“Oil star” жамоамиз ўйинчилари учун ажойиб имконият
Ўзбекистонда футболни аҳоли ўртасида энг оммавий спорт турига айлантириш, юқори иқтидорга эга бўлган ёш футболчиларни танлаш, саралаб олиш ва уларни профессионал спортчилар сифатида тайёрлаш тизимини йўлга қўйиш, мамлакат футболини ривожланган мамлакатлар билан рақобат қила оладиган даражага етказиш, халқаро талаб ва стандартлар асосида футбол бўйича мутахассисларни тайёрлаш, футбол клублари фаолиятини ривожлантиришга алоҳида эътибор қаратилмоқда.
6 апрель куни Президент Шавкат Мирзиёев ёшлар сиёсати ва спортни ривожлантириш бўйича таклифлар тақдимоти билан танишди.
Тақдимотда спорт соҳасида давлат бошқарувини самарали ташкил қилиш ва уларни ривожлантиришга доир чора-тадбирлар белгиланди. Хусусан, иқтидорли футболчиларни танлаш ва тайёрлашнинг узвийлигини таъминлаш мақсадида Ўзбекистон футбол ассоциацияси ҳузурида 14 та футбол мактаби, “Дўстлик” стадиони негизида барча ёш тоифалари учун Терма жамоалар маркази ташкил этилади.
Футбол бўйича мутахассисларни тайёрлаш маркази фаолияти такомиллаштирилиб, Хорватия, Япония ва бошқа давлатлардан мутахассислар жалб қилиниши белгиланди.
Бу эса бизнинг “Oil star” жамоамиз футболчилари учун ҳам яхши имкониятдир.
5 апрелда Тошкентда мини-футбол бўйича Ўзбекистон олий лигасида 8-турнинг сўнгги ўйини бўлиб ўтди. Турнирда мамлакатнинг барча вилоятларидан 12 та жамоа иштирок этди. “Oil star” терма жамоаси (БНҚИЗ) Бухоро вилояти шарафини ҳимоя қилди.
Биринчи ўйинда жамоамизга “Локомотив” қарши чиқди.
Ўйин давомида "Локомотив" пешқадамлиги билан ажралиб турди, лекин ҳар сафар жамоамиз ажойиб ўйнади ва ўйин сценарийсини ўз фойдасига ўзгартирди. Натижада, “Oil star” 4:2 ҳисобида ғалаба қозонди.
Голлар: Шоҳжахон Шоназаров 11, Бехруз Салиев 23, Исохон Иброҳимов 27, Феруз Фахриддинов 35.
Иккинчи ўйинда жамоамиз “Насаф” билан учрашди.
Насаф жамоасига қарши кескин ва қизиқарли учрашувда рақиблар 4:1 ҳисобида ғалаба қозонишди.
Учинчи ўйинда жамоамизга “Пахтакор” қарши чиқди.
5 апрель куни “Oil star” жамоаси ўзининг 3-ўйинини ўтказди. Ҳал қилувчи баҳсда терма жамоамиз “Пахтакор" жамоасини 3:2 ҳисобида мағлуб этди.
Голлар: Феруз Фахриддинов 21, Исохон Иброҳимов 31, Артур Умуров 36.
Ҳозирда “Oil star” турнир жадвалида тўртинчи ўринни эгаллаб, етакчилардан 15 очко ортда қолмоқда.
“Бизнинг ўз тарихига эга ажойиб жамоамиз бор. Биламан “Oil star” ҳеч қачон тўхтаб қолмайди, биз эса олдимизга фақат улкан вазифаларни қўямиз.
Ўзбекистон олий лигасидаги ғалабани кутмоқдамиз. Жамоамизга омад ва чиройли голлар тилайман!”. - Акбар Фазилов, Бухоро нефтни қайта ишлаш заводи директори.