Баҳорнинг илк айёми муносабати билан байрам тадбири ташкиллаштирилди
Бухоро НҚИЗ раҳбарияти ва Касаба уюшма қўмитаси ташаббуси билан 8 март — "Халқаро хотин-қизлар куни"га бағишланган байрам тадбири ташкиллаштирилди.
Баҳорнинг илк байрами муносабати билан заводимизнинг дилбар, фидойи ва меҳрибон хотин-қизларига байрам дастурхони ёзилиб, кўнгиллар шод этилди.
Илк дақиқалардан залда байрам шукуҳи сезилди. Байрамона безатилган стол, қувноқ янграган куй-қўшиқлар дилбар аёлларимиз, мухтарама опа-сингилларимиз кўнглига бир олам қувонч олиб кирди.
Йиғилган аёллар жамоасига Бухоро нефтни қайта ишлаш заводи директори Aкбар Фазилов самимий тилаклар ва миннатдорчилик сўзлари ила мурожаат қилди. Катта оилаларда меҳнат ҳамда фарзанд тарбиясини уйғунлаштирган аёллар муносиб келажак авлодни вояга етказишда алоҳида ҳисса қўшиб, ўз ибратлари билан қувонтиришларини алоҳида таъкидлади.
Корхонанинг иқтидорли ходимлари ижросидаги қўшиқ ҳамда рақслар жамоамизнинг гўзал аъзоларига қувончли кайфият бағишлади.
Шунингдек, байрам тадбирига корхонанинг меҳнат фахрийлари ва нафақага чиққан аёл ишчи-ходимлари ҳам таклиф этилиб, дам олиш ва бир-бирлари билан мулоқот қилиш имконияти яратилди.
