👉 t.me/Sirdaryo

2018 yil 25 avgust kuni Sayxunobod tumani Bolalar-o'smirlar sport maktabida 2007-2008 va 2009-2010 yillarda tug'ilgan o'smir va qizlar o'rtasida sportning dzyudo turidan “O'zbekiston Respublikasi mustaqilligining 27 yilligi”ga bag'ishlab, “Aziz va yagonamsan, jonojon O'zbekistonim“ shiori asosida Sirdaryo viloyati birinchiligi musobaqasi bo'lib o'tdi.

Yoshlar ongiga yurtimiz mustaqil va erkin vatan ekanligi, bunda biz yoshlar uchun ulkan imkoniyatlar yaratilganligi hamda iqtidor egalarini aniqlash va rag'batlantirish, ularning mahoratini yanada oshirish hamda bo'sh vaqtlarini mazmunli o'tkazish maqsadida tashkil etilgan musobaqada 8 ta jamoadan 168 nafar sportchi-o'quvchilar; shundan 64 nafar qizlar ishtirok etdilar. O'zbekiston Respublikasi madhiyasi sportchi-o'quvchilar tomonidan ijro etildi.

Musobaqani Sayxunobod tumani Jismoniy tarbiya va sport bo'limi boshlig'i Mirjalol Xo'jamov ochib berdi. So'zi davomida sportchilarni mustaqilligimizning 27 yilligi hamda bugungi musobaqa bilan tabriklab, hozirgi kunda sportga bo'layotgan e'tibor va o'zgarishlar haqida tushunchalar berdi.

Musobaqa qoidalari va o'tkazilish tartibi bo'yicha Sirdaryo viloyati Dzyudo federatsiya rahbari Qahramon Fayziev o'z fikr-mulohazalarini aytib o'tdi va musobaqaga “Start” berildi.

Murosasiz o'tgan bellashuvda: 1-o'rin Sayxunobod tumani (murabbiy Djamaxmedov Nodir), 2-o'rin Guliston tumani (murabbiysi Shamiratov Temur) hamda 3-o'rin Guliston shahar (murabbiy O'razaliev Sherali) egalladilar. Musobaqada g'olib bo'lgan jamoalar Sayxunobod tumani Bolalar-o'smirlar sport maktabi tomonidan diplom va esdalik sovg'alari topshirildi.

Dehqonboy Gulov, musobaqaning bosh hakami.

Sirdaryo viloyatidagi kasb-hunar kollejlarida yangi o'quv yiliga tayyorgarlik yuzasidan yangicha dizayn asosida obodonlashtirish ishlaridan olib borilmoqda.

Sirdaryo viloyati kasb-hunar ta'limi boshqarmasi

👉 t.me/Sirdaryo

Sirdaryo viloyati Guliston tumanida "Bel olish" va uch kurash yo'nalishlari bo'yicha 2001-2002 yillarda tug'ilgan o'smirlar o'rtasida O'zbekiston kubogi sport musobaqalari g'oliblari aniqlandi.

G'olib bo'lgan sportchilar Jismoniy tarbiya va sport vazirligining 1, 2, 3 darajali medali va diplomlari bilan taqdirlanishdi.

Sirdaryo viloyati Jismoniy tarbiya va sport boshqarmasi 

👉 t.me/Sirdaryo

Odamlarimizning dunyoqarashi, amaliy natijalarni o'z ko'zi bilan ko'rganda o'zgaradi. Ularning ertanggi kunga yuksak ishonchini oshirishda mahalliy Kengashga saylangan deputatlarning o'rni beqiyosdir. Qachonki, ular o'z saylovchisining bahosi yo'q ishonchini qadriga etishiga bog'liq.

So'nggi yillarda ommaviy axborot vositalarida, ayniqsa, matbuot sahifalarida mahalliy Kengashlarga saylangan deputatlar o'zlarining saylovoldi dasturida belgilangan vazifalarni bajarmayotgani, yillab saylovchilar bilan uchrashmay deputat degan ulug' maqomni xalqning tafakkurida “vadaboz” degan salbiy tushunchalarga aylanib qolganiga hayotda ko'plab guvohi bo'lib turibmiz.

