ҲАР БИР ФУҚАРО УЧУН ЗАРУР
АДЛИЯ ВАЗИРЛИГИ томонидан аҳолининг ҳуқуқий билимини баҳолаш ва рағбатлантириш, фуқароларнинг ҳуқуқий саводхонлигини юксалтириш, шунингдек, қонун ҳужжатларининг мазмун-моҳияти ва аҳамиятини аҳолига етказиш бўйича ишлар самарадорлигини ошириш мақсадида республика бўйлаб “Ҳуқуқий билимлар куни” номи остида флешмоб кўринишидаги тадбирлар ўтказилди.
#huquqiybilimlarkuni ҳештеги остида ўтган флешмоб Қорақалпоғистон Республикаси ва вилоятлар ҳамда улардаги туманлар марказларида ташкил этилди.
Тошкент шаҳри ҳудудида эса бир вақтнинг ўзида 6 та жойда: Мирзо Улуғбек туманидаги “Эко бозор” савдо мажмуаси, Чилонзор туманидаги “Ғафур Ғулом” истироҳат боғи, Шайхонтоҳур туманидаги “Анҳор Локомотив” боғи, Яккасарой туманидаги “Next” савдо мажмуаси, Юнусобод туманидаги “Олой” бозори ҳамда “Mega PLANET” савдо мажмуаси марказий майдонларида бўлиб ўтди.
Флешмобда иштирок этган кўплаб фуқароларга тадбир доирасида ҳудудий адлия органлари ва адлия бўлимлари ходимлари ҳамда нотариуслар ва адвокатлар томонидан бепул ҳуқуқий маслаҳатлар берилди. Мухбирларимиз томонидан ушбу жараён қандай кечганлигига оид репортажлар тайёрланди.ъ
Муҳаммадали АБДУҚУНДУЗОВ,
Ўзбекистон ва Қорақалпоғистон
Республикаси халқ артисти:
— Фақат биргина йўл — қонун ва адолат йўлигина инсонни адаштирмайди. Бугунги тадбир ана шу ақидани ҳар бир юртдошимизнинг онгу шуурига сингдириш учун ўтказилаяпти. Адлия ходимларининг нияти жуда ҳам улуғ, мақсадлари катта. Барака топишсин. Қонун ҳимоясида бўлишинг учун сен уни билишинг, ўзинг унга бағир очишинг керак. Шундагина ҳаётда ҳеч нарсадан чўчимай яшайсан, ишингда унум бўлади. Бу каби тадбирлар бориб-бориб янада улкан сайилларга айланишига ишонаман. Адлия ходимлари энг тўғри йўлни танлашибди.
Нигора АҲМАДБОЕВА,
Олмазор тумани:
— Очиғи, ҳуқуқий маслаҳатга катта эҳтиёжим бор эди. Келин бўлиб тушган уйимда 21 йилдан буён пропискада тураман. Лекин айрим сабабларга кўра турмуш ўртоғим билан ажрашганмиз. Икки нафар фарзандимиз бор. Мени шу уйга кириб яшашим мумкинми, деган савол ўйлантирарди. Бугун “Ҳуқуқий билимлар куни”да адвокатдан бепул ҳуқуқий маслаҳат олдим. У менга ушбу масалада судга мурожаат қилишим зарурлигини тушунтирди. Айтмоқчиманки, биз аёллар табиатан бироз тортинчоқроқ бўламиз. Мен каби айрим аёллар ҳаётида дуч келган муаммоларга ечим топиш учун қайси идорага боришни ҳам билмайди. Бундай тадбирлар ҳуқуқ идоралари ходимларини халқ билан яқинлаштиради, деб ўйлайман.
Азиза Турсунбоева,
Тошкент тиббиёт академияси
3-босқич талабаси:
— Флешмоб жуда кўтаринки руҳда ўтаяпти. Бизга Адлия вазирлиги томонидан чоп этилган “Ҳаётий муҳим масалалар бўйича ҳуқуқий қўлланма” совға қилинди. Тўғриси, яна бир навбатдаги зерикарли тарғиботдирда бу ҳам, деб ўйладим. Лекин китобчани варақлаб бу китоб нафақат менда, балки барча юртдошларимизнинг уйида китоб жавонида туриши кераклигини тушундим.
Асила Фармонова,
энг ёш иштирокчи, 6 ёш:
— Дадам ҳар бир бола ҳуқуқларини ёшлигиданоқ ўрганиши керак, деб мени шу ерга олиб келди. Ҳуқуқий тестларни ишлаб, юз фоизлик натижани қўлга киритдим. Менга Адлия вазирлигидан совға беришди. Концертлар ўтказилаяпти. Тадбир жуда қизиқарли ўтаяпти.
