Инвесторлар қонун ҳимоясида
Ўзбекистон Республикаси мустақилликка эришган пайтдан бошлаб инвестиция ва ишбилармонлик муҳитини яхшилашга, мамлакатнинг инвестициявий жозибадорлигини оширишга ҳамда хорижий ва маҳаллий инвесторларнинг манфаатларини ҳимоя қилиш борасидаги ҳуқуқий механизмларни такомиллаштиришга қаратилган чора-тадбирларга алоҳида эътибор қаратиб келмоқда. Бу борада кейинги вақтларда инвесторларни ҳуқуқ ва манфаатларини ҳимоя қилиш, инвесторни фойда олиш мақсадида инвестиция фаолияти объектларига ўзининг маблағларини ёхуд жалб қилинган бошқа инвестиция ресурсларини инвестиция қилиш фаолиятини рағбатлантирувчи қонун ҳужжатлари қабул қилинди.
Навоий вилоят суди, Навоий вилояти маъмурий суди ҳамда Навоий вилоят давлат активларини бошқариш бошқармаси билан ҳамкорликда, Корхоналарни соғломлаштириш ва хусусийлаштириш клиникасининг маъмурий биносида “Инвестор-қонун ҳимоясида” мавзусида чет эллик ва маҳаллий инвесторлар билан учрашув бўлиб ўтди. Мазкур учрашувда инвесторларга инвестициявий низоларни судларда кўриш жараёнида инвесторга берилган қонуний имтиёзлар, инвестициявий низолар бўйича ишларнинг судловга тааллуқлилиги масаласи, чет эл ва маҳаллий инвесторларнинг Ўзбекистон Республикаси қонунчилигида уларга берилган ҳуқуқий кафолатлар хусусида тушунчалар берилди.
Жумладан, давлатимиз раҳбарининг 2020 йил 24 июлда қабул қилинган “Судлар фаолиятини янада такомиллаштириш ва одил судлов самарадорлигини оширишга доир қўшимча чора-тадбирлар тўғрисида”ги Фармонига асосан амалдаги қонунчиликка ўзгартириш киритилиб, энди йирик инвесторнинг хоҳишига кўра, у билан боғлиқ инвестициявий низолар бевосита Олий суднинг инвестициявий низоларни ҳамда рақобатга оид ишларни кўриш бўйича судлов таркиби томонидан кўрилиши, қолган инвестициявий низолар инвесторларнинг хоҳишига кўра, Қорақалпоғистон Республикаси, вилоятлар ва Тошкент шаҳар суди томонидан биринчи инстанция суди сифатида кўрилиши белгиланганлигини, шу билан бирга, процессуал қонунчиликка алоҳида инвестициявий низоларга бағишланган алоҳида модда киритилиб, мазкур моддада инвестициявий низоларга аниқ тариф бериб ўтилганлиги, шу жумладан қонунчилигимизда белгиланган инвестиция фаолиятининг асосий принциплари қонунийлик, ошкоралик ва очиқлик, инвестиция фаолиятини амалга оширишда эркинлик, адолатлилик ва инвестиция фаолияти субъектларининг тенглиги, инвесторларга нисбатан камситишга йўл қўймаслик, инвесторларнинг виждонлилиги презумпцияларини амалга ошириш учун барча қонуний механизмлар яратилганлиги хусусида тўхталиб ўтилди.
Турғунбой Қаҳҳоров
Навоий вилоят судининг
судьяси