Biroq, besh qo'l barobar emasligini hayot o'zi isbot qilib turibdi. 2014 yilda bo'lib o'tgan saylovlarda Xalq deputatlari Mirzaobod tuman Kengashi deputati etib saylangan Murodjon Hayitovning “Odamlarning ishonchi – ulug' mukofot”, “Rost gapirsak – baraka topamiz” degan so'zlarida hikmat borga o'xshaydi.

Murodjon Hayitov o'zining ilk faoliyatini saylov okrugidagi muammolarni chuqur o'rganishdan boshladi. Eng dolzarb deb hisoblangan muammolar yuzasidan takliflar ishlab chiqib, bosqichma-bosqich dasturlarga kiritib bordi. Yaqin uch yarim yillik faoliyati doirasida fuqarolardan tushgan 350 yaqin muammolarning etmish foizini ijobiy echimiga erishdi. Hal etilmay qolgan muammolarga tegishlicha mutaxassislar orqali malakali tavsiyalar berishga harakat qildi.

U Xalq deputatlari Mirzaobod tuman Kengashidagi O'zbekiston XDP guruhi rahbari, Reglament va deputatlik odobi doimiy komissiyasi raisi sifatida shu kunga qadar 12 ta masalani sessiyada, 18 ta masalani doimiy komissiya muhokamasiga olib chiqdi. Shuningdek, qabul qilingan qarorlarni ijrosini ta'minlashni o'z nazoratiga oldi. Ushbu maslalar orasida aholini ish bilan ta'minlash, tibbiyot sohasidagi kamchiliklarni bartaraf etish va yangi texnik uskunalar bilan jihozlash, shuningdek, ta'lim sifatini oshirish, tadbirkorlik sub'ektlarida savdo terminallarini muntazam ishlashini ta'minlash kabi dolzarb masalalar o'zining ijobiy echimini topa boshladi.

Tuman Kengashi deputati sifatida mutasaddi tashkilotlarga deputatlik so'rovlari bilan murojaat qilish asosida o'zining saylov okrugida 740 dan ortiq fuqarolarni bepul tibbiy ko'rikdan o'tkazish va xomiylar yordamida bepul dori-darmonlar bilan ta'minlashda, 60 yaqin fuqarolarni ish bilan ta'minlashga erishdi. Shuningdek, 46 nafar kam ta'minlangan oilalarga uy-joy qurish uchun er uchastkalari ajratilishiga ko'maklashdi. Ishsiz bo'lgan, o'z tadbirkorligini boshlash istagini bildirgan 20 nafar fuqarolarga tijorat banklaridan kam foizli kreditlar olishga yordam berdi.

2018 yil Xalq deputatlari Sirdaryo viloyat Kengashining bo'shab qolgan o'rinlarga o'tkazilgan saylovda eng ko'p ovoz bilan 8-Navro'z saylov okrugidan Xalq deputatlari Sirdaryo viloyat Kengashi deputati etib saylangan Murodjon Hayitovning vakolat doirasi yanada kengaydi. U viloyat Kengashi deputati etib saylangan dastlabki kundan boshlab, Muhtaram yurtboshimizning 2017 yil 8 avgustdagi “Hududlarning jadal ijtimoiy-iqtisodiy rivojlanishini ta'minlashga doir ustuvor chora-tadbirlar to'g'risida”gi PQ-3182-sonli qaroriga asosan viloyat hamda tuman sektor rahbarlari bilan hamkorlikda o'z faoliyatini tashkil eta boshladi.

Murodjon Hayitovning tashabbusi bilan o'tgan 5 oylik faoliyati davomida saylov okrugi hududida joylashgan O'zbekiston temir yo'llari aktsiyadorlik kompaniyasiga qarashli “Sardoba temir yo'l” agrosanoat majmuasi unitar korxonasi rahbariyati bilan hamkorlikda Mirzaobod tumanidagi “Navbahor” mahallasida bolalar uchun futbol maydoni va bolalar o'yingohi qurilishi boshlandi.

