@tdpu.pr

Pedagogika universiteti kasaba uyushmasi raisi taqdirlandi

tdpu.pr — Thu, 04 Nov 2021 14:30:11 GMT

Har bir tashkilotdagi xodimlarni ijtimoiy-iqtisodiy, ma'naviy e'tibor nuqtayi nazaridan qo'llash, ko'maklashishda shu tashkilotlarda faoliyat yurituvchi kasaba uyushmasining o'rni beqiyos. Nizomiy nomidagi Toshkent davlat pedagogika universiteti kasaba uyushmasi ham ta'lim dargohi xodimlariga har tomonlama ko'mak berib kelmoqda. Ayniqsa universitet kasaba uyushmasi raisi Said_Nosir Fayzullayevning faol harakatlari natijasida so'nggi yillarda uyushma faoliyati ancha yuksaldi.

Kuni kecha Said-Nosir Fayzullayev kirib kelayotgan 11-noyabr Kasaba uyushmalari kuni munosabati bilan Toshkent shahar kasaba uyushmalari kengashi tashabbusi bilan o'tkazilgan tadbirda shahar kengashi raisi Ahmedov Sayfulla Normatovich tomonidan ko'krak nishoni bilan taqdirlandi.

Butun universitet jamoasi nomidan Fayzullayev Said-Nosir Saidburxanovichni ushbu ulkan yutuq va e'tirof bilan chin qalbdan tabriklaymiz. Ishlarda muvaffaqiyat va sihat-salomatlik tilab qolamiz!

Said-Nosir Saidburxanovichni tabriklash bahona ulardan universitet kasaba uyushmasi faoliyatiga oid kichikroq intervyu oldik. Uni e'tiboringizga havola etamiz:

Savol: Universitet kasaba uyushmasining bugungi kundagi faoliyati qanday yo'nalishlardagi ishlarni qamrab olayapti?

Said-Nosir Said-Burxonovich: 2020-yil 11-fevraldagi jamoa yigʻilishining 1-sonli bayonnomasi bilan tasdiqlangan Nizomiy nomidagi Toshkent davlat pedagogika universitet maʼmuriyati hamda kasaba uyushmasi oʻrtasida 2020-2022-yillar uchun tuzilgan jamoa shartnomasi bandlarida: kasaba uyushmasi aʼzolarini ijtimoiy-iqtisodiy va fuqarolik huquqlari, kasbiy manfaatlarini ifoda etish va himoya qilish ishlarini qamrab olgan. Universitet ish faoliyatida barcha masalalarni hal etish kasaba uyushmasi raisi va kasaba uyushmasi ijroiya qoʻmitasi roziligi asosida amalga oshirilyapti, universitet faoliyatida turli masalalarni hal etishda kasaba uyushmasi oʻz oʻrni va ovoziga ega. Universitetning barcha hal etuvchi masalalaridagi tuzilmalarida kasaba uyushmasi ijroiya qoʻmitasi aʼzolari qatnashadilar (ilmiy kengash, jamoat nazorati, ustamalarni hal etish ishchi guruhi va buyruqlar). Yil yakunida kasaba uyushmasi qoʻmitasi va maʼmuriyat jamoaga, jamoa shartnomasi bandlarining bajarilishi boʻyicha hisobot topshiradilar.

Savol: So'nggi paytlarda uyushma universitet xodimlariga qanday imtiyozlar, ko'mak va yordamlarni ko'rsatmoqda?

