilar uchun aylanmadan (yalpi tushumdan) soliqni 4 foiz miqdordagi bazaviy stavkadan kelib chiqib hisoblash va to‘lash tartibini hamda ixtiyoriy ravishda qo‘shilgan qiymat solig‘ini to‘lash imkoniyatini belgilash;

yagona yer solig‘i to‘lovchilari uchun amaldagi soliq solish tartibini saqlab qolish.

g) to‘rtinchidan, qo‘shilgan qiymat solig‘i va aksiz solig‘ini hisoblash va to‘lash tartibi quyidagilar orqali takomillashtiriladi:

qo‘shilgan qiymat solig‘ini to‘liq hisobga olish tizimini joriy qilish, soliq solish bazasini aniqlashtirish va imtiyozlar sonini kamaytirish, shuningdek, 2019 yil yakuni bo‘yicha mazkur soliq stavkasini pasaytirish orqali qo‘shilgan qiymat solig‘ining 20 foiz miqdordagi amaldagi stavkasini saqlab qolish;

hozirgi vaqtda sotib olinadigan asosiy vositalar, qurilishi tugallanmagan obyektlar va nomoddiy aktivlar narxiga kiritiladigan qo‘shilgan qiymat solig‘ini hisobga olish summalariga kiritish huquqini berish;

tegishli tadbirlarni moliyalashtirish uchun mablag‘larni respublika byudjetiga o‘tkazish yo‘li bilan alkogol va tamaki mahsulotlarini ishlab chiqaruvchilarning xar bir ishlab chiqariladigan mahsulot birligiga o‘rnatilgan aksiz va yig‘imlarni birlashtirish.

Farmon bilan shuningdek yangi tahrirdagi Soliq kodeksi loyihasini ishlab chiqishni muvofiqlashtirish va samarasiz soliq va bojxona imtiyozlari hamda preferensiyalarini bekor qilish bo‘yicha ishchi komissiya tarkibi tasdiqlandi.

Komissiyaga:

2018 yil 1 noyabrga qadar samarasiz soliq va bojxona imtiyozlari hamda preferensiyalarini bekor qilish, Soliq va Bojxona kodekslariga muvofiq doimiy amalda bo‘ladigan soliq hamda bojxona imtiyozlarini taqdim etish tartibini joriy qilish bo‘yicha takliflar tayyorlash;

2018 yil 1 dekabrga qadar yangi tahrirdagi Soliq kodeksi loyihasini Xalqaro valyuta jamg‘armasi, Jahon banki va boshqa tashkilotlar ekspertlarini jalb qilgan holda ishlab chiqish yuklandi.

Farmonda qayd etilishicha yakka tartibdagi tadbirkorlar tomonidan amalga oshirilishiga ruxsat etilgan faoliyat turlarini tanqidiy ko‘rib chiqiladi va qisqartiriladi.

Mutasaddi tashkilotlarga 2018 yil 1 avgustga qadar 2019-2021 yillarga mo‘ljallangan O‘zbekiston Respublikasini rivojlantirishning asosiy makroiqtisodiy ko‘rsatkichlari prognozini ishlab chiqishni ta’minlash topshirildi. Ta’kidlab o‘tish lozimki shu paytgacha makroiqtisodiy ko‘rsatkichlar faqat 1 yilga mo‘ljallab tuzib kelinar edi.

Xususiylashtirilgan korxonalarga ko‘maklashish va raqobatni rivojlantirish davlat qo‘mitasiga 2018 yil 1 sentyabrga qadar muddatda davlat mulki bo‘yicha ijara to‘lovlarining minimal stavkalarini har bir hududning o‘ziga xos xususiyatlaridan kelib chiqqan holda qayta ko‘rib chiqish yuklandi.

👉 https://t.me/Sirdaryo

Sirdaryo viloyati Mirzaobod tumani 2 – Bahoriston va Nurafshon mahallalarida “Obod qishloq” dasturi doirasida keng ko‘lamda qurilish obodonlashtirish ishlari amalga oshirilmoqda.