Mirazobod tumani “Tinchlik” mahallasida eski davlat sanitariya epidemiologiya markazining bo'shab qolgan binosini bolalar bog'chasiga aylantirish tashabbusi bilan chiqib, sektor rahbari bilan bu muammoni ijobiy echim topishiga erishdi. Bugungi binoni ta'mirlash ishlari boshlanib ketdi.

Mirzaobod tumanidagi “Bog'iston” mahallasida aholining chorva mollari uchun 6 gektar yaylov ajratish masalasi deputatning aralashuvi bilan hal etildi. “Bog'iston” mahallasining 3 ta ko'chalaridan oqib o'tuvchi kollektor ko'p yillar davomida tozalanmasdan ko'milib ketganligi oqibatida, qishloqning bir qismida xonadonlar atrofi suv bosib uylarga jiddiy zarar keltirmoqda edi. Deputat Murodjon Hayitovning O'zbekiston Respublikasi Suv xo'jaligi vaziriga yuborgan deputat murojaati natijasida ushbu muammo hal etilib, 0,6 km kollektor (zovur) tozalanib, szot suvlar sathi pasaytirildi.

M.Haitovning Uztransgaz aktsiyadorlik jamiyati boshqaruviga yuborgan murojaati asosida Mirzaobod tumani Navro'z shaharchasidagi Ma'rifat va Istiqbol ko'chalariga tabiiy gaz keltirildi. Shuningdek, yana bir deputat so'rovi asosida Mirzaobod tumanidagi Toshkent, Tinchlik, Bog'iston, Navbahor, Yo'ldoshobod, Bahoriston mahallalari va Navro'z shaharchasida yashovchi 1200 nafar fuqarolar bepul tibbiy ko'rikdan o'tkazildi.

Deputatning O'zbekiston Respublikasi uy-joy kommunal xizmat ko'rsatish vaziriga yuborgan deputatlik murojaatlariga asosan, Mirzaobod tumani Navro'z shaharchasining Bobur ko'chasida yashovchi aholini sifatli toza ichimlik suvi bilan ta'minlash masalasi o'zining ijobiy echimini topdi.

Deputat Murodjon Hayitovning eng afzal jihati shuki, u quyi rahbarlarning rad etilgan javobidan qoniqmasa, yuqori idoralarga murojaat etib bo'lsa-da, odamlarning murojaatini imkoni boricha ijobiy hal etib berishga qat'iyat bilan kirishadi.

-Deputat degan so'zni eshitardigu, o'zini ko'rmasdik - deydi Mirzaobod tumani “Navbahor” MFY Arnasoy ko'chasida yashovchi fuqaro Saydulla Mamatqulov. –O'g'lim Sharif Mamatqulov bolalikdan nogiron bo'lib tug'ilgan, yurak parogi. O'g'limni nafaqaga chiqarish uchun 8 yil turli idoralarga murojaat etdik, hech uddasidan chiqmadik. Nihoyat, Murodjon Hayitov bizning mahalladan deputat etib saylanganidan keyin shu masalada undan yordam so'radi. Shukurki, yosh deputatimiz bir oy ichida tegishli davlat organlariga deputat so'rovlari chiqarib, shifokorlar ataylab yashirib qo'ygan hujjatlarini topdirib, o'g'limni 2-guruh nogironi maqomiga ega bo'lishiga yordam ko'rsatdi. Hozirda, o'g'lim nafaqa olyadti. Biz deputatimizning juda ko'p amaliy ishlaridan xabardormiz. Masalan qishlog'imizda viloyat markaziga qatnovchi avtobus yo'q edi. Mana bir emas, ikkita avtobus qatnovi deputatimizning say-harakati bilan yo'lga qo'yildi. 20 yildan beri 3-4 oila bir xonadonda noqulay sharoitlarda yashar edi. Deputatimiz hokimlikka murojaat qilish orqali 2018 yilning yanvar oyida 46 nafar fuqaroga uy-joy qurish uchun er uchastkalari ajratildi. Bir qariyalar deputatimizning yosh bo'lishiga qaramay, u kishining yonib ishlashi, tashabbusi, tirishqoqligi, qo'rmasligiga hamisha qoyil qolamiz va hamisha uni asrashini so'raymiz.

