📆 Joriy yilning 6-fevral kuni Xalqaro huquq va qiyosiy huquqshunoslik fakulteti Tadqiqot markazi katta ilmiy xodimi, PhD Sh.Tillaboyev, hamda professor-o'qituvchilari A.Mo'minov va Sh.Alamonova Navoiy yuridik texnikumi o‘quvchilari uchun O'zbekiston Respublikasi Prezidentining 2025-yil 26-noyabrdagi "O'zbekiston Respublikasida yuridik ta'lim va fanni yanada isloh qilish chora-tadbirlari to'g'risida" (https://lex.uz/uz/docs/-7864099)gi PF-232-son Farmoni ijrosi doirasida TDYUda amalga oshirilayotgan islohotlar bilan tanishtirish maqsadida mahorat darsi o'tkazildi.

📝 Mahorat darsi davomida professor-o'qituvchilar tomonidan TDYUda amalga oshirilayotgan zamonaviy islohotlar va o'zgarishlar, Dual ta'lim tizimini joriy etish yuzasidan olib borilayotgan ishlar va yuridik ta'limni yanada takomillashtirish yo'nalishlari bo'yicha batafsil ma'lumotlar taqdim etildi.

📚 Tadbir yakunida texnikum talabalari o'zlarini qiziqtirgan savollarga batafsil javoblar olishdi.

⚡️ Ushbu tashabbuslar yuridik ta'lim sohasida mintaqaviy hamkorlikni mustahkamlash va talabalarni zamonaviy yuridik bilimlar bilan qurollantirish yo'nalishidagi muhim qadamlardan biri hisoblanadi.

📆 Joriy yilning 5-fevral kuni Navoiy yuridik texnikumida “O‘zbekiston Respublikasi Huquqni muhofaza qilish akademiyasiga qabul jarayonlari to‘g‘risida” mavzusida targ‘ibot tadbiri bo‘lib o‘tdi.

📝 Mazkur tadbirda O‘zbekiston Respublikasi Huquqni muhofaza qilish akademiyasining mas’ul xodimi F.Mardanov ishtirok etib, talabalar bilan uchrashdi. U o‘z chiqishida Akademiyaning Tergov faoliyati yo‘nalishi bo‘yicha hujjat topshirish tartibi, qabul jarayonlarining bosqichlari hamda ta’lim olish jarayonida yaratilgan imkoniyatlar haqida batafsil ma’lumot berdi.

📚 Tadbir davomida Akademiyaga kirish uchun nomzodlarga qo‘yiladigan talablar, imtihon topshirish jarayonlari, jumladan, test sinovlari, jismoniy tayyorgarlik, suhbat va tibbiy ko‘rik bosqichlari haqida tushuntirishlar berildi. Shuningdek, o‘quv jarayonida nazariy bilimlar bilan bir qatorda amaliy ko‘nikmalarni shakllantirishga alohida e’tibor qaratilishi ta’kidlandi.

🎓 F.Mardanov o‘z nutqida Akademiyada tahsil olish yoshlar uchun mustahkam bilim va huquqni muhofaza qilish organlarida faoliyat yuritish imkoniyatini yaratib berishini qayd etdi. Bitiruvchilarning ish bilan ta’minlanishi, kasbiy o‘sish imkoniyatlari hamda xizmat davomida beriladigan imtiyozlar haqida ham ma’lumotlar berildi.

🤝 Tadbir yakunida talabalar o‘zlarini qiziqtirgan savollar bilan murojaat qilib, batafsil javoblar oldilar. Ushbu targ‘ibot tadbiri yoshlarni huquqni muhofaza qilish sohasiga yo‘naltirish, ularning kelajak kasbini to‘g‘ri tanlashida muhim ahamiyat kasb etdi.

📆 2026-yil 31-yanvar kuni respublika miqyosida tashkil etilgan nufuzli “IBRAT Debate Nationwide Tournament” musobaqasida Navoiy yuridik texnikumi 9/2-guruh o‘quvchilari Sharifov Shoxrux hamda Salimov Javohir munosib ishtirok etib, viloyat bosqichida qatnashgan jamoalar orasida faxrli 2-o‘rinni egalladilar.

📝 Sharifov Shoxrux va Salimov Javohir musobaqa davomida o‘zlarining bilim saviyasi, mantiqiy fikrlash qobiliyati hamda jamoaviy hamkorlikda ishlash mahoratini yuqori darajada namoyon etdilar. Ular bahs jarayonlarida berilgan mavzular yuzasidan asosli dalillar keltirib, raqib jamoalar bilan tengma-teng bellashib, tomoshabinlar va hakamlar e’tirofiga sazovor bo‘ldilar.

