Кшталт Слова. Паэтычны Вечар #4. Выступоўцы. Частка 1.
Каб азнаёміць вас з выступоўцамі Паэтычнага Вечара #4, мы запыталіся ў іх наконт жыцьцёва важных пытаньняў, а таксама папрасілі пагадаць на альбому "Сьвяты Вечар", каб даведацца ня толькі сьвядомыя адказы, але й анты-сьвядомыя.
Юрка Мельнікаў
Дзень пачынаўся з пажару, пачуццяў бясконцай трывогі І гора, што душыць цяжарам, Глядзіць на мяне з-пад падлогі.
Гэтыя вуліцы брэшуць! За кутом не чакае спагада! Там паўстае незалежнасць Праз узорнасць вайсковых парадаў!
Гэтыя вуліцы брэшуць! Спевамі рэек трамвайных. Не пакідаючы межаў У сценах хаваюцца тайны.
Як праліваецца кроў, Як сэрца дрыжыць пад прымусам, Як бацька з дому сышоў І ніколі ўжо не вярнуўся
З болем гучаць адгалоссі Падзеяў мінулых гадоў. Тое, што адбылося Не мусіла здарыцца зноў.
Знакі бяды зіхацяць Новым жыццём у труне, Клічуць, як родная маці, Дзесьці чакаюць мяне.
1. Чаму будзе прысьвечаны твой выступ?
— Мой выступ будзе прысвечаны шаноўным падпісчыкам Кшталт.Слова і ўсім тым, хто знайшоў у сабе сілы выйсці з дому ў нядзелю.
2. Хто ты з калядных вобразаў?
— Няхай будзе дзед. Здаецца, што з кожным годам усё часцей адчуваю сябе дзедам. Ашалелым, забыўшым прыняць таблеткі дзедам.
3. Гаданьне па альбому "Сьвяты Вечар". Мы папрасілі Юрку задаць пытаньне сусьвету, а потым напісаць песьню і радок. Вось што атрымалася:
Пытаньне: "Чаму мне так сорамна?"
Адказ: "Лай-лай, ла-лай-ла-лай, Мiнyла дзьве тысячы год."
Сац. Сеткі Паэта: t.me/i_t_d_i_t_p
Яраслаў Кірвель
Перакопана ўся Варшава Перакопана душа мая Дакапаўся да Новага свята скрозь трамвайна-зламаны кайдан.
Усё часцей над/пад Панятышчакам Вісла - нібы Нёман спявае. Чапскі, Вех і КірвЕль на Kciutach rockавое віно каштавалі.
Прага-Поўнач Нібы стала роднай. Вуліца-сталь і вуліца-міт Сустракаюць на Вінклю.
Сустракаю над Віслай світанак Мяне чакаюць твае Найпрыгажэйшы свет і дні Буду сніць Каляровыя сны,
Перакопана ўся Варшава І разкопана душа мая. Начапіў ліхтар Божага цела; Брыгадзір будоўлі цяпер я.
1. Чаму будзе прысьвечаны твой выступ?
— Пра фарбы, грудзі й запеканкі.
2. Хто ты з калядных вобразаў?
— Я мядзьведзь! Я заўсёды хачу есьць.
3. Гаданьне па альбому "Сьвяты Вечар". Мы папрасілі Яраслава задаць пытаньне сусьвету, а потым напісаць песьню і радок. Вось што атрымалася:
Пытаньне: "Калі я паеду над возера?"
Адказ: "Шчодры вечар добрым людзям! Сьвяты вечар добрым людзям!"
Сац. Сеткі Паэта: instagram.com/yar.vel
Дар'я Бялькевіч
Бурбалкі ад дажджу плывуць ўздоўж тратуара Хочацца выбрацца з вечнага трауру Перастаць капаць з дахаў Якія едуць, пакуль я сяджу ў грамадскім транспарце
Кіроўца тралейбуса не адрывае вачэй ад дарогі, даючы рэшту, лічыць манеты навобмацак, і не памыляецца. Прыкладна так я ўяўляю сабе Бога
Мы едзем дадому напаўпустыя
Наступны прыпынак таварная
А нам няма чаго прадаваць
Бо самім амаль нічога не засталося
Толькі квіток у светлую будучыню.
1. Чаму будзе прысьвечаны твой выступ?
— Усім добрым людзям, якія прыйдуць на "Кшталт" 14 снежня.
2. Хто ты з калядных вобразаў?
3. Гаданьне па альбому "Сьвяты Вечар". Мы папрасілі Дар'ю задаць пытаньне сусьвету, а потым напісаць песьню і радок. Вось што атрымалася:
Пытаньне: "Які будзе 2026 год для мяне?"
Адказ: "На жаль калядная пара (На жаль!) Наступнай зьменіцца парою. (Зьменіцца!) І хопіць нам на год сьвятла, (Хопіць!) Сьвятла каляднага настрою."
Сац. Сеткі Паэткі: instagram.com/darya.bialkevich/