20 DAN ORTIQ MUROJAAT JOYIDA HAL ETILDI
“Yoshlar daftari”da turgan 15 nafar yoshga Yoshlar ishlari Kattaqo‘rg‘on shahar bo‘limi tomonidan tikuv mashinasi, kalitlar jamlanmasi, payvandlash va avtomobil yuvish uskunasi, elektron arra va boshqa asbob-uskunalar tarqatildi.
Bundan tashqari, shaharning “Go‘zalkent” mahallasida O‘zbekiston Respublikasi Prezidentining Kattaqo‘rg‘on shahridagi Xalq qabulxonasi hamda shahar sektor rahbarlari tomonidan ommaviy sayyor qabul o‘tkazildi. Unda 50 nafardan ortiq fuqaro o‘z yechimini kutayotgan murojaatlari bilan ishtirok etishdi.
Ular tahlil qilinganda uy-joy kadastri, aliment undirish, sud qarorlari ijrosi, kommunal to‘lovlar, “Ayollar daftari”ga kiritish, ichki yo‘llarni ta’mirlash, oilaviy masalalar, ijtimoiy yordamlar va boshqa masalalardan iboratligi ma’lum bo‘lib, qabul davomida mazkur murojaatlarning 20 dan ortig‘i joyida ijobiy hal etildi. Yechimi muddat va mablag‘ talab etadigan murojaatlar mutasaddi tashkilotlarga yo‘naltirilib, ijrosi nazoratga olindi.
Bugun shaharda yoshlarga berilgan imkoniyatlardan unumli foydalanib, yuqori natijalarga erishayotgan yoshlar ham talaygina. Ulardan biri ikki karra Osiyo va Jahon chempioni Sevara Mamatovadir. Yurtimiz sharafini himoya qilib kelayotgan yosh bokschi qizning g‘alabasi munosabati bilan Kattaqo‘rg‘onda uchrashuv hamda taqdirlash tadbiri o‘tkazilib, uchrashuv mobaynida sportga qiziquvchi yoshlar o‘zlarini qiziqtirgan savollarga javob olishdi.