“БИР ДОНА МИХ”
Ассалому алейкум ҳурматли Лидерлар канали аъзолари. Бугун сизларга навбатдаги “ҲАММА ЎҚИШИ ШАРТ” рубрикамизнинг №10 сонини тақдим этаман.
Навбатдаги рубрикамиз номи “БИР ДОНА МИХ”. Жуда қизиқ мавзу. 2 йил давомида мамлакатимизда ислоҳотлар жадаллик билан амалга ошмоқда. Ўзбекистон бугун улкан марраларни забт этишни ўз олдига мақсад қилиб қўйган. Булар, 2030 йилга келиб Глобал инновацион индекс рейтинги бўйича жаҳоннинг 50 илғор мамлакати қаторига кириш. Шунингдек, Рақамли иқтисодиётни ривожлантириш, ялпи ички маҳсулот кўрсаткичларини аҳоли жон бошига икки баравар ошириш кабилардир.
Албатта, ушбу мақсадларга эришишимиз учун, энг аввало, барчамиздан бирдай фойдали меҳнат талаб этилади. 33 миллион аҳолидан фаолликни, Ватани учун ўзининг самарали меҳнатини аямасликни талаб этади. “Сен менга, мен сенга тегмайман” каби иш юритиш, ўйлайманки, айнан бугунги кунда энг салбий одатлардан биридир. Ушбу ислоҳотларнинг бир қисми бўлмаслик, унда фаол қатнашмаслик ва ўз ҳиссангни қўшмаслик, ўйлайманки, энг катта хатолик бўлади. Ёки томошабин бўлиб бир четда туриш, бу давлатнинг вазифаси, бу Президентнинг иши ёки ҳокимнинг бурчи деб маҳалласидаги битта лампочкани алмаштирмай, боқиманда бўлиш бугун одат тусига кириб бормоқда. Агар юртимизни катта бир кема деб оладиган бўлсак, унинг олдинга сузиши, яъни кўзлаган манзилига етиб бориши учун ҳар биримиз шу кемани бир бўлаги ёки эшкаги сифатида ҳаракат қилишимиз лозим. Барчамиз меҳнат қилсаккина, мақсадга эришишимиз мумкин, агар айримгина инсонларнинг ҳаракатини томоша қилиб кузатсак, ҳеч қандай натижага эришмаймиз. Ҳар биримизга шижоат ва ишонч керак.
1962 йил Америка президенти Джон Кеннеди NASA ташкилотига ташриф буюради. У ерда берилиб пол юваётган бир фаррош аёл ёнига келиб, “мен Джон Кеннедиман, сиз бу ерда нима қилаяпсиз?” деб савол берганида, фаррош аёл унга “Жаноб президент, мен инсонни ойга учиб, у ерга қадам қўйиши учун хизмат қилаяпман”, деб жавоб берган экан. Агар биз ҳам ҳар куни ишлаётганимизда “мен бугун юртимни 2030 йилда топ-50 талик давлатлар қаторига киришига хизмат қилаяпман”, деб ёндашсак, ўйлайманки, қилаётган ишимизнинг сифати ва самарадорлиги кескин ошади.
Демак, “Бир дона мих” ҳикоясини сизларга тақдим этаман:
БИР ДОНА МИХ
ПРУССИЯЛИК ОНАЛАР АЛЛАСИ
Қадимий Пруссия.
Она алла айтмоқда:
«Ватанга ёв бостириб кирди.
Икки қўшин бир-бирин қирди.
Ногаҳон ҳалок бўлди прусслар саркардаси,
Оқибатда пароканда бўлди Прусс лашкари,
Ёвга мағлуб бўлиб қочди жанггоҳдан.
Шаҳар забт этилди.
Таҳқирланди бола-ю қари…
Нега бундай бўлди?!
Сабабини топайлик:
Нега шаҳар душман қўлига ўтди?
Чунки қўшин енгилди…
Қўшин нега енгилди?
Чунки саркарда ҳалок бўлди…
Саркарда қандай ҳалок бўлди?
Отдан йиқилиб…
Отдан нега йиқилади?!
Чунки отнинг тақасини қоқаётганда
Тақачига бир дона мих етмай қолганди…
Бир дона мих деб бутун бир халқ қул бўлди…»
Битта нотўғри қўйилган ғишт, битта чириган ёғоч эртага бутун бир иморатнинг қулаб тушишига сабабчи бўлиши мумкин.
Ҳар куни ҳар биримиз ушбу михни қоқамиз. Фақат бир-биримизни алдаб, кўзбўямачилик қилиб ёки боқимандаликка берилиб, ушбу михни қоқиш эсдан чиқмаса бўлди. Бўлмаса, бизнинг фарзандларимизга Пруссиялик оналар алласи айтилади.
Ўзбекистон Республикаси Президенти Шавкат Мирзиёев таъкидлаганидек, “Биринчи – давлат раҳбари – Президентдан бошлаб барча бўғиндаги раҳбарларнинг якуний натижалар учун шахсий жавобгарлиги. Иккинчи – ҳамма соҳада аниқ тартиб ва қаттиқ интизомни таъминлашимиз даркор. Яна бир бор таъкидлайман, ишни биргаликда бажарамиз, натижа учун эса ҳар биримиз шахсан жавоб берамиз”.
Ҳар биримизга Оллоҳим инсоф берсин,
михни қоқаётганда... Хулоса сиздан.
Тайёрлади:
Отабек Хасанов
Сиёсий фанлар бўйича PhD доктори