Зокир Очилдиев,
сўз устаси:
— Ҳуқуқий билимлар нафақат қизиқчиларга ёки актёрларга, бирон тор доира вакилларига эмас, балки юраги уриб турган ҳар бир инсонга зарур. Чунки қўрқоқлик, ўз қобиғига ўралиб қолиш, ноҳақликка учраганда ҳам гапиролмаслик, қўлидан келадиган бирон ишни қандай бажаришни билмаслик, буларнинг барчаси ҳуқуқий билимларнинг етишмаслиги оқибатида келиб чиқади. Ҳуқуқини билган инсон довюрак бўлади. “Тарихни билмай туриб келажак қуриб бўлмайди”, дейишади. Мен шунга қўшимча қилиб айтган бўлардим: “Ҳуқуқни билмай туриб ҳеч нарса қилиб бўлмайди”.
Усмон Арзиев,
Навоий вилояти:
— Мени Тошкент шаҳридан уй сотиб олинганда фуқаронинг пропискага қўйилиши билан боғлиқ масала жуда қизиқтирарди. Бу масалада нотариусга мурожаат қилиш учун борганман. Аммо бу ерда навбат кутиб-кутиб қайтиб кетганман. Бугун нотариуснинг ўзи бизга ҳуқуқий маслаҳат бериш учун келибди. Нотариус менга Тошкент шаҳридан уй олиш тартибини тушунтирди ва бунинг қонуний асослари билан таништирди. Шу билан бирга уй сотиб олаётганимда шартнома шартларини диққат билан ўрганиб чиқишим кераклигини айтди. Қани эди бундай тадбирлар тез-тез ўтказилса. Одамларга енгиллик бўларми-ди?
Зулфия Муродмусаева
Юнусобод тумани, 72 ёш:
— Ҳуқуқий саволлар жуда кўп. Аммо уларга жавоб топиш учун ҳуқуқшуносларнинг ёнига боришга юрак дов бермасди. Чунки уларни жуда димоғдор, деб ўйлардим. Шу билан бирга ортиқча чиқим ҳам чўнтакни тешиб ўтарди. Лекин бугунги тадбирдан кейин фикрим ўзгарди. Ҳуқуқшунослар ҳам одамларга яқинлашишга, уларнинг дардини тинглашга бел боғлабди. Хўжакўрсинга эмас, аксинча, халққа енгиллик бўлиши учун амалий ҳаракатлар қилиняпти. Буни бугун ўз кўзимиз билан кўрдик, гувоҳи бўлдик.
— Фуқаролар томонидан энг кўп сўралган ҳуқуқий тушунтиришлар мерос ҳамда васиятнмоларни расмийлаштириш, Тошкент шаҳрида доимий рўйхатда туриб уй-жой олиш, вақтинча пропискада туриб ишга жойлашиш масаласи, уй олди-сотди шартномаларини расмийлаштириш, нотариал идораларида кўрсатиладиган хизматлар учун давлат божлари хусусида бўлди, — дейди Олмазор туман давлат нотариал идораси нотариуси ёрдамчиси Азиза Ҳабиб. — Демак, ушбу йўналишларда тарғибот ишларини кучайтиришимиз керак экан, деган хулосага келдик.
Тадбир давомида фуқароларга Адлия вазирлиги томонидан минимал талаблар асосида ишлаб чиқилган ҳамда аҳоли билиши лозим бўлган уй-жой, оила, солиқ, банк, тадбиркорлик, ер, меҳнат ва таълим қонунчилигига оид, ижтимоий таъминот ва ижтимоий суғурта билан боғлиқ муносабатлар, истеъмолчиларнинг ҳуқуқларини ҳимоя қилиш ва бошқа соҳалардаги асосий ҳуқуқий масала ҳамда тушунчаларни ўзида жамлаган
20 000 дан ортиқ “Ҳаётий муҳим масалалар бўйича ҳуқуқий қўлланма” ҳамда ҳуқуқий флаерлар бепул тарқатилди.
Шунингдек, фуқароларни ҳуқуқий билимларга қизиқтириш ҳамда уларнинг ҳуқуқий саводхонлигини оширишни рағбатлантириш учун тадбирлар доирасида танлов-тестлар, викториналар, ҳуқуқий тарғиботга доир бошқа акциялар ва турли танловлар ташкил этилди.
Хусусан, фуқаролар томонидан етмиш мингдан ортиқ ҳуқуқий тестлар ишланиб, фаол иштирокчилар эсдалик совғалари билан тақдирландилар.
Дилфуза ЭРГАШЕВА,
“Инсон ва қонун” мухбири