150 БАЙРОҚ КЎТАРГАН 100 НАФАР ОТЛИҚ ЙЎЛГА ЧИҚДИ

• Амир Темур майдони. Буюк саркарданинг маҳобатли ҳайкали жойлашган майдон атрофида 150 нафар отлиқ жам. Улар боши узра юртимиз ғурури, ифтихори, истиқлолимизнинг ёрқин тимсоли - Ўзбекистон байроғини баланд тутган.

Кеча 100 та байроқни ҳилпиратиб бораётган бу отлиқ Ислом Каримов кўчаси бўйлаб Халқлар дўстлиги саройи томон йўл олди. Ушбу ажойиб тадбир Ўзбекистон Республикаси Давлат байроғи қабул қилинганининг 28 йиллиги муносабати билан ташкил этилди. 

Она табиат ҳам қуёшли, осмон - мусаффо, худди байроғимизнинг мовий рангидай. От устида байроғимизни мардонавор тутиб бораётган юрт ўғлонларининг юз-кўзида ярқ этиб турган шижоат, жасорат, жўшқинлик миллий рамзимизнинг қизил чизиқларидаги рамзий маънолар билан уйғун. Миллионлаб ўзбек халқининг ўзлиги, Ватанга чексиз муҳаббатни намойиш этиб бораётган отлиқлар манзили эса байроғимиз оқ йўлларидай оқ бўлсин, равон бўлсин. Соҳибқирон бобомиз Амир Темур ҳам ўзининг алп ва жасур издошларига оқ йўл тилаётгандек гўё.

Айни шу дақиқаларда 100 та байроқ кўтарган веломарафон иштирокчилари ҳаракатига ҳам старт берилди. Улар ҳам Яшнобод тумани “Ашхобод” боғидан Махтумқули, Абдулла Қодирий, Пахтакор, Ислом Каримов кўчалари бўйлаб Халқлар дўстлиги саройи томон юради.

Феруза МИРЗАКОМИЛОВА,

Муҳаммад АМИН (Фото),

ЎзА