📚 Ushbu yutuq Navoiy yuridik texnikumi o‘quvchilarining nafaqat o‘qishda, balki intellektual musobaqalarda ham faol va yetuk ekanini yana bir bor tasdiqladi. Mazkur natija yoshlarni ilmga, fikrlashga va o‘z ustida ishlashga undovchi muhim rag‘bat bo‘ldi.

🤝 Texnikum jamoasi Sharifov Shoxrux va Salimov Javohirni ushbu yutuq bilan tabriklab, kelgusida respublika va xalqaro miqyosdagi musobaqalarda ham ulkan muvaffaqiyatlarga erishishlariga ishonch bildiradi.

📆 Joriy yilning 24-yanvar kuni Navoiy yuridik texnikumida ingliz tili fani o‘qituvchisi Feruza Atamuradova tomonidan 9/4-guruh o‘quvchilari ishtirokida “Every country has its culture” (“Har bir mamlakatning o‘z madaniyati bor”) mavzusida ochiq dars mashg‘uloti tashkil etildi.

📝 Dars interfaol metodlar asosida olib borildi. Mashg‘ulot davomida o‘quvchilar turli mamlakatlarning milliy urf-odatlari, an’analari, kiyim-kechaklari, bayramlari va kundalik turmush tarzi haqida ingliz tilida ma’lumotlar berishdi. Guruh ishlari, savol-javoblar, taqdimotlar hamda bahs-munozaralar orqali o‘quvchilarning mustaqil fikrlash qobiliyatlari rivojlantirildi.

📚 Feruza Atamuradova tomonidan dars jarayoni puxta rejalashtirilgan bo‘lib, zamonaviy pedagogik texnologiyalar va ko‘rgazmali vositalardan samarali foydalanildi. O‘quvchilarning darsdagi faolligi, ijodkorligi va nutq madaniyati ochiq darsning yuqori saviyada o‘tganini ko‘rsatdi.

⚡️ Ochiq dars yakunida faol ishtirok etgan o‘quvchilar rag‘batlantirildi va dars yuzasidan ijobiy xulosalar bildirildi. Ushbu mashg‘ulot nafaqat bilim berish, balki madaniyatlararo muloqotni rivojlantirishga xizmat qiluvchi samarali pedagogik jarayon sifatida baholandi.

📆 Joriy yilning 16-yanvar kuni Navoiy yuridik texnikumi Axborot-resurs markazi tomonidan o‘zbek adabiyotining durdonalaridan biri — "O‘tkan kunlar" asari asosida texnikum kitobxon o‘quvchilari ishtirokida mazmunli davra suhbati hamda tanlov tashkil etildi. Tadbir buyuk adib Abdulla Qodiriy ijodini chuqurroq o‘rganish, o‘quvchilarda kitobxonlik madaniyatini yuksaltirish hamda badiiy asar tahlili orqali mustaqil fikrlash ko‘nikmalarini rivojlantirishga xizmat qildi.

📝 Davra suhbatida “O‘tkan kunlar” romanining g‘oyaviy-badiiy ahamiyati, undagi tarixiy voqealar talqini, obrazlar tizimi va ularning ma’naviy-axloqiy xulosalari yuzasidan qizg‘in muhokamalar olib borildi. O‘quvchilar asar qahramonlari xarakteri, muhabbat va vatanparvarlik g‘oyalari, jamiyatdagi ijtimoiy munosabatlar haqida o‘z mulohazalarini bildirdilar.

📊 Tadbir yakunida o‘tkazilgan tanlov natijalariga ko‘ra quyidagi ishtirokchilar g‘oliblikni qo‘lga kiritdilar:

🥇 1-o‘rin — Xudaykulova Alina;
🥈 2-o‘rinlar — Mirzayeva Lola, Mardonova Sabina, Doniyorova Ruxshona;
🥉 3-o‘rin — Dilmurodov Asilbek hamda Mustafayeva Shaxrizoda egalladilar.

📚 Ushbu tadbir texnikumda kitobxonlikni targ‘ib etish, milliy adabiyotimizga bo‘lgan qiziqishni yanada oshirish yo‘lida muhim qadamlardan biri bo‘ldi.

⚡️ Navoiy yuridik texnikumida 9/2-guruh rahbari Oripova Venera hamda 9/3-guruh rahbari Shopo'latova Zulfiya tomonidan navbatdagi ota-onalar yig‘ilishi tashkil etildi. Mazkur yig‘ilish ta’lim jarayonini yanada samarali tashkil etish, o‘quvchilar tarbiyasi va ularning ijtimoiy faolligini oshirish masalalariga bag‘ishlandi.