Said-Nosir Said-Burxonovich: Uyushma ijtimoiy-iqtisodiy, huquqiy masalalarda, sogʻlomlashtirish (respublikadagi sanatoriy va oromgohlarga imtiyozli yoʻllanmalar berish), moddiy yordam berish, professor-oʻqituvchi va xodimlarning farzandlariga bolalar oromgohlariga imtiyozli yoʻllanmalar berish, sport-sogʻlomlashtirish tadbirlari va universitetda oʻtkaziladigan barcha bayram tadbirlarini tashkil etish va oʻtkazish, qimmatbaho sovgʻalar bilan faollarni taqdirlashda maʼmuriyatga oʻz koʻmak va yordamini koʻrsatib kelmoqda. Faol professor-oʻqituvchi va xodimlarning Buxoro va Xorazm viloyatlariga ziyoratlari uyushtirildi.
2021-yil 28-martdagi 5-23- sonli bayonnoma bilan tasdiqlangan Nizomiy nomidagi Toshkent davlat pedagogika universitet maʼmuriyati hamda kasaba uyushmasi oʻrtasida 2020-2022-yillar uchun tuzilgan jamoa shartnomasiga kiritilgan qoʻshimchalarda “Koronavirus yoki boshqa yuqumli kasalliklar tufayli joriy qilingan karantin choralari davrida xodimlarga beriladigan imtiyoz va kafolatlar” bandi kiritildi. Pandemiya davrida COVID-19ga chalingan xodimlarga dori-darmon xaridiga ish beruvchi tomonidan kasaba uyushmasi tavsiyasiga koʻra Oʻzbekiston Respublikasida oʻrnatilgan mehnatga haq toʻlashning eng kam miqdorining 3 barobari miqdorida, kasallikdan vafot etgan xodimga Oʻzbekiston Respublikasida oʻrnatilgan mehnatga haq toʻlashning eng kam miqdorining 10 barobaridan kam boʻlmagan miqdorda moddiy yordam berildi.

Savol: Universitet kasabа uyushmasining bugungi kundagi a'zolari soni qancha?

Said-Nosir Said-Burxonovich: Bugungi kunda universitet kasaba uyushmasining xodimlar va professor-o'qituvchilarni qo'shib hisoblaganda 1109 nafar aʼzosi bor.

Savol: Uyushma tomonidan aynan qanday toifadagi xodimlarga imtiyoz va ko'mak beriladi?

Said-Nosir Said-Burxonovich: Ehtiyojmand xodimlarga, koʻp bolali va nogiron farzandlari bor xodimlarga, yosh bolali (uch yoshga toʻlmagan bolalari bor) ayol professor-oʻqituvchi va xodimlarga ko'mak ko'rsatiladi. Shuningdek yuqoridagi toifaga kiruvchi xodimlarga 1 soatga qisqartirilgan ish kuni belgilash bo'yicha huquqiy-amaliy yordam beriladi. Undan tashqari 9-may “Xotira va qadrlash kuni” munosabati bilan har yili 30 nafar faxriy ustozlarga ozik-ovqat mahsulotlari beriladi.

Savol: Kasaba uyushmasining shiori qanday?

Said-Nosir Said-Burxonovich: Universitet kasaba uyushmasi xodimlarining shiori “Insonga naf keltirish-oliy baxt”.

Savol (uyushma xodimlariga): Said-Nosir aka Fayzullayevning uyushma ishlarida erishgan yutuqlari va u kishining uyushma faoliyatini rivojlantirishdagi hissasi qanday?

Universitet kasaba uyushmasi xodimlari: Fayzullayev Said-Nosir Said-Burxonovich 2018-yil oktyabr oyida universitet kasaba uyushmasi qoʻmitasi raisi lavozimiga saylandi. Shundan so'ng kasaba uyushmasi faoliyatida jonlanishga erishildi. Chunki S.S.Fayzullayev universitetda koʻp yillar davomida oʻquv ishlari boʻyicha prorektor lavozimida ishlagan. Shu davrda universitetning barcha faoliyatidan xabarlari boʻlgan. Universitetning professor-oʻqituvchi va xodimlarining hurmatiga sazovar boʻlgan, shu sababli xodimlar ham kasaba uyushmasi faoliyatiga maʼsuliyat bilan yondashib, oʻz muammo, masalalarini bemalol aytib, ularga yechim topishga erishmoqdalar.

Universitet taraqqiyoti uchun o'zining ulkan hissasini qo'shib kelayotgan TDPU kasaba uyushmasi jamoasiga, xususan jamoa faoliyatini sifatli tashkil etib kelayotgan Said-Nosir Said-Burxonovichga o'z minnatdorchiligimizni bildiramiz.

30 ga yaqin TDPU talabalarining kontrakt summalari to'lab beriladi

tdpu.pr — Tue, 05 Oct 2021 11:56:42 GMT

Toshkent davlat pedagogika universitetida bugun Yoshlar ishlari agentligi Toshkent shahar va Chilonzor tumani boshqarmalari bilan hamkorlikda yoshlar muammolarini yechishga qaratilgan muloqot tadbiri tashkil etildi.

