📆 "Dolzarb 90 kun" loyihasi doirasida Xalqaro huquq va qiyosiy huquqshunoslik fakulteti tashabbusi bilan talabalar turar joyida "Talabalar ligasi" nomi ostida mini futbol musobaqasi o‘tkazildi. Ushbu sport tadbiri fakultet yoshlari orasida sog‘lom turmush tarzini targ‘ib qilish, jamoaviylikni mustahkamlash va ijtimoiy faollikni oshirish maqsadida tashkil etildi.

⚽️ Musobaqa davomida talabalar jamoalari o‘zaro kuch sinashib, do‘stona, ammo shiddatli bahslarda ishtirok etishdi. Qizg‘in kechgan o‘yinlarni fakultet dekanati bevosita kuzatib borib, hakamlik vazifasini bajardi. Bu esa o‘yin jarayonining shaffof va adolatli o‘tishini ta'minladi.

📊 Musobaqa natijalariga ko‘ra:

🥇 1-o'rinni "TSUL UNN" jamoasi;
🥈 2-o'rinni "YURISTLAR" jamoasi;
🥉 3-o'rinni "OLMAZOR YOSHLARI" jamoasi egalladi.

🏆 G‘olib jamoalarga esdalik sovg‘alar va darajali diplomlar topshirildi. Bu ular uchun nafaqat sportdagi muvaffaqiyat, balki jamoaviylik va mashaqqatli mehnat evaziga erishilgan faxrli yutuq bo‘ldi.

🤝 Musobaqada Talabalar shaharchasi yoshlari ham faol ishtirok etdi. Ularning ishtiroki sportga bo‘lgan qiziqish, sog‘lom raqobat ruhini kuchaytirgan holda, talabalar o‘rtasidagi do‘stlik rishtalarini mustahkamladi.

✅ Zamonaviy sport yo‘nalishlaridan biri bo‘lgan street work out musobaqasi “Dolzarb 90 kun” loyihasi doirasidagi eng noodatiy va ilhomlantiruvchi tadbirlardan biri bo‘ldi. Unda talabalar o‘zining jismoniy tayyorgarligi, bardoshliligi va irodasini sinovdan o‘tkazish imkoniga ega bo‘lishdi.

📝 Musobaqada asosiy e’tibor brus tortilish, turnikda mashqlar bajarish, anjimaniya mashqlariga qaratildi. Ishtirokchilar har bir bosqichda o‘z imkoniyatlarini namoyon etar ekan, hakamlar tomonidan texnika, davomiylik va aniqlik mezonlariga ko‘ra baholandi.

📊 Yakuniy natijalarga ko'ra,
🥇 1-o'rinni Atamuradov Behruz;
🥈 2-o'rinni Erkinov Muhammadamin;
🥉 3-o'rinni Nizomiddinov Elyor egallashdi.

⚡️ Street work out nafaqat jismoniy mashqlarni, balki sog‘lom turmush tarzini, o‘z ustida ishlashni va iroda kuchini shakllantirishni targ‘ib qiladi. Ushbu yo‘nalishda g‘olib bo‘lgan talabalar alohida rag‘batlantirildi va bu musobaqa ko‘pchilik yoshlar orasida katta ilhom uyg‘otdi.

🏆 G‘oliblikni qo‘lga kiritgan talabalar fakultet nomidan maxsus diplom va esdalik sovg‘alari bilan taqdirlandilar.

✅ Xabar berganimizdek (https://t.me/xalqarohuquqfakulteti/5480), Toshkent davlat yuridik universiteti rektorining buyrug'i bilan universitet talabalari uchun yuridik ta’lim va fan sohasi fidoiylari bo‘lgan faxriy professorlar nomiga atab nomli stipendiyalar joriy etilgan edi.

⚖️ Xalqaro huquq va qiyosiy huquqshunoslik fakulteti talabalari uchun – O‘zbekiston Fanlar akademiyasining Akademigi, O‘zbekistonda xizmat ko‘rsatgan fan arbobi, “Jasorat” medali sohibi, yuridik fanlar doktori, professor Rahmonqulov Hoji-Akbar Rahmonqulovich nomidagi stipendiya joriy etildi.

📝 Joriy haftada mazkur stipendiya uchun saralash bosqichi bo‘lib o‘tdi. Tanlov universitetning belgilangan tartibi asosida tashkil etildi va unda o‘zining bilim darajasi, ilmiy qiziqishi hamda faolligi bilan ajralib turgan talabalar ishtirok etdilar.

📚 Mazkur tashabbus nafaqat ilm-fan fidoyilarining xotirasini e’zozlash, balki yosh avlodga ma’naviy namunalar asosida ulg‘ayishida ham muhim ahamiyat kasb etadi.

