VILOYAT PROKURORI MARHAMAT TUMANIDA
Hozirgi kunda hududlarni kompleks ijtimoiy-iqtisodiy rivojlantirish, aholining yashash sharoitlarini tubdan yaxshilash, turmush darajasida sezilarli ijobiy oʻzgarishlarga erishish boʻyicha izchil chora-tadbirlar amalga oshirilmoqda.
Shu maqsadda, viloyat prokurori S.Eshquvvatov joriy yilning 20-yanvar kuni Marhamat tumaniga tashrif buyurdi.
Tashrif davomida viloyat prokurori oʻziga biriktirilgan, ogʻir hudud sifatida qayd etilgan, 2-sektor hududidagi Uvaysiy mahalla fuqarolar yigʻinida boʻlib, ushbu hududda amalga oshirilayotgan obodonlashtirish, infratuzilma holatlari va ijtimoiy soha ob'ektlarida olib borilayotgan ishlar bilan tanishdi.
Viloyat prokurori mahallani oʻrganib chiqib, ushbu hududdagi Toshloq-1 koʻchasida yashovchi Oʻsmonov Sanjarbekning xonadonida boʻlib, uning muammolarini tingladi. Fuqaro S.Oʻsmonovning oilaviy sharoiti ogʻirligi sababli unga oziq-ovqat mahsulotlari topshirildi.
Shuningdek, Toshloq-1 koʻchasida yashovchi Mahkamov Mirzajonning yashash xonadoniga kirib, fuqaroning mahalladagi ichimlik suvi oʻz vaqtida kelmayotganligi haqidagi muammosi tinglandi. Ushbu masala tuman «Suvtaʼminoti» korxonasi tomonidan bartaraf etilishi taʼminlandi.
Beshmirza koʻchasida yashovchi Umarova Masturaxon oʻzining sogʻligidagi muammolarni bildirdi va unga viloyat prokurori tashabbusi bilan joriy yilning 21-yanvar kuni ushbu hududda tashkil etilayotgan tibbiy koʻrikdan oʻtishi tavsiya etildi.
Bundan tashqari, viloyat prokurori ushbu hududdagi ijtimoiy soha ob'ekti hisoblangan 25-maktabgacha taʼlim tashkilotida boʻlib, MTMda bolalar uchun yaratilgan sharoitlar, ya'ni, qish mavsumiga tayyorgarlik holati, isitish tizimi va oziq-ovqat ombori bilan tanishdi.
Shuningdek, viloyat prokurori MTMda bolalar sport oʻyingohi qurish lozimligi haqida mutasaddi tashkilot rahbarlariga topshiriq berdi.
Tashrif davomida, Uvaysiy MFYning Toshloq-1 koʻchasidagi 1 dona transformator joriy taʼmirlandi va 0,4 kVa li 900 metr uzunlikda elektr uzatgich havo tarmoqlarida joriy taʼmirlash ishlari amalga oshirildi.
Beshmirza koʻchasining 250 metr qismi shagʻallandi. Uvaysiy MFYda yashovchi 15 ta oilalarga suyultirilgan gaz ballonlar tarqatildi. 6 tonna koʻmir olib kelinib, aholining koʻmirga muhtoj qatlamiga tarqatildi.
Bundan tashqari, hududda yashovchi ehtiyojmand, kam taʼminlangan va moddiy yordamga muhtoj 16 ta oilalar tanlab olinib, ularga 6 xil turdagi (goʻsht, yogʻ, guruch, shakar, un va makaron) oziq-ovqat mahsulotlari tarqatildi.