Muloqotda Yoshlar ishlari agentligi Toshkent shahar boshqarmasi boshlig'i Abdulaziz Nazirov, Yoshlar ishlari agentligining Chilonzor tumani bo’limi rahbari Bahodir Ziyovuddinov, TDPU Yoshlar ittifoqi Boshlang’ich tashkiloti yoshlar yetakchisi Mumtozbek Meliqoziyev va universitet talabalari ishtirok etishdi.

O'zaro suhbat davomida yoshlarni qiynayotgan muammolar, takliflar va murojaatlar o'rganildi hamda bulardan bir qanchasi joyida hal etildi.

Toshkent shahrida muqim istiqomat qiluvchi, ijtimoiy himoyaga muhtoj yoshlarga Yoshlar ishlari agentligi tomonidan kontrakt summalari to'lab berilishi bo'yicha kelishib olindi.

Mamlakatimizning boshqa viloyatlaridan kelib Toshkent shahrida o'qiyotgan talabalarning kontrakt summalarini ular muqim istiqomat qiladigan viloyat, tuman Yoshlar ishlari agentligi boshqarma va bo'limlari bilan hamkorlikda to'lab berilishi bo'yicha ishlar olib borilishi haqida ma'lumot berildi.

Uchrashuv yakunlariga ko'ra, universitetimizda to'lov-kontrakt asosida tahsil oluvchi 30 ga yaqin talabalarining kontrakt summalari to'lab berilishi bo'yicha kelishuvga erishildi.

Oʻqituvchi va murabbiylar kuniga bagʻishlangan bayram tadbiri bo'lib o'tdi

tdpu.pr — Tue, 28 Sep 2021 11:20:13 GMT

Har bir insonning komil shaxs boʻlib voyaga yetishida, yetuk kasb egasi boʻlib jamiyatda oʻz oʻrnini topishida ustoz-murabbiylarning oʻrni juda muhim. Jamiyatni ilmli qilish barobarida yetuk, komil shaxsni yetishtirishning asosiy bo'g'ini bo'lgan pedagoglarni insoniyat yuragi deb atasak yanglishmaymiz.

Fidoiy, zahmatkash muallim-oʻqituvchilar oʻz shogirdlariga bilim berish barobarida ular qalbiga insonga xos eng goʻzal ezgu xislatlarni, mehr-oqibat va odamiylik tuygʻularini singdirib boradi. Turli yoʻnalishlarda oʻz iqtidori, mahorati va bilim salohiyati bilan yuqori natijalarga erishib kelayotgan oʻgʻil-qizlarimizning muvaffaqiyatlari zamirida avvalo, aziz ustozlarning zahmatli mehnatlari mujassam.

Mamlakatimizda 1-oktyabr -Oʻqituvchi va murabbiylar kuni deb eʼlon qilinganligi mustaqil Oʻzbekistonimiz taraqqiyotiga ulkan hissa qoʻshayotgan ming-minglab oʻqituvchilar, ustoz va murabbiylar mehnatining yuksak eʼtirofi, ularga bildirilgan hurmat va eʼtibor namunasidir.

“Buyuk ajdodlarimizning betakror va noyob ilmiy-maʼnaviy merosi biz uchun doimiy harakatdagi hayotiy dasturga aylanishi kerak. Bu oʻlmas meros hamisha yonimizda boʻlib, bizga doimo kuch-quvvat va ilhom bagʻishlashi lozim. Avvalambor, milliy taʼlim tizimini ana shunday ruh bilan sugʻorishimiz kerak”, “Koʻpchilik ziyolilar qatorida men ham bir fikrni hamisha katta armon bilan oʻylayman: mamlakatimizda uchinchi Renessansni 20 asrda maʼrifatparvar jadid bobolarimiz amalga oshirishlari mumkin edi. Ular “Ilmdan boshqa najot yoʻq va boʻlishi mumkin ham emas”, degan hadisi sharifni hayotiy eʼtiqod deb bildilar” deb taʼkidlab oʻtganlar prezidentimiz Sh.Mirziyoyev.

