Musiqa fanida avtofokus metodi orqali dars o‘tish

Sinfdagi zerikarli dars muhitining birinchi sabablaridan biri bu o‘quvchilarning diqqati pastligi, darsga befarqligi va dangasaligidir. Bunday vaziyatda asosiy mas’uliyat o‘qituvchining bo‘ynida bo‘ladi. O‘qituvchi sifatida o‘quvchilarning qiziqishini oshirish va ularni faol ishtirok etishga undash juda muhimdir.

Bugungi Avtofokus metodi orqali o‘quvchilarda ushbu muammolarni osonlikcha hal qila olasiz. Ushbu metod o‘quvchilarning ixtiyoriy tarzda darsga e’tibor qaratishlarini ta’minlaydi, bu esa musiqa darslarida ham juda foydali.

Avtofokus metodining asosiy mazmuni

Ushbu metodni qo‘llashda sizga skripka kaliti va bass kaliti yozilgan kartochkalar kerak bo‘ladi. Sinfdagi o‘quvchilarning har biriga ushbu kartochkalarni tarqatib chiqasiz. Albatta, buni dars boshida amalga oshirasiz. Ushbu kartochkalar o‘quvchilarni dars davomida faol bo‘lishga undaydi va ularni musiqiy asboblar bilan bog‘liq savollarga javob berishga tayyorlaydi.

So‘ngra dars mobaynida to‘satdan savol berib qolasiz. Masalan, musiqiy terminlar yoki asboblar haqida savollar bering. Savollar quyidagicha:

• Skripka kaliti yozilgan kartochkasi borlar o‘rnidan tursin va mavzu yuzasidan biror savolni turgan o‘quvchilardan istalgan biriga berasiz. Javob topa olishsa, ushbu kartochkasi bor guruhga bir bal qo‘shib qo‘yasiz. Bu jarayon o‘quvchilarning musiqaga bo‘lgan qiziqishini oshiradi va ularni o‘z bilimlarini ko‘rsatishga undaydi.
• Keyin yana dars davomida to‘satdan bass kaliti yozilgan kartochkasi borlar o‘rnidan tursin deysiz va yuqoridagi kabi, bass kaliti yozilgan kartochkasi bor o‘quvchilardan istalganiga mavzu yuzasidan savol berasiz. Shu tartibda darsning so‘ngigacha bir necha marotaba ushbu usulni qo‘llaysiz.

Natijada, dars mobaynida barcha o‘quvchilar hushyorlikda bo‘lishadi. Bu usul o‘quvchilarni harakatga keltirish, ya’ni o‘rinlaridan turish jarayonida darsga bo‘lgan qiziqish signallarini orttiradi. Ular musiqiy mavzularda o‘z fikrlarini bildiradi va bir-biri bilan muloqot qiladi, bu esa darsni yanada qiziqarli qiladi.

Qolaversa, istalgan o‘quvchiga beriluvchi savollar barchani mavzuni diqqat bilan eshitishga majbur qiladi. Bu jarayonda bellashuv ham ketmoqda! O‘quvchilar o‘zaro bellashish orqali ixtiyoriy darsga diqqatlarini qaratishadi. Ya’ni siz o‘quvchilarda Avtofokus muhitini yaratgan bo‘lasiz.

Yuqoridagi usullarni albatta qo‘llab ko‘ring! Samarali o'qituvchi bo'lish juda qiyin, chunki har bir o‘quvchi o'ziga xosdir, ammo o'qitish strategiyasidan foydalangan holda o'z sinfingizni o‘quvchilar uchun dinamik va motivatsion muhitga aylantirishingiz mumkin! Bu, musiqa fanida o‘quvchilarning diqqatini oshirish va musiqiy bilimlarini yanada kengaytirish uchun ajoyib imkoniyatdir. O‘quvchilarning har biri o‘z iqtidorini namoyish etishga va o‘z musiqiy qobiliyatlarini rivojlantirishga imkoniyatga ega bo‘ladi.