📝 Yig‘ilish davomida ta’lim sifati, tartib-intizom, kiyinish madaniyati hamda o‘quvchilar ishtirok etayotgan tanlov va musobaqalar haqida atroflicha fikr almashildi. Guruh rahbarlari tomonidan o‘quvchilarning darslarga qatnashuvi, intizomi va jamoat joylaridagi xulq-atvoriga doir muhim masalalar yuzasidan ota-onalarga tushuntirishlar berildi.

📆 Shuningdek, ota-onalar bilan hamkorlikni yanada mustahkamlash maqsadida Ota-onalar kengashi raisi Norbayev Xakim Baratovich tomonidan har oyning birinchi shanba kunida muntazam ravishda ota-onalar yig‘ilishini o‘tkazib borish bo‘yicha taklif bildirildi. Ushbu taklif ota-onalar tomonidan qo‘llab-quvvatlanib, kelishuvga erishildi.

🤝 Mazkur yig‘ilish o‘qituvchi va ota-onalar o‘rtasidagi hamkorlikni kuchaytirish, o‘quvchilarning bilim va tarbiyasiga birgalikda e’tibor qaratish yo‘lida muhim ahamiyat kasb etdi. Kelgusida ham bunday uchrashuvlar tizimli ravishda tashkil etilishi rejalashtirilmoqda.

📝 Navoiy yuridik texnikumida 14-yanvar — “Vatan himoyachilari” kuni munosabati bilan mazmunli va ko‘tarinki ruhda bayram tadbiri tashkil etildi. Tadbirning asosiy maqsadi yoshlar qalbida vatanparvarlik tuyg‘ularini mustahkamlash, ona yurt himoyachilariga bo‘lgan hurmat va e’tiborni yanada oshirishdan iborat bo‘ldi.

🇺🇿 Bayram tadbiri texnikum rahbariyatining samimiy tabrik so‘zi bilan ochilib, unda Vatan tinchligi va osoyishtaligi yo‘lida fidokorona xizmat qilayotgan harbiy xizmatchilarning mashaqqatli mehnati alohida e’tirof etildi. Shuningdek, yosh avlodni jismonan va ma’nan yetuk, Vatanga sadoqatli insonlar etib tarbiyalash muhim vazifa ekani ta’kidlandi.

⚡️ Tadbir davomida ishtirokchilar uchun qiziqarli o‘yinlar va interaktiv mashg‘ulotlar tashkil etilib, ular bayramona kayfiyatni yanada oshirdi.

🎭 Ayniqsa, talabalar tomonidan namoyish etilgan “Kelajagimiz himoyachilari” mavzusidagi sahna ko‘rinishi tomoshabinlarda katta taassurot qoldirdi. Ushbu sahna asarida yoshlarning Vatanga muhabbati, burch va mas’uliyatni chuqur his etishi badiiy ifoda orqali yorqin aks ettirildi.

🇺🇿 Navoiy yuridik texnikumida O‘zbekiston Respublikasi Konstitutsiyasining 33 yilligi munosabati bilan dekabr oyida “Konstitutsiya fan olimpiadasi” yuqori saviyada tashkil etildi.

📝 Mazkur tadbir yoshlarning konstitutsiyaviy bilimlarini mustahkamlash, huquqiy tafakkurini rivojlantirish hamda Asosiy Qonunimizga hurmat ruhini yuksaltirishga xizmat qildi.

📚 Olimpiada jarayonida ishtirokchilar Konstitutsiyaning mazmun-mohiyati, undagi asosiy prinsiplar, inson huquq va erkinliklari, davlat hokimiyati tizimi hamda huquqiy davlat asoslariga doir savollarga javob berib, o‘z bilim va salohiyatlarini namoyon etdilar. Bellashuvlar adolatli va shaffof mezonlar asosida baholandi.

📊 Yakuniy natijalarga ko‘ra:

🥇 1-o‘rin — Toshimboyeva Xonzoda Murodillo qizi
(500 000 so‘m pul mukofoti)
🥈 2-o‘rin — Sattorova Nafisa Nuriddin qizi
(300 000 so‘m pul mukofoti)
🥉 3-o‘rin — Odilova Sevinch Olimjon qizi
(200 000 so‘m pul mukofoti)

🏆 Shuningdek, 1–3-o‘rin sohiblariga qo‘shimcha rag‘bat sifatida 3 oy davomida oylik to‘lovsiz huquqshunoslik kurslarida tahsil olish imkonini beruvchi pul mukofoti vaucherlari ham taqdim etildi. Bu esa g‘oliblarning bilimini yanada chuqurlashtirish va amaliy ko‘nikmalarini oshirishga xizmat qiladi.