Yangilanayotgan Oʻzbekiston islohotlarning muvaffaqiyatiga, mamlakatimizning dunyodagi rivojlangan, zamonaviy davlatlar qatoridan munosib oʻrin egallashiga, avvalo, ilm-fan va taʼlim-tarbiya sohasining rivoji bilan erishamiz, desak, hech qanday mubolagʻa boʻlmaydi.

Kuni kecha 27-sentyabr sanasida Nizomiy nomidagi Toshkent davlat pedagogika universitetida 1-oktyabr -Oʻqituvchi va murabbiylar kuniga bagʻishlangan tantanali bayram tadbiri tashkil etildi.

Mazkur bayram tadbiridan koʻzlangan asosiy maqsad – universitetimizda koʻp yillardan beri yoshlarga taʼlim-tarbiya berib kelayotgan ustozlarni, oʻqituvchi va murabbiylarni bayram bilan qutlash, ularning mashaqqatli mehnatlarini eʼtirof etish, ularga bildirilgan hurmat va eʼtiborni yana bir bor namoyon etishdan iborat.

Ushbu tashkil etilgan bayram tadbirida Toshkent Davlat pedagogika universiteti rektori Alisher Umarov, prorektorlar, Oliy va oʻrta maxsus taʼlim vazirligi va Xalq taʼlimi vazirligi vakillari, faxriy ustozlar, universitet jamoasi, professor-oʻqituvchilar hamda talabalar ishtirok etdilar.

Tadbir davomida koʻp yillar davomida alohida oʻrnak, fidoiylik koʻrsatib kelayotgan professor-oʻqituvchilar universitet rektori va universitet Kasaba uyushmasi tomonidan tomonidan tashakkurnoma va esdalik sovg'alari bilan taqdirlandilar.

Shuningdek, universitet "Musiqa madaniyati” fakulteti talabalari, U.A.Uspenskiy nomidagi respublika oʻrta maxsus musiqa maktabi ansambli, “Orom” bolalar raqs ansambli tomonidan kuy, qoʻshiqlar, ajoyib raqslar ijro etildi.

Prorektor va yoshlar uchrashuvi

tdpu.pr — Fri, 24 Sep 2021 11:26:17 GMT

Kuni kecha Maxsus pedagogika va inklyuziv ta’lim fakulteti tomonidan “Prorektor va yoshlar” uchrashuvi tashkil etildi. Ochiq muloqot tarzda tashkil etilgan tadbirda o‘quv ishlari bo‘yicha prorektor Raxmonqulova Nargiza Xojiakbarovna tashrif buyurib fakultet dekani sifatida faoliyat boshlagan pedagogika fanlari nomzodi, dotsent Nurkeldieva Dilbar Axmadovnaning kelgusidagi rahbarlik faoliyatiga rivoj tilab, yuksak ishonch bildirilganligi qayd etildi.

Shuningdek kredit modul tizimida darslarni tashkil etilishi, korrupsiyasiz ta’lim tizimi, o‘qish va izlanish baxt natijasi ekanligi to‘g‘risida batafsil ma’lumot berdi.

Tengdoshdan tengdoshga tamoyili asosida fakultet Yoshlar ittifoqi faollari Bekzod Haydarov va Muhammad Erembetovlar tomonidan universitet rahbariyati, ya’ni rektor, prorektorlar, jamoat tashkiloti rahbarlari, fakultet dekan o‘rinbosarlari, kafedra mudirlari va guruh murabbiylari birma-bir tanishtirib o‘tildi.

Fakultet dekani Dilbar Nurkeldieva o‘z so‘zida: “universitetda “Odob-axloq Kodeksi” qabul qilinganligi, universitet ichki tartib qoidalariga har bir talaba va professor-o‘qituvchilar so‘zsiz amal qilishi lozim” deya ta’kidladi.

Tadbirda har bir talaba dars mashg‘ulotlarida o‘z vaqtida ishtirok etishi va talabalik davrining oltinga teng damlarini g‘animat bilib vaqtdan unumli foydalanish lozimligi qayd etildi.

Muloqotda talabalar o‘zlarini qiziqtirgan savollarga javob olishdi. Tadbir yakunida iqtidorli talabalar o‘z badiiy chiqishlari bilan barchaga xush kayfiyat ulashdi.

