BU YERDA HAR BIR XODIMNING ISHI MUHIM

Vohida Shermatova har kuni ishga ishtiyoq bilan shaylanib, o‘z mehnat vazifalarini sidqidildan bajarib, kechki payt esa xonadonida sarishtalik, oilaviy uyg‘unlikni yaratish uchun uyi tomon oshiqadigan insonlardan.

Enter Steel mashinasozlik zavodida ma’muriy-xo‘jalik bo‘limining oddiy xodimi sifatida mehnat qilayotgan Vohida o‘z ishiga hamisha katta mas’uliyat bilan yondashadi, shu sabab hamkasblari orasida chinakam hurmat qozongan. Xushchaqchaq va ijobiy xarakterga ega bo‘lgan qahramonimiz 15 nafar farrosh-texniklardan iborat kichik ayollar jamoasining yuragidir. U zamonaviy mini-kar — Tennant markasiga tegishli pol yuvish mashinasini mohirona boshqarib, ishlab chiqarish binolarini tozalaydi va tartibga keltiradi.

— Zavodda 2021-yildan buyon ishlab kelaman, zavod yaqinida joylashgan «Qo‘shtepa» mahallasida istiqomat qilaman, — deydi Vohida Shermatova. — Ishga joylashish borasida omadim chopgan deb hisoblayman, chunki uch nafar maktab o‘quvchisining onasi uchun uydan piyoda chiqsa, zumda yetib boradigan joyda va munosib maosh to‘laydigan ish topish haqiqiy omaddir. Ertalabdan zavod ofislarini tartibga keltiramiz, keyin mashinalarimizni “egarlaymiz” va navbat bilan sexlarni tozalab chiqamiz.

Aytish joizki, zavodda ikkita shunday pol yuvish agregati, yana turli modellari mavjud. Vokhida esa ancha zamonaviyroq va gabariti bo‘yicha kattaroq modelni boshqaradi.

— Bizning zavodimiz tumandagi eng zamonaviy zavod, — deydi hikoyamiz qahramoni. — Har xil delegatsiyalar, jumladan, xorijdan mutaxassislar muntazam kelib turadi, shuning uchun ham hamma joyda, ishlab chiqarish sexlarida ham barchasi toza va ozoda bo‘lishi kerak. Jamoamiz bunga erishsh uchun harakat qilmoqda. Korxona ma’muriyati va xodimlari mehnatimizni qadrlashidan xursandmiz. Ko‘pincha rahbariyatimizdan: “Zavodimizda ishning katta- kichigi yo’q, chunki yuqori natijalarga erishish uchun har birimizning mehnatimiz muhimdir!”, degan so‘zlarni eshitamiz.

Fursatdan foydalanib, barcha hamkasblarimni kirib kelayotgan Yangi yil bilan tabriklamoqchiman va Enter Steel xodimlariga sog‘lik, baxt va muvaffaqiyatlar tilayman!