Болалар қувончи – бахтдан нишона!
Бола табассуми – олам безаги. Айниқса, 1 июнь – Халқаро болаларни ҳимоя қилиш кунида сайёрамиз болажонларнинг самимий ва беғубор кулгуси билан янада яшариб кетади. Бу сана қуёшли диёримизда ҳам ўзгача интиқлик билан кутилади. Азалдан болажон бўлган халқимиз шу куни кундалик ташвишларни бир четга қўйиб, фарзандларини истироҳат боғларию кўнгилочар масканларга олиб боришга ошиқади. Болажонларга турли хил совғалар улашилади. Бу эса оилада меҳр-муҳаббат ришталарини мустаҳкамлашга хизмат қилади.
1 июнь “Халқаро болаларни ҳимоя қилиш куни”га бағишлаб, бугун “Нефтчилар” шаҳарчасидаги “Истиқлол” сунъий кўл ҳавзасида туманимиз болалари учун байрам ташкил этилди. Сунъий кўл хавзаси атрофи байрамона кайфиятда безатилган, турли мултьфильм ва эртак қаҳрамонлари эса болажонлар кайфиятини янада кўтаришди.
Даставвал, Бухоро НҚИЗ директор ўринбосари Ж.Х.Зияев сўзга чиқиб, азиз болажонларни байрам билан муборакбод этди ва байрамни очиб берди.
Сунъий кўл ҳавзаси майдончаларида Президентимизнинг 5 ташаббуси асосида турли дастурлар, чиқишлар ташкиллаштирилди. Майдончаларда кураш, гимнастика спорт турлари бўйича кўргазмали чиқишларини намойиш этишди. Кичик кутубхона ташкил этилиб, турли адабиётлар ёш китобхонлар эътиборига ҳавола қилинди. Шунингдек, мусиқа чолғу-асбоблари ёрдамида кичик концертлар, жажжи қизалоқлар ижросидаги рақслар ҳам байрамга ташриф буюрган болажонлар ва меҳмонлар учун жуда қизиқарли муҳитни яратиб бера олди.
Ёшлар иттифоқи БНҚИЗ БТ ҳомийлигида Бухоро вилоят қўғирчоқ театри жажжи меҳмонлар учун байрам дастурини намойиш этди. Турли миллатлар тасвирлаган қўғирчоқлар рақслари болажонларда ажойиб таассурот қолдирди.
Бухоро НҚИЗ Касаба ушмаси қўмитаси томонидан болажонларнинг қувончига янада қувонч улашиш учун музқаймоқ тарқатилди.