Pedagogika universitetida xayriya hashari bo'lib o'tmoqda

tdpu.pr — Sat, 21 Aug 2021 09:15:58 GMT

Oʻzbekiston Respublikasi Vazirlar Mahkamasining tegishli farmoyishi bilan bugun yurtimizda “Yangi Oʻzbekistonda erkin va farovon yashaylik” shiori ostida umumxalq obodonlashtirish xayriya hashari oʻtkazilmoqda.

Bugun erta tongdan Toshkent davlat pedagogika universitetida xalqimizga xos boʻlgan qadriyat – hashar ishlari koʻtarinki ruhda boshlandi.

✅Universitetning professor-oʻqituvchilar hamda xodimlari tomonidan universitet hududi va atrofidagi maydonlar tozalanib, oʻquv binolari, sport inshootlarida obodonlashtirish ishlari olib borildi.

Universitetning barcha fakultetlari hovlisida jamoa tomonidan hashar oʻtkazilib, daraxtlarning tagi tozalandi, ularga shakl berilib, oqlandi.

Magistratura imtihonlari boshlandi. Ularni onlayn kuzatib borish mumkin.

tdpu.pr — Fri, 13 Aug 2021 07:40:17 GMT

Nizomiy nomidagi Toshkent davlat pedagogika universitetiga magistratura bosqichiga roʻyxatdan oʻtgan abituriyentlar uchun imtihonlar boshlandi. Magistratura abituriyentlari test sinovlariga faqat fuqarolik pasporti va imtihonda qatnashish uchun maxsus ruxsatnoma bilan kiritilmoqda. Ruxsatnomani http://magistr.edu.uz va http://ruxsatnoma.edu.uz/ manzili orqali yuklab olish imkoniyati yaratilgan.

Barcha karantin talablariga to‘liq rioya qilgan holda, jarayonlarning tartibli va adolatli o‘tishi ta’minlanmoqda. Magistratura imtihonlari 29 ta yoʻnalishda bo'lib o'tadi. Ushbu yo'nalishlarga 2451 ta nafarga yaqin abituriyent ro’yxatdan o’tgan.

Imtihonlari 13-18 avgust kunlari Chilonzor tumanida joylashgan universitetning Bosh binosida boʻlib oʻtadi.

Imtihonlar oʻtkazilishidan oldin abituriyentlar roʻyxatdan oʻtish vaqtida koʻrsatgan telefon raqamiga SMS xabarnoma yuborilildi. Shuningdek, universitetning Call-markazi orqali ularga imtihon oʻtkazish sanasi, joyi va vaqti maʼlum qilingan.

Xolislik va shaffoflikni taʼminlash maqsadida har bir imtihon oʻtkazish joyi kuzatuv kameralari bilan jihozlangan. Ota-onalar uchun farzandlarining imtihon topshirish jarayonini https://imtihon.edu.uz/Toshkent/25 havola orqali onlayn kuzatish imkoniyati yaratilgan.

Magistraturaga imtihon topshirayotgan abituriyentlar tibbiy niqob, qo‘lqop, shuningdek, ruchka, qadoqlangan suv bilan ham ta'minlanmoqda. Universitet ijtimoiy tarmoq sahifalari va maxsus telegram botlar yordamida magistratura bosqichi abituriyentlarini qiziqtirgan savollarga javob berib borilmoqda.

Nizomiy nomidagi Toshkent davlat pedagogika universiteti huzuridagi Ilmiy Kengash murojaati

tdpu.pr — Wed, 14 Jul 2021 09:11:17 GMT

Xabaringiz bor, prezidentimiz Shavkat Mirziyoyev raisligida 16-iyun kuni oliy ta’lim tizimidagi ustuvor vazifalarga bag‘ishlangan videoselektor yig‘ilishi bo‘lib o‘tgan edi.

Ushbu videoselektorda oliy ta’lim muassasalariga akademik va tashkiliy-boshqaruv bo‘yicha mustaqil qaror qabul qilish vakolati berilishi ta’kidlandi. Bunday ishonch va qo'llab-quvvatlov ortidan OTMlari talab qilinayotgan sifat va natijani ko'rsatishlari, jamiyatning lokomotivi bo'lishlari shart.

