Бухоро НҚИЗнинг Oil-Star футбол жамоаси “Футбол-2022” турнири ғолиби бўлди
“Ўзбекнефтгаз” АЖ тизим ташкилотлари ўртасида ўтказилган “Футбол-2022” турнири ўз якунига етди. Тошкентдаги “Бунёдкор” футбол клубининг махсус майдонида бўлиб ўтган якуний баҳсларда “Ўзбекнефтгаз” АЖ Марказий аппарат жамоаси Бухоро нефтни қайта ишлаш заводи жамоаси билан беллашди ва 3:2 ҳисобда Бухоро НҚИЗнинг Oil-Star жамоаси ғолибликни қўлга киритди.
Таъкидлаш жоизки, бу йил Бухоро НҚИЗ футбол жамоаси учун совринларга бой йил бўлмоқда. Соҳил футболи бўйича Ўзбекистон чемпионати - 2022да олтин медал совриндори, футзал бўйича 2022/23 йилги Олий Лига иштирокчисига айланган жамоамиз учун "Футбол-2022" турнири кубоги навбатдаги ғалаба бўлди.
Мусобақанинг тантанали тақдирлаш маросимида “Ўзбекнефтгаз” АЖ Бошқарув раиси - “Бунёдкор” футбол клуби президенти Меҳриддин Абдуллаев, футбол бўйича Ўзбекистон олимпия терма жамоаси бош мураббийи Тимур Копадзе, “Бунёдкор” футбол клуби Бош директори Азизбек Ҳайдаров, Ўзбекистон терма жамоаси собиқ ҳужумчиси Камолиддин Мурзоев, “Бунёдкор” футбол клуби бош мураббийи Иван Бошкович ва “Бунёдкор” футбол Академияси директори Ислом Аҳмедов ва бир қатор футбол фахрийлари ҳамда юлдузлари иштирок этишди.
Турли номинациялар бўйича таъкидланган ўйинчилар орасида Бухоро НҚИЗ жамоаси аъзоси Соҳиб Нарзуллаев “Энг яхши ўйинчи” деб топилди.
“Бухоро НҚИЗ” МЧЖ директори Aкбар Фазилов таъкидлаганидек, корхонада спортни қўллаб-қувватлаш – бу ғурурланиш мумкин бўлган яхши анъаналардан биридир.
Миллионлар ўйини корхонамиз учун асосий спорт турларидан ҳисобланади. Миллий байрамлар арафасида ушбу спорт тури бўйича цехлараро чемпионатлар ўтказиш анъанага айланиб улгурди.
Сизларни "Ўзбекнефтгаз” АЖ тизим ташкилотлари орасида ўтказилган
“Футбол - 2022” турнири кубогини қўлга киритганлигингиз билан табриклаймиз.
Бухоро НҚИЗ жамоаси ғалабангиз билан фахрланади.
Умид қиламизки, кейинги йилларда ҳам юқори марраларга эришишда давом этасиз.
Барчангизга яхши кайфият, саломатлик ва янги спорт чўққиларини забт этишни тилаймиз!
Бошқарув раиси Меҳриддин Абдуллаевга катта ташаббус хусусан, ўндан ортиқ жамоаларни бир майдонда йиға олгани, тизимдаги корхона ва ташкилотлар жамоалари ўртасида дўстона алоқаларни мустаҳкамлагани учун алоҳида миннатдорчилик билдирамиз!
“Ўзбекнефтгаз” АЖ тизимида навқирон авлоднинг мамлакатимиз келажаги учун муҳимлигини англаган ҳолда спортни ривожлантиришга қаратилган лойиҳаларга алоҳида эътибор қаратилмоқда.
