«ZUKKO KITOBXON» KO‘RIK-TANLOVINING G‘OLIBLARI ANIQLANDI
Xabaringiz bor, Marhamat tumani hokimi Boburjon Yuldashev tomonidan Yoshlar o‘rtasida kitobxonlik madaniyatini yuksaltirish maqsadida «Zukko Kitobxon» tanlovi e'lon qilingan bo‘lib, yaqinda ushbu tanlovning tuman bosqichlari bo‘lib o‘tdi.
Bugun 28-yanvar kuni Andijon viloyatidagi tuman bosqichlarida g‘olib bo‘lgan kitobxon yoshlar tumanimizdagi «Kelajak nuri» Xalq kutubxonasiga yakuniy final bosqichida o‘zaro bellashish uchun jam bo‘lishdi.
Ko‘rik-tanlovni tuman hokimining o‘rinbosari M.Qurbonov kirish so‘zi bilan ochib, barcha yosh kitobxonlarga omad tiladi.
Shundan so‘ng, tanlovda ishtirok etayotgan yosh kitobxonlar «O‘zbek adabiyoti bilimdoni», «Jahon adabiyoti bilimdoni» hamda «Zukko kitobxon» shartlari asosida og‘zaki savol-javoblar orqali o‘z bilimlarini namoyon etdilar.
Ochiq-oshkora, shaffoflik asosida o‘tkazilgan final bosqichi yakuniga ko‘ra, ko‘rik-tanlovda faxrli 3-o‘rinni Marjona Akramjonova (Bo‘ston tumani), 2-o‘rinni Ma'mura Madaminova (Paxtaobod tumani), 1-o‘rinni esa barcha bosqichlarda eng yuqori natijalarni ko‘rsatib kelayotgan Soliha G‘ulomjonova (Marhamat tumani) qo‘lga kiritdi.
Faxrli o‘rinlarni egallagan kitobxonlar Marhamat tumani hokimi B.Yuldashev tomonidan qimmatbaho sovg‘a va diplomlar bilan taqdirlandi.
Final bosqichiga chiqqan qolgan kitobxonlar ham Marhamat tumani hokimining faxriy yorliq va esdalik sovg‘alari bilan taqdirlandi.
1-o‘rin g‘olibi _ Kitobxon hamda ota-onasiga sayohat uchun Dubayga yo‘llanma;
2-o‘rin g‘olibi _ Kitobxon hamda ota-onasiga sayohat uchun Toshkent, Samarqand, Buxoro va Xiva shaharlariga yo‘llanma;
3-o‘rin g‘olibi _ Qimmatbaho maishiy texnikalari bilan taqdirlandi.