✅ Toshkent davlat yuridik universitetining Xalqaro huquq va qiyosiy huquqshunoslik fakulteti tashabbusi bilan maʼnaviy-maʼrifiy yoʻnalishda muhim tadbir tashkil etildi. Tadbir doirasida taniqli shoir va Oʻzbekistonda xizmat koʻrsatgan madaniyat xodimi Bobur Bobomurod taklif etildi hamda Adiblar xiyoboniga sayohat hamda Gʻafur Gʻulom hayoti va ijodiga bagʻishlangan davra suhbati oʻtkazildi.

📝 Davra suhbati doirasida Gʻafur Gʻulomning adabiy merosi, uning oʻzbek adabiyotiga qoʻshgan ulkan hissasi, istiqlol davridagi adabiy baholar va shoirning xalq ongidagi oʻrni haqida chuqur tahliliy fikrlar bildirildi. Bobur Bobomurod Gʻafur Gʻulomning poetik uslubi, gʻoya va mazmun uygʻunligi, xalq dardini his etish va ifoda qilish mahorati borasida oʻzining mulohazalari bilan oʻrtoqlashdi.

📚 Tadbirda talabalar faol ishtirok etib, shoir ijodiga oid oʻz fikr-mulohazalarini bayon qilishdi, savol-javoblar orqali adabiy bilimlarini mustahkamlashdi. Ayniqsa, Gʻafur Gʻulom hayoti va ijodiga bagʻishlab KAHOOT platformasi orqali tashkil etilgan interaktiv tanlov ishtirokchilar tomonidan katta qiziqish bilan kutib olindi. Tanlov davomida talabalar shoir hayoti, asarlari, ijodiy bosqichlari va tarixiy xizmatlariga oid savollarga tezkorlik va aniqlik bilan javob berishga harakat qilishdi.

⚡️ Tadbir yakunida Bobur Bobomurod talabalarga ijodiy izlanishlarida muvaffaqiyatlar tiladi va Gʻafur Gʻulom merosini oʻrganishda davom etish lozimligini taʼkidladi.

🎓 Fakultet rahbariyati bunday tadbirlar muntazam oʻtkazilishini rejalashtirayotganini bildirar ekan, maʼnaviyat va maʼrifatning kuchi yoshlarga ruhiy madad boʻlishini alohida qayd etdi.

⚖️ Xalqaro huquq va qiyosiy huquqshunoslik fakultet talabalariga Mamlakatimizda qishloq xo‘jaligi, iqtisodiyot, korrupsiyaga qarshi kurash va xalqaro hamkorlik sohalarida amalga oshirilayotgan muhim islohotlar to‘g‘risida "Ma'rifat darsi" doirasida professor Rahmon Oʼrmonovich Qoʼchqorov ma'ruza qildi.

Ushbu ma'ruza davomida quyidagi masalalar bo'lib o'tdi.
⏺ Qishloq xo‘jaligida yangi loyihalar va xalqaro hamkorlik
2025-yil 3-martda Prezident Shavkat Mirziyoyev agrosanoat tarmoqlari samaradorligini oshirish, ilg‘or texnologiyalarni joriy etish;
⏺ Xitoy, Italiya, Yaponiya tajribasidan foydalanilib, urug‘chilik va ko‘chatchilikni rivojlantirish uchun 200 million dollar sarmoya ajratilganligi to'g'risida;
⏺ Italiya oliy ta’lim muassasalariga 200 nafar talaba yuborilishi;
⏺ Kambag‘allikni qisqartirish va bandlikni oshirish 2025-yil 4-martda aholi bandligi va investitsiyalar masalalari ko‘rib chiqildi.
⏺ Yanvar-fevral oylarida 719 ming kishi ish bilan ta’minlanganligi;
⏺ Jizzax, Samarqand, Buxoro va Navoiy viloyatlari yuqori natijalarga erishganligi.
⏺ 5-mart kuni Korrupsiyaga qarshi kurashish bo‘yicha milliy kengash yig‘ilishida bo'lib o'tgan masalalar;
⏺ “Shaffof qurilish” dasturi, elektron davlat xizmatlari (721 tur) joriy etilganligi.
⏺ Oliy ta’lim tizimi raqamlashtirilib, byurokratik jarayonlar kamaytirilganlgi.
⏺ Xalqaro hamkorlik va tashqi siyosatda 5-mart kuni SHHT Bosh kotibi bilan uchrashuv bo‘lib, tashkilotning modernizatsiyasi muhokama qilinganligi to'g'risida ma'lumotlar berildi.

