“Дирафши Коваёнӣ” дар Қазоқистон пирӯз шуд

Муаллиф: Мусои Бобоҳоҷӣ, Asia-Plus

Акс аз саҳифаи фейсбукии Суҳроб Ҷанҷолов

Намоишномаи “Дирафши Коваёнӣ”-и Театри давлатии ҷавонони Тоҷикистон ба номи М.Воҳидов дар сеюмин Фестивали байнулмилалии театрҳои ба номи Жанат Хоҷиев соҳиби ҷойи аввал гардид.

Дар ин бора ба Asia-Plus коргардони ин намоишнома Нозим Меликов хабар дод.

“Ин бори аввал нест, ки намоишҳои мо дар фестивалҳои театрӣ соҳиби ҷойҳои намоён мешаванд. Ин рисолати мо – театриён аст, ки намоишро омода карда, ба тамошобин пешниҳод созем. Боиси ифтихор аст, ки “Дирафши Коваёнӣ” дар фестивали Қазоқистон аз ҷониби ҳайати ҳакамон ва бинандагон баҳои арзанда гирифта, “Беҳтарин намоиш” дониста шуд”, - афзуд ӯ.

Фестивали мазкур рӯзҳои 15-19 октябр дар Театри мусиқию драмавии шаҳри Жезказгани Қазоқистон доир гардид. Он ба поси хотири арбоби шоистаи Қазоқистон, яке аз асосгузорони театри Жезказган, коргардон Жанат Ҳоҷиев бахшида шудааст.

Дар ин фестивал гурӯҳҳои театрӣ аз минтақаҳои гуногуни Қазоқистон, инчунин аз Тоҷикистону Ӯзбекистон ва Қирғизистон ширкат варзиданд.

Намоиши «Дирафши ковиёнӣ» аз рӯйи “Шоҳнома”-и Абулқосим Фирдавсӣ дар таҳияи коргардон Нозим Меликов рӯйи саҳна омадааст.

Акс аз саҳифаи фейсбукии Суҳроб Ҷанҷолов

“Миннатдории худро ба Институти “Ҷамъияти кушода” – Бунёди мадад дар Тоҷикистон барои дастгириашон мерасонам, ки сафари ҳунармандони моро ба фестивали Қазоқистон маблағгузорӣ карданд. Инчунин ба Вазорати фарҳанги ҶТ барои иҷозатнома изҳори сипос мекунам”, - гуфт коргардон.

Ёдовар мешавем, ки “Дирафши коваёнӣ” дар Фестивал-озмуни ҷумҳуриявии театрҳои касбӣ “Парасту-2017” соҳиби шоҳҷоиза гардида буд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.

https://asiaplustj.info/tj/news/tajikistan/society/20191021/dirafshi-kovayoni-dar-jashnvorai-qazoiston-piruz-shud