Yurtboshimiz bergan imkoniyat va vakolatdan foydalangan holda, Nizomiy nomidagi Toshkent davlat pedagogika universiteti huzuridagi Ilmiy Kengash navbatdagi yig'ilishida universitet jamoasi orasida COVID-19 ga qarshi emlash jarayonlarini jadallashtirish bo'yicha qaror qabul qilindi. Bunda universitetning barcha professor-o'qituvchilariga, xodimlari va talabalariga vaksinatsiya jarayonlarida faol ishtirok etishlarini so'rab murojaat qilamiz.

Albatta bunda surunkali kasallikka chalinganlar va vaksinatsiya sog'ligiga salbiy ta'sir etishi mumkin bo'lganlarning holati inobatga olinadi.

Davlatimiz rahbari pandemiya sharoitida aholi salomatligi va xavfsizligini saqlash bo'yicha juda katta ishlar amalga oshirilishiga bosh-qosh bo'ldilar. Ayniqsa vaksinatsiya jarayonini tezlashtirish uchun xorijdan tinimsiz vaksinalar olib kelinishi jadal suratlarda davom etmoqda. Yoshlar kelajagimiz deya bot-bot takrorlovchi yurtboshimiz, ularga yengillik yaratish maqsadida vaksina olgan (18 yoshdan katta) talabalarga kontrakt to'lovlariga bir martalik 10 % lik chegirma berilishi haqida qaror qabul qildilar.

26-iyundan boshlab universitetimiz jamoasi ham vaksina bilan emlanish jarayonlarida faol qatnashib kelmqoda. Birinchilar qatorida rektor Alisher Umarov "ZF-UZ-VAC 2001" vaksinasini olib, barchamizga o'rnak bo'ldilar.

Har bir inson uchun o'z hayoti qimmatli. Yaqinlarimiz hayoti esa ikki karra qadrlidir. Biz pedagoglar, ziyolilar hayot uchun kurashamiz. Shunday ekan keling bir bo'lib vaksina olib, kasallikni yengib o'zimiz va yaqinlarimiz hayotini asrab qolaylik.

Toki oramizdan boshqa hech kim bevaqt hayotdan ko'z yummasin!

Vaksina olib yaqinlarimizni asraylik!

tdpu.pr — Wed, 14 Jul 2021 07:28:32 GMT

Nizomiy nomidagi TDPU rektori, Alisher Umarov

To'rt yil avval kimdir "koronavirus degan kasallik keladi, u millionlab insonlarni yostig'ini quritadi, hayot tarzimiz butkul o'zgarib ketadi" desa ustidan kulgan yoki ishonqiramagan bo'lardik.

Afsuski boshimizda shunday global kasallik bilan kurashish, uning oqibatlari yuzaga keltirgan hayotda yashash ham bor ekan. O'zbekistonimizga ham bu kasallik kirib kelganiga bir yarim yilcha vaqt bo’lib qoldi. Shu vaqt mobaynida qanchadan-qancha yurtdoshlarimiz kasallik yenggan yaqinlarining sovuq tanalarini yerga qo'yishdi, qanchadan-qancha insonlar sog'ligi va immunitetining kuchsizlanganligi uchun bugun nimjon va holsiz. Bu balo nafaqat insonlar sog'ligiga balki iqtisodiyot, ta'lim, sog'liqni saqlash, turizm tizimlariga, umuman jamiyat va davlat hayotiga ulkan zarar keltirdi.

Bugun jamiyatimizda ozmi-ko'pmi ushbu kasallik sharoitida yashash, unga qarshi kurashish bo'yicha ko'nikmalar shakllandi. Ammo kasallik hali ham yo'qolgani yoki biz uni yengganimizcha yo'q.

Birinchilardan bo'lib vaksinatsiya jarayonlariga jalb etiluvchilar safiga oliy ta'lim tizimida faoliyat yuritayotgan professor-o'qituvchilar va talabalarning kiritilganligi, ta'lim sohasining ziyolilariga qaratilgan katta e'tibordir. Ammo bugun ba'zi mish-mishtalab insonlar vaksina haqida turli asossiz, bo'lmag'ur gaplarni tarqatib, nafaqat o'zini balki boshqalarni ham hayotini xavf ostiga qo'yayotganligini tasavvur ham qilib ko'rmayapti.