Odamlarimizning dunyoqarashi ularning taqdirida ro'y bergan tugunli muammolarning echilishiga ham bog'liqdir. Deputat Murodjon Hayitov ayni vaqtlarda o'zini-o'zi boshqarish organlarining mutasaddilari bilan 2019 yilgi davlat va mahalliy dasturlarga takliflar ishlab chiqmoqda.

O'zbekiston Xalq demokratik partiyasidan deputat etib saylangan Murodjon Hayitovning deputatlik faoliyati, Xalq deputatlari Sirdaryo viloyat Kengashi va Mirzaobod tuman Kengashilari deputati sifatidagi ishlari partiyaning aholi, elektorat orasidagi obro'si va nufuzini ko'tarishda katta ahamiyat kasb etmoqda.

Jamol Andaqulov,

O'zbekiston XDP Sirdaryo viloyat kengashi bo'lim boshlig'i

👉 t.me/Sirdaryo

"Yoshlar kelajagimiz" Davlat dasturining ijrosini ta’minlash maqsadida O‘zbekiston yoshlar ittifoqi Guliston shahar Kengashi tomonidan shahar Adliya bo‘limi, Savdo-sanoat palatasi viloyat boshqarmasi hamda "Hamkorbank" bilan hamkorlikda, Dastur asosida imtiyozli kredit olib o‘z tadbirkorlik faoliyatini boshlamoqchi bo‘lgan yoshlar uchun o‘quv-seminar tashkil etildi.

O‘quv-seminarni tashkil etishdan maqsad, bo‘lg‘usi yosh tadbirkorlarda ilk tadbirkorlik ko‘nikmalarini shakllantirish, start up loyihalarni amalga oshirishda ko‘maklashish, Davlat dasturining mazmun mohiyatini tushuntirish, biznes rejalarni tuzishni o‘rgatish, bank imtiyozlari hamda tadbirkorlikning huquqiy asoslari to‘g‘risida tushunchalarni shakllantirishdan iborat.

Bekzod ALMAMATOV,

O‘zbekiston yoshlar ittifoqi Guliston shahar Kengashi raisi

👉 t.me/Sirdaryo

Sirdaryo viloyati Jismoniy tarbiya va sport boshqarmasi tasarrufidagi Sayxunobod tumani Bolalar-o‘smirlar sport maktabida 2018 yil 7-13 avgust kunlari sportning 8 turidan 12-avgust - “Xalqaro yoshlar kuni” ga bag‘ishlab sport musobaqalari tashkil etildi.

Jumladan; Badiiy gimnastika, Taekvondo ITF, Shashka, Taekvondo VTF, Futbol, Basketbol, Shaxmat hamda Gandbol sport turlari bo‘yicha musobaqalar reja asosida o‘tkazildi.

Musobaqalarda jami 447 nafar o‘quvchi-sportchilar ishtirok etdilar; shundan 132 nafari qizlar. Musobaqada g‘olib bo‘lgan sportchilar tashkilotchilar tomonidan esdalik sovg‘alari bilan taqdirlanishdi.

Sirdaryo viloyati Jismoniy tarbiya va sport boshqarmasi

👉 t.me/Sirdaryo

Sirdaryo viloyati Guliston tumanida Bel olish va uch kurash yo‘nalishlari bo‘yicha 2001-2002 yillarda tug‘ilgan o‘smirlar o‘rtasida O‘zbekiston kubogi sport musobaqalari joriy yilning 13-15 avgust kunlari tashkillashtirildi.