Dastur doirasida amalga oshirilayotgan ishlar bilan tanishish maqsadida Nurafshon mahallasida bo‘ldik.

Mahalladagi 897 xonadonda 4 mingdan ziyod aholi istiqomat qiladi. Mahalla fuqarolar yig‘ini hududi 6ta ko‘chadan iborat bo‘lib, 42ta ikki qavatli, 51ta bir qavatli kotedj tipidagi, qolganlari yakka tartibdagi aholi hovli joylari, shuningdek, 2ta umumta’lim maktabi, 1ta maktabgacha ta’lim muassasasi hamda 1ta qishloq oilaviy poliknilikasi mavjud.

“Obod qishloq” dasturi doirasida Nurafshon mahallasida qurilish, rekonstruksiya, mukammal va joriy ta’mirlash ishlariga 7 milliard 309 million so‘m mablag‘ yo‘naltirilishi rejalashtirilgan.

Tuman hokimligidan olingan ma’lumotga ko‘ra, bugungi kunda ushbu mahalla hududida fuqarolar tomonidan qurilgan 17ta noqonuniy, tartibsiz qurilma buzilib, chiqindilar “Toza hudud” davlat unitar korxonasi Mirzaobod tumani filiali tomonidan belgilangan joyga olib chiqilgan. Mahalladagi har bir ko‘cha bo‘yicha arxitektura va qurilish bo‘limi tomonidan eskiz loyiha ishlab chiqilgan. Qurilish, ta’mirlash ishlari avjida.

MNU-2 mas’uliyati cheklangan jamiyati tomonidan mahalla hududidagi 1,5 kilometr uzunlikdagi ko‘chaga shag‘al yotkazilib, betonlash ishlari boshlangan.

Bahoriston va Nurafshon mahallalariga jami 13,5 tonna suyultirilgan gaz balonlari yetkazib berilgan. Tuman elektr tarmoqlari korxonasi tomonidan mavjud transformatorlar yangilanib, ayrimlari mukammal ta’mirlandi. 2,6 kilometr uzunlikdagi ochiq simlar yopiq kabellilarga almashtirildi. Havo tarmoqlariga xalaqit beryotgan 2,7 metr uzunlikda joylashgan daraxt shoxlari kesilib, fazalari teng taqsimlandi.

Yutuqlar o‘zimizniki, uni bizdan hech kim tortib olaolmaydi. Lekin yig‘ilib qolgan muammolarni bartaraf etish, aholiga qulay sharoitlar yaratib berish bugungi kunning eng dolzarb masalasidir.

...Nurafshon mahalla hududiga kiraverishda zovurdan katta suv tortadigan motor yordamida maydon sug‘orilayotganiga ko‘zimiz tushdi. “Oqar suv tarmog‘i qishloqda yo‘g‘mi?”, degan savol xayolimizdan o‘tdi. Bu savolga javobni sal keyinroq qishloq aholisidan eshitdik.

Mahallaga kirib borar ekanmiz, pishiq g‘ishtdan qurilgan hayhotdek, ammo tashlandiq holatga kelib qolgan, atrofini yantoq bosib ketgan bino ko‘zga tashlanadi. Mahalladagilarni aytishicha, bu yerda ilgari gullab-yashnagan choyxona bo‘lgan. Qo‘shni qishloqdan Qozoqboy Sulaymonov degan tadbirkor xususiylashtirib olgan ekan. Olgan chog‘ida katta va’dalar bergan tadbirkor nimagadir binoni o‘z holicha tashlab qo‘ygan.

Mahalla ichkarisiga kirganimizda yer osti drenajlaridan suv tortayotgan kishini ko‘rdik. U nima maqsadda “o‘lik” suvni tortayotgani bilan qiziqdik.

