Мактабгача таълим бўлимида тарғибот тадбири ўтказилди
Аввало шуни қайд этиш керакки, Конституциямизнинг
37-моддасида ҳар бир шахс меҳнат қилиш, эркин касб танлаш, адолатли меҳнат шароитларида ишлаш ва қонунда кўрсатилган тартибда ишсизликдан ҳимояланиш ҳуқуқига эга эканлиги мустаҳкамлаб қўйилган.
Иш берувчи ва ходим ўртасидаги меҳнатга оид ҳуқуқий муносабатларни кенг оммага тарғиб қилиш мақсадида
Учқудуқ тумани мактабгача таълим бўлими биносида фуқаролик ишлари бўйича Учқудуқ туман суди раиси Б.Шерматов, Учқудуқ туман иқтисодий суди раиси Х.Турсунов, жиноят ишлари бўйича Учқудуқ туман суди раиси А.Қурбонов ҳамда Учқудуқ туман адлия бўлими бошлиғи М.Умерзаковлар ташаббуси билан тарғибот тадбири ташкил этилди.
Тадбирда туман суди раислари томонидан фуқароларининг меҳнатга оид конституциявий ҳуқуқлари амалдаги меҳнат қонунчилигида ҳам ўз ифодасини топганлиги, мазкур ҳуқуқий механизмлар орасида меҳнат шартномасини тузиш, ўзгартириш ва бекор қилиш билан боғлиқ муносабатлар алоҳида ўрин эгаллашини, амалдаги қонунларимизга кўра, ҳеч ким асоссиз равишда ишдан бўшатилиши мумкин эмаслиги, аммо бунга қарамай фаолиятда меҳнат низолари учраб туришини, бунинг асосий сабаби сифатида иш берувчи ёки ходимнинг меҳнат қонунчилигига тўлиқ амал қилмаслиги, меҳнат шартномаси тўғри тузилмагани ва иш берувчи ҳамда ходимларнинг ўз ҳуқуқ ва мажбуриятларини тўғри тушуниб етмаслиги, бу муаммони бартараф этиш учун албатта, меҳнат қонунчилигини кенг тарғиб этиш лозимлигини, меҳнат шартномаси — ходим билан иш берувчи ўртасида муайян мутахассислик, малака, лавозим бўйича ишни ички меҳнат тартибига бўйсунган ҳолда тарафлар келишуви, шунингдек, меҳнат тўғрисидаги қонунлар ва бошқа норматив ҳужжатлар билан белгиланган шартлар асосида ҳақ эвазига бажариш ҳақидаги келишув эканлиги, Қонунчиликка мувофиқ меҳнат шартномасининг мазмуни тарафлар келишуви бўйича шунингдек, меҳнат тўғрисидаги қонунлар ва бошқа норматив-ҳуқуқий ҳужжатлар билан белгиланлиги ҳақида гапириб ўтди.
Тадбир давомида иштирокчилар томонидан берилган меҳнатга оид ҳуқуқий муносабатлар бўйича саволларга суд раислари томонидан жавоблар берилди.