Bugun Turkiya aholisining 20 % i, Qozog'iston aholisining 12 % i vaksina olib bo'lgan sharoitida, salkam 35 millionlik O'zbekiston aholisining 3 foizga yaqinigina vaksina olish jarayonida ishtirok etgan. Nahot biz o'zimiz va yaqinlarimiz sog'ligiga shu qadar befarq bo'lsak?

O'zini ushbu yurtning muhim bir bo'lagi deb sanagan Nizomiy nomidagi Toshkent davlat pedagogika universiteti jamoasi ham birinchilardan bo'lib vaksinatsiya jarayonlarida faol ishtirok etib kelmoqda. Shu vaqtga qadar ushbu kasallik universitetimiz jamoasining ba'zi a'zolarini hayotiga zomin bo'ldi. Bu holat bilan yuzlashish biz uchun juda og'riqli va afsuslanarli holat desam sira yanglishmayman. Bir necha yillar, oylar va kunlar mobaynida birga ishlab, ko'zi ko'zimizga tushib turgan insonni bir kun yoki bir lahza ichida yo'qotish hammamizni larzaga soldi. Jamoadoshlarimizga o'rnak bo'lish va turli mish-mishlarning yolg'on ekanligini yana bir bor isbotlash maqsadida o'zim ham "ZF-UZ-VAC 2001" vaskinasi bilan emlandim. Ishontirib aytamanki jismoniy va ruhiy holatim a'lo darjada.

Prezidentimiz joriy yilning 16-iyun kuni oliy ta'lim tizimiga bag'ishlab o'tkazgan tarixiy videoselektor yig'ilishlarida oliy ta'lim muassasalari mustaqil, jamiyatimizda ta'lim-tarbiya va madaniyatning o'chog'i bo'lishi lozimligini ta'kidlab, soha bo'yicha muhim ijobiy o'zgarishlarni, imkoniyatlarni barchamizga taqdim qildilar. Shu ishonch va qo'llov bayrog'i ostida, pandemiya sababli shakllangan shunday sinovli kunlarda oliy ta'lim muassasalari xalqimiz va jamiyatimizga chinakam o'rnak bo'lishi lozim deb hisoblaymiz. O'qituvchi, ziyoli, pedagoglarning esa bu borada vazifa va ma'suliyati juda ahamiyatlidir. Vaksinatsiya jarayonida barchaga o'rnak bo'lish, yurtboshimiz tomonidan yaratilayotgan ulkan imkoniyatlardan foydalanishga barchani faol chorlash universitetimiz jamoasining burchidir.

Shu sababli kuni kecha bo'lib o'tgan universitet Ilmiy kengashining navbatdagi yig'ilishida kengash a'zolarining yakdil ovozi bilan universitetda vaksinatsiya jarayonlarini jadallashtirish bo'yicha qaror qabul qilindi. Albatta bunda surunkali kasallikka chalinganlar va vaksinatsiya sog'ligiga salbiy ta'sir etishi mumkin bo'lganlarning holati inobatga olinadi. Universitetning oliy boshqaruv organi bo'lgan kengash ta'lim dargohimizning barcha a'zolariga vaksinatsiya jarayonlarida faol qatnashish bo'yicha murojaat qiladi:

Qadrli jamoa a'zolari, professor-o'qituvchilar, talabalar va xodimlar! Butun jamiyatimizga pandemiyadan omon chiqib olish uchun, farzandlarimiz, yaqinlarimiz sog' bo'lishi uchun, ziyoli sifatida ongli qaror qabul qilib, vaziyat taqozo etayotgan vaksinatsiya jarayonlarida qatnashib namuna bo'laylik. Yurtboshimiz boshchiligida vaksina olish bo'yicha yaratilayotgan imkoniyatlardan unumli foydalanib, yaqinlarimiz va o'zimizning sog'ligimiz haqida qayg'uraylik. Barchamiz bir bo'lib, butun jamiyatimiz va dunyoga kasallikka qarshi yakdil kurashib uni yengishimizni ko'rsatib qo'yaylik. Toki boshqa biror yaqinimiz yoki yurtdoshimizning o'limi bizni mahzun etmasin!