Sirdaryo viloyati Jismoniy tarbiya va sport boshqarmasi 

👉 https://t.me/Sirdaryo

Fuqarolar, ayniqsa, yosh avlodni turli zararli oqimlar ta’siridan asrash bo‘yicha o‘tkazilayotgan uchrashuvlar va davra suhbatlari, ko‘rilayotgan chora-tadbirlar tinch-farovon turmushimizning muhim omili bo‘lib xizmat qilmoqda.

O‘zbekiston Respublikasi Prezidentining 2017 yil 15 dekabrdagi “Tashqi bozorlarda mahalliy mahsulotlarni raqobatdoshligini ta’minlash va eksportini rag‘batlantirishga doir qo‘shimcha chora-tadbirlar to‘g‘risida”gi PF-5286-sonli farmonida O‘zbekiston Respublikasi va insoniyat xavfsizligiga qarshi, hududiy yaxlitlikni, davlat suvereniteti va siyosiy mustaqillikni buzishga qaratilgan bosma nashriyot mahsulotlari, qo‘lyozmalar, rasmlar, fotosuratlar, fotoplyonkalar, negativlar, kino, video va audio mahsulotlari, ovoz yozilgan materiallar, shuningdek, urush, terrorizm, zo‘ravonlik, milliy ajratish va diniy qarshilik, irqchilik va uning turlarini (antisemitizm va fashizm) targ‘ib etuvchi hamda pornografik mazmundagi materiallarni olib kirish ta’qiqlanishi belgilab qo‘yilgan.

Shunday bo‘lsa ham, ayrim fuqarolar tomonidan bilib-bilmay diniy mazmundagi, behayolik va zo‘ravonlikni targ‘ib etuvchi materiallarni respublika hududiga olib kirishga bo‘lgan urinishlar hamon uchrab turibdi, ayniqsa, mazkur qonunbuzarlik holatlari yoshlar o‘rtasida uchrashib turishi achinarli holat, albatta.

2018 yilning 1-yarim yilligi davomida fuqarolar va ularga tegishli bo‘lgan yuklarni bojxona ko‘rigidan o‘tkazish natijasida 1 ta holatda diniy mazmundagi, 12 ta holatda zo‘ravonlik va shafqatsizlikni, hamda 64 ta holatda behayolikni targ‘ib qiluvchi materiallar bilan bog‘liq bojxona qoidabuzarlik holatlari aniqlangan, natijada 1 nafar fuqaroga nisbatan jinoiy va 76 nafar fuqarolarga nisbatan ma’muriy ishlar yuritilib, sud qarorlariga asosan jazo choralari qo‘llanilgan.

Barcha holatlarda ushbu ta’qiqlangan materiallar fuqarolarning shaxsiy qo‘l telefoni, noutbuk va boshqa axborot tashuvchi vositalarida saqlanganligi ma’lum bo‘lgan, mazkur ta’qiqlangan materiallarning mavjudligi haqida bojxona xodimlarining og‘zaki so‘rovlari vaqtida va zamonaviy texnika vositalari orqali keng foydalangan holda aniqlanmoqda.

Sirdaryo viloyati bojxona boshqarmasining tegishli bo‘lim va bojxona postlari xodimlari tomonidan aholi o‘rtasida bojxona qonunchiligi bo‘yicha olib borilgan keng qamrovli targ‘ibot va tashviqot ishlari, davra suhbatlari, uchrashuvlari va profilaktik suhbatlari tizimli yo‘lga qo‘yilib, o‘sib kelayotgan yosh avlodni odob va axloq darajasida tarbiyalash, ularning ongini har xil buzg‘unchi g‘oyalar bilan zaharlanishining oldini olish nafaqat huquqni muhofaza etish organlarining vazifalari, balki har bir fuqaroning kunlik faoliyatidagi asosiy yo‘nalish bo‘lib qolishini yoddan chiqarmasligimiz zarurdir.

Shunday ekan, bu vaziyatda huquq-targ‘ibot organlarining, shu jumladan, bojxona xodimlarining hushyorligi va sezgirligiga tayanish bilan bir qatorda yurtdoshlarimizdan ham bojxona qonunchiligiga qat’iy rioya qilishlari talab qilinadi.

