ЙЎЛ ХАТОНИ КЕЧИРМАЙДИ
Жиноят ишлари бўйича Когон туман суди ўз биносида очиқ суд мажлисида Аббосов Аббос Алиевич (исм-шарифи ўзгартирилган)га нисбатан жиноят ишини кўриб чиқди.
Аббосов Аббос Алиевич 1971 йил 3 май куни Бухоро шаҳрида туғилган, Ўзбекистон Республикаси фуқароси, 3 нафар фарзанди бор, вақтинча ишсиз.
Судланувчи А.Аббосов 2024 йил 24 октябрь куни соат 15:50 ларда бошқарувида бўлган МЧЖга тегишли “Исузу” русумли чиқинди ташувчи юк автомашинасини Когон туман ҳудудидан ўтувчи 4Р69-сонли автомобиль йўли бўйлаб, Когон туман “Сиёзпоён” МФЙ томондан “Наврўз” МФЙ томон йўналишида бошқариб бориб, ушбу йўлнинг 15-километрига етганида, Ўзбекистон Республикаси Вазирлар Маҳкамасининг 2022 йил 12 апрелдаги 172-сон қарорига асосан тасдиқланган амалдаги йўл ҳаракати қоидаларининг 1-боб 2-банди, 3-банди, 4-банди, 11-банди, 77-банди ва 78-банди талабларини қўпол равишда бузиб, ҳаракат йўналиши бўйича қатнов қисмини ўнг томондан чап томонга велосипед бошқариб кесиб ўтаётган фуқаро 1949 йилда туғилган Раупов Рауф Равилович (исм-шарифи ўзгартирилган)ни автомашинасининг олд қисми билан уриб юбориб, йўл-транспорт ҳодисаси содир қилган. Оқибатда, фуқаро Раупов Рауф Равилович “Оғир” тан жароҳати олиб, ҳодиса жойида вафот этган.
Суд Аббосов Аббос Алиевични Ўзбекистон Республикаси Жиноят кодексининг 266-моддасининг 2-қисмида кўрсатилган жиноятни содир этганликда айбли деб топиб, унга шу модда билан Жиноят кодексининг 45,57-моддаларини қўллаб, 1 (бир) йил муддатга муайян ҳуқуқдан, яъни барча турдаги транспорт воситаларини бошқариш ҳуқуқидан маҳрум қилган ҳолда, 3 (уч) йил озодликни чеклаш жазоси тайинланди.
Ҳақли савол туғилади?! Бундай машъум йўл транспорт ҳодисаси содир бўлмаслиги ҳам мумкин эди. Афсуски содир этилди, бир бегуноҳ инсон бу дунёни эрта тарк этди.