“Заковат” билимдонлар беллашувининг финал учрашуви бўлиб ўтди
Олдин хабар қилганимиздек, 9 ноябрь куни “Нефтчилар” маданият саройида завод ёшлари ўртасида “Заковат” интеллектуал ўйинининг I ўрин учун финал босқичи ўтказилди. Унда 2 жамоа: 1-цехнинг “Ёш технологлар” жамоаси ва 2-цех ишчи-ходимларидан ташкил топган “Машъала” жамоалари ғолиблик учун куч синашишди.
Ўйиннинг адолатли ўтиши учун "Ўзбекнефтгаз" АЖ Ёшлар иттифоки етакчилар кенгаши раиси А.Неъматхонов, кенгаш координатори Э.Мухторов, завод Хотин-қизлар қўмитаси раиси Г.Шукурова ҳамда Ёшлар иттифоқи БНҚИЗ БТ раиси Ж.Зияевдан иборат ҳакамлар ҳайъати назорат қилиб борди.
Таъкидлаш жоизки, иштирокчи жамоалар бежизга финал босқичига чиқмаганликларини қизғин баҳс-мунозара ва ўйин охиригача сақланиб турган тенг ҳисоб билан исботлаб беришди.
Ғолиб жамоа қўшимча савол орқали аниқланди.
Ҳакамлар ҳайъати жамоаларнинг берган жавобларини таҳлил қилиб, “Заковат” интеллектуал ўйинининг финал босқичи ғолибини эълон қилишди. Натижаларга кўра 5:6 ҳисобида “Ёш технолог” терма жамоаси ғалаба қозонди ва I ўрин эгаси бўлди. “Машъала” жамоаси эса II ўринни қўлга киритди. Ўйин сўнгида 3та ўрин совриндорлари жумладан, ярим финал босқичи ғолиби 5-цехнинг “Таъмирчи” жамоасини Ёшлар иттифоқи Бухоро НҚИЗ бошланғич ташкилоти томонидан тақдирлаш маросими бўлиб ўтди.
Барча қатнашчи жамоаларга, тадбир ташкилотчилари, шунингдек, уларни қўллаб-қувватлаган цех бошлиқлари, ҳамкасбларига қизғин ўйинлар учун миннатдорчилик билдирамиз. Ғолиб жамоага эса зафар қучишда тўхтаб қолмасликни тилаб қоламиз!