Shuni eslatib o‘tamizki, Diniy adabiyotlarni respublikaga olib kelish, sotish va tarqatish O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaning xulosasi asosida amalga oshiriladi.

Shu o‘rinda yurtdoshlarimizdan bojxona qoidabuzarliklari yoki bojxona xodimlarining noqonuniy hatti-harakatlari yuzasidan Sirdaryo viloyati bojxona boshqarmasining (0367) — 225-48-67 — “Ishonch telefoni”ga qo‘ng‘iroq qilishlari mumkinligini eslatib o‘tamiz.

Anvar Karabayev,

Sirdaryo viloyati bojxona boshqarmasi Axborot xizmati rahbari, podpolkovnik telefon raqami: (+998 90) 953-71-17, (+998 90) 352-71-17

👉 https://t.me/Sirdaryo

Muqaddam sudlangan fuqaro Usmon Shoyev (ism-familiyalar, joy nomlari va atamalar o‘zgartirilgan) qilmishlaridan to‘g‘ri xulosa chiqarmadi. Bundaylar haqida xalqimiz “Hassasini ikkinchi bor yo‘qotdi“, deydi.

– Fuqaro Maqsad Ma’murov Usmon Shoyev rahbarligidagi “Media ta’mir” xususiy korxonasi tomonidan 2-mavzedagi bir necha uyda amalga oshirilgan ta’mirlash ishlarida noqonuniy o‘zlashtirish va talon-taroj qilish jinoyatlari sodir etilganini yozma ravishda ma’lum qildi, – deydi Guliston shahar prokurori Sarvar Bozorov. – Ushbu murojaat yuzasidan surishtiruv o‘tkazildi. Tegishli tartibda qo‘zg‘atilgan jinoyat ishi yuzasidan dastlabki tekshiruv harakatlari olib borildi.

“Media ta’mir” xususiy korxonasi rahbari, muqaddam sudlangan fuqaro Usmon Shoyev o‘zgalarning mulkini talon-taroj qilish va boshqaruv tartibiga qarshi jinoyatlarni quyidagi holatda qasddan sodir etish harakatini amalga oshirgan. Xususan, “Media ta’mir” xususiy korxonasi rahbari sifatida mansab vakolatini suiiste’mol qilib, noqonuniy yo‘l bilan boylik orttirish maqsadida, buyurtmachi “Soy bo‘yi” xususiy uy-joy mulkdorlari shirkati bilan 2015 yil 13 iyul sanasida Guliston shahrining Alisher Navoiy shoh ko‘chasida joylashgan 124, 136-uylar, Ulug‘bek ko‘chasidagi 1- va 10-uylarni joriy ta’mirlash to‘g‘risida 7-shartnomani tuzadi. Ishni boshlamasdan oldin 65 million 73 ming 259 so‘m mablag‘ni xususiy korxonasi hisob raqamiga o‘tkazishga erishadi.

2015 yilning avgust-sentyabr oylarida “Media ta’mir” xususiy korxonasi quruvchilari uylarni ta’mirlash uchun jami 61 million 676 ming 331 so‘mlik ish bajarildi, deb amalda bajarilmagan ish uchun 27 million 263 ming 451 so‘m mablag‘ni dalolatnomalarni soxtalashtirgan holda qo‘shib yozadi va soxtalashtirilgan hujjatlarni shirkatga taqdim etadi. Shirkat tomonidan to‘langan summani soxtalashtirilgan hujjatlar bo‘yicha yana 3 million 396 ming 928 so‘m, jami 30 million 660 ming 379 so‘m mablag‘ni mansab mavqeyini suiiste’mol qilgan holda, o‘zganing mablag‘ini o‘zlashtirish yo‘li bilan talon-taroj qiladi.

Bugungi shiddatli zamonda har qanday “qing‘ir ishning qiyig‘i“ chiqishi uchun 40 yil kutish shart emas. Usmon Shoyevning qilmishi 3 yilda fosh bo‘ldi.