– Bolalar bog‘chasining daraxtlarini sug‘ormasam, bu issiqda daraxtlar nobud bo‘ladi, – dedi mahalladagi 14-maktabgacha ta’lim muassasasi qoravuli Marqaboy Shoyusupov. – Bu “o‘lik” suvligini bilaman, ammo qishlog‘imizga mana bir necha yillardan buyon oqar suv kelmaydi. Daraxtlar esa qovjirab qolmoqda.

– Hovlimizda bir tup ko‘kargan giyoh yo‘q, – deydi fig‘oni falakka ko‘tarilib, shu mahallada istiqomat qiluvchi Rahmonqul Subonov. – Vodaprovodni suvi bilan bo‘lsa ham ko‘kartirardim. U ham yo‘qda. Mahallamiz aholisining asosiy qismi ichimlikka yaroqsiz, deb topilgan bashniyadan chiqayotgan sho‘r suvni ichadi. Sariq kasallik ko‘payib ketmoqda.

– Sobiq ittifoq davrida 10 yildan ortiq brigada boshlig‘i, mustaqillikka erishganimizdan so‘ng fermer bo‘ldim, keyin hammasini topshirib nafaqaga chiqdim, – deydi mehnat faxriysi Abdumo‘min Norboyev. – Nafaqada bo‘lsam ham ishlayverardim, lekin qishloq atrofini sobiq militsiya xodimi, prokuror, qozi, raykom bo‘lganlar bo‘lib oldi. Baliqchilik xo‘jaliklari ochildi. Yerimiz sho‘rlandi, sug‘orish tizimi ishdan chiqdi. 1996 yili qishloq ahli pul yig‘ib, tabiiy gaz olib keldik. 5-6 yil foydalandik. Keyin viloyatdan gazni kattakonlari kelib: “Sizlarni qishloqlaring proyektda yo‘q” deb xalq puliga kelgan quvurlarni kesib, mashinaga yuklab olib ketdi. Mahallaga gaz quvurini qaytib tortish haqida gap-so‘z ham bo‘lgani yo‘q. Bunga o‘zimiz ham ishonmaymiz.

Ustiga-ustak mahallani oqar va ichimlik suvi bilan ta’minlash maqsadida biror kishini kelib, loyiha chizmalari tayyorlaganini ham ko‘rmadik.

Mahallaning Nodira ko‘chasida joylashgan 90 o‘ringa mo‘ljallangan 14-maktabgacha ta’lim muassasasi faoliyati joriy yil 10 iyundan vaqtincha to‘xtatilib, “Xozarasp ideal servis” mas’uliyati cheklangan jamiyati tomonidan kapital ta’mirlanayotgan ekan. Ayni paytda bog‘cha binosining eski tom qismi, eshik va derazalari hamda pol qismlari to‘liq olib tashlanganu shu bilan ish to‘xtagan.

“Nega ishlamayapsizlar?” degan savolimizga quruvchi yigitlar: “Bizga buyurilgan ishni bajardik, yangi topshiriqni kutayapmiz” deb javob berishdi.

E’tiborimizni tortgan yana bir jihat. Bog‘chaning ort tomonidagi Yoshlar ko‘chasida yashovchi aholi o‘zlariga qulaylik yaratish maqsadida noqonuniy qurilish qilgan. Mahalladagi 8-umumta’lim maktabi o‘tgan yili ta’mirlangan ekan. Ammo 624 o‘ringa mo‘ljallangan 7- umumta’lim maktabida amalga oshirilishi lozim bo‘lgan kapital ta’mirlash ishlari o‘lda-jo‘lda. “Xozarasp ideal servis” mas’uliyai cheklangan jamiyati quruvchilari tomonidan boshlangan qurilish ishlari negadir to‘xtab qolgan. Loyiha qiymati 1 milliard 390 million so‘mdan ortiq bo‘lgan maktab binosi qurilishi “Yangiyer qurulish redgold” mas’uliyati cheklangan jamiyati quruvchilari tomonidan amalga oshirilayotir.

