Опера куйчилари Бухорода
Кеча Бухоро шаҳридаги Ёшлар маркази биносида Ўзбекистон халқ артисти Рамиз Усмонов бошчилигидаги Алишер Навоий номидаги Давлат академик Катта театрининг гастроль сафари доирасида дунёга машҳур опера куйчилари ва симфоник оркестр иштирокида концерт бўлиб ўтди.
Бухоро вилояти ҳокимлиги ва Бухоро НҚИЗ Касаба уюшма қўмитаси ҳамкорлигида ташкил этилган концерт дастурига заводимиз ишчи-ходимлари ҳам ташриф буюришди.
Муболағасиз айтишимиз мумкинки, концерт давомидаги жонли ижро, севимли қўшиқлар барча мухлисларга манзур бўлди. Буни мухлислар олқишлари ва концерт сўнгидаги изоҳлардан билиш мумкин эди.
Маълумот учун: Алишер Навоий номидаги Давлат академик Катта театри ҳақли равишда Ўзбекистоннинг етакчи театри, мамлакатнинг миллий ифтихори, мусиқа-театр маданиятининг оҳанрабо маркази ҳисобланади. У ажойиб анъаналарга бой шонли тарихга эга. Бу тарих опера ва балет театри жаҳонда шуҳрат топишига олиб келган юқори даражадаги маданият ҳамда маҳоратнинг мустаҳкам пойдеворидир. Ўтган давр мобайнида театр муайян ютуқларга эришди, тўпланган тажриба такомиллашиб борди. Театр миллий ва жаҳон мумтоз меросининг бутун бойлигини ўзида мужассамлаштирди ва ўзбек мусиқа-саҳна санъатининг бетакрор намуналарини яратди.
Театр тарихи 1920-йиллар ўрталарида миллий маданиятимиз дарғаси, театр санъатининг ҳассос муҳиби, Ўзбекистон халқ артисти Муҳиддин Қори-Ёқубов томонидан профессионал Концерт-этнографик ансамбли ташкил этилган вақтдан бошланади.