Shu o‘rinda haqli savol tug‘iladi. “Xo‘sh, bu jinoyatning kelib chiqish sababi qayerda? Kimdir o‘zganing haqini o‘zlashtirib, talon-taroj qilsa, hujjatlarni soxtalashtirib, tekin daromad orttirganini nega oddiy fuqaro Maqsad Ma’murov sezadi-yu, o‘sha summani o‘tkazib berayotgan shirkat rahbarlari bilmaydi?”

– Bu jinoyatning kelib chiqish sababi, avvalo, nafaqat oddiy fuqarolar, balki mas’ul lavozimda ishlayotgan mansabdor shaxslar ham o‘z haq-huquqini bilmasligi, bilimi sayozligi, eng yomoni, davlat mulki talon-taroj bo‘lishiga, nopok yo‘l bilan noqonuniy ravishda o‘zlashtirib olinishiga loqaydligi tufayli kelib chiqmoqda, – deydi Guliston shahar prokurori Sarvar Bozorov. – Aynan bu jinoyatning kelib chiqishi xususida to‘xtaladigan bo‘lsak, “Soy bo‘yi” xususiy uy-joy mulkdorlari shirkati a’zolari va pudratchilar o‘rtasida tuzilgan shartnomaga asosan, uylar ta’miri yakuni bo‘yicha bajarilgan ish haqidagi dalolatnomalarni yetarli bilimga ega bo‘lmagan holda qabul qilib olishi, nazorat o‘lchovi o‘tkazishni tashkillashtirmasligi hamda huquqni muhofaza qiluvchi organlar tashabbusi yoki fuqarolarning e’tirozi asosida o‘tkaziladigan nazorat o‘lchovlarida aniqlangan qonun buzilishlar sabab bo‘lgan.

Abdujalol Qayumov, O‘zA

👉 https://t.me/Sirdaryo

Sirdaryo tumanida jami 38 ta qabristonlar mavjud bo‘lib, tuman obodonlashtirish boshqarmasi fuqarolarga xizmat ko‘rsatish uchastkasi tasarrufida.

Qabristonlardan biriga tashrif buyurib, 3 muammoning yechim kutayotganiga guvoh bo‘ldik.

1 – muammo.

Tuman hududining “Peng – Sheng” qo‘shma korxonasi atrofiga sifatli qora asvalt yotqizilgan-u, yo‘l shundoq “Navbahor” qishloq belgisiga yetib tugagan. Keyin haqiqiy “qishloq yo‘li” boshlanadi. Bu yo‘llarga necha yilki “mehr” berilmagani, ta’mirlash, yamash ishlari olib borilmaganini bilish uchun “andak” surishtirish ham shart emas. Achinarlisi, yo‘l yo‘qolib bormoqda. Chuqurlarning ko‘pligi odamlarni bezovta qilib kelishi haqiqat. Shuningdek, qabristonga kirish yo‘lagi faqat tosh tashlash bilan hosil qilingan. Ochig‘i, “ballon izi”gina qolganidan bunga ham ko‘p bo‘lgan deyish mumkin. Tabiat allaqachon kuchini ko‘rsatib “yashillagan”. Masalaning mazmuni tuman mutasaddilariga ham ayon. Joriy yilning 1 choragi davomida o‘rganib chiqilgan va 2019 yilda ichki yo‘llarni ta’mirlash bo‘yicha dasturga kiritish uchun viloyat hududiy yo‘llardan foydalanish DUKga taklif xati yuborilgan. Muammoning hal etilishi mutasaddi tashkilotlar, qolaversa, tuman hokimligi nazoratni qanchalik mas’uliyat bilan olib borishiga bog‘liq qolmoqda.

2 – muammo

Qabriston maydoni 2 gektardan iborat bo‘lib, nomi, darvozasi yo‘q “ochiq mozor” holatida. 7 yildan buyon qorovul bo‘lib xizmat qilayotgan Abdug‘ofur Xusanovning aytishicha, 50 – yillardan buyon bu yerga qabrlar qo‘yiladi. Yaqingacha nom ham berilmagan, el “Navbahor qabristoni” deb yuritib kelgan. Shuncha vaqtdan buyon yolg‘iz o‘zi xizmat qiladi. Go‘rkov yo‘qligidan qabr kovlash uchun mahalladan ko‘ngilli odam chaqiriladi. Bir xonali loysuvoq hujra ham tahorotxona, ham tilovotxona vazifasini o‘tagan. Yuritib kelinayotgan 3 ta daftarlar qorovulning xonadonida saqlanib kelinmoqda.