– Ish boshlaganimizga 3 kun bo‘ldi, – deydi MCHJ xodimi Hamid Bekirov. – Qurilish ishlarini nima sababdan boshqa tashkilotdan olib bizga berilganini bilmaymanu ammo, ayni chog‘da 14 kishi mehnat qilmoqda. Bugun-erta qo‘shimcha kuchlarni jalb etamiz... 

Ajablanarlisi, yangi o‘quv yili boshlanishiga bor-yo‘g‘i 2 oy qolgan bir vaqtda “yapyolong‘och” qilib tashlangan maktab binosini na “Xozarasp ideal servis” va na “Yangiyer qurulish redgold” yakunlay olishiga ishonish juda qiyin.

Xullas, Mirzaobod tumanidagi Nurafshon mahalla fuqarolar yig‘inida “Obod qishloq” dasuri bo‘yicha amalga oshirilayotgan ishlar mana shulardan iborat. Tumandagi Bahoriston mahallasida bu borada qanday ishlar amalga oshirilayotgani xususida kelgusi maqolamizda to‘xtalamiz.

A.Qayumov, O‘zA

👉 https://t.me/Sirdaryo

Sirdaryo viloyati Guliston tumanidagi 21 ming gektar ekin maydonining 8 ming gektariga g‘alla, 6 ming 800 gektariga paxta yetishtirilmoqda.

Gulistonning serhosil dalalarida bog‘dorchilik, poliz va sabzavot mahsulotlari yetishtirishda ham o‘ziga xos tajriba to‘plangan. Tumanda baliqchilik, asalarichilik, chorvachilik, yilqichilik, parrandachilik rivojlanayotgan tarmoqlardan sanaladi.

– Mirishkorlarimiz davlatga 22 ming 300 tonna g‘alla, 22 ming tonna paxta sotish shartnoma rejasini ortig‘i bilan bajarish uchun astoydil mehnat qilmoqda, – deydi tuman hokimining qishloq xo‘jaligi masalalari bo‘yicha o‘rinbosari Umurzoq Umarov. – Tumanda g‘alla yetishtirishda, g‘o‘za parvarishida “Beshbuloq”, “O‘zbekiston”, “Yangi hayot” suv iste’molchilari uyushmalari yetakchilik qilmoqda. Hududdagi “Orol ne’matlari”, “Burgutli Uchqun”, “Nurli bo‘ston fayz” kabi fermer xo‘jaliklari davlatga g‘alla sotish shartnoma rejasini ortig‘i bilan uddaladi.

Hududda qishloq xo‘jaligining keng qamrovli o‘sib borishida ko‘p tarmoqli fermer xo‘jaliklarining alohida o‘rni bor.

– Joriy yilda 30 gektarga g‘alla, 20 gektarga paxta ekdik, – deydi “Orol ne’matlari” ko‘p tarmoqli fermer xo‘jaligi rahbari Bahodir Begmatov. – G‘allamiz hosildorligi o‘rtacha 80 sentnerni tashkil etdi. Natijada davlatga g‘alla sotish shartnoma rejasini 127,4 foizga uddalab, 85,5 tonna o‘rniga 110 tonna sara don topshirdik. Ayni paytda somonni maxsus texnika yordamida preslab, qishga jamg‘arib qo‘ymoqdamiz.

Ushbu xo‘jalikda 450 bosh qoramol, 300 bosh qo‘y-echki, 150 bosh yilqi boqilmoqda. Joriy yil 20 gektarlik havzada baliqchilik tashkil etildi. Sun’iy ko‘l yil boshida sazan, oq amur, do‘ng peshona kabi baliq chavoqlari bilan baliqlantirildi.

Fermer xo‘jaligida 13,2 gektar bog‘, 2 gektar tokzorda ham mo‘l hosil yetishtirildi. E’tiborlisi, bugun 45 tonna olxo‘ri eksport qilish uchun tayyor.

