Vladimir Maslovning barqarorligi
O‘zbekiston kelajagini belgilab beruvchi innovatsion texnologiyalar orasida quyosh energetikasi alohida o‘rin tutadi. Ushbu soha rivojiga hissa qo‘shayotganlar orasida Enter Solar zavodida fotoelektrik modullarni ishlab chiqarish bo‘yicha avtomatlashtirilgan liniya operatori Vladimir Maslov ham bor.
— Men bu yerga boshqa ishlab chiqarishdan, Enter Steel zavodidan kelganman, — dedi Vladimir Maslov. — Avvalgi ikki yil payvandchi bo‘lib ishlagandim, biroq bir yil avval bir joyda to‘xtab qolmaslik istagi meni quyosh panellari ishlab chiqarilishiga yetakladi. Bu yangi imkoniyatlar sari qadam ekanligini darhol angladim. Zamonaviy uskunalar bilan jihozlangan toza va yorug‘ ustaxonada ishlash — bu orzu! Shu bilan birga, barcha ilg‘or texnologiyalarni noldan boshlab o‘zlashtirishim kerak edi. Italiyadan kelgan mutaxassislar boshchiligida «Ecoprogetti» kompaniyasining avtomatlashtirilgan liniyasining ishlashini o‘rgandim. O‘qitish olti oy davomida amaliy mashg‘ulotlar yordamida o‘tkazildi. Ustozim va bevosita rahbarim Timur Xaybullinning bergan maslahatlari ham men uchun qimmatli, u menga uskunalar bilan ishlash ko‘nikmalarini o‘zlashtirishimda yordam berdi. Payvandchi bo‘lish uchun kollejda o‘qish yetarli, lekin endi menda oliy ma’lumot olish istagi paydo bo‘ldi — yangi mas’uliyat meni shu qadar rag‘batlantirmoqda.
Ishlab chiqarish liniyasining Vladimir ishlaydigan qismi stringer deb ataladi. Bu birinchi bosqich bo‘lib, unda robot fotoelementlarda ehtimoliy nuqsonlar bor-yo‘qligini tekshiradi, ularni maxsus sim — flyus va ribbon yordamida bir-biriga ulaydi, so‘ngra tayyor yacheykani EVA-plyonka bilan qoplangan oynaga joylashtiradi.
— Uchastkamni «ishlab chiqarishning yuragi» deb hisoblayman, — dedi qahramonimiz. — Agar men ish boshlamasam, butun ishlab chiqarish tsikli to‘xtaydi. Shuning uchun mendan maksimal darajadagi mas’uliyat va diqqatni jamlash talab etiladi, chunki sifat bizning ustuvor maqsadimizdir.
Tashqi tomondan bu yerda barcha operatsiyalar robot tomonidan bajarilayotgandek tuyulishi mumkin, ammo mutaxassislarga juda katta mas’uliyat yuklangan — fotoelementlar ta’minoti va flyus darajasini, listlarga fotoelementlarni yotqizishni, yacheykalarni yuqori sifatli ulanishini nazorat qilish, shuningdek, robot tomonidan brakka chiqarilgan elementlarni tekshirish va nosozliklarni bartaraf etish zarur. Italiyalik mutaxassislar doimiy ravishda sex bilan aloqada bo‘lib, har doim yordam berishga tayyor, ammo liniya operatorlari uskunalarning o‘ziga xos xususiyatlarini allaqachon yaxshi o‘zlashtirib olishgan, bu ularga ko‘pgina texnik masalalarni mustaqil ravishda hal qilish imkonini beradi.
— Korxona innovatsion bo‘lib, avvaliga menda uddalay olmayman degan qo‘rquv bor edi, ammo hozir men o‘z malakamga ishonchim komil, — dedi Vladimir Maslov so‘zining yakunida. — Barqarorlik hukm surgan joyda ishga boʻlgan chinakam ishtiyoq paydo boʻladi va siz rahbariyatning qoʻllab-quvvatlashini his qilasiz. Buni kompaniyamizning har bir xodimiga tilab qolaman!
