Pozitiv fikrlashni o‘rganishga yordam beruvchi 5 mashq
Ko‘pchilik pozitiv fikrlashning foydasi haqida bir necha bor eshitgan bo‘lsa kerak.
Ammo bu aslida nimani anglatadi?
Va salbiy fikrlardan butunlay qanday qutulish mumkin?
Juda kam odam bu mavzuni chuqur tushunadi.
Ushbu maqolada biz pozitiv fikrlarning afzalliklarini va bunday fikrlashni rivojlantirishga yordam beradigan mashqlarni ko‘rib chiqamiz.
Pozitiv fikrlashning afzalliklari
Pozitiv fikrlash nafaqat insonning ruhiyati va aqliga, balki uning sog‘lig‘iga ham foyda keltiradi. Quyida pozitiv fikrlashning haqiqiy afzalliklari keltirilgan:
· stressga chidamlilik oshadi;
· depressiyaga tushish xavfi kamayadi;
· turli salbiy holatlar bilan tezroq kurashishni o‘rganasiz;
· o‘ziga ishonch paydo bo‘ladi, iroda va motivatsiya kuchayadi;
· vazifalarga yaxshiroq e’tibor qaratib, maqsadlarga erishish osonlashadi.
Ammo bitta muhim shart bor!
Pozitiv fikrlarni o‘z ichingizdan o‘tkazish va ichki holatni boshqarish kerak.
Faqatgina tashqaridan quvnoq ko‘rinish va muvaffaqiyat niqobi ortiga yashirinish yetarli emas.
Chunki ichingizda salbiy fikrlar qaynatilib, ularni sun’iy tabassum bilan bostirish psixosomatik kasalliklarga olib kelishi mumkin.
Shuning uchun ichki holatni, o‘z fikrlaringiz va his-tuyg‘ularingizni qayta ishlash juda muhim. Ichki uyg‘unlik, xotirjamlik va muvozanatga erishganingizda, tashqi ko‘rinishingizda ham baxt va pozitivlikni uchqunlantira boshlaysiz.
Pozitiv fikrlashni rivojlantirish uchun 5 mashq:
O‘zingizni har qanday kichik yutuqlar uchun ham maqtab turing.
Katta g‘alabalar uchun o‘zingizni minnatdorlik bilan maqtab qo‘yish oson, lekin kichik yutuqlarni sezish va muvaffaqiyatsizliklardan yaxshilikni topishni o‘rganish biroz qiyinroq.
Har qanday vaziyatni to‘g‘ri tahlil qilib, uni tajriba va donolikka aylantirish muhimdir.
Har kuni o‘zingizni maqtashingiz mumkin bo‘lgan 5 ta holatni topishga harakat qiling.
Buni yozib borib, kundalik yuritish yanada yaxshi samara beradi.
O‘z ideal kuningizni tasvirlang.
Bu mashq, aslida nimani xohlashingiz va nimalardan qochayotganingizni tushunishga yordam beradi.
O‘z ideal kuningizni tasavvur qiling, muhim lahzalarni o‘ylab chiqing va uni yaqin orada amalga oshirishga harakat qiling.
Keyin o‘sha kunni tahlil qiling, agar biror narsa amalga oshmagan bo‘lsa, yana hamma jihatlarni yozib chiqing va uni hayotga tatbiq eting.
So‘ngra, his qilgan hissiyot va tuyg‘ularingiz haqida o‘ylang.
O‘z ideal kuningizni imkon qadar tez-tez yashashga odatlaning va qisqa vaqt ichida o‘zingizdagi sifatli o‘zgarishlarni ko‘rasiz.
O‘z fikrlaringiz va his-tuyg‘ularingizni boshqarishni o‘rganing.
Salbiy fikrlar va his-tuyg‘ular hayot energiyasini so‘rib oladi.
Ammo bu fikrlar bizning ongimizda tug‘iladi, demak, ularga ta’sir o‘tkazishni o‘rganish mumkin.
Inson har qanday hayotiy vaziyatda o‘z fikrlarini boshqarish va nazorat qilish qobiliyatiga ega, lekin buning uchun mashq qilish kerak.
Bu unchalik qiyin emas.
5 ta pozitiv tomonlarni yozib chiqing.
Bu mashhur metodika bo‘lib, haqiqatan ham samarali.
Siz har qanday voqeada, ayniqsa, eng yomon holatda, 5 ta pozitiv jihatni topishingiz kerak.
Eng umidsiz vaziyatlarda ham o‘zingiz uchun foydali, qalbga yaqin bo‘lgan pozitiv tomonlarni topishingiz mumkinligiga hayron qolasiz.
Shu bilan birga, voqeaga boshqa tomondan qarashni o‘rganasiz, nostandart yechimlar va imkoniyatlarni kashf etasiz.
O‘tmish bilan yarashing.
Ko‘pincha salbiy fikrlar o‘tgan hayotdagi yoqimsiz voqealardan kelib chiqadi.
Inson doimo bu lahzalarni eslaydi, xafa bo‘ladi va o‘z kayfiyatini buzib, kuch va energiyasidan mahrum bo‘ladi.
O‘tmishni qo‘yib yuborishga, eski xafagarchiliklarni kechirishga harakat qiling, hozirgi zamonda yashashni boshlang, o‘zingizni o‘zgartiring va o‘tgan muvaffaqiyatsizliklarning asiriga aylanmang.