🇺🇿 Professor R.Qo‘chqorovning ta'kidlashicha, bu islohotlar nafaqat ichki barqarorlikni ta'minlash, balki mamlakatimizning xalqaro sahnadagi o‘rnini mustahkamlashga ham katta hissa qo‘shmoqda.

📚 Shuningdek, talabalar islohotlarning ahamiyati va ularning amalga oshirilish jarayonidagi masalalar yuzasidan savollar berib, o‘z fikrlarini bildirishdi.

📝 Ma'ruzada ishtirok etgan talabalar mamlakatimizda olib borilayotgan islohotlarni qo‘llab-quvvatlab, o‘zlarini kelajakda ushbu jarayonlarda faol ishtirok etishga tayyor ekanliklarini bildirishdi.

👍 Toshkent davlat yuridik universiteti talaba 1 va 2-sonli Talabalr turar joyi qizlari o‘rtasida oshpazlik mahoratini sinovdan o‘tkazish, ijodiy fikrlash hamda jamoaviy ishlash ko‘nikmalarini rivojlantirish maqsadida “Eng mazali salat” tanlovi bo‘lib o‘tdi.

⚡️ Tanlovda turli xil talabalar turar joylarida istiqomat qiluvchi qizlar ishtirok etib, o‘zlarining pazandalik borasidagi mahoratlarini namoyish etdilar.

📊 Qizlar nafaqat mazali va o‘ziga xos salatlar tayyorlashdi, balki ularni chiroyli bezatish, taqdim etish san’atida ham o‘z mahoratlarini namoyon etishdi. Hay’at a’zolari taomlarning mazasi, taqdimoti va bezaklariga alohida e’tibor qaratib, g‘oliblarni aniqlashdi.

🏅 Natijalarga ko‘ra, “Eng mazali salat” nominatsiyasida 2-sonli Talabalar turar joyi Xalqaro huquq va qiyosiy huquqshunoslik fakulteti qizlari g‘oliblikni qo‘lga kiritishdi. Ular tayyorlagan salat ta’mi va tarkibining uyg‘unligi hakamlar tomonidan yuqori baholandi.

🤝 Tadbir iliq va samimiy muhitda o‘tib, ishtirokchilar o‘zaro tajriba almashish, pazandalik sirlarini o‘rganish imkoniga ega bo‘lishdi. Bunday tanlovlar nafaqat talaba qizlarning ijodiy va amaliy ko‘nikmalarini rivojlantiradi, balki ular orasida do‘stona munosabatlarni mustahkamlashga ham xizmat qiladi.

⚖️ Toshkent davlat yuridik universitetining Xalqaro huquq va qiyosiy huquqshunoslik fakultetida "Mis Yurist - 2025" tanlovining fakultet bosqichi bo‘lib o‘tdi.

🎯 Mazkur tanlov yosh huquqshunos ayollarni qo‘llab-quvvatlash, ularning intellektual va notiqlik salohiyatini oshirish hamda jamoatchilik oldida o‘zini erkin ifoda etish ko‘nikmalarini shakllantirishga qaratilgan.

📚 10dan ortiq tashabbuskor talaba-qizlar ishtirok etgan tanlovda talabalar turli shartlar orqali o‘z bilim va iste’dodlarini namoyish etishdi.

📊 Tanlov yakunlariga ko‘ra, komissiya qaroriga binoan Muhidinova Marjona va Xayrullayeva Muxlisa g‘olib deb topilib, universitet bosqichida ishtirok etish uchun yo‘llanma qo‘lga kiritdi.

⚡️ Mazkur tadbir fakultet talabalari o‘rtasida sog‘lom raqobat muhitini yaratish, yetuk mutaxassis bo‘lib shakllanish yo‘lida ularni rag‘batlantirishga xizmat qilishi bilan ahamiyatlidir.

🤝 Tanlovda ishtirok etgan barcha qizlar kelajakda huquq sohasi rivojiga munosib hissa qo‘shishlariga ishonch bildiramiz va universitet bosqichida yo‘llanmani qo‘lga kiritgan talaba-qizlarimizga omad tilaymiz!

Qadrli ustozlar!
Aziz talaba-yoshlarimiz!
Hurmatli yurtdoshlar!

Sizlarni Yangi — 2025-yil bilan chin qalbdan tabriklayman!
Yangi yil ostonasida ortga nazar tashlab, yil davomida erishilgan yutuqlar salmog‘idan quvonish bayram fayziga fayz qo‘shadi. Shukrki, universitetimiz yildan-yilga zafarli marralarga erishishni davom ettirib, ulkan natijalarga erishib kelmoqda.