Xo‘jalikda parvarishlanayotgan 3 ming 500 o‘rdak soni yaqin vaqt ichida 10 mingtaga yetkazilishi rejalashtirilmoqda. O‘tgan yilning kuzida tashkil etilgan 10 sotixli issiqxonada yetishtirilgan pomidor, bodring va turli ko‘katlardan 20 million so‘m daromad qilingani e’tiborlidir.

Doimiy 70, mavsumda 130 kishi ish bilan ta’minlangan xo‘jalikning yillik daromadi ham qilinayotgan mehnatga yarasha salmoqli. O‘tgan yili qishloq xo‘jaligi va chorva mahsulotlaridan hamda fermer xo‘jaligiga qarashli to‘yxona, maishiy va savdo obyektlaridan jami 1 milliard 500 million so‘m daromad qilindi.

Daromad bor joyda yangi loyihalar qilishga, tarmoqni kengaytirishga harakat bo‘lishi tabiiy.

– Bu yil ishchilarni moddiy rag‘batlantirish va boshqa xarajatlarimizni ta’minlab, jamg‘arilgan ortiqcha mablag‘ni 200 tonna sig‘imga ega sovutgich-omborxona qurishga yo‘naltirganmiz, – deydi deydi Bahodir Begmatov. – Bu katta mablag‘ talab qiladigan ish, shuning uchun bankdan yana 1 milliard so‘m kredit oldik. Kelgusida o‘zimiz va hududdagi boshqa fermerlar yetishtirgan qishloq xo‘jaligi mahsulotlarini uzoqroq muddatga sifatli saqlash imkoniga ega bo‘lamiz. 

Fermerning paxta dalalarini oralab, nihollarining o‘sish avji ko‘ngildagidek ekaniga guvoh bo‘lasiz. G‘o‘za 60-70 santimetrdan bo‘y bergan. Har tupida o‘rtacha 12-14 ta shona, 3-4 tagacha ko‘sak hosil bo‘la boshlagan.

Quvonarlisi, tumanda “Orol ne’matlari” kabi ko‘p tarmoqli fermer xo‘jaliklari soni yildan yilga ortib bormoqda. Ko‘p tarmoq –ko‘p daromad berishini “Orol ne’matlari“ fermer xo‘jaligi faoliyati misolida ko‘rish mumkin.

A. Qayumov, O‘zA

👉 https://t.me/Sirdaryo

Sardoba tumanida yoshlar muammolarini bartaraf etish, bandlikka koʻmaklashish hamda yoshlarni tadbirkorlikka jalb qilish maqsadida "Hokim va yoshlar" uchrashuvi tashkil qilindi. Unda kasb hunar kollejlari bitiruvchilari va mahallalardagi uyushmagan yoshlar ishtirok etdi.

Bunyod Butayev

O'zbekiston yoshlar ittifoqi Sardoba tuman Kengashi

👉 https://t.me/Sirdaryo

Joriy yilning 29-iyun kuni Guliston tuman hokimligida "Hokim va yoshlar" uchrashuvi tashkil etildi. Uchrashuvda el suygan kinoaktyor Yigitali Mamajonov, xalq shoiri Murod Abdullayevlar ishtirok etishdi. Uchrashuv davomida yoshlar tomonidan bildirilgan rakluf muammolar joyida hal etildi. Uchrashuv so'ngida bir guruh faol yoshlar taqdirlandi.

Baxromjon Bobokulov

O'zbekiston yoshlar ittifoqi Guliston tumani Kengashi

👉 https://t.me/Sirdaryo

✅ Guliston shahar hokimi 1-sektor raxbari "Hokim va Yoshlar" uchrashuvini o'tkazdi. Uchrashuvda yoshlarning muammo va takliflari tubdan tanishdi. Uchrashuvda 130 nafar yoshlar ishtirok etdi.

Guliston shahar hokimligi