Bu yil Prezidentimizning Qabriston va ziyoratgohlarni obodonlashtirish bo‘yicha farmonlari va shu asosda viloyat hokimligining “Viloyatdagi qabristonlarni obodonlashtirishga biriktirilgan tashkilotlar ro‘yxati” ga asosan homiylar ko‘magi bilan ish boshlangan edi. Eng avval, mahalla faollari atrof bog‘ bilan o‘ralgan qabristonga “Bog‘aro” deya chiroyli nom berishdi. Qabriston nomi, muqaddas suralar yozilgan bannerlar tayyorlandi. Fevral oyida tuman prokuraturasi hamda tuman ichki ishlar bo‘limiga biriktirilgan homiy tashkilotlarning vazifaga kirishmaganliklari haqida xat chiqarildi. Mazkur qabristonga Sirdaryo “Refrejerator” deposi mas’ul homiy hisoblanib, hududning qarovsiz eskirgan binosini buzib, tekislab, yangilarini qurishni boshlagan edi. Lekin ishlar hozirda to‘xtab qolgan. Tashkilot respublika tasarrufiga qarashli ekani va yetarli asos ko‘rsatilmasa, moliyaviy qoidabuzarlik sodir etishdan cho‘chishini ro‘kach qilmoqda. Mutasaddilar esa hanuz zaruriy asosni berishmagan. Mahalla ahlining aytishicha, tashabbus bilan chiqayotgan homiylar bor va ular ishni bugundan boshlashga tayyor. Taraddudlari sababi ish boshlagan tashkilot yil oxirida hisob – kitobini olishda qiynalib, chalkashlik bo‘lishidan xavotirda. Anglashilganidek, bu yerda vakolatlining biriga ishni to‘xtatishiga, boshqasiga boshlashiga ruxsat kerak. Vaqt esa o‘tib bormoqda. Yangi olingan ish qurollari va yozilgan bannerlar hamon ko‘chada qolmoqda.

3 – muammo

“Bog‘aro” qabristoniga qishloqning Furqat va Quyosh MFYlaridan odamlar keladi. Ayni paytda qabriston to‘lib bormoqda. Qorovulning o‘lchovida yana 50-60 qabr uchun joy qolgan. Joy so‘rab qilingan murojaatlar esa…

2016 yil Xalq deputatlari tuman Kengashi deputati Abdurahmon Umirzaqov qabriston maydoni kichrayib, mayitlarni qabrga qo‘yishda muammolar tug‘ilganligi haqida joylarga murojaat qilgan. Obodonlashtirish boshqarmasi fuqarolarga xizmat ko‘rsatish bo‘limi mas’uli Zokir Eshnazarovning ma’lumotiga ko‘ra tumanda bu kabi “to‘lib” borayotgan qabristonlar bir nechta va qo‘shimcha yer ajratilishi to‘g‘risida murojaatlar qilingan.

Tuman hokimi o‘rinbosari Xudoyberdi Najmullayev yer maydoni ajratish bo‘yicha hududdan talabga javob beradigan, tuman zaxirasidagi yer maydonlaridan tanlash ishlari tuman kadastr hamda arxitektura va qurilish bo‘limi mutaxassislari tomonidan o‘rganib chiqilayotganini ma’lum qildi. Umid qilamizki, qo‘shimcha yer qabriston atroflaridan beriladi. Shundagina qabriston obodligi mas’ullari, kelib ketuvchi ziyoratchilari uchun qulaylik va g‘amxo‘rlik ko‘rsatilgan bo‘ladi.

Ozoda MAMADALIYEVA,

“Ishonch” muxbiri