O‘tib borayotgan 2024-yilda universitetimizda amalga oshirilgan keng ko‘lamli islohotlar va ular berayotgan natijalardan barchamiz faxr tuyamiz. Ayniqsa, bizning asosiy vazifamiz bo‘lgan raqobatbardosh kadrlar tayyorlash va ilm-fan taraqqiyotidagi ishtirokimiz ham tugab borayotgan yilda sezilarli darajada yuqoriladi.

Talaba yoshlarimizning ilm-fanda, sportda qo‘lga kiritayotgan yutuqlari qalblarimizga alohida quvonch va g’urur olib kirdi. Hurmatli Prezidentimizning yoshlarga bo‘lgan e’tibori davlat siyosati darajasiga ko‘tarilgani, ilm-fan rivoji uchun yaratilayotgan keng imkoniyatlar mamlakatimizni taraqqiyot sari ilgarilab bormoqda. Yangi O‘zbekistonning uchinchi Renessans orzusi real haqiqatga aylanmoqda desak aslo mubolag’a bo‘lmaydi.

Qadrli ustozlar, muhtaram professor-o‘qituvchilar, aziz talabalar!

Sizlarni yana bir bor Yangi yilingiz bilan chin qalbimdan muborakbod etaman. Ilmiy, ijodiy, ta’lim yo‘lidagi faoliyatingiz va intilishlaringizda ulkan muvaffaqiyatlar, oilangizga totuvlik, o‘zingizga mustahkam sog‘lik, xonadoningizga fayzu baraka tilab qolaman!
Yurtimizda inson qadri ulug’lanayotgan bir davrda, har bir oila, har bir inson murod-maqsadiga yetishiga tilakdoshman! Yangi yil jonajon Vatanimizga fayzu baraka, yangi yutuq va zafarlar olib kelsin!
Yangi yil barchamizga muborak bo‘lsin!

Barchangizga cheksiz hurmat va ehtirom ila,
Umarxanova Dildora Sharipxanovna,
Xalqaro huquq va qiyosiy huquqshunoslik fakulteti dekani, yuridik fanlari doktori, professor.

✅ Joriy yilning 5-noyabr kuni Toshkent davlat yuridik universitetida (TDYU) Xalqaro Qizil Xoch Qo‘mitasining (XQXQ) Toshkentdagi huquqiy maslahatchisi Marat Aminov ma’ruza o‘tkazdi.

📚 Ma’ruza TDYU va N.I. Lobachevskiy nomidagi Milliy tadqiqotlar Nijegorod davlat universiteti bilan hamkorlikdagi qo‘shma ta’lim dasturi doirasida ta’lim olayotgan talabalar uchun tashkil etildi.

📝 Marat Aminov o‘z ma’ruzasida Xalqaro Qizil Xoch Qo‘mitasining asosiy vazifalari, faoliyati, shuningdek, xalqaro gumanitar huquqning (XGH) asosiy tamoyillari haqida so‘zlab berdi. U qurolli mojarolar sharoitida inson huquqlarini himoya qilish, XQXQning inqirozli vaziyatlardagi o‘rni va vazifalari, shuningdek, amaliyotda XGH normalarini qo‘llashning o‘ziga xos jihatlariga alohida e’tibor qaratdi.

⚡️ Ma’ruza talabalarda katta qiziqish uyg‘otdi va ular mavzular yuzasidan ko‘plab savollar bilan faol ishtirok etishdi. Bu esa tinglovchilarning xalqaro huquq va gumanitar missiyalarga qiziqishi va tayyorgarlik darajasining yuqoriligidan dalolat beradi.

Bizga ma’lumki, joriy yilning 8-dekabr kuni O‘zbekiston Respublikasi Konstitutsiyasining 32 yilligi nishonlanadi. Shu munosabat bilan joriy yilning 22-noyabr kuni Toshkent davlat yuridik universiteti Xalqaro huquq va inson huquqlari kafedrasi professor-o‘qituvchilari tomonidan Xalqaro huquq va qiyosiy huquqshunoslik fakulteti Talabalar turar joyida “Konstitutsiya - huquq va erkinliklarimiz kafolati” mavzusida huquqiy targ‘ibot tadbiri o‘tkazildi.

Mazkur tadbirda kafedra professor-o‘qituvchilari Konstitutsiyamizning mazmun-mohiyati, hayotimizda tutgan o‘rni va ahamiyati bo‘yicha talabalar bilan yaqindan suhbatlar o‘tkazildi.

Bundan tashqari, O‘zbekiston Respublikasi Konstitutsiyasi qonun ustuvorligini, uning barcha fuqarolar uchun tengligini, shuningdek, davlat hokimiyatining qonun chiqaruvchi, ijro etuvchi va sud hokimiyatiga bo‘linishining huquqiy prinsipini belgilab beruvchi asosiy qonunimiz ekanligini ta’kidlab o‘tdilar.