Buxoro NQIZda ishlab chiqarish samaradorligini oshirish va uni yanada rivojlantirish masalalari muhokama qilindi
Buxoro neftni qayta ishlash zavodi va “O‘zbekneftgaz” AJ rahbariyati “SOCAR Downstream Management” va “SOCAR Trading” kompaniyalari delegatsiyasi bilan ishchi uchrashuv o‘tkazdi.
Uchrashuv xalqaro tarmoq hamkorlari bilan hamkorlikni kengaytirish doirasida bo‘lib o‘tdi.
Tashrif korxonaning operatsion faoliyatini tahlil qilish va uni yanada rivojlantirishning ustuvor yo‘nalishlarini belgilashga qaratildi.
Dastur davomida delegatsiya zavodning ishlab chiqarish jarayonlari bilan tanishdi va tegishli bo‘linmalar bilan uchrashuvlar o‘tkazdi. Quvvatlardan foydalanish, operatsion barqarorlik, xomashyoni qayta ishlash va ishlab chiqarilayotgan mahsulotlar tarkibi masalalari ko‘rib chiqildi. O‘tgan davrlardagi ish ko‘rsatkichlariga, jumladan, to‘xtashlar va uskunalarning ishonchliligiga ta’sir qiluvchi omillarga alohida e’tibor qaratilgan.
Shuningdek, rejalashtirish, ishlab chiqarish ma’lumotlarini boshqarish va raqamli yechimlarni rivojlantirish bo‘yicha fikr almashildi. Samaradorlikni oshirish, ichki jarayonlarni takomillashtirish va sanoat xavfsizligi tizimini rivojlantirish bo‘yicha yondashuvlar muhokama qilindi.
Tomonlar amaliy hamkorlik salohiyatini qayd etib, asosiy yo‘nalishlar bo‘yicha professional muloqotni davom ettirishga kelishib olishdi.
“O‘zbekneftgaz” AJ tarkibidagi Buxoro neftni qayta ishlash zavodi zamonaviy yechimlarni joriy etish, samaradorlikni oshirish va sohani barqaror rivojlantirishga e’tibor qaratgan holda xalqaro hamkorlar bilan hamkorlikni izchil rivojlantirmoqda.