Nizomiy nomidagi TDPU rektori, Alisher Umarov

Vaksina olib yaqinlarimizni asraylik!

tdpu.pr — Wed, 14 Jul 2021 07:23:02 GMT

Nizomiy nomidagi TDPU rektori, Alisher Umarov

To'rt yil avval kimdir "koronavirus degan kasallik keladi, u millionlab insonlarni yostig'ini quritadi, hayot tarzimiz butkul o'zgarib ketadi" desa ustidan kulgan yoki ishonqiramagan bo'lardik.

Bugun jamiyatimizda ozmi-ko'pmi ushbu kasallik sharoitida yashash, unga qarshi kurashish bo'yicha ko'nikmalar shakllandi. Ammo kasallik hali ham yo'qolgani yoki biz uni yengganimizcha yo'q.

Nizomiy nomidagi TDPU rektori, Alisher Umarov

KASBDOSHLARMIZ MEHNATI MUNOSIB TAQDIRLANDI

tdpu.pr — Wed, 28 Apr 2021 07:02:10 GMT

Inson mehnat bilan ulugʻ. Mehnat - haѐt demakdir. Oʻzbekiston – inson qadri ulugʻlangan yurt. Ayniqsa, ilm ahliga koʻrsatilayotgan eʼtibor va gʻamxoʻrlik, yoshlarning hurmat va ehtiromi mamlakatimizda inson manfaati, uning shaʼni va qadr-qimmati hamma narsadan ustun ekanini yana bir karra namoyon etmoqda.
Universitetda uzoq yillar samarali ilmiy-pedagogik faoliyat olib borgan, yoshlarni malakali mutaxassislar qilib tarbiyalashda oʻz hissasini qoʻshgan, yirik ilmiy izlanishlari bilan unutilmas meros qoldirgan kasbdoshlarimiz nomzodlari “Nuroniy” jamgʻarmasiga mukofotlash uchun tavsiya etilgan edi.

Oʻzbekiston Faxriylarining ijtimoiy faoliyatini qoʻllab-quvvatlash “Nuroniy” jamgʻarmasi Vasiylik Kengashining 2021-yil 19-apreldagi Qarori bilan universitetning qator faxriy-ustozlari “Mehnat faxriysi” koʻkrak nishoni bilan taqdirlandi:

- Asqarov Axmadali – tarix fanlari doktori, akademik I-darajali “Mehnat faxriysi” koʻkrak nishoni bilan;

- Jurayev Risbay Haydarovich – pedagogika fanlari doktori, akademik I-darajali “Mehnat faxriysi” koʻkrak nishoni bilan;

- Xamidov Xamitjan – filologiya fanlari doktori, professor, I-darajali “Mehnat faxriysi” koʻkrak nishoni bilan;

- Mavlonova Raxima Abdurazzakovna - pedagogika fanlari doktori, professor I-darajali “Mehnat faxriysi” koʻkrak nishoni bilan;

- To'xtaxo'jayeva Minovvar - pedagogika fanlari doktori, professor, I-darajali “Mehnat faxriysi” koʻkrak nishoni bilan;

- Xoliqov Ishqobil - tarix fanlari doktori, professor I-darajali “Mehnat faxriysi” koʻkrak nishoni bilan;

- Karimov Ibroxim - falsafa fanlari doktori, professor, I-darajali “Mehnat faxriysi” koʻkrak nishoni bilan;

- Isyanov Ravil Gennadyevich - pedagogika fanlari nomzodi, professor v.b. II-darajali “Mehnat faxriysi” koʻkrak nishoni bilan;

- Fayzullayev Said-Nasir Said-Burxanovich – biologiya fanlari nomzodi, professor v.b. II-darajali “Mehnat faxriysi” koʻkrak nishoni bilan;

- Xalikov Aʼzam Abdusalomovich - pedagogika fanlari doktori, professor II-darajali “Mehnat faxriysi” koʻkrak nishoni bilan.

- Shadmankulova Dilyarom Xalikovna - filologiya fanlari nomzodi, dotsent II-darajali “Mehnat faxriysi” koʻkrak nishoni bilan.

Universitet jamoasi nomidan bunday yuksak daraja va eʼtiborga erishgan kasbdoshlarimizga uzoq umr, mashaqqatli mehnatlarining rohatini uzoq yillar davomida koʻrib yurishni tilab qolamiz.